Jógvan Hansen tónlistarmaður segir það forréttindi að starfa við það sem honum þykir skemmtilegast að gera.

Færeyingurinn Jógvan Hansen vann íslensku X-Factor söngvakeppnina árið 2007. Markmið keppninnar var að laða fram í sviðsljósið hæfileikaríkt söngfólk sem unnið gat hug og hjörtu þjóðarinnar með söng sínum og persónutöfrum. Það gerði Jógvan svo sannarlega enda hefur hann verið einn ástsælasti söngvari þjóðarinnar síðan.
Jógvan er fæddur í Klaksvík í Færeyjum 28. desember 1978. Foreldrar hans eru Ása Hansen og Helgi Hansen. Jógvan á eina systur, Guri Mörköre.

Fór alltaf með aukaföt að heiman
„Ég lék mér mikið við Levi frænda minn í Klaksvík en hann er árinu eldri en ég. Við þvældumst í klettunum og eltumst við kindur. Ég man enn í dag hvað ég var svekktur þegar hann byrjaði í skóla því þá missti ég besta leikfélagann.
Hjá afa í Klaksvík lærði maður að vinna, ég slátraði rollunum, rúði og meira til. Ég dvaldi líka mikið í Árnafirði sem er ekki langt frá Klaksvík en þar búa um 70 manns. Amma mín og afi í föðurætt bjuggu þar og voru með búskap. Ég gat dundað mér endalaust úti í náttúrunni við að veiða krabba eða fiska á bryggjunni.
Ég fór alltaf með aukaföt með mér að heiman því það klikkaði eiginlega ekki að ég varð alltaf rennblautur.“

Frændi var mikill áhrifavaldur
„Ég var lengi í skátunum og við vorum dugleg að fara í útilegur um helgar.
Ég gekk í Viðósánna skóla frá sex til fimmtán ára aldurs og mér fannst alltaf gaman í skólanum. Þegar ég var 9 ára þá byrjaði ég að læra á fiðlu og lærði á hana í mörg ár. Málið var að frændi minn, Hans Hjalti, spilaði í hljómsveit og þeir spiluðu mikið af írskum lögum og hann leyfði mér stundum að spila með.
Ég leit mikið upp til hans og eflaust er það honum að þakka að ég lærði á fiðlu öll þessi ár,“ segir Jógvan brosandi. „Ég byrjaði síðan að spila með Færeysku sinfóníuhljómsveitinni þegar ég var 13 ára og var yngsti meðlimur sveitarinnar.
Ég eignaðist líka gítar og glamraði á hann en mér fannst það ekki eins gaman, mér fannst miklu skemmtilegra að syngja.“

Var of ungur til að muna eftir Bítlunum
„Þegar ég var fimmtán ára þá var ég að leika í áhugamannaleikhúsi ásamt frænku minni. Einn daginn tók ég gítarinn með og söng fyrir hana lagið „Leaving on a Jet Plane.“
Það voru hljómsveitagaurar í næsta herbergi sem heyrðu til mín. Þeir tjáðu mér að þá vantaði söngvara í hljómsveitina þeirra sem hét Aria og hvort ég væri til í að prófa. Ég sló til og mætti á æfingu hjá þeim. Þeir spurðu mig hvort ég gæti sungið Bítlana en ég var svo ungur að ég vissi ekki hverjir þeir voru en allt hafðist þetta nú. Ég spilaði síðan með þeim á böllum og ég man að ég þurfti sérstakt leyfi til að fá að vera inni á stöðunum vegna aldurs.
Þegar ég var 16 ára söng ég í fyrsta sinn í stúdíói á vegum hljómsveitarinnar. Þar tókum við upp lag sem síðar varð vinsælasta lagið í Færeyjum.“

Flutti til Íslands árið 2004
„Ég fór í verslunarskóla í eitt ár, vann í fiski, fór á sjóinn og fór til Danmerkur í tónlistarnám. Ég fór svo aftur til Færeyja og fór að læra hárgreiðslu og útskrifaðist úr því fagi.
Einn daginn árið 2004 kom Elísabet vinkona mín til mín og spurði mig hvort ég hefði áhuga á að koma með henni að læra förðunarfræði á Íslandi. Ég hafði mikinn áhuga á því og við fórum saman til Íslands og bjuggum á Færeyska sjómannaheimilinu. Elísabet var ófrísk á þessum tíma og vildi ekki vera mjög lengi í burtu þannig að hún fór aftur til Færeyja en ég varð eftir á Íslandi og hef verið hér síðan. Ég fékk starf á hárgreiðslustofu og leist bara vel á framtíðina hér.“

Vann X-Factor söngvakeppnina
„Árið 2006 söng ég í brúðkaupi hjá vinkonu minni. Eftir brúðkaupið skráðu hún og vinkona hennar mig í X-Factor söngvakeppnina sem átti að byrja um haustið.
Ég hafði ekki hugmynd um eitt eða neitt en fékk síðan tölvupóst um hvar ég ætti að mæta. Ég var nú ekki á því að fara fyrst en lét tilleiðast og vann keppnina. Þetta var mikið ævintýri.“

Skerpukjöt og hákarl í veislunni
Sama ár og Jógvan tók þátt í söngvakeppninni kynntist hann Hrafnhildi Jóhannesdóttur stærðfræðingi. Þau gengu í hjónaband í Hallgrímskirkju árið 2014 og veislan fór fram á Hilton hótelinu þar sem gestum var meðal annars boðið að smakka skerpukjöt frá Færeyjum og hákarl frá Íslandi. Þau eiga tvö börn, Jóhannes Ara fimm ára og Ásu Maríu þriggja ára.
„Við keyptum okkur hús í Mosfellsbæ árið 2010 og hér finnst okkur frábært að vera. Hrafnhildur er alin hér upp svo hún þekkir hér hvern krók og kima. Ég er mikill sveitastrákur og útsýnið hér heiman frá okkur er bara mjög svipað því sem ég hafði í Færeyjum svo þetta er bara frábært.“

Skemmtilegast að sjá viðbrögð fólks í salnum
Ég spyr Jógvan út í sönginn en hann hætti í hárgreiðslunni árið 2008 og hefur starfað eingöngu við söng síðan. „Það eru algjör forréttindi að starfa við það sem manni finnst skemmtilegast að gera.
Það hefur alltaf verið þannig með mig að það er sama hvaða starf ég hef tekið að mér, ég hugsa alla daga til tónlistar. Hún er alltaf efst í huga mér og ég er glaður þegar ég fæ að taka þátt í tónlist í hvað formi sem er. Skemmtilegast við sönginn er að sjá viðbrögð fólks í salnum. Það er ekki hægt að útskýra það, það þarf að upplifa það.
Ég er óendanlega þakklátur Íslendingum fyrir hvað þeir hafa tekið mér vel.“

Græna herbergið
„Við Friðrik Ómar Hjörleifsson opnuðum saman skemmtistaðinn Græna herbergið í fyrra. Við höfðum gengið með þessa hugmynd lengi því okkur langaði að opna stað sem einblínir á tónlist út í eitt.
Við lögðum upp með að geta boðið tónlistar- og listafólki upp á vandaðan aðbúnað til að koma fram. Við erum með allan helsta búnað á staðnum sem eykur þægindi listamanna.
Við störfum báðir á staðnum en erum einnig að syngja út um allt land. Þetta er auðvitað mikil vinna en hún er endalaust skemmtileg og henni fylgir mikil gleði. Er það ekki einmitt það sem lífið snýst um?“ segir Jógvan að lokum.

Mosfellingurinn 22. ágúst 2017
Myndir og texti: Ruth Örnólfs

Bæjarhátíðin, Í túninu heima, verður haldin helgina 25.-27. ágúst. Dagskráin er glæsileg að vanda og þar ættu flestir að geta fundið eitthvað við sitt hæfi. Hátíðin hefur fyrst og fremst verið byggð upp á framtaki íbúa bæjarins og þátttöku þeirra.
Mosfellsbær fagnar 30 ára afmæli um þessar mundir og hafa viðburðir verið á dagskrá frá afmælisdeginum 9. ágúst.
Um helgina verður boðið upp á þekkta dagskrárliði eins og Ullarpartí og markaðsstemningu í Álafosskvos, flugvéla- og fornvélasýningu á Tungubökkum, kjúklingafestival, stórtónleika á Miðbæjartorgi, götugrill og Pallaball. Frítt verður í leið 15 allan laugardaginn þannig að það er tilvalið að skilja bílinn eftir heima.

Smeltu hér til að skoða dagskrá hátíðarinnar 2017 (pdf)

 

MIÐVIKUDAGUR 23. ÁGÚST

20:00 – 22:00 UNGLINGADANSLEIKUR Í HLÉGARÐI
Upphitun fyrir bæjarhátíðina. Unglingaball fyrir 8.-10. bekkinga.
Fram koma: Rapparinn GKR og DJ. Aðgangseyrir: 800 kr.

 

FIMMTUDAGUR 24. ÁGÚST

BÆJARBÚAR SKREYTA HÚS OG GÖTUR Í HVERFISLITUM
GULUR – Hlíðar, Höfðar, Tún og Mýrar
RAUÐUR – Tangar, Holt og Miðbær
BLEIKUR – Teigar, Krikar, Lönd, Ásar, Tungur og Mosfellsdalur
BLÁR – Reykja- og Helgafellshverfi

19:00 FELLAHRINGURINN – FJALLAHJÓLAKEPPNI 
Hjólakeppni um stíga innan Mosfellsbæjar. Keppnin hefst við Íþróttahúsið að Varmá. Tvær vegalengdir, 16 km og 30 km. Sjá nánar á netskraning.is/fellahringurinn.

18:00 – 20:00 SUNDLAUGARKVÖLD Í LÁGAFELLSLAUG
Fjölskyldan skemmtir sér saman. Leikhópurinn Lotta kíkir í heimsókn með sína vinsælu söngvasyrpu. Blöðrulistamenn sýna listir sínar og gera skemmtileg blöðrudýr. Wipe-Out brautin verður á sínum stað, frír ís í boði. Frítt inn fyrir alla fjölskylduna.

20:15 BÍLAKLÚBBURINN KRÚSER Í HÁHOLTI
Bílaklúbburinn Krúser safnast saman við Kjarnagrill í Háholti. Keyrður verður rúntur um Mosfellsbæ og svo stilla allir sér upp á planinu. Tilvalið að kíkja á flottar drossíur og klassíska bíla frá liðinni tíð. Fjöldi glæsivagna verður á svæðinu ef veður leyfir.

21:00 STEBBI OG EYFI Í HLÉGARÐI
Frábær kvöldstund með þessum einstöku listamönnum. Gamanmál og gleðisöngvar úr ýmsum áttum. Miðasala á www.midi.is.

 

FÖSTUDAGUR 25. ÁGÚST

10:00 og 11:00 BÓKASAFN MOSFELLSBÆJAR
Leikhópurinn Lotta: Söngvasyrpa fyrir öll 5 ára börn í Mosó.
Dagskrá í samstarfi við leikskólana.

10:00-11:00 AFMÆLISGJÖF TIL SKÓLAKRAKKA
Friðrik Dór mætir í grunnskólana og tekur nokkur lög.
Leikkonurnar Agnes Wild og Sigrún Harðar þræða leikskóla bæjarins með skemmtiprógram í farteskinu.
Allir krakkar fá buff í hverfalitunum í afmælisgjöf frá Mosfellsbæ.

13:00 – 17:00 HÚSDÝRAGARÐURINN Á HRAÐASTÖÐUM Í MOSFELLSDAL
Geitur, refur, kettlingar, grís, kálfur, hænur, kanínur, naggrísir og mörg önnur húsdýr. Aðgangur 600 kr.

15:00 ARION BANKI
Krakkar frá Leikfélagi Mosfellssveitar syngja nokkur lög. Andlitsmálun fyrir börnin og Bíbí, Blaki og Ari verða á svæðinu.

18:00 – 19:00 KYNNINGARTÍMI Í GOLFI Á HLÍÐAVELLI
Opinn kynningartími fyrir nýja kylfinga í Mosfellsbæ. Komið og kynnist golfíþróttinni og lærið helstu tökin. Victor Viktorsson golfkennari verður á æfingasvæðinu við gamla skálann á Hlíðavelli. Gott er að koma með kylfur, en einhverjar kylfur verða á staðnum fyrir þá sem það vilja. Frítt er í tímann og fríir golfboltar til að slá.

19:00 – 23:00 VINNUSTOFUR OPNAR Á ÁLAFOSSVEGI
Vinnustofur ljósmyndaranna Bjarkar Guðbrandsdóttur og Guðbjargar Magnúsdóttur og myndlistarkonunnar Ólafar Oddgeirsdóttur verða opnar á neðri hæð Álafossvegar 20.

19:30-22:30 KAFFIHÚS MOSVERJA
Skátafélagið Mosverjar opnar kaffihús í Skálanum í Álafosskvos. Boðið upp á heitar vöfflur, kaffi og kakó.

19:30 – 22:30 ÚTIMARKAÐUR Í ÁLAFOSSKVOS
Markaðstjöld full af fjölbreyttum varningi.

20:00 BMX BROS Á MIÐBÆJARTORGINU
Snillingarnir í BMX bros hita upp á Miðbæjartorginu áður en skrúðgöngurnar leggja af stað. Þeir munu sýna listir sínar með glæsilegri sýningu og bjóða upp á kennslu fyrir þá sem það vilja.

20:30 ÍBÚAR SAFNAST SAMAN Á MIÐBÆJARTORGI
GULIR, RAUÐIR, BLEIKIR og BLÁIR – Allir hvattir til að mæta í lopapeysu.

20:45 SKRÚÐGÖNGUR LEGGJA AF STAÐ Í ÁLAFOSSKVOS
Hestamannafélagið Hörður leiðir gönguna með vöskum fákum.
Göngustjórar frá Leikfélagi Mosfellssveitar ræsa einn lit af stað í einu.

21:00 – 22:30 ULLARPARTÝ Í ÁLAFOSSKVOS 
Brekkusöngur og skemmtidagskrá.
Skólahljómsveit Mosfellsbæjar tekur á móti skrúðgöngu.
Haraldur Sverrisson bæjarstjóri setur hátíðina.
Gummi og Felix taka lagið
Hilmar og Gústi stýra brekkusöng.
Björgunarsveitin Kyndill kveikir í blysum.

Rauðakrosshópurinn sinnir gæslu ásamt Björgunarsveitinni Kyndli.

22:00 – 23:30 UPPISTAND Á HVÍTA RIDDARANUM
Uppistand.is heldur sitt mánaðarlega uppistand með úrvals grínistum. Frítt inn.

23:30 – 03:00 – PAPAR Í HLÉGARÐI
Hinir ómótstæðilegu Papar slá upp dansleik í tilefni bæjarhátíðarinnar. Tryllt stemning í Hlégarði, höfuðvígi Papanna á höfuðborgarsvæðinu. Miðasala er hafin á tix.is.

 

LAUGARDAGUR 26. ÁGÚST

•  Frítt í leið 15 í strætó allan daginn  •  Frítt í Varmárlaug og Lágafellslaug í dag  •  Frítt á Gljúfrastein

7:00 – 22:00 BAKKAKOTSVÖLLUR – Frítt í golf
Golfklúbbur Mosfellsbæjar býður Mosfellingum að spila frítt á Bakkakotsvelli í Mosfellsdal. Bóka þarf rástíma á golf.is eða í afgreiðslu GM og er nauðsynlegt að viðkomandi hafi þekkingu og getu til að leika á vellinum og fari eftir öllum þeim reglum sem þar gilda.

8:00 – 18:00 MOSFELLSBAKARÍ
Mosfellsbakarí í hátíðarskapi alla helgina og býður gestum og gangandi upp á  ilmandi  ferskt brauð, bakkelsi og frábæra stemningu. Litríkar hverfamúffur, hátíðarkaka og frábærar hátíðarvöfflur.

09:00 – 12:00 BEIN ÚTSENDING Á RÁS 2
Fjölmiðlafólkið Kolbrún Björnsdóttir og Gunnar Hansson verða í beinni útsendingu frá bæjarhátíðinni á Rás 2.

9:00 – 17:00 FRÍTT Á GLJÚFRASTEIN
Gljúfrasteinn – hús skáldsins opnar dyrnar að safninu í Mosfellsdal. Gljúfrasteinn var heimili og vinnustaður Halldórs Laxness og fjölskyldu hans um hálfrar aldar skeið. Nýlega opnaði safnið á nýjan leik eftir miklar framkvæmdir. Frítt verður inn á safnið og munu starfsmenn glaðir skeggræða við gesti um nýafstaðnar framkvæmdir og hvaðeina sem snertir Gljúfrastein.

9:00 – 17:00 ÍÞRÓTTASVÆÐIÐ Á TUNGUBÖKKUM
Fótboltamót Aftureldingar og Weetos, 6. og 7. flokkur karla og kvenna.

9:00 – 16:00 TINDAHLAUP MOSFELLSBÆJAR
Náttúruhlaup sem hefst við Íþróttamiðstöðina að Varmá. Ræst kl. 9:00 og kl. 11:00. Fjórar vegalengdir í boði, 7 tindar (37 km), 5 tindar (35 km), 3 tindar (19 km) og 1 tindur (12 km). www.mos.is/tindahlaup og www.hlaup.is.

9:30 KETTLEBELLS ICELAND – ENGJAVEGUR 12
Opin Ketilbjölluæfing fyrir hrausta Mosfellinga. Gengið með ketilbjöllur upp á Reykjafell þar sem æfing verður tekin á toppnum. Lagt af stað frá Engjavegi.

11:00 WORLD CLASS – MOSFELLSBÆ
Opinn tími í World Class fyrir alla Mosfellinga. Skemmtileg blanda af þol- og styrktaræfingum ásamt góðum teygjum. Kennarar eru Þorbjörg og Árni. Tökum á því í hverfalitunum!

10:00 – 16:00 MOSSKÓGAR Í MOSFELLSDAL
Útimarkaður: Sultukeppni, grænmeti frá Mosskógum, silungur frá Heiðarbæ, rósir frá Dalsgarði o.fl. Úrslit í sultukeppni kl. 15:00. Skila þarf inn sultum í keppnina fyrir kl. 12.

11:00 GALLERÍ HVIRFILL Í MOSFELLSDAL – MOSFELLINGAR BJÓÐA HEIM
Bjarki Bjarnason les úr væntanlegri ævisögu Guðrúnar Tómasdóttur söngkonu.

13:00 – 17:00 HÚSDÝRAGARÐURINN Á HRAÐASTÖÐUM Í MOSFELLSDAL
Geitur, refur, kettlingar, grís, kálfur, hænur, kanínur, naggrísir og mörg önnur húsdýr.  Aðgangur 600 kr.

12:00 – 17:00 ÍS-BAND FRUMSÝNIR JEEP COMPASS
Íslensk-Bandaríska frumsýnir nýjasta Jeep fjölskyldumeðliminn Jeep Compass í Þverholti 6. Stórglæsilegur og öflugur jeppi sem vert er að kíkja nánar á. Boðið verður upp á reynsluakstur á öllum Jeep jeppum. Kaffibarþjónar frá Lavazza galdra fram ítalskt eðalkaffi og gos og sælgæti verður í boði fyrir krakkana.

12:00 – 17:00 WINGS AND WHEELS – Tungubakkaflugvöllur
Fornvélasýning: Gamlar flugvélar, dráttarvélar úr Mosfellsbæ, mótorhjól, fornbílar og flugsýning. Heitt á könnunni fyrir gesti og karamellukast fyrir káta krakka.

12:00 HÓPAKSTUR UM MOSFELLSBÆ
Ferguson-félagið stendur fyrir hópakstri dráttarvéla og fornbíla.
Lagt er af stað frá Tungubakkaflugvelli og keyrður hringur um Mosfellsbæ.

12:00-17:00 KAFFIHÚS MOSVERJA
Skátafélagið Mosverjar opnar kaffihús í Skálanum í Álafosskvos. Boðið upp á heitar vöfflur, kaffi og kakó.

12:00 – 17:00 ÚTIMARKAÐUR Í ÁLAFOSSKVOS
Markaðstjöld full af fjölbreyttum varningi og ýmsar uppákomur á sviði.
12:00 Blaðrarinn mætir á svæðið með blöðrudýr fyrir börnin
12:30 Skósveinar (Minions) á vappi um svæðið
13:00 Krakkar úr Krikaskóla syngja
13:30 Kammerkór Mosfellsbæjar
14:00 Brassbandið Búbbert
14:30 Mosfellskórinn
15:00 Leikgleði flytur lög úr „Besta sýning ársins“.
15:30 Hljómsveit Ready (úr Tónlistardeild Listaskólans)
16:00 Hljómsveitin Piparkorn (úr Tónlistardeild Listaskólans)

13:00 – 17:00 VINNUSTOFUR OPNAR Á ÁLAFOSSVEGI
Vinnustofur ljósmyndaranna Bjarkar Guðbrandsdóttur og Guðbjargar Magnúsdóttur og myndlistarkonunnar Ólafar Oddgeirsdóttur verða opnar á neðri hæð Álafossvegar 20.

13:00-15:00 EIRHAMRAR – FÉLAGSSTARF ALDRAÐRA
Mosfellingar, FaMos-félagar og aðrir gestir velkomnir í heimsókn í þjónustumiðstöðina á Eirhömrum. Fjölbreytt vetrar­dagskrá kynnt. Kaffi á könnunni og Vorboðarnir taka lagið um kl. 13:00.

13:00-13:30 BARNADAGSKRÁ Á TÚNINU VIÐ HLÉGARÐ
Bíbí og Björgvin syngja töfrandi lög ævintýranna. Björgvin Franz mætir ásamt hinni heimsfrægu óperusöngkonu Bíbí Markan. Dans, söngur og grín fyrir alla fjölskylduna. Aðgangur frír.

13:00 – 16:00 SKOTTMARKAÐUR VIÐ KJARNA
Mosfellingum gefst kostur á að koma með alls kyns gull og gersemar úr skápum og bílskúrum og bjóða gestum og gangandi til sölu. Einnig er handverksfólk velkomið. Nánari upplýsingar um viðburð á Facebook. Skráning hjá Elísabetu  í síma 898 4412.

14:00 ÁLAFOSS – STÁLÚLFUR AÐ VARMÁ
Knattspyrnuliðið Álafoss mætir Stálúlfi á gervigrasinu að Varmá. Leikurinn er partur af Íslandsmótinu í 4. deild.

14:00 – 24:00 TÍVOLÍ VIÐ MIÐBÆJARTORG

13:30 AMSTURDAM 6 VIÐ REYKJALUND – MOSFELLINGAR BJÓÐA HEIM
Kvennakórinn Stöllurnar og María Guðmundsdóttir bjóða til árlegrar garðveislu.

14:00 – 17:00 LISTASALUR MOSFELLSBÆJAR
Sýning Rögnu Fróða í Listasal. Listamaðurinn verður á staðnum, spjallar við gesti og gangandi um sýninguna og fremur gjörning kl. 15.00.

14:00 – 16:00 KJÚKLINGAFESTIVAL – KJÚKLINGARÉTTIR FYRIR ALLA
Stærstu kjúklinga- og matvælaframleiðendur landsins kynna afurðir sínar og gefa smakk við íþróttamiðstöðina að Varmá. Matur og skemmtun fyrir alla fjölskylduna. Ýmis skemmtiatriði, Biggi Haralds, harmonikkuleikur, Mas Wrestling, uppistand og fleira.

14:00 – 16:00 ÍÞRÓTTAMIÐSTÖÐIN AÐ VARMÁ – AFTURELDING KYNNIR VETRARSTARFIÐ
Kynning á vetrarstarfi Aftureldingar. Fulltrúar deilda verða á svæðinu og kynna starfsemi sína. Aftureldingarbúðin verður opin.

14:00 – 17:00 VÖFFLUKAFFI Í FMOS
Nemendafélag Framhaldsskólans í Mosfellsbæ verður með vöfflukaffi í skólanum og rennur ágóðinn til Reykjadals þar sem Styrktarfélag lamaðra og fatlaðra rekur sumar- og helgardvöl fyrir fötluð börn og ungmenni.
Kammerkór Mosfellsbæjar syngur kl. 14:30.

14:00 – 17:00 STEKKJARFLÖT – HOPPUKASTALAR
Frítt fyrir káta krakka.

14:00 NJARÐARHOLT 10 – MOSFELLINGAR BJÓÐA HEIM
Létt og lifandi tónlist í garðinum í Njarðarholti 10. Allir velkomnir á garðtónleika Í túninu heima.

15:00 – 16:00 STEKKJARFLÖT – HESTAFJÖR
Teymt undir börnum í boði Hestamannafélagsins Harðar.

15:00 – 18:00 OPIÐ HÚS Á REYKJAVEGI 84
Opið hús á leirvinnustofu Helgu Jóhannesdóttur, Reykjavegi 84. Kaffi á könnunni og snapsakynning frá Eimverk Distillery, í stuðlabergsstaupum. Allir hjartanlega velkomnir.

15:00 AKURHOLT 21 – MOSFELLINGAR BJÓÐA HEIM
Siggi Hansa og fjölskylda bjóða upp á tónleika í garðinum í Akurholti. Hljómsveit hússins leikur og fær til sín góða gesti.

16:00 HAMARSTEIGUR 9 – MOSFELLINGAR BJÓÐA HEIM
Hjónin Sigríður Stephensen og Pálmar S. Ólafsson bjóða til tónleika við heimili sitt að Hamarsteigi 9. Þar mun 18 manna „Big-band“ stórsveit Öðlinga spila ásamt söngkonunni Hjördísi Geirsdóttur.

16:00 VARMÁRVÖLLUR – AFTURELDING – MAGNI
Knattspyrnulið Aftureldingar tekur á móti Magna frá Grenivík. Leikur í Íslandsmótinu í knattpyrnu – 2. deild karla.  Baráttuleikur í efri hluta deildarinnar.

16:00 DALATANGI 15 – MOSFELLINGAR BJÓÐA HEIM
Ari Brimar býður til tónleika með Kallabandinu. Bandið skipa: Brynjar Þór Jakobsson gítar, Hjörleifur Ingason hljómborð, Ari Brimar bassi/söngur og Brynjólfur Pétursson trommur. Framreidd verða lög eftir CCR, Santana og fleiri.

16:00 ÁLMHOLT 10 – MOSFELLINGAR BJÓÐA HEIM
Davíð Ólafsson óperusöngvari býður til útitónleika í garðinum heima. Meðal gesta verða Einar Dagur tenór, Hallveig Rúnarsdóttir sópran, Fjölnir Ólafsson baritón og Óperukór Reykjavíkur undir stjórn Garðars Cortes. Davíð og Stefán taka svo fjöldasöng í lokin ásamt Helga Hannessyni píanóleikara.

16:30 KARMELLUKAST Á FLUGVELLINUM TUNGUBÖKKUM

16:30 SKÁLAHLÍÐ – MOSFELLINGAR BJÓÐA HEIM
Útitónleikar í garðinum heima. Tríóið Kókos skemmtir í brekkunni fyrir neðan Skálahlíð. Dægurlög sem allir þekkja.

17:00 – 21:00 GÖTUGRILL Í MOSFELLSBÆ
Íbúar í Mosfellsbæ halda götugrill í vel skreyttum götum bæjarins

21:00 – 23:00 STÓRTÓNLEIKAR Á MIÐBÆJARTORGI
Skemmtun fyrir alla fjölskylduna þar sem Mosfellsbær býður öllum upp á tónleika á Miðbæjartorginu. Kynnar verða þeir Steindi Jr. og Dóri DNA.
Fram koma: Skólahljómsveit Mosfellsbæjar, Jógvan Hansen, Diddú, Stefanía Svavars, Stormsveitin, Stefán Hilmars, Páll Óskar, Biggi Haralds, Áttan og Stuðlabandið.
Rauðakrosshópurinn sinnir gæslu ásamt björgunarsveitinni Kyndli.

23:00 BJÖRGUNARSVEITIN KYNDILL MEÐ FLUGELDASÝNINGU

22:30 – 01:00 EINAR ÁGÚST Á HVÍTA RIDDARNUM
Hinn eini sanni Einar Ágúst mætir með gítarinn og syngur fyrir hressa sveitunga. Frítt inn.

23:30 – 04:00 STÓRDANSLEIKUR MEРPÁLI ÓSKARI AÐ VARMÁ

 

SUNNUDAGUR 27. ÁGÚST

7:00 – 22:00 HLÍÐAVÖLLUR – FRÍTT Í GOLF
Golfklúbbur Mosfellsbæjar býður Mosfellingum að spila frítt á Hlíðavelli. Bóka þarf rástíma á golf.is eða í afgreiðslu GM og er nauðsynlegt að viðkomandi hafi þekkingu og getu til að leika á vellinum og fari eftir öllum þeim reglum sem þar gilda.

8:00 – 17:00 MOSFELLSBAKARÍ
Mosfellsbakarí í hátíðarskapi alla helgina og býður gestum og gangandi upp á  ilmandi  ferskt brauð, bakkelsi og frábæra stemningu. Litríkar hverfamúffur, hátíðarkaka og frábærar hátíðarvöfflur.

9:00 – 17:00 ÍÞRÓTTASVÆÐIÐ Á TUNGUBÖKKUM
Fótboltamót Aftureldingar og Weetos, 6. og 7. flokkur karla og kvenna.

13:00 – 17:00 HÚSDÝRAGARÐURINN Á HRAÐASTÖÐUM Í MOSFELLSDAL
Geitur, refur, kettlingar, grís, kálfur, hænur, kanínur, naggrísir og mörg önnur húsdýr. Aðgangur 600 kr.

11:00 GUÐSÞJÓNUSTA Í MOSFELLSKIRKJU
Fögnum og höldum hátíð. Guðsþjónusta í dal skáldanna, Mosfellskirkju í Mosfellsdal kl.11:00. Sr. Arndís Bernhardsdóttir Linn þjónar fyrir altari og prédikar. Karl Tómasson, Jóhann Helgason og Guðmundur Jónsson annast tónlistarflutning ásamt Kjartani Ognibene organista og kirkjukór Lágafellskirkju. Hjartanlega velkomin!

14:00 – 17:00 STEKKJARFLÖT – HOPPUKASTALAR
Frítt fyrir káta krakka.

14:00 HLÉGARÐUR – HÁTÍÐARDAGSKRÁ
Umhverfisnefnd veitir umhverfisviðurkenningar Mosfellsbæjar 2017.
Útnefning bæjarlistarmanns Mosfellsbæjar 2017.
Verðlaunaafhending vegna ljósmyndasamkeppni í tilefni 30 ára afmælis Mosfellsbæjar.
Karlakórinn Stefnir flytur nokkur lög. Heitt á könnunni og allir velkomnir.

16:00 GLJÚFRASTEINN- STOFUTÓNLEIKAR
Tónlistarkonan Sóley flytur lög af nýjustu plötu sinni, Endless Summer, í bland við gömul lög. Meðleikarar hennar verða Albert Finnbogason á bassa og Katrín Helga Andrésdóttir á hljómborð. Aðgangseyrir: 2.000 kr.

17:00 BESTA SÝNING ÁRSINS Í BÆJARLEIKHÚSINU
Afrakstur fjögurra vikna námskeiðs hjá Leikgleði í Bæjarleikhúsinu í Mosfellsbæ. Söngleikur sem var saminn af leikhópnum í samstarfi við Elísabetu Skagfjörð. Miðaverð 1.000 kr. Miðapantanir í síma 5667788.

Haldið er upp á 30 ára afmæli Mosfellsbæjar um þessar mundir. Af því tilefni hefur bæjarráð Mosfellsbæjar samþykkt að framvegis standi íbúum Mosfellsbæjar til boða ókeypis bókasafnskort.
Markmiðið er að hvetja til lesturs og minna á bókmenntaarf Mosfellsbæjar. Í bænum er öflugt og vel sótt bókasafn sem þjónar bæjarbúum og hefur þróast með bænum í gegnum tíðina. Saga Bókasafns Mosfellsbæjar nær aftur til ársins 1890 með stofnun Lestrarfélags Lágafellssóknar og er saga þess samofin þróun byggðar í Mosfellsbæ.
Ráðist í hönnunarsamkeppni
Tilkynnt var um þessar afmælisgjafir á hátíðardagskrá í Hlégarði sem fram fór á afmælisdaginn 9. ágúst. Haraldur Sverrisson bæjarstjóri kynnti auk þessa nýjar stefnuáherslur og framtíðarsýn fyrir starfsemi Mosfellsbæjar. Hún verður kynnt nánar fyrir íbúum á næstunni.
Bæjarfulltrúar kynntu einnig að ráðist verði í hönnunarsamkeppni vegna merkinga við bæjarmörk Mosfellsbæjar og keypt leiktæki í Ævintýragarðinn sem er staðsettur í Ullarnesbrekkum. Garðurinn hefur verið í uppbyggingu síðustu 10 ár og var einmitt afmælisgjöf til bæjarins á tuttugu ára afmæli hans. Unnið hefur verið ötullega að gróðursetningu og uppbyggingu síðustu ár. Í Ævintýragarðinum er hundagerði, frisbígolfvöllur, bekkir og stígar og leiktæki fyrir börn.

Gyða Vigfúsdóttir leikskólastjóri lætur af störfum á Reykjakoti í ágúst eftir að hafa starfað þar í rúm 19 ár.

Leikskólinn Reykjakot er 70 barna leikskóli og tók til starfa í mars 1994. Skólinn er staðsettur í náttúrulegu umhverfi svo stutt er að fara með börnin í fjallgöngur, berjamó eða með nesti í Reykjalundarskóg.
Gyða Vigfúsdóttir leikskólastjóri hóf störf á Reykjakoti árið 1998. Hún lætur nú af störfum sökum aldurs og segir framtíðina óráðna en það sem hún taki sér fyrir hendur verði örugglega eitthvað skemmtilegt.

Gyða er fædd í Reykjavík 1. júlí 1950. Foreldrar hennar eru þau Inga Jenný Guðjónsdóttir, húsmóðir og handavinnukona, og Vigfús Árnason, hárskeri og kennari. Gyða á tvö systkini, þau Grétu og Árna Guðjón.

Laugavegurinn var stór ævintýraveröld
„Ég ólst upp í Laugarneshverfinu og síðar á Laugaveginum. Laugarneshverfið bauð upp á mikið frelsi fyrir börn og þar var margt hægt að bralla þó maður væri ungur að árum. Ég man að fyrsta barnapíustarfið mitt var að passa hana Láru litlu þó ég væri bara 6 ára og hún 2 ára.
Laugavegurinn var í mínum huga stór ævintýraveröld þar sem alltaf var eitthvað spennandi að gerast. Þegar ég var 10 ára flutti fjölskyldan í Kópavoginn, pabbi hafði byggt þar hús og það má segja að við höfum verið nokkurs konar frumbyggjar.“

Fékk þjálfun í kjötvinnslu
„Ég fór í sveit 8 ára að Flatey á Mýrum í Hornafirði. Það var mitt annað heimili öll sumur þangað til ég var 16 ára. Þá tók ég mér frí eitt sumar til að vinna í Kjötbúðinni Borg. Það var mjög lærdómsríkur tími þar sem ég fékk frábæra þjálfun í kjötvinnslu.
Þegar ég lít til baka þá man ég sérstaklega vel eftir bók sem mér var gefin, Börn eru besta fólk, eftir Stefán Jónsson. Þar kom staðfestingin á því að börn eru fólk en ekki bara börn. Ég lít alltaf á þá bók sem fyrsta skrefið í áttina að því að verða leikskólakennari.“

Öðlaðist mikla reynslu á Silungapolli
„Ég byrjaði mína skólagöngu í Laugarnesskóla, þar sem mér þótti gott að vera. Síðan lá leiðin í Austurbæjarskóla, Kópavogsskóla og að lokum í verknám í Lindargötuskóla. Ég held að mér sé óhætt að segja að skólagangan hafi verið svona upp og ofan, enda höfðum við Ásta vinkona nóg að gera við barnapössun.
Eftir útskrift fórum við að vinna á barnaheimilinu að Silungapolli og unnum þar í þrjú ár. Þar öðlaðist ég mikla reynslu og kynntist vel þeim erfiðleikum sem fátækir foreldrar stóðu frammi fyrir á þeim tíma.“

Gestur hjá bankastjórum bæjarins
Gyða giftist Heiðari Woodrow Jones árið 1968 aðeins 18 ára gömul. Þau eignuðust tvö börn, Karenu Jenný og Vigfús Þór. Gyða og Heiðar skildu árið 1979 eftir 11 ára hjónaband.
„Eftir skilnaðinn má segja að nýr kafli hafi hafist í lífi mínu. Til að styrkja fjárhaginn fór ég að vinna í Stáliðjunni þar sem ég saumaði áklæði utan um stóla.
Örlögin höguðu því svo til að nokkru síðar flutti ég til Seyðisfjarðar þar sem ég tók þátt í að reka steypustöð. Mitt hlutverk fólst aðallega í því að sjá um fjármál og var ég tíður gestur hjá bankastjórum bæjarins.“

Eignaðist marga vini á Tjaldanesi
„Eftir Seyðisfjarðarævintýrið flutti ég aftur suður og settist á skólabekk í Fóstruskóla Íslands, enda hef ég allt frá barnæsku haft mikinn áhuga á börnum. Eftir útskrift 1987 fór ég að vinna á skóladagheimilinu Ástúni. Um svipað leyti kynntist ég Knúti Birgissyni eiginmanni mínum. Hann starfar nú sem forstöðumaður á Velferðarsviði Reykjavíkurborgar. Við giftum okkur 1992 og höfðum skömmu áður flutt í Mosfellsbæinn.
Á þessum tíma hafði ég fengið vinnu sem deildarstjóri og varð síðar forstöðumaður Tjaldanesheimilisins í Mosfellsdal. Ef það er eitthvað sem mér finnst jafn gefandi og að vinna með börn, er það fatlað fólk. Ég eignaðist marga vini á Tjaldanesi og hitti suma þeirra reglulega, þá eru fagnaðarfundir.“

Lánsöm að hafa frábært starfsfólk
„Ég byrjaði að vinna á Reykjakoti árið 1998, sem þá var undir stjórn Maríu skólasystur minnar. Hún hafði innleitt Hjallastefnuna sem Margrét Pála er höfundur að. Þegar María hætti árið 2000 tók Margrét Pála við stjórn skólans og ég varð aðstoðarleikskólastjóri. Ég lærði mikið af Möggu Pálu og í gegnum árin höfum við hist reglulega og borið saman bækur okkar.
Ég tók við leikskólastjórastöðunni árið 2002. Á þeim árum sem ég hef stjórnað skólanum hef ég verið svo lánsöm að hafa alltaf frábæru starfsfólki á að skipa, sem hefur lagt sitt af mörkum til að gera Reykjakot að framsæknum vinnustað.“

Prjónuðum fyrir heimilislausa
„Við höfum í sameiningu tekist á við stór verkefni eins og stofnun Varmárdeildarinnar og Leirvogstunguskóla og eins höfum við unnið mörg þróunarverkefni.
Samfélagsverkefnin eru nokkur, t.d. prjónuðum við fyrir Mæðrastyrksnefnd og heimilislausa. Við tókum þátt í verkefni með leikskólanum að Hlaðhömrum sem við kölluðum Jólakassar fyrir börn á Íslandi. Síðast en ekki síst hafa Reykjakotssystur farið í námsferðir til útlanda.“

Allur matur eldaður frá grunni
„Nýjustu verkefnin okkar eru ekki síður spennandi. Heilsueflandi leikskóli á vegum Embættis landlæknis er verkefni, sem aðstoðarleikskólastjórinn minn, Hildur Helga Sævarsdóttir, sér um.
Það var mikill happafengur að fá hann Einar H. Ólafsson til starfa í eldhúsið okkar. Hann er mikill eldhugi og eftir að hann byrjaði var hafist handa við að endurskoða alla matseðla, hvort þeir uppfylltu hollustuþarfir barnanna. Ég tók þá ákvörðun að leyfa sköpunarkrafti og athafnaþrá Einars að njóta sín. Í dag er allur matur eldaður frá grunni og hugað að hollustu.
Að síðustu má nefna verkefni sem heitir Garðrækt með Ömmu náttúru og er í umsjá Jóhönnu B. Magnúsdóttur.“

Framtíðin óráðin
Nú er komið að tímamótum og lætur Gyða af störfum í ágúst sökum aldurs. „Ég hef átt gott og farsælt samstarf við stjórnsýslu bæjarins og mig langar að nota tækifærið og þakka sérstaklega Birni Þráni fyrir allan hans stuðning og traust sem hann hefur sýnt mér alveg frá upphafi.
Ekki má gleyma að þakka öllum dásamlegu börnunum sem hafa verið hjá okkur í gegnum tíðina því án þeirra væri Reykjakot ekki sá yndislegi staður sem hann er. Við fylgjumst grannt með afrekum þeirra í lífinu og erum sannfærð um að þegar eitthvert þeirra skarar fram úr er það allt uppeldinu á Reykjakoti að þakka,“ segir Gyða og brosir. „Ég er enn sannfærðari en nokkru sinni að börn eru besta fólk.
Framtíð mín er óráðin en það sem ég tek mér fyrir hendur verður örugglega eitthvað skemmtilegt.“

Mosfellingurinn 29. júní 2017
Myndir og texti: Ruth Örnólfs

Mosfellingar eru nú orðnir 10.000 talsins og var það ung og stækkandi fjölskylda sem flutti í Skeljatanga sem kom Mosfellsbæ yfir þennan tímamótaáfanga.
Daðey Albertsdóttir og Tómas Guðmundsson fluttu í Mosfellsbæ í síðasta mánuði og eiga þriggja vikna óskírðan dreng.
Fjölskyldan flutti í Mosfellsbæ í byrjun maí en Daðey kemur úr Árbænum en Tómas úr Dalasýslunni.
„Okkur langaði að komast á stað þar sem stutt er í náttúruna en við erum einnig með hund á heimilinu. Eitt af skilyrðunum var líka að við yrðum í göngufæri í sundlaug.“

Haraldur Sverrisson bæjarstjóri færði fjölskyldunni blóm og gjafir í tilefni þessa merka áfanga en íbúafjöldi Mosfellsbæjar fer ört vaxandi og hefur tvöfaldast á síðastliðnum 20 árum. Þann 9. ágúst næstkomandi verða svo liðin 30 ár frá því Mosfellsbær fékk kaupstaðarréttindi. Árið 1987 var nafni sveitarfélagsins breytt úr Mosfellssveit í Mosfellsbæ. Íbúar á þeim tíma voru um 3.900 talsins. Í dag eru íbúar orðnir 10.000 talsins og er Mosfellsbær sjöunda stærsta sveitarfélag landsins. Haldið verður upp á afmælið í ágúst með fjölbreyttri dagskrá frá 9. ágúst og fram yfir bæjarhátíðina Í túninu heima sem fram fer í lok ágúst.

 

Krakkarnir í 8. bekk Lágafellsskóla brölluðu ýmislegt síðustu skóladaga fyrir sumarfrí.
Meðal annars fóru nemendurnir í göngu upp á Úlfarsfellið. Hlynur Bergþór Steingrímsson, sem er í hjólastól, á greinilega góða vini í sínum bekk því þeim fannst ómögulegt að Hlynur kæmist ekki með.
Þeir gerði sér því lítið fyrir og rifu Hlyn upp úr stólnum og báru hann upp á topp. Strákarnir voru sjö talsins og skiptust á að bera Hlyn upp með skipulögðum hætti. Í mesta brattanum hjálpuðust þeir svo að til að ná takmarkinu.
Frábært framtak hjá félögunum sem fengu mikið lof fyrir. Frumkvæðið var þeirra og allir í skýjunum eftir vel heppnaða fjallaferð.
Á myndinni má sjá Hlyn og hans traustu vini, Ísak Tuma, Ísak Mána, Anton, Hallgrím, Guðmund, Eyþór og Kristófer Mána áður en lagt var í gönguna.

Útskriftarhátíð Framhaldsskólans í Mosfellsbæ fór fram laugardaginn 27. maí við hátíðlega athöfn.
Að þessu sinni voru alls þrjátíu og þrír nemendur brautskráðir, sjö af félags- og hugvísindabraut og tíu af náttúru­vísindabraut. Af opinni stúdentsbraut brautskráðust fjórtán nemendur. Einnig brautskráðust tveir nemendur af starfsbraut skólans.
Útskriftarnemendum voru veittar viðurkenningar fyrir góðan námsárangur:
Arnar Franz Baldvinsson fékk viðurkenningu fyrir góðan árangur í kvikmyndafræði og Valgeir Bjarni Hafdal fékk viðurkenningu fyrir góðan árangur í umhverfisfræði. Fyrir góðan árangur í sálfræði fékk Björn Bjarnarson viðurkenningu.
Fyrir góðan árangur í dönsku, íslensku, spænsku, og náttúrufræði fékk Kristján Davíð Sigurjónsson viðurkenningar. Viðurkenningar fyrir góðan árangur í dönsku og íslensku fékk Rakel Anna Óskarsdóttir. Mosfellsbær veitti jafnframt Kristjáni Davíð viðurkenningu fyrir hæstu einkunn á stúdentsprófi.