„Við áttum ekki von á því að fólk tæki þessu svona vel. Þetta eru alveg dásamlegar móttökur,“ segir Simmi Vill eftir að Barion opnaði um síðustu helgi. „Það kemur á óvart það þakklæti sem maður finnur hjá fólki.
Það eru ýmis smáatriði sem við höfum þurft að fínpússa frá opnun en annars hefur allt gengið mjög vel. Við sendum starfsfólkið okkar t.d. of snemma heim á laugardagskvöldið þannig að við Villi tókum bara uppvaskið sem var hressandi.
Við ætlum að byrja á því að vera með opið til kl. 01:00 um helgar og 23:00 aðra daga. Svo viljum við endilega koma af stað dagskrá með uppákomum og þá er aldrei að vita nema við höfum sveigjanlegri opnunartíma þegar mikið liggur við.
Okkur finnst þessir fermetrar þurfa að geta verið mjög fjölbreyttir og síbreytilegir. Að við getum verið sportbar án þess að vera sportbar, skemmtistaður án þess að vera skemmtistaður og veitingastaður án þessa að vera veitingastaður. Barion þarf að geta verið allt í senn.“

Nýtt fjölnota íþróttahús að Varmá hefur verið tekið í notkun. Húsið er sérútbúið til knattspyrnuiðkunar með gervigrasi á gólfum. Þar eru einnig þrjár hlaupabrautir auk göngubrautar umhverfis völlinn.
Efnt var til nafnasamkeppni fyrir nýja húsið og var hægt að senda inn tillögur á vefsíðu Mosfellsbæjar og skipuð var sérstök nafnanefnd Mosfellsbæjar og Aftureldingar.
Í nefndinni sátu frá Mosfellsbæ þau Bjarki Bjarnason og Anna Sigríður Guðnadóttir en fulltrúi Aftureldingar var Geirarður Þór Long. Starfsmaður nefndarinnar var Sigurður Guðmundsson íþróttafulltrúi Mosfellsbæjar.
Alls sendu 206 bæjarbúar inn tillögur sínar í nafnasamkeppnina og komu fram 135 tillögur að heiti á húsinu.
Nefndin hélt tvo fundi og varð það niðurstaða nefndarinnar að velja nafnið Fellið sem 6 einstaklingar lögðu til. Þeir sem lögðu nafnið til eru Ingibjörg Ívarsdóttir, Hafdís Benediktsdóttir, Magnea Ingimundardóttir, Agnar Davíð Halldórsson, Elín Konráðsdóttir og Rakel Baldursdóttir. Mynd af þeim má sjá hér til hliðar ásamt fulltrúum bæjarins þegar þeim var afhentur þakklætisvottur í vikunni. Á stóru myndinni má sjá hvernig húsið verður merkt að utan.

Mosfellsbær hefur markað umhverfisstefnu með hliðsjón af heimsmarkmiðum Sameinuðu þjóðanna.
Mosfellsbær er fyrsta íslenska sveitarfélagið sem setur sér ítarlega umhverfisstefnu með hliðsjón af heimsmarkmiðum Sameinuðu þjóðanna.
Markmiðið með vinnunni var að setja fram stefnu um hvernig Mosfellsbær geti þróast á sjálfbæran og framsækinn hátt á næstu árum í samvinnu við íbúa og aðra hagsmunaaðila. Umhverfisstefnan hefur nú verið gefin út og birt á heimasíðu sveitarfélagsins.

Ábendingar frá íbúum um áherslur
Umhverfisnefnd leiddi vinnu við mótun stefnunnar og lögð var áhersla á að hafa hana einfalda í framsetningu og þannig sem aðgengilegasta. Leitað var aðstoðar sérfróðra aðila við gerð stefnunnar og haldnir opnir íbúafundir þar sem kallað var eftir tillögum og ábendingum frá íbúum um áherslur í málaflokknum. Loks átti vinna við mótun umhverfisstefnunnar sér stað á milli kjörtímabila sem er fallið til þess að byggja undir sátt og skilning um stefnuna hjá kjörnum fulltrúum.

Heimsmarkmið Sameinuðu þjóðanna
Heimsmarkmið Sameinuðu þjóðanna um sjálfbæra þróun eru grunnur að endurskoðun umhverfisstefnu Mosfellsbæjar. Í hverjum kafla er gerð grein fyrir því hvaða kafla heimsmarkmiðanna er litið til með megináherslu á 11. kafla sem lýtur að sjálfbærni sveitarfélaga, skipulagi þeirra og uppbyggingu. Heimsmarkmiðin verða á næstu misserum lögð til grundvallar við aðra stefnumörkun sveitarfélagsins eins og við endurnýjun aðalskipulags Mosfellsbæjar svo nokkuð sé nefnt.
Í skýrslu Nordregio, norrænnar fræðastofnunar í skipulags- og byggðarmálum er ný umhverfisstefna Mosfellsbæjar tekin sem fyrirmyndardæmi um hvernig sveitarfélög geta innleitt heimsmarkmiðin í sinni starfsemi og þjónustu.

Smelltu hér til að skoða umhverfisstefnu Mosfellsbæjar. 

Geirarður Þórir Long deildarstjóri hjá Húsasmiðjunni er mikill gleðigjafi og jákvæður með eindæmum. Fjöldi rannsókna hefur sýnt að það að vera jákvæður og bjartsýnn hefur jákvæð áhrif á heilsu, andlega líkamlega og félagslega. Jákvæðni fleytir manni langt og einstaklingar með gott sjálfstraust vita að hugsanir þeirra og viðhorf skiptir máli.
Geiri eins og hann er ávallt kallaður er einstaklega jákvæður maður svo eftir er tekið, hann hefur vakið athygli fyrir uppbyggjandi og skemmtileg skrif á samfélagsmiðlum.

Geirarður er fæddur á Fæðingarheimilinu í Reykjavík 16. desember 1966. Foreldrar hans eru þau Svanhildur Geirarðsdóttir bankastarfsmaður og Guðlaugur Magnús Long byggingameistari.
Geirarður á tvo bræður, þá Kjartan f. 1972 og Bjarka Long f. 1977.

Fór beint í veg fyrir bíl
„Þegar ég var lítill þá bjuggum við fjölskyldan hjá ömmu og afa á Ægisíðunni. Lífið var æðislegt á þessum tíma, stutt í sjóinn og grásleppukarlana. Við afi, nafni minn, vorum miklir mátar og hann gerði allt fyrir mig.
Þegar ég var fimm ára þá var ég að hjóla út í götu og fór beint í veg fyrir bíl. Aumingja afi horfði á þetta gerast út um stofugluggann. Ég flaug af hjólinu og það kostaði viku legu á Borgarspítalanum. Mér skilst að starfsfólkið hafi verið fegið þegar ég útskrifaðist því ég var víst oft ansi óþekkur,“ segir Geiri og hlær.

Árgangurinn mjög samheldinn
„Foreldrar mínir byggðu sér hús í Kópavoginum og þangað fluttum við 1973. Ég gekk í Mela- og Digranesskóla en um 12 ára aldurinn fluttum við í Mosfellssveit.
Ég gekk í Gagnfræðaskóla Mosfellsbæjar en fannst lærdómur ekkert sérstaklega skemmtilegur þótt kennararnir hafi verið fínir. Það var þó alltaf gaman í smíði hjá Erlingi smíðakennara. Árin í Gaggó voru engu að síður frábær og árgangurinn minn var mjög samheldinn.“

Dreymdi um að verða bóndi
„Ég var ekki mikið í íþróttum á gagnfræðaskólatímabilinu en stundaði félagsmiðstöðina Svanssjoppu þeim mun meira. Það var ótrúleg þolinmæði sem Svanur sýndi okkur unglingunum og hann á þakkir skilið fyrir það.
Flest sumur á mínum yngri árum fór ég í sveit, hestarnir, sveitavinnan og útiveran áttu vel við mig. Það var nokkuð skondið þegar við krakkarnir vorum að velja okkur vinnustað í starfskynningu í 9. bekk þá valdi ég að fara í sveit, minn draumur var alltaf að verða bóndi.
Ég starfaði svo eitt sumar hjá Hestaleigunni Laxnesi, það var alveg magnað, maður var á hestbaki bróðurpart dagsins allt sumarið.“

Ævintýri í millilandasiglingum
„Eftir útskrift fór ég í Iðnskólann í Reykjavík á málmiðnaðarbraut. Hætti svo þar og réði mig sem messagutta á varðskipið Tý og varð fljótt fullgildur háseti. Eftir tæp tvö ár fór ég að læra allt sem viðkom málmsuðu í vélsmiðjunni Héðni og svo tók við 18 mánaða tímabil á Tý aftur.
Áramótin 1986-87 hætti ég á Tý og réði mig sem viðgerðarmann á flutningaskipinu Selnesi. Níu mánaða ævintýri í millilandasiglingum var fram undan og siglt var á milli hafna í Evrópu og Ameríku. Eftir þetta úthald var ég eitt ár á varðskipinu Ægi.“

Hjólreiðarnar heilla
Eiginkona Geira er Bóel Kristjánsdóttir sérfræðingur hjá Íslandsbanka. Þau fóru að vera saman árið 1986 og giftu sig árið 2006. Börn þeirra eru Svandís Ösp f. 1992 sjúkraþjálfari og Stefán Óli f. 1994 ráðgjafi hjá Byko. Barnabarnið Steinar Leó er fæddur árið 2018.
Ég spyr Geira út í áhugamálin. „Skotveiði, jeppaveiki, skíðin, vélsleðinn og ferðalög með fjölskyldunni er það sem kemur fyrst upp í hugann. Síðustu ár hafa hjólreiðar heillað mig en ég hjóla til og frá vinnu allt árið um kring.”

Gaman að þjónusta sveitunga mína
„Ég fór að læra trésmíði og vann til að byrja með við allrahanda húsbyggingar með tengdaföður mínum en fór síðan í sérsmíði á gluggum og útihurðum hjá Þyn og Búlka.
Árið 2003 hóf ég störf hjá GK gluggum hér í Mosó, fyrirtæki sem þekkt var fyrir gæðaframleiðslu. Árið 2011 fluttu eigendur fyrirtækisins fyrirækið í Þykkvabæinn en ég varð eftir. Þá tók ég að mér vélastjórnun hjá Gluggasmiðjunni í Reykjavík og var þar til ársins 2014.
Ég hætti í smíðinni og fljótlega var mér boðið starf í Húsasmiðjunni í Grafarholti. Þar líður mér vel með frábærum vinnuvinum og skemmtilegum viðskiptavinum. Mosfellingar eru duglegir að versla í Grafarholtinu og mér þykir gaman að þjónusta sveitunga mína.“

Með stórt Aftureldingarhjarta
Geiri eyðir miklum tíma í íþróttamiðstöðinni að Varmá og hefur gert lengi en hann er með stórt Aftureldingarhjarta. Bóel eiginkona hans spilaði knattspyrnu hjá félaginu og þjálfaði í 25 ár og dóttir þeirra hjóna spilaði einnig í boltanum í rúm 20 ár. Geiri fór því að taka þátt í ýmsu sem tengdist veru þeirra hjá félaginu, fjáröflunum, mótum og utanlandsferðum.
Þegar meistaraflokkur kvenna var endurvakinn árið 2006 þá aðstoðaði hann við alla vinnu í kringum flokkinn ásamt öðrum, m.a. að standsetja hús sem erlendu leikmennirnir bjuggu í yfir sumarið. Hann segir sjálfboðaliðastarfið hafa gefið sér einstaklega mikið og tímabilið með meistaraflokksráðinu sé ógleymanlegt. Það sé ekki sjálfgefið að hafa lið í efstu deild í 8 ár.

Mannauður félagsins er einstakur
Árið 2013 fékk Guðjón Helgason þáverandi formaður Aftureldingar Geira til að ganga til liðs við aðalstjórn félagsins. Hann lét tilleiðast og er þar enn, 7 árum síðar. Geiri hefur verið heiðraður fyrir störf sín og hefur fengið brons- og silfurmerki frá Aftureldingu, silfur frá UMSK og silfur frá Íþrótta- og Ólympíusambandi Íslands.
„Afturelding er stórt félag og það hefur verið heiður að vinna með öllu þessu frábæra fólki í gegnum tíðina, mannauður félagsins er einstakur.
Vegna stjórnarsetu minnar hef ég reynt að fylgjast vel með starfseminni í öllum deildum félagsins. Ég horfi til að mynda á yfir 100 fótboltaleiki á ári, eins fer ég á leiki og mót hjá öðrum deildum.
Í vetur sem leið var ég beðinn um að koma í varastjórn UMSK sem ég þáði. Það er áhugavert að skoða íþrótta og ungmennastarfið frá þeirri hlið líka.“

Hjálpar vonandi öðrum líka
Ég sný talinu að jákvæðni og fallegum orðum. Geiri hefur vakið athygli fyrir hvatningarorð sem hressa sálina og mörgum finnst gott að lesa. Af hverju skyldi hann taka þann pólinn í hæðina? „Í amstri dagsins getur verið gott að minna sjálfan sig á lífið. Skrif mín hjálpa mér í gegnum daginn og vonandi öðrum í leiðinni,” segir Geiri og brosir er við kveðjumst.

Mosfellingurinn 14. nóvember 2019
ruth@mosfellingur.is

Nýtt fjölnota íþróttahús að Varmá var vígt laugardaginn 9. nóvember við hátíðlega athöfn. Húsið mun valda straumhvörfum í aðstöðu fyrir íþróttaiðkendur í Mosfellsbæ auk þess sem unnt verður að stunda hreyfingu á 250 metra langri göngu- og hlaupabraut á tímum þegar allra veðra er von.
Húsið, sem er um 4.000 m² að grunnfleti auk innfelldrar lágbyggingar, er sérútbúið til knattspyrnuiðkunar. Þar eru einnig þrjár hlaupabrautir auk göngubrautar umhverfis völlinn.

Grunnur að sigrum framtíðarinnar
Haustið 2017 var samþykkt að ráðast í byggingu á fjölnota íþróttahúsi á íþróttasvæðinu við Varmá. Í janúar 2018 hófst vinna við hönnun hússins í samvinnu við Aftureldingu og í kjölfarið var samið við fyrirtækið Alverk um að reisa húsið. Verkið gekk greiðlega og hefur verið á áætlun allan framkvæmdatímann.
„Ég vil óska öllum Mosfellingum innilega til hamingju með nýtt fjölnota íþróttahús,“ segir Haraldur Sverrisson bæjarstjóri. „Hér er byggt til næstu ára og þetta hús mun valda straumhvörfum fyrir íþróttaiðkendur í Mosfellsbæ og er enn einn liður í því að efla umgjörðina og leggja þannig grunn að sigrum framtíðarinnar.“

Yfir 600 í yngri flokkum fótboltans
Æfingar hófust í húsinu í lok október en formlega vígsla fór fram um síðustu helgi.
Arkitekt hússins er Sturla Ásgeirsson hjá Arkþing en verkfræðihönnun var á vegum Verkís, byggingarstjóri er Halldór Bogason hjá Alverk en eftirlit á vegum Mosfellsbæjar var í höndum Þorsteins Sigvaldasonar og Óskars Gísla Sveinssonar.
„Það er sérlega ánægjulegt að sjá húsið verða að veruleika. Fjölgun iðkenda í Aftureldingu hefur verið mikil síðustu misseri,“ segir Birna Kristín Jónsdóttir formaður Aftureldingar. „Í dag eru iðkendur í barna- og unglingastarfi í öllum deildum um 1.550 en flestir í knattspyrnudeild eða rétt rúmlega 600. Ég hlakka gríðarlega til framtíðarinnar, sem er sannarlega björt hér í Mosfellsbæ.“

——

NAFNASAMKEPPNI

Sett hefur verið á laggirnar nafnasamkeppni fyrir nýja húsið. Hægt er að senda inn tillögu á vefsíðu Mosfellsbæjar, www.mos.is, til 25. nóvember. Mun nafnanefnd, sem skipuð er tveimur aðilum úr bæjarstjórn og fulltrúa frá Aftureldingu, kynna vinningstillöguna í næsta tölublaði Mosfellings.
Smelltu hér til að senda inn þína tillögu!

Fjárhagsáætlun Mosfellsbæjar fyrir árið 2020 og næstu þrjú ár þar á eftir var lögð fram til fyrri umræðu í bæjarstjórn þann 30. október.
Fjárhagsáætlunin gerir ráð fyrir að tekjur verði 13.380 m.kr., gjöld án fjármagnsliða 12.402 m.kr., fjármagnsliðir 628 m.kr. og að rekstrarafgangur verði 350 m.kr. Fyrirhugað er að framkvæma fyrir 2.970 m.kr. sem að mestu rennur til skóla-, gatna- og veitumannvirkja. Gert er ráð fyrir að íbúum fjölgi um rúmlega 5% milli ára, en þeir eru nú um 12.000. Þetta kemur fram í tilkynningu frá Mosfellsbæ.

Leikskólagjöld lækki um 5%
Áætlunin gerir ráð fyrir að framlegð verði 10,6% og að veltufé frá rekstri verði jákvætt um 1.277 m.kr. eða tæplega 10%. Skuldaviðmið skv. sveitarstjórnarlögum verði 79% í árslok.
Gert er ráð fyrir hóflegri hækkun gjaldskráa til samræmis við stefnumörkun lífskjarasamninganna en að leikskólagjöld lækki um 5%, auk þess sem álagningarprósentur fasteignagjalda lækka.
Áfram verður aukning á nýjum plássum á leikskólum fyrir 12–18 mánaða börn og er gert ráð fyrir að fjölga um 25 pláss á árinu 2020.
Á sviði fjölskyldumála eru lagðir til auknir fjármunir í málefni fatlaðs fólks, meðal annars með stofnun heimilis fyrir geðfatlaða.
Á sviði menningarmála er lagt til að framlag í lista- og menningarsjóð hækki um 14% auk þess sem stefnumörkun um starfsemi Hlégarðs ljúki og auknum fjármunum verði varið í endurbætur hússins.

Kraftur einkennir samfélagið
„Það er okkur Mosfellingum sem fyrr fagnaðarefni að rekstur og starfsemi Mosfellsbæjar er í miklum blóma og kraftur einkennir samfélagið okkar sem er í örum vexti,“ segir Haraldur Sverrisson bæjarstjóri.
„Þjónusta við íbúa og viðskiptavini eflist stig af stigi, Helgafellsskóli er í byggingu og nýtt fjölnota íþróttahús var tekið í notkun um síðustu helgi. Allt er þetta gert til að mæta þörfum íbúa núna og til framtíðar, byggja upp gott samfélag og auka lífsgæði og velferð íbúa.“
Síðari umræða um fjárhagsáætlun Mosfellsbæjar fyrir árið 2020 fer fram miðvikudaginn 27. nóvember.

Sóley Rut Jóhannsdóttir ætlaði sér alltaf að verða dýralæknir en hætti við og fór í Byggingatækniskólann í Reykjavík í húsgagna- og húsasmíði. Hún er nú með tvö sveinspróf í hendi aðeins 26 ára gömul og lætur ekki staðar numið þar því hún byrjaði í meistaranámi nú í haust.
Hún segir að iðngreinarnar henti jafnt konum sem körlum og að atvinnutækifærin séu óteljandi.

Sóley Rut er fædd í Reykjavík 10. mars 1993. Foreldrar hennar eru þau Katrín María Káradóttir fagstjóri og dósent í fatahönnun við Listaháskóla Íslands og Jóhann Bjarki Júlíusson flugvirki hjá British Airways.
Sóley Rut á eina systur, Salvöru Lóu Stephensen, fædda 2017. Faðir hennar er Sigurður Sverrir Stephensen barnahjartalæknir.

Flutti til Parísar
„Ég ólst upp að mestu leyti í miðbæ Reykjavíkur hjá mömmu minni en foreldrar mínir slitu samvistum þegar ég var á öðru ári. Árið 2000 fluttum við mæðgur til Parísar þar sem mamma fór í nám og þar bjuggum við í 5 ár.
Við mamma komum alltaf heim til Íslands á sumrin því hún starfaði sem fjallaleiðsögumaður. Ég var þá mikið hjá afa og ömmu og hjá vinafólki og á því góðan hóp af aukaforeldrum sem mér þykir ákaflega vænt um. Þar á meðal er guðmóðir mín, Kristín Sólveig Kristjánsdóttir, en börn hennar urðu svolítið eins og systkini mín.
Faðir minn, Bjarki, og Eva eiginkona hans hafa búið erlendis meira og minna alla mína ævi en ég hef líka verið mikið hjá þeim.“

Græddi margt á þessum árum
„Árin í París voru fyrir mér mikil lífsreynsla og ég kunni alveg ofboðslega vel við mig þarna. Ég var samt alltaf í góðu sambandi við gömlu vini mína úr Austurbæjarskóla. Það var ekki fyrr en ég varð unglingur sem ég fékk fyrst heimþrá og fljótlega eftir það fluttum við heim.
Ég hef oft hugsað um það hvernig líf mitt hefði orðið ef við hefðum ekki flutt aftur heim, en ég sé alls ekki eftir neinu. Ég græddi margt á árunum þarna úti, nýtt tungumál, nýja menningu, kynntist fólki og svo á maður svo margar góðar minningar sem erfitt er að lýsa með orðum.“

Þetta var eins og í bíómynd
„Af æskuminningunum er af mörgu að taka, veiði við Brúará og stundirnar í bústaðnum hjá ömmu og afa. Þau voru miklir veiðimenn og sáu um lítið veiðihús þar. Ég fékk að skrifa aflatölur í bækur og segja frá því sem gerst hafði yfir daginn. Þau eiga allar þessar bækur ennþá.
Ég held mikið upp á mótorhjólaferð sem ég fór í með pabba og Evu en það var alveg nýr heimur fyrir mig að sitja aftan á mótorhjóli. Við gistum í hjólahýsagarði með fullt af mótorhjólafólki, þetta var eins og í bíómynd,“ segir Sóley Rut og brosir. „Þau fóru líka með mig til Þýskalands til að læra á Trial mótorhjól, það var mjög skemmtilegt.“

Besta gjöf sem ég hef fengið
„Ég man þegar ég fór með mömmu á tískusýningu hjá Christian Dior og John Galliano á Champs-Elysées en hún fór til að sýna mér afrakstur vinnu sinnar en hún vann fyrir tískuhúsin. Ég man hvað ég var stolt af henni.
Þegar ég var níu ára þá var ég búin að fara á óteljandi tískusýningar, taka þátt í að sýna og svo sat maður fyrir í myndatökum fyrir tískublöð, maður hrærðist í þessum heimi.
Besta minning mín er samt án efa dagurinn þegar mamma sótti mig í skólann og kom mér á óvart með bestu gjöf sem ég hef fengið á ævinni. Þegar við komum heim þá beið mín hundabúr með hvolpi í. Vivienne varð órjúfanlegur partur af okkar tveggja manna fjölskyldu en hún veitti okkur stanslausa gleði í 13 ár. Besti hundur í heimi og ég hef ekki ennþá fundið neitt sem nær að fylla hennar pláss í hjarta mínu.“

Keppti á tveimur mótum
„Við bjuggum í miðbænum eftir að við fluttum heim og ég bjó þar fram yfir útskrift úr menntaskóla en þá flutti ég að heiman. Ég var eitt ár í Menntaskólanum í Reykjavík en færði mig svo yfir í Menntaskólann við Hamrahlíð og útskrifaðist þaðan. Ég kynntist módelfitness á síðasta árinu mínu í MH og keppti á tveimur mótum. Með skólanum vann ég á McDonalds´s og á skemmtistöðum í bænum.“

Innréttuð með tilliti til nýtingar
„Planið alveg frá því að ég var barn var að læra dýralækningar en á síðustu metrunum í skólanum fóru einhverjar efasemdir af stað og ég hætti við. Ég fór að vinna í fiski svona til að prófa eitthvað nýtt, en fór svo að hugsa um einkaþjálfaranám eða innanhússhönnun.
Mamma fann að ég var eitthvað áttavillt þegar ég var farin að skoða skóla í Ástralíu. Hún stakk upp á að ég færi í húsgagnasmíði þar sem ég hafði alltaf haft mikinn áhuga á smáhúsum sem voru innréttuð á margvíslegan máta, sérstaklega með tilliti til nýtingar á plássi.
Ég byrjaði í Byggingatækniskólanum 2012 og strax eftir fyrstu önnina var ég búin að skrá mig á húsasmíðabrautina líka. Ég vann sem barþjónn með skólanum og gerði það þangað til ég fór á samning í húsasmíði.“

Bættum við öðrum hundi
„Ég flutti í Mosfellsbæ og ári eftir að ég flutti kynntist ég Stefáni Sindra Ragnarssyni, múrara. Við keyptum okkur lítið raðhús nú í byrjun árs og erum alveg ofboðslega ánægð hérna.
Ég var nýbúin að fá mér hvolp þegar við Stefán kynntumst en við ákváðum síðan að bæta við öðrum hundi sem kom til okkar í sumar. Tíkurnar eru hálfsystur og það er bara eins og þær hafi verið saman alla ævi.“

Vinnutíminn gaf mér frelsi
„Ég kláraði sveinspróf í húsasmíði en hætti svo að vinna við smíðar. Ég var orðin frekar leið á lífinu og fór aftur í barstörfin og vinnutíminn gaf mér frelsi til að tjasla mér saman andlega.
Eftir nokkra mánuði var mér farið að líða betur og vinkonur mínar og kærastinn hvöttu mig til að sækja um annað smíðastarf og láta slag standa. Ég gerði það og er óendalega þakklát fyrir þá ákvörðun. Fyrirtækið sem ég starfa hjá í dag heitir Afltak, og er hér í Mosfellsbæ. Frábært fyrirtæki í alla staði sem heldur vel utan um sitt fólk. Í dag eru óteljandi atvinnutækifæri fyrir iðnmenntað fólk og ég hvet unga fólkið til að kynna sér þetta nám.
Fyrir nokkrum vikum fékk ég sveinsbréfið í húsgagnasmíði og svo byrjaði ég í Meistaraskólanum núna í september svo það er því lítill tími fyrir áhugamál þessi misserin nema kannski í félagsstörfum fyrir Félag fagkvenna en það er félag fyrir konur sem starfa í karllægum iðngreinum,“ segir þessi harðduglega kona að lokum er við kveðjumst.

Mosfellingurinn 24. október 2019
ruth@mosfellingur.is