Bæjarblaðið Mosfellingur er 13 ára í dag, 13. september. Blaðið kemur út á þriggja vikna fresti og er dreift frítt í öll hús í Mosfellsbæ, á Kjalarnesi og í Kjós. Mosfellingur er frítt, frjálst og óháð bæjarblað sem flytur jákvæðar og skemmtilegar fréttir af því helsta í Mosfellsbæ og næsta nágrenni.

Stofnandi blaðsins er Karl  Tómasson og stýrði hann blaðinu fyrstu þrjú árin. Áður hafði Karl unnið að blöðum eins og Mosfellsblaðinu og Sveitunga. Síðastliðin 10 ár hefur  Hilmar Gunnarsson ritstýrt Mosfellingi en hann tók við keflinu á haustdögum 2005.

„Blaðið vex og dafnar með hverju árinu,“ segir Hilmar Gunnarsson. „Skemmtilegast er að fá viðbrögð bæjarbúa sem virðast njóta þess að fá innansveitarfréttirnar beint í æð. Það heldur okkur gangandi sem að blaðinu starfa. Ég er með gott fólk með mér í liði sem á sinn þátt í velgengni blaðsins og ber þar að nefna hjónin Önnu Ólöfu og Ragga Óla sem eru alltaf boðin og búin, Ruth Örnólfs sem sér um drottningarviðtölin og svo er það Inga Vals sem er okkar villupúki.“
„Það er vel við hæfi að opna nýja heimasíðu á þessum fallega degi. Markmiðið er að setja á vefinn helstu fréttir og greinar úr blaðinu þannig að fólk geti deilt með umheiminum. Auðvitað verður pappírsútgáfan áfram númer eitt, tvö og þrjú og er nýjustu blöðunum hægt að fletta hér á síðunni. Með tilkomu Facebook og annarra samfélagsmiðla er æ eftirsóknarverðara að deila fréttum og skemmtilegu efni þannig að þetta er okkar liður í að verða við því.

Að lokum langar mig að þakka Sindra vini mínum fyrir að koma þessari heimasíðu í loftið og vonandi að þið njótið vel,“ segir Hilmar.

Næsti Mosfellingur kemur út fimmtudaginn 1. október og er skilafrestur efnis og auglýsinga til kl. 12 mánudaginn 28. september.
Netfang blaðsins er mosfellingur@mosfellingur.is

 

 

Ég hef ekki tíma. Hvað hefur þú oft notað þessa afsökun? Ég hef notað hana alltof oft. En ég er að bæta mig, forgangsraða tíma mínum betur. Til þess að gera hluti sem gefa manni orku, þarf maður að taka aðra hluti út í staðinn. Annars lendir maður í vítahring tímastjórnunar­brjálæðis, svefnleysis og stress. Þegar maður hættir að gera hluti sem draga úr manni kraft og stela frá manni orku, galopnast nýjar gáttir. Gáttir sem maður nýtir í að gera spennandi, skemmtilega og nærandi hluti. Ef þér líður vel í því sem þú ert að gera, lætur þú öðrum í kringum þig líða vel. Og öfugt. En hverju áttu að hætta? Því sem tekur frá þér orku. Sestu niður og gerðu lista. Hættu svo einum hlut í einum og njóttu þess að hafa meiri tíma og orku.

Hér eru nokkrir hlutir sem ég hef hætt að gera. Listinn er alls ekki tæmandi, ég á nóg eftir! Lesa DV.is, kaupa Moggann, fara á óspennandi fótboltaleiki, horfa á fréttir og flesta sjónvarpsþætti, borða of mikið í einu, hafa samviskubit yfir einhverju sem öðrum finnst að ég eigi að gera – en geri ekki, fá tölvupóst og FB skilaboð í símann og mæta á óþarfa fundi. Bara þessi fáu atriði gefa mér 12-14 glænýja klukkutíma á viku sem ég get notað í að gera hluti sem gefa mér orku. Vinnan er oftast nefnd sem orsök þreytu og tímaleysis. Ef þú ert í vinnu sem tekur alla þína orku, hættu. Finndu þér nýja vinnu eða skapaðu þér þína eigin tekjustrauma. Ekki vera þræll. Ég hef hætt í nokkrum vinnum sem tóku meira frá mér en þær gáfu mér. Það krefst trúar á sjálfan sig að taka stökkið, en tilfinningin að taka ábyrgð á eigin tíma, vellíðan og þar með heilsu er yndisleg.
Áfram veginn!

Heilsumolar Gaua
Mosfellingur 10. september 2015

Örn Þórisson Kjærnested opnaði nýverið Bifreiðaverkstæði Össa að Völuteig 27, þar sem hann býður upp á allar almennar bílaviðgerðir.
„Ég opnaði verkstæðið í sumar, þetta fer vel af stað hjá mér og verkefnin og kúnnahópurinn fjölbreyttur og skemmtilegur,“ segir Össi.
„Þegar kom að því að fara í framhaldsskóla þá varð Borgarholtsskóli fyrir valinu. Ég skráði mig í bifvélavélavirkjun og hef verið með algjöra bíladellu síðan. Þegar ég úrskrifaðist úr Borgó fór ég í framhaldinu í Tækniskólann þar sem ég tók meistarann og útskrifaðist þaðan árið 2010.“
„Ég er búinn að vinna við fagið síðan ég kláraði námið en langaði svo að gera eitthvað nýtt og opna mitt eigið verkstæði. Það er náttúrlega langbest að vera í Mosó og því kom ekkert annað til greina en að finna hentugt húsnæði hér,“ segir Össi og hlær.
Allar frekari upplýsingar um verkstæðið má finna Facebook eða í síma 537-0230.

Umhverfisviðurkenningar Mosfellsbæjar fyrir árið 2015 voru afhentar við hátíðlega athöfn á bæjarhátíð Mosfellsbæjar „Í túninu heima“ um liðna helgi.

Hjónin Matthildur Elín Björnsdóttir og Karl Þór Baldvinsson hljóta viðurkenningu fyrir sérlega fallegan og vel hannaðan garð að Litlakrika 25. Garðinn hafa þau byggt upp frá grunni á skömmum tíma og er umhirða til mikillar fyrirmyndar.

Helgi Ólafsson að Hvammi, Réttarhvoli 15, hlýtur viðurkenningu fyrir einstök ræktunarstörf og góða umhirðu um áratugaskeið. Helgi hefur ræktað stóran og fallegan garð sem státar af fjölbreyttum gróðri sem er sérlega vel við haldið.

Alls bárust um 10 tilnefningar að þessu sinni og sá umhverfisnefnd Mosfellsbæjar um að heimsækja þau svæði sem tilnefnd voru og velja úr tilnefningum.