Eins og kunnugt er tók Umhverfisstofnun sýni af gervigrasvöllum á höfuðborgarsvæðinu í vor og sendi utan til rannsóknar. Niðurstöður sýna ekki með óyggjandi hætti að gúmmíkurlið sé skaðlegt heilsu fólks og ekki er líklegt að leiðbeininga sé að vænta frá stofnuninni.
Umhverfisstofnun hefur horft til annarra umhverfisstofnana á Norðurlöndunum varðandi skaðsemi gúmmíkurls á sparkvöllum, en rannsóknir þeirra benda ekki til skaðsemi af völdum þess.
Mosfellsbær hefur notað grænhúðað SBR gúmmíkurl á gervigrasvellinum við Varmá. Húðunin veldur því að óæskileg efni losna síður úr því út í andrúmsloftið og hún bætir því gæði kurlsins.

Heilsa barna og ungmenna í fyrirrúmi
Samkvæmt upplýsingum frá Mosfellsbæ verða lagðar fram tillögur á næstunni. Þær munu fela í sér áherslu á að á öllum völlum í Mosfellsbæ verði gúmmíkurl sem innihaldi einungis ásættanleg efni með tilliti til heilsu barna og ungmenna sem stunda íþróttir á völlunum.
Metið verður ástand valla og lögð áhersla á að framleiðendur gúmmíkurlsins geti lagt fram fullnægjandi innihaldslýsingu sem tryggi að skaðleg efni sé ekki að finna í kurlinu. Þá stendur meðal annars til að ræða við KSÍ um endurnýjun kurls á þeim sparkvöllum sem sambandið hefur gefið.

Sjóvá Kvennahlaup ÍSÍ fer fram í Mosfellsbæ laugardaginn 4. júní. Hlaupið hefst kl. 11 á frjáls­íþróttavellinum að Varmá og hefst skráning kl. 10. Nú verður boðið upp á nýja vegalengd, 900 m, sem hlaupin eða gengin er í kringum íþróttavöllinn. Hinar vegalengdirnar sem í boði eru, eru 3, 5 og 7 km. Mikil þátttaka hefur verið í hlaupinu í Mosfellsbæ undanfarin ár og mikil stemning hefur skapast í kringum þennan árlega viðburð. Fimmtudaginn 2. júní er boðið upp á kvennahlaup eða göngu á Eirhömrum. Vegalengdin er þá miðuð við getu hvers og eins og hefst kl. 14.

Sjóvá Kvennahlaup ÍSÍ 2016
Frjálsíþróttavöllurinn að Varmá laugardaginn 4. júní klukkan 11.00

• Skráning / bolasala hefst klukkan 10:00 við Varmá.
• Söngkonan María Ólafs tekur nokkur lög kl. 10:30
• Upphitun kl. 10:45 • Hlaupið hefst kl. 11:00.
• 1.000 krónur fyrir 12 ára og yngri en 2.000 krónur fyrir eldri en 12 ára.
• Forsala er hafin í World Class í Lágafellslaug og Egilshöll.
• Mosfellsbær býður upp á andlitsmálun fyrir börnin fyrir og eftir hlaup.
• Allir þátttakendur fá bol og verðlaunapening auk þess fá langömmur rós.
• Frítt í sund að Varmá í boði Mosfellsbæjar að hlaupi loknu.
• Næg bílastæði við íþróttamiðstöðina að Varmá, Hlégarð og Brúarland.
• Mætum tímanlega • Veldu þér vegalengd og njóttu þess að hlaupa/ganga á þínum hraða í góðum félagsskap.

Það er ekki hægt að segja annað en að Albert Sigurður Rútsson sé litríkur einstaklingur enda hefur hann víða komið við á sinni lífsleið. Hann er mikið snyrtimenni, ávallt smekklega klæddur og gengur stundum um með hatt á höfði.
Hann var áberandi í íslensku skemmtanalífi á sjöunda áratugnum en síðar einna þekktastur fyrir bílasölur, fornbíla og hótel- og veitingahúsarekstur.
Albert var kosinn Mosfellingur ársins 2008 en í september það ár opnaði hann ásamt fjölskyldu sinni Hótel Laxnes sem telur 26 herbergi.

Albert Sigurður fæddist á Sigríðarstöðum í Fljótum í Skagafirði 14. maí 1946. Foreldrar hans eru Svanfríður Guðrún Stefánsdóttir verkakona og Rútur Kr. Hannesson harmonikkuleikari og hljómsveitarstjóri. Rútur lést árið 1984. Albert er einkabarn en hann á ellefu hálfsystkini.

Veiddi dúfur og seldi
„Ég ólst upp hjá móður minni á Siglufirði. Ég kynntist föður mínum lítið en hann bjó í Hafnarfirði. Mamma vann mikið og á meðan hafði ég skjól hjá afa og ömmu og móðursystur minni, Sigrúnu, og Ástvaldi eiginmanni hennar, sem var mér eins og faðir.
Ég tók mér ýmislegt fyrir hendur á mínum yngri árum, ég tíndi upp sígarettustubba fyrir afa en hann notaði þá í pípuna sína og fyrir það fékk ég smá pening. Ég hjálpaði mömmu í síldinni og svo mokaði ég snjó frá bíódyrunum og fékk frítt inn í staðinn.
Ég veiddi líka dúfur og seldi en þær komu alltaf til mín aftur svo ég seldi alltaf sömu dúfuna og stórgræddi,“ segir Alli og hlær.

Látinn sitja eftir og fékk oft skammir
„Ég gekk í barnaskóla á Sigló en mér gekk illa í skóla, aðallega vegna lesblindu, en lesblindan hefur oft hjálpað mér í seinni tíð. Ég var kallaður tossi, látinn sitja eftir og fékk oft skammir. Ég held að ég hafi verið ofvirkur unglingur, ég vildi helst vera að gera eitthvað allt annað en að læra.
Ég gerði upp bát þegar ég var fjórtán ára, keypti í hann utanborðsmótor og leigði hann svo út. Tveimur árum seinna eignaðist ég Willis jeppa, sem ég leigði líka út í sambandi við snjómokstur í Siglufjarðarskarði. Fóstri minn, Friðgeir Árnason, var vegaverkstjóri á þessum tíma.“

Hitaði pylsurnar á prímus
„Þegar maður fór að fara á sveitaböllin þá lét ég vini mína sem voru komnir með bílpróf keyra bílinn minn. Við tókum með okkur farþega sem greiddu fyrir farið og þar með var bíllinn minn orðinn aðal­leigubíllinn á Sigló.
Í skottinu var ég með pylsur og prímus, ég hitað pylsur eftir böllin og seldi grimmt. Þetta var skemmtilegur tími.
Eftir að ég fékk bílpróf keypti ég mér vörubíl og fékk starf á Vörubílastöðinni. Þar var brjálað að gera, enda síldarár. Þegar vinnan minnkaði á Sigló náði maður í möl í Fljótin eða í sand til Ólafsfjarðar.
Seinna keypti ég mér annan vörubíl og fór þá til Þórshafnar og vann þar í smá tíma.“

Var eftirsóttur skemmtikraftur
Alli ákvað að flytja til Reykjavíkur og byrjaði að troða upp á skemmtunum á sjöunda áratugnum. Hann vakti fljótlega athygli fyrir skemmtilega framkomu og varð eftirsóttur sem kynnir á skemmtunum.
Hann fór einnig með gamanmál og söng gamanvísur, oft með öðrum skemmtikröftum eins og Ómari Ragnarssyni, Bessa Bjarnasyni og Gunnari Eyjólfssyni að ógleymdum Karli Einarssyni en þeir félagar komu oft fram sem Gøg og Gokke.
Alli var einnig eftirsóttur sem jólasveinn. Hann var einmitt í jólasveinagírnum þegar barnaplatan hans, Kátir voru krakkar, var gefin út af Fálkanum árið 1973. Á henni er að finna fjögur lög.

Gríðarlegt áfall
„Ég starfaði í fasteignabransanum en færði mig svo yfir í bílabrask. Fékk vinnu á Bílasölu Guðmundar og vann þar í 10 ár.
Á þessum tíma var ég búinn að kynnast stúlku, Lilju Sveinsdóttur. Við keyptum okkur íbúð við Sporðagrunn og framtíð okkar var björt. Lilja varð ófrísk og þegar hún var komin sjö mánuði á leið vaknaði hún eina nóttina og leið ekki vel. Við köllum á lækni sem tók þá ákvörðun að leggja Lilju inn á spítala. Á meðan á rannsóknum stóð skrapp ég í vinnuna og hringdi svo til að kanna með hana en var þá sagt í símann að hún væri látin.
Þetta var gríðarlegt áfall og ég var lengi að ná mér,“ segir Alli alvarlegur á svip.
„Ég minnkaði að skemmta og hætti á bílasölunni.“

Stofnaði sína eigin bílasölu
„Ég fór síðar að vinna á bílasölu sem hét Bílahúsið og var þar í nokkur ár. Stofnaði síðan mína eigin bílasölu, Bílasölu Alla Rúts, í Borgartúni. Ég seldi svo fyrirtækið en ekki nafnið og byggði svo 700 fm bílasölu uppi á Höfða. Eftir það ævintýri fór ég til Þýskalands með góðum mönnum til að kaupa vinnuvélar og vörubíla sem við ætluðum að selja og ég garfaði í því í nokkur ár.“

Vinsælt að koma við og fá sér hóstasaft
„Ég kynntist góðri konu, Erlu Haraldsdóttur, og á með henni þrjú börn. Íris Ósk er fædd 1972, Jónas Svanur er fæddur 1978 og Anna Mæja fædd 1985. Fyrir átti ég Katrínu Þóru fædda 1967. Ég á sex barnabörn. Við Erla slitum samvistir.
Ég var í hestamennsku í mörg ár og var með þeim fyrstu sem byggði hesthús í Víðidal. Ég flutti í Mosfellsbæ í hús sem heitir Klöpp og var með hesthús heima. Það var nokkuð vinsælt að koma við hjá mér og fá sér smá hóstasaft,“ segir Alli og brosir.

Hótelið fengið mjög góða einkunn
„Ég seldi húsið þegar ég keypti veitingahúsið Áslák sem ég hef nú rekið í 16 ár. Ég sá möguleika á að byggja við og fékk leyfi til að byggja hótel.
Margir höfðu ekki trú á mér en ég seldi nokkra bíla og var í fjögur ár að byggja hótelið sem fékk nafnið Hótel Laxnes. Ég og fjölskylda mín eigum og rekum það saman. Við erum með tólf starfsmenn í vinnu.
Við áætlum að stækka hótelið á næstu misserum og erum byrjuð að teikna. Hótelið hefur fengið mjög góða einkunn og er það starfsfólki okkar að þakka.“

Gefur út ævisögu
„Það er gaman að segja frá því að ég er að fara að gefa út ævisögu mína. Ég fékk Helga Sigurðsson sagnfræðing til að skrifa bókina sem er langt komin.“
Albert á sjötugsafmæli þann 14. maí og ég spyr hann hvað hann ætli að gera í tilefni dagsins? „Ætli ég fari ekki bara í göngutúr í Kolaportinu og horfi svo á Eurovision um kvöldið.“
Með þeim orðum kveð ég afmælisbarnið með kossi á kinn.

Mosfellingurinn 12. maí 2016
Myndir og texti: Ruth Örnólfs

Séra Arndís G. Bernhardsdóttir Linn var sett í embætti í Mosfellsprestakalli sunnudaginn 1. maí. Þórhildur Ólafs, prófastur Kjalarnessprófastsdæmis, setti Arndísi í embættið í sérstakri innsetningarmessu.
Sr. Ragnheiður Jónsdóttir sóknarprestur þjónaði fyrir altari og Arndís Linn predikaði. Rut G. Magnúsdóttir djákni sóknarinnar las bænir og Helga Kristín Magnúsdóttir og Karl Loftsson lásu ritningarlestra.
Kirkjukór Lágafellssóknar og Skólakór Varmárskóla sungu undir stjórn Guðmundar Ómars Óskarssonar. Að athöfninni lokinni bauð sóknarnefnd í súpu og brauð í safnaðarheimili Lágafellssóknar.
Biskup Íslands skipaði Arndísi G. Bernhardsdóttur Linn í embætti prests í Mosfellsprestakalli að afloknum kosningum sem fóru fram í marsmánuði.

Frábæru keppnistímabili er lokið hjá stelpunum í úrvalsdeildarliði Aftureldingar í blaki en Aftureldingarstelpur eru þrefaldir meistarar og unnu alla titla sem í boði voru.
Veturinn hefur verið langur en auk þess að taka þátt í mótum á Íslandi, tók liðið þátt í riðlakeppni NEVZA (Norður-Evrópukeppni félagsliða) en leikið var í Bröndby í Danmörku í nóvember. Liðið lék við tvö bestu lið Danmerkur og Noregsmeistarana og átti mjög góða leiki á mótinu. Reynslan af þessu móti átti eftir að nýtast liðinu mjög vel á keppnistímabilinu.
Úrslitahelgin í Bikarkeppni Blaksambands Íslands var leikin í marsmánuði og lék Afturelding við lið KA í undanúrslitum og vann öruggan sigur 3-0. Í úrslitum léku þær við lið Þróttar frá Neskaupsstað og vann Afturelding 3-0 sigur þar sem Afturelding hafði yfirhöndina allan tímann en Þróttarar voru aldrei langt undan. Að leik loknum var Thelma Dögg Grétarsdóttir valin leikmaður úrslitaleiksins og fékk að launum Gullbolta Mizuno.

Hörð barátta í deildinni
Deildarkeppnin var jöfn í Mizunodeild kvenna og fyrir lokaumferðina áttu þrjú lið tækifæri á að verða meistarar. Með sigri á Þrótti Neskaupsstað tryggðu Aftureldingarkonur sér deildarmeistaratitilinn og um leið heimaleikjaréttinn í úrslitakeppninni.
Í úrslitakeppninni vann Afturelding lið Stjörnunnar í tveimur leikjum og lék við HK, en þær höfðu náð að sigra Aftureldingarkonur árið áður í keppninni um Íslandsmeistaratitilinn.
Afturelding hóf úrslitaeinvígið með góðum sigri að Varmá en tapaði síðan leik 2 sem leikinn var í Fagralundi. Leikur 3 var eign Aftureldingar frá upphafi og auðveldur 3-0 sigur. Úrslitin réðust í leik 4 í Fagra­lundi, Aftureldingarkonur komust í 2-0 en HK jafnaði í 2-2. Úrslitin réðust því í oddahrinu, líkt og árið á undan, en núna voru það Aftureldingarkonur sem stóðu uppi sem sigurvegarar.

Handahafar allra titlana
Frábært tímabil hjá stelpunum okkar á enda þar sem þær eru nú handhafar allra titlanna á Íslandi.
Auk þess að að ná þessum frábæra árangri þá voru þær Fjóla Rut Svavarsdóttir, Kristín Salín Þórhallsdóttir, Kristina Apostolova og Thelma Dögg Grétarsdóttir valdar í Úrvalslið Mizunodeildarinnar.
Thelma Dögg Grétarsdóttir var einnig kjörin besti leikmaður Mizunodeildar kvenna en hún átti frábært tímabil þar sem hún varð stigahæst í uppgjöfum og sókn ásamt því að vera stigahæsti leikmaður deildarinnar.

Lýtalæknar takast á við afleiðingar slysa og sjúkdóma. Þeir hjálpa fólki vegna útlitslýta hvort sem þau eru meðfædd eða áunnin og geta einnig aðstoðað við að draga úr ótímabærum öldrunareinkennum.
Halla Fróðadóttir er ein af þeim sem starfar sem lýtalæknir. Hún ákvað ung að aldri að leggja læknavísindin fyrir sig en veit ekki hvaðan sú köllun kom. Halla opnaði nýverið sína eigin læknastofu í Klíníkinni Ármúla þar sem hún framkvæmir bæði lýta- og fegrunaraðgerðir en hún sinnir einnig störfum á lýta- og brunadeild Landspítalans.

Halla fæddist í Dalsgarði í Mosfellsdal 9. febrúar 1973. Foreldrar hennar eru þau Steinunn Björk Guðmundsdóttir ritari og Fróði Jóhannsson garðyrkjubóndi en þau eru bæði látin.
Systkini Höllu eru: Högni fæddur 1969, járningameistari og tamningamaður í Þýskalandi, Ragna fædd 1970, textíl- og fatahönnuður og Birta fædd 1980, arkitekt.

Foreldrar mínir voru bóhemar
„Ég fæddist heima í Dalsgarði og ólst þar upp. Ég tilheyri einni af þessum stóru fjölskyldum sem hafa búið í Mosfellsbæ frá miðri síðustu öld. Dalsgarðsfjölskylduna þekkja margir, hún hefur þótt sérstök og fer sínar eigin leiðir. Stór hluti fjölskyldunnar býr í Dalnum og er gott samband manna á milli.
Foreldrar mínir voru bóhemar og settust hér að 1969. Þau héldu listrænt heimili og það var mikið um tónlist. Þau voru skapandi og litríkir einstaklingar og mjög hvetjandi sama hvað við systkinin tókum okkur fyrir hendur. Þau létust bæði árið 2012 langt fyrir aldur fram og við söknum þeirra mikið.
Í Dalsgarði hefur verið rekin gróðrarstöð frá árinu 1950, fyrst af afa mínum Jóhanni, svo tók Fróði faðir minn við. Nú rekur Gísli, föðurbróðir minn stöðina.“

Bjuggum til leynifélag
„Þegar ég var að alast upp var mikið af krökkum á sama aldri og ég í Dalnum og oft var mikið stuð. Við spiluðum fótbolta, vorum upp í fjalli og bjuggum til leynifélag. Það var frábært að alast hér upp með öllu því frelsi sem því fylgdi, svo við tölum ekki um nálægðina við náttúruna.
Ég gekk í Varmárskóla og var bekk á undan alla mína skólagöngu. Ég var stundum ofvirk, talaði mikið og var oft í miklu stuði. Mamma heyrði eitt sinn útundan sér að einn kennarinn hefði sagt: „Hún er óskaplega músíkölsk hún Halla en mikið er hún óhamin.“ Ég var nú samt ekki til mikilla vandræða,“ segir Halla með afsökunartón og brosir.

Dansaði í Gleðibanka myndbandinu
„Ég mátti aldrei missa af neinu og varð að vera með í öllu. Ég spilaði á fiðlu, æfði handbolta, fór á skíði, var í hestaklúbbnum og gott ef ég var ekki að vinna á Western Fried líka.
Ég fór mikinn í freestyle dansi og keppti mörg ár í röð í Tónabæ með vinkonum mínum. Hápunktur ferilsins var þegar hópurinn var fenginn til að dansa í Gleðibanka myndbandinu.
Ég var mjög sjálfstæð á mínum yngri árum, kannski einum of. Ég held að ég hafi jafnvel fengið of mikið frelsi, mig skorti stundum aga og aðhald.
Frá Gaggó Mos fór ég í Menntaskólann við Hamrahlíð og útskrifaðist vorið 1992. Ég naut mín vel í MH og þar eignaðist ég margar af mínum bestu vinkonum í dag.“

Giftu sig í fallegum lundi
Halla var aðeins 14 ára þegar hún kynntist manninum sínum, Hákoni Péturssyni. Hann er smiður og rekur sitt eigið fyrirtæki. „Ég greip hann glóðvolgan þegar hann flutti í Dalinn,“ segir Halla og glottir. „Við giftum okkur í fallegum lundi í Laxárnesi í Mosfellsdal árið 2000. Við eigum þrjá stráka, Mána fæddan 2002, Bjart fæddan 2004 og Fróða fæddan 2012.
Við fjölskyldan búum á æskuheimili mínu og erum sjö í heimili og svo erum við líka með landnámshænur, hesta, hund og kött. Bróðursonur minn býr hér hjá okkur núna og svo erum við með au pair frá Nepal en hann hefur verið hjá okkur síðan 2014.
Við erum mikið sveitafólk og viljum hvergi annars staðar vera. Við erum mikið úti í náttúrunni og erum dugleg að ferðast. Svo erum við í skot- og stangveiði sem er að verða nýja fjölskyldusportið.“

Með óstöðvandi útþrá og ferðaveiki
„Eftir menntaskóla tók ég mér árs leyfi frá námi og fór til Ameríku. Ég lærði ensku og tók nokkur fög í háskóla í Kaliforníu til að undirbúa mig undir nám í læknisfræði. Ég ætlaði mér alltaf að verða læknir, veit svo sem ekki hvaðan sú köllun kom en þetta stendur víst í stjörnukortinu mínu.
Ég útskrifast frá læknadeild HÍ 2001. Ég tók mér ársfrí frá náminu veturinn 1997-1998 þegar við Hákon skelltum okkur í heimsreisu sem tók átta mánuði. Það var ekki aftur snúið, við höfum verið með óstöðvandi útþrá og ferðaveiki síðan.“

Fluttu til Svíþjóðar
„Vorið 2003 fluttum við til Svíþjóðar þar sem ég fór í sérnám í lýtalækningum. Árin í Svíþjóð voru frábær og þarna var virkilega gott að búa. Ég verð nú samt að viðurkenna að mér þótti Svíarnir vera stundum óttalega ferkantaðir og ég saknaði stundum óreiðunnar á Íslandi. Við fluttum aftur heim til Íslands sumarið 2010.“
Sérhæfð í uppbyggingu brjósta
Halla starfar á lýta- og brunadeild Landspítalans við almennar lýtalækningar ásamt því að starfa á sinni eigin læknastofu. „Það eru mjög mismunandi ástæður þess að einstaklingar leita til lýtalækna. Við sjáum um ýmiss konar aðgerðir, vegna alvarlegra brunasára, gerum aðgerðir á lýtum, meðferð á sortuæxlum og öðrum húðkrabbameinum. Ég hef sérhæft mig í uppbyggingu brjósta eftir krabbamein.
Ég opnaði nýverið mína eigin stofu þar sem ég geri allar almennar fegrunaraðgerðir sem og minni lýtaaðgerðir. Ég legg mikið upp úr góðum samskiptum við mína sjúklinga. Væntingar sjúklinga í lýtalækningum eru oft miklar og stundum þarf að draga úr þeim.
Í langflestum tilvikum gengur allt vel en það geta komið upp fylgikvillar sem getur verið erfitt fyrir sjúklinga að takast á við og er því nauðsynlegt að fylgja þeim vel eftir og hjálpa þeim að takast á við þau vandamál sem síðar geta komið upp.“

Fæ mikla hugarró við lestur
Ég er núna að vinna í því að huga betur að sjálfri mér, hreyfa mig meira og svo er ég líka að reyna að temja mér hugleiðslu. Ég les mikið og fæ mikla hugarró við lestur.
Ég nýt þess líka að hitta fjölskyldu mína og vini. Uppáhaldskonurnar í lífi mínu eru systur mínar Ragna og Birta, þær eru mér ótrúlega mikilvægar og við erum mjög nánar.“

Mosfellingurinn 20. apríl 2016
Myndir og texti: Ruth Örnólfs

Það var stór stund fyrir Golfklúbb Mosfellsbæjar þegar tekin var fyrsta skóflustungan að nýrri íþróttamiðstöð GM sem mun standa miðsvæðis á Hlíðavelli.
Það var myndarlegur hópur ungra kylfinga klúbbsins sem fékk það verkefni að taka sameiginlega fyrstu skóflustunguna að nýju mannvirki undir handleiðslu þjálfara síns, Sigurpáls Geirs Sveinssonar, íþróttastjóra GM.
Þegar húsið verður allt komið í gagnið mun verða til aðstaða fyrir börn og ungmenni í Mosfellsbæ að æfa sína íþrótt alfarið í heimabyggð við bestu mögulegu aðstöðu.
Jarðavegsframkvæmdir eru nú þegar hafnar og mun verða líflegt um að litast á svæðinu í vor. Gert er ráð fyrir því að eiginlegar byggingarframkvæmdir hefjist í vor en klúbburinn stefnir að því að flytja inn í fyrsta hluta hússins vorið 2017.