Skillsspot.net er nýr vefur eða gagnagrunnur í eigu fyrirtækisins Football Associates Ltd. Guðmundur Bragason er eigandi vefsins ásamt Baldri Sigurðsyni.
„Hugmyndin kviknaði árið 2012 og hefur verið í þróun síðan. Samstarfsaðili minn hefur búið í Bretlandi síðan 1989 og hefur m.a. starfað sem milliliður við kaup og sölu fótboltaklúbba og umsýslu í kringum leikmenn,“ segir Guðmundur.
Skillsspot er í raun gagnagrunnur þar sem fótboltamenn og konur geta sett inn sínar ferilskrár, myndir, myndbönd, meðmæli og fleira sem tengist leikmönnunum. Gagnagrunnurinn verður síðan kynntur fyrir fótboltaklúbbum í Englandi sem auðveldar þeim finna leikmenn. Til að byrja með ætlum við að einbeita okkur að Englandi og fótbolta en framtíðarsýnin er að bæta við fleiri löndum og fleiri íþróttagreinum.“

Margir íslenskir leikmenn sem gætu haft það gott í neðri deild í Englandi
„Við erum ekki umboðsmenn heldur milliliður á milli leikmanna og klúbba. Við komum til með að einbeita okkur að 3. efstu deild Englands og niður, þó svo að gagnagrunnurinn henti öllum deildum.
Það geta allir skráð sig þarna inn, ekki bara Íslendingar. Það er hellingur af leikmönnum hér sem annars staðar sem myndu spjara sig vel í neðri deildunum á Englandi og hafa það fínt. Það er þörf á þessari þjónustu bæði í deildunum í Englandi og fyrir fótboltastráka og stelpur sem hafa kannski ekki getuna í að spila í efstu deild en langar að upplifa að æfa og spila erlendis,“ segir Guðmundur en vefurinn og gagnagrunnurinn er hannaður og forritaður af íslenska fyrirtækinu Habilis.

Frí skráning til 5. desember
„Við erum búnir að kynna hugmyndina fyrir nokkrum klúbbum í Englandi og höfum fengið mjög góð viðbrögð. Klúbbarnir fá aðgang að gagnagrunninum og geta leitað þar að því sem þeir sækjast eftir.
Við hvetjum alla sem áhuga hafa til að skrá sig og setja inn meira en minna af upplýsingum. Árgjaldið fyrir skráningu er 50 pund eða um 10.000 kr. Við ætlum að bjóða lesendum Mosfellings fría skráningu til 5. desember, greiðslulykillinn er XNLGYBCB,“ segir Guðmundur að lokum. Skráningin fer fram á www.skillsspot.net.“

Greta Salóme er komin heim í bili eftir skemmtilegt ævintýri hjá Disney þar sem hún hefur verið með sína eigin sýningu um borð í skemmtiferðaskipum.
Hún hefur haft í nógu að snúast, sungið með hljómsveitinni Dimmu og Sinfóníu­hljómsveit Norðurlands auk þess sem hún var að gefa út lagið Fleyið. „Lagið var samið um miðja nótt í stúdíóinu sem ég var með um borð í Disneyskipinu. Ég fékk svo svakalega heimþrá og samdi þá þetta lag. Þetta lag ásamt fleirum sem ég hef verið að gefa út eru undanfari að plötu,“ segir Greta Salóme. „Það er nóg að gera hjá mér um þessar mundir, ég verð með stóra tónleika á Akureyri 17. desember og einleikstónleika með Sinfóníuhljómsveit Norðurlands 17. janúar þar sem ég verð m.a. með hluta af Disneysýningunni og önnur verk eftir mig. Svo verð ég með jólatónleika um allt land.“

Jólatónleikar í Hlégarði 3. desember
„Desember verður viðburðaríkur þar sem ég er að fara túra um landið ásamt hljómsveitinni Swing kompaníinu. Við munum halda tónleika í kirkjum um allt land í samstarfi við kóra á hverjum stað. Þetta er með skemmtilegri jólaprógrömmum sem ég hef tekið þátt í. Við verðum í Hlégarði 3. desember og ætlum að vera með mosfellska tónleikadagskrá. Þetta verða mjög flottir tónleikar og er það von mín að við náum að festa jólatónleika í Hlégarði í sessi, að Mosfellingar geti í framtíðinni gengið að því sem vísu,“ segir Greta Salóme. Auk hennar koma fram á tónleikum söngvararnir Jógvan Hansen og Diddú, hljómsveitin Swing kompaníið, Skólakór Varmárskóla og Kammerkór Mosfellsbæjar. Hægt verður að nálgast miða á þessa tónleika á midi.is.

20.000 manns sáu sýninguna í sumar
Greta Salóme hefur undanfarið eitt og hálft ár starfað á skemmtiferðaskipum hjá Disney og verið þar með sína eigin sýningu. „Í júlí 2014 fékk ég sjö vikna samning hjá þeim í gegnum umboðsskrifstofu í Bandaríkjunum. Ég var fyrst á skipinu Disney Dream sem tekur um 4.000 farþega. Þessar sjö vikur urðu að tæpum fimm mánuðum þar sem ég var með sýningu tvisvar í viku. Ég var bæði með verk eftir mig og aðra og einn söngvara með mér.“
Í kjölfarið var Gretu Salóme boðin svokallaður „headliner“ samningur. „Þá fékk ég leikstjóra frá Disney, búningahönnuð og grafískan hönnuð með mér til að skapa mína eigin sýningu. Í þessari sýningu var ég svo með fjóra dansara og einn söngvara.
Við sýndum þessa sýningu á skipi sem heitir Disney Magic, við sigldum frá Karíbahafinu til Evrópu og niður í Miðjarðarhaf. Þetta var ótrúlega gaman og telst mér til að um 20.000 manns hafi séð sýninguna mína í sumar. Það kom mér á óvart hve fjölbreytt mannlífið var um borð. Það var náttúrlega mikið af fjölskyldufólki, mikið af ungu fólki jafnvel í brúðkaupsferðum og svo harðir Disney-aðdáendur,“ segir Greta Salóme. Hún er þakklát fyrir þessa reynslu en er ánægð með að vera komin heim full tilhlökkunar fyrir komandi verkefnum og þá sérstaklega jólatónleikunum í Hlégarði.

Kalli Tomm hefur gefið út sína fyrstu sólóplötu sem nefnist Örlagagaldur. Kalli er betur þekktur sem trommuleikari Gildrunnar og forseti bæjarstjórnar en þessa dagana keyrir hann túrista um landið á rútu.
Kalli rær því á önnur mið með þessari 12 laga plötu sem hefur fengið góðar viðtökur. „Níu lög eru eftir mig, tvö eftir Jóhann Helgason og eitt eftir Guðmund Jónsson. Þeir tveir hafa fylgt þessu verkefni með mér frá upphafi. Með okkur hefur myndast góð vinátta og sömdu þeir þessi lög sérstaklega fyrir Örlagagaldur,“ segir Kalli.
Kalli hefur unnið að plötunni í eitt og hálft ár og hefur hún greinilega átt hug hans allan. „Þetta hefur verið mikil áskorun þar sem ég hef hvorki samið sjálfur né sungið mikið þrátt fyrir að hafa verið í tónlist lengi. Þetta var því djúp laug sem ég stökk út í en Lína konan mín hefur hvatt mig óendanlega mikið. Platan er einmitt tileinkuð henni og margir textarnir gefa það glögglega til kynna.“

Örlagagaldur fyllir skarðið
Af hverju ákvaðstu að sökkva þér í þetta verkefni?
„Það kemur í kjölfarið þess að hljómsveitin okkar, Gildran, hætti óvænt störfum eftir 30 ára samstarf þegar Birgir og Sigurgeir yfirgáfu skútuna. Mér fannst ég þurfa að fylla það skarð og er mjög ánægður með útkomuna. Ætli nafn plötunnar, ­Ör­­laga­galdur, hafi ekki orðið til vegna þess.
Viðtökurnar hafa farið fram úr björtustu vonum og ég er fyrst og fremst þakklátur fyrir móttökur sveitunga minna. Þau viðbrögð hafa glatt mig mjög mikið.“

Diskurinn seldur beint frá býli
Hvernig tónlist er þetta?
„Platan er frekar lágstemmd heilt yfir þrátt fyrir nokkra spretti. Lögin eru í rólegri kantinum og minna rokk og ról en áður.
Hljóðfæraleikarar í grunninn eru Þórður Högnason kontrabassaleikari, Tryggvi Hübner gítarleikari og svo fékk ég gamla Gildrufélaga minn, Þórhall Árnason, á bassa og Gumma úr Sálinni á gítar.
Þá er ég með frábæra textahöfunda, Bjarka Bjarnason og Vigdísi Grímsdóttur með mér í liði á plötunni.
Svo er gaman að segja frá því að í laginu Góður dagur leiði ég saman þrjár kynslóðir Hólmara, þau Einar Hólm, Ólaf Hólm og Írisi Hólm sem öll eru úr Mosfellsbæ og góðir vinir míni.
Ekki má gleyma Pétri Baldvinssyni sem hannaði plötuumslagið sem hefur vakið verðskuldaða athygli,“ segir Kalli að lokum
Örlagagaldur er seldur beint frá býli í gegnum Kalla sjálfan en einnig er hægt að ná sér í eintak í Fiskbúðinni í Mosó.

Eva Magnúsdóttir varabæjarfulltrúi og formaður fræðslunefndar til margra ára hefur beðist lausnar. „Ég stofnaði fyrir um ári síðan ráðgjafarfyrirtækið Podium ehf. Það hefur farið mjög vel af stað sem þýðir að ég sé mér ekki fært að sinna starfi mínu sem varabæjarfulltrúi og formaður fræðslunefndar,“ segir Eva. „Ég verð því miður að biðjast lausnar frá því að vera varabæjarfulltrúi í Mosfellsbæ. Á næstu vikum og mánuðum mun ég vinna í því að þróa enn frekar framtíðarstefnu fyrir fyrirtækið mitt.“
Eva hefur starfað til fjölda ára í þágu Mosfellinga sem varabæjarfulltrúi, formaður fræðslunefndar og formaður fimleikadeildar og hefur starfið gefið henni mikið. „Ég vil þakka núverandi meirihluta og minnihluta fyrir farsælt og afar skemmtilegt samstarf og óska þeim alls hins besta í framtíðinni. Kjósendum mínum vil ég einnig þakka traustið og nota tækifærið að segja að þó það sé kannski gott að búa í Kópavogi þá er samt best að búa í Mosfellsbæ,“ segir Eva.
Podium sérhæfir sig í almannatengslum, markaðsmálum, stefnumótun og breytingastjórnun. Eva hefur margra ára reynslu af þessum málaflokkum en hún sat í framkvæmdastjórn Mílu og starfaði sem forstöðumaður samskipta og talsmaður hjá Símanum í alls 14 ár. Hún starfaði auk þess sem ráðgjafi í markaðs- og almannatengslum hjá KOM og var blaða- og fréttamaður um langt skeið.

Nú hafa tekið gildi nýjar reglur um hænsnahald í þéttbýli í Mosfellsbæ, samþykkt um hænsnahald í Mosfellsbæ, utan skipulagðra landbúnaðarsvæða. Þar kemur fram að leyfishafa er heimilt að halda allt að sex hænur í þéttbýli, en að ekki fáist leyfi til að halda hana (þ.e. karldýr). Leyfið er veitt til fimm ára í senn, og þar eru gerðar kröfur um aðbúnað og tekið sé tillit til nágranna varðandi staðsetningu og umhirðu hænsnanna. Reglurnar er að finna á vef bæjarins.

Jólaljós, árlegir styrktar- og jólatónleikar Kirkjukórs Lágafellssóknar verða haldnir þann sunnudaginn 15. nóvember og verður dagskráin létt, hátíðleg og fjölbreytt.
Diddú, María Ólafsdóttir, Hugi Jónsson, Bjarni Ara, Páll Rósinkranz, Greta Salóme, Hafdís Huld, Matthías Stefánsson, Jónas Þórir og að sjálfsögðu Kirkjukórinn munu koma fram ásamt mjög spennandi leynigesti.
Að þessu sinni eru tónleikarnir haldnir til styrktar Kára Erni Hinrikssyni sem er 27 ára Mosfellingur sem hefur barist við illvígt krabbamein í yfir áratug.

Gott að finna fyrir samkennd
„Það er erfitt að koma því í orð hvað ég er þakklátur. Ég hef fjórum sinnum greinst með krabbamein, síðast fyrir rúmum tveimur árum. Undanfarnir sex mánuðir hafa verið góðir hjá mér, sjúkdómsfríir, en rannsóknir sem ég fór í úti í Kaupmannahöfn í apríl komu vel út. Ég fer aftur í rannsóknir í nóvember og vona að þær komi vel út,“ segir Kári Örn.
„Tónleikarnir eiga eftir að verða geggjaðir enda ótrúlega mikið af hæfileikafólki sem ætlar að koma fram og á meðan ég kvíði mikið fyrir rannsóknunum þá hlakka ég til þessara tónleika. Styrkurinn á eftir að koma sér vel í baráttunni sem snýst um að lifa af, mögulega eignast barn ef örlögin leyfa og lenda í ævintýrum með ástinni minni henni Júlíönu. Að finna fyrir svona samkennd frá góðhjörtuðu fólki út í bæ er alveg sérstök tilfinning.“

Þakklátur fyrir hvern dag
Kirkjukór Lágafellssóknar hefur síðan 1999 haldið styrktartónleika í aðdraganda jólanna til styrktar ýmsum einstaklingum og málefnum undir nafninu Jólaljós en í ár fara þeir fram í Guðríðarkirkju og hefjast klukkan 16:00. Aðgangseyrir er 3.000 krónur og miðar eru seldir við innganginn.
„Ég hvet alla til að mæta og njóta fjölbreyttrar tónlistar og upplifa frábæra jólastemningu. Ég er þakklátur fyrir hvern einasta sjúkdómsfría dag sem ég fæ og óendanlega þakklátur öllum þeim sem koma að þessum styrktartónleikum,“ segir Kári Örn að lokum.

Alexander eða Lexi eins og hann er ávallt kallaður tók á móti mér á fallegu heimili sínu í Mosfellsdalnum. Á hlaðinu mátti sjá bíla, fjórhjól, vélsleða og mótorhjól svo eitthvað sé nefnt svo það fer ekki framhjá neinum hver áhugamálin eru á þessum bænum.
Það þarf ekki að vera lengi í návist Lexa til að sjá að þar er mikill ofurhugi á ferð, hann er hjálpsamur með eindæmum, hugsar stórt og er maður framkvæmda.

Alexander er fæddur í Reykjavík 25. júní 1975. Foreldrar hans eru þau Rósa Vestfjörð Guðmundsdóttir forstjóri og Kári Þórðarson prentari. Alexander á tvo bræður, þá Þórð og Ólaf.
„Foreldrar mínir fluttu með okkur bræður á Akureyri árið 1977. Þegar ég lít til baka til æskuáranna þá kemur snjórinn sterkur inn, útiveran í Hlíðarfjalli og svo voru líka góðar stundir þegar maður gat hoppað fram af húsþakinu heima beint út í skafl.“

Var sá eini sem fékk aukablað
„Ég gekk í Glerárskóla, umhverfið þar í kring var spennandi, gil og klettar og tilvalið að gleyma sér þarna milli tíma. Ég fann mig nefnilega ekki í félagsskap í frímínútum, ég æfði ekki fótbolta og fékk því ekki að vera með nema vera valinn seinastur í liðið. Mér leið oft eins og ég væri eitthvað öðruvísi en aðrir og sótti í athygli á neikvæðan máta, var samt aldrei vondur við neinn en uppátækjasamur.
Það var eins með námið, mig skorti einbeitingu. Ég man að í 2. bekk þá fékk maður blað sem var stimplað með stjörnu ef maður var óþekkur. Ég var sá eini sem fékk aukablað því hitt dugði ekki til en ég druslaðist einhvern veginn í gegnum þetta.“

Sökkti mér í flórinn
„Frá sjö ára aldri fór ég í sveit á sumrin, var aldrei sendur á sama staðinn tvisvar og fyrir því eru góðar ástæður, ég þótti erfiður og uppátækjasamur. Ég smurði kettlinga með júgursmyrsli, sofnaði í glerull, slóst við selsunga, sökkti mér í flórinn, hnuplaði skotum og teikaði beljur svo fátt eitt sé nefnt,“ segir Lexi og hlær.
„Í seinni tíð fór ég sjálfviljugur í sveit og stóð ég mig vel á traktorum og hinum ýmsu græjum.“

Fór á snjósleða í skólann
„15 ára gamall tók ég skellinöðrupróf, eingöngu til að mega keyra snjósleða. Ég keypti mér Polaris sleða fyrir fermingarpeningana og eftir það fékk ég sleðadellu. Ég fór stundum á sleðanum í skólann ef vel viðraði og svo fór ég að prófa að taka þátt í keppnum.
Eftir grunnskóla fór ég í Verkmenntaskólann. Áhuginn á náminu dvínaði fljótlega og þegar ég var búin að falla ­þrisvar sinnum í bókfærslu þá hætti ég.“

Fór til Lundúna í nám
„Ég hóf störf í fyrirtæki foreldra minna, Ásprent, en þá prentsmiðju keyptu foreldrar mínir árið 1978. Seinna stofnuðu þau Ás­útgáfuna sem gefur út Rauðu Seríuna. Bræður mínir unnu líka í fyrirtækinu og við nutum þess að starfa öll saman.
Nítján ára fór ég í nám til Lundúna í prent­stjórnun. Það var virkilega gaman í því námi, þar kynntist ég sálfræði og stjórnun sem hefur hjálpað mér vel.“

Engin eftirsjá
Eftir heimkomu fór Lexi á fullt í snjósleðakeppnir. Hann varð fjórum sinnum Íslandsmeistari í snjókrossi og keppti á EM í Svíþjóð og Finnlandi, HM í Bandaríkjunum og í X-Games.
Ég spyr hann hvort hann hafi aldrei slasast? „Jú, það var allt sett í þetta, slitin liðbönd í ökkla, brotinn leggur, rifbein og bak, marin þind og ég fór líka úr mjaðmarlið en þetta var allt þess virði og engin eftirsjá.“

Rosaleg upplifun
Stærsta ævintýri Lexa til þessa var þegar hann lék áhættuatriði í James Bond myndinni Tomorrow Never Dies. „Ég fékk fregnir af því að það ætti að taka þessa mynd upp hér á landi og í henni ættu að vera vélsleðaatriði. Ég lét útbúa myndbrot úr þeim keppnum sem ég hafði tekið þátt í og gerði svo framleiðsluteyminu vart við mig. Daginn eftir var mér boðið að koma og starfa við gerð myndarinnar og ég var með þeim í 10 daga. Þetta var rosaleg upplifun.”

Ég varð hugfanginn af henni
„Ég kynntist konunni minni, Árnýju Elvu, á Akureyri. Ég varð hugfanginn af henni, hún bauð mér í mat eitt kvöldið og ég þáði boðið. Ég var þá nýbúinn að vinna keppni á Ólafsfirði og átti að vera að fagna þar þetta kvöld en þangað fór ég aldrei. Við höfum verið saman síðan.
Við eigum þrjú börn, Ásgrím Örn fæddan 2005, Bergvin Snæ fæddan 2006 og Bergrúnu Fönn fædda 2008.“

Framtíðin í lausu lofti
„Árið 2004 var eftirminnilegt ár fyrir okkur stórfjölskylduna. Við seldum hluta af Ásprenti til manna á Akureyri sem ætluðu að byggja upp með okkur smiðjuna. Það fór ekki betur en svo að þeir reyndust tvöfaldir í roðinu og boluðu okkur út úr fyrirtækinu eftir nær 30 ára sögu þess. Við tók ömurlegur tími þar sem við höfðum ekkert fyrir stafni og framtíðin var í lausu lofti.
Fjölskyldan vildi halda áfram að starfa saman. Við fréttum af fyrirtæki í Reykjavík til sölu, Papco, slógum til og keyptum reksturinn. Til að byrja með flugum við suður á mánudögum og heim aftur á föstudögum en síðan fluttum við öll suður.“

Búið að vera mikið ævintýri
„Við Árný Elva keyptum okkur 10.000 m2 lóð í Mosfellsdalnum og fluttum inn forsteypt einingahús frá Kína. Það er búið að vera mikið ævintýri að byggja hérna undanfarin ár með aðstoð ættingja og vina. Við fluttum svo inn í febrúar 2013, héldum innflutningsveislu og giftum okkur í leiðinni. Ég er búinn að útbúa reiðhjólastökkpallsbraut hér á lóðinni fyrir börnin og svo er einnig lítil motorcrossbraut í smíðum.“

Lágmarkskrafa að það sé til aðstaða
Undanfarin ár hefur Lexi haldið allskonar viðburði eins og Lex Games sem er einskonar jaðaríþróttaveisla. Hann hefur einnig haldið BMX og hjólabrettakeppnir. Hann stofnaði jaðaríþróttfélag í Reykjavík, Hasar íþróttafélag á Akureyri og hefur tekið þátt í uppbyggingu á Brettafélagi Hafnarfjarðar.
„Mér finnst lágmarkskrafa að það sé til aðstaða fyrir allar íþróttir sem eru stundaðar. Það er gríðarlega stór hópur af börnum sem ekki falla inn í hóp­íþróttir en finna sig í jaðaríþróttum. Ég hef tekið að mér að láta hanna og smíða palla bæði við Lágafellsskóla, Varmárskóla, við áhaldahúsið og á Ingólfstorgi í Reykjavík.
Ég er núna að vinna í því að byggja upp stóra jaðarmiðstöð í Elliðaárdal og þar verður ýmis konar aðstaða í boði, veggjaklifur, svampgryfjur, BMX, hjólabretti, snjóbretti, skíði, línuskautar o.fl.
Ég get lofað því að þetta á eftir að verða eitt vinsælasta og skemmtilegasta hús landsins,“ segir Lexi er við kveðjumst.

Myndir og texti: Ruth Örnólfs