Nýársávarp bæjarstjóra Mosfellsbæjar

Kæru Mosfellingar!
Það er góður siður við áramót að líta um öxl, rifja upp það sem gekk vel og ekki síður skoða hvað mun mæta okkur á nýju ári.
Árið 2021 var í raun gjöfult ár þótt annað árið í röð þyrftum við að glíma við afleiðingar kórónuveirunnar í okkar daglega lífi. Efnahagslífið tók að rétta úr kútnum, atvinnuleysi fór minnkandi og hagur sveitarfélaganna batnaði lítillega. Við eigum þó nokkuð í land með að ná okkar styrk frá því áður en veiran skæða fór að herja á okkur. Þegar þessi orð eru skrifuð eru smittölur í hæstu hæðum og víðtækar samkomutakmarkanir í gildi. En góðu fréttirnar eru þær að hlutfall smitaðra sem þurft hafa á sjúkrahúsinnlögn að halda er mun lægra en áður í faraldrinum og álit sérfræðinga er að það sé því að þakka hversu hátt hlutfall þjóðarinnar hefur látið bólusetja sig. Bólusetning er besta vörnin gegn Covid-19. Ég hef þá trú að þrátt fyrir háar smittölur þessa dagana þá verði ekki langt að bíða eftir því að þessi faraldur verði að mestu leyti yfirstaðinn.

Metnaðarfull áætlun og þjónustan varin
Líkt og á árinu 2020 reyndi mikið á skipulag starfsemi Mosfellsbæjar á árinu 2021. Það hefur verið mikið um sóttvarnarreglur og samkomutakmarkanir á árinu og veiran komið og farið ef svo má segja. En þrátt fyrir það hefur tekist að halda úti órofinni starfsemi sveitarfélagsins og þjónustan hefur verið varin.
Það hefur oft á tíðum ekki verið einfalt verk en starfsfólk og stjórnendur Mosfellsbæjar hafa staðið vaktina af einstakri eljusemi, ábyrgð og festu. Það eru mikil verðmæti fyrir samfélagið okkar hér hversu vel hefur tekist til við rekstur og þjónustu bæjarins á þessu krefjandi tímum. Fyrir það vil ég þakka starfsfólki bæjarins kærlega fyrir.

Fjárhagsáætlunin fyrir árið 2022 er metnaðarfull. Í henni er gert ráð fyrir að afgangur verði af rekstri bæjarins sem nemi rúmum 200 m.kr. Það er viðsnúningur frá síðustu tveimur árum þegar töluverður halli hefur verið á rekstrinum sem orsakaðist að mestu vegna tekjufalls í þjóðfélaginu vegna kórónuveirunnar. Fjárfestingar verða í sögulegu hámarki en gert er ráð fyrir að fjárfest verði fyrir rúmar 2.900 m.kr. á árinu 2022.
Þar ber hæst að hafist verður handa við byggingu nýs 120 barna leikskóla í Helgafellshverfi, byggingu íþróttahúss við Helgafellsskóla og nýja þjónustubyggingu við íþróttamiðstöðina að Varmá. Þetta eru dæmi um framkvæmdir sem haldast þétt í hendur við öra stækkun sveitarfélagsins. Allt er þetta gert til þess að mæta þörfum íbúa í nútíð og framtíð og á þátt í að auka lífsgæði og velferð þeirra.
Á nýju ári munu álögur á íbúa og fyrirtæki ekki hækka að raungildi og lækka í nokkrum tilfellum. Þjónusta við íbúa hefur eflst jafnt og þétt og þar er sígandi lukka best. Sú fyrirhyggja og ráðdeild sem sýnd hefur verið er ástæða þess að við sjáum aftur fram á bjartari tíma í rekstri bæjarins en við verðum áfram að vera vakandi yfir rekstrinum. Ég vil leyfa mér að taka byggingu Helgafellsskóla, sem nú er komin í rekstur, sem dæmi um ráðdeild en skólinn var afhentur á réttum tíma og kostnaðurinn var 2% undir kostnaðaráætlun. Slíkur árangur næst ekki af sjálfu sér og liggur ekki hjá einum einstaklingi heldur vaskri sveit starfsmanna og stjórnenda.

Persónuleg tímamót
Í haust tók ég þá ákvörðun að gefa ekki kost á mér til endurkjörs í bæjarstjórn í kosningunum sem eru fram undan. Ég mun því láta af störfum sem bæjarstjóri í vor. Ég hafði leitt hugann að því fyrir fjórum árum að þetta kynni að verða mitt síðasta kjörtímabil í bæjarstjórn Mosfellsbæjar. Ég hef verið bæjarstjóri frá árinu 2007, lengst allra sem gegnt hafa þessu embætti í Mosfellsbæ. Það hefur verið einstakur heiður að fá að gegna þessu starfi allan þennan tíma og fá að vinna fyrir samfélagið hér í Mosfellsbæ.
Íbúum hefur fjölgað um helming á þessum tíma og gríðarleg uppbygging átt sér stað. Heildarfjárfesting bæjarfélagsins nemur rúmlega 23 milljörðum króna á tímabilinu. Allt hefur þetta verið unnið á sterkum grunni samstarfs við samstarfsflokk okkar og skýrri framtíðarsýn okkar um það hvað Mosfellsbær stendur fyrir. En þess má geta að á þessu tímabili hefur Mosfellsbær mótað sér heildarstefnu með gildum bæjarins, framtíðarsýn og stefnuáherslum og svo hefur stefnumótun átt sér stað í öllum málaflokkum á grundvelli þessarar heildarstefnu.

Fjárfestingin er að stofni til í skóla- og íþróttamannvirkjum og ef litið er yfir farinn veg þá má segja að eftirfarandi beri hæst:
Af skólamannvirkjum má nefna byggingu 2. og 3. áfanga Lágafellsskóla, stækkun Huldubergs, byggingu Krikaskóla, Framhaldsskólans, Höfðabergs og Leirvogstunguskóla. Nýjasta skólamannvirkið er svo Helgafellsskóli sem er stærsta einstaka framkvæmdin sem Mosfellsbær hefur ráðist í.

Af íþrótta- og tómstundamannvirkjum má nefna byggingu Lágafellslaugar, nýtt gras og stúka á gervigrasvöllinn, byggingu fimleikahúss og tengibyggingu með félags- og skrifstofuaðstöðu fyrir Aftureldingu, stækkun golfvallarins og nýs golfskála, reiðhöll Hestamannafélagsins Harðar, nýtt skátaheimili og svo síðast en ekki síst, fjölnota knattspyrnuhúsið okkar Fellið.

Á sviði velferðarmála má nefna stækkun félagsmiðstöðvar eldri borgara á Hlaðhömrum, byggingu hjúkrunarheimilisins Hamra og stofnsetningu áfangaheimilisins Króks, heimilis fyrir börn og frístundaklúbbsins Úlfsins.

Það sem er mjög mikilvægt í þessu samhengi er að af þessum 23 milljörðum sem varið hefur verið í þessar fjárfestingar hefur því sem næst helmingur fjárins komið úr rekstrinum sjálfum eða sem veltufé frá rekstri. Það er einstakur árangur á alla mælikvarða.

En mest um vert er að bæjarbúar eru stoltir af sínu sveitarfélagi, þeir standa vörð um samfélagið og sú þjónusta sem við veitum er í fremstu röð samkvæmt mælingum. Það er mikill heiður að vera treyst fyrir því að vera bæjarstjóri og vinna þannig fyrir samfélagið hér í Mosfellsbæ. Ég hef notið hvers dags og er afar þakklátur fyrir að hafa verið treyst fyrir þessu verkefni. Ég mun gegna starfi bæjarstjóra af trúmennsku þar til í vor þegar kjörtímabilinu lýkur.

Framtíðin er björt í Mosfellsbæ og með gildin okkar góðu VIRÐINGU – JÁKVÆÐNI – FRAMSÆKNI og UMHYGGJU að leiðarljósi eru okkur allir vegir færir sem fyrr.

Gleðilegt og gæfuríkt nýtt ár kæru Mosfellingar.

Haraldur Sverrisson
Bæjarstjóri

„Brotin loforð alls staðar, brotin hjörtu á dimmum bar, brotnar sálir biðja um far, burt, burt heim.“
Texti Bubba Morthens í samnefndu lagi lýsir stöðu fjölmargra sem geta ekki borið hönd fyrir höfuð sér, átta sig ekki á hvers vegna minna er á milli handanna og ekki sé hægt að bjóða börnum sínum betra viðurværi. Verst er þegar aðilar í samfélagi okkar gefa sig út fyrir að vera bestir til að veita bjargirnar og þeir langbestu til að gæta fjárhags ríkis og sveitarfélaga án innstæðu. Hefur það verið raunin? Já, svo sannarlega. Flestir stjórnmálamenn, þ.á m. öll vinstri stjórnin 2009-2013, voru tilbúnir að láta almenning borga verðbætur langt umfram það sem eðlilegt var. Aðeins einn aðili kom þarna til móts við fólkið í landinu, þ.e. Sigmundur Davíð Gunnlaugsson ásamt þeirri ríkisstjórn sem hann stýrði eftir kosningarnar 2013.
Á tímabili eftir hrun fjármálakerfisins 2008 mátti sjá fulltrúa margra flokka ganga gegn hagsmunum almennings og voru tilbúnir, jafnvel sem þingmenn og ráðherrar, að ganga ansi langt í að brjóta bæði loforð og lög í landinu gagnvart þeim sem þá áttu um sárt að binda og misstu eignir sínar og lífsviðurværi.
Nýlega kom ég í pontu í bæjarstjórn Mosfellsbæjar og gerði athugasemd við brotin loforð meirihlutans í Mosfellsbæ þegar kemur að leikskólagjöldum. Á fundi bæjarstjórnar númer 795, þann 8. desember 2021, vitnaði ég í loforð meirihlutans sem lesa má í málefnasamningi V- og D-lista frá 5. júní 2018 en þar segir orðrétt: ,,Við viljum: að leikskólagjöld lækki um 25% á kjörtímabilinu án tillits til verðlagshækkana.“
Þess ber að geta að undir þennan málefnasamning ritar oddviti VG og Sjálfstæðisflokksins. Hver er raunin. Jú, raunin er sú að lækkunin nam aðeins 14,3% en ekki 25% eins og lofað var. Í ræðu bæjarstjórans á fundi nr. 795 í bæjarstjórn segir aftur orðrétt (feitletrun mín):
,,Sko, varðandi þetta síðasta, lækkun leikskólagjalda þá…þá…he…þá er mér ljúft að svara því. Það vill svo bara til ágæti bæjarfulltrúi að…að það er búið að gera meira en loforðið segir til um. Loforðið segir til um það að lækka leikskólagjöld um 25% að…að…án tillits til verðlags. Það er að segja að þetta þýðir það að 25 prósentin eru ekki…eru með verðlagsbreytingum inn í. Við erum búin að lækka þau um 5% á ári og sem þýðir þá það að við erum búin að lækka þau meira og sennilega töluvert meira heldur en…heldur en þetta sem stendur í málefnasamningnum segir. Þannig að það sé nú á hreinu.“
Undir þetta tók oddviti VG og botnaði ekkert í athugasemd minni, þrátt fyrir að hafa lesið og vitnað sjálfur beint í framangreindan málefnasamning.
Hvað gengur þessu fólki til? Þess ber að geta að þeir sem keppa nú um oddvitasætið í Sjálfstæðisflokknum, formaður bæjarráðs og formaður fræðslunefndar, gerðu enga athugasemd við málflutning þennan. Hvers vegna?
Fólk sem gefur sig út fyrir að vera í stjórnmálum verður að taka ábyrgð. Þetta fólk sem að framan er getið er ekki að taka ábyrgð og beinlínis stunda það að ganga gegn eigin samningum og gera illt verra með því að svíkja loforð til kjósenda og reyna að draga fjöður yfir eigin villur, mistök og vanþekkingu.
Hér er verið að brjóta loforð á barnafólki í Mosfellsbæ. Vilja bæjarbúar kjósa slíkt fólk til framhaldandi valda.

Sveinn Óskar Sigurðsson,
bæjarfulltrúi Miðflokksins í Mosfellsbæ.

Kæru Mosfellingar
Hinn 1. janúar næstkomandi verða breytingar á ákveðnum lyfjaendurnýjunum hjá Heilsugæslu Mosfellsbæjar. Ávanabindandi sterk verkjalyf (svo kölluð ópíöt) og ávanabindandi róandi lyf (benzódíasepín) verður ekki hægt að endurnýja nema í bókuðum tíma hjá lækni. Ekki verður hægt að endurnýja lyfin á vaktinni, gegnum síma eða rafrænt gegnum Heilsuveru. Hægt verður að skrifa út lyfin til að hámarki þriggja mánaða í senn, en að þeim tíma liðnum þarf nýtt mat læknis til að ákvarða þörf á frekari meðferð.
Mikil aukning hefur verið á ávísunum slíkra lyfja á síðustu árum (sjá grein í Læknablaðinu 10. tbl. 107. árg. 2021. „Þróun lyfjaávísana á ópíóíðalyf í heilsugæslu á árabilinu 2008 til 2017“ eftir Sigríði Óladóttur og félaga). Mikilvægt er að ávísun lyfjanna sé byggð á reglubundinni skoðun og þörf á lyfjunum endurmetin reglulega. Lyfin geta valdið þreytu, minnisleysi, ávanabindingu, hægðatregðu og ógleði svo fátt sé nefnt. Einnig skerða lyfin færni fólks til aksturs í umferðinni. Þá hefur verið sýnt fram á það að lyfin séu sjaldnast gagnleg í langvinnum verkjavandamálum. Aldraðir eru í sérstakri hættu m.t.t. þessara lyfja þar sem þau auka byltu- og beinbrotahættu og auka hættu á óráðsástandi.

Með þessum breytingum á ávísanakerfinu er það von okkar á Heilsugæslu Mosfellsbæjar að auka öryggi okkar skjólstæðinga og veita betri meðferð en áður.
Rannsókn frá Danmörku (Jorgensen VR. An approach to reduce benzodiazepine and cyclopyrrolone use in general practice : a study based on a Danish population. CNS Drugs. 2007;21(11):947-55) og reynsla frá Heilbrigðisstofnun Vesturlands, Borgarnesi hafa sýnt fram á að dregið hefur úr notkun þessara lyfja með svipuðum aðgerðum.

Dæmi um lyf sem fara undir breytingarnar eru:
Ópíöt: Parkodin, Parkodin forte, Tramol, Tradolan, Oxycontin, Oxynorm, Contalgin.
Benzódíasepín: Sobril, Albrazolam, Stesolid.

Með von um góðar viðtökur og góða samvinnu.
F.h. Hg Mos

Ívar Marinó Lilliendahl læknir
Hörður Ólafsson heimilislæknir og fagstjóri lækninga

Í Mosfellsbæ hefur íbúafjölgun orðið hvað mest á meðal allra sveitarfélaga á landinu enda kostirnir við að búa í Mosfellsbæ augljósir.
Hér er gott að ala upp börn því Mosfellsbær heldur vel utan um börnin sín. Hér eru framúrskarandi leik- og grunnskólar, fjölbreytt og gott íþrótta – og tómstundastarf og síðast en ekki síst mikil tenging við náttúruna.
Fólk sem flytur í Mosó veit að hér svífur sveita­rómantíkin yfir vötnum í þessu heimilislega samfélagi þar sem nær allir þekkjast. Bærinn hefur í áraraðir verið meðal þeirra sveitarfélaga sem mælast í könnunum með mesta ánægju íbúa og hefur þessi hraða íbúafjölgun ekkert dregið úr ánægjunni.

Blómstrandi mannlíf
Með þéttingu byggðar á miðbæjarsvæði og í nýjum miðbæjargarði vonumst við til þess að geta laðað til okkar veitingahús og fleiri fyrirtæki því blómstrandi mannlíf, íbúafjölgun, fjölgun fyrirtækja og bætt þjónusta haldast í hendur. Mosfellsbær er grænn bær í sókn sem vill fá til sín fyrirtæki sem veðja á græna nýsköpun og þjónustu.
Framtíðartækifærin felast í sterkri tengingu við náttúruna og er Mosfellsbær þar fremstur í flokki sveitarfélaga hvað þau tækifæri varðar. Tækifæri í sjálfbærri matvælaframleiðslu eru hér allt í kringum okkur og er draumurinn að hér verði öflugur bændamarkaður í bland við matarupplifun, jafnvel í mathöll sem enga á sér líka. Matarupplifun í bland við menningu og listir er eftirsóknarverð upplifun fyrir alla fjölskylduna.

Græna byltingin er hafin
Vitað er að tækniþróun og COVID-19 hafa breytt hugmyndum okkar um það hvar störfin eiga að vera staðsett. Í dag skiptir fjarskiptasambandið meira máli en staðsetning starfsins. Tæknibyltingin fæðir af sér nýsköpun og leiðir okkur á nýjar brautir til þess að sjá tækifæri í að nýta það sem náttúran gefur á sjálfbæran hátt.
Það er von okkar að fyrirtækjaeigendur og frumkvöðlar vilji taka þátt í að byggja upp öflugt hringrásarhagkerfi til framtíðar. Mosfellsbær er rétti staðurinn til að vinna, búa og njóta, allt á sama stað. Græna byltingin er hafin og er Mosfellsbær virkur þáttakandi í henni. Þetta styður umhverfisstefna og framtíðarsýn Mosfellsbæjar.

Komdu út að leika
Mosfellsbær og náttúran er stórt leiksvæði fyrir fólk á öllum aldri. Hér er allt til að njóta hreyfingar og öll aðstaða hin besta hvort sem fólk vil hlaupa, ganga eða synda í sundlaugum eða Hafravatni. Mosfellsbær vill verða miðja hjólreiðafólks sem hjólar frá Gróttu til Esjuróta. Við viljum bjóða til okkar hlaupurum, göngufólki og golfurum á öllum aldri til æfinga á fellum, völlum og opnum svæðum. Þetta smellpassar inn í nútímafjölskylduna því lífsstíll fólks hefur breyst mikið á fáum árum og hefur græna byltingin haft sitt að segja en einnig leit fólks að afþreyingu á tímum heimsfaraldurs.
Rafmagnsbílar, hjólastígar, góðar almenningssamgöngur ásamt styrkingu hringrásarhagkerfisins eru hluti af verndun umhverfis og eftirsóknarverður lífsstíll fyrir nútíma fólk. Mosfellsbær vill verða í forystu í þessum flokki og verða fyrsta val fólks sem kýs heilsusamlegan og nútímalegan lífsstíl. Þetta er m.a. mín framtíðarsýn og býð ég mig fram til að leiða Mosfellsbæ áfram til forystu.

Kolbrún G. Þorsteinsdóttir
Bæjarfulltrúi og frambjóðandi í 1. sæti í prófkjöri Sjálfstæðisflokksins

Mosfellsbær er ört stækkandi sveitarfélag enda eftirsóknarverður búsetukostur fyrir margra hluta sakir.
Byggðakjarnar sveitarfélagsins eru skipulagðir með það að leiðarljósi að auðvelda aðgengi íbúanna að hvers kyns þjónustu og áhersla lögð á fjölbreytt búsetuform. Uppbyggingin mun halda áfram jafnt og þétt á komandi árum, meðal annars í miðbæ Mosfellsbæjar sem er í uppbyggingu og er að taka á sig skýrari mynd.
Til þess að skapa gott fjölbreytt miðbæjarlíf þarf að vera til staðar öflug og fjölbreytt verslun, þjónustufyrirtæki auk íbúðarhúsnæðis og fallegt umhverfi sem laðar að sér íbúa og gesti bæjarins.

Almenningsgarður í miðbæ Mosfellsbæjar
Í miðbæ Mosfellsbæjar er samkvæmt gildandi deiliskipulagi gert ráð fyrir 5.000 fermetra svæði í Bjarkarholti í miðbæ Mosfellsbæjar fyrir almenningsgarð sem hugsaður er sem grænt svæði til útivistar og upplifunar fyrir íbúa Mosfellsbæjar og gesti þeirra. Ásýnd svæðisins er ætlað að verða aðlaðandi og spennandi kostur til að njóta samveru í fallegu umhverfi. Samþykkt var nýlega í bæjarráði að efna til opinnar hugmyndasamkeppni í janúar á næsta ári um miðbæjargarðinn. Samkeppnisferlið mun taka nokkrar vikur og er áætlað að kynna niðurstöður úr samkeppninni á sumardaginn fyrsta eða 21. apríl 2022.

Í fyrirliggjandi deiliskipulagstillögu fyrir garðinn er gert ráð fyrir byggingu og útisvæði fyrir veitingasölu/kaffihús. Þessi garður verður frábær viðbót við miðbæ Mosfellsbæjar og tilvalinn vettvangur fyrir íbúa og gesti þeirra til að njóta útiveru og hreyfingar í fallegu og lifandi miðbæjarumhverfi. Hugmyndasamkeppninni er ætlað að kalla fram skapandi og skemmtilegar hugmyndir um útfærslur garðsins.

Áframhaldandi uppbygging við Bjarkarholt
Uppbygging húsnæðis í miðbænum við Bjarkarholt heldur áfram og ber þar hæst að nefna fyrirhugaða byggingu þjónustuíbúða fyrir eldri borgara sem tengjast munu núverandi byggingum og þeirri starfsemi sem fyrir er á Hlaðhömrum. Auk þjónustuíbúðanna verður einnig byggt rými fyrir félagsþjónustu eldri borgara í Mosfellsbæ. Eldri borgurum fjölgar og þessi viðbót er því kærkomin og mun hún auka þjónustuna til muna fyrir þennan aldurshóp í Mosfellsbæ.

Uppbygging á fleiri svæðum á miðsvæði Mosfellsbæjar
Á miðbæjarsvæði Mosfellsbæjar er einnig fyrirhuguð áframhaldandi uppbygging í Sunnukrika. Gert er ráð fyrir verslun og þjónustu á jarðhæðum og að skrifstofur eða íbúðir verði á efri hæðum eins og þekkist í Sunnukrika 3 sem búið er að byggja. Einnig mun Mosfellsbær úthluta lóðum á næstu misserum í landi Hamraborgar fyrir neðan Olís þjónustustöðina. Þar er verið að þétta byggð og á því svæði verða byggð tvö fjölbýlishús auk einbýlis- og raðhúsa.
Að lokum ber að nefna að samningar um stækkun hjúkrunarheimilisins Hamra milli ríkis og Mosfellsbæjar eru í vinnslu og kveða þeir á um að byggð verði 44 ný rými við hjúkrunarheimilið og leysa þau úr brýnni þörf fyrir fleiri slík rými. Það er ljóst að uppbygging á miðsvæði Mosfellsbæjar mun halda áfram af krafti næstu misseri sem tryggir fallegan, lifandi og skemmtilegan miðbæ með fjölbreyttri þjónustu, og fallegu umhverfi með miðbæjargarðinn sem hjarta svæðisins.

Ásgeir Sveinsson, formaður bæjarráðs og skipulagsnefndar Mosfellsbæjar.
Bryndís Brynjarsdóttir, varaformaður skipulagsnefndar Mosfellsbæjar.

Þessi dægrin liggur sól lægst á lofti, skammdegið er mikið en um leið er eitt fullvíst: „Dagarnir lengjast og dimman flýr í sjó“ svo vitnað sé í þekkt vorkvæði. Orðið „sólhvörf“ getur bæði merkt þau tímamót þegar daginn tekur að lengja og stytta, hvorttveggja minnir okkur á hverfulleika lífsins og hringrás tímans. Jól og áramót eru einmitt sá tími þegar við lítum í senn til ársins sem er á förum og þess nýja sem mætir okkur.
Árið sem kveður brátt hefur verið einstakt fyrir margra hluta sakir, heimsfaraldur geisar enn og aldrei mikilvægara en núna að gæta hvert að öðru og okkur sjálfum. Íslenskt samfélag hefur borið gæfu til að bregðast skjótt við breyttum sviðsmyndum sem blasa sífellt við okkur. Oft þarf að taka íþyngjandi og umdeildar ákvarðanir fyrir ýmsar starfsstéttir og almenna borgara sem hafa sýnt mikla þrautseigju og sveigjanleika í baráttunni við hinn skæða vágest.
Á þessu miklu óvissutímum hefur Mosfellsbær lagt allt kapp á að skila hallalausum rekstri og um leið að verja grunnþjónustuna við íbúa. Sá mannauður sem Mosfellsbær býr yfir hefur skipt sköpum við þessar óvenjulegu aðstæður og starfsfólk bæjarins hefur þurft að endurskipuleggja starfshætti sína.

Náttúruöflin létu líka að sér kveða á árinu 2021 og „hin rámu regindjúp“ létu rækilega í sér heyra. Nú er gosinu í Geldingadölum „formlega“ lokið en um leið vitum við að jörðin okkar sefur aldrei – aldrei alveg – og minnir okkur á að það er skylda okkar allra að hlúa betur að móður Jörð, já miklu betur.
Kæru Mosfellingar. Vetrarsólhvörf eru nýgengin hjá, hækkandi sól blasir við. Við viljum þakka bæjarbúum góð samskipti á árinu sem kveður senn og óskum ykkur öllum gleðilegra friðarjóla og farsældar á nýju ári.

Bjarki Bjarnason, bæjarfulltrúi V-lista.
Bryndís Brynjarsdóttir, varabæjarfulltrúi V-lista.

Bæjarstjórn er nú komin í jólafrí og lítið að frétta úr bæjarpólitíkinni. Búið að afgreiða fjárhagsáætlun og komin tími á jólaundirbúning og jólagleði.
Sveitarstjórnarkosningar verða haldnar í maí og ef að líkum lætur færist fjör og líf í bæjarmálin og stjórnmálaumræðu þegar kemur fram á nýja árið. Það eru mörg verkefnin sem sinna þarf í sveitarstjórn og margs konar stefnumótun sem þarf að fara fram eða endurskoða.
Skólamálin eru og eiga alltaf að vera efst á baugi enda leggur það starf sem þar er unnið grunninn að framtíð og farsæld unga fólksins okkar. Getur við gert betur í skólamálum? Já, það teljum við. Við þurfum að leggja aukna áherslu á að búa vel að skólunum okkar og gera allt sem í okkar valdi stendur til að efla það faglega starf sem þar er unnið. Getum við gert betur í fjölskyldumálum? Já, það teljum sannarlega. Við þurfum að búa betur að þeim sem eiga undir högg að sækja, við þurfum að fjölga félagslegum íbúðum til að standast samanburð við nágrannasveitarfélög okkar og við þurfum að sinna betur eldri borgurum. Getum við gert betur í skipulagsmálum? Já, það teljum við. Við verðum að gæta þess að jafnvægi haldist í uppbyggingu bæjarins okkar, að ímyndin um sveit í bæ glatist ekki. Getum við gert betur í umhverfismálum? Já, sannarlega getum við það, t.d. með því að leggja áherslu á loftslagsmál sem eru mikilvægustu mál framtíðarinnar. Getum við gert betur í íþrótta- og tómstundamálum, menningarmálum, lýðræðis- og mannréttindamálum? Já, við getum það.

Við eigum að gera betur í öllum þessum málaflokkum. Efla faglegt starf nefnda bæjarins og efla tækifæri bæjarbúa til þátttöku í stefnumótun og samtali um framþróun í bæjarmálunum. Alla þessa þætti þarf að ræða í aðdraganda sveitarstjórnarkosninga.
En núna er tími til að njóta samveru og helgi jólanna. Vonandi auðnast okkur öllum að halda gleðileg jól með fjölskyldu og vinum óáreitt af veiruskömminni. Bestu óskir um gleðiríka jólahátíð.

Anna Sigríður Guðnadóttir, bæjarfulltrúi Samfylkingarinnar
Ólafur Ingi Óskarsson, varabæjarfulltrúi Samfylkingarinnar.