Setjum Kolbrúnu kennara í fyrsta sætið hjá Sjálfstæðisflokknum!

Það eru spennandi kosningar fram undan til bæjarstjórnar hér í Mosfellsbæ. Ég hef ákveðið að beita mér örlítið í baráttunni því ein öflugasta manneskja sem ég hef verið svo lánsöm að kynnast, hún Kolbrún G. Þorteinsdóttir, er að berjast um toppsætið í stærsta stjórnmálaaflinu í bæjarfélaginu, Sjálfstæðisflokknum.
Fyrir vinstri manneskju eins og mig hefur verið kvalafullt að fylgjast með pólitíkinni undanfarið. Máttlausri kosningabaráttu Samfylkingarinnar og ósigrum svo og stuðningi VG við persónulega viðskiptahagsmuni útgerðarfurstanna. Og þá vaknar spurningin um hvort atkvæði manns sé dæmt til að vera alltaf kastað á glæ.
Í framhaldi af þessu hef ég velt fyrir mér hvernig ég geti haft áhrif á samfélag mitt. Því hef ég ákveðið að beita mér fyrir því að koma Kolbrúnu í fyrsta sætið hjá Sjálfstæðisflokknum í þeirri von að fá öfluga framsækna konu í bæjarstjórastólinn. Hér er gott að búa og ala upp börnin sín og það hefur verið haldið vel utan um bæjarmálin hér með Sjálfstæðisflokkinn í meirihluta í bæjarstjórn. Nokkuð sem ég verð að viðurkenna hvar svo sem pólitískar línur mínar liggja.
En hvað er ég að velja fyrir mig og bæinn minn þegar ég set Kolbrúnu í 1. sætið?
Ég er að velja konu sem lýsir sjálfri sér sem „skólamanneskju“ fyrst og fremst. Ég er að velja framsækna manneskju sem vill tala við fólk til að komast að góðri niðurstöðu.
Og ekki síst þá er ég að velja formann fræðslunefndar Mosfellsbæjar til frekari áhrifa. Sjálf er ég kennari og á 3 börn í tveimur skólum í Mosó og vinn í þeim þriðja. Ég þekki marga frábæra kennara og duglegt starfsfólk innan skólanna og ég vil manneskju til frekari áhrifa sem skilur og styður þetta mikilvægasta verkefni bæjarins.
Sjáðu til lesandi góður. 60% af fé Mosfellsbæjar fer í að reka skólana og 80% af þeim sem eru á launaskrá hjá bænum eru að vinna í skólunum. Og Kolbrún er kennari sem brennur fyrir einmitt þessu langstærsta verkefni allra bæja; velferð barnanna, skólunum þar sem þau ala manninn flesta virka daga ársins og starfsfólki bæjarfélagsins sem heldur uppi þessu mikilvæga starfi. Þetta er það sem skiptir máli. Samfélög snúast fyrst og síðast um að ala upp börnin okkar. „It takes a village to raise a child“ eins og sagt er. Því er svo mikilvægt að fá manneskju í fyrsta sæti í stærsta stjórnmálaflokknum sem leggur áherslu á einmitt þetta risamál.
Þau sem sækjast eftir 1. sætinu eru hvort úr sinni áttinni.
Annars vegar er framsækinn og mælskur kennari og lýðheilsufræðingur sem vill slá skjaldborg um skólana í bænum. Hún þekkir þá út og inn sem formaður fræðslunefndar og hefur líka áratuga reynslu af bæjarpólitíkinni. Hún er skarpgreind og raunsæ með báða fætur á jörðinni en hefur aldrei gleymt að láta hjartað ráða för. Hins vegar er maður sem hefur ekki reynslu af skólamálum.
Hvar sem þú ert á hinu pólitíska litrófi, getur þú haft áhrif. Það er mikilvægt að manneskjan sem leiðir lista stærsta stjórnmálaflokksins sé með puttann á púlsinum í málaflokknum sem er svo mikilvægur fyrir okkur öll. Skelltu þér í prófkjör Sjálfstæðisflokksins og settu Kolbrúnu G. Þorsteinsdóttur í fyrsta sætið. Fyrir skólana og fjölskyldurnar. Gleðilegt ár og gleðilegar kosningar!

Ólöf Guðmundsdóttir
Mosfellingur og kennari í Varmárskóla