Börn eru besta fólk

gyda_mosfellingur

Gyða Vigfúsdóttir leikskólastjóri lætur af störfum á Reykjakoti í ágúst eftir að hafa starfað þar í rúm 19 ár.

Leikskólinn Reykjakot er 70 barna leikskóli og tók til starfa í mars 1994. Skólinn er staðsettur í náttúrulegu umhverfi svo stutt er að fara með börnin í fjallgöngur, berjamó eða með nesti í Reykjalundarskóg.
Gyða Vigfúsdóttir leikskólastjóri hóf störf á Reykjakoti árið 1998. Hún lætur nú af störfum sökum aldurs og segir framtíðina óráðna en það sem hún taki sér fyrir hendur verði örugglega eitthvað skemmtilegt.

Gyða er fædd í Reykjavík 1. júlí 1950. Foreldrar hennar eru þau Inga Jenný Guðjónsdóttir, húsmóðir og handavinnukona, og Vigfús Árnason, hárskeri og kennari. Gyða á tvö systkini, þau Grétu og Árna Guðjón.

Laugavegurinn var stór ævintýraveröld
„Ég ólst upp í Laugarneshverfinu og síðar á Laugaveginum. Laugarneshverfið bauð upp á mikið frelsi fyrir börn og þar var margt hægt að bralla þó maður væri ungur að árum. Ég man að fyrsta barnapíustarfið mitt var að passa hana Láru litlu þó ég væri bara 6 ára og hún 2 ára.
Laugavegurinn var í mínum huga stór ævintýraveröld þar sem alltaf var eitthvað spennandi að gerast. Þegar ég var 10 ára flutti fjölskyldan í Kópavoginn, pabbi hafði byggt þar hús og það má segja að við höfum verið nokkurs konar frumbyggjar.“

Fékk þjálfun í kjötvinnslu
„Ég fór í sveit 8 ára að Flatey á Mýrum í Hornafirði. Það var mitt annað heimili öll sumur þangað til ég var 16 ára. Þá tók ég mér frí eitt sumar til að vinna í Kjötbúðinni Borg. Það var mjög lærdómsríkur tími þar sem ég fékk frábæra þjálfun í kjötvinnslu.
Þegar ég lít til baka þá man ég sérstaklega vel eftir bók sem mér var gefin, Börn eru besta fólk, eftir Stefán Jónsson. Þar kom staðfestingin á því að börn eru fólk en ekki bara börn. Ég lít alltaf á þá bók sem fyrsta skrefið í áttina að því að verða leikskólakennari.“

Öðlaðist mikla reynslu á Silungapolli
„Ég byrjaði mína skólagöngu í Laugarnesskóla, þar sem mér þótti gott að vera. Síðan lá leiðin í Austurbæjarskóla, Kópavogsskóla og að lokum í verknám í Lindargötuskóla. Ég held að mér sé óhætt að segja að skólagangan hafi verið svona upp og ofan, enda höfðum við Ásta vinkona nóg að gera við barnapössun.
Eftir útskrift fórum við að vinna á barnaheimilinu að Silungapolli og unnum þar í þrjú ár. Þar öðlaðist ég mikla reynslu og kynntist vel þeim erfiðleikum sem fátækir foreldrar stóðu frammi fyrir á þeim tíma.“

Gestur hjá bankastjórum bæjarins
Gyða giftist Heiðari Woodrow Jones árið 1968 aðeins 18 ára gömul. Þau eignuðust tvö börn, Karenu Jenný og Vigfús Þór. Gyða og Heiðar skildu árið 1979 eftir 11 ára hjónaband.
„Eftir skilnaðinn má segja að nýr kafli hafi hafist í lífi mínu. Til að styrkja fjárhaginn fór ég að vinna í Stáliðjunni þar sem ég saumaði áklæði utan um stóla.
Örlögin höguðu því svo til að nokkru síðar flutti ég til Seyðisfjarðar þar sem ég tók þátt í að reka steypustöð. Mitt hlutverk fólst aðallega í því að sjá um fjármál og var ég tíður gestur hjá bankastjórum bæjarins.“

Eignaðist marga vini á Tjaldanesi
„Eftir Seyðisfjarðarævintýrið flutti ég aftur suður og settist á skólabekk í Fóstruskóla Íslands, enda hef ég allt frá barnæsku haft mikinn áhuga á börnum. Eftir útskrift 1987 fór ég að vinna á skóladagheimilinu Ástúni. Um svipað leyti kynntist ég Knúti Birgissyni eiginmanni mínum. Hann starfar nú sem forstöðumaður á Velferðarsviði Reykjavíkurborgar. Við giftum okkur 1992 og höfðum skömmu áður flutt í Mosfellsbæinn.
Á þessum tíma hafði ég fengið vinnu sem deildarstjóri og varð síðar forstöðumaður Tjaldanesheimilisins í Mosfellsdal. Ef það er eitthvað sem mér finnst jafn gefandi og að vinna með börn, er það fatlað fólk. Ég eignaðist marga vini á Tjaldanesi og hitti suma þeirra reglulega, þá eru fagnaðarfundir.“

Lánsöm að hafa frábært starfsfólk
„Ég byrjaði að vinna á Reykjakoti árið 1998, sem þá var undir stjórn Maríu skólasystur minnar. Hún hafði innleitt Hjallastefnuna sem Margrét Pála er höfundur að. Þegar María hætti árið 2000 tók Margrét Pála við stjórn skólans og ég varð aðstoðarleikskólastjóri. Ég lærði mikið af Möggu Pálu og í gegnum árin höfum við hist reglulega og borið saman bækur okkar.
Ég tók við leikskólastjórastöðunni árið 2002. Á þeim árum sem ég hef stjórnað skólanum hef ég verið svo lánsöm að hafa alltaf frábæru starfsfólki á að skipa, sem hefur lagt sitt af mörkum til að gera Reykjakot að framsæknum vinnustað.“

Prjónuðum fyrir heimilislausa
„Við höfum í sameiningu tekist á við stór verkefni eins og stofnun Varmárdeildarinnar og Leirvogstunguskóla og eins höfum við unnið mörg þróunarverkefni.
Samfélagsverkefnin eru nokkur, t.d. prjónuðum við fyrir Mæðrastyrksnefnd og heimilislausa. Við tókum þátt í verkefni með leikskólanum að Hlaðhömrum sem við kölluðum Jólakassar fyrir börn á Íslandi. Síðast en ekki síst hafa Reykjakotssystur farið í námsferðir til útlanda.“

Allur matur eldaður frá grunni
„Nýjustu verkefnin okkar eru ekki síður spennandi. Heilsueflandi leikskóli á vegum Embættis landlæknis er verkefni, sem aðstoðarleikskólastjórinn minn, Hildur Helga Sævarsdóttir, sér um.
Það var mikill happafengur að fá hann Einar H. Ólafsson til starfa í eldhúsið okkar. Hann er mikill eldhugi og eftir að hann byrjaði var hafist handa við að endurskoða alla matseðla, hvort þeir uppfylltu hollustuþarfir barnanna. Ég tók þá ákvörðun að leyfa sköpunarkrafti og athafnaþrá Einars að njóta sín. Í dag er allur matur eldaður frá grunni og hugað að hollustu.
Að síðustu má nefna verkefni sem heitir Garðrækt með Ömmu náttúru og er í umsjá Jóhönnu B. Magnúsdóttur.“

Framtíðin óráðin
Nú er komið að tímamótum og lætur Gyða af störfum í ágúst sökum aldurs. „Ég hef átt gott og farsælt samstarf við stjórnsýslu bæjarins og mig langar að nota tækifærið og þakka sérstaklega Birni Þráni fyrir allan hans stuðning og traust sem hann hefur sýnt mér alveg frá upphafi.
Ekki má gleyma að þakka öllum dásamlegu börnunum sem hafa verið hjá okkur í gegnum tíðina því án þeirra væri Reykjakot ekki sá yndislegi staður sem hann er. Við fylgjumst grannt með afrekum þeirra í lífinu og erum sannfærð um að þegar eitthvert þeirra skarar fram úr er það allt uppeldinu á Reykjakoti að þakka,“ segir Gyða og brosir. „Ég er enn sannfærðari en nokkru sinni að börn eru besta fólk.
Framtíð mín er óráðin en það sem ég tek mér fyrir hendur verður örugglega eitthvað skemmtilegt.“

Mosfellingurinn 29. júní 2017
Myndir og texti: Ruth Örnólfs

Íþróttamiðstöð GM tekin í notkun – fær nafnið Klettur

Reist hefur verið 1.200 fm hús á Hlíðavelli, 18 holu golfvelli í Mosfellsbæ.

Reist hefur verið 1.200 fm hús miðsvæðis á Hlíðavelli, 18 holu golfvelli í Mosfellsbæ.

Glæsilegt útsýni úr hátíðarsalnum.

Glæsilegt útsýni úr hátíðarsalnum.

Golfklúbbur Mosfellsbæjar hefur nú opnað dyrnar á nýrri íþróttamiðstöð, Kletti, miðsvæðis á Hlíðavelli.
Öll efri hæðin hefur verið tekin í notkun þar sem fyrsta flokks aðstaða er til að þjónusta kylfinga og aðra gesti. Um er að ræða veitingaaðstöðu, hátíðarsal, skrifstofur, sölu golfvara og móttöku.
„Þetta er frábær aðstaða með fallegasta málverki í heimi sem þú sérð út um gluggann hérna. Ég held að það sé enginn staður á Íslandi sem býður upp á viðlíka útsýni,“ segir Kári Tryggvason formaður golfklúbbsins.
Efri hæð hússins er 650 fm en húsið alls er 1.200 fm. Á neðri hæðinni er gert ráð fyrir æfingaaðstöðu fyrir börn og unglinga.
„Við stefnum á það, með velvilja drottins, að við náum að koma æfingaaðstöðunni í gagnið í vetur.“

Gamli skálinn víkur fyrir íbúabyggð
Gunnar Ingi Björnsson framkvæmdastjóri GM tekur í sama streng og sér fram á bjarta tíma fyrir unga og efnilega afrekskylfinga. „Okkar kylfingar hafa verið að æfa í nærliggjandi sveitarfélögum og í vélaskemmunni okkar yfir vetrartímann. Aðstaða sem hefur verið langt undir því sem talist getur eðlilegt.“
Í sumar verður notast við æfingaaðstöðu við gamla skálann í Súluhöfða en gert er ráð fyrir því að Mosfellsbær taki við því svæði í haust og reisi í framhaldinu íbúðagötu.
„Þar hefur golfklúbburinn verið í bráðabyrgðaraðstöðu í 30 ár. Nú erum við að skipuleggja okkur og reyna að koma upp allri aðstöðu hér við nýja húsið og hefja frágang á lóðinni,“ segir Gunnar Ingi.

Gunnar Ingi Björnsson framkvæmdastjóri GM og Kári Tryggvason formaður.

Gunnar Ingi Björnsson framkvæmdastjóri GM og Kári Tryggvason formaður.

Opið fyrir alla Mosfellinga
Opnuð hefur verið glæsileg veitingaaðstaða í húsinu sem opin verður frá morgni til kvölds í sumar. Þá verður hátíðarsalurinn og ýmis þjónusta í boði allan ársins hring.
„Staðurinn er hugsaður fyrir alla Mosfellinga og sjáum við fyrir okkur ýmsa möguleika í okkar heilsueflandi samfélagi. Verið er að tengja okkur við stígakerfi Mosfellsbæjar enda er hér stunduð fjölbreytt útivist. Fólk í göngutúrum, á hjóli, hestum, skíðum og öðrum fararskjótum mun njóta góðs af þessari starfsemi í húsinu sem verður sannkölluð útivistarmiðstöð.“

Margar tillögur að nafni
Efnt var til nafnasamkeppni og bárust hátt í 300 tillögur. Klettur varð fyrir valinu en kletturinn sem húsið rís undir heitir Hrossaskjólsklettur. Þónokkrir stungu upp á nafninu og hefur Magnús Gunnarsson verið dreginn út og hlýtur árskort á völlinn.
„Þetta er niðurstaðan og ég held að húsið muni bera nafnið vel. Við erum að horfa til framtíðar og skapa klúbbnum sérstöðu og Klettur er sannarlega góður grunnur til að byggja á til framtíðar,“ segir Gunnar Ingi.
„Við höfum lagt mikla áherslu á að hér rísi hús í endanlegri mynd og að það falli vel inn í umhverfið. Hús sem mun sóma þessari starfsemi til framtíðar.“

Tíu þúsundasti Mosfellingurinn

Haraldur Sverrisson bæjarstjóri, Daðey Albertsdóttir, Tómas Guðmundsson og óskírður Tómasson.

Haraldur Sverrisson bæjarstjóri, Daðey Albertsdóttir, drengur Tómasson og Tómas Guðmundsson.

Mosfellingar eru nú orðnir 10.000 talsins og var það ung og stækkandi fjölskylda sem flutti í Skeljatanga sem kom Mosfellsbæ yfir þennan tímamótaáfanga.
Daðey Albertsdóttir og Tómas Guðmundsson fluttu í Mosfellsbæ í síðasta mánuði og eiga þriggja vikna óskírðan dreng.
Fjölskyldan flutti í Mosfellsbæ í byrjun maí en Daðey kemur úr Árbænum en Tómas úr Dalasýslunni.
„Okkur langaði að komast á stað þar sem stutt er í náttúruna en við erum einnig með hund á heimilinu. Eitt af skilyrðunum var líka að við yrðum í göngufæri í sundlaug.“

Haraldur Sverrisson bæjarstjóri færði fjölskyldunni blóm og gjafir í tilefni þessa merka áfanga en íbúafjöldi Mosfellsbæjar fer ört vaxandi og hefur tvöfaldast á síðastliðnum 20 árum. Þann 9. ágúst næstkomandi verða svo liðin 30 ár frá því Mosfellsbær fékk kaupstaðarréttindi. Árið 1987 var nafni sveitarfélagsins breytt úr Mosfellssveit í Mosfellsbæ. Íbúar á þeim tíma voru um 3.900 talsins. Í dag eru íbúar orðnir 10.000 talsins og er Mosfellsbær sjöunda stærsta sveitarfélag landsins. Haldið verður upp á afmælið í ágúst með fjölbreyttri dagskrá frá 9. ágúst og fram yfir bæjarhátíðina Í túninu heima sem fram fer í lok ágúst.

 

Burpees fyrir ferðalanga

Heilsumolar_Gaua_29

Ég var á Vík í Mýrdal um daginn. Flottur staður, á þaðan ýmsar góðar minningar. Það er magnað að standa á svörtu ströndinni og horfa út á hafið, lifandi öldur og drangarnir mynda saman töfrandi heild sem verður enn sterkari þegar hljóðið í öldunum bætist við.

Ég fékk þá flugu í höfuðið að gera burpees á ströndinni og leitaði ráða hjá sérstökum ráðgjafahópi sem ég tilheyri um fjöldann. Margar tillögur komu fram en mér leist best á þá sem vesturhúnverska dagmamman lagði í púkkið. Nefnilega að tengja saman staðsetningu, íslenska stafrófið og tölur. A/Á er 1, B er 2 og svo framvegis. Vík í Mýrdal þýðir samkvæmt þessu kerfi, 150 burpees. Ég tók þær snemma morguns, í hressandi Víkurroki á ströndinni. Notaði stigatalningu til að búta 150 niður í smærri einingar. Tók eina, labbaði nokkur skref, tók tvær, labbaði nokkur skref og þannig áfram koll af kolli þangað til 150 burpees voru komnar í hús. Labbaði til baka, kom við á tjaldstæðinu og tók nokkrar róðraæfingar á leikgrind – mótvægi við armbeygjurnar – og svo upp á hótel í ískalda sturtu. Hrikalega fín byrjun á degi.

Ráðgjafahópurinn hefur síðan stundað þetta á flakki sínu um landið og heiminn. Safnar saman burpeesum. Einn grjótharður heiðraði meðal annars Sveitarfélagið Hornafjörð með viðeigandi burpeesfjölda í síðustu viku. Það er áskorun! Fáið endilega hugmyndina lánaða í sumarfríinu. En munið að gera þetta vel, ekkert slugs. Góð æfingatækni er gulli betri.

P.s. Það má sleppa nokkrum armbeygjum af og til ef þið eruð mikið á flakki. Of margar armbeygjur gera engum gott.

P.s.s. Lýsing á burpee: Standið upprétt, niður í hnébeygju, hendur í gólf. Hoppa út í planka, gerið armbeygju, hoppið til baka. Standið upp og hoppið jafnfætis upp í loftið. Ein burpee komin. Njótið sumarsins á hreyfingu!

Heilsumolar Gaua
Mosfellingur 29. júní 2017

Báru félaga sinn upp á topp Úlfarsfells

Hlynur og bekkjarfélagar láta ekki hindranir stoppa sig.

Hlynur og bekkjarfélagar láta ekki hindranir stoppa sig.

Krakkarnir í 8. bekk Lágafellsskóla brölluðu ýmislegt síðustu skóladaga fyrir sumarfrí.
Meðal annars fóru nemendurnir í göngu upp á Úlfarsfellið. Hlynur Bergþór Steingrímsson, sem er í hjólastól, á greinilega góða vini í sínum bekk því þeim fannst ómögulegt að Hlynur kæmist ekki með.
Þeir gerði sér því lítið fyrir og rifu Hlyn upp úr stólnum og báru hann upp á topp. Strákarnir voru sjö talsins og skiptust á að bera Hlyn upp með skipulögðum hætti. Í mesta brattanum hjálpuðust þeir svo að til að ná takmarkinu.
Frábært framtak hjá félögunum sem fengu mikið lof fyrir. Frumkvæðið var þeirra og allir í skýjunum eftir vel heppnaða fjallaferð.
Á myndinni má sjá Hlyn og hans traustu vini, Ísak Tuma, Ísak Mána, Anton, Hallgrím, Guðmund, Eyþór og Kristófer Mána áður en lagt var í gönguna.

Bættu við bílaleigu til að auka þjónustu

Eigandinn Gunnlaugur Jónsson.

Eigandinn Gunnlaugur Jónsson.

Fjölskyldufyrirtækið Réttingaverkstæði Jóns B, sem staðsett er í Flugumýri 2, er með meira en 30 ára reynslu í bíla- og tjónaviðgerðum.
„Pabbi stofnaði þetta verkstæði árið 1978 í bílskúr í Bjargartanganum þar sem við bjuggum og þar byrjaði ég að vinna með honum. Árið 1983 keyptum við grunn hérna í Flugumýrinni og reistum þetta hús og höfum alla daga síðan verið hér og tvisvar byggt við húsnæðið,“ segir Gunnlaugur Jónsson sem er eigandi verkstæðisins í dag.

Bættu við bílaleigu
„Við erum fimm stjörnu, gæðavottað bílgreinasambands verkstæði og með samning við öll tryggingafélögin. Við erum rótgróið fyrirtæki hér í Mosfellsbæ og þjónustum mörg fyrirtæki hér í bæ og Mosfellinga.
Við erum mest í svokölluðum tryggingatjónum en leggjum okkur fram um að leysa öll verkefni sem koma til okkar. Einn þáttur í því að auka þjónustustigið við okkar viðskiptavini er bílaleiga sem við höfum nýverið stofnað.
Það er til hagsbóta fyrir viðskiptavini okkar að geta fengið bílaleigubíl hjá okkur á meðan við gerum við bílinn þeirra. En við finnum líka fyrir aukinni eftirspurn eftir bílum hjá ferðamönnum sem eru hér í bænum.“

Reynum að leysa öll mál varðandi bíla
Þrátt fyrir að Gulli og hans starfsmenn sérhæfi sig í réttingum og málun á bílum þá veita þeir þjónustu á fleiri sviðum.
„Við erum með bilanagreiningatölvu sem er í raun sú flottasta sem er á markaðnum í dag og gerum mikið af því að bilanagreina bæði nýja og gamla bíla. Við sérhæfum okkur til að mynda í viðgerðum á loftkælingum í bílum og rafmagnsbílum.
Þetta er í rauninni enn einn þátturinn í því að geta leyst sem flest vandamál sem viðkoma bílum og þjónusta okkar viðskiptavini á sem bestan hátt,“ segir Gulli að lokum.

33 nemendur brautskráðir frá framhaldsskólanum

Útskrift vor 2017. Efsta röð frá vinstri: Gestur Ólafur Ingvarsson, Kristján Davíð Sigurjónsson, Stefán Fannar Jónsson, Berglind Sara Björnsdóttir, Árni Valur Þorsteinsson, Rúnar Sindri Þorsteinsson, Benedikt Svavarsson, Davíð Sigurjónsson, Anton Þór Sævarsson, Andrea Ósk Finnsdóttir og Rakel Anna Óskarsdóttir. Miðröð frá vinstri: Arnar Franz Baldvinsson, Brynhildur Sigurðardóttir, Lára Björk Jónsdóttir, Freyja Lind Hilmarsdóttir, Völundur Ísar Guðmundsson, Eggert Smári Þorgeirsson, Kristín Dís Gísladóttir, Sandra Rós Jónasdóttir, Magnea Ása Magnúsdóttir, Margrét Phuong My Du og Ársól Þöll Guðmundsdóttir. Neðsta röð frá vinstri: Guðrún Guðjónsdóttir aðstoðarskólameistari, Geir Gunnar Geirsson, Sigursteinn Birgisson, Brynhildur Þórðardóttir, Karen Sunna Atladóttir, Bryndís Sigurðardóttir, Ásgerður Elín Magnúsdóttir, Valgeir Bjarni hafdal, Hafþór Ari Gíslason, Alída Svavarsdóttir og Guðbjörg Aðalbergsdóttir skólameistari. Á myndina vantar: Björn Bjarnarson og Hall Hermannsson Aspar.

Útskrift vor 2017. Efsta röð frá vinstri: Gestur Ólafur Ingvarsson, Kristján Davíð Sigurjónsson, Stefán Fannar Jónsson, Berglind Sara Björnsdóttir, Árni Valur Þorsteinsson, Rúnar Sindri Þorsteinsson, Benedikt Svavarsson, Davíð Sigurjónsson, Anton Þór Sævarsson, Andrea Ósk Finnsdóttir og Rakel Anna Óskarsdóttir. Miðröð frá vinstri: Arnar Franz Baldvinsson, Brynhildur Sigurðardóttir, Lára Björk Jónsdóttir, Freyja Lind Hilmarsdóttir, Völundur Ísar Guðmundsson, Eggert Smári Þorgeirsson, Kristín Dís Gísladóttir, Sandra Rós Jónasdóttir, Magnea Ása Magnúsdóttir, Margrét Phuong My Du og Ársól Þöll Guðmundsdóttir. Neðsta röð frá vinstri: Guðrún Guðjónsdóttir aðstoðarskólameistari, Geir Gunnar Geirsson, Sigursteinn Birgisson, Brynhildur Þórðardóttir, Karen Sunna Atladóttir, Bryndís Sigurðardóttir, Ásgerður Elín Magnúsdóttir, Valgeir Bjarni hafdal, Hafþór Ari Gíslason, Alída Svavarsdóttir og Guðbjörg Aðalbergsdóttir skólameistari. Á myndina vantar: Björn Bjarnarson og Hall Hermannsson Aspar.

Útskriftarhátíð Framhaldsskólans í Mosfellsbæ fór fram laugardaginn 27. maí við hátíðlega athöfn.
Að þessu sinni voru alls þrjátíu og þrír nemendur brautskráðir, sjö af félags- og hugvísindabraut og tíu af náttúru­vísindabraut. Af opinni stúdentsbraut brautskráðust fjórtán nemendur. Einnig brautskráðust tveir nemendur af starfsbraut skólans.
Útskriftarnemendum voru veittar viðurkenningar fyrir góðan námsárangur:
Arnar Franz Baldvinsson fékk viðurkenningu fyrir góðan árangur í kvikmyndafræði og Valgeir Bjarni Hafdal fékk viðurkenningu fyrir góðan árangur í umhverfisfræði. Fyrir góðan árangur í sálfræði fékk Björn Bjarnarson viðurkenningu.
Fyrir góðan árangur í dönsku, íslensku, spænsku, og náttúrufræði fékk Kristján Davíð Sigurjónsson viðurkenningar. Viðurkenningar fyrir góðan árangur í dönsku og íslensku fékk Rakel Anna Óskarsdóttir. Mosfellsbær veitti jafnframt Kristjáni Davíð viðurkenningu fyrir hæstu einkunn á stúdentsprófi.

Þrjár viðurkenningar til þróunar og nýsköpunar

Tekið við viðurkenningum. Ásta, Magne, Emma Sól Einar Karl og Anna Ólöf.

Tekið við viðurkenningum. Ásta, Magne, Emma Sól, Einar Karl og Anna Ólöf.

Þróunar- og nýsköpunarviðurkenning Mosfellsbæjar var afhent í Listasalnum þriðjudaginn 23. maí.
Óskað var sérstaklega eftir hugmyndum eða verkefnum sem styrkja ímynd Mosfellsbæjar sem heilsubæjar.
Alls bárust sjö gildar umsóknir og lagði þróunar- og ferðamálanefnd til við bæjarstjórn að afhentar yrðu þrjár viðurkenningar sem sjá má hér að neðan.
„Öllum umsækjendum er þakkað fyrir þátttökuna og þeir hvattir til að halda áfram að koma á framfæri hugmyndum um eflingu nýrra verkefna í þágu samfélagsins og heilsubæjarins Mosfellsbæjar,“ segir Rúnar Bragi Guðlaugsson, formaður þróunar- og ferðamálanefndar Mosfellsbæjar.

HRINGURINN – Magne Kvam
Fjallahjólastígur um fellin í kringum Mosfellsbæ. Hægt væri að leggja um 40 km hring með því að nýta þá stíga sem fyrir eru með breytingum og bæta við nýjum sérhönnuðum leiðum.
Stígurinn yrði opinn allt árið. Fjallahjóla og hlaupastígur á sumrin. Skíðagöngu- og breiðhjólastígur á veturna. Hringurinn er bæði fjölskylduvænn afþreyingarmöguleiki og áfangastaður fjallahjólreiðarmanna.
Peningastyrkur alls 300 þúsund krónur.

LEIKUR AÐ LÆRA – Kristín Einarsdóttir
Kennsluaðferð þar sem börnum á aldrinum 2 – 10 ára eru kennd öll bókleg fög í gegnum leiki og hreyfingu á skemmtilegan og árangursríkan hátt. Ný hugsun og kennsluaðferð um hvernig hægt er að kenna börnum í gegnum hreyfingu og leiki. Þar sameinast mörg heilsueflandi og lýðheilsu markmið.
Heilsueflandi skóli nýtir góðs af kennsluaðferðinni enda samræmist hann aðalnámskrá leik- og grunnskóla.
Peningastyrkur alls 200 þúsund krónur.

HEILSUDAGBÓKIN MÍN – Anna Ólöf Sveinbjörnsdóttir
Hugmyndin að Heilsudagbókinni er byggð á áralangri viðleitni höfundar til að öðlast betri heilsu og meiri lífsgæði. Heilsudagbókin er heildræn nálgun á bættar lífsvenjur þar sem lögð er áhersla á hreyfingu, mataræði og ekki síst huglæga eða andlega vinnu.
Heilsudagbókin er ódagsett sex vikna dagbók sem hjálpar notandanum að bæta líf sitt með markmiðasetningu, áætlunargerð, verkefnalista og fleiru.
Peningastyrkur alls 200 þúsund krónur.

Var skugginn af sjálfri sér

herdissigurjons

Herdís Sigurjónsdóttir smitaðist af svínaflensu árið 2009 og hefur glímt við erfið veikindi síðan.

Herdís hefur frá unga aldri haft áhuga fyrir nærumhverfi sínu. Hún er menntuð í lífeinda-, umhverfis- og auðlindafræðum og er reynslumikill ráðgjafi á sviði neyðarstjórnunar vottað af Alþjóðasamtökum hamfarasérfræðinga IAEM.
Herdís hefur einnig látið stjórnmál sig varða og sat í bæjarstjórn Mosfellsbæjar í tæp 15 ár en baðst lausnar árið 2013.

Herdís Sigurjónsdóttir fæddist í heimahúsi á Siglufirði 8. desember 1965. Foreldrar hennar eru þau Ásdís Magnea Gunnlaugsdóttir húsmóðir og alþýðulistakona og Sigurjón Jóhannsson skipstjóri. Sigurjón lést árið 2010.
Herdís á þrjú systkini, þau Kristínu, Jóhann og Sigurjón, en hann lést árið 1973.

Léku sér á ruslahaugunum
„Ég ólst upp á Siglufirði sem var í þá tíð ævintýri líkast fyrir krakka. Síldin var farin og eftir stóðu ónýtar bryggjur, verksmiðjur og braggar sem var gaman að leika sér í. Okkur þótti líka gaman að leika okkur á ruslahaugunum og segi ég nú oft í gríni að það sé þess vegna sem ég hef svona mikinn áhuga á úrgangsmálum í dag.
Ég elskaði að vera í bústaðnum okkar við Miklavatn. Mamma var með okkur systkinin þar öll sumur á meðan pabbi var á sjónum, þarna lærði maður að lifa í núinu.
Við fjölskyldan fluttum yfir á Raufarhöfn og þar bjuggum við í eitt ár. Pabbi starfaði sem skipstjóri á Rauðanúpi.“

Er enn smá pönkari í mér
„Ég gekk í Barnaskóla Siglufjarðar og fór svo í gagnfræðaskólann. Það var gaman í skólanum, skemmtilegast þótti mér í raungreinum og listum.
Haustið 1981 fór ég í Héraðsskólann á Reykjum í Hrútafirði. Í skólanum var náinn hópur 100 nemanda og við vorum eins og fjölskylda, deildum sorg og gleði. Þarna eignaðist ég nokkra af mínum bestu og tryggustu vinum.
Á þessum tíma var ég svarthærð og burstaklippt og ég verð að játa að ég er enn smá pönkari í mér,“ segir Herdís og glottir.

Vann á togara í Alaska
Herdís flutti suður og fór í Kvennaskólann í Reykjavík og útskrifast þaðan vorið 1985.
„Eftir stúdenspróf fór ég til Ameríku til að vera bróður mínum og mágkonu til halds og traust þar sem þau áttu von á frumburði sínum. Mér var síðan boðin vinna á togara og ég sló til og var á sjó í Alaska einn vetur en þar voru einnig nokkrir aðrir Íslendingar við störf.
Ég sótti um inngöngu í Tækniskólann áður en ég fór heim því mér hafði borist til eyrna að heima vantaði meinatækna svo mér fannst það tryggur kostur. Í skólanum kynntist ég Ella mínum, Erlendi Fjeldsted, sem er héðan úr Mosfellsbænum. Hann byrjaði á sama tíma og ég og fór í byggingatæknifræði.
Á sumrin starfaði ég á sjúkrahúsinu á Siglufirði og sem barþjónn á ferjunni Norrænu. Það var frábær skemmtun, ekki síst þegar það þurfti að æfa björgunaræfingar á færeysku.”

Vann við fisksjúkdómarannsóknir
„Eftir útskrift 1989 fór ég að vinna við fisksjúkdómarannsóknir á Keldum. Við Elli fluttum í Mosó árið 1990 og giftum okkur með pompi og prakt sama ár. Frumburðurinn, Ásdís Magnea, leit dagsins ljós árið 1992, Sturla Sær árið 1995 og svo fæddist Sædís Erla árið 2003 og er sómi okkar og ljómi eins og eldri systkini hennar.
Um aldamótin byggðum við fjölskyldan okkur hús í Rituhöfðanum.“

Besti skóli sem ég hef farið í
Herdís hefur látið stjórnmál sig varða og sat í bæjarstjórn Mosfellsbæjar í tæp 15 ár. „Mér bauðst 3. sæti á lista Sjálfstæðismanna í Mosfellsbæ í bæjarstjórnarkosningum árið 1998 og tók þá fyrst sæti í bæjarstjórn. Ég hef gaman af því að umgangast fólk og gefa af mér og fyrir slíkt fólk eru bæjarmál, þátttaka í pólitík og félagsstörf yfir höfuð skemmtileg.
Það er náttúrulega dásamlegt að búa í Mosfellsbæ og ala hér upp börn. Það eru forréttindi að hafa fengið að taka þátt í uppbyggingu samfélagsins. Ég segi oft að þáttaka mín í sveitarstjórnarmálunum sé sá besti skóli sem ég hef farið í.“

Veiktist af svínaflensu
Herdís varð að hætta störfum á Keldum vegna ofnæmis. Hún byrjaði að vinna hjá Rauða krossi Íslands árið 1998 og starfaði þar til ársins 2007 við hin ýmsu störf. Hún fór í meistaranám í umhverfis- og auðlindafræðum í HÍ og útskrifaðist vorið 2009 og byrjaði síðan í doktorsnámi. Um haustið veikist hún og fjölskylda hennar öll af svínaflensu. Herdís var þá nýbyrjuð í starfi hjá VSÓ ráðgjöf.
„Ég hef aldrei náð mér eftir að ég veiktist. Fyrst á eftir hélt ég að breytingaskeiðið væri að kikka svona rosalega inn en svo var nú ekki. Ég fékk svo endalausar sýkingar og leið alltaf eins og ég væri með flensu. Mér fannst ég einhvern veginn vera bara skugginn af sjálfri mér.“

Átti mörg samtöl við Guð
„Pabbi minn lést árið 2010 og fékk það mikið á mig. Annað áfall reið yfir í fjölskyldunni þegar litli frændi minn lést 2012, eins og hálfs árs. Þetta var óskaplega erfiður tími og maður átti mörg samtöl við Guð á þessum tíma.
Árið 2013 fékk ég veirusýkingu í miðtaugakerfið sem ég hef ekki enn náð mér af. Ég varð viðkvæm fyrir hávaða og gekk með sólgleraugu jafnt inni sem úti. Ég sat í bæjarstjórn á þessum tíma en baðst lausnar vegna orkuleysis.“

Jákvæð og bjartsýn að eðlisfari
„Það var ekki fyrr en sumarið 2015 að ég var greind með taugasjúkdóminn ME eða síþreytu eins og hann er kallaður á íslensku. Ég kom mér strax í samband við forsvarsmenn ME félagsins en félagið var stofnað árið 2011. Ég gekk í vísindahóp og fór að afla mér upplýsinga um sjúkdóminn. Í dag er ég virk í félaginu sem er mjög gefandi.
Nú er verið að undirbúa ráðstefnu sem haldin verður á Grand Hótel 28. september n.k. Þar munu erlendir sérfræðingar fræða íslenskt heilbrigðisfólk og sjúklinga um ME sjúkdóminn. Þar verður einnig rætt um Akur­eyrarveikina sem gekk yfir árið 1950 og er skráð sem faraldur í ME sögunni.
Staða mín í dag er sú að ég er óvinnufær en nýti nú tímann minn í að vinna í doktorsritgerðinni minni sem ég hef ekki snert á í tvö ár.
Þessi ganga mín undanfarin ár hefur vissulega verið erfið og er mikil kúvending en ég reyni að nýta reynsluna mér til góðs og hjálpar því ég er jákvæð og bjartsýn að eðlisfari.“

Mosfellingurinn 8. júní 2017
Myndir og texti: Ruth Örnólfs

Afturelding tekur þátt í Evrópukeppni félagsliða

umfaevrópa

Ásgeir Sveinsson formaður meistaraflokksráðs.

Ásgeir Sveinsson formaður meistaraflokksráðs.

Ljóst er að meistaraflokkur Aftureldingar í handknattleik mun leika í EHF Evrópukeppni félagsliða í haust. Í keppninni taka þátt bikarmeistarar auk annarra toppliða í hverju landi sem vinna sér inn þátttökurétt. Því er um að ræða sterka keppni með öllum bestu liðum Evrópu.
„Þetta er gríðarlega spennandi verkefni og það eru allir klárir í slaginn,“ segir Ásgeir Sveinsson formaður meistaraflokksráðs Aftureldingar.

Hvernig öðluðumst við þátttökurétt?
„Við fáum keppnisrétt vegna þess að Afturelding lék í bikarúrslitum gegn Val í vetur. Valsararar fóru með sigur af hólmi en urðu jafnframt Íslandsmeistarar í vor og öðlast þannig rétt til að leika í keppni meistaraliða.“

Er þetta eitthvað í líkingu við Áskorendakeppni Evrópu?
„Nei, þetta er talsvert sterkari keppni en Valsararnir voru í um daginn.“

Fylgir þessu ekki mikill kostnaður?
„Jú, kostnaðurinn er gríðarlegur, 2-3 milljónir á hverja umferð, sem fer svolítið eftir því hvar við lendum. Við ætlum að borga hluta af þessu og strákarnir í liðinu ætla að borga 75 þúsund á mann í hverja umferð. Svo verður farið í miklar fjár­aflanir.
Við erum auðvitað ekkert atvinnumannalið en ætlum að láta þetta ganga upp. Til stóð að fara í æfingaferð til Danmerkur en við ætlum að taka slaginn um Evrópu í staðinn. Þetta er virkilega spennandi og þroskandi fyrir okkar unga og efnilega lið því hjá okkur eru margir ungir leikmenn sem stefna að atvinnumennsku.“

Hafa lið verið að nýta sér þátttökurétt í þessum keppnum?
„Það er allur gangur á því en er að byrja aftur núna. Haukarnir hafa verið duglegir í gegnum tíðina. Þetta er rosalega spennandi dæmi. Ef við komumst í 2. umferð getum við mætt toppliðum í Þýskalandi eða Skandinavíu sem væri algjör draumur.“

Skiptir þetta einhverju máli fyrir okkur?
„Já, þetta hefur mikla þýðingu og er stórt skref upp á við fyrir félagið.
Afturelding hefur tekið þátt í keppninni áður en það er orðið ansi langt síðan. Spilað var við Drammen rétt fyrir aldamótin og Bjarki Sig var seldur þangað í kjölfarið.“

Hvenær hefst svo keppnin?
„Það fer eftir því hvernig þetta raðast í styrkleikaflokka. Við gætum átt fyrsta leik í byrjun september.“

33 nemendur brautskráðir frá framhaldsskólanum

Útskrift vor 2017. Efsta röð frá vinstri: Gestur Ólafur Ingvarsson, Kristján Davíð Sigurjónsson, Stefán Fannar Jónsson, Berglind Sara Björnsdóttir, Árni Valur Þorsteinsson, Rúnar Sindri Þorsteinsson, Benedikt Svavarsson, Davíð Sigurjónsson, Anton Þór Sævarsson, Andrea Ósk Finnsdóttir og Rakel Anna Óskarsdóttir. Miðröð frá vinstri: Arnar Franz Baldvinsson, Brynhildur Sigurðardóttir, Lára Björk Jónsdóttir, Freyja Lind Hilmarsdóttir, Völundur Ísar Guðmundsson, Eggert Smári Þorgeirsson, Kristín Dís Gísladóttir, Sandra Rós Jónasdóttir, Magnea Ása Magnúsdóttir, Margrét Phuong My Du og Ársól Þöll Guðmundsdóttir. Neðsta röð frá vinstri: Guðrún Guðjónsdóttir aðstoðarskólameistari, Geir Gunnar Geirsson, Sigursteinn Birgisson, Brynhildur Þórðardóttir, Karen Sunna Atladóttir, Bryndís Sigurðardóttir, Ásgerður Elín Magnúsdóttir, Valgeir Bjarni Hafdal, Hafþór Ari Gíslason, Alída Svavarsdóttir og Guðbjörg Aðalbergsdóttir skólameistari. Á myndina vantar: Björn Bjarnarson og Hall Hermannsson Aspar.

Útskrift vor 2017. Efsta röð frá vinstri: Gestur Ólafur Ingvarsson, Kristján Davíð Sigurjónsson, Stefán Fannar Jónsson, Berglind Sara Björnsdóttir, Árni Valur Þorsteinsson, Rúnar Sindri Þorsteinsson, Benedikt Svavarsson, Davíð Sigurjónsson, Anton Þór Sævarsson, Andrea Ósk Finnsdóttir og Rakel Anna Óskarsdóttir. Miðröð frá vinstri: Arnar Franz Baldvinsson, Brynhildur Sigurðardóttir, Lára Björk Jónsdóttir, Freyja Lind Hilmarsdóttir, Völundur Ísar Guðmundsson, Eggert Smári Þorgeirsson, Kristín Dís Gísladóttir, Sandra Rós Jónasdóttir, Magnea Ása Magnúsdóttir, Margrét Phuong My Du og Ársól Þöll Guðmundsdóttir. Neðsta röð frá vinstri: Guðrún Guðjónsdóttir aðstoðarskólameistari, Geir Gunnar Geirsson, Sigursteinn Birgisson, Brynhildur Þórðardóttir, Karen Sunna Atladóttir, Bryndís Sigurðardóttir, Ásgerður Elín Magnúsdóttir, Valgeir Bjarni Hafdal, Hafþór Ari Gíslason, Alída Svavarsdóttir og Guðbjörg Aðalbergsdóttir skólameistari. Á myndina vantar: Björn Bjarnarson og Hall Hermannsson Aspar.

Útskriftarhátíð Framhaldsskólans í Mosfellsbæ fór fram laugardaginn 27. maí við hátíðlega athöfn.
Að þessu sinni voru alls þrjátíu og þrír nemendur brautskráðir, sjö af félags- og hugvísindabraut og tíu af náttúru­vísindabraut. Af opinni stúdentsbraut brautskráðust fjórtán nemendur. Einnig brautskráðust tveir nemendur af starfsbraut skólans.
Útskriftarnemendum voru veittar viðurkenningar fyrir góðan námsárangur:
Arnar Franz Baldvinsson fékk viðurkenningu fyrir góðan árangur í kvikmyndafræði og Valgeir Bjarni Hafdal fékk viðurkenningu fyrir góðan árangur í umhverfisfræði. Fyrir góðan árangur í sálfræði fékk Björn Bjarnarson viðurkenningu.
Fyrir góðan árangur í dönsku, íslensku, spænsku, og náttúrufræði fékk Kristján Davíð Sigurjónsson viðurkenningar. Viðurkenningar fyrir góðan árangur í dönsku og íslensku fékk Rakel Anna Óskarsdóttir. Mosfellsbær veitti jafnframt Kristjáni Davíð viðurkenningu fyrir hæstu einkunn á stúdentsprófi.

Svava Ýr hlýtur Gulrótina

Svava Ýr Baldvinsdóttir tekur við lýðheilsuviðurkenningu Mosfellsbæjar úr höndum Ólafar Sívertsen verkefnastjóra Heilsueflandi samfélags í Mosfellsbæ. Gulrótin var afhent í fyrsta sinn á Heilsudaginn 1. júní.

Svava Ýr Baldvinsdóttir tekur við lýðheilsuviðurkenningu Mosfellsbæjar úr höndum Ólafar Sívertsen verkefnastjóra Heilsueflandi samfélags í Mosfellsbæ. Gulrótin var afhent í fyrsta sinn á Heilsudaginn 1. júní.

Heilsudagurinn í Mosfellsbæ var haldinn fimmtudaginn 1. júní. Dagurinn hófst snemma með hressandi morgungöngu á Mosfellið. Um kvöldið fór síðan fram áhugavert málþing í framhaldsskólanum og Gulrótin afhent í fyrsta sinn.
Gulrótin er lýðheilsuviðurkenning Mosfellsbæjar sem veitt er fyrir brautryðjendastarf í þágu heilsueflingar og bættrar lýðheilsu íbúa.
Svava Ýr Baldvinsdóttir íþróttakennari hlaut viðurkenninguna en hún hefur í áratugi unnið ötullega að lýðheilsu og heilsueflingu allra aldurshópa í Mosfellsbæ. Svava hefur m.a. starfrækt Íþróttaskóla barnanna hjá Aftureldingu í 25 ár en skólinn nýtur mikilla vinsælda. Þá hefur hún þjálfað handbolta í fjölmörg ár og haft umsjón með æfingahópi Morgunhananna í World Class, svo fátt eitt sé nefnt.
„Svava hefur kennt, frætt og byggt upp stóra hópa með heilsueflingu að leiðarljósi,“ segir í rökstuðningi.

Kuldinn

Heilsumolar_Gaua_8juni

Ég er búinn að vera að vinna með kuldann í vor. Kaldar sturtur og sjóböð eru í uppáhaldi. Köldu kerin í sundlaugunum eru líka hressandi. Mér finnst þetta hafa haft mjög góð áhrif á mig. Ég finn sérstaklega mun þegar ég er búinn að vera að puða og púla. Það er eins og þreyttur líkaminn endurnærist í kalda vatninu, lifni einhvern veginn við aftur.

Best finnst mér að enda á kaldri sturtu og finna líkamann hita sig upp aftur, hægt og rólega. En maður þarf að fara að rólega af stað og venja sig við kuldann. Það er mjög mikilvægt. Byggja upp kuldaþol. Æfa sig. Verða smám saman betri í að vinna með kuldann.

Það er mikilvægt að stýra önduninni, anda hægt og rólega og slaka á, annars á maður ekki möguleika í kalda vatninu. Maður þarf líka að stýra hugsunum sínum. Hugsa um hvað þetta sé gott fyrir mann, að kuldinn geri mann hraustari og hressari. Hafi góð áhrif á mann. Þannig hugsanir hjálpa manni að ná stjórn á önduninni. Það hjálpar ekki hugsa um hvað þetta sé nú hrikalega kalt og eigi eftir að verða erfitt og vont. Jafnvel þótt þetta sé erfitt til að byrja með. Eins og með allt sem er erfitt en gott fyrir mann, þá tekur líkaminn smám saman stjórnina og hvetur mann til dáða.

Daglegu köldu sturturnar voru ekki auðveldar fyrst en núna hlakka ég til þeirra. Hlakka til þess að finna ískalt og hressandi vatnið skella á mér. Tilfinning er góð á meðan ég er í kalda vatninu og frábær eftir á.

Sjórinn er svo alltaf bestur. Stútfullur af lífi og orku. Ég hlakka til að stinga mér í spegilslétta íslenska firði í sumar. Fyrir sunnan, austan, norðan og vestan. Njóta þess að svamla í ferskri náttúrunni í sumarsólinni. Njótum ferðalagsins!

Heilsumolar Gaua
Mosfellingur 8. júní 2017

Fjölbreyttar gönguleiðir við allra hæfi

Ævar Aðalsteinsson í hlíðum Helgafells.

Ævar Aðalsteinsson í hlíðum Helgafells en búið er að stika um 90 km af gönguleiðum í Mosfellsbæ.

Farsælt samstarf á milli Mosfellsbæjar og skátafélagsins Mosverja, um að auðvelda Mosfellingum að nýta sér útivistasvæði í kringum bæinn til útivistar og gönguferða, hefur staðið yfir í nokkurn tíma. „Þetta byrjaði á árunum 2004-2005 en þá fengu skátarnir fyrirspurn frá Íþrótta- og tómstundanefnd þar sem óskað var eftir hugmyndum að útivistaverkefnum,“ segir Ævar Aðalsteinsson sem hefur haft yfirumsjón með þessu verkefni frá byrjun. „Stikaðar gönguleiðir um fellin og dalina í kringum Mosfellsbæ var ein af þeim hugmyndum. Það var svo árið 2008 sem undirritaður var samstarfssamningur milli þessara aðila en þá lá fyrir bæði verkefnaáætlun og kostnaðaráætlun fyrir þetta verkefni.“ Góð verkáætlun í byrjun „Landsvæðið var skipulagt þannig í byrjun að við hefðum yfirsýn yfir svæðið. Fyrsta sumarið fór í skipulagningu og meðal fyrstu verkefna var að ræða við landeigendur og fá heimild til að fara yfir þeirra eignalönd. Hannað var göngukort fyrir heildarsvæðið, hönnuð voru skilti, vegprestar, girðingastigar og göngubrýr. Sótt var um leyfi fyrir bílastæðum og fleiru sem fylgdi verkefninu. En sumarið 2009 voru fyrstu 10 km stikaðir,“ segir Ævar og vill meina að ein af ástæðunum fyrir að fólki finnst gott að búa í Mosfellsbæ sé nálægðin við ósnerta náttúru. Stikaðar gönguleiðir 90 km „Þetta verkefni hefur gengið mjög vel og ég held að allir séu sammála um að það er aukin umferð göngufólks á svæðinu. Staðan er þannig í dag að búið er að stika um 90 km af gönguleiðum, útbúa um 10 bílastæði, fjöldan allan af girðingastigum og göngubrúm.“ „Á svæðinu eru um 30 vegprestar og 30 upplýsinga- og fræðsluskilti. Á þessum skiltum eru staðarheiti, vegalengdir og ýmsar fróðlegar upplýsingar, bæði landfræðilegar og sögulegar. Gönguleiðirnar eru fjölbreyttar og því ættu allir að finna eitthvað við sitt hæfi. Við skipulögðum göngurnar með það í huga að teyma göngufólkið á fallega staði á svæðinu.“ Úlfarsfellið fjölfarnasta útivistarsvæðið „Verkáætluninni, eins og hún var gerð í upphafi, fer að ljúka og nú tekur við viðhaldsstig. Svo er það spurningin hvert viljum við fara með þetta verkefni og það eru þegar komnar nokkrar hugmyndir að næstu skrefum.“ „Nú í sumar ætlum við að leggja stíg á gönguleiðina frá Skarhólabraut upp á Úlfarsfellið, sem er að verða eitt fjölsóttasta útivistarsvæðið á höfuðborgarsvæðinu. Reykjvíkingar eru að hugsa um að gera svipað sín megin og skógræktin í Hamrahlíðarskógi ætlar að gera stíg frá sínu svæði. Þetta er jákvæð þróun og við höfum fengið mikinn meðbyr frá almenningi,“ segir Ævar að lokum og tekur fram að umgengnin á gönguleiðunum sé alveg til fyrirmyndar og hvetur Mosfellinga til að nýta sér gönguleiðirnar í kringum bæinn okkar. Hér er hægt að skoða kort af stikuðum gönguleiðum í Mosfellsbæ. (Einnig er hægt að nálgast göngukort í þjónustuveri Mosfellsbæjar, sundlaugunum, bókasafninu og víðar)

Flug og skotfimi eiga vel saman

mosfellingurinn_bara+

Bára Einarsdóttir framkvæmdastjóri og eigandi Bílaparta ehf. er Íslands- og bikarmeistari í 50 metra liggjandi riffli.

Það er ekki hægt að segja annað en að Bára Einarsdóttir fari óhefðbundnar leiðir þegar kemur að vali á áhugamálum. Dagsdaglega starfar hún innan um bíla og bílaparta, á góðviðrisdögum skreppur hún í flugtúr á sinni eigin flugvél og þess á milli meðhöndlar hún riffla og skammbyssur.
Hún veit ekkert skemmtilegra en að skella sér í veiðitúr erlendis í góðra vina hópi og síðastliðið haust var haldið til Eistlands þar sem veiddir voru elgir og rádýr.

Bára fæddist í Hafnarfirði 4. maí 1972. Hún er dóttir hjónanna Þóru M. Sigurðardóttur fv. bankastarfsmanns og Einars D.G. Gunnlaugssonar, tækniteiknara. Systkini Báru eru þau Sonja Sól og Einar Sigurður.

Með þeim fyrstu í Grafarvoginn
„Ég bjó í Reykjavík til þriggja ára aldurs en árið 1974 flutti fjölskyldan búferlum til Hafnar í Hornarfirði þar sem við bjuggum í átta ár. Móðurafi minn og amma bjuggu á Höfn og afi rak bakaríið hjá Kaupfélagi Austur-Skaftfellinga.
Móðir mín vann við verslunarstörf og faðir minn við hin ýmsu störf. Síðustu tvö árin okkar á Höfn vann hann í Síldarsöltunarstöðinni en við byggingu nýrrar söltunar­stöðvar varð hann fyrir alvarlegu vinnuslysi sem olli því að við þurfum að flytja til Reykjavíkur.
Við fluttum í Breiðholtið og ég gekk tvo vetur í Fellaskóla. Við fluttum svo yfir í Grafarvoginn og vorum með þeim fyrstu sem fluttu þangað. Fyrsta veturinn minn þar gekk ég í Laugarnesskóla en þegar Foldaskóli var tilbúinn þá færðist ég yfir. Síðasta veturinn í gagnfræðaskólanum var öllum bekkjunum skipt upp og ég valdi að fara í Ölduselsskóla og sé ekki eftir því.“

Fórum á hestbak á Keldum
„Það var skemmtilegt að búa í Grafarvogi. Þetta var fyrst um sinn lítið samfélag og við sem bjuggum þarna vorum mjög náin.
Vinahópurinn var nú ansi oft uppátækjasamur og við vorum ekki eftirlæti kennaranna. Við fórum stundum á hestbak á hestunum hjá Tilraunastöðinni á Keldum og höfðum mikið gaman af.
Eftir grunnskóla fór ég að vinna en með skólanum hafði ég verið að vinna í Kólus­ lakkrísgerð og í Miklagarði og í fiski á sumrin.“

Fluttu fyrirtækið til Mosfellsbæjar
„Í mars 1988 kynntist ég eiginmanni mínum, Ásgeiri Jamil Allanssyni. Við Jamil eigum tvo syni, Atla fæddan 1990 og Andra fæddan 1994. Atli og kona hans Ágústa eiga einn son, Alex Jamil, sem er fæddur 2010.
Við Jamil unnum saman fyrst í sjoppu og í Bílaþjónustunni í Dugguvogi en faðir Jamils rak það fyrirtæki. Við opnuðum Bílapartasöluna við Rauðavatn í júní 1989 en fluttum svo fyrirtækið að Grænumýri í Mosfellsbæ þar sem við erum í dag. Við fjölskyldan fluttum svo hingað árið 2003 og hér finnst okkur gott að vera.
Atli og Ágústa starfa með okkur á Bíla­partasölunni en Andri Jamil er í flugvirkja­námi í Grikklandi. Fjölskyldan skiptir mig mestu máli, við erum mjög samrýmd enda vinnum við öll saman og erum góðir vinir.“

Lærði arabísku í Egyptalandi
Bára fór í Skrifstofu- og ritaraskólann, Tölvu- og viðskiptaskólann og lærði líka svæðanudd. Í 12 ár sýndi hún hunda á sýningum hjá HRFÍ og var einnig formaður Spaniel-deildarinnar.
Bára er löggildur bílasali og fór á Cabas­námskeið og plastsuðunámskeið hjá Iðunni. Hún hefur farið á nokkur tungumálanámskeið og hefur meðal annars lært arabísku. Hún lagði leið sína til Egyptalands í nokkrar vikur til að læra arabískuna betur.
Jamil keppti í torfæru í sex ár og átti það hug þeirra hjóna allan þann tíma.

Fóru til Eistlands í veiðiferð
„Það var árið 2013 sem Jónas Hafsteinsson lögreglumaður kynnti mig fyrir skotfimi hjá Skotíþróttafélagi Kópavogs. Það var ekki aftur snúið því ég kolféll fyrir þessu og byrjaði að æfa um haustið.
Ég varð Íslandsmeistari í loftskammbyssu 2014 og hef síðan þá náð nokkrum titlum og sett nokkur Íslandsmet í liðakeppni í hinum ýmsu skotgreinum. Ég var valin skotíþróttakona ársins hjá félaginu árið 2015 og 2016.
Ég varði Íslands- og bikarmeistaratitilinn minn á dögunum í 50 metra liggjandi riffli og er að sjálfsögðu ánægð með það. Í dag er ég varaformaður Skotíþróttafélagsins.
Stöllur mínar, Guðrún Hafberg og Margrét Linda, hafa líka sett nokkur Íslandsmet þetta keppnisbilið en það er gaman að segja frá því að við erum allar úr Mosfellsbæ.
Ég hef mjög gaman af því að veiða og síðast­liðið haust fórum við nokkrar vinkonur saman til Eistlands í veiðiferð. Þar hittum við fleiri konur sem voru í sama tilgangi og við.
Ég veiddi þrjú rádýr í þessari ferð og stefni á að fara aftur út í haust ásamt því að fara á gæs hér heima.“

Keyptu sér flugvél í Bandaríkjunum
„Ég fór að læra að fljúga í Flugskólanum Geirfugli árið 2015 og útskrifaðist með einkaflugmannspróf sumarið 2016. Skotfimi og flug eiga vel saman, maður er í skotfiminni inni á veturna og svo tekur flugið við á sumrin.
Við Jamil keyptum okkur flugvél frá Bandaríkjunum sl. haust en hann flýgur einnig mikið. Ég flaug á sjóflugvél í fyrsta skipti um páskana á Flórída og mun ég reyna að fara sem oftast til þess.
Það er ekkert sem jafnast á við listflug. Sigurjón Valsson fráfarandi formaður Flugklúbbs Mosfellsbæjar náði að smita mig af þessari bakteríu áður en ég tók við formennsku af honum í mars sl. og ég get sagt þér að þetta er algjör snilld.
Ég fer út í sumarið full af áhuga og ætla að reyna að fljúga sem mest og njóta sumarins og ætla jafnvel að skella mér á salsanámskeið,“ segir Bára brosandi að lokum er við kveðjumst.

Mosfellingurinn 18. maí 2017
Myndir og texti: Ruth Örnólfs