Í haust tekur til starfa útibú frá Varmárskóla í Brúarlandi. Skólavist í Brúarlandi verður valkvæð fyrir nemendur í 1. og 2. bekk Varmárskóla og verður tekið á móti 35-40 nemendum í haust.
Starfsemin er fyrsta skrefið í stofnun nýs skóla sem mun rísa í Helgafellslandi. Stefnt er að því að hefja skólastarf í Helgafellsskóla haustið 2018.

Heildstæður skóladagur
Þórdís Eik Friðþjófsdóttir, kennari við Varmárskóla, hefur verið ráðin til að stýra starfinu í Brúarlandi. Þórdís er reynslumikill kennari á yngsta stigi.
Starfsemi í Brúarlandi mun byggja á skólastefnu-, námsskrá og skóladagatali Varmárskóla. Þar verður boðið upp á heildstæðan skóladag, stoðþjónustu, mötuneyti og frístund. Samvinna verður á milli bekkjardeilda í Brúarlandi og Varmárskóla þar sem nemendur fara saman í íþróttir og nýta útikennslusvæðið.

Opið hús næsta fimmtudag
Brúarland er sögufrægt hús í Mosfellsbæ en þar hefur verið starfræktur skóli í áratugi. Unnið hefur verið að endurbótum á aðstöðunni bæði inni og úti til að taka á móti ungum nemendum og verið er að skipuleggja næstu skref.
Boðið verður upp á opið hús fimmtudaginn 7. apríl kl. 18-20 í Brúarlandi. Þar verður skólastarfið kynnt og foreldrum boðið að hitta skólastjórnendur og skoða aðstöðuna.
Foreldrar og forráðamenn eru hvattir til að hafa samband við Þórönnu skólastjóra (thoranna@varmarskoli.is) eða Þórdísi Eik (thordiseik@varmarskoli.is) ef einhverjar spurningar vakna.

Ég er á degi fjögur í 30 daga áskorun þegar þessi Mosfellingur kemur út. Ég elska áskoranir, svo lengi sem þær eru líklegar til þess að gera manni gott. Þessi áskorun gengur út á mataræði, að borða ákveðnar fæðutegundir og sleppa öðrum á sama tíma.
Ég tek þátt í áskoruninni til þess að komast að því hvort mér líði enn betur ef ég sleppi því að borða fæðutegundir sem ég hef borðað talsvert mikið af undanfarið. Ég hef grun um það, eina leiðin til þess að komast að því er að prófa það á sjálfum mér.

Ráðleggingar um mataræði eru margar og mismunandi í dag. Ég er nýbúinn að lesa tvær bækur um mataræði. Önnur sannfærði mig um að ég ætti að fasta á hverjum degi, borða mikið af ávöxtum og grænmeti og helst láta allar dýraafurðir eiga sig. Hin sannfærði mig um að ég ætti að vera rólegur í ávöxtunum, borða mikið af grænmeti og talsvert mikið af dýraafurðum.
Höfundar beggja bóka rökstuddu sitt mál vel, ég trúði þeim báðum þótt þeir væru innilega ósammála hvor öðrum. Ég á vin sem fylgir þriðju leiðinni, hann er grjótharður á því að hún sé sú eina rétta. Hann hefur líka náð að sannfæra mig með rökum um það.

Staðan í dag er einfaldlega sú að það er enginn einn ótvíræður sannleikur með mataræði, það sem hentar einum þarf ekki að henta öðrum. Besta leiðin til þess að finna það mataræði sem hentar þér, kæri lesandi, er að prófa sig áfram. Velja eina leið og fylgja henni í 25-30 daga. Meta hvað gerir þér gott, hvað ekki.
Ekki láta aðra trufla þig á meðan. Fólk á eftir að freista þín, bjóða þér kökusneið eða kókosbollu. Segðu bara nei takk. Haltu svo áfram að prófa þig áfram. Finndu þína leið.

Heilsumolar Gaua
Mosfellingur 31. mars 2016

Fanney Dögg Ólafsdóttir snyrtifræðimeistari og eigandi snyrti-, nudd- og fótaaðgerðastofunnar Líkama og sálar segir ávinning af varanlegri förðun vera svipmeira útlit sem undirstrikar fegurð einstaklingsins.

Varanleg förðun eða förðun framtíðarinnar er byltingarkennd meðferð sem felst í innsetningu lita undir yfirborð húðar til þess að skerpa línur andlits og undirstrika fegurð. Meðferðirnar eru tiltölulega sársaukalitlar og eru ávallt gerðar í samráði við viðskiptavini bæði hvað varðar litaval og lögun.
Ein af þeim sem hefur ástríðu fyrir förðun sem þessari er Fanney Dögg Ólafsdóttir, snyrtifræðimeistari, en hún notar liti frá Nouveau Contour sem hafa verið prófaðir fyrir litastöðuleika, öryggi og útkomu og teljast þeir bestu á markaðnum í dag.

Fanney Dögg er fædd í Reykjavík 21. september 1981. Foreldrar hennar eru þau Hugrún Þorgeirsdóttir snyrti-, nudd- og fótaaðgerðafræðingur og Ólafur Sigurjónsson verslunarstjóri Kaupfélags Skagfirðinga. Fanney Dögg á eina systur, Jónu Björgu, sem er fædd 1979.

Alltaf líf og fjör hjá afa og ömmu
„Ég er alin upp í Mosfellsbæ og vil hvergi annars staðar eiga heima. Björg föðuramma mín og Sigurjón afi bjuggu í næstu götu við okkur og það var dásamlegt að fá að alast upp svona nálægt þeim.
Ansi oft fylgdi okkur systrum stór vinahópur sem mætti í Álmholtið til þeirra og þar var alltaf líf og fjör og vel tekið á móti öllum.“

Kafaði gjörsamlega niður á botn
„Á mínum yngri árum var maður mikið út að leika í hinum ýmsu leikjum eða að renna sér í brekkunni fyrir neðan Lágholtið.
Áður en Sorpa kom til sögunnar þá voru ruslagámar rétt hjá hesthúsahverfinu. Ég gekk gjarnan þangað, fór upp í gámana og kafaði gjörsamlega niður á botn og fann alltaf einhverja flotta hluti sem ég tók að sjálfsögðu með mér heim,“ segir Fanney Dögg og skellir upp úr.
„Foreldrar mínir voru lítt hrifnir af þessu uppátæki mínu, hvað þá að gjöfunum sem ég færði þeim eftir hverja ferð.“

Týpísk nútíma fjölskylda
„Ég gekk í Varmárskóla og fór síðan í Gaggó Mos. Við æskuvinkonurnar höfum haldið hópinn og ég er einstaklega heppin að eiga frábærar og traustar vinkonur.
Foreldrar mínir skildu þegar ég var fimmtán ára. Þau eignuðust síðan nýja maka og í kjölfarið eignaðist ég sjö stjúp­systkini svo mín nánasta fjölskylda stækkaði ansi mikið. Þetta er þessi týpíska nútíma fjölskylda,”“segir Fanney Dögg og brosir. „Allt er þetta dásamlega gott og skemmtilegt fólk og samband okkar er gott.“

Eyddi frítíma mínum í hestamennsku
„Allan minn tíma í grunnskóla æfði ég knattspyrnu með Aftureldingu og svo var ég líka í Skólakór Varmárskóla.
Við fjölskyldan vorum í hestunum og í hesthúsinu eyddi ég öllum mínum frítíma og á frábærar minningar þaðan. Hestamennskan er yndislegt fjölskyldusport og í Herði er mikið lagt upp úr barna- og unglingastarfi.
Við í unglingahóp Harðar vorum með hestasýningu í Vestmannaeyjum 1995 þar sem við sýndum m.a. skrautsýningu, fánareið, hlýðniæfingar, hindrunarstökk og fleira. Þessi ferð var afar vel heppnuð og rataði meira að segja í blöðin.“

Flutti til Danmerkur
„Eftir gagnfræðaskólann lá leið mín á Laugarvatn þar sem ég var í tvö ár en svo flosnaði ég upp úr skóla og fór að vinna.
Sumarið 1999 flutti ég til Danmerkur og fór að læra snyrtifræði í Cidesco cosmetologskolen í Kaupmannahöfn. Þetta var skemmtilegur tími og ég varð sjálfstæðari og þroskaðri við þessa dvöl mína. Ég flutti heim eftir námið og við tók nemasamningur á Snyrtistofunni Líkama og sál, sveinsprófið klárað ég árið 2002.
Ég kláraði stúdentinn og sjúkraliðann frá Menntaskólanum við Ármúla 2005 og svo tók ég meistararéttindin í snyrtifræði 2008 og bætti svo förðunarfræðingnum við 2011 svo það er búið að vera nóg að gera.“

Bestu stundirnar fólgnar í einfaldleika
„Ég kynntist eiginmanni mínum, Guðmundi Þór Sævarssyni, sölustjóra hjá Emmess ís, árið 2007. Það má segja að þetta hafi verið ást við fyrstu sýn. Við giftum okkur 2009 í Lágafellskirkju og héldum veislu í Kjósinni, frábær dagur í alla staði.
Gummi gekk dóttur minni, Andreu Rós, í föðurstað þegar hún var fjögurra ára og samband þeirra er sterkt og gott. Árið 2008 eignumst við soninn Aron Þór, en yngst er Eva Dögg, hún er fædd 2010.
Hvað finnst fjölskyldunni skemmtilegast að gera saman? „Okkur finnst gaman að ferðast innanlands sem utan, fara í sumarbústaðaferðir, göngutúra, skíði og bara hverskyns samvera. Á planinu er svo að vera með tvo hesta í húsi fram á sumar.
Það er nú ekki mikill tími aflögu í þessu hraða þjóðfélagi sem við lifum í en við reynum að nýta vel þær stundir sem við eigum saman og njóta þeirra. Oft eru bestu stundirnar fólgnar í einfaldleikanum.“

Líkami og sál 20 ára
„Snyrtistofan Líkami og sál var stofnuð af móður minni árið 1996 svo fyrirtækið verður 20 ára í ár. Ég keypti stofuna árið 2011 og nú starfar mamma hjá mér og okkur finnst dásamlegt að vinna saman. Jóna Björg systir útskrifaðist sem fótaaðgerðafræðingur s.l. haust og nú hefur hún bæst í hópinn. Auk okkar starfa tveir aðrir starfsmenn á stofunni.“

Meðferðirnar henta báðum kynjum
Er boðið upp á margar meðferðir á stofunni? „Já, hjá okkur er fjölbreytileikinn í fyrirrúmi og meðferðirnar henta bæði konum og körlum. Það er gleðilegt að segja frá því að við sjáum mikla aukningu hjá körlum sem er frábært því þeir þurfa jafn mikið á meðferðunum að halda og konur.
Í byrjun árs 2015 klárað ég mastersnám í varanlegri förðun (tattú). Þetta er það skemmtilegasta sem ég geri og þarna liggur mín ástríða. Við notum liti frá Noveau Contour sem eru náttúrulegir og endast lengi. Allt er þetta framkvæmt eftir óskum hvers og eins og útkoman er eðlileg og undir­strikar fegurð einstaklingsins.
Varanleg förðun getur breytt miklu t.d. fyrir manneskjur sem hafa gisnar augabrúnir og þurfa að fara í litun mjög ört eða hafa misst hárin vegna lyfjameðferðar. Það er vert að geta þess að Tryggingastofnun tekur þátt í kostnaði sem hlýst af svona meðferðum fyrir sjúklinga.
Þetta er sem sagt nýjasta viðbótin hjá okkur og ég er stolt að geta boðið upp á þessa meðferð,“ segir Fanney Dögg að lokum er við kveðjumst.

Myndir og texti: Ruth Örnólfs

Þegar íbúar í Mosfellsbæ eru spurðir hversu ánægðir eða óánægðir þeir séu með Mosfellsbæ sem stað til að búa á eru 93% aðspurðra ánægðir eða mjög ánægðir.
Mosfellsbær er því enn eitt árið með ánægðustu íbúana í samanburði við önnur sveitarfélög og með hæstu einkunn. Þetta kemur fram í árlegri könnun Capacent þar sem mælt var viðhorf til þjónustu í 19 stærstu sveitarfélögum landsins.

Flestir ánægðir með íþróttaaðstöðu – fæstir við þjónustu við fatlað fólk
Alls eru 83% íbúa í Mosfellsbæ ánægðir með aðstöðu til íþróttaiðkunar og ánægja með þjónustu í leikskólum bæjarins mælist um 80%. Spurðir um þjónustu Mosfellsbæjar í heild eru 77% mjög eða frekar ánægðir.
Niðurstöður sýna að ánægja í Mosfellsbæ er í eða yfir landsmeðaltali í öllum málaflokkum sem spurt er um. Einn af helstu styrkleikum Mosfellsbæjar miðað við önnur sveitarfélög síðustu ár hefur verið ánægja íbúa með skipulagsmál og svo er einnig nú. Þegar spurt er um þjónustu við eldri borgara er ánægja í Mosfellsbæ einnig talsvert yfir landsmeðaltali enda hefur aðbúnaður vegna þeirra þjónustu í Mosfellsbæ verið stórbættur á síðustu misserum.

Vilja gera betur í sorphirðu
Viðhorf til þjónustu í tengslum við sorphirðu versnar marktækt á milli ára og stendur til að skoða það mál sérstaklega, segir í tilkynningu frá Mosfellsbæ. Þar gæti spilað inn í að könnunin var gerð í nóvember og desember en þá eykst þörfin fyrir sorphirðu talsvert ásamt því að veður og færð gera framkvæmd sorphirðunnar erfiðari, sérstaklega á dreifbýlli svæðum sveitarfélagsins. Einnig er eftirspurn eftir því að flokka sorp að aukast og sveitarfélagið hyggst leita leiða til að koma á móts við þá eftirspurn.

Stoltur af niðurstöðunni
Haraldur Sverrisson bæjarstjóri segist afar ánægður með útkomuna. „Það er gaman að enn eitt árið mælast Mosfellingar með ánægðustu íbúum landsins. Ég er afar stoltur af niðurstöðunni í heild og sérstaklega varðandi þjónustu við eldri borgara.
Hins vegar leggjum við metnað okkar í að viðhalda ánægju íbúa í öllum málaflokkum og ég hef sérstakan áhuga á að skoða viðhorf fólks varðandi þjónustu við barnafjölskyldur. Í Mosfellsbæ býr mikið af ungu fjölskyldufólki og við leggjum mikla áherslu á að veita þeim hópi framúrskarandi þjónustu hvort sem það snýr að leikskóla eða skólamálum, íþróttum eða tómstundum.“
Heildarúrtak í könnuninni er yfir 12 þúsund manns og þar af fengust svör frá 316 einstaklingum úr Mosfellsbæ.

Niðurstöður könnunarinnar í heild sinni er hægt að kynna sér á vef Mosfellsbæjar www.mos.is.

Páll Helgason, tónlistarmaður og kórstjóri, lést laugardaginn 5. mars, á sjötugasta og öðru aldursári. Páll var fæddur á Akureyri 23. október 1944.
Foreldrar hans voru Helgi Pálsson, kaupmaður og bæjarfulltrúi, f. á Akureyri 14. ágúst 1896, d. 19. ágúst 1964, og Kristín Pétursdóttir húsmóðir, f. 8. janúar 1900 á Tjörn í Vindhælishreppi í Austur-Húnavatnssýslu, d. 5. desember 1989.
Páll spilaði á gítar og bassa m.a. með hljómsveit Ingimars Eydal á hótel KEA. Páll stundaði síðar nám við Tónlistarskóla Mosfellshrepps undir stjórn Ólafs Vignis Albertssonar og lauk þaðan 8. stigi í tónfræðum. Hann kenndi ennfremur tónlist við Klébergsskóla og Ásgarðsskóla um árabil.
Páll Helgason var valinn bæjarlistamaður Mosfellsbæjar 2012.

Páll var afkastamikill í tónlistarlífi landsins, þó mest í Mosfellsbæ, með þekktum útsetningum fyrir kóra og kom að stofnun fjölda kóra. Þar má nefna Álafosskórinn, Mosfellskórinn, Vorboða – kór eldri borgara í Mosfellsbæ, Landsvirkjunarkórinn og Karlakór Kjalnesinga auk endurvakningu kóra svo sem eins og Karlakórinn Svanir á Akranesi og Karlakór Stefnis í Mosfellsbæ. Einnig kom hann að fleiri kórum s.s. stjórnandi Strætókórsins áður en hann veiktist. Blómlegt söngstarf þrífst í öllum þessum kórum í dag.
Páll söng í Karlakórnum Stefni undir stjórn Lárusar heitins Sveinssonar um nokkra hríð. Þá var hann organisti í Brautarholtskirkju, Saurbæjarkirkju og Reynivallakirkju. Páll var félagi í Rótarýklúbbi Mosfellssveitar.
Eftirlifandi eiginkona Páls er Bjarney S. Einarsdóttir og eiga þau þrjú uppkomin börn.

Margrét Guðjónsdóttir, héraðsdómslögmaður og löggiltur fasteignasali, hefur opnað lögmannsstofu, MG Lögmenn ehf., á annarri hæð að Háholti 14, Mosfellsbæ.
Margrét hefur búið í Mosfellsbæ í 25 ár og er gift Kjartani Óskarssyni. Margrét hefur starfað á lögmannsstofu sem skrifstofustjóri til fjölda ára en tók sig svo til og skellti sér í laganám við Háskóla Íslands þaðan sem hún útskrifaðist með fyrstu einkunn. Héraðsdómslögmannsréttindum lauk hún í apríl 2014.

Áratuga löng reynsla
Margrét hefur víðtæka þekkingu og áratuga reynslu í málum á sviði kröfuréttar og hefur í 25 ár haft yfirumsjón með löginnheimtu fyrir einstaklinga, fyrirtæki, banka og lífeyrissjóði. Margrét er með IL+ innheimtukerfi lögmanna og getur aðlagað innheimtuferlið eins og hverjum kröfuhafa hentar og tekið að sér kröfur á hvaða innheimtustigi sem er.
Hún leggur áherslu á kurteisi en jafnframt ákveðni við innheimtu en mikilvægt er að tryggja langtímahagsmuni og góða viðskiptavild kröfuhafans. Jafnframt hefur Margrét fengist við mál á sviði erfða- og skiptaréttar svo sem frágang á dánarbúum. Auk þess sem hún hefur mikinn áhuga á eignarétti og komið að hinum ýmsu jarðamálum.

Persónuleg og sanngjörn þjónusta
Með opnun skrifstofu hér í Mosfellsbæ vonast Margrét til að geta aðstoðað einstaklinga og fyrirtæki með hin ýmsu lögfræðimál og veitt þeim persónulega og sanngjarna þjónustu.
Skrifstofan er opin virka daga frá 9:00-12:00 og 13:00-16:00 en auk þess býður Margrét upp á að pantaðir séu viðtalstímar milli 17:00-19:00 á fimmtudögum fyrir þá sem eiga erfitt með að komast á hefðbundnum vinnutíma. Sími MG Lögmanna ehf. er 588 1400.

Creditinfo hefur unnið ítarlega greiningu sem sýnir rekstur hvaða íslensku fyrirtækja telst til fyrirmyndar. Alls komust 682 fyrirtæki á listann af þeim tæplega 36 þúsund sem skráð eru á Íslandi.
Creditinfo hefur birt lista framúrskarandi fyrirtækja frá árinu 2010 en þá voru einungis 178 félög á listanum.
Þau félög sem fá viðurkenningu Creditinfo sem framúrskarandi þurfa að uppfylla viss skilyrði er varða rekstur og stöðu þeirra. Félögin þurfa að vera skráð hlutafélög, hafa skilað ársreikningum síðustu þriggja ára, einnig þurfa líkur á alvarlegum vanskilum að vera undir 0,5% og félögin þurfa að sýna fram á rekstrarhagnað síðustu þriggja ára. Jafnframt þarf eiginfjárhlutfall félaganna að vera 20% eða meira þrjú rekstrarár í röð og eignir yfir 80 milljónir þrjú ár í röð.
Hjálagt er að finna lista yfir þau fyrirtæki sem teljast framúrskarandi í Mosfellsbæ. Á listanum er að finna stór fyrirtæki, meðalstór og lítil. Fyrirtækin eru mörg búin að vera á listanum síðustu tvö ár en færri í fleiri ár en það. Nokkur fyrirtæki koma ný inn á lista líkt og Matfugl sem er í efsta sæti yfir meðalstór fyrirtæki.

„Við höfum náð góðum árangri”
Aðalstarfsstöð Matfugls er að Völuteig 2 og hóf þar rekstur árið 2003. Þar er slátrun, kjötvinnsla, fullvinnsla, lager og dreifing auk skrifstofu. Að auki er Matfugl með starfsstöðvar víða um land en hjá fyrirtækinu vinna að jafnaði um 140 manns.
„Við höfum eytt miklu púðri í að endur­nýja húsakost okkar, gert kjúklingahúsin bæði betri fyrir fuglinn og gagnvart sóttvörnum“, segir Sveinn Vilberg framkvæmdastjóri Matfugls. „Við höfum þannig náð góðum árangri og er kamfílóbakteríusýking orðin hverfandi.
Það var mikill skortur á kjúklingi þetta tiltekna ár, 2014, þannig að það voru ytri aðstæður sem gerðu árið mjög gott hjá okkur og salan gekk mjög vel.
Við erum stolt af þessari viðurkenningu og þetta sýnir að það er traust að eiga viðskipti við okkur.
Að Völuteigi höfum við afkastagetu upp á 21.000 kjúklinga á dag en erum ekki að nýta það dags daglega. Við eigum því ennþá inni möguleika á að stækka og dafna um ókomna framtíð,“ segir Sveinn Vilberg.