Það sem veðrið er búið að leika við okkur hérna megin landsins í byrjun sumars, þetta er bara dásamlegt.
Við fjölskyldan erum til dæmis búin að fara á tvö stór fótboltamót í Vestmannaeyjum og á Sauðárkróki og það hefur varla rignt, þetta gerir allt svo miklu betra og auðveldara. Ég er mjög upprifin yfir þessum fótboltaferðum, það er fyrir það fyrsta svo gaman að fylgjast með börnunum sínum takast á við sig sjálf, taka framförum, hafa gaman með liðsfélögum og ekki síst kynnast foreldrar á allt annan hátt þar sem svona mikil samvera á sér stað.
Við sem komum að skipulagningu íþróttastarfs vitum vel hversu mörg handtök sjálfboðaliðanna eru fyrir svona viðburði og kann ég þessum skipuleggjendum bestu þakkir fyrir frábæra umgjörð.
Það er þó eitt sem situr í mér á árinu 2019. Hvernig er jafnréttinu háttað í íþróttum barnanna okkar? Er það jafnrétti að á sama fótboltamóti í sama bæjarfélagi sjá stelpurnar sjálfar um skemmtiatriðin með hæfileikakeppni meðan strákarnir fara í skrúðgöngu og fá skemmtiatriði frá skemmtikrafti ?
Eða
Á sambærilegum fótboltamótum er stelpum 9–10 ára boðið upp á Tímon og Púmba sem hentar kannski á leikskóla og strákarnir hlusta á Jón Jónsson skemmta.
Eða
Þú ferð á leik í Inkasso hjá stelpunum og það er ekki einu sinni boltasækir á vellinum (sem ég varð vitni að á Kópavogsvelli) eða leik í sömu deild hjá strákunum þar sem umgjörðin er öll önnur.
Þetta er umræða og viðhorf sem við verðum að opna hugann fyrir. Ég veit að það er erfitt að breyta fullorðna fólkinu en berum alla vega gæfu til þess að ala það upp í börnunum okkar að kynin eru jöfn og hafa jafnan rétt.
Oft vill umræðan í íþróttum fara að snúast um krónur og aura, en hjá börnunum okkar er sama gjald til að iðka íþróttir hvort sem við erum kvenkyns eða karlkyns og það er sama mótsgjald fyrir stelpur og stráka. Þó að ég vitni í persónulega reynslu í fótboltanum er ég sannarlega með allar greinar í huga.
Ég held eftir að hafa pælt mikið og talað við ýmsa þar á meðal fulltrúa KSÍ, fyrrum landsliðskonu og foreldra, að við í Aftureldingu stöndum okkur mjög vel í samanburði við önnur félög EN betur má ef duga skal. Ef þið hafið góða hugmynd til þess að auka jafnrétti í íþróttum er ég mjög tilbúin til að heyra hana, en fyrst og fremst verðum við að byrja á okkur sjálfum.
Áfram Afturelding.

Birna Kristín Jóndóttir,
mamma og formaður Aftureldingar.

Menningar- og nýsköpunarnefnd Mosfellsbæjar vinnur nú að endurskoðun á nýtingarmöguleikum á félagsheimilinu Hlégarði í komandi framtíð.
Liður í þeirri vinnu var opinn íbúafundur í Hlégarði 16. október 2018 þar sem Mosfellingum gafst kostur á að koma sínum tillögum á framfæri. Hlégarður var vígður við hátíðlega athöfn 17. mars 1951 og hélt Halldór Laxness þar ræðu, hrósaði húsinu og sagði meðal annars: „Slíkt hús sem þetta á að vera sveitúngum skjól og afdrep sem þeir leiti til úr stormviðrum hversdagslífsins og finni skemmtun og menntun.“

Húsið hefur í gegnum tíðina þjónað sínum tilgangi þar sem ýmis starfsemi hefur verið rekin. Hins vegar eru flestir sammála um það í dag að húsið hafi undanfarið ekki staðið undir því að vera menningarhús Mosfellsbæjar. Skoðanir um einsleitni viðburða í Hlégarði og takmarkað aðgengi hafa einkennt umræðuna.
Það komu margar góðar hugmyndir fram á opna íbúafundinum og virðast Mosfellingar bera sterkar taugar til Hlégarðs og hafa mikinn áhuga fyrir því að skoða nýtingarmöguleika hússins og hvernig megi koma upp reglulegri viðburðadagskrá sem höfði til allra bæjarbúa.
Í beinu framhaldi voru ráðgjafar KPMG fengnir til þess að taka út starfsemina í Hlégarði og leiða fram greiningu á valkostum um rekstrarform Hlégarðs með tilliti til markmiða Mosfellsbæjar um menningarstarfsemi í húsinu. Lagt var mat á fjóra ólíka valkosti á rekstrarformi Hlégarðs:
A: Áframhaldandi útleiga með úrbótum, B: Mosfellsbær annast rekstur Hlégarðs, C: Samstarf um rekstur og D: Hlégarður auglýstur til sölu.
Menningarmálanefnd hefur lagt til að farin verði leið C sem gengur út á sameiginlegan rekstur utanaðkomandi rekstraraðila og bæjarins, en hver valkostur var metinn út frá kostum og annmörkum rekstrarfyrirkomulags fyrir Mosfellsbæ ásamt væntri fjárþörf.

Forstöðumanni bókasafns- og menningarmála hefur verið falið að gera tillögu að útfærslu þeirrar leiðar sem felur m.a. í sér að Mosfellsbær leggi til viðburðastjóra sem skipuleggi og byggi upp reglubundna menningarstarfsemi í Hlégarði og yrði sú staða auglýst síðar til umsóknar. Samhliða þessu skipi menningar- og nýsköpunarnefnd þriggja manna hóp skipaðan fólki tengdu viðburðahaldi sem hittist a.m.k. fjórum sinnum á ári og móti hugmyndir um viðburði sem eru til þess fallnir að efla starfsemi Hlégarðs með það að markmiði að auka vægi „mosfellskra“ viðburða.

Á síðustu fimm árum hefur verið unnið eftir þeirri stefnumörkun varðandi húsnæði Hlégarðs að endurnýja allt ytra byrði hússins og er þeirri vinnu nú lokið. Það var beðið með umbreytingu á innra rými hússins þar til fyrir lægju tillögur að nýtingu þess í framtíðinni. Nú liggja þær tillögur fyrir og því hefur forstöðumanni bókasafns og menningarmála jafnframt verið falið að hefja viðræður við núverandi rekstraraðila um fyrirhugaðar breytingar á samningi. Til að unnt verði að byggja upp áformaða menningarstarfsemi í Hlégarði er skynsamlegt að gera ráð fyrir því að leigusamningur þurfi að ná til allt að fimm ára. Forstöðumanni bókasafns og menningarmála hefur einnig verið falið að ræða við umhverfissvið um val á arkitekt til að vinna tillögur að breytingum á innra útliti Hlégarðs og gera tillögu að áfangaskiptingu breytinganna. Tillögurnar eru ekki bindandi, einungis leiðbeinandi um leið og þær gefa betri sýn á möguleikana og auðvelda ákvarðanatöku og koma í veg fyrir tvíverknað.

Misjafnar skoðanir eru á því hvernig skal ráðast í breytingar. Sumir vilja breyta húsinu þannig að það nýtist betur án þess að skemma söguna en aðrir vilja ekki að sagan hefti framkvæmdir. Áhersla verður lögð á að finna samræmt heildaryfirbragð og skipulag hússins með því móti að sem flestir geti nýtt sér aðstöðuna og mæta þannig þörfum ólíkra hópa sem vantar húsnæði, t.d. kórar, leikfélög, viðburðir á vegum bæjarins, tónleikahald, ráðstefnur o.fl.
Enn viðameiri framkvæmdir þyrfti svo að fara í ef starfrækja á kaffihús í Hlégarði, byggja við alhliða tónlistarhús eða færa leikfélag inn í Hlégarð. Sérstök áhersla verður lögð á að gæta að heildaryfirbragði breytinganna af virðingu við höfundareinkenni byggingarinnar og sögu þess um leið og gætt verði að notagildi og framtíðarmöguleikum.

Sagan sýnir að það tekur tíma að byggja upp farsæla menningarviðburði í Mosfellsbæ. Óháð rekstrarfyrirkomulagi þarf að fara í úrbætur á húsnæðinu að innan ef Hlégarður á að verða fyrirmyndar félagsheimili og menningarhús. Á næstunni verður farið í að hreinsa allt drasl út úr húsinu og lagfæra flygilinn svo eitthvað sé nefnt.
Menningar- og nýsköpunarnefnd fagnar því að gert verður ráð fyrir tilgreindum úrbótum á húsnæði Hlégarðs í fjárhagsáætlun Mosfellsbæjar á næstu árum.
Með ósk um gleðilegt sumar og bjarta framtíð Hlégarðs fylgir hér vísa til gamans sem samin var og flutt við vígsluna árið 1951 en við vitum því miður ekki hver höfundur hennar er:

Hús var byggt við Héraðsbraut,
Mosfellshreppur á það.
Það ætti að standa ofan í laut,
Svo enginn þyrfti að sjá það.

Björk Ingadóttir, formaður Menningar- og nýsköpunarnefndar.
Sólveig Franklínsdóttir, varaformaður Menningar- og nýsköpunarnefndar.

Mörg þeirra vandamála sem uppaldendur standa frammi fyrir er hægt að koma í veg fyrir með nokkrum grundvallar atriðum uppeldis.
Fyrir börn merkir nei ekki nei heldur aðeins „reyndu betur“. Flestir uppalendur þekkja það þegar barnið fær neitun við því sem það biður um að það fer til annars fullorðins á svæðinu og reynir þar að fá vilyrði.
Uppalandinn verður svo ósáttur þegar hann uppgötvar að barnið er að gera það sem hann hafði nýverið neitað því um. Barnið er skammað en þegar það svarar því til að hinn uppalandinn hafi gefið leyfi eru vopnin úr höndum þess sem áður hafði neitað.
Þetta er auðvitað afleitt fyrir hinn fullorðna en hegðun barnsins er skiljanleg. Ástæðan fyrir því að börn gera þetta er sú að aðferðin virkar og því oftar sem hún virkar því oftar er hún notuð. Barnið fær jákvæða styrkingu í hvert sinn sem hún virkar.

Uppalendur tali saman
Þegar um er að ræða spurningar sem hafa nokkuð augljós svör svo sem hvort hægt sé að kaupa nýju PlayStation tölvuna eða nýja FIFA leikinn er ólíklegt að barnið fái mismunandi svör. Þegar um spurningar er að ræða þar sem svarið veltur að miklu leyti á geðþótta er líklegra að barnið geti fengið sitt hvort svarið, eftir því við hvern það talar.
Dæmi um slíka spurningu gæti verið hvort barnið megi fá kex þótt stutt sé í matartímann eða hvort það megi fara út eftir matinn o.s.frv.
Leiðin til að stöðva svona hegðun er einföld; uppalendur barnsins verða að tala saman. Ef uppalendur verða varir við að barnið noti þessa aðferð oftar en áður og oftar en ásættanlegt er verða þeir einfaldlega að vera á varðbergi í hvert sinn sem barnið spyr um eitthvað sem gæti verið álitamál.
Einföld leið fyrir uppalendurna er einfaldlega að spyrja barnið hvort það sé búið að spyrja hinn uppalandann. Flest börn svara slíkum spurningum sannleikanum samkvæmt, vitandi að ef það skrökvar fær það alls ekki það sem beðið var um ef það biður um það aftur síðar.

Beðið eftir svari
Oft þarf barnið heldur ekki að fá svarið hér og nú. Það getur verið gott fyrir barnið að þurfa að bíða. Þannig lærir það þolinmæði. Svarið sem þú getur gefið barninu gæti verið: „Ég ætla að hugsa málið og læt þig vita eftir matinn“ eða „Ég ætla að tala við pabba þinn/mömmu þína og svara þér svo.“
Ef barnið höndlar ekki að þurfa að bíða og kvartar yfir því eða tekur jafnvel reiðikast er svarið einfalt: „Ef þér finnst ekki þess virði að bíða eftir svarinu getur þetta ekki verið þér mikilvægt. Svarið mitt er því nei, þú getur ekki fengið það sem þú baðst um.“

Samheldni og samskipti foreldra
Þegar tekið er á svona kringumstæðum af festu og barnið sér að það kemst ekki upp með að fara á bak við foreldra sína á þennan hátt mun það gefast upp á að reyna og hættir því. Það er ekki þar með sagt að björninn sé unninn. Það þýðir í raun einfaldlega að barnið reynir nýja aðferð til að fá vilja sínum framgengt.
Þá reynir enn og aftur á samheldni og samskipti foreldranna. Séu þeir nógu duglegir að tala saman og miðla upplýsingum um líf barnsins sjá þeir fljótlega hvað barnið er að reyna. Þá þurfa foreldrarnir að ákveða hvernig best er að taka á því … af festu og mildi.
________________________
Fjalar Freyr Einarsson,
aga- og uppeldisráðgjafi
www.agastjornun.is

Kæru Mosfellingar.
Íbúalýðræði er eitt af stefnumálum Vina Mosfellsbæjar því við vitum að íbúarnir eru sérfræðingar í nærumhverfinu.
Það gleður okkur því að samráðsverkefnið Okkar Mosó 2019 var sett af stað eftir góðan árangur sem varð af verkefninu Okkar Mosó 2017, en þá var kosið á milli 25 hugmynda og komust tíu hugmyndir til framkvæmda. Má þar nefna fjölgun bekkja fyrir eldri borgara, ungbarnarólur á róluvelli bæjarins, fuglafræðslustíg meðfram Leirvogi og strandblakvöll á Stekkjarflöt. Í þeim kosningum nýttu sér um 14% íbúa kosningarétt sinn en nú skulum við gera enn betur.

Markmiðið með verkefni sem þessu er að fá almenning til þátttöku í lýðræðislegri umræðu og ákvarðanatöku. Okkar Mosó er tilvalinn staður fyrir íbúa til að koma með bæði skemmtilegar hugmyndir svo og góðar ábendingar að nýframkvæmdum og viðhaldsverkefnum og í ár var ekki skortur þar á. Eiga þeir sem settu fram hugmyndir eða bentu á þörf verkefni þakkir skildar.
Í greinargerð með fjárhagsáætlun Mosfellsbæjar fyrir árið 2019 var ákveðið að setja í pott 35 milljónir til verkefnisins. Hugmyndasöfnun er lokið og bárust alls 113 frábærar tillögur.
Hugmyndirnar voru metnar af sérfræðingum á umhverfissviði Mosfellsbæjar og varð niðurstaðan framsetning á 30 hugmyndum sem Mosfellingar geta nú kosið um og veitt því verkefni sem þeir hafa áhuga á sérstakt brautargengi. Verkefnin verða síðan boðin út og framkvæmd á tímabilinu júní 2019 til október 2020.
Hugmyndirnar í ár eru allt frá betri lýsingu á göngustíga, leiksvæði í Helgafellshverfi, ærslabelg við íþróttahúsið að Varmá, skautasvell á Miðbæjartorgi og sjálftæmandi flösku- og dósatunnur, svo eitthvað sé nefnt.

Rafræn kosning er hafin og stendur yfir til 28. maí nk. Ég vil hvetja Mosfellinga til að taka þátt í þessu skemmtilega verkefni og hafa þannig áhrif á nærumhverfi okkar.
Allir íbúar sem hafa lögheimili í Mosfellsbæ geta tekið þátt og vil ég sérstaklega geta þess að kosningin er opin öllum sem verða 15 ára eða eldri á árinu 2019.
Kosning og nánari upplýsingar eru á vefsvæðinu mos.is/okkarmoso.

Tökum þátt, því með íbúalýðræði byggjum við upp betri bæ.

Margrét Guðjónsdóttir
Höfundur er varabæjarfulltrúi Vina Mosfellsbæjar og aðalmaður í lýðræðis- og mannréttindanefnd.

Mosfellsbær býður starfsmönnum sínum að sækja fjölbreytta íþróttatíma, þeim að kostnaðarlausu. Er þetta liður í að hvetja alla starfsmenn til að hreyfa sig með reglubundnum hætti, bæta heilsufar sitt, vellíðan og hreysti.
Þetta hefur mælst vel fyrir og hafa starfsmenn sótt tíma í jóga, vatnsleikfimi, Peak Pilates og nú bætast skokk- og hlaupahópar við fram á sumar.
Mosfellsbær hóf einnig að bjóða starfsmönnum sínum samgöngustyrk árið 2018 og hvetja þannig starfsmenn til að bæði hreyfa sig meira og nota vistvænan ferðamáta til og frá vinnu í a.m.k. 80% tilvika eða fjóra daga í viku.

Nú er að hefjast árlegt heilsu- og hvatningarverkefnið „Hjólað í vinnuna“. Meginmarkmið átaksins „Hjólað í vinnuna“ er að vekja athygli á virkum ferðamáta sem heilsusamlegum, umhverfisvænum og hagkvæmum samgöngumáta.
Allir sem nýta eigin orku til að ferðast til og frá vinnu eru gjaldgengir þátttakendur þ.e. hjóla, ganga, hlaupa, nota línuskauta/hjólabretti o.s.frv. Þeir sem nota almenningssamgöngur geta einnig tekið þátt en þá er skráð sú vegalengd sem gengin/hjóluð er til og frá stoppistöð.
Starfsmenn Mosfellsbæjar eru hvattir til að taka virkan þátt í átakinu og sækja þá einnig um samgöngustyrk. Mosfellsbær verður með hvatningarstöðvar á eftirtöldum dögum/stöðum þar sem þeir sem „Hjóla í vinnuna“ geta stoppað við eftir hjólatúrinn og fengið sér hressingu við skemmtilega tónlist áður en haldið er til vinnu.

HREYFUM OKKUR INN Í SUMARIÐ!
Mosfellsbær – Heilsueflandi samfélag

Hanna Guðlaugsdóttir
Mannauðsstjóri Mosfellsbæjar

Við undirritaðar vinnum í Varmárskóla og erum stuðningsfulltrúar. Við erum stoltar af því vinna í Varmárskóla og þar ríkir góður vinnuandi.
Okkur og fleirum þykir miður þessi neikvæða umræða um vinnustaðinn okkar, rúmlega 800 nemenda og 150 annarra starfsmanna sem hefur verið undanfarið. Í Varmárskóla starfar frábært starfsfólk sem leggur mikið á sig.
Í Stundinni birtist bréf sem byrjar á þessa leið: „Foreldrar og kennarar barna í Varmárskóla eru ósáttir við skólastjórnendur.“ Þótt við séum ekki kennarar við skólann þá vitum við að það er engin óánægja meðal starfsfólks með skólastjórnendur. Kannski er pistlahöfundurinn að vitna í starfsmann sem er löngu hættur störfum?
Mikil umræða hefur verið um myglu í skólanum, við starfsfólkið höfum verið mjög vel upplýst um gang mála. Haldnir hafa verið fundir með okkur starfsfólki með umhverfissviði bæjarins. Það hafa fundist rakaskemmdir sem er kannski ekki óeðlilegt í gömlu skólahúsnæði en reynt hefur verið að laga það og telja menn að það hafi tekist vel til en það þarf alltaf að vera á tánum í þessum málaflokki. Það er ekkert óeðlilegt að viðhald fari fram, ekki síst í húsnæði sem er notað kvölds og morgna.
Húsnæðið okkar nýta kórar og bekkjarfulltrúar eru duglegir að gera eitthvað skemmtilegt með krökkunum eftir að skóla lýkur. Það vekur furðu okkar að spyrja á pólitískri Face­book-síðu hér í bæ hvort fólk mæli með skólanum. Á síðu þar sem einmitt hefur verið ítrekað fundið að skólanum í einu og öllu. Að sjálfsögðu koma mismunandi sjónarmið eins og samfélagið er uppbyggt. Sum svörin dæma sig sjálf og það er dapurt að sjá einstaklinga kasta fram fullyrðingum sem ljóst er að skólinn getur ekki tjáð sig um.
Fullyrt er að það sé allt morandi í einelti og ekki tekið á því. Við skólann starfar mjög öflugt eineltisteymi sem fundar um leið og mál koma upp og setja í ferli. Málin eru hinsvegar ekki alltaf leysanleg ef heimilin koma ekki með í þá vegferð. Sumt á sér stað utan skóla, í netheimum og þar þurfa heimilin að stíga fast niður.
Einnig er talað um að það sé engin sérkennsla lengur í skólanum! Hvaðan fá aðilar þær upplýsingar? Í Varmárskóla yngri deild er stoðþjónustan örugglega með þeim allra bestu sem þekkist á landinu. Þar starfar 18 stuðningsfulltrúar, þrír sérkennarar, einn þroskaþjálfi og einn iðjuþjálfi.
Að auki hafa margir kennarar og stuðningsfulltrúar það hlutverk að vera lestrarstuðningur við þá nemendur sem ekki hafa náð lestrarviðmiðum og þurfa auka þjálfun. Við erum með Varmárstofu sem þjónustar nemendur meðal annars með einhverfu og aðrar raskanir.

Við erum stolt af skólanum okkar og teljum okkur vera að vinna gott starf. Uppbyggileg gagnrýni er að sjálfsögðu gild en þegar hún verður til niðurrifs hefur hún þá ekki snúist í andhverfu sína?

Fyrir hönd stuðningsfulltrúa við Varmárskóla
Margrét Gróa Björnsdóttir , Ása Þ. Matthíasdóttir, Birgitta
Jóhannsdóttir, Sandra Rut Falk og Sigríður F. Jónbjörnsdóttir

Ársreikningur fyrir árið 2018 var samþykktur nýverið í bæjarstjórn. Niðurstaða hans var góð og allar lykiltölur jákvæðar. Ástæðan er fyrst og fremst hagstæð ytri skilyrði.
Rekstrarafgangur A og B hluta er um 800 milljónir en það eru rífleg frávik frá upphaflegri áætlun með viðaukum sem var upp á rúmlega 300 milljónir. Það er umtalsverð upphæð. Líkt og árið 2017 skýrist niðurstaðan aðallega af eftirfarandi þáttum. Fjölgun íbúa um 8% var vel umfram áætlanir og tekjur íbúa hærri sem þýðir hærri útsvarsgreiðslur inn í bæjarsjóð. Þá voru vextir og verðbætur lægri en gert hafði verið ráð fyrir vegna lægri verðbólgu. Sala byggingarréttar var einnig talsvert meiri en gert var ráð fyrir.

Pólitísk forgangsröðun
Starfsfólk bæjarins hefur, eins og ávallt áður, unnið ötullega að því að halda rekstrinum innan þess ramma sem settur er í stefnumörkun þess pólitíska meirihluta sem ræður ferðinni í bæjarstjórn Mosfellsbæjar. Það sem er gert og ekki síður það sem látið er ógert er hvort tveggja byggt á pólitískum ákvörðunum meirihluta Vinstri grænna og Sjálfstæðisflokks og á ábyrgð þeirra.
Meginhlutverk sveitarfélagsins er að veita íbúum þjónustu og til þess nýtum við útsvarið. Sú fjölgun íbúa sem við verðum vitni að þessi árin, sem og aðhald undanfarinna ára í rekstri og viðhaldi, hrópar á innspýtingu í þjónustu bæjarins og viðhald fasteigna. Í því samhengi nefni ég sérstaklega skólana okkar, innra starf og húsnæði, en Samfylkingin hefur á umliðnum árum margrætt nauðsyn þess að bæta þar um betur.

Undanfarið ár hefur umræðan um slakt viðhald Varmárskóla verið ofarlega á baugi. Sem betur fer hefur bæjarstjórn öll loks samþykkt að fara í gagngera úttekt og viðhald á því húsi sem og öðrum byggingum sem hýsa skólastarf. Það er bara sérstakt að pólitískur meirihluti VG og Sjálfstæðisflokks skuli ekki hafa brugðist við fyrr. Vanrækt viðhald er ávísun á stóraukinn kostnað í framtíðinni. Opin umræða um það sem aflaga fer eða er talið ábótavant er jafn mikilvæg og jafnvel mikilvægari en umræða um það sem tekst vel. Með gagnsæi, opinni umræðu, samstarfi og upplýsingamiðlun má koma í veg fyrir að umræðan lendi í öngstræti. Vonandi tekst að lægja öldurnar í kringum Varmárskóla því nemendur og starfsfólk skólans þurfa vinnufrið.
Bætt þjónusta innan skólanna er að sjálfsögðu eilífðarverkefni, þar verður seint komið að endastöð. Öflug þjónusta innan skólakerfisins getur skipt sköpum fyrir þroska og framtíð nemendanna. Í svo ört stækkandi bæjarfélagi hlýtur fræðslukerfið að þurfa að bæta í og auka þjónustuframboð. Ég nefni sérstaklega sérfræðiþjónustu sem brýn nauðsyn er á að efla.

Fæðslumálin eru fyrirferðarmest í rekstri bæjarins en síaukinn fjöldi bæjarbúa kallar á að félagsþjónustan og tómstundastarf í heilsueflandi samfélagi fái aukinn stuðning svo ekki sé minnst á almennt viðhald mannvirkja og gatna eða mál málanna, umhverfismálin. Í öllum þessum málaflokkum þarf að taka til hendinni.
Eins og ég nefndi hér áður þá byggjast ákvarðanir um rekstur bæjarins á pólitískri stefnu þeirra aðila sem mynda meirihluta í bæjarstjórn, Vinstri grænna og Sjálfstæðisflokks. Þar er þjónustustigið í raun ákveðið og þar hvílir ábyrgðin.

Anna Sigríður Guðnadóttir
bæjarfulltrúi Samfylkingarinnar