Birgir Grímsson iðnhönnuður og eigandi V6 Sprotahúss er formaður félags um foreldrajafnrétti. Birgir hefur lengi barist fyrir réttindum skilnaðarbarna eftir að hafa kynnst því af eigin raun eftir skilnað hve staða þeirra er bágborin. Hann hefur ríka réttlætiskennd og hefur mikla þörf fyrir að bæta það sem er brotið í samfélaginu.
Birgir tók við formannsstöðu félags um foreldrajafnrétti árið 2014 en meginstefna félagsins er að tryggja jafnrétti foreldra bæði til forsjár og umönnunar, með hagsmuni barnsins að leiðarljósi.

Birgir Grímsson er fæddur í Reykjavík 26. apríl árið 1973. Foreldrar hans eru þau Sigríður Ágústsdóttir skrifstofukona og Grímur Heiðar Brandsson skriftvélavirki. Sigríður lést árið 2013. Systkini Birgis eru þau Nína Margrét fædd 1965 og Páll fæddur 1968.
„Ég bjó fyrstu árin á Háaleitisbraut eða til sex ára aldurs en þá fluttum við yfir í Hvassaleitið. Á þessum tíma var einungis búið að steypa upp Hús verslunarinnar en restin af Kringlusvæðinu var mói, þar lék ég mér oft þegar ég var lítill.“

Fór utan í nám
„Skólaskylduna kláraði ég í Álftamýrarskóla og stúdentinn frá MH. Ég hafði alltaf stefnt að því að fara utan í í nám. Ég valdi iðnhönnun og til að undirbúa mig fór ég í húsasmíðina hér heima og kláraði sveinsprófið.
Ég sótti um nám í Danmörku og fann þar íbúð fyrir mig og kærustuna mína. Ég komst ekki inn í skólann um haustið svo ég ákvað að fara á námskeið í Árósum. Það er eitt af því eftirminnilegasta sem ég gerði þarna því þar kynntist ég Dönunum, lærði tungumálið og á danska menningu.“

Frumkvöðlabransinn á vel við mig
„Mér var bent á skóla á Jótlandi, Design Seminariet í Hojer sem ég ákvað að fara í.
Á þessum tíma ákváðum ég og kærasta mín að gifta okkur og eignuðumst við okkar fyrsta barn í framhaldi af því, dóttirin Arney Íris fæddist 2001.
Eftir að námi mínu lauk 2003 fluttum við til Svíþjóðar og um svipað leyti vann ég í samkeppni um viðskiptaáætlanir á Íslandi. Þarna sá ég að frumkvöðlabransinn átti vel við mig. Árið 2004 eignuðumst við svo soninn Hrafnar Ísak.
Á síðasta ári mínu í skólanum ákváðum við hjónin að skilja, ég var þá búinn að finna nám í frumkvöðlafræði í Malmö sem mér fannst mjög spennandi.“

Með fimm háskólagráður
„Konan fór heim til Íslands með börnin og ég varð því að fara á milli landa á meðan ég lagði stund á námið til að geta verið með börnunum mínum.“
Ég spyr Birgi hvað hann hafi lokið við margar háskólagráður? „Ég spaugast oft með það að ég sé búinn að ljúka fimm háskólagráðum rétt eins og frægur karakter í Næturvaktinni hélt fram forðum og finnst það alltaf jafn fyndið, en það er staðreynd.
Eftir að ég kom heim, stofnaði ég heimasíðuna Frumkvöðull.com þar sem ég bauð upp á ráðgjöf.“

Mikil lukka að kynnast Björgu
„Ég kynntist konunni minni, Björgu Helgadóttur, árið 2007. Hún vinnur sem verkefnastjóri hjá Umhverfis- og skipulagssviði Reykjavíkurborgar. Það var mér og börnunum mikil lukka að fá Björgu inn í líf okkar. Við keyptum okkur hús í Mosfellsbæ og giftum okkur árið 2013.“

Stofnaði fyrirtæki
„Árið 2010 stofnaði ég ásamt félögum mínum V6 Sprotahús hér í Mosfellsbæ. Markmið okkar var að bjóða upp á ráðgjöf og þjónustu fyrir nýstofnuð fyrirtæki. Svona verkefni er þess eðlis að það nær ekki að lifa nema með stuðningi ríkis eða sveitarfélags en þann stuðning þraut á endanum. Ég keypti félaga mína út og flutti fyrirtækið heim til mín. Ég býð enn upp á ráðgjöf og vinn einnig að eigin hönnunarverkefnum.
Ég tek líka þátt í málefnum sem eru mér hugleikin. Ég stofnaði ásamt öðrum Stjórnarskrárfélagið árið 2011. Þessi hópur fólks telur grundvallarþörf á að Ísland fái notið nýrrar og betri stjórnarskrár því það sé undirstaðan að því að gera þetta samfélag betra.“

Réttarfarsleg staða barna er bágborin
„Ég gekk til liðs við Foreldrajafnrétti árið 2006 eða eftir að ég skildi. Ég sá að réttarfarsleg staða barna eftir skilnað er afar bágborin og alvarleg réttindabrot eru framin á hverjum degi.
Ég byrjaði sem aðstoðarmaður í stjórn en tók við formennsku 2014. Við höfum náð að koma þessum málflokki á kortið í samfélaginu þótt margt sé enn óleyst. Við finnum fyrir meiri áhuga frá kvenfólki, sem upplifir þessa ranglátu stöðu sem skilnaðarbörn eru í.
Við heyrum ýmsa vinkla þar sem fólk almennt áttar sig ekki á hlutunum og sýnir hversu víðtæk áhrif það hefur ef ekki er gætt að réttindum barnanna eftir skilnað, sambúðarslit, eða þeirra barna sem eru rangfeðruð.
Við erum t.d. með eina ömmu í stjórn sem vill leggja sitt af mörkum en hún upplifði að réttur ömmubarnsins til hennar var ekki virtur, óháð deilum foreldranna.“

Mæður borga dagsektir
„Við erum með stjúpmæður í stjórn sem sjá óréttlætið sem börn maka þeirra mæta, gagnvart fyrri barnsmæðrum. Við höfum heyrt sögur af mæðrum sem vilja að feður sinni börnum sínum en skilja með engum hætti ábyrgð sína og taka til sín það verkefni sem felst í því að eiga börn.
Börn lenda í tilfinningaklemmu vegna tálmunarmála þar sem annað foreldrið heldur börnum frá hinu foreldrinu með því að beita andlegu ofbeldi og oft líka brjóta á lögum og rétti barna samkvæmt lögformlegum samningum.
Mæður borga dagsektir svo mánuðum skiptir bara til að koma í veg fyrir að börn fái að hitta feður sína, þótt ekki sé neitt sýnt fram á að þeir séu á einhvern hátt ekki hæfir til þeirrar ábyrgðar.“

Viljum stofna fjölskyldudómstól
„Við viljum að stofnaður verði sérstakur fjölskyldudómstóll. Sá dómstóll væri sérhæfður í öllum félagslegum og fjölskyldulegum málefnum í samfélaginu og hefði á sínum snærum sérhæft starfsfólk, sálfræðinga og félagsfræðinga.
Þessi dómstóll gæti brugðist við innan viku ef beiðni kemur um úrskurð vegna brota og komið til aðstoðar með sérfræðiaðstoð eða aðgerð sem tekur mið af að koma í veg fyrir átök, brot eða óásættanlegar aðstæður.
Á þann hátt væri hægt að koma í veg fyrir flest vandamál án þess að þau verði að óleysanlegum vandamálum með slæmum afleiðingum fyrir alla aðila, þó sérstaklega börnin.“

Myndir og texti: Ruth Örnólfs

Tölvugerð mynd af fjölbýlishúsum við Bjarkarholt.

Uppbygging í miðbæ Mosfellsbæjar er að hefjast af fullum krafti. Auglýstar hafa verið lóðir fyrir fjölbýli við Þverholt og svo núna síðast við Bjarkarholt og Háholt.
Í Þverholti stendur til að byggja 30 leiguíbúðir í bland við 12 íbúðir á almennum sölumarkaði. Til úthlutunar eru lóðir við Bjarkarholt og Háholt þar sem áætlað er að byggja að minnsta kosti 52 íbúðir í fjölbýli.
Ásýnd og þéttleiki byggðar í miðbænum mun því breytast talsvert á næstu misserum í takt við nýlegt deiliskipulag miðbæjarins. Sérstaklega mun verða breyting í Háholti þar sem húsið sem stendur þar númer 23, og hefur hýst margvíslega starfsemi, verður endurbyggt frá grunni í samræmi við núgildandi skipulag. Í útboðsskilmálum er kveðið á um uppkaup á húsinu og endurbyggingu eða niðurrif.

Auðugra mannlíf
„Það er okkar von að fleiri íbúðir miðsvæðis í Mosfellsbæ muni skila sér í enn auðugra mannlífi og aukinni verslun og þjónustu í bænum,“ segir Haraldur Sverrisson bæjarstjóri.
Hann upplýsti jafnframt að verið væri að leggja lokahönd á samninga við fyrirtæki á vegum verktakafyrirtækisins Ris vegna uppbyggingar í Þverholtinu og að framkvæmdir þar muni líklega hefjast í sumar.

Sigrún Þ. Geirsdótti hefur verið valin Mosfellingur ársins 2015. Bæjarblaðið Mosfellingur stendur fyrir valinu en Sigrún er sú ellefta til að hljóta titilinn.
Sigrún vann það þrekvirki á árinu 2015 að synda fyrst íslenskra kvenna yfir Ermarsundið. Sigrún sem hefur stundað sjósund undanfarin ár og hafði áður synt boðsund í tvígang yfir Ermarsundið sem varð kveikjan að því að hana langaði að gera þetta ein.
Ermarsundið er stundum kallað „Mount Everest sundmanna,“ en að synda yfir sundið er eitt og sér mikið afrek, en þrekvirki Sigrúnar verður líklega seint leikið eftir. Bakgrunnur Sigrúnar í íþróttum er enginn og lærði hún skriðsund fyrir þremur árum síðan. Þetta afrek hennar er því ótrúlegt.

Ótrúlegur heiður
„Þetta er æðislegt, ég var tilnefnd sem maður ársins af ýmsum fjölmiðlum en það er ótrúlegur heiður að hljóta nafnbótina Mosfellingur ársins, það er svakalega skemmtilegt,“ segir Sigrún og bætir við að hún sé alltaf endurnærð þegar hún komi upp úr sjónum, skilji áreiti og áhyggjur eftir og finni fyrir meiri jarðtengingu.
„Þegar ég ákvað að fara í þetta sund átti ég ekki von á allri þessari athygli, ég er nú frekar feimin og því er þetta bæði gaman og erfitt. Þetta var ótrúlegt ævintýri og ég er mjög stolt af sjálfri mér að hafa klárað sundið og ekki gefist upp þrátt fyrir mikið mótlæti á leiðinni.“

Samsvarar 1.254 ferðum í Lágafellslaug
Vegalengdin beint yfir sundið er 33 km en ég synti 62,7 km á 22 klukkustundum og 34 mínútum.
„Ég byrjaði vel en eftir rúmlega þrjá klukkutíma varð ég sjóveik og kastaði upp eftir hverja matargjöf í sjö tíma. Þegar ég var búin að synda í 10 klukkutíma komst ég þó yfir sjóveikina, þá var brugðið á það ráð að gefa mér súkkulaði, kók og Jelly Babies að borða. Það er líklega einsdæmi að einhver hafi synt yfir Ermarsundið á þessu fæði.“
Vegalengdin sem Sigrún synti samsvarar 1.254 ferðum fram og til baka í Lágafells­laug og það í gríðarlega miklum straumum, öldum og að hluta til í svarta myrkri.

Snýst um rétta hugarfarið
Sund Sigrúnar hefur vakið mikla athygli. „Ég hef haldið þónokkra fyrirlestra og mér finnst það voða skemmtilegt. Ég fjalla þá um undir­búninginn en hann er rosalega mikilvægur, bæði æfingarnar og ekki síst hugarfarið.
Ég segi frá lífi mínu áður en ég byrjaði að stunda sjósund og þá aðalega heilsufarslega. Sýni svo myndband af sundinu en fólk gerir sér ekki alveg grein fyrir því hvað þetta er fyrr en það sér myndbandið og verður svolítið slegið þegar það sér myrkrið, öldurnar og líkamlegt og andlegt ástand mitt,“ segir Sigrún að lokum.

Grunnurinn er mikilvægastur. Í öllu sem við gerum. Ef grunnurinn er ekki sterkur, getur það sem á honum er byggt aldrei verið sterkt. Hús er skýrt dæmi. Heilsa er nákvæmlega eins. Þú þarft að byggja sterkan heilsugrunn til að vera fullkomlega heilsuhraust/ur.

Heilsugrunnurinn byggir á þremur meginstólpum: næringu, svefni og hreyfingu. Ef þú vanrækir einhvern af þessum stólpum, er heilsugrunnur þinn ekki sterkur. Svo einfalt er það. Það skiptir ekki máli þótt þú mætir á æfingu fimm sinnum í viku, ef mataræðið eða svefninn er ekki í lagi vantar sterka stólpa í grunninn. Sama gildir ef þú sefur í átta tíma á hverri nóttu en sinnir ekki líkamanum. Allir stólparnir eru mikilvægir og við þurfum að sinna öllum vel.

Þetta er alls ekki flókið, í raun sáraeinfalt. Málið er bara að við erum svo ótrúlega góð í að búa okkur til afsakanir og selja sjálfum okkur þá vondu hugmynd að við þurfum að leyfa okkur allt, gera vel við okkur, að allt sé gott í hófi. Afleiðingin af þannig hugsunarhætti er að við vökum allt of lengi yfir einhverju sem skiptir litlu máli, borðum allt of mikið rusl og nennum ekki að hreyfa okkur. Leiðin út úr þessu er sjálfsagi.

Aga sjálfan sig til að hætta að gera það sem fer illa með okkur. Hætta að leyfa sér allt og falla fyrir öllum freistingum. Horfa þess í stað fram á veginn. Hugsa sex mánuði fram í tímann. Setja sér einföld markmið sem skila þér árangri, láta þér líða miklu betur, líkamlega og andlega. Gefa þér hámarksorku. Prófaðu þetta: Sofa í 7-8 tíma á sólarhring, borða mat en sleppa ruslfæði, nammi og gosi, labba úti á hverjum degi og mæta þrisvar sinnum í viku í styrkjandi hreyfingu. Hlustaðu á líkamann, finndu orkuna flæða og njóttu þess að vera heilsuhraust/ur.

Heilsumolar Gaua
Mosfellingur 7. janúar 2016

Vetur konungur hefur heldur betur látið að sér kveða í desember. Í byrjun mánaðarins kyngdi niður snjó í miklu magni á stuttum tíma. Þegar slíkar aðstæður skapast mæðir mikið á snjómoksturstækjum og þeim mannskap sem þeim stýra en Þjónustustöð Mosfellsbæjar ber ábyrgð á snjómokstri í bænum.
Mosfellingur hafði samband við Þorstein Sigvaldason sem stýrir Þjónustustöðinni. „Við vinnum bæði á eigin vélum bæjarins og eins eru ráðnir verktakar til starfsins þegar á þarf að halda.
Skipulega er gengið til verks og liggur fyrir snjómokstursáætlun sem forgangsraðar verkefnum. Þar er í fyrsta forgangi að ryðja stofngötur, strætóleiðir og fjölfarnar safngötur. Áhersla á að ryðja stígakerfi bæjarins hefur aukist síðustu ár. Stígakerfi til og frá skólum og þau sem tengja saman hverfi eru í fyrsta forgangi.“

GPS sendar í moksturstækin
Þorsteinn sagði einnig frá nýjung í starfseminni sem snýr að því að nýverið voru settir GPS sendar í moksturstækin. Þannig er hægt að fylgjast betur með þeim svæðum sem búið er að ryðja. Markmiðið með þessu er að gera vinnuna við snjómokstur og önnur verkefni skilvirkari og þjónustuna betri.
„Þessi tækni mun jafnvel geta falið í sér að íbúar gætu farið inn á netið og séð hvar vélarnar eru í rauntíma. Það bætir upplýsingaflæði og gerir þjónustuna gegnsæa,“ segir Þorsteinn bjartsýnn áður en hann þurfti að snúa sér aftur að þeim mörgu verkefnum sem fylgja vetrinum og jólunum hjá Þjónustustöðinni.

HÁLKUVARNIR
Hálka er nú mjög víða og eru bæjarbúar hvattir til að fara varlega. Hjá Þjónustustöð bæjarins við Völuteig 15 geta íbúar fengið sand til að bera á plön og stéttir við heimahús. Aðgengi er opið að sandinum og er bæjarbúum velkomið að taka það sem til þarf (muna að taka með sér poka eða ílát). Hægt er að senda ábendingar um það sem betur má fara á mos@mos.is eða hringja í þjónustumiðstöð 566 8450.

Guðjón Svansson
gudjon@kettlebells.is

Þjóðir heims gerðu með sér sögulegt samkomulag í París í síðustu viku. Það snýst um að hugsa betur um jörðina á margvíslegan hátt, meðal annars með því að einblína á endurnýjanlega orkugjafa. Vindorku frekar en olíu, til dæmis. Vonandi munu allir standa sig í stykkinu svo sett markmið náist.

Ég er mjög mikið að velta fyrir mér orku núna. Mér fannst ég sjálfur óvenjulega orkulítill í seinni hluta nóvember, tók sjálfan mig í greiningu og ákvað að gera breytingar. Fyrsta skrefið var kaffið. Mér finnst gott kaffi mjög gott. En ég á erfitt með að halda mér innan skynsamlegra kaffimarka og þarna í nóvember var ég farinn að drekka ansi marga kaffibolla á hverjum degi. Ég ákvað að hætta alveg að drekka kaffi og sjá hvaða áhrif það hefði.

Fyrstu tveir dagarnir voru erfiðir, hausverkur og önnur fráhvarfseinkenni, magnað hvað kaffið slær mann þegar maður hættir að drekka það. Er núna á þriðju viku, sakna svarta vökvans lítið. Breytti líka aðeins til í mataræðinu, borða núna sem dæmi bara ávexti fyrir hádegi. Þessar tvær breytingar eru að gera mér gott, ég finn það, sef betur og er allur einbeittari. Fyrir mér er líkaminn eins og jörðin, við eigum að hugsa jafn vel um okkur sjálf og jörðina. Jörðin hefur sinn ryðma, við okkar. Við eigum að vakna úthvíld eftir góðan nætursvefn, borða passlega og rétt, hreyfa okkur sem mest og styrkja okkur líkamlega.

Þetta er grunnurinn að góðu lífi, góð líkamleg orka. Góð líkamleg orka gefur okkur kraft til þess að sinna verkefnum og áskorunum dagsins og gott betur. Við fáum aukaorku til þess að gera eitthvað skemmtilegt með okkar nánustu og sinna skapandi og gefandi hlutum. Við höfum eina jörð og verðum að fara vel með hana. Þú hefur bara einn líkama, farðu vel með hann.

Heilsumolar Gaua
Mosfellingur 17. desember 2015

Simmi Vill eins og hann er oftast kallaður hefur víðtæka reynslu af atvinnulífinu og hefur ávallt mörg járn í eldinum. Hann er maðurinn við stjórnvölinn í Keiluhöllinni í Egilshöll en nýjasta verkefni hans og viðskiptafélaga hans er að opna lúxushótelsvítur á efstu hæð Turnsins við Höfðatorg í Reykjavík og eru framkvæmdir hafnar.
Sigmar segir mikinn vöxt í ferðatengdri þjónustu hérlendis og nú sé rétti tíminn til að hrinda af stað gömlum draumi.

Sigmar er fæddur í Reykjavík 3. janúar 1977. Foreldrar hans eru þau Gerður Unndórsdóttir og Vilhjálmur Einarsson skólastjóri. Sigmar á fimm bræður, Rúnar fæddur 1958, Einar fæddur 1960, Unnar fæddur 1961, Garðar fæddur 1965 og Hjálmar fæddur 1973.
Fjölskyldan flutti frá Reykholti í Borgarfirði til Egilsstaða þegar Sigmar var þriggja ára en faðir hans var fyrsti skólastjóri Menntaskólans á Egilsstöðum.

Íþróttahúsið var okkar annað heimili
„Ég á hlýjar og góðar æskuminningar að austan, á sumrin var alltaf troðfullt af ferðamönnum og því var mikið líf og fjör.
Við félagarnir æfðum allar íþróttir sem í boði voru og á veturna var íþróttahúsið okkar annað heimili. Ég keppti reglulega á mótum enda fátt annað sem komst að.
Við höfðum frjálst aðgengi að veiðistöðum og veiddum reglulega í Eyvindará og vötnum í Skriðdal og Eiðaþingá.
Eftirminnilegar eru líka ferðir okkar fjölskyldunnar í Mjóafjörð þar sem við dvöldum alltaf að sumri. Þá var farið á trillu og veitt á handfæri, svo var farið í berjamó og unnið úr aflanum á kvöldin.“

Flutti til Svíþjóðar
„Þegar ég var 13 ára fluttum við fjölskyldan til Svíþjóðar og bjuggum þar í þrjú ár þar sem faðir minn fór í endurmenntunarnám.
Ég fermdist í Svíþjóð ásamt öðrum Íslendingi í norsku sjómannakirkjunni í Gautaborg. Við þurftum að kunna trúarjátninguna upp á hár því það var engin leið að mæma þar sem við vorum bara tveir í fámennri athöfn en allt gekk þetta nú eftir,“ segir Sigmar og glottir.

Það besta sem gat komið fyrir mig
„Flutningur okkar til Svíþjóðar er sennilega ein mikilvægasta breytingin á mínum unglingsárum. Ég flutti úr vernduðu umhverfi þar sem ég var öruggur með mitt. Ég þekkti alla og allir þekktu mig. Ég var að einhverju leyti leiðtogi því ég stýrði því hverjum var strítt og hverjum ekki. Ég hafði það orðspor hjá eldri strákunum á Egilsstöðum að vera eitt leiðinlegasta barn á Íslandi en ég átti það til að standa verulega upp í hárinu á þeim.
Þegar ég flutti út þá var ég akkúrat í hinu hlutverkinu, mér var strítt og átti mjög erfitt fyrsta árið. Þegar ég náði svo tökum á sænskunni fór lífið að brosa við mér aftur.“

Einlæg afsökunarbeiðni
„Við fluttum svo aftur heim og lífið gekk sinn vanagang. Einn daginn var ég að horfa á þátt með Opruh Winfrey í sjónvarpinu um einelti og varð hugsað til baka. Ég áttaði mig á því hvað ég hafði gert, ég lagði manneskju í ljótt einelti án þess að gera mér grein fyrir því. Ég sá að mér og ákvað að setja mig í samband við viðkomandi og biðjast afsökunar á framkomu minni, það var mikilvæg stund.
Síðan þá hef ég hvatt alla sem hafa gert eitthvað á hlut annarra í æsku að gefa sig á tal og biðjast afsökunar. Maður veit nefnilega ekki hvað maður hefur mögulega lagt á fólk, einlæg afsökunarbeiðni getur breytt lífi og líðan,“ segir Sigmar alvarlegur.

Flutti snemma að heiman
„Ég flutti að heiman 17 ára, mér þótti Egilsstaðir ekki bjóða upp á nægilega mörg tækifæri. Það má því segja að ég hafi snemma þurft að sjá fyrir sjálfum mér og ég gerði það sem þurfti að gera hverju sinni.
Ég starfaði um tíma við ræstingar á nóttunni með námi, sinnti dyravörslu á skemmtistöðum, var pítsubílstjóri, vann í saltfiski, afgreiðslumaður í verslun og allt voru þetta störf sem gáfu mér mikið.“
Alltaf náð að skipuleggja fjölskyldulífið
Sigmar er giftur Bryndísi Björgu Einarsdóttur og saman eiga þau synina Einar Karl 13 ára, Vilhjálm Karl 9 ára og Inga Karl 6 ára og hundinn Bola Karl.
Við Bryndís höfum verið saman síðan 1998 og gift í 10 ár. Bæði höfum við haft mikið fyrir stafni, verið í rekstri fyrirtækja og virk í félagsstörfum en alltaf náð að skipuleggja fjölskyldulífið. Bryndís heldur samt traustataki utan um þetta allt saman því það er ekki mín sterka hlið.“

Leiðin lá í fjölmiðla
„Fjölmiðlar hafa alltaf heillað mig, snemma fékk ég tækifæri í útvarpsmennsku á Rás 2. Ég færði mig yfir á frjálsa stöð sem hét Mono en þaðan lá leiðin í sjónvarp þar sem ég og félagar mínir tókum við stöð sem hét PoppTíví. Í kjölfarið lá leiðin á Stöð 2 þar sem ég var einn stjórnenda Idol stjörnuleitar og fleiri þátta, samhliða þessu sinnti ég markaðsfulltrúastöðu.
Ég hóf störf hjá Landsbankanum en færði mig svo yfir til IP fjarskipta, sem framkvæmdastjóri sölu-og markaðssviðs.
Árið 2010 stofnaði ég ásamt félaga mínum veitingastaðinn Íslensku Hamborgara­fabrikkuna, staðirnir eru í dag orðnir þrír talsins. Árið 2013 tók ég þátt í stofnun Lava sem er eldfjalla- og jarðskjálftasýning sem opnuð verður árið 2017 á Hvolsvelli.“

Skapa fjölskylduvæna stemningu
Ég spyr Sigmar út í Keiluhöllina en hann starfar þar sem framkvæmdastjóri. „Við erum fjórir eigendur, ég, Jóhannes Ásbjörnsson, Snorri Marteinsson og Jóhannes Stefánsson og fjölskylda í Múlakaffi.
Okkar markmið eru að auka veg og vanda keiluíþróttarinnar ásamt því að auka þjónustu við einstaklinga, hópa og fjölskyldur í leit að afþreyingu og góðum mat.
Keila er afþreying þar sem allir geta tekið þátt, amma og afi geta keppt við barnabörnin og allt þar á milli. Við ætlum okkur að skapa fjölskylduvæna stemningu hérna.“

Opna lúxushótelsvítur
„Næsta verkefni okkar er að opna lúxus­hótelsvítur efst í Höfðatorgsturni. Það verður hægt að leigja stök herbergi og eins verður möguleiki á að sameina svíturnar og leigja þannig stærri gistipláss. Hótelið er fyrir fólk sem vill láta lítið fyrir sér fara en mikið fyrir sér hafa.“
Það er ekki hægt að sleppa Sigmari nema að spyrja hann út í sjónvarpsstöðina Miklagarð og hvað fór úrskeiðis þar. Rúmum mánuði eftir að stöðin hóf útsendingar leituðu eigendurnir að nýju hlutafé til að styrkja reksturinn en á sama tíma var öllum starfsmönnum stöðvarinnar sagt upp störfum. „Það var einfaldlega lagt af stað með of lítið hlutafé en dýrmæt reynsla að baki og skemmtilegur tími er ég hugsa til baka,“ segir Sigmar að lokum.

Myndir og texti: Ruth Örnólfs