Fab Lab smiðja, skapandi vettvangur nýsköpunar fyrir skólasamfélagið

Arna Hagalíns

Í heimi þar sem tækninni fleygir fram á ógnarhraða er mikilvægt að stuðla að tækniþróun skólanna og undirbúa nemendur fyrir framtíðina með því að gera starfsumhverfi skólanna enn betra.
Einn þáttur í því er að halda áfram að stuðla að snjöllum skólum og skapa vettvang til nýsköpunar.

Skólasamfélagið kallar eftir nýjum leiðum í kennslu þar sem samþætting námsgreina og fjölbreyttir kennsluhættir geti meðal annars mæst á vettvangi tækni og nýsköpunar. Okkur þykir mikilvægt að svara þessu ákalli.

Annars vegar teljum við að það yrði frábært fyrir skólasamfélagið okkar hér í Mosfellsbæ að hafa aðgang að Fab Lab smiðju, en Fab Lab smiðja er sköpunar- og tæknismiðja útbúin tækjum og tólum til að búa til nánast hvað sem er, þar sem einstaklingum eru gefin tækifæri til að þjálfa sköpunargáfuna með því að hanna, móta og framleiða hluti með aðstoð stafrænnar tækni.

Elín María Jónsdóttir

Að fá hugmynd, setja sér markmið og sjá hana verða að veruleika er geggjuð tilfinning. Að fylgjast með nemendum sínum fá hugmynd, hvetja þá til að setja sér markmið og fylgjast með þeim þróa og skapa sína hugmynd þar til hún verður að veruleika en enn betri tilfinning. Tilfinningin er eins og heimurinn sé ósigrandi og hindranir verða bara eitthvað sem við lærum að finna lausn á.
Við Sjálfstæðismenn ætlum því, á næsta kjörtímabili, að opna Fab Lab smiðju með stafrænum tækjum og tólum sem gefur ungum sem öldnum, einstaklingum og fyrirtækjum, tækifæri til að þjálfa sköpunargáfuna og hrinda hugmyndum sínum í framkvæmd.

Hinn þátturinn er að halda áfram að stuðla að snjöllum skólum, en það er áframhaldandi átak í upplýsingatæknimálum skólanna þar sem áherslan verður að styðja áfram við upplýsingateymi kennara og stjórnenda innan skólanna.
Við viljum sjá til að þess að þeir hafi áframhaldandi aðgang að verkefnastjóra til að hafa umsjón með upplýsingatæknimálum og búnaði innan skólanna. Við teljum það góða leið til að styðja við kennarann í starfi og styrkja hann þannig til að nýta tækin og tæknina í kennslu. Við viljum gera betur í að undirbúa nemendur fyrir framtíðina og stuðla að því að þau verði ekki bara neytendur tækninnar heldur líka notendur.

Arna Hagalíns og Elín María Jónsdóttir,
frambjóðendur á lista Sjálfstæðisflokksins
fyrir komandi kosningar 14. maí.

Viðhalds er þörf

Ólafur Ingi Óskarsson

Það er öllum hollt að hreyfa sig. Hjá flestum er það hluti af almennri heilsubót. Hreyfing getur verið alls konar og kallar á mismunandi aðstæður.
Mörgum dugar að ganga um eða hlaupa í okkar fallegu náttúru eða bara á gangstéttum og göngustígum bæjarins. Fyrir aðra þarf að byggja upp aðstöðu.
Það er ekki lögbundið verkefni sveitarfélaga að byggja og reka íþróttamannvirki en hins vegar teljum við það vera sjálfsagt verkefni þeirra til að styðja við gott og blómlegt mannlíf.

Borðaklippingar
Það hefur þótt gott nesti fyrir stjórnmálamenn að fara í kosningar með loforð um metnaðarfull íþróttamannvirki eða að taka í notkun eitt eða fleiri slík korteri fyrir kosningar.
En þegar búið er að byggja þá tekur hversdagurinn við, rekstur mannvirkjanna og líka viðhald sem verður þeim mun kostnaðarsamara eftir því sem þau eldast. Það er hins vegar ekki jafn líklegt til vinsælda að skipuleggja viðhald. Því fylgja engar skóflustungur eða borðaklippingar að viðstöddum ljósmyndurum.

Sunna Arnardóttir

Stefnuleysi
Það dregur verulega úr notkunarmöguleikum og öryggi notenda þessara dýru mannvirkja ef viðhaldi er ábótavant. Því miður er þetta orðin staðan hjá okkur víða þrátt fyrir að margt sé í góðu lagi.
Á fundi sem Öryrkjabandalagið og Landssamtökin Þroskahjálp boðuðu nýverið til hér í bæ og buðu fulltrúum allra framboða í Mosfellsbæ til, kom fram að lyfta ætluð fötluðum í íþróttamiðstöðinni að Varmá hafi verið biluð í mjög langan tíma. Fólki sem bundið er við hjólastól og á erindi í íþróttamiðstöðina er rennt inn um neyðarútgang til að komast inn í húsið. Það er ekki mikil virðing sem fötluðu fólki er sýnd með því.
Mosfellsbær státar af mörgu framúrskarandi íþróttafólki í ýmsum íþróttagreinum, þar á meðal í frjálsum íþróttum. Árið 1989 var tekinn í notkun í Mosfellsbæ fullkomnasti frjálsíþróttavöllur landsins.
Í kjölfarið varð mikill uppgangur í íþróttinni hér í bæ og blómlegt starf. Því er það þyngra en tárum taki að síðan 2011 hafi þessi glæsilegi völlur ekki uppfyllt kröfur til að halda stærri mót, s.s. Íslands- eða landsmót.
Vegna hvers var það, jú vegna skorts á viðhaldi! Margt af okkar fremsta frjálsíþróttafólki æfir nú og keppir með félögum í öðrum sveitarfélögum. Því miður er þetta ekki eina dæmið. Fjölmörg dæmi eru líka um að ekki hafi verið fjárfest í búnaði til nota í íþróttamannvirkjum okkar, búnaði sem myndi auka notagildi þeirra.
Það er mikill ábyrgðarhluti að eigur okkar íbúanna séu látnar grotna niður vegna skorts á eðlilegu viðhaldi og endurbótum.

Stefna til framtíðar
Þróttmikið íþróttastarf fyrir alla, óháð aldri, efnahag og félagslegum aðstæðum eflir og auðgar samfélagið og hefur jákvæð áhrif á lýðheilsu. Öflugt starf byggir á góðri aðstöðu og það er hlutverk bæjaryfirvalda að sjá til þess að sú aðstaða sé fjölbreytt, góð og mæti þörfum. Aðstöðunni þarf síðan að halda við og bæta jafnt og þétt svo hún haldi gildi sínu.
Nauðsynlegt er að móta stefnu til framtíðar um uppbyggingu íþróttasvæða í bænum, þar með talið viðhald, stefnu sem unnið er eftir. Það mun Samfylkingin gera fái hún til þess afl eftir kosningar.
Settu x við S á kjördag.

Ólafur Ingi Óskarsson, skipar 2. sæti á framboðslista Samfylkingarinnar
Sunna Arnardóttir, skipar 6. sæti á framboðslista Samfylkingarinnar

Hvernig líður börnunum okkar?

Lára Þorgeirsdóttir

Undanfarin ár hefur gengið á ýmsu í lífi okkar allra. Margir upplifðu stóran skell þegar heimsfaraldur Covid 19 skall á af miklum þunga.
Fólk er í eðli sínu missterkt til að takast á við erfiðleika í lífinu en ég þori að fullyrða að Covid hefur haft áhrif okkur öll, ekki síst börnin okkar. Það hlýtur að vera erfitt að vera barn á þessum tímum og taka þátt í umræðum um hluti sem börn eiga ekki að þurfa að taka þátt í og hafa áhyggjur af hlutum sem börn eiga heldur ekki að þurfa að hafa áhyggjur af. Mörg þeirra hafa haft áhyggjur af sínu nánasta fólki, verið hrædd um að smita afa sína og ömmur eða aðra nátengda.
Mikil umræða hefur verið um bólusetningar barna og maður heyrir þau tala um kosti og galla bólusetninga eins og þau heyra fullorðna fólkið gera. Börn hafa ítrekað verið send í sóttkví, smitgát, sýnatökur, þau smitast, þau orðið veik ásamt því að þurfa að þola annað álag þessum faraldri samfara.
Við verðum nú sem aldrei fyrr að leggja við hlustir og heyra hvað börnin hafa að segja. Hvernig líður börnunum okkar?
Samhliða því að hlusta á raddir barna gefst tækifæri til að efla umræður um hag barna og tryggja að sú umræða byggist í grunninn á öryggi barna, velferð þeirra og menntun. Mikilvægt er að skólakerfið taki vel í óskir barna en samhliða tryggi að gæði náms séu ávallt í fyrirrúmi, að öll umgjörð skóla taki vel á móti öllum börnum. Þannig getum við bæði átt gott og gefandi samtal um skóla framtíðar.
Hvers vegna eru börn hér á landi látin bíða í marga mánuði eftir greiningu á fjölþættum vanda sínum? Hvers vegna er börnum og aðstandenum þeirra ekki tryggður greiður aðgangur að þeirri þjónustu sem þeim ber að fá?
Ótal skýrslur hafa verið unnar um mikilvægi málaflokks barna með fjölþættan vanda en lítið hefur áorkast. Við mjökumst í rétta átt en enn er langt í land og börn á mikilvægum ferli í þroska sínum geta ekki beðið.
Nýleg skýrsla um stöðu barna með fjölþættan vanda, unnin af stjórnendum í barnavernd á höfuðborgarsvæðinu, fjallar m.a. um hve óskaplega lengi málaflokkurinn hefur verið vanræktur. Margt hefur áunnist en einhvern veginn virðast stjórnvöld vera bæði of sein, á eftir og oftar en ekki illa undirbúin undir að taka við börnum með fjölþættan vanda. Getið er í skýrslunni um fundi með þáverandi velferðarráðherra 2012 en nú eru liðin 10 ár.
Árið 2020 er málið enn í brennidepli með tilliti til þarfa og þjónustu við þessi börn. Enn liggur þó ekki ljóst fyrir hvar kostnaður vegna þjónustu við börn með fjölþættan vanda skuli liggja og ekki eru enn fyrir hendi þau fjölbreyttu úrræði sem ljóst er að þurfa að vera til staðar. Skýrslan er góð en er þetta nóg?
Bætum hag allra barna óháð stétt og stöðu.

Lára Þorgeirsdóttir, kennari við Varmárskóla.
Skipar 7. sæti á M-lista Miðflokksins fyrir komandi sveitastjórnarkosningar

Kjósum V-listann!

Bjarki Bjarnason

Þegar þetta er ritað eru rúmar tvær vikur til sveitarstjórnarkosninga, kjörfundur fer fram í Lágafellsskóla laugardaginn 14. maí. Sjö listar eru í framboði og verður kosið um 11 sæti í bæjarstjórn Mosfellsbæjar, fulltrúum verður fjölgað um tvo í samræmi við aukinn íbúafjölda bæjarins.
Kosningabaráttan er að komast í algleyming, framboð og frambjóðendur keppast við að kynna sig og sín stefnumál. Þetta er um margt áhugaverður tími, kosningar eru tímamót og við horfum í senn til baka og fram í tímann, um leið og við nýtum okkur þann lýðræðislega rétt að velja þá sem við treystum best til að stjórna bæjarfélaginu næstu fjögur árin.

Sjö málaflokkar
Hér í Mosfellsbæ hafa vinstri-græn boðið fram undir eigin merkjum frá árinu 2006 og allar götur síðan hefur hreyfingin sett mark sitt á stjórn sveitarfélagsins. Á framboðslista VG eru 22 Mosfellingar með ólíkan bakgrunn en hafa áþekka sýn á samfélagið. Við viljum stuðla að því að samfélag okkar hér í Mosfellsbæ sé fjölskylduvænt, umhverfisvænt og byggist á félagslegu réttlæti og samfélagslegri ábyrgð. Stefnuskrá V-listans hvílir á þessum grunni og skiptist í sjö hluta sem eru:
Fræðslumál.
Íþrótta- og tómstundamál.
Velferðarmál.
Jafnréttis- og lýðræðismál.
Menningar- og ferðamál.
Skipulags-, atvinnu- og umhverfismál.
Fjármál.

Meðal stefnumála V-listans er að lengja opnunartímann í sundlaugum bæjarins, auka framboð á félagslegum íbúðum, gera leikskólann gjaldfrjálsan, vinna aðgerðaráætlun í loftslagsmálum og skipuleggja Hafravatnssvæðið fyrir aukna útivist.
Menningarmál eru okkur einnig ofarlega í huga og vill V-listinn láta vinna heildarstefnu um rekstur á mannvirkjum sem tengjast menningarstarfsemi í bæjarfélaginu.

VG-stofan og fjölskylduskemmtun
Vinstri-græn hafa opnað VG-stofuna í miðrýminu í Kjarna, þar er tekið á móti gestum þriðjudaga – föstudaga kl. 16-18 og kl. 13-16 laugardaginn 7. maí. Og næstkom­andi laugardag, 30. apríl, verður efnt til mikillar fjölskylduhátíðar í Álafosskvos, meðal annars verður farið í ratleik, spilað bingó og kynt undir grillinu. Þangað er að sjálfsögðu allir velkomnir.
Hér að framan var getið um þau tímamót sem kosningar eru. Við erum stöðugt „að meta stöðuna“ eins og tekið er til orða, horfa um öxl og fram á veginn.
Gleymum því þó ekki að njóta andartaksins og dagsins – gleðilegt sumar, kæru Mosfellingar!

Bjarki Bjarnason, skipar 1. sæti V-listans í kosningunum 14. maí.

Sveitarstjórnarmál sem ólympíugrein

Elín Anna Gísladóttir

Sveitarstjórnarkosningar eru líkt og Ólym­píuleikarnir haldnar fjórða hvert ár.
Kannski eru þessir viðburðir ekki svo ólíkir. Órjúfanlegur hluti af þeim báðum er keppni þar sem einstaklingar og lið etja kappi og einhverjir standa uppi sem sigurvegarar og aðrir með sárt ennið. En ef kosningar til sveitarstjórnar yrðu fullgild ólympíuíþrótt er gaman að ímynda sér hvaða þættir geta ráðið því hver stendur uppi með gullið.

Fólkið
Það sem skiptir hvað mestu máli eru einstaklingarnir sem eru í framboði. Listarnir eru auðvitað mannana verk og ekki betri eða verri en nöfnin sem eru á þeim.
Þetta á sérstaklega við í bæjarstjórnarkosningum líkt og í Mosfellsbæ þar sem aðeins eru ellefu fulltrúar í bæjarstjórn og vægi hvers því talsvert. Því ætti kjósandinn að spyrja sig hvaða einstaklinga hann vill sjá með gullmedalíu um hálsinn og takast á við þá ábyrgð sem fylgir að stjórna sveitarfélagi með heiðarleikann að leiðarljósi.

Ölvir Karlsson

Málefnin
Þá skipta málefnin auðvitað miklu máli en í þeim felast ákvarðanatökur sem geta haft veruleg áhrif á íbúa sveitarfélagsins. Þau eru jafn mörg og þau eru ólík en þess þarf að gæta að gullið má ekki vera of dýru verði keypt.
Má þá benda á mikilvægi þess að sýna ábyrgð í fjármálum sveitarfélaga og umgangast fjármuni almennings af virðingu. Einng eru umhverfismál eitt af stóru viðfangsefnum dagsins í dag og því er stefna sveitarfélaga í þeim málaflokki gríðarlega mikilvæg. Því þarf að hafa umhverfismál í huga við stefnumótun og ákvarðanatöku sveitarfélaga með það að markmiði að sporna við hlýnun jarðar og gæta að umhverfinu.

Hugsjónin
Þá er ákveðin pólitísk hugsjón á bak við stjórnmálasamtök sem endurspeglast í ólíkum markmiðum stjórnmálaflokkanna. Þessar pólitísku hugsjónir hafa áhrif á stjórnmálasamtök hvort sem það er á sveitarstjórnarstigi eða í landsmálunum.
Því er ekki hægt að skilja á milli landsmála og sveitarstjórnarmála að öllu leyti. Þetta hefur í för með sér að stuðningur við ákveðin stjórnmálasamtök á sveitarstjórnarstigi rennir styrkari stoðum undir þau á landsvísu og þá vegferð sem þau eru á, t.d. hvaða hagsmuni þau eru að berjast fyrir.
Það sem er samt best við þessa Ólympíuleika er að þú lesandi góður ert sá sem ræður úrslitum. Viðreisn setur almannahagsmuni framar sérhagsmunum. Þú getur breytt því sem þú vilt.
Veldu Viðreisn.

Elín Anna Gísladóttir og Ölvir Karlsson.
Höfundar skipa 3. og 4. sæti á lista Viðreisnar í Mosfellsbæ.

Ný Framsókn fyrir Mosfellsbæ

Örvar Jóhannsson

14. maí nk. göngum við til kosninga og fáum tækifæri til að nýta mikilvægustu mannréttindi sem við höfum, réttinn til að velja sjálf það fólk sem kemur til með að stýra málefnum samfélagsins okkar til næstu 4 ára.
Ég gaf kost á mér til að taka sæti á lista Framsóknar í Mosfellsbæ í komandi sveitarstjórnarkosningum og var treyst fyrir 4. sæti listans.
Ég er 38 ára, bý ásamt eiginkonu minni og 3 börnum í Helgafellshverfinu, þar höfum við búið síðan árið 2019. Ég er fæddur og uppalinn á Seyðisfirði og bjó þar óslitið þar til við fjölskyldan fluttum í Mosfellsbæ. Okkur hefur hvergi liðið betur en einmitt hér. Ég brenn fyrir það að hér búum við sem best að börnunum okkar, auk ýmissa annarra þátta sem ég og við í Framsókn munum kynna á næstu vikum.
Í nútímasveitarfélögum verður ákall bæjarbúa og krafan um það að þjónustan sé veitt um leið og eftir henni er kallað sífellt háværari. Stærsti þjónustuveitandi flestra einstaklinga er vafalítið lögheimilissveitarfélag hvers og eins. Það er því mikilvægt að til að mæta ákalli og kröfum bæjarbúa að sveitarfélagið sé stöðugt á tánum þegar kemur að nýtingu tæknilausna og þróunar í samskiptamiðlum við þá vinnu.
Í þessu sambandi tel ég mikilvægt að ávallt sé tryggt að vefsíða sveitarfélagsins sé góð og aðgengileg upplýsingaveita. Innra svæði vefsins fyrir íbúa, þ.e. „Mínar síður“, sé gagnvirkt svæði þar sem íbúar geta nálgast í rauntíma allar upplýsingar um þá þjónustu sem innskráður íbúi greiðir af til sveitarfélagsins. Ekki ósvipað því sem sjá má við kaup á lyfjum skv. lyfseðli, þar sem kemur fram annars vegar hlutur sjúklings af kostnaðinum og hins vegar hluti sjúkrasamlags.
Í ábendingakerfinu sem á vefnum er, fengist við innsendingu úthlutað málsnúmeri þar sem á hverjum tíma er hægt að nálgast upplýsingar um stöðu málsins í stjórnkerfinu, þ.e. ekki eingöngu stöðu eins og móttekið, í vinnslu, o.s.frv. heldur ítarlegri eftir atvikum, t.d. á borði hvaða nefndar, þjónustusviðs eða jafnvel ákveðins starfsmanns sveitarfélagsins málið er.
Ég tel mikilvægt að í þjónustu sveitarfélagsins við íbúa, sé stöðugt fylgst með tækniþróun til að þjónusta á hverjum tíma sé ávallt með því besta sem völ er á. Slíkri þróun fylgja vissulega alltaf einhver útgjöld, en líklegt er að til lengri tíma felist í raun sparnaður í því að endurnýja kerfin örar frekar en að vera stöðugt að greiða af og viðhalda eldri, oft á tíðum óskilvirkum kerfum, sem þrátt fyrir að hafa talist góð og gagnvirk á sínum tíma, eru einfaldlega börn síns tíma.
Ég er reiðubúinn til að leggja mitt af mörkum næstu fjögur árin til að gera okkar yndislega bæ enn betri. Ég er ávallt reiðubúinn að taka samtalið um hugmyndir og útfærslur úr öllum áttum og vinna að góðum málum sama frá hverjum þau koma.
Við á lista Framsóknar í Mosfellsbæ óskum eftir því að þú hugsir til okkar í kosningunum þann 14. maí og setjir X við B á kjördag.

Örvar Jóhannsson skipar 4. sæti B-lista Framsóknar í Mosfellsbæ

Mætum á völlinn

Jón Fannar Árnason

Fótboltasumarið er hafið. Í sumar er Afturelding með lið í Bestu deild kvenna og Lengjudeild karla.
Síðasta sumar komst kvennalið Aftureldingar upp í Bestu deildina með því að lenda í öðru sæti á eftir KR í Lengjudeildinni. Stórkostlegur árangur og núna er næsta skref að standa sig vel í Bestu deildinni.
Karlalið Aftureldingar er að hefja sitt fjórða tímabil í röð í Lengjudeildinni eftir að hafa komist upp úr 2. deildinni árið 2018. Liðið hefur gert vel í að halda sæti sínu í deildinni síðustu þrjú ár og núna er kominn tími til að gera enn betur.
Undirritaður var staddur á leik Aftureldingar og Vængja Júpíters í Mjólkurbikar karla föstudagskvöldið 22. apríl og þar var mjög góð mæting. Vonandi heldur það áfram í sumar að við Mosfellingar styðjum við bakið á okkar fólki. Þau þurfa svo sannarlega á því að halda.

Verum dugleg að mæta á völlinn í sumar að styðja okkar fólk.
Áfram Afturelding!

Jón Fannar Árnason
Tómstunda- og félagsmálafræðingur

Fagleg handleiðsla

Dagný Kristinsdóttir

Á undanförnum árum hefur orðið mikil fjölgun á nemendum í grunn- og leikskólum bæjarins. Með auknum fjölda hafa skapast nýjar áskoranir meðal kennara og skólastjórnenda, margar þeirra krefjandi sem hafa sýnt fram á nauðsyn þess að efla og styrkja skólafólk með auknu aðgengi að sérfræðingum.
Það er fátt eins lamandi og erfitt í starfi með börnum og að lenda í alvarlegum aðstæðum sem þú veist ekki hvernig á að leysa. Á þeirri stundu þarf starfsmaðurinn lítið til að upplifa að stuðningur, innan vinnustaðar, sé ekki fyrir hendi.
Nú, þegar hægt hefur á nemendafjölgun í grunnskólum er gott að nýta tímann til að fara yfir undanfarin ár, skoða það sem vel hefur tekist til og hverju má standa betur að – með eflingu á þjónustu Fræðslusviðs. Fara þarf í þarfagreiningu í hverjum skóla, meta hvaða þjónustu þarf beint inn í skólana, hvaða þjónustu skólarnir geta sameinast um og verið miðlægt staðsett á Fræðslusviði.
Við í Vinum Mosfellsbæjar leggjum ríka áherslu á að á Fræðslusviði sé teymi sérfræðinga ráðið inn, sem fari út í skólana og sé kennurum og stjórnendum til stuðnings. Í teyminu geta verið ráðgjafar á borð við kennsluráðgjafa, hegðunarráðgjafa, sálfræðinga, félagsráðgjafa og ráðgjafarþroskaþjálfa sem geta stutt beint við bakið á kennurum.
Benda má á sambærileg verkefni í Reykjavík, Betri borg fyrir börn og þjónustu Farteyma. BBB verkefnið, eins og það er kallað, gengur út á það að færa þjónustuna nær notendum og hafa kennsluráðgjafar og hegðunarráðgjafar viðveru í skólum hverfisins á tilteknum tímum og geta þar tekið til vinnslu mál sem bíða og unnið jafnóðum og þau koma upp. Þessi viðvera hefur verið mikill styrkur fyrir nemendur og starfsfólk, vinnsla mála hefst fyrr, sem þýðir að færri málum er vísað til Þjónustumiðstöðva til vinnslu.
Þjónusta Farteyma er þjónusta við nemendur með fjölþættan vanda þar sem unnið er með nemandann í nærumhverfi hans. Allt kapp er lagt á að málin séu unnin í skólanum, ef það gengur ekki upp er teymið með aðsetur og getur tekið nemendur til sín. Með dyggri aðstoð og ríkri eftirfylgd náum við betri árangri, börnunum okkar til heilla.

Dagný Kristinsdóttir, skipar 1. sæti
á framboðslista Vina Mosfellsbæjar.

Mosfellsbær – náttúru- og útivistarbær

Ásgeir Sveinsson

Skipulagsmál eru stór þáttur í vaxandi samfélagi okkar í Mosfellsbæ og eitt helsta hagsmunamál íbúa.
Bærinn okkar mun halda áfram að stækka á næstu árum en við ætlum að standa vörð um sérkenni Mosfellsbæjar sem „sveit í borg“ og huga vel að dýrmætri náttúrunni allt í kringum okkur. Mosfellsbær er fallegur bær, umlukinn fellum, ám og vötnum. Tengslin við náttúruna eru sterk og því er bæjarfélagið vinsælt til búsetu fyrir áhugafólk um útivist og íþróttir.

Við leggjum áfram áherslu á góð búsetuskilyrði í fallegu og öruggu umhverfi þar sem gert er ráð fyrir fjölbreyttum húsa- og íbúðagerðum sem uppfylla þarfir íbúa á öllum æviskeiðum. Sem heilsueflandi samfélag mun Mosfellsbær hafa heilbrigði bæjarbúa að leiðarljósi í skipulagsmálum.

Helga Jóhannesdóttir

Fagleg og fjölbreytt uppbygging heldur áfram
Uppbygging nýrra hverfa heldur áfram og þar er langstærsta verkefnið uppbygging á Blikastaðalandinu. Við ætlum að byggja upp stóra og fjölbreytta byggð á Blikastaða­landi með grænum svæðum inn á milli í byggðinni frá fjalli til fjöru og mun gamli Blikastaðabærinn standa áfram en honum er ætlað að vera hjartað í hverfinu. Í þessu hverfi sem og öðrum verður lögð mikil áhersla á góðar og öruggar samgöngur og stígakerfi með góðu aðgengi að hágæða almenningssamgöngum m.a. Borgarlínu.

Í öðrum nýjum hverfum verður meira haldið í hefðbundna mosfellska byggð með áherslu á minni þéttleika og sérbýli. Áfram verður lögð áhersla á góðar og fjölbreyttar samgöngur, sérstaklega fyrir gangandi og hjólandi vegfarendur auk hestafólks.

Ævintýragarður – perla útivistar í Mosó
Ein helstu verðmæti Mosfellsbæjar er fjölbreytt náttúran sem umlykur bæjarfélagið og þau fjölbreyttu útistarsvæði sem við eigum. Þar er Ævintýragarðurinn perla sem er í uppbyggingu og framkvæmdir þar í gangi sem munu halda áfram. Deiliskipulag fyrir svæðið er tilbúið og verið er að klára hönnun og skipulag varðandi aðgengi að garðinum í samstarfi við Vegagerðina.

Í Ævintýragarðinum er nýbúið að opna glæsilegan samgöngustíg fyrir gangandi og hjólandi með fjórum akreinum sem annar umferðinni um garðinn mjög vel sem aðalsamgönguæðin í gegnum garðinn.
Mikil fjölbreytni verður innan Ævintýragarðsins samkvæmt skipulaginu og má þar nefna m.a. rósastíg sem mun liggja eftir svæðinu endurlöngu og ætistíg meðfram matjurtargarðinum.
Þar er einnig gert ráð fyrir fjallahjólabraut, gönguskíðabraut, stóru leiksvæði þar sem kastalinn, grillið og ærslabelgurinn eru þegar komin í notkun og á minni leiksvæðum á jöðrum garðsins verða einnig leiktæki fyrir alla aldurshópa. Settar verða upp þrekstöðvar á nokkrum stöðum í garðinum og þrektröppur, auk þess sem skíða- og sleðabrekkur verða á tveimur stöðum.
Í garðinum verður einnig tjaldsvæði og þjónustu- og veitingastaður tengdur því svo fátt eitt sé nefnt. Ævintýragarðurinn er og verður algjör útivistarperla fyrir okkur Mosfellinga til framtíðar.
Við eigum fleiri frábær útistarsvæði í Mosó og má þar til dæmis nefna þær fjölmörgu hjóla-, hlaupa- og göngleiðir í bæjarfélaginu og á fellunum í kring. Einnig má nefna Stekkjarflötina við Álafosskvos.
Það er markmið okkar að ljúka uppbyggingu útivistarsvæðis í miðbænum á næsta kjörtímabili. Þar mun glæsilegur miðbæjargarður vera hjarta miðbæjarins þar sem hægt verður að njóta útivistar í fallegu umhverfi og mun garðurinn ramma inn mannlífið í miðbænum og skerpa ásýnd miðbæjarins.

Ásgeir Sveinsson,
formaður bæjarráðs og skipulagsnefndar.
Frambjóðandi í 1. sæti á lista Sjálfstæðisflokksins.
Helga Jóhannesdóttir,
nefndarmaður í skipulagsnefnd.
Frambjóðandi í 4. sæti á lista Sjálfstæðisflokksins.

Græn svæði fyrir alla

Stefanía Ragnarsdóttir

Eitt sterkasta einkenni og aðdráttarafl Mosfellsbæjar er náttúran sem umlykur byggðina. Fellin, heiðin og hafið.
Í bænum sjálfum eru það svo þessi litlu grænu svæði sem gefa mikið. Lækir, móar, stallar og skógar. Það eru heilmikið forréttindi að hafa aðgang að þessum grænu svæðum og þau hafa mikil áhrif á íbúana sem tengjast þeim allir á sinn hátt.

Til að tryggja vistvænar samgöngur, aðgengi fyrir alla og heilnæmt umhverfi þarf að horfa á grænu svæðin, bæði í stóru samhengi og smáu. Að ár séu verndaðar frá upptökum að ósum og að aðgengi að grænum svæðum sé mögulegt fyrir allar kynslóðir og hreyfigetu.
Það er lykilatriði fyrir umhverfið og þar af leiðandi loftslagið að græn svæði séu til í sinni náttúrulegustu mynd, bæði á stórum og smáum skala. Þau skapa lífið á jörðinni eins og við þekkjum það í dag, framleiða hreint loft, hreint vatn og aðstæður fyrir matvælaframleiðslu.
Grænu svæðin móta hversdaginn, hvort sem það er hlaupatúr meðfram sjónum, ganga með barnavagn á stígum milli trjáa og leikvalla eða bara eitt augnablik þegar litið er út um eldhúsgluggann og veður dagsins gefur útsýninu nýjan blæ.
Grænu svæðin sem við njótum alla daga þarf að vernda til framtíðar og eitt besta verkfærið sem við eigum til þess er náttúruvernd. Með skipulagðri vernd gefum við svæðunum framtíð og tryggjum að náttúran umlyki ekki bara bæinn heldur eigi sér líka heimili í þéttbýlinu.
Vinstri græn vilja fjölskylduvænt, réttlátt og umhverfisvænt samfélag. Verndun grænna svæða er í senn loftslagsaðgerð og einn lykillinn að þeirri framtíð.

Stefanía Ragnarsdóttir skipar 11. sæti
V-listans í kosningunum 14. maí.

Skólarnir okkar

Anna Sigríður Guðnadóttir

Fáir efast um það að skólarnir okkar í Mosfellsbæ, leikskólar og grunnskólar, séu þær stofnanir bæjarins sem snerta líf barna okkar mest. Hafa áhrif á uppvöxt og þroska, félagslega færni og velferð í víðum skilningi.
Ég birti greinina „Farsæll grunnskóli“ í Mosfellingi í febrúar síðastliðnum og ég skrifa aftur núna um skólana því ég tel að málefni barnanna okkar séu mikilvægustu málefni sem sveitarstjórnarfólk stendur frammi fyrir að sinna. Starfið sem unnið er innan þessara stofnana leggur grunninn í lífi barnanna okkar. Skólarnir auka jöfnuð í samfélaginu því þar mætast börn á jafnræðisgrundvelli. Þar eiga börnin að fá þá þjónustu sem þau þurfa til að rækta hæfileika sína og blómstra. En fá börnin þá þjónustu sem þau þurfa?
Það er alveg ljóst að starfsfólk skólanna gerir sitt allra besta til að styðja börnin til þroska en því miður hefur vantað úrræði inn í skólana svo mæta megi börnunum þar sem þau eru stödd. Kennarar eru settir í þá stöðu að bera ábyrgð á menntun og velferð barnanna en fá ekki þann sérfræðistuðning sem þarf og er nauðsynlegur.
Ef við grípum ekki börnin þegar þau þurfa á stuðningi að halda getur aðstoðin orðið mun kostnaðarsamari fyrir samfélagið á fullorðinsárum þeirra. Sveitarstjórnarmenn eiga alltaf að horfa langt fram í tímann og það á ekki síst við þegar við fjöllum um aðbúnað barna.
Leikskólinn er fyrsta skólastigið en oft hefur borið á skilningsleysi í umræðunni á því fagstarfi sem þar fer fram. Mannekla sem sífellt berast fréttir af víða um land, hefur á stundum orðið til þess að umræðan um skólastigið hefur hverfst um gæsluhlutverk leikskólans. Leikskólinn er hvort tveggja í senn, skóli og gæsla. Hluta dagsins er unnið samkvæmt námsskrá og síðan tekur frjáls leikur við undir umsjón starfsfólks en börnin eru náttúrulega að læra allan daginn. Snemmtæk íhlutun varðandi málþroska er gríðarlega mikilvægur þáttur í starfi leikskóla þar sem sjónum er beint að því að börn fái þá aðstoð sem þarf til að koma í veg fyrir að vandi ágerist.
Í leikskólunum okkar fer fram metnaðarfullt starf en það er nauðsynlegt að styrkja umgjörð þeirra sem skólastofnana, auka stuðning til símenntunar og til að sækja sér menntun í leikskólakennarafræðum. Samkvæmt lögum um menntun og hæfni kennara eiga 2/3 hlutar stöðugilda í leikskólum að vera mannaðar með kennurum. Því fer víðs fjarri að það hlutfall náist.
Ég lýk þessum skrifum með tveimur áherslupunktum úr kosningastefnuská Samfylkingarinnar og hvet kjósendur til að kjósa út frá hagsmunum barna og kynna sér stefnumál okkar á sammos.is

Fjölbreyttari sérfræðiþekkingu inn í skólana
Við viljum ráða sérfræðinga með mismunandi fagþekkingu inn í teymi sem þjónustar skóla bæjarins.

Gjaldfrjáls leikskóli – fyrsta skólastigið
Við stefnum að gjaldfrjálsum leikskóla með það markmið að sá tími sem ætlaður er í skipulagt, faglegt skólastarf samkvæmt námsskrá verði gjaldfrjáls.

Anna Sigríður Guðnadóttir, bæjarfulltrúi,
skipar 1. sæti á lista Samfylkingarinnar

Mosó, stórasti bærinn!

Ragnar Bjarni Zoëga

Það er gott og eftirsóknarvert að búa í Mosfellsbæ eins og við öll vitum. Samkvæmt könnunum eru íbúar hér með þeim ánægðustu á landinu sem er ekkert nýtt fyrir okkur sem höfum búið hér lengi. Það er nefnilega alvitað að það er best að búa í Mosfellsbæ, þar sem sveit og borg sameinast í hina fullkomnu blöndu sveitar og byggðar.
Í Mosó eru góðir skólar og mjög flott íþrótta- og tómstundalíf og frábært að alast hér upp. Mosfellsbær er gæðasamfélag sem við í meirihlutanum höfum unnið í að þróa og skapa undanfarin ár og við viljum halda því áfram.
Við viljum líka halda áfram að vera snjöll og framsýn og ætlum að opna FabLab smiðju og viljum líka koma á fót Þróunar- og nýsköpunarsetri sem gefur endalausa möguleika fyrir ungt fólk til að taka þátt í þróun og nýsköpun. Staður þar sem ungt fólk kemur hugmyndum sínum á framfæri.

Við í Sjálfstæðisflokknum ætlum áfram að stuðla að því að boðið verði upp á fjölbreytt húsnæði fyrir alla aldurshópa í nýjum hverfum bæjarins. Mismunandi stærðir og skipulag á íbúðum henta ólíkum hópum af fólki. Með því að auka úrval og framboð á fjölbreyttari íbúðum viljum við passa að allir sem eru að leita að heimili í Mosfellsbæ geti fundið eitthvað sem hentar fyrir sig. Fyrir ungt fólk og ungar fjölskyldur er það spennandi valkostur að geta eignast sína fyrstu íbúð hér í Mosfellsbæ.

Þóra Björg

Áherslur Sjálfstæðisflokksins eru að stuðla að því að boðið verði áfram upp á fjölbreytta og fjölskylduvæna byggð, fjölbreytta möguleika á húsnæði fyrir alla og allar fjölskyldustærðir allt frá einstaklingsíbúðum til stærri eigna fyrir stórar fjölskyldur.
Við viljum byggja upp stóra og fjölbreytta byggð á Blikastaðalandi. Blikastaðalandið er tilvalið svæði til að bjóða upp á fjölbreytt úrval af húsnæði fyrir bæði núverandi og verðandi Mosfellinga.

Ekki má gleyma þeim sem byggðu upp þetta samfélag og er Mosfellsbær með forystu Sjálfstæðisflokksins búinn að gera samning um uppbyggingu á íbúðum í Bjarkarholti fyrir eldri borgara í samstarfi við Eir. Þar munu rísa öryggis- og þjónustuíbúðir sem munu tengjast við núverandi byggingar auk þess sem húsnæði fyrir félagsstarf mun aukast mjög mikið. Þessar viðbætur tryggja það að bærinn geti mætt þörfum þessa ört stækkandi hóps enn betur.

Íbúafjöldi Mosfellsbæjar hefur frá árinu 2004 til dagsins í dag tvöfaldast og frá 2011 hefur aukningin verið 50%. Það mætti þá kannski segja að Mosfellingurinn og fyrrverandi forsetafrú hafi haft rétt fyrir sér þegar hún sagði að Mosfellsbær væri stórasti bærinn eða eitthvað í þá áttina.

Ragnar Bjarni Zoëga og Þóra Björg frambjóðendur á lista Sjálfstæðisflokksins fyrir komandi sveitarstjórnarkosningar 14. maí

Líf í bæinn

Kristján Erling Jónsson

Nú þegar Hlégarður hefur verið opnaður á ný getum við loksins farið að nota aðstöðuna til að njóta lista og menningar sem í boði er í bænum.
Það er mikil söngmenning í bænum okkar. Við erum rík af kórum og ekki síður listafólki sem bæði er búið að gera garðinn frægan eða er að gera tónlist og skapa alls konar list
Hvernig væri að opna Hlégarð nokkra daga í mánuði og gefa fólki færi á að nýta húsið sem vettvang til að koma sér á framfæri? Það væri hægt að bjóða kórum upp á að hafa opnar æfingar, halda sýningar listafólks eða aðra sköpun.
Þessir viðburðir yrðu opnir fyrir Mosfellinga og aðra gesti. Nú nýverið var stofnað lista- og menningarfélag Mosfellinga sem er ætlað að sameina listamenn og gera meira úr menningu bæjarins. Aðgangseyrir að viðburðum gæti verið hóflegur og runnið til þessa nýja og mikilvæga félags.
Ég get sagt út frá sjálfum mér sem meðlim í Karlakór Kjalnesinga og Stormsveitinni að ég væri meira en til í að fá að koma fram og syngja án gjalds en styrkja gott málefni í staðinn, og ég held ég tali fyrir munn margra því fyrir okkur er það allra skemmtilegasta að koma fram fyrir áheyrendur.

Kristján Erling Jónsson
skipar 7. sæti á lista Vina Mosfellsbæjar

Snemmtæk úrræði fyrir skólasamfélagið. Hvað er til ráða?

Erla Edvardsdóttir

Á undanförnum árum hefur Mosfellsbær vaxið jafnt og þétt og í dag eru 5 grunnskólar og 9 leikskólar starfræktir í bæjarfélaginu.
Sem starfandi kennarar hér í bæ höfum við fundið fyrir vaxandi þörf á sértækum úrræðum af ýmsum toga fyrir börn og ungmenni sem kljást við félagslega einangrun, einhverfu, ADHD taugaþroskaröskun, tengslavanda, þroskaskerðingu, sjálfsskaða, geðraskanir, áhættuhegðun, tölvufíkn og hegðunarvanda. Auk þess sárvantar móttökudeild fyrir nýbúa með annað móðurmál en íslensku, en þeim hefur farið fjölgandi í bæjarfélaginu.
Hugmyndafræðin „skóli án aðgreiningar“ er flott á blaði en hefur ekki verið fylgt inn í skólakerfið með því fjármagni og sérþekkingu sem þarf til. Allt of fá úrræði hafa verið í boði fyrir börn með mikinn vanda og biðin eftir því að komast að hjá sérfræðingum oft allt of löng. Við það skapast mikið álag, bæði innan skólakerfisins og inn á heimilunum. En hvað er til ráða?
Við í Framsókn teljum að með því að koma upp miðlægðri þjónustumiðstöð sem býður upp á margs konar úrræði, sniðnum að þörfum hvers og eins, megi draga verulega úr þessu álagi. Í slíkri þjónustumiðstöð væru starfandi sérfræðingar á sviðum sálfræði, talmeinafræði, atferlistfræði, uppeldisfræði, nýbúafræði og kennsluráðgjafar, svo eitthvað sé nefnt. Þessir sérfæðingar gætu nýst öllum börnum leik-og grunnskólanna, líka yfir sumartímann. Þessir sérfræðingar kæmu inn í

Þorbjörg Sólbjartsdóttir

skólana eftir þörfum hverju sinni, auk þess sem húsnæði þjónustumiðstöðvarinnar væri nýtt til kennslu og námskeiðahalds. Þjónustumiðstöðinni væri einnig ætlað að veita foreldrum upplýsingar og aðstoð hvað réttindi barna þeirra varðar.
Hið sögufræga hús, Brúarland, væri tilvalið fyrir slíka þjónustumiðstöð, en undanfarin ár hefur húsnæðið verið nýtt til skólahalds og nemendum og starfsfólki liðið afar vel þar.
Með því að byggja upp miðlæga þjónustumiðstöð í Brúarlandi tryggjum við skólakerfinu hér í bæ greiðan aðgang að sérfræðingum og stuðlum að snemmtækri íhlutun sem líta þarf á sem fjárfestingu í framtíðinni, bæði fyrir einstaklinginn, fjölskyldu hans og samfélagið.

Erla Edvardsdóttir og Þorbjörg Sólbjartsdóttir
Höfundar eru grunnskólakennarar og skipa 6. og 8. sæti á lista Framsóknar í Mosfellsbæ.

Öll á sama báti

Ari Trausti Guðmundsson

Aðgerðir okkar í loftslagsmálum gagnast veröldinni. Það sem önnur ríki ná að gera í þeim efnum er samtímis í okkar þágu.
Einföld sannindi rétt eins og þau að jákvæðar aðgerðir, sem minnka losun kolefnisgasa eða binda kolefni, eru ekki á fárra höndum. Þær eru flókið langtíma samvinnuverkefni stjórnvalda, þ.e. ríkis, þings og sveitarstjórna, margvíslegra samtaka, fyrirtækja og almennings. Enginn er eyland þegar kemur að umhverfi samfélaga hvar sem þau eru. Við erum þar með öll í sama bátnum hvað sem fjarlægðum og ólíkri menningu veraldar líður. Þetta á líka við um aðlögun að loftslagsbreytingunum. Þar mun alþjóðleg samvinna skipta meginmáli.
Orkuskipti eru meðal helstu verkefna. Til þeirra þarf raforku. Full orkuskipti merkja að vélknúin tæki á landi, sjó og í lofti nota ekki olíu, bensín eða þotueldsneyti, heldur „grænt“ rafmagn og rafeldsneyti, byggt á vetni framleiddu með slíkri orku, að því marki sem samfélagið ákveður.
Markið er nú sett við 2040 og þá búið að „fasa út“ yfir milljón tonna ársnotkun af jarðefnaeldsneyti. Sjálfbær orkustefna og raunhæf loftslagsstefna Íslands eiga að taka mið af þessu næstu 18 árin. Samhliða æ minni losun kolefnisgasa verður reynt að binda sem mest kolefni í gróðri og jarðvegi með ýmsum aðferðum.
Sveitarfélög hafa sem betur fer sett sér umhverfis- og loftslagsstefnu, sum jafnvel líka auðlindastefnu. Mosfellsbær hefur, m.a. með stuðningi VG, tekið þátt í vinnu við nýja, sameiginlega loftslagsstefnu fyrir höfuðborgarsvæðið: Grunnstefnu sem sveitarfélög geta lagað að sér. Góðar vonir eru bundnar við hana.
Kolefnisspor Íslands er stórt miðað við fólksfjölda. Aðgerðir hér varða bæði ábyrgð okkar og velferð milljarða manna, þegar allt kemur til alls. Við erum þátttakendur í örlagaríku verkefni jarðarbúa. Það munar um Mosfellsbæ í þessu samhengi.
Sveitarfélagið getur og á að spara orku og minnka kolefnislosun með orkuskiptum í sínum ranni. Fyrirtæki og samtök geta það, einnig heimilin, og við getum unnið saman að því að binda kolefni með því bæta við gróðri og endurheimta votlendi. Vernda og ganga vel um umhverfið, m.a. minnka notkun og sóun plasts sem mengar umhverfið víða í sveitarfélaginu.
VG er með framsýna stefnu í umhverfis- og loftslagsmálum og hefur sýnt ábyrgð í málefnum sveitarfélagsins. Hún þarf áfram að skila sér til samfélagsins í Mosó.

Ari Trausti Guðmundsson
skipar 14. sæti V-lista í kosningunum 14. maí.