Á sumardaginn fyrsta, fimmtudaginn 21. apríl kl. 15 verður barnaleikritið Ævintýraþjófarnir frumsýnt í Bæjarleikhúsinu.
Í tilefni þess að Leikfélag Mosfellssveitar var valið bæjarlistamaður Mosfellsbæjar árið 2015 langar leikfélaginu að þakka fyrir sig og því er öllum bæjarbúum, ungum sem öldnum, boðið á sýninguna.

Ævintýraþjófarnir er nýtt barnaleikrit byggt á gömlum íslenskum ævintýrum skrifað af Maríu Guðmundsdóttur og Brynhildi Sveinsdóttur ásamt leikhópi og leikstjóra. Þegar nokkrir félagar frétta af elstu og dýrmætustu ævintýrabók Íslendinga sem inniheldur öll þau ævintýri sem Íslendingar hafa skrifað, ætla þau heldur betur að græða.
Þau brjótast inn í Sögusafnið þar sem bókin hefur verið varðveitt í mörg hundruð ár til þess að stela henni og selja dýrum dómi. En þegar þau koma inn í sögusafnið hefur það ófyrirsjáanleg áhrif og þau uppgötva leyndardóma ævintýranna.

Sýningartímar:
Fimmtudaginn 21. apríl kl. 15
Fimmtudaginn 21. apríl kl. 17
Sunnudaginn 24. apríl kl. 15
Sunnudaginn 24. apríl kl. 17
Aðgangur er ókeypis á allar sýningar. Miðapantanir í síma 566 7788.

Lumar þú á ævintýri eða langar til þess að skrifa nýtt ævintýri?
Leikfélag Mosfellssveitar safnar ævintýrum í Ævintýrabókina og hvetur alla sem koma að sjá sýninguna, bæði börn og fullorðna, til að skrifa ævintýri og koma með í leikhúsið. Ævintýrunum verður safnað saman í Ævintýrabókina og þau varðveitt fyrir alla áhugasama til að lesa um ókomin ár. Ævintýrin mega vera um hvað sem er og nú gildir bara að leyfa ímyndunaraflinu að njóta sín. Ekki gleyma að myndskreyta.

Signý Sigtryggsdóttir hefur starfað sem dagmamma í 37 ár, lengst af í Mosfellsbæ. Hún tók á móti mér með þéttu handabandi og bros á vör er ég bankaði upp á hjá henni á heimili hennar í Hulduhlíð. Hún er lífsglöð kona, orðheppin með eindæmum og það þarf ekki að vera lengi í návist hennar til að sjá að þarna er mikill skörungur á ferð, röggsamur og skipulagður.
Signý lætur sig yngstu kynslóðina varða enda búin að starfa lengi sem dagmamma. Hún segist vinna skemmtilegustu vinnu í heimi og myndi með engu móti vilja skipta um starfsvettvang.

Signý Sigtryggsdóttir er fædd 12. nóvember 1956 á Litlu Reykjum í Reykjahverfi í Þingeyjarsýslu. Foreldar hennar eru þau Aðalbjörg Jónsdóttir og Sigtryggur Árnason en þau eru bæði látin. Signý á tvær eldri systur, þær Kristrúnu og Árnínu Laufeyju og yngri bróður, Þráinn Ómar.

Foreldrarnir alltaf heima
„Reykjahverfi er lítil sveit rétt sunnan við Húsavík. Við systkinin áttum frábæra æsku, foreldrarnir bændur og alltaf heima. Ég lék mér að dúkkum fram að fermingu og er sennilega enn að finna mig í dúkkuleik. Það er skrýtið til þess að hugsa að við vorum byrjuð að keyra dráttarvélar 12 ára og hjálpa til við hin ótrúlegustu störf.
Þegar ég var að snúa á traktornum þá söng ég alltaf hástöfum og stundum held ég að ég hafi ekki haft hugmynd um hvað ég var að gera, ég lifði mig svo inn í sönginn.
Ég hef alltaf átt stóran draum, að vera með engiltæra og fallega söngrödd og geta sungið ein á sviði. Ég er löngu búin að átta mig á að þessi draumur minn mun ekki rætast,” segir Signý og skellihlær.

Stóð og potaði í súkkulaði
„Ég fór í skóla að Laugum í Reykjadal, var tvo vetur í skóla í Öxarfirði en útskrifaðist sem gagnfræðingur á Akureyri árið 1974.
Um sumarið starfaði ég í Súkkulaðiverksmiðjunni Lindu við hin ýmsu störf. Stundum stóð ég við færibandið en á því voru fullt af járnmótum með súkkulaði sem ég potaði í svo það myndu ekki myndast loftgöt. Síðan „tromplaði“ þetta inn í kæli og endaði að lokum sem dýrindis súkkulaðipakkar á borðum landsmanna.”

Flutti á Bessastaði
„Einn daginn sá ég auglýst þjónustustarf á Bessastöðum, þetta var í tíð Kristjáns Eldjárns forseta. Ég sótti um og fékk starfið, sagði skilið við súkkulaðið og flutti til Bessastaða. Upphaflega var ég ráðin í eitt ár en árin urðu þrjú.
Forsetahjónin voru yndislegar manneskur og það var gaman að vinna þarna. Ég bjó á staðnum ásamt ráðskonunni, Sigrúnu Pétursdóttur, sem er einstaklega yndisleg kona.”

Hellti í glösin að sveitamanna sið
„Á Bessastöðum þurfti að passa upp á að allt væri hreint og fínt, pússa silfrið og annað slíkt. Mér fannst gestamóttökurnar skemmtilegastar, þá þurftum við að vera í svörtum kjól með hvítan kappa, svuntu og hvítt stykki á handleggnum og svo var þjónað til borðs.
Ég var nú ekkert sérlega vel að mér í veislumenningunni á þessum tíma enda ekki nema 17 ára.
Eitt sinn var fín veisla í gangi og ég átti að fara inn með silfurbakka með kristalsglösum á með allskonar tegundum af vínum. Ég hellti í glösin og eins og sveitamanna er siður þá voru glösin ansi vel full, þar með talin koníaksglösin sem ég fyllti alveg upp að barmi. Sem betur fer náðu æðri konur að stoppa mig af áður en ég trillaði með herlegheitin inn til gestaskarans.”

Lærði smurbrauðstækni á Sögu
Árið 1977 flutti Signý til Reykjavíkur og fór að læra smurbrauðstækni á Hótel Sögu. „Það var eiginlega sjokk að koma á svona stóran vinnustað eftir rólega heimilislífið á Bessó. Eftir að ég lauk námi fór ég að vinna á kaffistofunni í Norræna húsinu.
Á þessum tíma var ég búin að kynnast manninum mínum, Garðari Vigni Sigurgeirssyni, en hann starfar hjá Eimskip. Við eignumst frumburðinn Sindra Örn 1978 og Árna Rúnar 1982. Við eigum fimm barnabörn.”

Eitt af okkar gæfusporum
„Árið 1979 gerðist ég dagmamma, það kom til vegna þess að mig langaði til að vera lengur heima með Sindra. Það sama var með Árna þegar hann fæddist, ég hélt áfram að passa börn. Mér fannst æðislegt að geta verið heima.
Árið 1992 var komið að því að skipta um húsnæði og sem betur fer þá lentum við hér í Mosfellsbæ sem var eitt af okkar gæfusporum.
Á þessum tíma tíðkaðist í bæjarfélaginu að leyfi til daggæslu var ekki gefið út nema fyrir ákveðinn barnafjölda svo allar sem í stéttinni störfuðu höfðu fullt hús. Frekar úrelt hugsun en þá fór ég út á vinnumarkaðinn og var þar í nokkra mánuði. Umsókn mín var samt inni og ég beið í ofvæni eftir að komast í starfið aftur og það varð úr.”

Dagarnir í föstum skorðum
„Dagmömmustarfið er ekki neinn leikur, það er mikil vinna og ekki hægt að sinna því í neinum hjáverkum. Dagarnir hjá mér eru löngu komnir í fastar skorður.
Þegar þessar litlu mannverur mæta fá þær hafragraut og upp úr tíu fer ég með þær út í garð. Það er ótrúlega hressandi og þau koma inn rjóð, þreytt og sæl.
Oft tek ég upp gítarinn og syng fyrir þau í smástund. Fyrst þegar þau eru að byrja í pössun verða þau skelfingu lostin yfir þessu gauli í mér, grípa fyrir augun og bresta í grát. Ég tel að besta aðferð til að róa barn sé að syngja fyrir það.”

Tilbreyting í leik og starfi
„Áður fyrr fóru börn seinna í leikskóla og voru þar af leiðandi eldri, þá föndraði ég mikið með þeim. Í dag geri ég það aðeins fyrir jólin en það er mjög takmarkað sem hægt er að láta eins árs gamalt barn eða yngra gera.
Áður hafði ég alltaf jólaball, jólasveinn mætti og dansaði með okkur en í síðasta sinn sem ég hélt ball urðu börnin svo hrædd við jólasveininn að það lá við að ég yrði að útvega áfallahjálp. Ég breytti því til og hef bara einn jóladag þar sem ég býð foreldrum í kakó og smákökur og börnin fá eitthvað gott í gogginn, þetta er svona smá tilbreyting í leik og starfi.
Ef vel liggur á mér á vorin og sólin lætur sjá sig hef ég stundum haldið garðpartý, þá eru blöðrur og húllumhæ.”

Félagsskapurinn mannbætandi
„Ég hef sungið lengi með Mosfellskórnum og það er ótrúlega skemmtilegt, í kórnum er einstaklega fjörugt og yndislegt fólk,“ segir Signý aðspurð um áhugamálin. „Svo er auðvitað alltaf eitthvað meira um að vera í kringum svona gaul.
Ég gerðist félagi í Lionsklúbbnum Úu fyrir nokkrum árum og ég mæli eindregið með þeim félagsskap, hann er mannbætandi.
Ég fór að stunda sund fyrir mörgum árum síðan og fer á hverjum degi í laugina. Þetta er mín stóra fíkn fyrir utan kaffibollann,“ segir Signý að lokum er við kveðjumst.

Mosfellingurinn 31. mars 2016
Myndir og texti: Ruth Örnólfs

Í haust tekur til starfa útibú frá Varmárskóla í Brúarlandi. Skólavist í Brúarlandi verður valkvæð fyrir nemendur í 1. og 2. bekk Varmárskóla og verður tekið á móti 35-40 nemendum í haust.
Starfsemin er fyrsta skrefið í stofnun nýs skóla sem mun rísa í Helgafellslandi. Stefnt er að því að hefja skólastarf í Helgafellsskóla haustið 2018.

Heildstæður skóladagur
Þórdís Eik Friðþjófsdóttir, kennari við Varmárskóla, hefur verið ráðin til að stýra starfinu í Brúarlandi. Þórdís er reynslumikill kennari á yngsta stigi.
Starfsemi í Brúarlandi mun byggja á skólastefnu-, námsskrá og skóladagatali Varmárskóla. Þar verður boðið upp á heildstæðan skóladag, stoðþjónustu, mötuneyti og frístund. Samvinna verður á milli bekkjardeilda í Brúarlandi og Varmárskóla þar sem nemendur fara saman í íþróttir og nýta útikennslusvæðið.

Opið hús næsta fimmtudag
Brúarland er sögufrægt hús í Mosfellsbæ en þar hefur verið starfræktur skóli í áratugi. Unnið hefur verið að endurbótum á aðstöðunni bæði inni og úti til að taka á móti ungum nemendum og verið er að skipuleggja næstu skref.
Boðið verður upp á opið hús fimmtudaginn 7. apríl kl. 18-20 í Brúarlandi. Þar verður skólastarfið kynnt og foreldrum boðið að hitta skólastjórnendur og skoða aðstöðuna.
Foreldrar og forráðamenn eru hvattir til að hafa samband við Þórönnu skólastjóra (thoranna@varmarskoli.is) eða Þórdísi Eik (thordiseik@varmarskoli.is) ef einhverjar spurningar vakna.

Ég er á degi fjögur í 30 daga áskorun þegar þessi Mosfellingur kemur út. Ég elska áskoranir, svo lengi sem þær eru líklegar til þess að gera manni gott. Þessi áskorun gengur út á mataræði, að borða ákveðnar fæðutegundir og sleppa öðrum á sama tíma.
Ég tek þátt í áskoruninni til þess að komast að því hvort mér líði enn betur ef ég sleppi því að borða fæðutegundir sem ég hef borðað talsvert mikið af undanfarið. Ég hef grun um það, eina leiðin til þess að komast að því er að prófa það á sjálfum mér.

Ráðleggingar um mataræði eru margar og mismunandi í dag. Ég er nýbúinn að lesa tvær bækur um mataræði. Önnur sannfærði mig um að ég ætti að fasta á hverjum degi, borða mikið af ávöxtum og grænmeti og helst láta allar dýraafurðir eiga sig. Hin sannfærði mig um að ég ætti að vera rólegur í ávöxtunum, borða mikið af grænmeti og talsvert mikið af dýraafurðum.
Höfundar beggja bóka rökstuddu sitt mál vel, ég trúði þeim báðum þótt þeir væru innilega ósammála hvor öðrum. Ég á vin sem fylgir þriðju leiðinni, hann er grjótharður á því að hún sé sú eina rétta. Hann hefur líka náð að sannfæra mig með rökum um það.

Staðan í dag er einfaldlega sú að það er enginn einn ótvíræður sannleikur með mataræði, það sem hentar einum þarf ekki að henta öðrum. Besta leiðin til þess að finna það mataræði sem hentar þér, kæri lesandi, er að prófa sig áfram. Velja eina leið og fylgja henni í 25-30 daga. Meta hvað gerir þér gott, hvað ekki.
Ekki láta aðra trufla þig á meðan. Fólk á eftir að freista þín, bjóða þér kökusneið eða kókosbollu. Segðu bara nei takk. Haltu svo áfram að prófa þig áfram. Finndu þína leið.

Heilsumolar Gaua
Mosfellingur 31. mars 2016

Fanney Dögg Ólafsdóttir snyrtifræðimeistari og eigandi snyrti-, nudd- og fótaaðgerðastofunnar Líkama og sálar segir ávinning af varanlegri förðun vera svipmeira útlit sem undirstrikar fegurð einstaklingsins.

Varanleg förðun eða förðun framtíðarinnar er byltingarkennd meðferð sem felst í innsetningu lita undir yfirborð húðar til þess að skerpa línur andlits og undirstrika fegurð. Meðferðirnar eru tiltölulega sársaukalitlar og eru ávallt gerðar í samráði við viðskiptavini bæði hvað varðar litaval og lögun.
Ein af þeim sem hefur ástríðu fyrir förðun sem þessari er Fanney Dögg Ólafsdóttir, snyrtifræðimeistari, en hún notar liti frá Nouveau Contour sem hafa verið prófaðir fyrir litastöðuleika, öryggi og útkomu og teljast þeir bestu á markaðnum í dag.

Fanney Dögg er fædd í Reykjavík 21. september 1981. Foreldrar hennar eru þau Hugrún Þorgeirsdóttir snyrti-, nudd- og fótaaðgerðafræðingur og Ólafur Sigurjónsson verslunarstjóri Kaupfélags Skagfirðinga. Fanney Dögg á eina systur, Jónu Björgu, sem er fædd 1979.

Alltaf líf og fjör hjá afa og ömmu
„Ég er alin upp í Mosfellsbæ og vil hvergi annars staðar eiga heima. Björg föðuramma mín og Sigurjón afi bjuggu í næstu götu við okkur og það var dásamlegt að fá að alast upp svona nálægt þeim.
Ansi oft fylgdi okkur systrum stór vinahópur sem mætti í Álmholtið til þeirra og þar var alltaf líf og fjör og vel tekið á móti öllum.“

Kafaði gjörsamlega niður á botn
„Á mínum yngri árum var maður mikið út að leika í hinum ýmsu leikjum eða að renna sér í brekkunni fyrir neðan Lágholtið.
Áður en Sorpa kom til sögunnar þá voru ruslagámar rétt hjá hesthúsahverfinu. Ég gekk gjarnan þangað, fór upp í gámana og kafaði gjörsamlega niður á botn og fann alltaf einhverja flotta hluti sem ég tók að sjálfsögðu með mér heim,“ segir Fanney Dögg og skellir upp úr.
„Foreldrar mínir voru lítt hrifnir af þessu uppátæki mínu, hvað þá að gjöfunum sem ég færði þeim eftir hverja ferð.“

Týpísk nútíma fjölskylda
„Ég gekk í Varmárskóla og fór síðan í Gaggó Mos. Við æskuvinkonurnar höfum haldið hópinn og ég er einstaklega heppin að eiga frábærar og traustar vinkonur.
Foreldrar mínir skildu þegar ég var fimmtán ára. Þau eignuðust síðan nýja maka og í kjölfarið eignaðist ég sjö stjúp­systkini svo mín nánasta fjölskylda stækkaði ansi mikið. Þetta er þessi týpíska nútíma fjölskylda,”“segir Fanney Dögg og brosir. „Allt er þetta dásamlega gott og skemmtilegt fólk og samband okkar er gott.“

Eyddi frítíma mínum í hestamennsku
„Allan minn tíma í grunnskóla æfði ég knattspyrnu með Aftureldingu og svo var ég líka í Skólakór Varmárskóla.
Við fjölskyldan vorum í hestunum og í hesthúsinu eyddi ég öllum mínum frítíma og á frábærar minningar þaðan. Hestamennskan er yndislegt fjölskyldusport og í Herði er mikið lagt upp úr barna- og unglingastarfi.
Við í unglingahóp Harðar vorum með hestasýningu í Vestmannaeyjum 1995 þar sem við sýndum m.a. skrautsýningu, fánareið, hlýðniæfingar, hindrunarstökk og fleira. Þessi ferð var afar vel heppnuð og rataði meira að segja í blöðin.“

Flutti til Danmerkur
„Eftir gagnfræðaskólann lá leið mín á Laugarvatn þar sem ég var í tvö ár en svo flosnaði ég upp úr skóla og fór að vinna.
Sumarið 1999 flutti ég til Danmerkur og fór að læra snyrtifræði í Cidesco cosmetologskolen í Kaupmannahöfn. Þetta var skemmtilegur tími og ég varð sjálfstæðari og þroskaðri við þessa dvöl mína. Ég flutti heim eftir námið og við tók nemasamningur á Snyrtistofunni Líkama og sál, sveinsprófið klárað ég árið 2002.
Ég kláraði stúdentinn og sjúkraliðann frá Menntaskólanum við Ármúla 2005 og svo tók ég meistararéttindin í snyrtifræði 2008 og bætti svo förðunarfræðingnum við 2011 svo það er búið að vera nóg að gera.“

Bestu stundirnar fólgnar í einfaldleika
„Ég kynntist eiginmanni mínum, Guðmundi Þór Sævarssyni, sölustjóra hjá Emmess ís, árið 2007. Það má segja að þetta hafi verið ást við fyrstu sýn. Við giftum okkur 2009 í Lágafellskirkju og héldum veislu í Kjósinni, frábær dagur í alla staði.
Gummi gekk dóttur minni, Andreu Rós, í föðurstað þegar hún var fjögurra ára og samband þeirra er sterkt og gott. Árið 2008 eignumst við soninn Aron Þór, en yngst er Eva Dögg, hún er fædd 2010.
Hvað finnst fjölskyldunni skemmtilegast að gera saman? „Okkur finnst gaman að ferðast innanlands sem utan, fara í sumarbústaðaferðir, göngutúra, skíði og bara hverskyns samvera. Á planinu er svo að vera með tvo hesta í húsi fram á sumar.
Það er nú ekki mikill tími aflögu í þessu hraða þjóðfélagi sem við lifum í en við reynum að nýta vel þær stundir sem við eigum saman og njóta þeirra. Oft eru bestu stundirnar fólgnar í einfaldleikanum.“

Líkami og sál 20 ára
„Snyrtistofan Líkami og sál var stofnuð af móður minni árið 1996 svo fyrirtækið verður 20 ára í ár. Ég keypti stofuna árið 2011 og nú starfar mamma hjá mér og okkur finnst dásamlegt að vinna saman. Jóna Björg systir útskrifaðist sem fótaaðgerðafræðingur s.l. haust og nú hefur hún bæst í hópinn. Auk okkar starfa tveir aðrir starfsmenn á stofunni.“

Meðferðirnar henta báðum kynjum
Er boðið upp á margar meðferðir á stofunni? „Já, hjá okkur er fjölbreytileikinn í fyrirrúmi og meðferðirnar henta bæði konum og körlum. Það er gleðilegt að segja frá því að við sjáum mikla aukningu hjá körlum sem er frábært því þeir þurfa jafn mikið á meðferðunum að halda og konur.
Í byrjun árs 2015 klárað ég mastersnám í varanlegri förðun (tattú). Þetta er það skemmtilegasta sem ég geri og þarna liggur mín ástríða. Við notum liti frá Noveau Contour sem eru náttúrulegir og endast lengi. Allt er þetta framkvæmt eftir óskum hvers og eins og útkoman er eðlileg og undir­strikar fegurð einstaklingsins.
Varanleg förðun getur breytt miklu t.d. fyrir manneskjur sem hafa gisnar augabrúnir og þurfa að fara í litun mjög ört eða hafa misst hárin vegna lyfjameðferðar. Það er vert að geta þess að Tryggingastofnun tekur þátt í kostnaði sem hlýst af svona meðferðum fyrir sjúklinga.
Þetta er sem sagt nýjasta viðbótin hjá okkur og ég er stolt að geta boðið upp á þessa meðferð,“ segir Fanney Dögg að lokum er við kveðjumst.

Myndir og texti: Ruth Örnólfs

Þegar íbúar í Mosfellsbæ eru spurðir hversu ánægðir eða óánægðir þeir séu með Mosfellsbæ sem stað til að búa á eru 93% aðspurðra ánægðir eða mjög ánægðir.
Mosfellsbær er því enn eitt árið með ánægðustu íbúana í samanburði við önnur sveitarfélög og með hæstu einkunn. Þetta kemur fram í árlegri könnun Capacent þar sem mælt var viðhorf til þjónustu í 19 stærstu sveitarfélögum landsins.

Flestir ánægðir með íþróttaaðstöðu – fæstir við þjónustu við fatlað fólk
Alls eru 83% íbúa í Mosfellsbæ ánægðir með aðstöðu til íþróttaiðkunar og ánægja með þjónustu í leikskólum bæjarins mælist um 80%. Spurðir um þjónustu Mosfellsbæjar í heild eru 77% mjög eða frekar ánægðir.
Niðurstöður sýna að ánægja í Mosfellsbæ er í eða yfir landsmeðaltali í öllum málaflokkum sem spurt er um. Einn af helstu styrkleikum Mosfellsbæjar miðað við önnur sveitarfélög síðustu ár hefur verið ánægja íbúa með skipulagsmál og svo er einnig nú. Þegar spurt er um þjónustu við eldri borgara er ánægja í Mosfellsbæ einnig talsvert yfir landsmeðaltali enda hefur aðbúnaður vegna þeirra þjónustu í Mosfellsbæ verið stórbættur á síðustu misserum.

Vilja gera betur í sorphirðu
Viðhorf til þjónustu í tengslum við sorphirðu versnar marktækt á milli ára og stendur til að skoða það mál sérstaklega, segir í tilkynningu frá Mosfellsbæ. Þar gæti spilað inn í að könnunin var gerð í nóvember og desember en þá eykst þörfin fyrir sorphirðu talsvert ásamt því að veður og færð gera framkvæmd sorphirðunnar erfiðari, sérstaklega á dreifbýlli svæðum sveitarfélagsins. Einnig er eftirspurn eftir því að flokka sorp að aukast og sveitarfélagið hyggst leita leiða til að koma á móts við þá eftirspurn.

Stoltur af niðurstöðunni
Haraldur Sverrisson bæjarstjóri segist afar ánægður með útkomuna. „Það er gaman að enn eitt árið mælast Mosfellingar með ánægðustu íbúum landsins. Ég er afar stoltur af niðurstöðunni í heild og sérstaklega varðandi þjónustu við eldri borgara.
Hins vegar leggjum við metnað okkar í að viðhalda ánægju íbúa í öllum málaflokkum og ég hef sérstakan áhuga á að skoða viðhorf fólks varðandi þjónustu við barnafjölskyldur. Í Mosfellsbæ býr mikið af ungu fjölskyldufólki og við leggjum mikla áherslu á að veita þeim hópi framúrskarandi þjónustu hvort sem það snýr að leikskóla eða skólamálum, íþróttum eða tómstundum.“
Heildarúrtak í könnuninni er yfir 12 þúsund manns og þar af fengust svör frá 316 einstaklingum úr Mosfellsbæ.

Niðurstöður könnunarinnar í heild sinni er hægt að kynna sér á vef Mosfellsbæjar www.mos.is.

Páll Helgason, tónlistarmaður og kórstjóri, lést laugardaginn 5. mars, á sjötugasta og öðru aldursári. Páll var fæddur á Akureyri 23. október 1944.
Foreldrar hans voru Helgi Pálsson, kaupmaður og bæjarfulltrúi, f. á Akureyri 14. ágúst 1896, d. 19. ágúst 1964, og Kristín Pétursdóttir húsmóðir, f. 8. janúar 1900 á Tjörn í Vindhælishreppi í Austur-Húnavatnssýslu, d. 5. desember 1989.
Páll spilaði á gítar og bassa m.a. með hljómsveit Ingimars Eydal á hótel KEA. Páll stundaði síðar nám við Tónlistarskóla Mosfellshrepps undir stjórn Ólafs Vignis Albertssonar og lauk þaðan 8. stigi í tónfræðum. Hann kenndi ennfremur tónlist við Klébergsskóla og Ásgarðsskóla um árabil.
Páll Helgason var valinn bæjarlistamaður Mosfellsbæjar 2012.

Páll var afkastamikill í tónlistarlífi landsins, þó mest í Mosfellsbæ, með þekktum útsetningum fyrir kóra og kom að stofnun fjölda kóra. Þar má nefna Álafosskórinn, Mosfellskórinn, Vorboða – kór eldri borgara í Mosfellsbæ, Landsvirkjunarkórinn og Karlakór Kjalnesinga auk endurvakningu kóra svo sem eins og Karlakórinn Svanir á Akranesi og Karlakór Stefnis í Mosfellsbæ. Einnig kom hann að fleiri kórum s.s. stjórnandi Strætókórsins áður en hann veiktist. Blómlegt söngstarf þrífst í öllum þessum kórum í dag.
Páll söng í Karlakórnum Stefni undir stjórn Lárusar heitins Sveinssonar um nokkra hríð. Þá var hann organisti í Brautarholtskirkju, Saurbæjarkirkju og Reynivallakirkju. Páll var félagi í Rótarýklúbbi Mosfellssveitar.
Eftirlifandi eiginkona Páls er Bjarney S. Einarsdóttir og eiga þau þrjú uppkomin börn.