Tugur frá Kiðafelli besti hrúturinn

Hreppaskjöldurinn eftirsótti verður á Kiðafelli næsta árið.

Hreppaskjöldurinn eftirsótti verður á Kiðafelli næsta árið.

stjórn sauðfjárræktarfélagsins: Ingibjörg, Ólöf ósk og hafþór

Stjórn Sauðfjárræktarfélagsins: Ingibjörg Ásta Guðmundsdóttir, Ólöf Ósk Guðmundsdóttir og Hafþór Finnbogason.

Hin geysivinsæla hrútasýning Sauðfjárræktarfélagsins í Kjós var haldin þriðjudaginn 17. október á Kiðafelli.
Í félaginu eru sauðfjárbændur í Kjós, Kjalarnesi, Mosfellsbæ og Mosfellsdal og kepptu þeir sín á milli um hver ætti besta hrútinn. Keppt var í nokkrum flokkum: veturgömlum hrútum, hyrndum lambhrútum, kollóttum lambhrútum og svo var besti misliti lambhrúturinn sérstaklega verðlaunaður.
Mæting á sýninguna var með besta móti og höfðu gestir á orði að féð liti sérlega vel út þetta árið.

Bestu hrútarnir voru eftirfarandi:
Hyrndir lambhrútar
1. Hrútur númer 87 frá Kiðafelli, 87 stig. Sérlega breiðvaxinn og fallegur samanrekinn köggull.
2. Hrútur númer 736 frá Morastöðum, 87 stig. Útlögumikill hrútur.
3. Hrútur númer 370 frá Kiðafelli, 85 stig. Sprækur mjög.

Kollóttir lambhrútar
1. Hrútur númer 778 frá Miðdal, 86 stig.
2. Hrútur númer 43 frá Kiðafelli, 85,5 stig.
3. Hrútur númer 2 frá Kiðafelli, 85,5 stig.
Besti misliti lambhrúturinn var Svartur frá Kiðafelli. Sá var seldur samstundis.

Veturgamlir hrútar
1. Tugur frá Kiðafelli, 85 stig. Holdugur, breiðvaxinn og útlögumikill hrútur.
2. Garður frá Morastöðum. Fallegur, holdmikill hrútur með gott skap.
3. Prins frá Kiðafelli. Kollóttur hrútur, feiknalega holdgóður en stuttur. Köggull!

Stjórn Sauðfjárræktarfélagsins óskar sigur­vegurum til hamingju, þakkar gestum fyrir komuna og bóndanum á Kiðafelli fyrir frábæra aðstöðu.

Mosfellsbær tekur við tíu flóttamönnum

uganda

Á fundi bæjarráðs þann 12. október var tekið fyrir erindi velferðarráðuneytisins þar sem óskað var eftir því að að Mosfellsbær taki á móti 10 flóttamönnum frá Úganda. Í afgreiðslu bæjarráðs segir að Mosfellsbær hafi áður lýst vilja sínum til að taka á móti flóttamönnum og sé því jákvæður gagnvart þessu erindi ráðuneytisins. Framkvæmdastjóra fjölskyldusviðs var falið að undirbúa umsögn um málið, ræða við velferðarráðuneytið og hefja undirbúning samnings um verkefnið. Fallist Mosfellsbær á að taka við fólkinu mun sveitarfélagið meðal annars útvega því húsnæði og veita því nauðsynlega þjónustu en fjármögnun kemur frá velferðarráðuneytinu.

Handstaðan

handstaða

Um síðustu helgi fórum við æfingahópurinn á Strandir í æfingaferð. Nánar tiltekið á Hótel Laugarhól í Bjarnarfirði. Staðurinn er magnaður og hópurinn samsettur af lifandi og skemmtilegum einstaklingum. Ferðin var frábær og allir spenntir fyrir að fara aftur á Strandir haustið 2018. Helgin var af stútfull af æfingum, leikjum og þrautum. Allt á afslöppuðum nótum. Við krýndum Strandameistara í ketilbjöllukasti og bóndagöngu. Kepptum líka í drumbakasti, boðhlaupi, dýfingum, snapchati og mörgu öðru.

Mér finnst gaman að keppa, sérstaklega þegar ég vinn. Það er einhvern veginn skemmtilegra að vinna en að vinna ekki. Stundum er samt bara gaman að vera með, þannig séð. Mitt lið, appelsínugula liðið, stóð sig mjög vel í snapchat keppninni, enda með nokkra sérfræðinga í þeirri íþrótt innan liðsins. Við unnum líka drumbahlaupið sem lið mjög örugglega. Aðrar keppnir tókum við ekki eins alvarlega og unnum þær þar af leiðandi ekki.

Af öllum þeim keppnum og leikjum sem ég tók þátt í fannst mér erfiðast að tapa í Asna fyrir trommuleikaranum í Doors frá Laugarvatni. Mér fannst ég vera með þetta. Var bara með A þegar hann var kominn með Asni og vantaði bara tvo punkta. En auðveldu skotin mín geiguðu á meðan trommarinn mýktist með hverju skotinu og raðaði sínum niður án fyrirhafnar. Ég reyndi að láta á engu bera og óskaði honum auðvitað til hamingju með sigurinn en átti mjög erfitt inni mér.

Mér finnst reyndar gefandi að sjá fólk í kringum mig blómstra og ná árangri þannig að ég var ekki lengi tapsár. Einn af skemmtilegustu sigrum helgarinnar var síðan þegar ísfirska mærin okkar náði sinni fyrstu handstöðu. Eitthvað sem hana hefur lengi langað til að geta og hefur stefnt að lengi. Markmið sem náðist. Það var sigur sem skipti máli og mér fannst gaman að fá að upplifa það með henni. Njótum lífsins!

Heilsumolar Gaua
Mosfellingur 19. október 2017

Lionshreyfingin hvetur börn til lestrar

Sigurberg Árnason, Gústaf Guðmundsson, Jón Bjarni Þorsteinsson Lkl. Mosfellsbæjar, Dagný Finnsdóttir Lkl. Úa, Kristinn Hannesson Lkl. Mosfellsbæjar, Guðrún Björt Yngvadóttir verðandi alþjóðaforseti Lionshreyfingarinnar úr Lkl. Eik í Garðabæ, Anna María Einarsdóttir Lkl. Úa og Sigríður Skúladóttir Lkl. Úa.

Sigurberg Árnason, Gústaf Guðmundsson, Jón Bjarni Þorsteinsson Lkl. Mosfellsbæjar, Dagný Finnsdóttir Lkl. Úa, Kristinn Hannesson Lkl. Mosfellsbæjar, Guðrún Björt Yngvadóttir verðandi alþjóðaforseti Lionshreyfingarinnar úr Lkl. Eik í Garðabæ, Anna María Einarsdóttir Lkl. Úa og Sigríður Skúladóttir Lkl. Úa.

Lionshreyfingin á Íslandi tekur þátt í alþjóðlegu verkefni sem nefnt er Lestrarátak Lions og stendur yfir í 10 ár eða til ársins 2022. Meðal annars hefur Lionshreyfingin gefið út bókamerki sem hluta af þessu verkefni.
Hinn 25. ágúst heimsóttu Lionsklúbburinn Úa og Lionsklúbbur Mosfellsbæjar Varmárskóla í því skyni að afhenda börnum í 5. bekk bókamerki. Auk þess voru bæði yngri og eldri deildum skólans færðar bókagjafir.
Var þetta hin ánægjulegasta stund með börnunum og kennurum þeirra sem tóku á móti Lionsfélögunum á sal skólans. Skólastjórnendur og bókasafnsfræðingar fá bestu þakkir frá klúbbunum fyrir jákvæðar undirtektir við erindinu og góðar móttökur.

Heimsókn verðandi alþjóðaforseta
Í fylgd með klúbbfélögum í þessari skemmtilegu heimsókn var góður gestur, Guðrún Björt Yngvadóttir, sem fyrst kvenna í heiminum mun gegna embætti alþjóðaforseta Lions.
Hún gegnir nú þegar mikilvægu hlutverki innan Lionsheimsins, sem eru stærstu góðgerðar- og líknarsamtök í heimi. Eitt af fjölmörgum verkefnum Lions er að hvetja börn til lestrar og er það gert í samráði við kennara og skólastjórnendur.
Það var einmitt Guðrún Björt sem setti af stað lestrarátaksverkefnið hér á landi árið 2012 og var Lionsklúbburinn Úa fyrstur klúbba til að taka þátt í verkefninu. Það fór því vel á því að Guðrún Björt tæki þátt í afhendingu bókamerkjanna og bókanna.

Flugið togar endalaust í mig

sigurjon

Sigurjón Valsson flugrekstrarstjóri Air Atlanta Icelandic og formaður Íslenska flugsögufélagsins er mikill áhugamaður um flugsöguna og þekkir vel til sögu fyrstu flugvélarinnar sem kom til landsins. Sigurjón er vel þekktur innan fluggeirans enda búinn að fljúga frá því að hann var unglingur. Í dag stjórnar hann flugdeild Air Atlanta Icelandic sem sinnir flugi um allan heim.
Sigurjón hefur einnig brennandi áhuga á varðveislu flugsögunnar og hefur ansi mörg járn í eldinum hvað það varðar.

Sigurjón er fæddur á Selfossi 8. apríl 1973. Foreldrar hans eru Helga Sigurjónsdóttir og Valur Snorrason. Helga lést árið 2014. Sigurjón á þrjú systkini, Freyju fædda 1978, Snorra Jón fæddan 1979 og Fanneyju Guðrúnu fædda 1982.

Hveragerði hálfgerður smábær
„Foreldrar mínir bjuggu í Hveragerði þegar ég fæddist en fluttu svo að Hamars­hjáleigu í Gaulverjabæjarhreppi. Þegar ég var fjögurra ára þá fluttum við aftur í Hveragerði og þar ólst ég upp.
Hveragerði var á þessum tíma hálfgerður smábær þar sem flestir bæjarbúar könnuðust hver við annan sem var kostur en á sama tíma stundum galli.“

Hugsaði um skjáturnar hans Sæmundar
„Það var ýmislegt brallað á æskuárunum. Ég var nánast alinn upp á hestbaki eða frá því ég gat setið hest þar til ég var 16 ára. Þá tók flugið algerlega yfir, og þá meina ég algerlega, því ég fór ekki á hestbak næstu 20 árin. Það er fyrst núna síðustu ár sem ég hef skroppið á bak en þá eingöngu til þess að fara í göngur.
Þar sem foreldrar mínir voru bæði úr sveit og héldu hesta kom það einhvern veginn til að faðir minn var fenginn til að hugsa um kindur samstarfsmanns síns í ullarþvottastöðinni í Hveragerði um hver jól, til fjölda ára. Þetta varð til þess að í mínum huga eru jólin í „gamla daga“ ­all­­taf tengd því að hugsa um skjáturnar hans Sæmundar í Brekku og það voru engin jól nema að stússast í þessu með pabba.“

Kenndi sjálfum sér að lesa
„Ég gekk í Grunnskóla Hveragerðis og síðan í Gagnfræðaskólann. Í upphafi skólagöngu minnar var lestur ekki mín sterka hlið og þegar ég var 9 ára var ég ekki búinn að ná sömu færni og jafnaldrarnir. Það var eflaust um að kenna „dassi“ af lesblindu ásamt fullt af þrjósku.
Ég var sendur í sérkennslu í lestri og fór sú kennsla fram á bókasafninu. Einn daginn mætti kennarinn ekki svo ég fór eitthvað að ráfa um á milli hillanna. Þá rakst ég á bók sem átti eftir að breyta öllu fyrir mig. Ég tók bókina úr hillunni og opnaði hana. Á fremstu síðu var teikning af mikilli loft­­­­­­­­­o­rr­ustu. Þessi teikning höfðaði til mín á einhvern hátt þannig að mér fannst ég þurfa að lesa það sem stæði í bókinni. Ég fékk hana lánaða, las hana og kenndi þannig sjálfum mér að lesa, alveg óvart. Bókin hét Haukur í hættu.“

Stalst til að fara í flugtíma
„Eftir að ég útskrifaðist úr gaggó lá leiðin í Fjölbrautaskóla Suðurlands. Einn daginn eftir að ég var byrjaður í skólanum stalst ég til þess að taka flugtíma hjá flugskólanum Flugtaki og greiddi fyrir hann með peningum sem ég var búinn að safna mér.
Ég sagði foreldrum mínum ekki frá tímanum vegna þess að þau voru algjörlega á móti því að ég lærði að fljúga, sérstaklega mamma. Eftir að þetta upplýstist allt saman var samið um að ég fengi að halda áfram í náminu. Ég kláraði einkaflugmannsprófið samhliða náminu í fjölbraut en ég útskrifaðist árið 1993. Yfir sumartímann vann ég við túnþökutínslu á Núpum í Ölfusi.“

Dró línu í sandinn
„Ég var búin að hugsa mér að fara í verkfræði í HÍ því útlitið í atvinnuflugi var frekar dökkt. Á þessum tíma hafði varla verið ráðinn flugmaður til Flugleiða í fjöldamörg ár.
Flugið togaði samt í mig og á endanum ákvað ég að skella mér í atvinnuflugmennsku en var búinn að draga línu í sandinn. Ef ég yrði ekki kominn með vinnu sem flugmaður þegar ég yrði þrítugur þá biði verkfræðin mín. Ég fékk síðan atvinnuflugmanns- og kennararéttindi vorið 1995 og í ágúst sama ár var ég byrjaður að kenna hjá Flugtaki.
Ég flutti frá Hveragerði haustið 1996 en þá flutti ég í höfuðborgina til að sleppa við að keyra svona langt í vinnuna.“

Klúbbur stofnaður af áhugamönnum
Frá Flugtaki lá leið Sigurjóns til Íslandsflugs þar sem hann flaug á ATR-42, Do-228 og Boeing 737. Eftir sameiningu Íslandsflugs og Air Atlanta Icelandic hefur hann starfað sem flugstjóri og þjálfunarflug­stjóri en er í dag flugrekstrarstjóri félagsins. Hann hefur flogið sem listflugmaður frá árinu 1997, mest á TF-UFO.
Sigurjón var lengi vel formaður Flugklúbbs Mosfellsbæjar eða í 10 ár en klúbburinn er með aðsetur á Tungubakkaflugvelli. Klúbburinn var stofnaður 29. maí 1981 af 14 flugáhugamönnum. Á vellinum eru 7 flugskýli, um 20 vélar og klúbbhús félags­manna.
Sigurjón er giftur Lucíu Guðnýju Jörundsdóttur sjúkraliða og á hann þrjár stjúpdætur, þær Steinunni Mörtu, Hrafnhildi Völu og Önnu Kolbrá.

Markmiðið er að varðveita flugsöguna
„Ég byrjaði að stunda vinnukvöld hjá Íslenska Flugsögufélaginu þegar ég var unglingur. Áhugi minn á gömlum flugvélum kemur eflaust til af því að Haukur flugkappi sem ég las um í denn var alltaf að fljúga gömlum flugvélum úr seinna stríði.
Flugsögufélagið er félag sem var stofnað árið 1977 af áhugamönnum um flugsögu og markmið félagsins er að varðveita flugsögu Íslands. Við erum að safna hlutum sem koma flugsögunni við, allt frá hnífapörum upp í flugvélar, og við þiggjum alla hluti sem tengjast henni með þökkum. Félagið hefur jafnframt gert upp nokkrar flugvélar í gegnum tíðina.
Við erum ávallt með mörg járn í eldinum hjá Flugsögufélaginu og okkur vantar alltaf fleiri félaga til þess að leggja okkur lið við varðveislu flugsögunnar.“

Hundrað ára afmæli flugsins
Árið 1919 kom fyrsta flugvélin til landsins og var hún af gerðinni Avro 504K. Þessi tegund af vél var töluvert notuð í fyrri heimsstyrjöldinni og þótti henta ljómandi vel til flugkennslu. Árið 2015 var Hið íslenska Avrof­élag stofnað. Að baki því standa nokkrir af flugköppum nútímans en Sigurjón er formaður þess. Þeir félagar ætla að kaupa Avro 504 og sjá til þess að hún fljúgi á hundrað ára afmælisdegi flugsins á Íslandi, 3. september 2019.

Mosfellingurinn 28. september 2017
Myndir og texti: Ruth Örnólfs

Ungmennahús Mosfellsbæjar opnar í Framhaldsskólanum

Úlfar Darri, Björn, Embla Líf og Ásdís.

Hluti af nýju húsráði Ungmennahússins: Úlfar Darri, Björn, Embla Líf og Ásdís.

Ungmennahús Mosfellsbæjar hefur verið opnað í Framhaldsskólanum í Mosfellsbæ. Þar er vettvangur fyrir ungt fólk á aldrinum 16-25 ára að hittast og byggja upp öflugt og fjölbreytt félagsstarf.
Markmið Ungmennahússins eru meðal annars að veita ungu fólki aðstöðu og aðstoð við að koma hugmyndum sínum í framkvæmd. Bjóða upp á heilbrigðan og vímuefnalausan valkost til afþreyingar ásamt því að opna á tækifæri fyrir ungt fólk fyrir Evrópusamstarf.

Fundir aðra hverja viku
Nú þegar hefur verið stofnað húsráð sem hefur fjölbreytt hlutverk. Sem dæmi má nefna skipulagningu opnunartíma, umsjón viðburða ásamt því að hvetja ungt fólk til áhrifa í Mosfellsbæ.
Húsráðið er opið fyrir alla og fundar aðra hverja viku og eru fundir auglýstir á facebook-síðu Ungmennahússins. Allir sem hafa áhuga á að taka þátt í að móta og hafa áhrif á hvað er gert fyrir ungt fólk í Mosfellsbæ eru hvattir til að mæta.

Lasertag og hamborgarar
Fyrsti viðburður Ungmennahússins verður þann 4. október klukkan 18:00 í Framhaldsskólanum í Mosfellsbæ. Farið verður í lasertag og síðan verða grillaðir hamborgarar. Ef þú ert á aldrinum 16-25 og vilt vera með í að móta starfsemina þá hvetjum við þig til að mæta á þennan fyrsta viðburð þér að kostnaðarlausu.

SAMKEPPNI
Ákveðið hefur verið að efna til samkeppni um nafn og lógó fyrir Ungmennahúsið. Allar hugmyndir og tillögur sendist á hrafnhildurg@mos.is.

Ný framtíðarsýn og áherslur Mosfellsbæjar

Hjá Mosfellsbæ starfa um 650 manns.

Hjá Mosfellsbæ starfa um 650 manns.

Haraldur Sverrisson bæjarstjóri Mosfellsbæjar.

Haraldur Sverrisson bæjarstjóri Mosfellsbæjar.

Að veita þjónustu sem mætir þörfum, vera til staðar fyrir fólk og þróa samfélagið í rétta átt er leiðarljósið í stefnu og framtíðarsýn Mosfellsbæjar sem bæjarráð samþykkti á fundi sínum 20. júlí sl.
Stefnan er afrakstur vinnu sem stóð yfir frá því snemma í vor og skiptist stefnan í þrjá áhersluflokka og níu áherslur sem munu móta og stýra starfsemi Mosfellsbæjar til næstu ára.
Að sögn Haraldar Sverrissonar bæjarstjóra var Mosfellsbær fyrst sveitarfélaga hérlendis til þess að marka sér heildstæða stefnu um það hvernig starfsmenn leysa sín verkefni í þágu íbúa og hvernig þeir styðja kjörna fulltrúa við að koma stefnu málaflokka í framkvæmd. Sú stefnumörkun átti sér stað árið 2007 og kominn var tími til þess að endurtaka leikinn.

Mosfellsbær er einn vinnustaður
„Gildi Mosfellsbæjar voru mótuð árið 2007 og hafa nýst okkur við að búa til einn vinnustað,“ segir Haraldur Sverrisson bæjarstjóri. „Við lítum á bæjarskrifstofurnar og stofnanir bæjarins sem heild og þá er gott að vinna með sameiginleg gildi. Við unnum saman að því að þróa gildin okkar áfram haustið 2016 og létum þau því halda sér í þeirri vinnu sem fram fór í vor en mótuðum í samvinnu við starfsmenn og stjórnendur framtíðarsýn og áherslur til ársins 2027.“

Snjöll, meðvituð og sjálfbær
„Áhersluflokkarnir í stefnu Mosfellsbæjar eru rétt þjónusta, flott fólk og stolt samfélag. Undir þessum flokkum setjum við fram níu áherslur. Við viljum vera persónuleg, skilvirk og snjöll. Einnig samstarfsfús, framsækin og meðvituð. Loks viljum við vera eftirsótt, heilbrigð og sjálfbær.
Þegar við segjumst vilja vera snjöll þá ætlum við að nýta snjallar lausnir og spara íbúum sporin með rafrænni þjónustu, auka þannig aðgengi að þjónustu og hafa um leið jákvæð umhverfisleg áhrif.
Við erum meðvituð um að mikilvægt sé að vera til fyrirmyndar varðandi rekstur og þróun starfseminnar og að sveitarfélagið sé rekið af ábyrgð og þannig afhendum við reksturinn til komandi kynslóða.
Með því að vera sjálfbær leggjum við þá áherslu að láta umhverfið okkur varða, sinna málaflokknum af kostgæfni og tryggja að nálægð okkar við náttúruperlur sé nýtt samfélaginu til góðs.“

Að mæta þörfum nýrra íbúa
Eitt af því sem þátttakendum í vinnunni var hugleikið var sú fjölgun íbúa sem mun verða næstu misserin og mikilvægi þess fyrir íbúa, kjörna fulltrúa og starfsmenn að vel takist til við að nýta það tækifæri.
„Við leggjum því áherslu í stefnunni á að vöxtur sveitarfélagsins hafi jákvæð áhrif á þjónustu og þjónustustig og það sé sameiginlegt verkefni íbúa, kjörinna fulltrúa og starfsfólks að svo verði,“ segir Haraldur að lokum.

Framtíðarsýn Mosfellsbæjar
Mosfellsbær er fjölskylduvænt, heilsueflandi og framsækið bæjarfélag sem setur umhverfið
í öndvegi og hefur þarfir og velferð íbúa að leiðarljósi.

Útiæfingatæki tekin í notkun

æfingatæki

Okkar Mosó er samráðsverkefni íbúa og bæjarins um forgangsröðun og úthlutun fjármagns til smærri nýframkvæmda og viðhaldsverkefna í Mosfellsbæ. Hugmyndasöfnun og kosning fóru fram fyrri hluta árs. Kosin voru 10 verkefni og eru þau öll komin af stað, ýmist lokið eða langt komin.
Stekkjarflöt útivistarparadís fékk flest atkvæði íbúa. Þar er búið að koma upp strandblakvelli og vatnsbrunni.
Útileikvöllur fyrir fullorðna var verkefni sem gerði ráð fyrir líkamsræktartækjum fyrir fullorðna. Tækin eru nú komin upp og tilbúin til notkunar á græna svæðinu við Klapparhlíð.
Meðal annarra verkefna má nefna að búið er að setja upp ungbarnarólur á opin leiksvæði við Víðiteig, Hrafnshöfða, Furubyggð og Rauðumýri. Þá eru komnir bekkir fyrir eldri borgara og aðra íbúa við Klapparhlíð, verið er að undirbúa göngustíg gegnum Teigagilið og endurbætur á göngubrúm við Varmá og við Eyri eru í undirbúningi. Búið er að lagfæra og snyrta gróður á göngugötunni fyrir aftan Þverholt og hönnun á fuglafræðslustíg meðfram Leirvoginum er langt komin.

Neil Warnock

Heilsumolar_Gaua_28sept

Ég las viðtal á fotbolti.net um daginn við Neil Warnock, knattspyrnustjóra Cardiff, liðsins sem Aron Einar fyrirliði íslenska landsliðsiðsins spilar með dags daglega. Neil er grjótharður og hefur alltaf verið, þess vegna var einmitt mjög áhugavert að lesa þetta viðtal. Þar sagði kappinn að hann hefði engan áhuga á að stýra liði í ensku úrvalsdeildinni (Cardiff er í næstefstu deild), pressan þar væri ómanneskjuleg. Hann sagði að aðrir hlutir væru mikilvægari, til dæmis heilsan og fjölskyldulífið.

Ég er sammála Neil Warnock. Við verðum að passa okkur á að láta ekki vinnu og verkefni taka allan okkar tíma og láta fjölskylduna, vinina og heilsuna mæta afgangi. Það gengur bara ekki upp til lengdar, eitthvað mun undan láta. Heilsan, fjölskyldan og/eða vinnan.

Ég er undanfarið búinn að vera að ræða við fólk sem vinnur mjög mikið. Fólk sem er nánast í vinnunni allan sólarhringinn, alla daga, og finnst það næstum því bara vera allt í lagi. Af því álagið sé svo mikið og það þurfi að klára verkefnin. Annars liggi verkefnin bara ókláruð. Og, stundum líka, af því það fær svo há laun. Því hærri laun, því meiri pressa. Alveg eins og í enska fótboltanum. Launin eru hæst í úrvalsdeildinni.

Fólk sem er á mjög háum launum á erfitt með að segja nei þegar vinnuveitandinn hringir á miðnætti á laugardagskvöldi og pantar skýrslu sem verði að vera tilbúin snemma á mánudagsmorgni. Þá er bæði svefn og samvera með fjölskyldunni sett í annað sæti. Vinnan alltaf í það fyrsta. Sama hvað.

Hamingjan felst ekki alltaf í hærri launum. Stundum er betra að hafa lægri laun og meiri lausan tíma. Hafa lífið í betra jafnvægi. Endum þetta á beinni tilvitnun í Neil, nýja besta vin minn: „Þú getur ekki sett verðmiða á góða heilsu, hamingju og fjölskyldu. Sama hver þú ert.“

Heilsumolar Gaua
Mosfellingur 28. september 2017

Arnar Hallsson ráðinn þjálfari meistaraflokks

Arnar Hallsson og Ásbjörn Jónsson.

Arnar Hallsson nýr þjálfari meistaraflokks karla og Ásbjörn Jónsson formaður meistaraflokksráðs.

Arnar Hallsson hefur verið ráðinn þjálfari meistaraflokks karla í knattspyrnu. Liðið leikur í 2. deild og hefur gert síðustu ár. Afturelding endaði í 4. sæti í sumar undir stjórn Úlfs Arnars Jökulssonar. Síðast fór liðið upp um deild árið 2008.
„Ég er búinn að hafa augastað á þessu félagi í talsverðan tíma,“ segir Arnar Hallsson sem hefur unnið sem þjálfari yngri flokka síðustu ár. „Mig hefur langað til að þjálfa meistaraflokk hjá félagi sem hefði rætur og efnivið til að vinna úr. Það freistaði mín þegar ég sóttist eftir þessari stöðu.
Sjálfur var ég leikmaður hjá Víkingi og ÍR þangað til ég fótbrotnaði og fór í langa pásu. Ég byrjaði að þjálfa 2010 sem aðstoðarþjálfari hjá ÍR. Svo var ég yfirþjálfari hjá Víkingi og síðustu þrjú ár hef ég verið hjá HK.“

Í Pepsi-deild eftir fjögur ár
„Þetta verður frumraun mín sem meistaraflokksþjálfari og þá má kannski segja að sem betur hafi tækifærið ekki komið fyrr.
Ég er búinn að vera undirbúa mig síðustu 6 ár, læra fullt af hlutum og gera aragrúa af mistökum. Þannig að ég held að þetta komi á hárréttum tíma.
Ég er tilbúinn að gefa mikið og hjálpa þessum strákum að verða betri í fótbolta. Niðurstaðan verður sú að við munum fara upp um deild og gera okkur gjaldgenga í næstu deild fyrir ofan. Ég vil fara upp í Pepsi-deild eftir 4 ár og held ég að efniviðurinn sé til staðar hjá okkur.
Nú er bara verkefni fyrir alla Mosfellinga að aðstoða okkur við að skapa umgjörð sem verður skemmtileg og glæsileg.
Okkar í hópnum bíður svo að leggja hart að okkur og skemmta fólki með góðum fótbolta og góðum úrslitum. Svo er mikilvægt að aðstöðumál hér í Mosfellsbæ fylgi í kjölfarið, þau þarf að bæta.
Mikilvægustu leikmennirnir eru þeir sem eru til staðar hjá félaginu. Svo er hægt að bæta í hópinn einni til tveimur skrautfjöðrum, eins og flestir þjálfarar vilja. Bæta þá við leikmönnum sem eru nógu góðir fyrir næstu deild fyrir ofan.“

Ætlum okkur stóra hluti
„Ég þekki Arnar frá því ég spilaði með honum í ÍR,“ segir Ásbjörn Jónsson formaður meistaraflokksráðs. „Hann er besti maðurinn til að koma mönnum í réttan gír fyrir leiki. Alla vega sem leikmaður og ég efast ekki um að það verði eins sem þjálfari.
Svo hef ég séð til hans sem þjálfara og liðin hans spila yfirburðabolta. Nafnið hans kom strax upp í hugann á mér þegar leitin að þjálfara hófst.
Án þess að gera nokkuð lítið úr fyrri þjálfurum erum við í talsvert betri málum í dag í rekstri klúbbsins og ætlum okkur stóra hluti.
Ég er sammála Arnari að við ætlum okkur upp um deild á næsta ári.“

Tvær hleðslustöðvar teknar í notkun

Frátekin stæði fyrir rafbíla við Varmárlaug og Lágafellslaug.

Frátekin stæði fyrir rafbíla við Varmárlaug og Lágafellslaug.

Settar hafa verið upp tvær hleðslustöðvar fyrir rafbíla í Mosfellsbæ. Önnur er staðsett við íþróttamiðstöðina Lágafell og hin við íþróttamiðstöðina að Varmá. Sú þriðja verður sett upp innan skamms við Framhaldsskólann í Mosfellsbæ.
Stöðvarnar eru merktar Mosfellsbæ og Ísorku, sem er í eigu Íslenska gámafélagsins. Þær eru snúrulausar og af gerðinni ­Circontrol eVolve og eru 2×22 kW AC.
Mosfellsbær og Íslenska Gámafélagið undirrituðu í sumar samning til þriggja ára um að Íslenska Gámafélagið setji upp og reki þrjár hleðslustöðvar sem geta hlaðið allar gerðir rafbíla á Íslandi. Áætluð verklok voru í janúar 2018 en uppsetning stöðvanna hefur gengið framar vonum og því var verklokum flýtt um nokkra mánuði. Mosfellingar geta nú hlaðið rafbíla sina á helstu viðkomustöðum í bæjarfélaginu.

Bæjarleikhúsinu breytt í jazzklúbb

xxx x

Allt önnur Ella verður frumsýnd í Bæjarleikhúsinu föstudaginn 29. september.

Nú eru hafnar æfingar í Bæjarleikhúsinu á sýningu sem er samstarfsverkefni tónlistarskólans og leikfélagsins. Sýningin kallast „Allt önnur Ella“ og er að mestu byggð á tónlist Ellu Fitzgerald.
Leikhúsinu verður breytt í jazzklúbb á sjöunda áratugnum og tónlistaratriði fléttast saman við leikin atriði. Leikhúsgestir sitja við borð í salnum og upplifa kvöldstund þar sem þeir ferðast aftur í tímann, njóta góðrar tónlistar og verða vitni að ýmsum fyndnum og skemmtilegum atvikum.
Leikstjóri er Ingrid Jónsdóttir og um tónlistarstjórn sjá Sigurjón Alexandersson og Heiða Árnadóttir. Frumsýning verður föstudaginn 29. september kl. 20 og sýningar verða á föstudögum. Miðasala er í síma 566-7788. Áhugasamir eru hvattir til að fylgjast með undirbúningi á Facebook, Instagram og Snapchat.

Setur upp rokktónleikasýningu

Greta Salóme stendur fyrir hrollvekjandi rokktónleikum.

Greta Salóme stendur fyrir hrollvekjandi rokktónleikum.

Greta Salóme stendur í stórræðum þessa dagana ásamt góðum hópi af hæfileikaríku fólk en þau eru að setja á svið tónleikasýningu sem nefnist Halloween Horror Show.
„Þessi hugmynd er búin að blunda lengi í mér. Þegar ég var að vinna með Disney þá kynntist ég því hvernig hægt væri að blanda saman alls konar tilefnum og tónlist. Ég hef alltaf verið mikill aðdáandi Halloween og mér hefur fundist vanta alvöru viðburð í kringum hrekkjavökuna á Íslandi. Fólk er í auknum mæli farið að halda Halloweenpartý en nú gefst öllum tækifæri á að koma á alvöru hryllings rokktónleikasýningu,“ segir Greta Salóme sem er framleiðandi sýningarinnar.

Öllu tjaldað til í Háskólabíói
Auk Gretu Salóme koma fram á sýningunni Eyþór Ingi, Salka Sól, Stebbi Jak, Andrea Gylfa, Selma Björns, Sirkus Íslands, Ólafur Egill, stórsveit Todmobile, kór og dansarar.
„Ég myndi segja að þetta sé 70% söngur og 30% dans en við leggjum rosalega mikið í þessa sýningu. Ég fullyrði að þessi tónleikasýning á sér enga hliðstæðu á Íslandi. Við munum flytja lög eins og Highway to Hell, Zombie, Thriller, lög úr Litlu Hryllingsbúðinni og Rocky Horror og margt fleira.“

Vegleg verðlaun fyrir flottustu búningana
Sýningin verður í Háskólabíó 28. október og á undan verður boðið upp á fordrykk í samstarfi við Partýbúðina með alls kyns ­uppákomum. „Það er sýning kl. 20 en það er eiginlega uppselt á hana þannig að við vorum að bæta við sýningu kl. 22:30 og fer miðasala fram á Tix.is. Ég hvet alla til mæta í búningum en það verða vegleg verðlaun fyrir þá flottustu,“ segir Greta Salóme.

Veiðimaður og bóndi í hjarta mínu

bæjarlistamaður2017

Davíð Þór er meðal fjölhæfustu tónlistarmanna landins, jafnvígur á píanóleik, spuna, tónsmíðar og hljómsveitarstjórn auk þess sem hann leikur á ógrynni hljóðfæra. Hann hefur leikið með flestum tónlistarmönnum landsins og spilað á tónlistarhátíðum um allan heim.
Mosfellsbær útnefndi Davíð Þór bæjarlistamann Mosfellsbæjar 2017 á dögunum en viðurkenningin var afhent við hátíðlega athöfn í Hlégarði.

Davíð Þór Jónsson er fæddur á Seyðisfirði 27. júní 1978. Foreldrar hans eru þau Jenný Ásgerður Magnúsdóttir listakona, húsfreyja og skautritari og Jón Þórir Leifsson vélsmiður og lögreglumaður. Davíð á þrjá bræður, Daníel, Leif og Arnar.

Fékk að vera frjálst barn
„Ég flutti frá Seyðisfirði til Akraness þegar ég var þriggja ára gamall. Þegar ég hugsa til æskuáranna á Skaganum þá er það brimið við Traðarbakkakletta, rauðmagi, hrogn og lifur, mamma syngjandi og þríhjólareiðtúr á Kothúsatúninu sem stendur upp úr.
Frá unga aldri sinnti ég heimilis- og ­bústörfum ásamt því að leggja net með föður mínum.
Ég fékk að vera frjálst barn þar sem ég gat leikið lausum hala um götur og fjörur bæjarins. Ég fór líka mörg sumur í sveit í Andakíl í Borgarfirði og átti það mjög vel við mig í alla staði.
Ég gekk í Brekkubæjarskóla og fór þaðan í Fjölbrautaskóla Vesturlands.“

Starfið hefur margar birtingamyndir
„Tónlist var hluti af daglegu lífi þar sem var sungið, spilað á gítar eða leikið á potta og pönnur. Ég var níu ára þegar ég fór í fyrsta píanótímann í Tónlistarskóla Vesturlands. Ég fékkst ekki til að fara fyrr en ég frétti að Sveinn Rúnar æskuvinur minn ætlaði að skella sér í tíma, þá fór ég líka. Í kjölfarið lærði ég svo á saxafón í 10 ár. Þarna var ekki aftur snúið því líf mitt hefur meira og minna snúist um tónlist síðan.
Ég byrjaði að vinna fyrir mér sem tónlistarmaður þegar ég var 14 ára gamall og hef starfað við það síðan. Starf mitt hefur margar birtingarmyndir, allt frá því að leika á harmonikkuballi í Dölunum yfir í það að leika í kvikmynd í Úkraínu.“

Gaf út sína fyrstu sólóplötu
Davíð Þór stundaði nám í Tónlistarskóla FÍH og fór í skiptinám til Þrándheims á vegum skólans og útskrifaðist vorið 2001. Árið eftir gaf hann út sína fyrstu sólóplötu, Rask.
Hann hefur gert tónlist og hljóðmyndir fyrir fjölda leiksýninga, Tengdó, Hrærivélina, söngleikinn Leg, Baðstofuna, Héra Hérason, Manntafl, Mýs og menn, Dagbók djasssöngvarans og síðast Húsið sem sett var upp í Þjóðleikhúsinu. Hann hefur einnig tónsett útvarpsleikrit og sjónvarpsverk af ýmsu tagi auk þess að semja tónlist fyrir dansverk.
Davíð Þór hefur frá unga aldri leikið með flestum þekktari tónlistarmönnum landsins. Hann hefur einnig unnið náið með sviðslistafólki og myndlistarmönnum og mætti þar helst nefna Ragnar Kjartansson, en saman sköpuðu þeir tónlistar- og myndbandsverkin „The End“, framlag Íslands á Feneyjartvíæringnum árið 2009 og „Guð“. Davíð samdi og útsetti tónlistina og flutti ásamt Ragnari og hljómsveit.
Davíðs Þór hefur hlotið margvísleg verðlaun, til dæmis Íslensku tónlistarverðlaunin og Grímuverðlaunin, auk þess sem tónlist hans úr kvikmyndinni Hross í oss hefur verið verðlaunuð á kvikmyndahátíðum í Evrópu.

Nýtur lífsins í Álafosskvosinni
Davíð Þór er kvæntur Birtu Fróðadóttur arkitekt og saman eiga þau dótturina Silfru sem er átján mánaða gömul. Ég spyr Davíð út í föðurhlutverkið. „Það er bæði stærsta verkefnið og jafnframt það dásamlegasta í lífi mínu og kemur manni sífellt á óvart.“
Fjölskyldan er búsett í Álafosskvosinni þar sem Davíð er einnig með vinnustofu. Davíð segir Kvosina vera dásamlegt lítið þorp þar sem fólk talar mannamál, verkar fugl og fisk á víxl og tekur einn dag í einu.
„Við Birta erum forvitnir eldhugar og elskum að ferðast og nema ný lönd, kynnast nýju fólki og læra af því. Við höfum mikið dálæti á að vera undir Snæfellsjökli og þar höfum við átt töfrastundir. Aðráttaraflið þar er það sama og á við um tónlist, það er hið ósýnilega. Við göngum einnig til rjúpna saman í leit að kyrrðinni.“

Minnir mann á að halda áfram að skapa
Mosfellsbær útnefndi Davíð Þór bæjarlistamann Mosfellsbæjar 2017 á dögunum en viðurkenningin var afhent við hátíðlega athöfn í Hlégarði. En hvaða þýðingu hefur það að vera bæjarlistamaður Mosfellsbæjar? „Það er mikill heiður og vissulega hefur það jákvæða þýðingu í hvívetna. Þetta minnir mann á að halda áfram að skapa og gefa af sér eins og kostur er á.
Ég mun láta gott af mér leiða áfram og munu nokkrir viðburðir líta dagsins ljós hér í bæ nú í vetur á hinum ýmsu vel völdu stöðum. Nánari staðsetning og tími kemur í ljós síðar.“

Kona fer í stríð
Um þessar mundir er Davíð Þór að vinna að tónlist fyrir nýjustu kvikmynd Benedikts Erlingssonar sem ber heitið Kona fer í stríð, en hún er um konu sem vill bjarga heiminum og hefur fundið lausnina til þess. Tónlistin er meðal annars unninn í Sundlauginni, hljóðveri í Álafosskvos, en þar vinnur Davíð mikið að listsköpun sinni.
„Þrátt fyrir allt þetta hafarí þá er ég samt veiðimaður og bóndi í hjarta mínu og tel að æðsta markmiðið sem maður hefur í lífinu sé að verða góð manneskja,“ segir Davíð að lokum.

Mosfellingurinn 7. september 2017
Myndir og texti: Ruth Örnólfs

Gefur út heilsudagbók

Anna Ólöf gefur út 6 vikna ódagsetta dagbók með áherslu á bættar lífsvenjur.

Anna Ólöf gefur út 6 vikna ódagsetta dagbók með áherslu á bættar lífsvenjur.

Anna Ólöf Sveinbjörnsdóttir hefur gefið út dagbók sem hún nefnir Heilsudagbókin mín. Í vor hlaut Anna Ólöf þróunar- og nýsköpunarviðurkenningu Mosfellbæjar fyrir það verkefni.
„Ég var búin að ganga með þessa hugmynd í maganum í langan tíma og var búin að gera margar útfærslur af bókinni áður en endanleg útkoma varð til. Heilsudagbókin er heildræn nálgun á bættar lífsvenjur, þar sem lögð er áhersla á hreyfingu, mataræði og ekki síst huglæga eða andlega vinnu,“ segir Anna Ólöf en heilsudagbókin er 6 vikna ódagsett dagbók.

Hlaut þróunar- og nýsköpunarviðurkenningu Mosfellsbæjar
„Það skipti mig miklu máli að hljóta þessa viðurkenningu, þá aðallega að fá jákvæð viðbrögð á bókina. Ég hannaði bókina í rauninni sem verkfæri fyrir mig til að öðlast betri heilsu og þannig aukin lífsgæði. Það er því ánægjuleg viðbót ef bókin getur hjálpa öðrum.
Bókin er einföld í notkun og hentar í raun öllum sem langar að bæta líf sitt. Lögð er áhersla á að fólk fari aðeins inn á við og finni hvað það er sem það vill fá út úr lífinu og hvað það er sem raunverulega veitir meiri hamingju.“

Frábærar viðtökur
„Ég ákvað til að byrja með að selja bókina í gegnum Facebook-síðuna Heilsudagbókin mín, en svo stefni ég á koma henni í sölu á einhverjum útsölustöðum. Bókin kostar kr. 2.900 en verður á kynningartilboði til 15. september á aðeins 2.500 kr.
Ég er eiginlega orðlaus yfir viðtökunum sem bókin hefur fengið. Ef einhverjir hafa áhuga á að vita meira eða jafnvel verða sér út um Heilsudagbók þá endilega hafið samband við mig,“ segir Anna Ólöf að lokum.