Vinningshafar í heilsueflandi samfélagsmiðlaleik

Hér má sjá vinningshafa ásamt Ólöf Kristínu Sívertsen, verkefnisstjóra Heilsueflandi samfélags í Mosfellsbæ. Verðlaunaafhendingin fór fram á Fyrirmyndardeginum sl. laugardag. Frá vinstri: Eva María (3. sæti), Elsa Björg (aukaverðlaun), Ólöf, Elmar (4. sæti), Dagbjört Lára (1. sæti) og Tjörvi (2. sæti).

Hér má sjá vinningshafa ásamt Ólöf Kristínu Sívertsen, verkefnisstjóra Heilsueflandi samfélags í Mosfellsbæ. Verðlaunaafhendingin fór fram á Fyrirmyndardeginum sl. laugardag. Frá vinstri: Eva María (3. sæti), Elsa Björg (aukaverðlaun), Ólöf, Elmar (4. sæti), Dagbjört Lára (1. sæti) og Tjörvi (2. sæti).

Heilsueflandi samfélag í Mosfellsbæ stóð á dögunum fyrir samfélagsmiðlaleik fyrir nemendur í 8.-10. bekk í grunnskólum bæjarins.
Tilgangur verkefnisins var sá að vekja ungmennin til umhugsunar um mikilvægi og ábyrgð á eigin heilsu og vellíðan. Jafnframt var mikilvægt að koma því til skila að þótt næring og hreyfing séu mjög mikilvægir þættir þegar kemur að heilsueflingu þá skipti félagslegi þátturinn ekki síður máli, það að vera með fólki og eiga góða vini og fjölskyldu.

Hugmyndaríkir krakkar
„Þátttakan í leiknum fór fram úr björtustu vonum og skiluðu ungmennin inn hverri glæsimyndinni á fætur annarri,“ segir Ólöf Sívertsen verkefnastjóri. „Fjölbreytni myndefnis gaf það svo sannarlega til kynna að þau hefðu áttað sig á mikilvægi allra fyrrnefndra þátta, þ.e. líkamlegra, andlegra og félagslegrar vellíðunar.
Það var ekki einfalt verk að finna vinningshafana en í störfum dómnefndar var horft til ýmissa þátta s.s. frumleika, heildarhugsunar, fjölda mynda, hugmyndauðgi og skilaboða.“

Glæsileg verðlaun afhent
Verðlaunin voru ekki af verri endanum en fyrir 1. sætið var það iPhone 7 sími og gjafakort í Intersport að upphæð 50.000 kr. Fyrir 2.-4. sæti voru einnig gjafabréf frá Inter­sport ­og tveir aðilar fengu aukaverðlaun frá Keiluhöllinni í Egilshöll.
Hér má sjá nokkrar af myndum vinningshafanna en hægt er að skoða allar myndir á Instagram undir merkinu #mosoheilsa.

#mosoheilsa

A post shared by Dagbjört Lára Bjarkadóttir (@_dagbjort_lara) on

?? #bmx #mosoheilsa

A post shared by Tjörvi Arnarsson (@tjxrvi_arnarsson) on

#mosoheilsa

A post shared by Eva María (@eva_maria03) on

5 á dag, hvern dag????? #mosoheilsa

A post shared by Dab (@djemmixd) on

Reykjalundur stofnun ársins

Magnús Ólason framkvæmdastjóri lækninga, Birgir Gunnarsson forstjóri, Guðbjörg Gunnarsdóttir mannauðs­stjóri og Lára M. Sigurðardóttir fram­kvæmdastjóri hjúkrunar. Mynd/Heiða

Magnús Ólason framkvæmdastjóri lækninga, Birgir Gunnarsson forstjóri, Guðbjörg Gunnarsdóttir mannauðs­stjóri og Lára M. Sigurðardóttir fram­kvæmdastjóri hjúkrunar. Mynd/Heiða

Reykjalundur hlaut á dögunum titilinn Stofnun ársins 2017 samkvæmt árlegri könnun sem gerð er á vegum fjármála- og efnahagsráðuneytisins í samstarfi við SFR og VR.
Á Reykjalundi fer fram alhliða endurhæfing sem miðar að því að bæta lífsgæði, færni og sjálfsbjargargetu þeirra sem þangað leita. Könnunin er framkvæmd af Gallup og nær til yfir 50 þúsund starfsmanna á almennum og opinberum vinnumarkaði. Könnunin gefur stjórnendum upplýsingar um hvað vel sé gert og hvað megi bæta frá sjónarhóli starfsfólksins. Þátttakendur eru spurðir út í ýmsa þætti í starfsumhverfinu þ.e. trúverðugleika stjórnenda, starfsanda, launakjör, vinnuskilyrði, sveigjanleika í starfi, sjálfstæði í starfi, ímynd stofnunar, ánægju og stolt og jafnrétti.
„Þessi niðurstaða endurspeglar viðhorf til vinnustaðarins og nær til ýmissa samverkandi þátta. Þetta er mikil viðurkenning og staðfesting á að við erum á réttri leið,“ segir Birgir Gunnarsson forstjóri Reykjalundar.
Niðurstöðurnar voru kynntar miðvikudaginn 10. maí.

Heilsubærinn

heilsumolar_18maí

Ég ætlaði að skrifa kjarnyrtan upp-með-sokkana pistill til þeirra sem taka sér þriggja mánaða frí frá öllum æfingum á sumrin, borða allt sem hönd á festir og gleyma að sofa. Ranka svo móðir og andstuttir við sér einhvern tíma eftir verslunarmannahelgi með bullandi samviskubit og kaupa sér árskort í ræktina. En ég nenni því ekki. Fólk veit þetta alveg sjálft. Það er ekkert vit í því að taka sér margra mánaða frí frá heilbrigðu líferni og það er sáraeinfalt, alls ekki tímafrekt og mjög skemmtilegt að halda sér í góðu formi á sumrin. Lykillinn er að koma sér út úr húsi, hreyfa sig og æfa utandyra. Ná sér í birtu og súrefni. Borða alvöru mat og sofa á nóttunni.

En mig langar miklu frekar að skrifa um heilsubæinn Mosfellsbæ. Ég er dagsdaglega í samskiptum við sveitarfélög víðsvegar um landið og upplifi í gegnum þau samskipti hvað það er mikið litið til Mosfellsbæjar sem leiðandi sveitarfélags þegar kemur að heilsu. Það sem mestu máli skiptir, að mínu mati, er að gjörðir fylgja orðum. Mosfellsbær til dæmis hefur tekið þá ákvörðun að vera Heilsueflandi samfélag og fylgt þeirri ákvörðun eftir með ýmis konar jákvæðum framkvæmdum. Okkar Mosó er frábært verkefni og eitthvað sem önnur sveitarfélög eru og munu taka sér til fyrirmyndar. Lykilatriðið í því verkefni er að bærinn mun á næstu mánuðum koma í framkvæmd heilsueflandi hugmyndum íbúa bæjarfélagsins. Okkar hugmyndum. Íbúakosning án framkvæmda myndi litlu skila. Hafa þveröfug áhrif.

Við erum á góðum stað, Mosfellsbær, og erum í kjörstöðu til þess að fara alla leið. Við getum orðið Heilsubær Íslands. Fyrirmynd á heimsvísu. Kjörstaður þeirra sem vilja lifa heilbrigðu lífi og þeirra sem vilja vinna við heilsu og hollustu. Tækifærin eru til staðar. Grunnurinn hefur verið lagður og bærinn er stútfullur af fólki með góðar hugmyndir á þessu sviði.

Heilsumolar Gaua
Mosfellingur 18. maí 2017

Styrkir til efnilegra ungmenna

Magnús Þór, Cecelía Rán, Arnór Daði, Kristín Sól, Hlynur Logi, Arna Karen og Ragnar Már. Á myndina vantar Arnór Gauta, Ólaf Má, Ernu Sóleyju og Dagmar Ýri.

Magnús Þór, Cecelía Rán, Arnór Daði, Kristín Sól, Hlynur Logi, Arna Karen og Ragnar Már. Á myndina vantar Arnór Gauta, Ólaf Má, Ernu Sóleyju og Dagmar Ýri.

Íþrótta- og tómstundanefnd Mosfellsbæjar veitir árlega styrki til efnilegra ungmenna á aldrinum 14-20 ára.
Markmiðið með styrkjunum er að gefa styrkþegum sömu tækifæri og jafnöldrum gefast til að njóta launa, á sama tíma og þau stunda af kappi sína list, íþrótt eða tómstund yfir sumartímann.
Styrkurinn er fólginn í launum frá vinnuskóla Mosfellsbæjar og er einstaklingum þannig gefið tækifæri til að einbeita sér frekar að sinni grein og ná enn meiri árangri. Að þessu sinni sóttu 36 ungmenni um styrkinn en 11 hlutu styrk.
Arna Karen Jóhannsdóttir badminton, Arnór Daði Rafnsson gítar, Arnór Gauti Jónsson knattspyrna/handbolti, Cecelía Rán Rúnarsdóttir knattspyrna, Dagmar Ýr Eyþórsdóttir rafgítar, Erna Sóley Gunnarsdóttir frjálsar, Hlynur Logi Ingólfsson körfubolti, Kristín Sól Guðmundsdóttir golf, Ólafur Már Einarsson, knattspyrna, Magnús Þór Sveinsson rytmískt píanónám, Ragnar Már Ríkarðsson, golf.

Í boltanum í 50 ár

sveinbjorn_mosfellingur

Sveinbjörn Sævar Ragnarsson eigandi Silkiprents er brautryðjandi í framleiðslu á útifánum á Íslandi.

Hann ber það ekki með sér að vera kominn yfir sjötugt enda ávallt í fullu fjöri. Ef hann er ekki í vinnunni þá er hann í útreiðatúr, í golfi eða að spila handbolta. Hann segir það skemmtilegasta við boltann, sem hann hefur stundað í yfir 50 ár, sé að vera í marki og verja 15 bolta í leik.
Maðurinn sem um ræðir heitir Sveinbjörn Sævar, ávallt kenndur við Silkiprent.

Sveinbjörn Sævar Ragnarsson er fæddur 24. ágúst 1944. Foreldrar hans eru þau Lilja Steinunn Guðmundsdóttir húsmóðir og Ragnar Breiðfjörð Sveinbjörnsson matreiðslumaður en hann lést árið 1972. Sveinbjörn á tvo bræður, þá Pál og Guðmund.

Gerði bara eins og hinir
„Ég er alinn upp í Reykjavík og var snarofvirkur prakkari á mínum yngri árum. Ég vaknaði snemma á morgnana og kom ekki heim fyrr en undir kvöldmat alla daga. Ég fór í sund á hverjum degi um sex ára aldurinn og einn daginn kom ég heim með miða sem á stóð að ég hefði synt 200 m sund í Norrænu sundkeppninni. Mamma spurði hvernig ég hefði farið að því þar sem ég kynni ekki að synda og ég svaraði, ég gerði bara eins og hinir.
Ég spilaði fótbolta með Val til tólf ára aldurs og það var mjög skemmtilegur tími en svo uppgötvaði ég stelpurnar og þá fækkaði nú æfingunum aldeilis,“ segir Sveinbjörn og hlær.

Útskrifaðist úr prentiðn
„Ég gekk í Laugarnes-, Langholts- og Austurbæjarskóla. Mér fannst ekki gaman í skóla og fannst leiðinlegt að læra. Mottóið­ hjá mér var bara að ná prófunum og láta það duga og það gerði ég nema í eitt sinn. Kennarinn minn í heilsufræði sagði eitt sinn við mig að ef ég kæmi þrisvar sinnum ólesinn í tíma þá þyrfti ég ekki að mæta meira. Ég lærði þá eins og enginn væri morgundagurinn og fékk 9 á prófinu.
Þegar ég var 12 ára talaði ég mjög mikið í tíma og hafði truflandi áhrif á bekkinn. Kennarinn fékk nóg af mér einn daginn, tók kennaraprikið og sló mig í rassinn og við það brotnaði það. Ég þagði það sem eftir lifði dags.
Eftir útskrift úr gaggó fór ég í Iðnskólann í Reykjavík að læra prentun. Ég komst svo á samning hjá Prentsmiðjunni Eddu og var þar í fjögur ár. Árið 1963 fór ég að læra setningu á Morgunblaðinu og starfaði þar í níu ár.“

Skemmtilegur félagsskapur
„Á Morgunblaðsárunum plataði Magnús Ólafsson skemmtikraftur mig á handboltaæfingu hjá Þrótti en hann starfaði einnig á blaðinu. Hjá Þrótti var ég alveg þangað til ég færði mig yfir til Aftureldingar. Ég spilaði með Júmboys og má segja að það tímabil sé það efirminnilegasta á ferlinum.
Í dag spila ég með Hvíta Riddaranum. Mér finnst alveg ótrúlega gaman í handbolta og missi aldrei af æfingu. Félagsskapurinn er nú heldur ekki til að skemma fyrir, allt saman frábærir strákar. Það skemmtilegasta við boltann er að vera í marki og verja 15 bolta í leik.“
Ég spyr Sveinbjörn hver sé galdurinn við að vera í góðu formi fram eftir aldri og hversu lengi hann ætli að halda áfram? „Það sem hjálpar mér er að ég verð aldrei veikur og get alltaf mætt á æfingar. Svo hleyp ég upp og niður stigann í vinnunni, þannig held ég mér í ágætis formi. Ég ætla að vera í boltanum eins lengi og ég get og ætla ekki að hætta fyrr en ég verð að gera það eða strákarnir henda mér út af æfingu.
Það eru tíu ár síðan ég byrjaði fyrir alvöru í golfi en ég var að fikta við það öðru hverju fram að þeim tíma. Það er býsna erfitt að verða góður í golfi og það krefst mikilla æfinga. Ég vildi sannarlega hafa meiri tíma til að sinna því.“

Hesthúsahverfið innan seilingar
„Ég giftist Grétu Sigurðardóttur um tvítugsaldurinn og við eignuðumst fjögur börn: Lilju fædda 1964, Sigríði 1965, Rögnu 1971 og Sveinbjörn fæddan 1978. Við byrjuðum okkar búskap í Reykjavík en fluttum í Mosfellssveit árið 1974.
Við hjónin byrjuðum saman í hestamennskunni en hesthúsahverfið var innan seilingar en við bjuggum þá í Dvergholtinu. Ég hef keppt bæði á fjórðungs- og landsmótum og átti landsfrægan hest, Muna, en hann vann A-flokkinn árið 1990. Ég er enn í hestastússinu og hef mikið gaman af.
Við Gréta slitum samvistir árið 1997.“

Fundu frábært efni í fánana
Sveinbjörn Sævar stofnaði fána- og skiltagerðina Silkiprent árið 1972 en fyrirtækið byrjaði í litlu húsnæði vestur á Granda. Silkiprent er fyrsta fyrirtækið til að framleiða útifána á Íslandi.
„Við erum brautryðjendur í framleiðslu á útifánum og er það enn okkar stærsti framleiðsluþáttur,“ segir Sveinbjörn. Leitast var við að þróa fánana og finna bestu lausn fyrir íslenskar aðstæður og fannst frábært efni í þá sem er flutt inn frá Frakklandi. Einnig er hægt að fá borðfána, hátíðarfána, strandfána og alla heimsins þjóðfána ásamt ýmsu öðru þar á meðal skilti.
„Það er fátt sem er ekki leyst hér, það er meira að segja hægt að afgreiða fána samdægurs,” segir Sveinbjörn brosandi er við kveðjumst.

Mosfellingurinn 27. apríl 2017
Myndir og texti: Ruth Örnólfs

Okkar Mosó: Niðurstöður íbúakosningar

okkarmosó_heimasida

Kosningu í lýðræðisverkefninu Okkar Mosó er lokið. Alls bárust 1.065 atkvæði sem nemur um 14% kosningaþátttöku. Það er meiri kosningaþátttaka en mælst hefur í sambærilegum verkefnum í Reykjavík og Kópavogi.
Mosfellsbær er eina sveitarfélagið sem hefur slegist í hópinn með þeim tveimur fyrrnefndu og framkvæmt lýðræðislegt samráðsverkefni eins og Okkar Mosó sem felur í sér bæði hugmyndasöfnun meðal íbúa og einnig kosningu um þær hugmyndir sem fram komu.

24 milljónir í framkvæmdir sem hefjast fljótlega
Á kjörskrá voru um 7.700 einstaklingar en það voru 16 ára og eldri íbúar í Mosfellsbæ sem gátu tekið þátt í kosningunni. Faghópur á vegum Mosfellsbæjar vann úr öllum innsendum hugmyndum og alls var kosið um 25 hugmyndir. Þar af voru 10 sem hlutu brautargengi og framkvæmd þeirra mun kosta um 24 milljónir.
Allar innsendar hugmyndir hafa fengið málefnalega umfjöllun. Sumar voru sendar í framkvæmd strax og aðrar verða sendar til frekari umfjöllunar í nefndum og ráðum bæjarins. Yfirlit um afdrif hugmyndanna verður aðgengilegt og uppfært á vef Mosfellsbæjar.
Til stendur að endurtaka verkefnið Okkar Mosó. Þá er tilvalið fyrir hugmyndasmiði að senda sínar hugmyndir inn aftur hafi þær ekki náð í gegn í þetta sinn. Framkvæmdir hefjast fljótlega og hægt verður að fylgjast með þeim í sumar á vef Mosfellsbæjar.

Nafn Kostnaður Atkvæði
Stekkjarflöt útivistarparadís 3,5 m. 476
Aðgengi að göngu- og hjólastígum 2,5 m. 466
Bekkir fyrir eldri borgara við Klapparhlíð 1 m. 462
Vatnsbrunnar og loftpumpur 2,5 m. 378
Ungbarnarólur á róluvelli bæjarins 1,5 m. 375
Útileikvöllur fyrir fullorðna 4,5 m. 370
Göngustígur gegnum Teigagilið 1,5 m. 344
Göngugatan: Laga bekki og gróður 1,5 m. 311
Bæta aðgengi á göngustíg við trjágöngin 3,5 m. 281
Fuglafræðslustígur með fram Leirvoginum 2 m. 255

Mosöld fer fram um helgina – bærinn fyllist af blökurum

Öldungamót Blaksambands Íslands haldið í Mosfellsbæ 28.-30. apríl.

Öldungamót Blaksambands Íslands haldið í Mosfellsbæ 28.-30. apríl.

Um helgina er Blakdeild Aftureldingar gestgjafi á einu stærsta fullorðinsmóti sem haldið er á Íslandi, öldungamótinu í blaki eða Mosöld 2017 eins og mótið heitir í ár.
Mótið er fyrir þá sem eru 30 ára og eldri og er um að ræða mjög stóran viðburð þar sem 167 lið eru skráð til leiks og reikna má með um 2.000 manns sem koma í Mosfellsbæinn þessa helgina til að spila og fylgjast með mótinu.
Mikill undirbúningur hefur verið fyrir þetta stærsta öldungamót Blaksambands Íslands af hálfu blakdeildar Aftureldingar en þetta er 42. öldungamótið í röðinni. Öldungur mótsins er Guðrún K. Einarsdóttir, formaður blakdeildar Aftureldingar en öldungur mótsins ber ábyrgð á mótinu og framkvæmd þess.
Leikið verður á 10 völlum að Varmá en einnig verður leikið í Lágafelli og á Reykjalundi. Fjöldi leikja á mótinu verða rúmlega 500 og verður leikið frá morgni til kvölds. Undirbúningur hefur í rauninni staðið yfir í heilt ár og eru öll íþróttamannvirki í Mosfellsbæ undirlögð ásamt Varmárskóla sem nýttur er undir gistingu.

Þúsund manns á lokahófi
Fjölbreytt skemmtun verður einnig í gangi þá daga sem mótið er og lýkur mótinu sunnudaginn 30. apríl með glæsilegu lokahófi en reiknað er með að um 1.000 manns verða að Varmá það kvöld.
Blakdeild Aftureldingar er mótshaldari og mikil vinna er búin að vera í gangi í allan vetur við skipulagningu og undirbúning mótsins.
Það er því alveg ljóst að bærinn mun fyllast af blökurum um helgina.
Mótið mun hafa áhrif vítt og breitt um bæinn og á fleiri deildir innan Aftureldingar. Þá verður dagskrá í Hlégarði og á Hvíta Riddaranum alla helgina.
Blakdeild Aftureldingar hvetur bæjarbúa til að koma í íþróttahúsin og kíkja á keppendur og aðstöðuna og upplifa stemninguna sem fylgir þessu skemmtilega móti en umtalað er hversu skemmtilegir og glaðlegir blakarar eru og leikgleðin sem einkennir þetta mót.

Æfingahópurinn þinn

Heilsumolar_Gaua_27april

Ég hef verið tengdur íþróttum og hreyfingu síðan ég var smá gutti. Hef æft með ýmsum hópum og félögum. Þrótti, Fylki, Aftureldingu, ÍR og Mjölni, svo nokkur séu nefnd. Ég tilheyri í dag tveimur æfingahópum. Þjálfa og held utan um annan og er þátttakandi í hinum.

Hver æfingahópur hefur sína menningu. Hún er mótuð af þeim sem stýra hópnum og þeim sem mynda hópinn. Einkenni góðra æfingahópa er að fólk mætir reglulega, bætir sig, hlakkar til að mæta og líður vel eftir æfingu. Góður húmor skiptir máli, hvetjandi aðhald þjálfara og annarra æfingafélaga líka. Og það sem mér finnst mjög mikilvægt, að það sé pláss fyrir alla. Alla sem virkilega vilja vera með í hópnum og æfa með honum. Við erum öll ólík, öll sérstök á okkar hátt, en það gefur lífinu lit og gerir hópinn sterkari að innan hans séu einstaklingar sem fara sínar eigin leiðir, án þess að fara gegn óskrifuðum reglum hópsins eða eyðileggja út frá sér. Ég hef verið í æfingahópum þar sem ekki var pláss fyrir þá sem þóttu of öðruvísi. Það er hálf óþægileg tilfinning að hugsa til þess eftir á og ég er viss um að þeir hópar hefðu náð lengra ef menning þeirra hefði verið opnari.

Það skiptir ekki máli hvers konar hreyfingu maður stundar eða hvaða íþrótt maður er að æfa, öflugur æfingahópur er alltaf mikill styrkur. Gefur manni orku, veitir manni jákvætt aðhald og andlega upplyftingu.

Það eru margir æfingahópar í Mosfellsbæ. Afturelding og hin íþróttafélögin í bænum eru til dæmis með marga hópa á sínum vegum, líkamsræktarstöðvarnar sömuleiðis. Hópar hittast til að sparka í bolta, glíma, ganga á fjöll eða hlaupa. Möguleikarnir eru ótal margir og í bæ þar sem margir þekkja marga er mjög líklegt að þú getur fundið æfingahóp sem hentar þér og þínum lífstíl.

Afhentu ágóða styrktarkvölds

Fjölskylda Þorsteins Atla ásamt formönnum UMFUS.

Fjölskylda Þorsteins Atla ásamt formönnum UMFUS.

Þann 24. mars héldu UMFUS félagar kóte­lettu-styrktarkvöld líkt og í fyrra fyrir sína menn í Ungmennafélaginu ungir sveinar.
Boðið var upp á dýrindis kótelettur framreiddar af Ragnari Sverrissyni hjá Höfðakaffi. Aðrir styrktaraðilar voru Víking, Golfklúbbur Mosfellsbæjar og Norðlenska. Umfus vill koma á framfæri þökkum til allra sem styrktu þetta góða málefni með nærveru sinni, framlögum og aðstoð.
Í ár var ákveðið að styrkja Þorstein Atla Gústafsson, sem er tæplega 6 ára gamall sprækur og glaður Mosfellingur, og fjölskyldu hans. Foreldrar hans eru Sóley Erla Ingólfsdóttir og Gústaf Helgi Hjálmarsson. Þosteinn Atli á tvo bræður, Ingólf Orra og Þorkel Mána.

Notar augun til tjáningar
Þorsteinn Atli er með með mjög sjaldgæfa stökkbreytingu í geni sem heitir SCN8A. Hann er algjörlega einstakur því aðeins eru greind um 100 tilfelli í heiminum. Hann er flogaveikur og hreyfihamlaður auk þess sem hann er með þroskaskerðingu. Hann tjáir sig ekki á hefðbundin hátt en hann notar augun til tjáningar.
Í Klettaskóla þar sem Þorsteinn Atli stefnir á að hefja nám í haust hefur verið í gangi þróunarverkefni með augnstýribúnað sem heitir Tobii og hefur reynst vel fyrir þá sem nota óhefðbundnar tjáskiptaleiðir.
Því miður er þessi búnaður ekki niðurgreiddur af tryggingum. Til þess að Þorsteinn Atli geti lært að nýta sér svona tæki er nauðsynlegt að hafa slíkan búnað heima líka. Það er því von UMFUS félaga að þetta framlag komi að góðum notum.

„Þú endar á því að moka skurði drengur“

villifagverk

Vilhjálmur Þór Matthíasson er eigandi og framkvæmdastjóri Fagverks verktaka sem er framúrskarandi fyrirtæki

Vilhjálmur Þór tók á móti mér á skrifstofu sinni í Flugumýri. Hvert sem litið var, bæði á inni- og útisvæði, mátti sjá vörubíla, malbikunarvélar, gröfur, valtara og aðrar stórvirkar vinnuvélar.
Villi, eins og hann er ávallt kallaður, stofnaði fyrirtækið Fagverk árið 2004. Hann sér fram á mikla viðhaldsvinnu við malbikun á næstu árum þar sem götur eru víða farnar að láta á sjá vegna umferðarþunga.

Vilhjálmur Þór er fæddur í Reykjavík 20. febrúar 1974. Foreldrar hans eru þau Svanhildur Vilhjálmsdóttir félagsliði og Matthías Ottósson verktaki. Systkini Vilhjálms eru þau Svava fædd 1971, Sólborg 1975 og Matthías 1986.

Notuðu bíl nágrannans sem rennibraut
„Ég bjó í Kópavogi til 10 ára aldurs og á þaðan góðar minningar. Ég og Ægir vinur minn fórum reglulega í dagsgöngu í Fossvogsdalinn til að veiða kanínur. Við ætluðum að hafa þær í búri í garðinum sem við höfðum smíðað sjálfir.
Mörg prakkarastrikin voru framin á þessum tíma. Við systkinin rifum einu sinni upp öll blómin hjá nágrannakonunni sem hún var búin að vera að rækta. Það þurfti að sjálfsögðu að borga fyrir þau. Einu sinni notuðum við bíl nágrannans sem rennibraut því hann var svo ótrúlega vel hannaður. Það þurfti að borga fyrir viðgerðina á honum.
Ég fattaði svo að ef maður lamdi rúður með einhverju hörðu þá brotnuðu þær. Held að ég hafi náð að brjóta 18 rúður áður en það sást til mín og nágrannakonan sem átti blómin átti 12 af þeim. Ég held að hún hafi ekki haldið mikið upp á mig þessi elska,“ segir Villi og brosir er hann rifjar þetta upp.

Settu Íslandsmet í boðsundi
„Við fjölskyldan fluttum svo í Mosfellssveitina og ég hóf nám í Varmárskóla. Þar eignaðist ég marga vini sem ég er enn í góðu sambandi við.
Ég byrjaði fljótlega að æfa sund en það var Svava systir sem dró mig í það. Hópurinn sem ég var að æfa með stóð sig mjög vel. Við settum mörg Íslandsmet í boðsundi og þau met verða aldrei slegin, alla vega ekki í okkar huga.“

Kennarinn reyndist sannspár
„Í Gaggó Mos gekk mér ekki vel námslega því ég er bæði les- og skrifblindur en það greindist ekki fyrr en á síðasta árinu mínu í skólanum. Ég man að eitt sinn öskraði einn kennarinn á mig að ef ég myndi ekki taka mig á þá myndi ég enda á því að moka skurði. Það er nú svolítið gaman að segja frá því að nokkrum árum seinna keypti ég mér mína fyrstu gröfu af mörgum og byrjaði að moka skurði. Ég hef í raun gert það allar götur síðan svo kennarinn reyndist sannarlega sannspár.
En það var alltaf gaman í skólanum og við vinirnir skemmtum okkur vel. Það voru nokkrar ruslatunnur sprengdar á göngunum og svona en við tölum nú ekkert meira um það,“ segir Villi og hlær.

Unnu alla verslunarmannahelgina
Eftir útskrift úr Gaggó Mos fór Villi beint út á vinnumarkaðinn og til 18 ára aldurs starfaði hann hjá föður sínum sem rak jarðvinnufyrirtækið Mottó.
Síðan hóf hann störf við malbikun hjá Malbik og völtun og starfaði þar í nokkur ár. „Vinnutíminn í malbikinu gat orðið ansi langur, allt upp í 100 tímar á viku þegar mest var að gera, og það gat tekið á. Ég ákvað að breyta til og fór að vinna hjá JVJ verktökum. Þar vann ég meðal annars við gerð Höfðabakkabrúarinnar.
Eitt sinn vorum við fengnir til að vinna alla verslunarmannahelgina. Þá áttum við að breyta gatnamótum á meðan allir voru í útilegu. Við fengum auka bónus fyrir þetta, ferð til Newcastle, svo menn urðu mjög ánægðir með það.
Ég byrjaði svo aftur hjá pabba árið 2000 og starfaði þar sem verkstjóri.“

Fara reglulega á ættaróðalið
Villi kynntist konu sinni, Sigrúnu Eiríksdóttur, ritara í Gagnfræðaskóla Mosfellsbæjar, um tvítugsaldurinn. Þau byrjuðu að búa saman í Reykjavík en ákváðu síðan að byggja sér hús í heimahögunum en þau eru bæði alin upp í Mosfellsbæ. Þau eiga þrjár dætur, þær Írisi, Tinnu og Lísu.
„Ég man þegar maður stóð í byggingaframkvæmdunum á sínum tíma. Allar ferðirnar til Ásbjörns byggingafulltrúa upp á lofti í Hlégarði. Þá var maður nú stundum stressaður en hann tók alltaf vel á móti stráknum sem var aðeins 22 ára þá og leiðbeindi manni í gegnum ferlið. Við Sigrún byggðum okkur svo seinna stærra hús í Spóahöfðanum þar sem við búum í dag.
Við fjölskyldan höfum yndi af ferðalögum innanlands og erum búin að fara í óteljandi ferðir á hina ýmsu staði um landið. Við förum reglulega vestur á firði á ættar­óðalið okkar sem er rétt fyrir utan Þingeyri eða við Svalvogana.“

Viðurkenning frá Creditinfo
Villi var þrítugur þegar hann stofnaði sitt eigið fyrirtæki, Fagverk verktaka. Fagverk er í grunninn malbikunarfyrirtæki en er einnig í byggingageiranum. Fyrirtækið er með mjög gott vörubíla- og vinnuvélaverkstæði til að þjónusta tæki og búnað í þeirra eigu.
Villi segir að fyrirtækið hafi í raun byrjað að blómstra í hruninu en þá sá hann tækifærin út um allt. Í dag starfa 24 hjá fyrirtækinu en fleiri starfa yfir sumarið eða á meðan mest er að gera í malbikinu.
Fagverk fékk á dögunum viðurkenningu frá Creditinfo sem framúrskarandi fyrirtæki 2016 og er því á meðal þeirra fyrirtækja sem efla íslenskt efnahagslíf.
„Þetta er mikill heiður, við stóðumst styrkleikamat sem er frábært. Aðeins gott starfsfólk gerir þetta mögulegt en hér starfar afar jákvæður og samrýmdur hópur.
Það er alltaf gaman að fá viðurkenningu fyrir það að maður sé að gera góða hluti,“ segir Villi er við kveðjumst.

Mosfellingurinn 6. apríl 2017
Myndir og texti: Ruth Örnólfs

Styttist í að íþróttamiðstöð GM verði tekin í notkun

golfGM

Kári Tryggvason formaður GM.

Kári Tryggvason formaður GM.

Miðsvæðis á Hlíðavelli er nú verið að leggja lokahönd á glæsilega íþróttamiðstöð Golfklúbbs Mosfellsbæjar.
Fyrir ári síðan, þann 1. apríl 2016, tóku ungir kylfingar fyrstu skóflustunguna og í dag er uppbygging á húsinu á lokasprettinum.
Á Hlíðavelli hefur átt sér stað mikil uppbygging á 18 holu golfvelli frá árinu 2004.
„Það eru miklir uppgangstímar hjá okkur og nýtt hús mun gjörbylta allri aðstöðu golfklúbbsins,“ segir Kári Tryggvason nýr formaður GM. Klúbburinn telur um 1.000 manns í dag og fer ört fjölgandi.

Veitingasala og veislusalur
Íþróttamiðstöðin verður 1.200 fm á tveimur hæðum og mun hýsa alla skrifstofu-, félags- og æfingaaðstöðu klúbbsins til framtíðar. Þá verður tekinn í notkun salur á efri hæð hússins sem rúma mun 120-200 manns. Þar verður rekin veitingasala og veislusalur leigður út.
„Hér eiga allir Mosfellingar eftir að njóta góðs af góðri aðstöðu og geta mætt hér í kaffi eða mat. Útsýnið héðan er frábært og fellur húsið vel inn í landslagið. Stefnt verður að því að svæðið verði tengt inn á stígakerfi Mosfellsbæjar og munu þar skapast mörg tækifæri fyrir tengingar við fleiri íþróttir og útvist í hjarta Mosfellsbæjar.“

Æfingaaðstaða fyrir börn og unglinga
„Stefnt er að því að fyrsta áfanga verksins ljúki nú í næsta mánuði með opnun efri hæðarinnar. Neðri hæðin með búnings- og æfingaaðstöðu verður svo vonandi tekin í notkun fyrir veturinn.
Á sumrin stunda um 200 börn golf og hefur vantað verulega upp á aðstöðu til æfinga yfir vetrartímann. Þetta verður því kærkomið fyrir okkar ungu og efnilegu kylfinga. Þá gefst möguleiki á því að gera golf að heilsársíþrótt í Mosfellsbæ við bestu mögulegar aðstæður.“

Ómetanlegir sjálfboðaliðar
„Hér erum við full eftirvæntingar og sjálfboðaliðar hafa unnið hörðum höndum á síðustu mánuðum undir eftirliti verktaka hússins. Allt gengur samkvæmt áætlun og tilhlökkunin er mikil.
Félagsandinn er mjög góður og án þessara öflugu sjálfboðaliða sem lagt hafa á sig hundruð vinnustunda væri þetta einfaldalega ekki hægt,“ segir Kári að lokum.
Gamli golfskálinn neðan við Súluhöfða mun víkja ásamt æfingasvæðinu og þar mun rísa íbúðagata.

Hafa gróðursett 1,4 milljónir plantna

Fréttabréf Skógræktarfélags Mosfellsbæjar kom út á síðum Mosfellings.

Fréttabréf Skógræktarfélags Mosfellsbæjar kom út á síðum Mosfellings. 30. tbl. – apríl 2017

Fréttabréf Skógræktarfélagsins kom út á síðum Mosfellings þann 6. apríl. Aðalfundur félagsins verður haldinn í húsi Björgunarsveitarinnar Kyndils, Völuteigi 23, Mosfellsbæ, mánudaginn 10. apríl kl. 20.00. Fyrir utan hefðbundin aðalfundastörf mun Bjarni diðrik Sigurðsson flytja erindið Vatnið og skógurinn. Þar ræðir hann um eitt mikilvægasta umhverfismál samtímans sem eru vatnsmálin og fjallar um mikilvægi skógarins í því samhengi.

Skógræktarfélag Mosfellssveitar síðar Mosfellsbæjar var stofnað 20. maí 1955. Stofnfélagar voru 88 og þrjú félagasamtök gerðust meðlimir: Ungmennafélagið Afturelding, Kvenfélag Lágafellssóknar og Skógræktarfélag kvenskáta við Hafravatn.
Fyrsti formaður félagsins var Guðjón Hjartarson á Álafossi. Fyrst var félagið hluti af Skógræktarfélagi Kjósarsýslu en varð síðan sjálfstætt félag til þess að geta átt beina aðild að Skógræktarfélagi Íslands. Núverandi formaður er Kristín Davíðsdóttir.

Skógar félagsins
Frá stofnun félagsins hafa verið gróðursettar um 1,4 milljónir plantna. Fyrsta plöntun félagsins var kringum Hlégarð vorið 1956. Fljótlega fékk félagið reit í Hamrahlíðinni.
Árið 1990 hófst hið svokallaða Landgræðsluátak en þá fóru skógræktarfélögin að fá plöntur án endurgjalds, en við það jókst útplöntun félagsins til muna. Gerðir voru samningar bæði við bæjarfélagið og einkaaðila um land til skógræktar. Síðan þá er búið að klæða mörg fellin og myndar það hluta af hinum Græna trefli sem umlykja á allt höfuðborgarsvæðið.
Í dag er ekki lögð eins mikil áhersla á að gróðursetja nýskóg heldur hefur þörfin á umhirðu skógarins aukist eftir því sem skógarnir hafa vaxið og dafnað. Mikil þörf er á grisjun skóganna og gerð göngustíga til að hægt sé að nota þá til útivistar.
Svæði sem félagið hefur plantað í eru: Hamrahlíð, Þormóðsdalur, Úlfarsfell, Lágafell, Reykjahvolshlíð, Helgafell að norðan, Norður Reykir, Æsustaðhlíð, Varmaland, Háaleiti og Langihryggur.
Ár hvert er haldinn fræðslufundur í samráði við Mosfellsbæ, en hann hefur verið í byrjun maí. Í byrjun júní er vinnukvöld félagsins. Árleg skógarganga er um miðjan júní. Hægt er að fylgjast með á síðu félagsins www.skogmos.net.

Hér fyrir neðan má sjá fréttabréfið í heild sinni.

Bæði karla- og kvennalið Aftureldingar í úrslitum

Kjörísbikarinn fer fram í Laugardalshöll um helgina.

Kjörísbikarinn fer fram í Laugardalshöll um helgina.

Sannkölluð bikarhelgi er framundan í blakinu en bæði úrvalsdeildarlið Aftureldingar í blaki munu leika í undanúrslitum á föstudaginn 7. apríl. Stelpurnar eiga titil að verja en þetta er í fyrsta skipti sem strákarnir komast í Laugardalshöllina.
Stelpurnar leika gegn Þrótti Nes. kl. 14 á föstudag og Strákarnir spila gegn Vestra Ísafirði kl. 20.
Markmið beggja liða er að leika til úrslita en úrslitaleikirnir fara fram á sunnudeginum í Laugardalshöll. Það er því mikilvæg helgi framundan hjá blakdeildinni og því er stuðningur Mosfellinga og Aftureldingarfólks gífurlega mikilvægur. Miðasala á úrslitahelgina er í fullum gangi og hægt er að nálgast miða í afgreiðslunni í íþróttamiðstöðinni að Varmá.
Úrslitaleikirnir á sunnudaginn í Laugardalshöllinni hefjast með úrslitaleik karla kl. 14:00 og konurnar leika síðan kl. 16:00.

Íslandsmeistaratitill kvenna í húfi
Úrvalsdeildarlið kvenna er búið að tryggja sér réttinn til að leika til úrslita um Íslandsmeistaratitilinn eftir öruggan sigur á Þrótti Neskaupsstað í tveimur leikjum. Fyrri leikurinn sem var leikinn að Varmá vannst örugglega 3-0 og seinni leikinn í Neskaupsstað unnu stelpurnar 3-1.
Úrslitakeppnin hefst þann 19. apríl og leika stelpurnar við HK, en þessi lið hafa verið í sérflokki í deildinni í vetur. Fyrsti leikurinn fer fram í Fagralundi en fyrsti heimaleikur Aftureldingar er 21. apríl. Vinna þarf þrjá leiki til að landa titlinum og alveg ljóst að úrslitarimman verður jöfn og spennandi eins og leikirnir í vetur.

Lykilmenn framlengja

Ernir Hrafn Arnarson og Mikk Pinnonen ásamt áSgeiri Sveinssyni formanni meistaraflokksráðs.

Ernir Hrafn Arnarson og Mikk Pinnonen ásamt Ásgeiri Sveinssyni formanni meistaraflokksráðs.

Mikk Pinnonen og á Ernir Hrafn Arnarson hafa skrifað undir nýjan samning til eins árs við handknattleiksdeild Aftureldingar.
Þessir öflugu leikmenn eru lykilmenn í sterku liði Aftureldingar og er mikill fengur að halda þeim næsta vetur í Mosfellsbænum.
Mikk kom til liðs við Aftureldingu í byrjun árs 2016 og er einn öflugasti sóknarmaðurinn í Olísdeildinni.
Ernir Hrafn sneri til baka úr atvinnumennsku í Þýsklandi síðastliðið sumar og byrjaði að leika með sínu uppeldisfélagi Aftureldingu í janúar síðastliðinn og er hann mjög öflugur leikmaður í vörn og sókn. Það verður gaman að fylgjast með þessum sterku leikmönnum í úrslitakeppninni sem hefst á mánudaginn og jafnframt á næsta tímabili.
Þá hefur Mosfellingurinn Einar Ingi Hrafnsson ákveðið að leika með uppeldisfélaginu sínu á næsta tímabili. Einar Ingi er öflugur línumaður sem leikið hefur í Noregi síðustu fjögur árin.

Úrslitakeppnin hefst á mánudaginn
Lokaumferð Olísdeildarinnar fór fram á þriðjudag og hafnaði Afturelding í 4. sæti.
Liðið mætir Selfoss í 8-liða úrslitum Íslandsmótsins og fer fyrsti leikur fram að Varmá á mánudag kl. 20. Leikur númer 2 fer fram á Selfossi á miðvikudag kl. 19:30 og ef til oddaleiks kemur þá verður hann leikinn í Mosfellsbæ laugardaginn 15. apríl.
Mosfellingar eru hvattir til að mæta á völlinn og hvetja strákana í baráttunni sem fram undan er.

Afgangur af rekstri Mos­fellsbæjar á síðasta ári

Vetrarríki í Mosfellsbæ. Ljósmynd: Kristinn Ingi Pétursson

Vetrarríki í Mosfellsbæ. Ljósmynd: Kristinn Ingi Pétursson

Ársreikningur Mosfellsbæjar fyrir árið 2016 var lagður fram í bæjarráði á miðvikudag og jafnframt tekin til fyrri umræðu í bæjarstjórn.
Tekjur ársins námu alls 9.105 milljónum, launakostnaður 4.151 milljónum og annar rekstrar­kostnaður 3.640 milljónum. Framlegð er því 1.314 milljónir en að teknu tilliti til fjármagnsliða er rekstrarafgangur A og B hluta 380 milljónir.
Veltufé frá rekstri er 1.109 milljónir eða rúmlega 12% af tekjum. Eigið fé í árslok nam 4.681 milljón og eiginfjárhlutfall 29,4%. Skuldaviðmið er 108% sem er vel innan þess 150% hámarks sem kveðið er á um í lögum.

Betra en áætlanir gerðu ráð fyrir
Rekstrarniðurstaðan er talsvert betri en gert var ráð fyrir í fjárhagsáætlun ársins. Það má helst skýra með hærri óreglulegum tekjum vegna lóðasölu og byggingarréttargjöldum og lægra verðlagi en gert var ráð fyrir, sem hefur áhrif á fjármagnsliði. Þetta kemur fram í tilkynningu frá Mosfellsbæ.
Fram undan er áframhaldandi uppbygging innviða í Mosfellsbæ. Á síðustu árum hefur verið verið lögð áhersla á uppbyggingu framhaldsskóla, íþróttahús, hjúkrunarheimili og stórbætt aðstaða fyrir félagsstarf eldri borgara.
Stærsta verkefnið sem sveitarfélagið hefur með höndum nú er bygging Helgafellsskóla. Það er leik- og grunnskóli í nýbyggingarhverfi í hraðri uppbyggingu sem áætlað er að muni kosta um 3.500 milljónir á næstu tíu árum.

Traustur og ábyrgur rekstur
„Það hefur verið mikil áskorun að reka sveitarfélag síðustu ár. Það má segja að við höfum verið stöðugt að endurskoða reksturinn frá árinu 2008 í þeirri viðleitni að láta enda ná saman. Það er því ánægjulegt að á þessum tímapunkti, þegar svo mikil uppbygging á sér stað að við skulum sjá árangur þess erfiðis,“ segir Haraldur Sverrisson bæjarstjóri.
„Við viljum leggja áherslu á traustan og ábyrgan rekstur og það hafa allir starfsmenn hjá Mosfellsbæ snúið bökum saman í því verkefni. Fyrir það ber að þakka.“

Rúmur helmingur til fræðslumála
Fræðslumál eru langstærsti málaflokkurinn í rekstri sveitarfélagsins en til hans runnu 3.604 milljónir eða 52% skatttekna. Til félagsþjónustu var veitt 1.382 milljónum og eru þar meðtalin málefni fatlaðs fólks.
Íþrótta- og tómstundamál eru þriðja stærsta verkefni bæjarins en til þeirra mála var varið um 803 milljónum. Samtals er því 83% skatttekna Mosfellsbæjar varið til fræðslu-, félagsþjónustu, íþrótta- og tómstundamála.

>> Íbúar Mosfellsbæjar voru 9.783 um síðustu áramót og hafði fjölgað um 3% á milli ára sem er í samræmi við spár þar um. Gert er ráð fyrir að íbúafjöldinn fari yfir 10 þúsund á þessu ári. Mosfellsbær er sjöunda fjölmennasta sveitarfélag landsins og þar störfuðu 619 starfsmenn í 509 stöðugildum á árinu 2016.