Reynir Örn Pálmason og hestur hans Greifi frá Holtsmúla urðu heimsmeistarar í fimmgangsgreinum á heimsmeistaramóti íslenska hestsins í Danmörku

Íslendingar unnu til fernra gullverðlauna og tvennra silfurverðlauna í fullorðinsflokki á heimsmeistaramóti íslenska hestsins sem fram fór í ágúst í Herning í Danmörku en keppendur voru frá fjórtán löndum.
Einn keppendanna, Reynir Örn og hestur hans, Greifi frá Holtsmúla urðu heimsmeistarar í samanlögðum fimmgangsgreinum en þann titil hlýtur sá keppandi sem reynist vera með hæstu meðaleinkunn úr forkeppni í fimmgangi, slaktaumatölti og skeiðgrein.

Reynir Örn er fæddur í Reykjavík 17. apríl­ 1971. Foreldrar hans eru þau Jóna Hulda Helgadóttir sjúkraliði og Pálmi Þór Vilbergs húsasmíðameistari. Systkini Reynis eru þau Viðar Þór og María.

„Það var bara yndislegt að alast upp í Mosfellssveit, við fluttum hingað árið 1976 og ég á bara góðar minningar frá æskuárunum. Það voru nýbyggingar út um allt, fullt af timbri og öðru dóti til að byggja kofa og fleka. Maður var stanslaust úti í einhverjum leikjum eða að gera dyraat,” segir Reynir Örn og glottir.
Ég gekk í Varmárskóla og Gaggó Mos, við félagarnir fórum oft gangandi í hesthús foreldra minna eftir skóla og héngum þar en fórum svo ríðandi heim með skóladótið sem var mjög þægilegt því þá voru Arnartangi og Brekkutangi ystu göturnar í hverfinu.
Ég æfði fótbolta, handbolta og badminton á þessum tíma en svo tók hestamennskan alveg yfir.“

Útskrifaðist sem blikksmiður
„Eftir útskrift úr gagnfræðaskólanum tóku við nokkrar misheppnaðar tilraunir til að fara í menntaskóla en þær einkenndust mest af skrópi og hesthúsaferðum ásamt því að starfa á hinum og þessum stöðum.
Ég var svo atvinnulaus um tíma og ákvað að setja inn auglýsingu í Dagblaðið og óskaði eftir vinnu í þrjá mánuði því ég ætlaði mér aftur í skóla og bara læra eitthvað. Tveir svöruðu auglýsingunni, hamborgarastaður í Ármúla og Blikksmiðja í Kópavogi sem varð fyrir valinu. Ég lærði blikksmíði og útskrifaðist úr Iðnskólanum í Reykjavík 1994 en hef aldrei starfað við fagið því strax eftir útskrift bað ég um ársfrí og það frí stendur enn.“

Dvölin stóð yfir í átta ár
„Ég ákvað að fara í búfræði- og tamninganám að Hólum í Hjaltadal og áður en námi mínu lauk þar var mér boðið að fara til Svíþjóðar að þjálfa hesta í þrjá mánuði. Ég þáði boðið og fór út haustið 1996 eða strax eftir útskrift. Dvölin ytra ílengdist til muna því hún stóð yfir í átta ár eða til 2004 þá ákvað ég að drífa mig aftur á Hóla og klára reiðkennaranám.“

Draumur minn var að komast í sveit
„Eftir dvölina á Hólum flutti ég í Mosfells­bæinn og starfaði við reiðkennslu ásamt þjálfun hrossa. Reiðkennslan fór að mestu leyti fram erlendis og ég var að fara allt upp í 20 ferðir á ári, mest til Finnlands og Svíþjóðar. Það kom síðan að þeim tímapunkti að mér fannst orðið þreytandi að fara svona á milli, draumur minn var að komast í sveit.“

Hrossaræktarbúið Margrétarhof
„Ég hélt alltaf góðu sambandi við fjölskylduna sem ég vann hjá í Svíþjóð. Þeirra draumur var að eignast jörð á Íslandi og árið 2010 kom draumajörðin, Krókur í Ásahreppi, á sölu og þau keyptu hana. Strax var hafist handa við uppbyggingu og er þetta nú eitthvert glæsilegasta hrossaræktarbú á landinu með hesthús fyrir um 50 hross, reiðhöll með kennsluaðstöðu og gistirými fyrir gesti og gangandi, allt til mikillar fyrirmyndar.
Á búinu eru ræktuð hross undir ræktunar­nafninu Margrétarhof en nafnið vísar til ræktunar sem eigendurnir stunda á búgarði sínum í Svíþjóð.
Ég starfa sem bústjóri á þessu búi og lífið snýst um hesta. Við rekum alhliða þjálfunar­miðstöð, bjóðum upp á kennslu, bæði helgarnámskeið og einkatíma, ásamt því að hafa ávallt vel tamin hross til sölu. Mikill tími fer í keppnir og nánast um hverja helgi er eitthvað um að vera.”

Eiga von á barni í október
Unnusta Reynis er Aðalheiður Anna Guðjónsdóttir reiðkennari en þau eiga von á barni í október. Reynir á tvo syni frá fyrra sambandi, þá Arnar Frey viðskiptafræðing hjá WOW Air og Eið Örn sem er nemi.

Þetta er mikil upplifun
Reynir Örn er alinn upp í Hestamannafélaginu Herði og hefur starfað þar sem reiðkennari og sinnt félagsstörfum. Hann hefur verið valinn íþróttamaður Harðar sjö sinnum og er góð fyrirmynd ungu kynslóðarinnar.
Í sumar keppti hann á Heimsmeistaramóti íslenska hestsins í Herning í Danmörku en mótið er haldið á tveggja ára fresti. Ég spyr Reyni út í mótið en hann náði bestum árangri Íslendinga. „Það er gríðarleg stemning á svona móti og þetta er mikil upplifun, þarna eru fleiri þúsund áhorfendur. Ég fór með hestinn minn, Greifa frá Holtsmúla, og við unnum tvenn silfurverðlaun og eitt gull á mótinu.“

Kveðjustundin erfið
„Íslendingar mega ekki koma með hestana sína aftur til Íslands ef þeir fara með þá erlendis svo það var komið að leiðarlokum hjá okkur Greifa. Þetta var erfið stund, átta ára samvinna og það féllu nokkur tár. Ég hugga mig við það að hann fór á góðan stað og vonandi mun hann veita nýjum eiganda góðar stundir í framtíðinni.“
En hvað tekur nú við? „Það er að finna nýjan hest, byggja hann upp og mæta hnarr­reistur að tveim árum liðnum og verja titilinn,“ og með þeim orðum kveðjumst við.

Myndir og texti: Ruth Örnólfs

Tölvuteiknuð mynd af fjölbýlishúsunum sem rísa munu í Vefarastræti. Alls 55 íbúðir í tveimur húsum.

Verk­taka­fyr­ir­tækið MótX vinn­ur nú að því að reisa tvö ný fjöl­býl­is­hús í Helgafellshverfi. Um er að ræða þriggja til fjögurra hæða hús með samtals 55 íbúðum. 23 íbúðir við Vefarastræti 28-30 og 32 íbúðir við Vefarastræti 24-26.
„Við í MótX er mjög spenntir fyrir þessu verkefni hér í Mosfellsbæ, enda bærinn í örum vexti, innviðir góðir og bjart framundan.“ Eigendur MótX ehf. eru þeir Svanur Karl Grjetarsson, Vignir Steinþór Halldórsson og Viggó Einar Hilmarsson.

Í sátt við álfa og menn
„Hérna ætlum við að sinna markaðnum og íbúðir í réttum stærðum og á verði sem fólk ræður við,“ segir Vignir Halldórsson stjórnarformaður MótX. „Við höfum lengi haft augastað á þessu svæði enda flottar suðurhlíðar. Svo hyggst bæjarfélagið reisa hér leik- og grunnskóla í nágrenninu.
Við munum vinna þetta hratt og örugglega og ætlum okkur rúmt ár þetta. Við höfum mikla og góða trú á verkefninu.“
Vignir segist hvergi smeykur við álfa og huldufólk í sjálfum Sauðhól sem stendur við byggingarreitinn. „Ég held við náum þessu í mikilli vinsemd enda munum við koma fram við alla af virðingu,“ segir Vignir.
Verktakafyrirtækið MótX var stofnað 2005 og hefur byggt fjölda einbýlishúsa og fjölbýlishús í Kópavogi.

Guðjón Svansson
gudjon@kettlebells.is

Það er gott fyrir mann að hætta að gera það sem tekur frá manni orku og gera í staðinn það sem gefur manni orku. Því meiri orku sem maður hefur sjálfur, því meir getur maður gefið af sér. Hlutir geta líka tekið frá manni orku. Dýrir hlutir, fínir hlutir, hlutir með sögu, hlutir sem mann langar í, hlutir, hlutir sem mega ekki skemmast, hlutir sem mega ekki týnast. Dæmi: fíni spegillinn frá ömmu, iPhone 6 (bráðum 7), finnski vasinn, rétti hjólabúningurinn, dúnúlpan, fellihýsið og leðurstígvélin. Listinn er ótæmandi og mismunandi eftir lífstíl hvers og eins.

Alveg eins og það er frelsandi að losa sig úr orkutæmandi verkefnum er ótrúlega gott fyrir sálina að losa sig við alla þessa hluti. Hlutunum fylgja áhyggjur og óþarfa vesen. Áhyggjur skapa stress. Stress hefur bein áhrif á andlega og líkamlega heilsu. Því meira stress, því meira álag á líkamann. Þar af leiðandi er borðleggjandi að því færri hluti sem maður á og því færri hluti sem mann langar í, því betri er líkamleg heilsa manns. Mitt markmið, og ég er mjög nálægt því í dag, er að eiga svo fáa hluti sem mér er ekki sama um að ég geti pakkað þeim í stóran bakpoka. Það sem skiptir mig máli er að vera með fjölskyldunni og öðru góðu fólki, gera það sem ég elska að gera og reyna að hvetja aðra til þess að bæta líf sitt, láta drauma rætast.

Ég skora á þig að taka til í dótinu þínu. Losa þig við alla orkukrefjandi hluti, líka stóra spegilinn sem þú erfðir frá ömmu, henni er pottþétt sama þótt þú leyfir öðrum að njóta hlutanna hennar. Prófaðu svo að gera lista yfir þá hluti sem þú myndir setja í 60 lítra bakpoka, þá fáu hluti sem virkilega skipta þig máli.
Áfram veginn!

Heilsumolar Gaua
Mosfellingur 1. október 2015

Einar Hreinn matráður ásamt börnum á leikskólanum

Stofnanir Mosfellsbæjar taka þátt í heilsueflandi samfélagi.

„Heilsueflandi samfélag er verðugt verkefni fyrir bæjarfélag og gefur ótrúlega mörg tækifæri fyrir íbúa og starfsmenn Mosfellsbæjar,“ segir Ingunn Stefánsdóttir leikskólakennari á Reykjakoti.
„Margt er mjög vel gert í bænum og fróðlegt að heyra af öllu því góða starfi sem fer fram í stofnunum Mosfellsbæjar. Ennfremur er stuðningur og vilji til góðra verka frá stjórnsýslu bæjarins sem er sérlega mikilvægt í allri vinnu. Hér verður aðeins fjallað um fyrsta áhersluþáttinn í verkefninu en það er matur og næring.“

Áhersla á hreint mataræði
„Í leikskólanum Reykjakoti er mikið borðað, talað og hugsað um mat. Matarilmur berst daglega um hverfið og gefur falleg fyrirheit um daglegt brauð og hádegismat. Maturinn er unninn frá grunni úr fersku hráefni og allt sem hægt er keypt í heimabyggð. Mikil áhersla er lögð á hreint mataræði sem eldað er og bakað á staðnum. Þannig verður lítið um aukefni í matnum og öll innihaldsefni eru þekkt.“
Síðustu ár hafa leikskólabörnin notið góðs af visku og færni Jóhönnu B. Magnúsdóttur eða „ömmu náttúru“ við ræktun grænmetis í matjurtagarði skólans og skilar sú vinna sér í sneisafullum beðum af girnilegu grænmeti. Nú er uppskerutími og börnin taka upp grænmetið og borða það hrátt eða færa Einari matráði sem nýtir það í eldhúsi Reykjakots.
„Þetta hefur verið mjög skemmtilegt og lærdómsríkt fyrir börnin og í framhaldi kviknaði hugmynd að nýju þróunarverkefni sem er hafið í skólanum. Verkefnið er unnið í anda Jamie Oliver sem hefur um árabil unnið að breytingum skólamáltíða í Bretlandi, Bandaríkjunum og Ástralíu.“
Verkefnið kallast Kitchen Garden Project og er ætlað að kenna börnum frá leikskólaaldri um ræktun, matreiðslu og næringu í von um að bæta langtímamatarvenjur þeirra, heilsu og lífsgæði. Einar hefur fengið ráðgjöf frá teymi Jamie Olivers sem og hrós fyrir hversu vel unnið er að matarmenningu barna Reykjakots. Einar fær litla hópa í eldhúsið til sín vikulega þar sem hann kennir börnunum matreiðslu og matarfróðleik í anda Jamie Olivers.

Spennandi verkefni
„Til stuðnings verkefninu er ennfremur litið til fræðimanna sem benda á að börn fæðast ekki með getu til að velja næringarríka fæðu heldur eru matarvenjur lærðar með reynslu og menntun. Því er brýnt að kenna börnum frá unga aldri að hollur matur nærir líkamann og það er skemmtilegt að gera tilraunir í eldhúsinu. Ótrúlega fjölbreytt upplifun getur orðið við matargerð og fá börnin til dæmis að smakka alls konar krydd og grænmeti. Þetta er afar spennandi og verður gaman að fylgja þessu verkefni eftir,“ segir Ingunn Stefánsdóttir.

Mynd af Salóme systur Kristínar og ber titilinn Forseti alþingis.

Þann 18. september kl. 17 opnar sýning á verkum eftir Kristínu Þorkels­dóttur í Listasal Mosfellsbæjar. Á sýningunni sem ber yfirskriftina ÁSÝND samferðafólks á lífsfleyinu er sjónum fyrst og fremst beint að portrettverkum Kristínar. Sýningin spannar allt frá eldri teikningum að nýjum verkum og einnig verða til sýnis skissubækur, dagbækur og vinnuteikningar. Kristín á langan feril að baki bæði sem grafískur hönnuður og sem myndlistarmaður. Eftir Kristínu liggur umfangsmikið safn grafískrar hönnunar og má þar nefna hönnun hennar á íslenskum peningaseðlum og íslenska vegabréfinu. Auk þess hefur Kristín hannað fjöldann allan af vöruumbúðum, bókakápum og merkjum. Hún teiknaði merki Mosfellsbæjar árið 1968, það er tilvísun í sögnina um silfur Egils. Sýningin stendur til 10. október. Sýningarstjóri er Birta Fróðadóttir. Meðfylgjandi mynd er af Salóme systur Kristínar og ber titilinn Forseti alþingis.

Hrönn Svansdóttir.
Mynd/Ruth

Hrönn Svansdóttir framkvæmdastjóri CrossFit Reykjavíkur hvetur alla til að mæta hverju augnabliki með jákvæðu hugarfari.

CrossFit Reykjavík var stofnað í árslok 2009 í 27 fm bílskúr í Mosfellsbæ. Mikil bylting hefur orðið í þekkingu á CrossFit á Íslandi og ötulum iðkendum fjölgar stöðugt. Árið 2010 var stöðin því stækkuð og flutt um set.
Framkvæmdastjóri Lesa meira →

Sáttmálanum komið fyrir í Íslandslíkani.

Illugi Gunnarsson mennta- og menningarmálaráðherra og Haraldur Sverrisson bæjarstjóri í Mosfellsbæ undirrituðu á dögunum Þjóðarsáttmála um læsi.
Undirritunin, sem fór fram á Gljúfrasteini, skuldbindur ríkið og sveitarfélagið til að vinna að því með öllum tiltækum ráðum að ná settu markmiði um læsi.
Markmiðið er að öll börn sem hafa til þess getu, lesi sér til gagns við útskrift úr grunnskóla. Ráðherra lagði þó áherslu á að það væru áfram skólastjórnendur sem veldu þær aðferðir sem þeim þykja vænlegar til árangurs á hverjum stað.
Á myndinni má sjá fulltrúa Mosfellsbæjar, Kjósarhrepps og Heimilis og skóla ásamt ráðherra og börnum með Íslandslíkan sem varðveitir eintak af agnarsmáum samningi sem hvert sveitarfélag staðfestir vegna sáttmálans.

Hér fyrir neðan má sjá myndbrot af Ingó Veðurguð taka lagið „Gott að lesa“.
Hér er hægt að fylgjast með Mosfellingi á Instagram.

Það er gott að lesa. Átak í læsi hrint af stað á Gljúfrasteini í dag.

A video posted by Mosfellingur (@mosfellingur) on Aug 24, 2015 at 9:17am PDT