Anna Olsen formaður Karatedeildar Aftureldingar hvetur alla til þess að læra sjálfsvörn.

Alþjóðlega karatesambandið viðurkennir fjóra mismunandi karatestíla í keppni, Shito Ryu, Goju Ryu, Shotokan og Wado Ryu. Þrír af þessum stílum eru iðkaðir á Íslandi og er Shito Ryu stíllinn kenndur hjá Karatedeild Aftureldingar. Þrátt fyrir mismunandi áherslur og stíla er karateiðkun alltaf skipt í þrjá hluta, kata, kihon, kumite.
Karate hentar iðkendum á öllum aldri og er í senn bardagaíþrótt, líkamsrækt, sjálfsvörn og lífsstíll. Anna Olsen var 48 ára gömul er hún fór á sína fyrstu karate­æfingu. Í dag er hún komin með svarta beltið, dómararéttindi og svo kennir hún bæði byrjendum og framhaldshópum. Hún segir karate íþróttina gefa sér mikið en hún eyðir fimm dögum vikunnar í íþróttahúsinu að Varmá.

Anna fæddist í heimahúsi í Vesturbæ Reykjavíkur 15. desember 1964. Foreldrar hennar eru þau Anna Jóhannesdóttir og Karl Hinrik Olsen en þau eru bæði látin.
Anna á þrjú alsystkini, Hinrik f. 1952, Sigurbjörg f. 1954, Jóhannes f. 1958 d. 1980. Þrjú hálfsystkini, Ágústa f. 1943, Valdimar f. 1948 og Soffía f. 1954 og einn fósturbróður, Anton f. 1961.

Setti spritt á sárin
„Ég er alin upp á Meistaravöllum í Reykjavík. Á flestum heimilum í kring voru 3-4 börn svo það var ávallt líf og fjör og nóg af leikfélögum. Við lékum okkur oftast úti og það skipti ekki máli hvort þú varst 8 ára eða 15 ára, allir léku saman.
Óbyggða svæðið sem síðar var byggður Flyðrugrandi var heillandi staður. Þar var starfandi starfsvöllur á sumrin og margir fallegir hlutir búnir til. Margir kofarnir voru smíðaðir og því fylgdi óhjákvæmilega að stígið var á naglaspítur, maður var orðin ansi lunkinn við að kippa nöglunum úr og setja spritt á sárin.”

Mamma sat uppi við alla nóttina
„Ferðalögin með fjölskyldunni eru ofarlega í huga frá æskuárunum. Farið var á rauðu Volkswagen bjöllunni, öllu pakkað á toppinn, okkur systkinunum troðið aftur í og svo var ekið af stað. Foreldrar mínir reyktu bæði og það var reykt í bílnum eins og tíðkaðist í denn. Það fór illa í mig og ég varð oft bílveik, yfirleitt var ég búin að æla áður en Ártúnsbrekkunni var náð.
Það var farið víða um land og hvíta tjaldinu tjaldað. Mamma var mjög hrædd við pöddur og hún sat oftast uppi við alla nóttina með kveikt á vasaljósinu til að fylgjast með hvort það væru einhverjar köngulær inn í tjaldinu,” segir Anna og brosir.”

Vorum heppin með kennara
„Melaskóli og Hagaskóli voru mínir skólar. Melaskóli þessi stóri skóli, man hvað manni fannst maður orðin stór þegar maður byrjaði þar. Við vorum heppin með kennara, Ástríði Guðmundsdóttur en hún kenndi okkur allan barnaskólann. Hún var dugleg að fara með okkur á skauta á Melavöllinn, æfingar hjá Sinfóníuhljómsveitinni í Háskólabíói og í fjöruferðir.
Hagaskóli var gagnfræðaskólinn, lauk þar 9. bekk sem þá var efsta stigið. Haldin voru regluleg skólaböll og aðrar skemmtanir sem voru vel sóttar.”

Tóku þátt í húsverkum og heyskap
Anna var 15 ára að klára Hagaskóla þegar hún kynntist manni sínum, Árna Jóhannessyni. Hann var úr sveit svo sumarið eftir gagnfræðaskóla lá leiðin í Húnavatnssýsluna. Þar brettu þau upp ermar og tóku þátt í sauðburði, húsverkum og heyskap.
„Eftir dásamlegan tíma í sveitinni hafði ég hugsað mér að fara í fatasaum í Iðnskólann í Reykjavík, ég sótti um en komst ekki inn. Ég fór því að vinna á saumastofunni í Karnabæ, taldi það koma sér vel, en þar fann ég út að mig langaði bara alls ekki að vinna við þetta. Það varð því ekkert af framhaldsskólagöngu hjá mér.”

Fjölbreyttur og farsæll ferill
„Árið 1983 keyptum við Árni okkar fyrstu íbúð, það sama ár var ég ráðin til starfa hjá Landsbankanum. Ég átti þar fjölbreyttan og farsælan feril í 37 ár og fór í gegnum ýmiskonar nám. Störfin í bankanum voru töluvert öðruvísi þá miðað við sem þekkist í dag, margt fólk á hverri vinnustöð og mörg handtökin. Það var mikil breyting þegar tölvuvæðingin hóf innreið sína, ég tók þátt í að innleiða og kenna á gjaldkerakerfin sem tekin voru upp ásamt því að fara á milli fyrirtækja og kenna á netbankann þegar hann kom.
Að vera starfsmaður í bankanum þegar hann var ríkisbanki, einkabanki og svo aftur ríkisbanki var töluverð reynsla og fylgdu því miklar breytingar. Að fá að þróast í starfi frá því að vera almennur starfsmaður að selja tékkhefti í að vera staðgengill útibússtjóra með þeirri ábyrgð sem því fylgdi var líka mikil reynsla.
Ég er lánsöm að hafa kynnst góðu fólki í gegnum tíðina hjá bankanum. Nú hafa tímarnir breyst, ég missti vinnuna s.l. haust og er því Landsbankahjartað mitt svolítið brotið en ég er hokin af reynslu.”

Dundum okkur saman í garðinum
Anna og Árni slitu samvistum árið 2019. Þau eiga saman dótturina, Valdísi Ósk f. 2000.
„Við mæðgur erum duglegar að dunda okkur saman í garðinum og gróðurhúsinu og svo förum við í gönguferðir með hundinn. Erum svo lánsamar að búa á dásamlegum stað þar sem stutt er í náttúruna. Við höfum einnig verið duglegar að ferðast um landið.”

Ég gjörsamlega heillaðist
„Árið 2011 byrjaði Valdís Ósk mín að æfa karate og ég hafði gaman af að fylgjast með úr fjarlægð. Mér leið vel með að vita að hún gæti varið sig ef eitthvað kæmi upp á, ég myndi gjarnan vilja sjá fleiri feta þennan veg. Fljótt fór ég að vera með puttana í ýmis­konar málum, fór í stjórn félagsins og hef verið formaður frá 2015.
Það varð svo úr að ég fór að mæta á fullorðins æfingar, orðin 48 ára gömul,” segir Anna og brosir. Æfingarnar voru skemmtilegar og það ríkti mikil virðing milli æfingafélaganna. Ég gjörsamlega heillaðist og hef nú mætt að jafnaði þrisvar sinnum í viku á æfingar frá því að ég byrjaði. Ég vissi ekki alveg hvort þetta myndi ganga hjá mér því ég hef átt við bakvandamál að stríða en styrkur minn hefur eflst til muna.
Nú er ég komin með svarta beltið 2. Dan og með dómararéttindi í Kata, hver veit nema ég reyni við 3. Dan eftir 3 ár. Undanfarin ár hef ég einnig verið að kenna bæði byrjendum og framhaldshópum sem gefur mér mikið, ég er því í íþróttahúsinu fimm daga vikunnar, bæði við æfingar og kennslu.
Það er svo gaman að taka á móti krökkunum á haustin og sjá hvað þau hafa þroskast í sumarfríinu og svo auðvitað að bjóða nýja iðkendur velkomna,” segir Anna að lokum er við kveðjumst.

Vinna við heildstæða endurgerð fyrstu hæðar Hlégarðs lauk á dögunum og verður húsið opið fyrir bæjarbúa sunnudaginn 10. apríl frá kl. 13 til 16..
Í fyrsta áfanga var fyrsta hæð endurgerð, skipt var um öll gólfefni, lagnir endurnýjaðar, salerni endurnýjuð og hæðin öll innréttuð á ný með ljósri eik til samræmis við upphaflegt útlit hússins.
Hlégarður er teiknaður af Gísla Halldórssyni arkitekt og var þess sérstaklega gætt að halda heildaryfirbragði hússins í samhengi við höfundareinkenni byggingarinnar og sögu þess. Samhliða var það að markmiði að breytingarnar yrðu til þess að auka notagildi hússins.

Nýttu myndir frá fyrr tíð
„Hlégarður er okkur Mosfellingum mjög mikilvægt hús og það hefur verið gaman að fylgjast með þeirri umbreytingu á aðstöðu til viðburðarhalds sem endurgerður Hlégarður felur í sér. Við fórum þá leið að skoða hönnun og sögu hússins, nýttum myndir frá fyrri tíð sem geymdar eru á Héraðsskjalasafninu,“ segir Haraldur Sverrisson bæjarstjóri.
„Þannig verður héðan í frá unnt að halda tvo til þrjá viðburði á sama tíma með bættri lokun milli rýma. Hin hliðin á þeim þætti er síðan að unnt verður að opna betur á milli rýma þegar aðstæður kalla á það.“

Opið hús fyrir bæjarbúa
„Í upphafi stóð til að fara eingöngu í fyrsta áfanga endurgerðar Hlégarðs en ákveðið var að flýta nokkrum verkþáttum sem tengjast öðrum áfanga sem er endurgerð annarrar hæðar og við því komin á rekspöl í öðrum áfanga.
Ég vil nota þetta tækifæri til þess að hvetja íbúa til að mæta í opið hús næsta sunnudag milli kl. 13 og 16,“ segir Haraldur.

Mosfellska söngkonan GDRN og meistaraflokkur kvenna í knattspyrnu hafa gert með sér þriggja ára samning. Söngkonan verður styrktaraðili stelpnanna og mun prýða æfingafatnað liðsins.

Sjálf sleit Guðrún Ýr hér barnskónum og lék með yngri flokkum félagsins og sýnir hér í verki hollustu sína við félagið. Hún á nokkra meistaraflokksleiki með Aftureldingu áður en hún lenti í slæmum meiðslum og lagði skóna á hilluna. Þegar einar dyr lokast, opnast aðrar og Guðrún Ýr hefur náð langt í tónlistinni og gefur til baka með þessum tímamóta samningi. Um leið verður Afturelding eitt af fyrstu liðunum á Íslandi til að flagga stórum styrktaraðila á æfingasetti liðsins en það þekkist nánast eingöngu í stórum deildum erlendis.

Hugmyndin að samstarfinu kemur í kjölfar samnings Aftureldingar við hljómsveitina Kaleo. „Við erum óendanlega þakklát okkar frábæra tónlistarfóki sem er tilbúið að vinna með okkur. Við þökkum GDRN kærlega fyrir stuðninginn og hlökkum til samstarfsins,“ segir Sigurbjartur Sigurjónsson formaður meistaraflokksráðs. Afturelding leikur í Bestu deild kvenna í sumar. 

Ég fór út að hlaupa í gær. Er farinn að hafa gaman af því að hlaupa (án bolta), nokkuð sem ég hélt að myndi aldrei gerast. Ég man mjög vel eftir því að hlaupa Stífluhringinn fræga í Árbænum á undirbúningstímabilinu fyrir fótboltann. Það var aldrei gaman. Ég man líka eftir því að hlaupa hálfmaraþon í Reykjavíkurmaraþoninu. Það var hugsanlega eitt það leiðinlegasta sem ég hef nokkurn tíma gert á ævinni. Og ég hef aldrei gert það aftur.

Leiðinlegast fannst mér þegar hópur eldri kvenna (ég var sjálfur um þrítugt) hljóp brosandi og hlæjandi fram úr mér – þær svifu hreinlega yfir malbikinu af hlaupaorku og lífsgleði. Ég hló ekki með þeim, var mjög langt frá því hamrandi grjóthart malbikið á Sæbrautinni með lúnum löppum.

En svo lenti ég í því að melda mig í 21km þrautahlaup sem verður í júní og ákvað að undirbúa mig betur en fyrir hálfmaraþonið forðum. Ég hef verið í hlaupaprógrammi frá Polar sem er sniðið að mér og mínum markmiðum. Það hefur verið hressandi að fara út að hlaupa í vetrartíðinni og enn meira hressandi núna þegar það er að byrja að vora. Ég hljóp fyrst í snjónum – ekki annað í boði – en er núna byrjaður að þræða alla malarstígana okkar hér í nánasta umhverfi Mosfellsbæjar. Það er af mörgu að taka og gaman að prófa nýjar leiðir.

Ígær fór ég til dæmis upp í Skammadal og þræddi hann áður en ég hljóp niður með Varmánni að Álafosskvosinni þar sem ég sneri við. Ég heyrði í fuglunum og ánni, sá rjúpur, lenti í allskonar undirlagsævintýrum á leiðinni – sökk sumstaðar vel yfir ökkla, fann lyktina af vorinu og upplifði mikla ánægju við það að vera hlaupandi úti í ferskri náttúrunni. Gott ef mér varð ekki hugsað til eldri kvennanna sem hlupu brosandi fram úr mér forðum. Áfram veginn!

Heilsumolar Gaua
Mosfellingur 7. apríl 2022

Fjölskyldutímar Mosfellsbæjar hófu göngu sína haustið 2015 og eru því á sjöunda starfsári. Markmið Mosfellsbæjar með tímunum er að sinna hlutverki sínu sem lýðheilsusamfélag og eru tímarnir frábær viðbót við mörg önnur lýðheilsuverkefni bæjarins.
Hjónin Þorbjörg Sólbjartsdóttir íþróttafræðingur og Árni Freyr Einarsson tóku að sér að sjá um tímana fyrsta starfsárið en þar sem tímarnir nutu mikilla vinsælda strax fyrsta starfsárið var þörf á að bæta við fleiri leiðbeinendum og bættust þá hjónin Íris Dögg og Ólafur Snorri Rafnsson íþróttakennari í hópinn. Mosfellingur tók Ólaf Snorra tali um starfið.
„Markmið tímans er að búa til aðstæður þar sem fjölskyldan, mamma, pabbi, afi, amma, börn og unglingar geta komið saman og leikið sér í íþróttum af öllu tagi, bolta­íþróttum, spaðaíþróttum og fimleikum svo eitthvað sé nefnt.
Fjölskyldurnar eiga dýrmæta og skemmti­lega samverustund saman í íþróttasalnum og allir njóta sín.“

Almenn ánægja og ásókn mikil
„Aðókn í tímann hefur verið vonum framar og eru Mosfellingar greinilega ánægðir með þennan möguleika að koma í íþróttahúsið og eiga þar góðar stundir. Tímarnir hafa vakið athygli út fyrir okkar bæjarmörk og hafa önnur sveitarfélög spurst fyrir um verkefnið, einnig var var fjallað um það í málgagni UMFÍ á dögunum.
Stemningin er alltaf góð í tímunum og mikil gleði allsráðandi. Jólasveinar hafa komið í heimsókn fyrir jólin og í kringum hrekkjavöku hefur verið hrekkjavökuþema og gestir komið í búningum. Þegar við förum í sumarfrí þá höfum við grillað pylsur eftir tímann og einu sinni var hoppukastali í lokatímanum.
Uppbrotsdagar falla í góðan jarðveg hjá gestum fjölskyldutímans. Fyrsta veturinn fengu gestir fjölskyldutímans skíðapassa í Skálafelli einn sunnudag og voru margir sem nýttu sér það og skíðuðu saman.
Eins er frítt í Varmárlaugina eftir tímann og þar eru stundum heitir sunnudagar í lauginni. Þá er hitastig sundlaugarinnar hækkað örlítið og þá gefst gestum sá möguleiki að slaka vel á í lauginni eftir tímann.

Oft fyrsta skref í ástundun á skipulögðu íþróttastarfi
„Við erum virkilega ánægð með þessar viðtökur og það er greinilega grundvöllur fyrir tíma sem þessa. Fleiri heimsóknir í Varmá eru líka góð auglýsing fyrir Aftureldingu þar sem margir sjá auglýsingar hjá deildum Aftureldingar og þar af leiðandi getur þetta verið fyrsta skref í ástundun á skipulögðu íþróttastarfi þegar áhugi vaknar að prófa íþróttir hjá Aftureldingu í framhaldinu.
Meðan ánægjan með fjölskyldutímann meðal bæjarbúa er svona mikil og aðsóknin góð í tímana höldum við ótrauð áfram á þessari braut og höldum áfram að hafa gaman saman á sunnudagsmorgnum að Varmá,“ sagði Ólafur Snorri að lokum.

KYNNING

Björk Erlingsdóttir var komin yfir fertugt þegar hún fékk áhuga á mótorkrossi. Áhugi hennar kviknaði eftir að hafa horft á mótorkrosskeppni út á landi þar sem spennan náði hámarki.
Björk keypti sér hjól, fór að stunda æfingar og hefur varla sleppt keppni síðan hún byrjaði að hjóla. Hún hefur átt velgengi að fagna síðustu ár en síðastliðið sumar náði hún að halda Íslandsmeistaratitli sínum sem hún landaði árið 2020. Hún segir að gott úthald, einbeiting og sjálfstraust sé allt sem þarf til að geta stundað þessa erfiðu íþrótt.

Björk fæddist á Sólvangi í Hafnarfirði 9. nóvember 1966. Foreldrar hennar eru þau Ólöf Jóna Guðmundsdóttir fyrrv. sölumaður og Erling Ólafsson múrari en hann lést árið 2006.
Björk á þrjú systkini, Guðrún Rut f. 1963, Örn f. 1964 og Margréti f. 1968, d. 1970.

Gott að fá pönnsur hjá ömmu
„Ég ólst upp á nokkrum stöðum á mínum yngri árum en þó lengst af í Hlíðunum og í Breiðholti. Í Hlíðunum bjó ég til 7 ára aldurs, amma og afi bjuggu í Bogahlíðinni og það var alltaf gott að koma við hjá þeim og fá pönnukökur. Við krakkarnir í hverfinu lékum okkur mest úti við og vorum dugleg í prakkarastrikunum, teika bíla og skauta fram af bílskúrsþökum.
Ég á líka góðar minningar frá tjaldútilegunum með fjölskyldunni, það var brunað út úr bænum um helgar og alltaf var veiðistöngin með í för.
Ég gekk í Hlíðaskóla og á bæði góðar og slæmar minningar þaðan, í uppáhaldi voru kennslustundirnar með Ármanni Kr. Einarssyni rithöfundi en svo fékk ég löðrung frá öðrum kennara sem ég gleymi seint en ég er ofvirk og hef alltaf átt erfitt með að sitja kyrr.“

Sló strákunum við
„Í Breiðholti var gott að búa, ég átti góðar vinkonur í Kötlu­fellinu og við lékum okkur mikið saman. Ég gekk í Fellaskóla og þetta voru góð ár og kennararnir frábærir. Félagsmiðstöðin okkar hét Fellahellir og var stútfull af krökkum alla daga, þar keppti ég í minni fyrstu maraþondanskeppni.
Ég var frekar mikil strákastelpa, stundaði fótbolta og keppti í borðtennis. Ég valdi mér smíðar í stað handavinnu og varð hæst yfir bekkinn, sló strákunum við sem mér fannst ekki leiðinlegt,“ segir Björk og hlær.
„Með skólanum starfaði ég í Kron, í Fellahelli og við barnapössun.“

Því meira að gera því betra
„Eftir útskrift úr gagnfræðaskóla fór ég á íþróttabraut í Fjölbraut í Breiðholti því ég ætlaði að verða íþróttakennari en það nám tók U-beygju því ég ákvað að skella mér til Bandaríkjanna sem au pair. Þar var ég í tvö ár og þetta var virkilega góð lífsreynsla.
Ég hef nánast allt mitt líf starfað við afgreiðslu og í sölugeiranum. Byrjaði ung að vinna í verslun, var hjá Ikea, Allra best í Suðurveri og svo hjá Vífilfelli, Ísam, Lýsi og Egilsson.
Í dag starfa ég hjá Beiersdorf og hef gert í fjölda ára, ég fer á milli apóteka og verslana og sinni alls konar verkefnum, sé um sölu og framsetningu. Þetta á mjög vel við mig, því meira að gera því betra.“

Alsæl með ákvörðunina
Eiginmaður Bjarkar er Sverrir Jónsson iðnrekstrar- og vörustjórnunarfræðingur en hann starfar sem innkaupastjóri hjá Sorpu. Þau eiga tvö börn, Margréti Mjöll f. 1992 og Óliver Örn f. 1998.
„Við fluttum í Mosfellsbæ árið 2001 og bjuggum hér í nokkur ár en færðum okkur svo yfir í fæðingarbæ minn, Hafnarfjörð. Við fluttum svo aftur hingað árið 2017 og erum alsæl með að hafa tekið þá ákvörðun, hér er svo gott að vera.“

Keppti í Járnkonunni
Björk byrjaði í mótorkrossi 2006 en áhugi hennar kviknaði eftir að hún mætti til að horfa á bróður sinn og börn hans keppa í mótorkrosskeppni í Ólafsvík. Hún segir adrenalínið hafi farið á fullt bara við að horfa á keppnina. Hún fékk að prófa hjólið hjá bróður sínum og gjörsamlega heillaðist.
Hún keypti sér hjól og hellti sér strax út í Endurokeppni sem er þolakstur sem stendur yfir í 6 klst. Keppti þar í tvímenningi með annarri konu og tókst þeim að komast á verðlaunapall. Björk hefur einnig tekið þátt í Járnkonunni, lenti þar í 3. sæti en þá keppir keppandi einn í 6 klst og sú sigrar sem fer flesta hringi.

Alls konar aðstæður geta komið upp
„Þessi íþrótt krefst þess að maður æfi stíft, hafi gott úthald, einbeitingu og það reynir á tækni og snerpu bæði þegar maður er að æfa og keppa,“ segir Björk einbeitt á svip. „Það tekur tíma að finna getu til að stýra þessum hjólum og finna til öryggis. Það þarf líka að hafa sjálfstraust til að geta stokkið á pöllunum og keyra í alls konar aðstæðum sem geta komið upp. Með árunum finnur maður sinn flöt á þessu öllu saman.
Ég er með mikið keppnisskap og hef þurft að keppa við mikið af ungum hraðskreiðum stúlkum. Þær eru mér hvatning til að gera enn betur en ég reyni nú samt að fara ekki fram úr mér.“

Keppti í Bandaríkjunum
Björk, eða Brjálaða Bína eins og hún er ávallt kölluð, hefur nánast ekki misst úr keppni síðan hún byrjaði að æfa og síðustu ár hafa verið henni sérstaklega góð. Hún varð Íslandsmeistari í kvennaflokki árið 2020 og náði að halda titlinum í keppninni sl. sumar.
Hún hefur einnig keppt í mótorkrossi í Bandaríkjunum en sú keppni er sú stærsta í heimi. Þar keppa 1.400 konur frá ýmsum löndum og í hinum ýmsum flokkum. Björk náði 3. og 5. sæti í tveimur flokkum.

Virk í félagsstarfi
Björk situr í stjórn MSÍ, Mótorhjóla- og vélsleðasambandi Íslands og hefur verið virk í félagsstarfi sem snýr að félaginu. Hún setur oft upp „Bínu-búllu“ sjoppu fyrir keppnir sem er fjáröflun fyrir félagið. Sverrir eiginmaður hennar stendur þétt við hlið konu sinnar en hann hefur einnig verið virkur í hinum ýmsu störfum fyrir félagið.
„Yfir vetrartímann æfi ég í Crossfit Reykjavík en auðvitað tek ég í hjólið ef ég kemst í að hjóla á ís eða sandi. Þegar snjóa leysir þá byrja ég að æfa mig í brautum og tek þá langar æfingar.“

Fátt sem toppar þetta tvennt
„Mótorkrossið er ekki ódýr íþrótt og ég er heppin að vera búin að hafa mína sömu styrktaraðila í gegnum árin sem hafa gert mér það fært að stunda þetta með þeim hætti sem ég hef gert og kann ég þeim bestu þakkir fyrir en þetta eru Arctic Trucks, Púkinn, Merkistofan og Crossfit Reykjavík.
Það er ekki áhættulaust að vera á þessum hjólum og ég hef meiðst en sem betur fer ekki oft. Það sem tosar mest í mig í þessu öllu saman er spennan og félagsskapurinn, það er fátt sem toppar það kombó,“ segir Björk og brosir.

Framboðslisti Samfylkingarinnar fyrir sveitarstjórnarkosningarnar 14. maí var samþykktur einróma á fjölsóttum félagafundi 5. mars.
Anna Sigríður Guðnadóttir núverandi oddviti leiðir listann, annað sætið skipar Ólafur Ingi Óskarsson varabæjarfulltrúi. Í þriðja sæti er Ómar Ingþórsson landslagsarkitekt og fjórða sæti skipar svo Elín Árnadóttir lögmaður. Sérstakur gestur fundarins var Logi Einarsson alþingismaður og formaður Samfylkingarinnar.
Í sveitarstjórnarkosningum árið 2018 fékk Samfylkingin í Mosfellsbæ 9,5% greiddra atkvæða og einn kjörinn bæjarfulltrúa.

---

Við byggjum á þekkingu og reynslu
Anna Sigríður Guðnadóttir leiðir nú framboðslista Samfylkingarinnar í þriðja sinn.
„Ég er full tilhlökkunar og bjartsýni fyrir vorið. Við bjóðum fram mikla reynslubolta í sveitarstjórnarmálum ásamt öflugu fólki með reynslu víða að úr samfélaginu sem vill nú taka þátt og vinna að góðum málum í sínu sveitarfélagi. Sveitarstjórnarmál snúast um nærumhverfi okkar, félagsauðinn, skipulag, skólana, umhverfið, fólkið í bænum og hvernig við mótum umgjörðina um daglegt líf þess. Við byggjum afstöðu okkar til úrlausnarefna alltaf á alþjóðlegum grunngildum jafnaðarstefnunnar: Frelsi, jafnrétti og samábyrgð. Jafnaðarstefnan setur almannahagsmuni alltaf framar sérhagsmunum. Við viljum hafa meiri áhrif á stefnumörkun sveitarfélagsins og stefnum ótrauð þangað.“

---

Gerum bæinn skemmtilegri og meira aðlagandi
Jakob Smári Magnússon skipar 5. sæti Samfylkingarinnar í sveitarstjórnarkosningunum 2022. Hann hefur starfað sem tónlistarmaður og er menntaður áfengis og vímuefnaráðgjafi. Hann er giftur Rögnu Sveinbjörnsdóttur viðskiptastjóra.
„Ég vil leggja mitt á vogarskálarnar til að gera Mosfellsbæ að betri bæ. Ég vil gera bæinn skemmtilegri og meira aðlaðandi. Mig langar að sjá hér fallegan miðbæ og efla menningarstarf í bænum. Mosfellsbær á mikið af frábæru listafólki og bærinn á sér sögu sem við verðum að varðveita. Það þarf að vekja bæinn til lífsins og ég er til í að taka það að mér. Svo vil ég fá Pizzabæ aftur, takk fyrir.”

---

Framboðslisti Samfylkingarinnar í Mosfellsbæ

1. Anna Sigríður Guðnadóttir  bæjarfulltrúi, stjórnsýslufræðingur og upplýsingafræðingur
2. Ólafur Ingi Óskarsson  kerfisfræðingur
3. Ómar Ingþórsson  landslagsarkitekt
4. Elín Árnadóttir  lögmaður
5. Jakob Smári Magnússon  tónlistamaður og áfengis- og vímuefnaráðgjafi
6. Sunna Björt Arnardóttir  sérfræðingur í mannauðsmálum
7. Daníel Óli Ólafsson  læknanemi
8. Margrét Gróa Björnsdóttir  stuðningsfulltrúi í grunnskóla
9. Elín Eiríksdóttir  framhaldsskólakennari
10. Ragnar Gunnar Þórhallsson  hefur setið í stjórnum ÖBÍ, NPA miðstöðvarinnar og Sjálfsbjargar
11. Kristrún Halla Gylfadóttir  umhverfis- og auðlindafræðingur
12. Guðbjörn Sigvaldason  verslunarmaður
13. Sólborg Alda Pétursdóttir  verkefnastjóri/ náms-og starfsráðgjafi
14. Þóra Sigrún Kjartansdóttir  hágreiðslunemi
15. Símon Guðni Sveinbjörnsson  bifreiðasmiður
16. Gerður Pálsdóttir  þroskaþjálfi
17. Greipur Rafnsson  nemi í félagsráðgjöf
18. Gunnhildur Edda Guðmundsdóttir  viðburðahönnuður og leiðbeinandi í grunnskóla
19. Finnbogi Rútur Hálfdánarson  lyfjafræðingur
20. Nína Rós Ísberg  framhaldsskólakennari
21. Ólafur Guðmundsson  húsasmiður
22. Kristín Sæunnar Sigurðardóttir  eftirlaunakona