Bæjarhátíðin, Í túninu heima, verður haldin helgina 26.-28. ágúst. Dagskráin er glæsileg að vanda og þar ættu flestir að geta fundið eitthvað við sitt hæfi. Hátíðin hefur fyrst og fremst verið byggð upp á framtaki íbúa bæjarins og þátttöku þeirra.
Boðið er upp á þekkta dagskrárliði eins og Ullarpartí og markaðsstemningu í Álafosskvos, flugvéla- og fornvélasýningu á Tungubökkum, kjúklingafestival, stórtónleika á Miðbæjartorgi, götugrill og Pallaball. Frítt verður í leið 15 allan laugardaginn þannig að það er tilvalið að skilja bílinn eftir heima.

Smelltu hér til að skoða dagskrá hátíðarinnar 2016 (pdf)

 

MIÐVIKUDAGUR 24. ÁGÚST

20:00 – 22:00 UNGLINGADANSLEIKUR Í HLÉGARÐI
Upphitun fyrir bæjarhátíðina. Unglingaball fyrir 8.-10. bekkinga.
Fram koma: Úlfur Úlfur, Sprite Zero Klan og DJ Anton Kroyer. Aðgangseyrir: 800 kr.

 

FIMMTUDAGUR 25. ÁGÚST

BÆJARBÚAR SKREYTA HÚS OG GÖTUR Í HVERFISLITUM
GULUR – Hlíðar, Höfðar, Tún og Mýrar
RAUÐUR – Tangar, Holt og Miðbær
BLEIKUR – Teigar, Krikar, Lönd, Ásar, Tungur og Mosfellsdalur
BLÁR – Reykja- og Helgafellshverfi

09:00-16:00 HLÍÐAVÖLLUR – UNGLINGAEINVÍGI Í GOLFI
Allir bestu unglingar landsins taka þátt Unglingaeinvíginu í Mosfellsbæ á vegum GM.

17:00-19:00 SKÁTAHEIMILIÐ – HUGREKKI
Samsýning Ástu Gríms, Ástu Bjargar og Andrésar Þórarins á akrýlmyndum og ljósmyndum.

17:00-19:00 LISTASALUR MOSFELLSBÆJAR – SMIÐUR EÐA EKKI
Opnun á sýningunni SMIÐUR EÐA EKKI sem hverfist um ævi og störf Birtu Fróðadóttur innanhússarkitekts og húsgagnasmiðs sem settist að í Mosfellsdal og var fyrsta konan hér á landi menntuð í innanhússarkitektúr. Að sýningunni stendur sonardóttir og alnafna hennar, Birta Fróðadóttir arkitekt.

18:00-21:00 KJARNINN – HERNÁMSSÝNING
Sýning á áhugaverðum munum frá hernámsárunum á Íslandi og þá sérstaklega Mosfellsbæ. Til sýnis eru ljósmyndir, fatnaður, dagblöð, bækur og annað sem tengist stríðsárunum í kringum 1939-1945. Minjarnar eru í eigu Tryggva Blumenstein sem hefur safnað þeim frá unga aldri. Sýningin fer fram í gamla húsnæði Íslandsbanka, Þverholti 2.

19:00 – 21:00 SUNDLAUGARKVÖLD Í LÁGAFELLSLAUG
Fjölskyldan skemmtir sér saman. Tímataka í Wipeoutbrautinni. Aqua Zumba, fjör og gleði. Björgvin Franz og íþróttaálfurinn mæta á svæðið ásamt góðum gestum. DJ Baldur stjórnar tónlistinni.

21:00 STEBBI OG EYFI Í HLÉGARÐI
Stebbi og Eyfi fagna 25 ára afmæli Nínu auk þess sem stiklað verður á stóru í gegnum Eurovision-söguna. Gamanmál og gleðisöngvar úr ýmsum áttum.
Miðasala á www.midi.is.

 

FÖSTUDAGUR 26. ÁGÚST

11:00 – 17:00 HÚSDÝRAGARÐURINN Á HRAÐASTÖÐUM Í MOSFELLSDAL
Geitur, refur, kettlingar, grís, kálfur, hænur, kanínur, naggrísir og mörg önnur húsdýr. Opið alla daga 11:00-17:00. Aðgangur 600 kr.

14:00 ARION BANKI
Skólakór Varmárskóla syngur nokkur lög. Bíbí og Blaki verða á svæðinu auk þess sem boðið verður uppá andlitsmálun fyrir börnin.

18:00-21:00 KJARNINN – HERNÁMSSÝNING
Sýning á áhugaverðum munum frá hernámsárunum á Íslandi og þá sérstaklega Mosfellsbæ. Til sýnis eru ljósmyndir, fatnaður, dagblöð, bækur og annað sem tengist stríðsárunum í kringum 1939-1945. Minjarnar eru í eigu Tryggva Blumenstein sem hefur safnað þeim frá unga aldri. Sýningin fer fram í gamla húsnæði Íslandsbanka, Þverholti 2.

19:00-21:00 SKÁTAHEIMILIÐ – HUGREKKI
Samsýning Ástu Gríms, Ástu Bjargar og Andrésar Þórarins á akrýlmyndum og ljósmyndum.

19:30 – 22:30 ÚTIMARKAÐUR Í ÁLAFOSSKVOS
Markaðstjöld full af fjölbreyttum varningi.

20:30 ÍBÚAR SAFNAST SAMAN Á MIÐBÆJARTORGI
GULIR, RAUÐIR, BLEIKIR og BLÁIR – Allir hvattir til að mæta í lopapeysu.

20:45 SKRÚÐGÖNGUR LEGGJA AF STAÐ Í ÁLAFOSSKVOS
Hestamannafélagið Hörður leiðir gönguna með vöskum fákum.
Göngustjórar frá Leikfélagi Mosfellssveitar ræsa einn lit af stað í einu.

21:00 – 22:30 Ullarpartý Í ÁLAFOSSKVOS
Brekkusöngur og skemmtidagskrá.
Skólahljómsveit Mosfellsbæjar tekur á móti skrúðgöngu.
Haraldur Sverrisson, bæjarstjóri, setur hátíðina.
Sveppi og Villi taka lagið.
Hilmar og Gústi stýra brekkusöng.
Björgunarsveitin Kyndill kveikir í blysum.

22:15 GRÍNKVÖLD RIDDARANS
Uppistand og lifandi tónlist á Hvíta Riddaranum. Jóhann Alfreð, Ari Eldjárn og Andri Ívars sjá um að kitla hláturtaugarnar. Síðan taka föstudagslögin við með Stebba Jak söngvara Dimmu í fararbroddi. Miðaverð: 3.000 kr. eða 1.500 kr. eftir miðnætti.

 

LAUGARDAGUR 27. ÁGÚST

•  Frítt í leið 15 í strætó allan daginn  •  Frítt í Varmárlaug og Lágafellslaug í dag

8:00 – 18:00 MOSFELLSBAKARÍ
Mosfellsbakarí er með opið lengur í tilefni af bæjarhátíðinni. Múffur í hverfislitunum og skúffukökubitar, þessir gömlu góðu með súkkulaði á köntunum.

9:00 – 17:00 ÍÞRÓTTASVÆÐIÐ Á TUNGUBÖKKUM
Fótboltamót Aftureldingar og Weetos, 6. 7. og 8. flokkur karla og kvenna.

9:00 – 16:00 TINDAHLAUP MOSFELLSBÆJAR
Náttúruhlaup sem hefst við Íþróttamiðstöðina að Varmá. Ræst kl. 9:00 og kl. 11:00. Fjórar vegalengdir í boði, 7 tindar (37 km), 5 tindar (35 km), 3 tindar (19 km) og 1 tindur (12 km). www.mos.is/tindahlaup og www.hlaup.is.

9:30 KETTLEBELLS ICELAND – ENGJAVEGUR 12
Opin Ketilbjölluæfing fyrir hrausta Mosfellinga. Gengið með ketilbjöllur upp á Reykjafell þar sem æfing verður tekin á toppnum. Lagt af stað frá Engjavegi.

9:30 – 11:00 WORLD CLASS – MOSFELLSBÆ
World Class Mosfellsbæ. Tökum á því í hverfislitunum- 3 skemmtilegir og fjölbreyttir 30 mín. tímar í boði. Þorbjörg og Unnur halda uppi stuði, puði og stemningu.
Allir að sjálfsögðu hvattir til að mæta í sínum hverfislit. Tabata kl. 9:30 – Þorbjörg, Fight FX kl. 10:00 – Unnur og Fit Pilates kl. 10:30 – Unnur.

10:00 – 16:00 MOSSKÓGAR Í MOSFELLSDAL
Útimarkaður: Sultukeppni, grænmeti frá Mosskógum, silungur frá Heiðarbæ, rósir frá Dalsgarði o.fl. Úrslit í sultukeppni kl. 15:00.

11:00 – 17:00 HÚSDÝRAGARÐURINN Á HRAÐASTÖÐUM Í MOSFELLSDAL
Hafdís Huld og Alisdair Wright syngja lög af plötunni Barnavísur kl. 14:00.
Geitur, refur, kettlingar, grís, kálfur, hænur, kanínur, naggrísir og mörg önnur húsdýr. Opið alla daga 11:00-17:00. Aðgangur 600 kr.

11:00-18:00 KJARNINN – HERNÁMSSÝNING
Sýning á áhugaverðum munum frá hernámsárunum á Íslandi og þá sérstaklega Mosfellsbæ. Til sýnis eru ljósmyndir, fatnaður, dagblöð, bækur og annað sem tengist stríðsárunum í kringum 1939-1945. Minjarnar eru í eigu Tryggva Blumenstein sem hefur safnað þeim frá unga aldri. Sýningin fer fram í gamla húsnæði Íslandsbanka, Þverholti 2.

12:00 – 14:00 VARMÁRLAUG – FJÖR Í SUNDLAUGINNI
Koddaslagur á rörinu góða fyrir 10 ára og eldri. Hin sívinsæla Wipeout-braut verður á staðnum. Frítt í laugina og allir fá ís í boði Kjörís.

12:00 – 17:00 WINGS AND WHEELS – FLUGVÖLLURINN Á TUNGUBÖKKUM
Fornvélasýning: Gamlar flugvélar, dráttarvélar úr Mosfellsbæ, mótorhjól, fornbílar og flugsýning. Heitt á könnunni fyrir gesti og karamellukast fyrir káta krakka.

12:00 HÓPAKSTUR UM MOSFELLSBÆ
Ferguson-félagið stendur fyrir hópakstri dráttarvéla og fornbíla.
Lagt er af stað frá Tungubakkaflugvelli og keyrður hringur um Mosfellsbæ.

12:00 – 17:00 ÚTIMARKAÐUR Í ÁLAFOSSKVOS
Markaðstjöld full af fjölbreyttum varningi og ýmsar uppákomur á sviði.
Blaðrarar á svæðinu sem gefa börnunum blöðrudýr.
12:00 Álafosskórinn
12:30 Úti-Zumba með Röggu Ragnars
13:00 Mosfellskórinn
13:30 Danshópar frá Dansstúdíói World Class
14:00 Karlakórinn Stefnir
14:30 Óperukór Mosfellsbæjar
15:00 Kammerkór Mosfellsbæjar
15:30 Djasshljómsveitin Pipar úr tónlistardeild Listaskóla Mosfellsbæjar.
16:00 Sirkus Íslands

12.45 – 16.00 SVART OG SYKURLAUST Á RÁS 2
Útvarpsþátturinn Svart og sykurlaust á Rás 2 með Sólmundi Hólm sendur beint út frá bæjarhátíðinni í Mosfellsbæ.

13:00 GALLERÍ HVIRFILL Í MOSFELLSDAL – MOSFELLINGAR BJÓÐA HEIM
Bjarki Bjarnason les úr væntanlegri bók sinni sem heitir Ljón norðursins og fjallar um Leó Árnason frá Víkum á Skaga.
Kl. 13:45 mætir Kammerkór Mosfells­bæjar og tekur nokkur lög.

13:00 LISTASALUR MOSFELLSBÆJAR – SMIÐUR EÐA EKKI
Í tilefni af bæjarhátíð verður sérstök leiðsögn um sýninguna sem hverfist um ævi og störf Birtu Fróðadóttur innanhússarkitekts og húsgagnasmiðs sem settist að í Mosfellsdal og var fyrsta konan hér á landi menntuð í innanhússarkitektúr. Að sýningunni stendur sonardóttir og alnafna hennar, Birta Fróðadóttir arkitekt.

13:00-15:00 EIRHAMRAR – FÉLAGSSTARF ALDRAÐRA
FaMos-félagar og aðrir velunnarar velkomnir í heimsókn í aðstöðu félagsstarfsins á Eirhömrum. Fjölbreytt vetrar­dagskrá kynnt. Vorboðarnir taka lagið kl. 13:00.

13:00-17:00 SKÁTAHEIMILIÐ – HUGREKKI
Samsýning Ástu Gríms, Ástu Bjargar og Andrésar Þórarins á akrýlmyndum og ljósmyndum.

13:00 BARNADAGSKRÁ Á TÚNINU VIÐ HLÉGARÐ
Einar Mikael mætir með brot af því besta úr sínum vinsælu töfrasýningum. Sjónhverfingar og ótrúleg töfrabrögð. Sýningin hefst stundvíslega kl. 13:00

13:00 – 16:00 SKOTTMARKAÐUR VIÐ KJARNA
Mosfellingum gefst kostur á að koma með alls kyns gull og gersemar úr skápum og bílskúrum og bjóða gestum og gangandi til sölu. Einnig er handverksfólk velkomið. Nánari upplýsingar um viðburð á facebook. Skráning hjá Elísabetu S. Ólafsdóttur í síma 898 4412.

13:00 – 24:00 TÍVOLÍ VIÐ MIÐBÆJARTORG

14:00 HVÍTI RIDDARINN – ÍSBJÖRNINN
Topplið Hvíta Riddarans tekur á móti Ísbirninum á Varmárvelli.
Liðin leika í 4. deild karla á Íslandsmótinu í knattspyrnu.

14:00 AMSTURDAM 6 VIÐ REYKJALUND – MOSFELLINGAR BJÓÐA HEIM
Stöllurnar syngja nokkur íslensk og erlend lög í Amsturdam 6 við Reykjalund.

14:00 – 16:00 KJÚKLINGAFESTIVAL KJÚKLINGARÉTTIR FYRIR ALLA
Stærstu kjúklinga- og matvælaframleiðendur landsins kynna afurðir sínar og gefa smakk við íþróttamiðstöðina að Varmá. Matur og skemmtun fyrir alla fjölskylduna. Biggi Haralds, loftboltar, uppistand, áskorun í ólympískum lyftingum og Danshópar frá Dansstúdíói World Class sýna dansa.

14:00 – 16:00 ÍÞRÓTTAMIÐSTÖÐIN AÐ VARMÁ – AFTURELDING KYNNIR VETRARSTARFIÐ
Kynning á vetrarstarfi Aftureldingar. Fulltrúar deilda verða á svæðinu og kynna starfsemi sína.
Aftureldingarbúðin verður opin.

14:00 – 17:00 VÖFFLUKAFFI Í FMOS
Nemendafélag Framhaldsskólans Mosfellsbæ verður með vöfflukaffi í skólanum og rennur ágóðinn til Reykjadals þar sem Styrktarfélag lamaðra og fatlaðra rekur sumar- og helgardvöl fyrir fötluð börn og ungmenni.
Óperukór Mosfellsbæjar syngur kl. 15:30.

14:00 – 17:00 STEKKJARFLÖT – HOPPUKASTALAR
Frítt fyrir káta krakka.

14:30 SÚLUHÖFÐI 16 – MOSFELLINGAR BJÓÐA HEIM
Lifandi tónlist og kaffihúsastemning. Ásbjörg Jónsdóttir syngur og spilar ljúfan djass ásamt félögum sínum. Kaffi frá Te & Kaffi + heimabakað bakkelsi verður til sölu og rennur ágóði sölunnar óskiptur til starfs Rauða krossins í Mosfellsbæ.

15:00 – 16:00 STEKKJARFLÖT – HESTAFJÖR
Teymt undir börnum í boði Hestamannafélagsins Harðar.

15:00 AKURHOLT 21 – MOSFELLINGAR BJÓÐA HEIM
Siggi Hansa og fjölskylda bjóða upp á tónleika í Akurholti. Rokk-karlakórinn Stormsveitin, Stefanía Svavars, Jóhannes Freyr Baldursson og djasshljómsveitin Kaffi Groove ásamt fleiri góðum gestum.

16:00 ÁLMHOLT 10 – MOSFELLINGAR BJÓÐA HEIM
Davíð Ólafsson óperusöngvari býður til útitónleika í garðinum heima. Meðal gesta verða Dísella Lárusdóttir, Bragi Jónsson, Gissur Páll Gissurarson, Stefán Helgi Stefánsson, Jónas Þórir Þórisson og fleiri.

16:00 LITLA HAFMEYJAN Í BÆJARLEIKHÚSINU
Stórskemmtilegur fjölskyldusöngleikur sem byggður er á ævintýri H.C. Andersen. Miðaverð er 1.000 kr. og miðapantanir fara fram í síma 566-7788.

16:30 KARMELLUKAST Á FLUGVELLINUM TUNGUBÖKKUM

16:30 SKÁLAHLÍÐ – MOSFELLINGAR BJÓÐA HEIM
Útitónleikar í garðinum heima. Tríóið Kókos skemmtir í brekkunni fyrir neðan Skálahlíð. Dægurlög sem allir þekkja.

17:00 – 21:00 GÖTUGRILL Í MOSFELLSBÆ
Íbúar í Mosfellsbæ halda götugrill í vel skreyttum götum bæjarins

21:00 – 22:45 STÓRTÓNLEIKAR Á MIÐBÆJARTORGI
Hljómsveitin Albatross undir tónlistarstjórn Halldórs Fjallabróður leikur ásamt góðum gestum.
– Sverrir Bergmann
– Friðrik Dór
– Matti Matt
– Helgi Björns
– Stórskotalið Mosfellinga flytur hátíðarlagið Í túninu heima

22:45 BJÖRGUNARSVEITIN KYNDILL MEÐ FLUGELDASÝNINGU

23:30 DÚNDURFRÉTTIR MEÐ MIÐNÆTURTÓNLEIKA Í HLÉGARÐI
Hljómsveitin mun flytja bland af því besta í gegnum árin. Að tónleikunum loknum mun Ólafur Páll Gunnarsson Rokklandskóngur þeyta skífum fram á nótt. Miðasala á www.midi.is

23:30 – 04:00 STÓRDANSLEIKUR MEРPÁLI ÓSKARI AÐ VARMÁ

 

SUNNUDAGUR 27. ÁGÚST

8:00 – 18:00 MOSFELLSBAKARÍ
Mosfellsbakarí er með opið lengur í tilefni af bæjarhátíðinni. Múffur í hverfislitunum og skúffukökubitar, þessir gömlu góðu með súkkulaði á köntunum.

9:00 – 17:00 ÍÞRÓTTASVÆÐIÐ Á TUNGUBÖKKUM
Fótboltamót Aftureldingar og Weetos, 6. 7. og 8. flokkur karla og kvenna.

11:00 – 17:00 HÚSDÝRAGARÐURINN Á HRAÐASTÖÐUM Í MOSFELLSDAL
Geitur, refur, kettlingar, grís, kálfur, hænur, kanínur, naggrísir og mörg önnur húsdýr. Opið alla daga 11:00-17:00. Aðgangur 600 kr.

11:00 GUÐSÞJÓNUSTA Í MOSFELLSKIRKJU
Helgum lífið, höldum litríka bæjarhátíð, Í túninu heima.
Prestur sr. Arndís Bernhardsdóttir Linn.

11:00-18:00 KJARNINN – HERNÁMSSÝNING
Sýning á áhugaverðum munum frá hernámsárunum á Íslandi og þá sérstaklega Mosfellsbæ. Til sýnis eru ljósmyndir, fatnaður, dagblöð, bækur og annað sem tengist stríðsárunum í kringum 1939-1945. Minjarnar eru í eigu Tryggva Blumenstein sem hefur safnað þeim frá unga aldri. Sýningin fer fram í gamla húsnæði Íslandsbanka, Þverholti 2.

13:00-16:00 SKÁTAHEIMILIÐ – HUGREKKI
Samsýning Ástu Gríms, Ástu Bjargar og Andrésar Þórarins á akrýlmyndum og ljósmyndum.

14:00 – 17:00 STEKKJARFLÖT – HOPPUKASTALAR
Frítt fyrir káta krakka.

14:00 HLÉGARÐUR – HÁTÍÐARDAGSKRÁ
Umhverfisnefnd veitir umhverfisviðurkenningar Mosfellsbæjar 2016.
Útnefning bæjarlistarmanns Mosfellsbæjar 2016.
Heitt á könnunni og allir velkomnir.

16:00 LITLA HAFMEYJAN Í BÆJARLEIKHÚSINU
Stórskemmtilegur fjölskyldusöngleikur sem byggður er á ævintýri H.C. Andersen. Miðaverð er 1.000 kr. og miðapantanir fara fram í síma 566-7788.

 

Eitt af því skemmtilegasta við Ólympíuleika er að spá í líkamsbyggingu keppenda. Maður sér litla, stóra, mjóa, breiða, langa, stutta, þétta og þunna skrokka. Allt eftir því í hvaða íþrótt skrokkarnir eru að keppa í. Blakarar eru hávaxnir, körfuboltaspírunar líka. Kastararnir eru þungir og þéttir. Fimleikafólkið vöðvaþrungið. Langhlauparar vöðvarýrir. Hver íþróttagrein á sinn uppáhaldsvöxt. Það er frábært. Það er virkilega gaman að sjá að allir þessir ólíku skrokkar og líkamsbyggingar hafi fundið íþróttagrein við hæfi. Þetta er eitthvað sem við, sem erum ekki keppendur á Ólympíuleikum, getum lært af. Við höldum nefnilega mörg að við getum breytt okkur, sama hvaða líkamsbyggingu við höfum, í einhvern annan. Bara ef við æfum eins og viðkomandi.

Ég, sem er rétt tæplega 1.80 cm á hæð og með létta líkamsbyggingu, get auðveldlega selt mér þá hugmynd að ef ég æfi og borða eins og Usain Bolt, þá geti ég orðið frábær spretthlaupari. Nánast eins hraður og hann. Ég þurfi bara að komast yfir æfingaplanið hans og borða yams í morgunmat eins og menn gera á Jamaica. Þangað til ég skoða og ber saman líkamana sem við fengum í vöggugjöf. Usain Bolt er 1.95 cm og rúmleg 25 kg þyngri en ég – af vöðvum. Hann hefur forskot og sama hvað ég æfi mikið og borða mikið yams, þá verð ég aldrei 15 cm hærri og 25 kg þyngri af vöðvum.

Ég hef hinsvegar fína líkamsbyggingu í að klifra og gera ýmsar líkamsæfingar sem þyngri skrokkar eiga erfitt með. Þar hef ég forskot. Skilaboðin með þessum samanburði á mér og Bolt eru þessi: Pældu í líkamsbyggingunni þinni. Vertu sáttur við hana og nýttu þér styrkleika þína. Þeir eru þarna. Þú þarft bara að uppgötva þá, vera þakklátur fyrir þá og rækta þá. Hver veit, hugsanlega kemstu á Ólympíuleikana ef þú finnur rétta sportið fyrir þína líkamsbyggingu.

Heilsumolar Gaua
Mosfellingur 23. ágúst 2016

Hin ungi og efnilegi knattspyrnumaður Ísak Snær Þorvaldsson flytur nú í júnímánuði til Norwich ásamt fjölskyldu sinni.
Ísak er 15 ára gamall og hefur spilað allan sinn feril með Aftureldingu. Hann er sonur hjónanna Þorvaldar Ásgeirssonar og Evu Hrannar Jónsdóttur.
„Ég er mjög spenntur fyrir þessu tækifæri, ég mun æfa og keppa með U16 og U18 liðum Norwich,“ segir Ísak. „Þetta byrjaði þannig að þeir buðu mér í gegnum umboðsmanninn minn að koma á reynslu hjá þeim í apríl 2015. Síðan þá hef ég farið fjórum sinnum til þeirra og æft með félaginu auk þess að taka þátt í Rey Cup með þeim í fyrrasumar.“

Draumur að verða atvinnumaður
„Þetta er mikið tækifæri fyrir Ísak sem hefur lengi stefnt að því að verða atvinnumaður í fótbolta. Við fjölskyldan lítum líka á þetta sem ævintýri og erum ákveðin í að njóta þess,“ segir Þorvaldur. „Ísak byrjar á því að fara í einkaskóla þar sem hann mun klára 10. bekk en í framhaldinu verður hann svo alfarið í akademíunni hjá þeim þegar hann hefur náð 16 ára aldri.
Við komum til með að búa í nágrenni við æfingasvæði, okkur líst mjög vel á þessa borg og það hefur verið einstaklega vel tekið á móti okkur.“
Þeir feðgar eru sammála um að Norwich sé góður klúbbur, frábærir þjálfarar og góður andi meðal strákanna. „Þetta er búið að vera draumur hjá mér lengi og aðalmarkmiðið hjá mér núna er að hafa gaman af þessu og njóta en að sjálfsögðu að gera mitt besta,“ segir Ísak að lokum.

Fátt er betra fyrir heilsuna en samvera með jákvæðu fólki. Á sama hátt og fátt er verra fyrir heilsuna en mikil samvera með leiðinlegu fólki. Ég fór í þriggja daga æfingaferð með frábæru fólki núna í júní. Það gaf mér mikið, bæði líkamlega og andlega, og ég kom endurnærður heim.

Þessi ferð var tilraunaferð. Hugmyndin var að tengja saman fjölbreyttar æfingar, útiveru, gott veður (pantað með löngum fyrirvara), lifandi landslag, jákvætt fólk, góðan mat og hæfilegar áskoranir af ýmsu tagi. Mér fannst þetta takast frábærlega og hlakka mikið til næstu ferðar.

Íslendingar eru að upplagi jákvætt fólk. Okkur líður best þegar við getum sameinast um eitthvað skemmtilegt og spennandi. EM í fótbolta er skýrt dæmi. Stór hluti þjóðarinnar fór til Frakklands og allar fréttir af okkar fólki eru jákvæðar. Enginn með vesen, allir brosandi og kátir, að njóta þess að vera til. Þetta smitar út frá sér til okkar sem erum heima. Við samgleðjumst með þeim sem eru úti og fjarstyðjum strákana til dáða.

Það hlustar enginn á Útvarp Sögu þessar vikurnar og enginn nennir að velta sér upp úr lúalegum kosningabrögðum, það tekur enginn eftir þeim þannig að menn geta alveg eins hætt að reyna. Ég legg til að við höldum fast í þessa jákvæðni að EM loknu. Pössum okkur á að detta ekki í neikvæðu gildrurnar þegar þær laumast upp að okkur. Pössum okkur á neikvæða fólkinu. Þeim fáu sem þrífast best í eymd og volæði og engjast um eins og ormar á öngli þegar allir jákvæðu EM straumarnir fljóta á milli Íslendinga.

Við höfum margt að vera þakklátir fyrir, Íslendingar, landið, miðin, tækifærin, hvert annað. Því jákvæðari sem við erum í hugsun og samskiptum, því lengra komumst við í því sem við fáumst við í okkar daglega lífi. Og því betur líður okkur öllum.

Heilsumolar Gaua
Mosfellingur 23. júní 2016

Rauði krossinn í Mosfellsbæ hefur fært hælisleitendum í Arnarholti á Kjalarnesi fimm reiðhjól ásamt hjálmum og lásum.
Deildin stóð fyrir hjólasöfnun og færir fólki bestu þakkir fyrir hjálpina og sérstaklega Barnaheillum sem útveguðu nokkur hjól. Byko gaf svo myndarlegan afslátt á hjálmum og fylgihlutum.
„Það er okkar von að með komu hjólanna verði auðveldara fyrir þá að fara ferða sinna því það er rúmur hálftíma gangur að næsta strætóskýli eða yfir höfuð í einhverja þjónustu og enn lengra til dæmis í sund,“ segir Hulda M. Rútsdóttir verkefnastjóri Rauða krossins í Mosfellsbæ.
Stefnt er að því að fara með fleiri hjól til þeirra fljótlega ef vel gengur.
Í Arnarholti eru á fjórða tug manna á aldrinum 20-50 ára sem bíða þess að hælisumsóknir þeirra verði teknar fyrir. Þeir hafa lítið við að vera og fara margir hverjir daglega til Reykjavíkur.

Bæting á samgöngum hafi góð áhrif
„Rauði krossinn í Mosfellsbæ þjónar Kjalarnesi og Kjós og eftir að við komumst að tilveru þeirra þarna og skoðuðum aðstæður, fórum við að velta fyrir okkur hvað við gætum gert til að aðstoða þá. Augljósast var að bæting á samgöngum hefði góð áhrif,“ segir Hulda.
Hælisleitendur mega ekki afla tekna á meðan umsókn þeirra er tekin fyrir en mega sinna sjálfboðnu starfi. Hulda bendir á að það vanti vinnufúsar hendur í fataflokkun RKÍ í Skútuvogi.
„Það væri vel þegið ef einhverjir hafa tök á því að taka þrjá til fjóra menn með í bæinn frá Arnarholti á morgnana endrum og eins. Þar gefst upplagt tækifæri til að spjalla og kynnast þeim betur í bílferðinni,“ segir Hulda (hulda@redcross.is).

Markvörðurinn öflugi, Kristófer Fannar Guðmundsson, hefur gengið til liðs við Aftureldingu. Kristófer Fannar er 25 ára Mosfellingur, uppalinn í Aftureldingu. Síðustu fjögur tímabil hefur hann leikið með ÍR og Fram. Kristófer er einn allra besti markvörður á Íslandi í dag og er kominn með mikla reynslu þrátt fyrir ungan aldur. Hann á því eftir að styrkja hóp meistaraflokks Aftureldingar í handbolta til muna fyrir næstu leiktíð.
Pálmar Pétursson sem hefur verið varamarkvörður Davíðs Svanssonar hjá Aftur­eldingu síðustu tvö ár hefur ákveðið að leggja skóna á hilluna.
Eftir frábæran árangur Aftureldingar í Olísdeildinni tvö ár í röð er ljóst að Mosfellingar ætla að halda áfram að styrkja og efla liðið sitt og verður stefnt að því að keppa um alla titla sem eru í boði á næsta tímabili.
Þá er stefnt að því að styrkja liðið um 1-2 leikmenn í viðbót auk þess sem Elvar Ásgeirsson er tilbúinn í slaginn eftir krossbandsmeiðsli sem héldu honum frá keppni á nýliðnu tímabili.

 

Ungir lykilmenn framlengja
Í síðustu viku framlengdu einnig ungir lykilmenn Aftureldingar samninga sína við félagið til þriggja ára.
Þetta eru þeir Gunnar Malmquist Þórsson, Birkir Benediktsson og Gestur Ólafur Ingvarsson.
Þrátt fyrir ungan aldur spila þessir leikmenn stórt hlutverk í toppliði Aftureldingar og er gríðarleg ánægja hjá stjórn og Einari Andra þjálfara með þessa nýju samninga.
Þessir leikmenn tóku miklum framförum og voru lykilmenn í vörn og sókn hjá Aftureldingu í vetur. Þeir áttu frábæra leiki í hinni mögnuðu úrslitakeppninni sem er nýlokið. Það verður því gaman að fylgjast með þessum drengjum halda áfram að vaxa og dafna á næsta tímabili en þar ætla menn sér stóra hluti.

Eins og kunnugt er tók Umhverfisstofnun sýni af gervigrasvöllum á höfuðborgarsvæðinu í vor og sendi utan til rannsóknar. Niðurstöður sýna ekki með óyggjandi hætti að gúmmíkurlið sé skaðlegt heilsu fólks og ekki er líklegt að leiðbeininga sé að vænta frá stofnuninni.
Umhverfisstofnun hefur horft til annarra umhverfisstofnana á Norðurlöndunum varðandi skaðsemi gúmmíkurls á sparkvöllum, en rannsóknir þeirra benda ekki til skaðsemi af völdum þess.
Mosfellsbær hefur notað grænhúðað SBR gúmmíkurl á gervigrasvellinum við Varmá. Húðunin veldur því að óæskileg efni losna síður úr því út í andrúmsloftið og hún bætir því gæði kurlsins.

Heilsa barna og ungmenna í fyrirrúmi
Samkvæmt upplýsingum frá Mosfellsbæ verða lagðar fram tillögur á næstunni. Þær munu fela í sér áherslu á að á öllum völlum í Mosfellsbæ verði gúmmíkurl sem innihaldi einungis ásættanleg efni með tilliti til heilsu barna og ungmenna sem stunda íþróttir á völlunum.
Metið verður ástand valla og lögð áhersla á að framleiðendur gúmmíkurlsins geti lagt fram fullnægjandi innihaldslýsingu sem tryggi að skaðleg efni sé ekki að finna í kurlinu. Þá stendur meðal annars til að ræða við KSÍ um endurnýjun kurls á þeim sparkvöllum sem sambandið hefur gefið.