Þann 24. mars héldu UMFUS félagar kóte­lettu-styrktarkvöld líkt og í fyrra fyrir sína menn í Ungmennafélaginu ungir sveinar.
Boðið var upp á dýrindis kótelettur framreiddar af Ragnari Sverrissyni hjá Höfðakaffi. Aðrir styrktaraðilar voru Víking, Golfklúbbur Mosfellsbæjar og Norðlenska. Umfus vill koma á framfæri þökkum til allra sem styrktu þetta góða málefni með nærveru sinni, framlögum og aðstoð.
Í ár var ákveðið að styrkja Þorstein Atla Gústafsson, sem er tæplega 6 ára gamall sprækur og glaður Mosfellingur, og fjölskyldu hans. Foreldrar hans eru Sóley Erla Ingólfsdóttir og Gústaf Helgi Hjálmarsson. Þosteinn Atli á tvo bræður, Ingólf Orra og Þorkel Mána.

Notar augun til tjáningar
Þorsteinn Atli er með með mjög sjaldgæfa stökkbreytingu í geni sem heitir SCN8A. Hann er algjörlega einstakur því aðeins eru greind um 100 tilfelli í heiminum. Hann er flogaveikur og hreyfihamlaður auk þess sem hann er með þroskaskerðingu. Hann tjáir sig ekki á hefðbundin hátt en hann notar augun til tjáningar.
Í Klettaskóla þar sem Þorsteinn Atli stefnir á að hefja nám í haust hefur verið í gangi þróunarverkefni með augnstýribúnað sem heitir Tobii og hefur reynst vel fyrir þá sem nota óhefðbundnar tjáskiptaleiðir.
Því miður er þessi búnaður ekki niðurgreiddur af tryggingum. Til þess að Þorsteinn Atli geti lært að nýta sér svona tæki er nauðsynlegt að hafa slíkan búnað heima líka. Það er því von UMFUS félaga að þetta framlag komi að góðum notum.

Miðsvæðis á Hlíðavelli er nú verið að leggja lokahönd á glæsilega íþróttamiðstöð Golfklúbbs Mosfellsbæjar.
Fyrir ári síðan, þann 1. apríl 2016, tóku ungir kylfingar fyrstu skóflustunguna og í dag er uppbygging á húsinu á lokasprettinum.
Á Hlíðavelli hefur átt sér stað mikil uppbygging á 18 holu golfvelli frá árinu 2004.
„Það eru miklir uppgangstímar hjá okkur og nýtt hús mun gjörbylta allri aðstöðu golfklúbbsins,“ segir Kári Tryggvason nýr formaður GM. Klúbburinn telur um 1.000 manns í dag og fer ört fjölgandi.

Veitingasala og veislusalur
Íþróttamiðstöðin verður 1.200 fm á tveimur hæðum og mun hýsa alla skrifstofu-, félags- og æfingaaðstöðu klúbbsins til framtíðar. Þá verður tekinn í notkun salur á efri hæð hússins sem rúma mun 120-200 manns. Þar verður rekin veitingasala og veislusalur leigður út.
„Hér eiga allir Mosfellingar eftir að njóta góðs af góðri aðstöðu og geta mætt hér í kaffi eða mat. Útsýnið héðan er frábært og fellur húsið vel inn í landslagið. Stefnt verður að því að svæðið verði tengt inn á stígakerfi Mosfellsbæjar og munu þar skapast mörg tækifæri fyrir tengingar við fleiri íþróttir og útvist í hjarta Mosfellsbæjar.“

Æfingaaðstaða fyrir börn og unglinga
„Stefnt er að því að fyrsta áfanga verksins ljúki nú í næsta mánuði með opnun efri hæðarinnar. Neðri hæðin með búnings- og æfingaaðstöðu verður svo vonandi tekin í notkun fyrir veturinn.
Á sumrin stunda um 200 börn golf og hefur vantað verulega upp á aðstöðu til æfinga yfir vetrartímann. Þetta verður því kærkomið fyrir okkar ungu og efnilegu kylfinga. Þá gefst möguleiki á því að gera golf að heilsársíþrótt í Mosfellsbæ við bestu mögulegar aðstæður.“

Ómetanlegir sjálfboðaliðar
„Hér erum við full eftirvæntingar og sjálfboðaliðar hafa unnið hörðum höndum á síðustu mánuðum undir eftirliti verktaka hússins. Allt gengur samkvæmt áætlun og tilhlökkunin er mikil.
Félagsandinn er mjög góður og án þessara öflugu sjálfboðaliða sem lagt hafa á sig hundruð vinnustunda væri þetta einfaldalega ekki hægt,“ segir Kári að lokum.
Gamli golfskálinn neðan við Súluhöfða mun víkja ásamt æfingasvæðinu og þar mun rísa íbúðagata.

Sannkölluð bikarhelgi er framundan í blakinu en bæði úrvalsdeildarlið Aftureldingar í blaki munu leika í undanúrslitum á föstudaginn 7. apríl. Stelpurnar eiga titil að verja en þetta er í fyrsta skipti sem strákarnir komast í Laugardalshöllina.
Stelpurnar leika gegn Þrótti Nes. kl. 14 á föstudag og Strákarnir spila gegn Vestra Ísafirði kl. 20.
Markmið beggja liða er að leika til úrslita en úrslitaleikirnir fara fram á sunnudeginum í Laugardalshöll. Það er því mikilvæg helgi framundan hjá blakdeildinni og því er stuðningur Mosfellinga og Aftureldingarfólks gífurlega mikilvægur. Miðasala á úrslitahelgina er í fullum gangi og hægt er að nálgast miða í afgreiðslunni í íþróttamiðstöðinni að Varmá.
Úrslitaleikirnir á sunnudaginn í Laugardalshöllinni hefjast með úrslitaleik karla kl. 14:00 og konurnar leika síðan kl. 16:00.

Íslandsmeistaratitill kvenna í húfi
Úrvalsdeildarlið kvenna er búið að tryggja sér réttinn til að leika til úrslita um Íslandsmeistaratitilinn eftir öruggan sigur á Þrótti Neskaupsstað í tveimur leikjum. Fyrri leikurinn sem var leikinn að Varmá vannst örugglega 3-0 og seinni leikinn í Neskaupsstað unnu stelpurnar 3-1.
Úrslitakeppnin hefst þann 19. apríl og leika stelpurnar við HK, en þessi lið hafa verið í sérflokki í deildinni í vetur. Fyrsti leikurinn fer fram í Fagralundi en fyrsti heimaleikur Aftureldingar er 21. apríl. Vinna þarf þrjá leiki til að landa titlinum og alveg ljóst að úrslitarimman verður jöfn og spennandi eins og leikirnir í vetur.

Ársreikningur Mosfellsbæjar fyrir árið 2016 var lagður fram í bæjarráði á miðvikudag og jafnframt tekin til fyrri umræðu í bæjarstjórn.
Tekjur ársins námu alls 9.105 milljónum, launakostnaður 4.151 milljónum og annar rekstrar­kostnaður 3.640 milljónum. Framlegð er því 1.314 milljónir en að teknu tilliti til fjármagnsliða er rekstrarafgangur A og B hluta 380 milljónir.
Veltufé frá rekstri er 1.109 milljónir eða rúmlega 12% af tekjum. Eigið fé í árslok nam 4.681 milljón og eiginfjárhlutfall 29,4%. Skuldaviðmið er 108% sem er vel innan þess 150% hámarks sem kveðið er á um í lögum.

Betra en áætlanir gerðu ráð fyrir
Rekstrarniðurstaðan er talsvert betri en gert var ráð fyrir í fjárhagsáætlun ársins. Það má helst skýra með hærri óreglulegum tekjum vegna lóðasölu og byggingarréttargjöldum og lægra verðlagi en gert var ráð fyrir, sem hefur áhrif á fjármagnsliði. Þetta kemur fram í tilkynningu frá Mosfellsbæ.
Fram undan er áframhaldandi uppbygging innviða í Mosfellsbæ. Á síðustu árum hefur verið verið lögð áhersla á uppbyggingu framhaldsskóla, íþróttahús, hjúkrunarheimili og stórbætt aðstaða fyrir félagsstarf eldri borgara.
Stærsta verkefnið sem sveitarfélagið hefur með höndum nú er bygging Helgafellsskóla. Það er leik- og grunnskóli í nýbyggingarhverfi í hraðri uppbyggingu sem áætlað er að muni kosta um 3.500 milljónir á næstu tíu árum.

Traustur og ábyrgur rekstur
„Það hefur verið mikil áskorun að reka sveitarfélag síðustu ár. Það má segja að við höfum verið stöðugt að endurskoða reksturinn frá árinu 2008 í þeirri viðleitni að láta enda ná saman. Það er því ánægjulegt að á þessum tímapunkti, þegar svo mikil uppbygging á sér stað að við skulum sjá árangur þess erfiðis,“ segir Haraldur Sverrisson bæjarstjóri.
„Við viljum leggja áherslu á traustan og ábyrgan rekstur og það hafa allir starfsmenn hjá Mosfellsbæ snúið bökum saman í því verkefni. Fyrir það ber að þakka.“

Rúmur helmingur til fræðslumála
Fræðslumál eru langstærsti málaflokkurinn í rekstri sveitarfélagsins en til hans runnu 3.604 milljónir eða 52% skatttekna. Til félagsþjónustu var veitt 1.382 milljónum og eru þar meðtalin málefni fatlaðs fólks.
Íþrótta- og tómstundamál eru þriðja stærsta verkefni bæjarins en til þeirra mála var varið um 803 milljónum. Samtals er því 83% skatttekna Mosfellsbæjar varið til fræðslu-, félagsþjónustu, íþrótta- og tómstundamála.

>> Íbúar Mosfellsbæjar voru 9.783 um síðustu áramót og hafði fjölgað um 3% á milli ára sem er í samræmi við spár þar um. Gert er ráð fyrir að íbúafjöldinn fari yfir 10 þúsund á þessu ári. Mosfellsbær er sjöunda fjölmennasta sveitarfélag landsins og þar störfuðu 619 starfsmenn í 509 stöðugildum á árinu 2016.

Í ljósi aðstæðna hefur verið ákveðið að grípa til þess ráðs að gefa egg í Mosfellsbæ í dag. Hægt verður að næla sér í eggjabakka á Teigi þar sem Brúnegg voru til húsa.

„Við erum með 12.000 egg sem við annars þyrftum að farga. Í allri þessari umræðu um matarsóun fannst okkur ekki annað koma til greina en að koma eggjunum okkar í gagnið. Eggin eru í góðu standi og renna ekki út fyrr en í lok apríl. Við ætlum því að vera með opið á lagernum í dag, laugardag kl. 14-16 þar sem fólk getur náð sér í ókeypis eggjabakka,“ segja forsvarsmenn Brúneggja.

Tekið skal fram að afhentir verða hámark tveir stórir eggjabakkar á mann, meðan birgðir endast.

Eins og alþjóð veit fór fyrirtækið flatt eftir Kastljós-umfjöllunina fyrir jólin og situr því uppi með þennan mikla lager. „Við höfum verið hér í Mosfellsbæ í fjölda ára í sátt við Guð og menn og viljum því þakka fyrir í bili með þessu uppátæki í dag.“

 

Teigur er við Reykjaveg í Mosfellsbæ. Sjá kort hér að neðan…

Atli Guðlaugsson skólastjóri Listaskóla Mosfellsbæjar hefur verið viðloðandi tónlist í 55 ár.

Listaskóli Mosfellsbæjar var stofnaður 1. febrúar 2006 en skólinn saman­stendur af leikfélagi, myndlistarskóla, skólahljómsveit og tónlistardeild en allar undirstofnanir skólans nema tónlistardeildin eru reknar sem sjálfstæðar einingar. Markmið Listaskólans er að samþætta starfsemi þessara stofnana og tryggja tengsl þeirra á milli. Þá er lögð áhersla á að fléttuð verði saman starfsemi skólans við grunn- og leikskóla.
Hlutverk skólans er að auka tengsl við aðila utan stofnana bæjarins, ekki síst starfandi listamenn. Það má því segja að Listaskóli Mosfellsbæjar sé regnhlíf yfir fjölbreytta listastarfsemi í Mosfellsbæ.

Atli er fæddur í heimahúsi í Hafnarfirði 10. nóvember 1953. Foreldrar hans eru þau Kamma Karlsson ritari og Guðlaugur Atlason bókbandsmeistari. Atli á fjórar yngri systur, Rósu Láru, Huldu Guðbjörgu, Svölu og Guðlaugu Berglindi.
Atli ólst upp í þriggja hæða húsi við Köldukinn í Hafnarfirði. Lára móðuramma hans bjó á efstu hæðinni og hjá henni átti hann sitt eigið herbergi enda mikill ömmustrákur.

Með ólæknandi hestadellu
„Það var mjög stutt fyrir okkur að fara út í náttúruna og áttum við amma margan göngutúrinn upp eftir Kaldárselsveginum. Þar voru margir frístundabændur með hesta sína og kindur. Var ég gagntekinn af hrifningu á þessum skepnum og dreymdi snemma um að verða bóndi.
Ég stundaði fótboltann í FH fram undir fermingu, en var svo í sveit á sumrin frá 11-18 ára aldurs. Frá þeim tíma hef ég verið með ólæknandi hestadellu og fékk minn fyrsta hest í sumarkaup þegar ég var 15 ára.
Ég hóf skólagönguna í Lækjarskóla en fluttist yfir í Öldutúnsskóla 8 ára. Eftir fermingu lá svo leiðin í Flensborgarskólann þaðan sem ég lauk landsprófi. Árið 1974 útskrifast ég sem stúdent frá Menntaskólanum í Reykjavík.“

Ný lög tóku gildi
Atli hlaut tónlistaruppeldi sitt að stórum hluta í Tónlistarskóla Hafnarfjarðar og Lúðrasveit Hafnarfjarðar en lauk blásarakennaraprófi frá Tónlistarskólanum í Reykjavík 1978, með trompet sem aðalhljóðfæri. Veturinn 1978-79 kenndi hann við Tónlistarskólann í Hafnarfirði og Tónlistarskóla Seltjarnarness en þar stjórnaði hann líka skólahljómsveitinni.
„Haustið 1979 var ég búinn að fá skólavist í háskóla í Bandaríkjunum þar sem stóð til að læra útsetningar, upptökutækni og hljómsveitarstjórn. Á síðustu stundu tóku ný lög gildi í Bandaríkunum sem gengu út á það að útlendingar áttu að víkja fyrir minnihlutahópum og þar með missti ég af þessu tækifæri.“

Tuttugu ár á Norðurlandi
„Ég fékk vinnu á Siglufirði og ætlaði að vera þar í eitt ár en árin á Norðurlandi urðu tuttugu. Á þeim árum stjórnaði ég m.a. Tónlistarskólanum á Akureyri í rúm 5 ár og stofnaði og stjórnaði Tónlistarskóla Eyjafjarðar í 9 ár. Ég var um árabil 1. trompet­leikari í blásarakvintett Tónlistarskólans á Akureyri og í Sinfóníuhljómsveit Norðurlands. Auk þess stjórnaði ég skólalúðrasveitum í 20 ár, Lúðrasveit Akureyrar í 18 ár, hljómsveit Félags harmonikkuunnenda við Eyjafjörð í 12 ár, Karlakór Akureyrar í 5 ár og Karlakór Eyjafjarðar í 3 ár, svo maður hefur kom víða við.“

Ráðgjafi í tónlistarfræðslu
„Eftir að ég flutti suður árið 1999 var ég kennari og lúðrasveitarstjórnandi á Akranesi í tvö ár, skólastjóri í Tónskóla Eddu Borg í eitt ár, ráðgjafi í tónlistarfræðslu í Fræðslumiðstöð Reykjavíkur í tvö ár og hef frá 2004-2006 stjórnað Tónlistarskóla Mosfellsbæjar og Listaskóla Mosfellsbæjar frá stofnun.
Hlutverk tónlistardeildarinnar er að efla almenna tónlistarfræðslu og gera öllum kleift að stunda nám í hljóðfæraleik og söng sem þess óska. Í skólanum er kennt á öll helstu hljóðfæri, auk söngnáms, en kenndar eru 17 námsgreinar við skólann. Nemendur við skólann eru 210 og kennarar 23.
Ég stjórnaði Karlakórnum Stefni í sjö ár en í dag stjórna ég Grundartangakórnum og Sprettskórnum. Ég söng líka og stjórnaði um árabil karlakvintettinum Galgopum í Eyjafirði og var fjögur ár í Borgarkvartettinum.“

Kindurnar í sumarbeit í Kjósinni
„Við hjónin kynntumst 1973 en gengum í það heilaga 8. júlí 1978. Kona mín, Halldóra Bjarnadóttir, er hjúkrunarfræðingur og eigum við tvo syni, Bjarna sem er fæddur 1983 og Guðlaug fæddan 1985. Bjarni á þrjú börn en kona hans er Telma Dögg Ólafsdóttir. Guðlaugur á tvö börn en kona hans er Ásta María Þrastardóttir. Fjölskyldurnar búa í þremur húsum á Tindum á Kjalarnesi.
Við erum hobbýbændur, með hesta og kindur. Því fylgir að sjálfsögðu smalamennska á haustin því kindurnar okkar eru í sumarbeit í Kjósinni.“

Syngur í tríói með sonum sínum
Frá árinu 2003 hefur Atli sungið í tríói með sonum sínum sem heitir Tindatríóið. Synir hans hafa báðir lokið framhaldsprófi í söng frá Listaskóla Mosfellsbæjar og hófu söngferilinn 16 ára gamlir með Karlakórnum Stefni.
Atli hefur einnig samið mikið fyrir karlakóra og ýmsa sönghópa, bæði lög og texta auk þess sem hann hefur verið að útsetja.
Hann hefur einnig verið ritari og formaður í Samtökum tónlistarskólastjóra og varaformaður í Félagi tónlistarskólakennara og stjórnarmaður í Kennarasambandi Íslands.

Á leið til Eyja með barnabarninu
„Helstu áhugamál okkar Halldóru snúa að fjölskyldunni og dýrunum svo og ferðalögum innanlands og utan. Ég hef verið duglegur að ferðast með Topphestum með ferðamenn á sumrin og þá verið kúskur á daginn og kórstjóri á kvöldin. Þá er trompetinn yfirleitt með í för.
Síðastliðið sumar fór ég norður og suður Kjöl sem aðstoðarmaður með Hjalta og Ásu á Kjóastöðum sem hafa ferjað þúsundir túrista fyrir Íshesta í gegnum árin. Þá höfum við hjónin farið í marga góða reiðtúra með félögum í Sprettskórnum. Við eigum líka hlut í jörð við norðanverðan Breiðafjörð, þar sem sumrin eru yndisleg.
Elsta barnabarnið æfir fótbolta með Aftureldingu og er búinn að semja um það við afa sinn að hann fylgi honum á mót í Vestmannaeyjum í sumar og að sjálfsögðu gerir afi það,“ segir Atli að lokum er við kveðjumst.

Mosfellingurinn 16. mars 2017
Myndir og texti: Ruth Örnólfs

Forseti Íslands afhenti á dögunum Framhaldsskólanum í Mosfellsbæ Gulleplið, viðurkenningu fyrir framúrskarandi starf á sviði heilsueflingar á framhaldsskólastiginu.
Í skólanum hefur markvisst verið unnið að bættri heilsu, bæði á sál og líkama. Hátíðleg athöfn fór fram í skólanum þann 1. mars og að henni lokinni kynnti forsetinn sér starfsemi og húsnæði skólans í fylgd stjórnenda hans.
Framhaldsskólinn í Mosfellsbæ var stofnaður árið 2009 og er nú til húsa í sérhannaðri byggingu sem hefur víða vakið athygli og fer að ýmsu leyti óhefðbundnar og framsæknar leiðir í námi og kennslu. Gulleplið hefur verið afhent frá árinu 2011. Átak þetta um heilsueflingu innan framhaldsskólanna þykir hafa gefið góða raun en á síðastliðnu ári hefur Framhaldsskólinn í Mosfellsbæ lagt áherslu á gerðrækt.