Andlegt ferðalag

Í lífi manna gengur mismikið á en hjá flestum safnast upp með tímanum atvik og tilfinningar sem erfitt getur verið að vinna úr. Sumt er meðvitað en annað ómeðvitað og það getur verið erfitt að átta sig á því.
Ég er þarna engin undantekning og fann ég að eitthvað var ekki eins og það átti að vera. Eitthvað hafði slokknað innra með mér. Ég hélt samt áfram því ég þurfti að sjá fyrir mér og mínum! Það kom svo að því að ég varð algerlega búinn á því, gleðin var horfin úr lífi mínu og ég vissi ekki hvað ég vildi eða þurfti. Mér fannst fólk ráðskast með mig, bæði persónulega og í vinnu.
Þó ég hefði einhverjar skoðanir stóð ég ekki á þeim heldur flaut bara með en var ekki ánægður. Ég hafði lítið sjálfsálit og dæmdi mig hart ef eitthvað gekk ekki eins og ég vildi. Mér leið ekki vel, einangraði mig og sinnti ekki mínum eigin þörfum. Mér fannst ég hafa misst stjórnina á lífinu.
Dag einn hitti ég vin sem greinilega tók eftir breytingu á mér og kannaðist sjálfur við ástandið. Hann fór að segja mér frá hvernig hann hafði endurskoðað líf sitt með aðferðum 12 sporanna og hvernig hann hafði náð tökum á lífi sínu á ný. Hann lýsti því hvernig það að skoða líf sitt á þennan hátt, fékk hann til að koma auga á ýmislegt sem betur mátti fara.
Á einum vetri hafði hann náð góðum tökum á lífi sínu á ný. Hann tileinkaði sér nýjan lífstíl þar sem hann notar aðferðir 12 sporanna til að tækla lífið og tilveruna. Með því varð hann aftur sáttur við líf sitt, sig og sína.
Vinur minn hvatti mig til að koma með sér á sporafund hjá Vinum í bata og athuga hvort ég fyndi þar leið fyrir mig. Ég varð hissa því ég hélt að 12 sporin væru eingöngu fyrir þá sem ættu við áfengis- eða fíkniefnavanda að stríða.
Það er skemmst frá því að segja að ég sló til og fór í 12 sporin og get nú ekki hugsað mér lífið án þeirra. Með hjálp sporanna tileinkaði ég mér nýjan lífstíl sem gerði mér kleift að ná tökum á lífinu, finna gleðina á ný og lifa í sátt við sjálfan mig og aðra.

Vinir í bata er hópur karla og kvenna á öllum aldri sem hafa tileinkað sér Tólf sporin til að vinna úr sínum málum hvort sem er úr fortíð eða í nútíð.

Kynningarfundur verður í safnaðarheimili Lágafellskirkju að Þverholti 3, miðvikudaginn 6. október kl. 19.30. Næstu þrjú miðvikudagskvöld eftir það verða opnir fundir til frekari kynningar en 27. október, kl 19.30 er síðasta tækifærið til að slást í hópinn þennan veturinn því eftir það verður hópnum lokað og hin eiginlega 12 spora vinna hefst.
Bestu kveðjur

Vinur í bata

Ádrepa

Guðjón Jensson

Mörgum hefur ofboðið grasslátturinn á vegum Mosfellsbæjar í sumar sem leið. Oft hefur kappið borið skynsemina ofurliði en nú virðist þessi sláttustefna hafa færst heldur betur í aukana. Verið var að þessu sinni að fram yfir lok september og jafnvel enn verið að slá þá þessar línur eru ritaðar. Það ætti að vera sjaldséð að blettir séu hafðir snöggslegnir að hausti.

Allir skynsamir garðeigendur hætta slætti um mánuði fyrr og leyfa grasinu að vaxa síðsumars og hafa grasblettina dálítið loðna yfir veturinn. Það kemur í veg fyrir kal og að mosi nái sér á strik.
Þessi grassláttarstefna bæjarfélagsins hlýtur að kosta verulega háar fjárhæðir sem mætti verja í annað þarflegra eins og að lagfæra göngustíginn sunnan við Varmá ofan við Dælustöðina. Það aðgerðarleysi er bæjaryfirvöldum vægast sagt til mjög mikils vansa.

Mosfellsbær er þekktur fyrir að vera mikill útivistarbær. Óvíða eru jafn margar skemmtilegar gönguleiðir og hér enda fjölbreytni mjög mikil. Vinsælar gönguleiðir eru á Úlfarsfell, Helgafell, Reykjaborg, Reykjarfjall, Mosfell og fleiri mosfellsk fjöll. Nýverið var bætt gönguleið við Bringur áleiðis að Helgufossi en betur má ef duga skal.
Mætti ekki verja sláttupeningnum fremur í að bæta stígakerfi innan bæjarmarkanna en hvarvetna eru verkefni? Ýmsar leiðir mætti skoða.

Hestafólkið í Mosfellsbæ þarf beitarhólf og slægjur og hafa hestar bæjarbúa verið fluttir jafnvel landshornanna á milli, í og úr sumarbeit. Einnig hefur heyskapur farið fram utan Mosfellsbæjar hestafólkinu til mikillar fyrirhafnar og kostnaðar. Víða mætti nýta slægjur bæjarins í þágu hestafólks. Ég fæ ekki skilið annað en að hafa mætti fyrirmyndar samstarf bæjaryfirvalda við Hestamannafélagið Hörð um þessi mál enda eru hestar bæði umhverfisvænni og hagkvæmari í rekstri en sláttuvélar.

Við þurfum að forgangshraða verklegum framkvæmdum. Víða hafa verið gerð mjög alvarleg mistök eins og við skipulag neðst í Súluhöfða þar sem betur hefði mátt vanda til undirbúnings verka. Meira tillit hefði mátt taka til þeirra húseigenda sem fá allt í einu hús örstutt frá sinni lóð, beint framan við stofugluggann sinn í stað góðs útsýnis yfir Leirvoginn og til Esjunnar. En það er efni í aðra grein.

Guðjón Jensson
arnartangi43@gmail.com

Fræðsluganga

Úrsúla Jünemann

Eins og lesa má á vef Mosfellsbæjar skipulagði Mosfellsbær, í samstarfi við Hið íslenska náttúrufræðifélag, fræðslugöngu um Blikastaðakró þann 5. september.
Járngerður Grétarsdóttir grasa­­- fræðingur fræddi fólk um plöntulífið sem fyrir augu bar. Þó að flestar plöntur séu á þessum árstíma ekki lengur í blóma er ekki síður skemmtilegt að læra að þekkja þær á fræi og blöðum. Hrefna Sigurjónsdóttir líffræðingur sagði frá lífríkinu í fjörunni.
Blikastaðakró, þar sem Úlfarsá rennur í sjóinn, er með mjög næringarríka fjöru og spennandi að skoða. Mikið af mismunandi tegundum af þangi og þara er þar að finna. Margæsirnar sem eru á leið frá varpstöðvum sínum á Norðuríshafsströndum til Írlands á haustin stoppa á Íslandi til að næra sig og er eyjan okkar eins konar bensínstöð tvisvar á ári.
Þátttakendur í göngunni skoðuðu einnig alls konar skeljar, kuðunga og hrúðurkarla á steinum. Í leirunum lifa sandormar og burstaormar sem margir fjörufuglar gæða sér á.
Góð þátttaka var og gaman að það voru börn með í göngunni og hversu áhugasöm og virk þau voru í að skoða og fræðast. Ég skora á Mosfellsbæ að stofna til annarrar svona fræðslugöngu snemmsumars þegar fyrstu plönturnar byrja að blómstra og fuglalífið er í fullu fjöri.
Takk fyrir þessa velheppnaða haustgöngu.

Úrsúla Jünemann

Drengirnir okkar í vanda

Karl Gauti Hjaltason

Drengirnir okkar eiga í vanda. Þjóðfélaginu hefur mistekist að styðja við þá á viðkvæmum tíma mótunaráranna, efla þá og þroska á þeirra eigin forsendum. Á sama tíma hefur verið dýrmætt að sjá stöðu stúlkna batna á undanförnum árum, þó vissulega megi þar margt bæta ennþá. En drengirnir mega ekki gleymast.
Slæm staða drengja er eitthvert alvarlegasta vandamál íslensks samfélags í dag. Síðustu ár hafa þúsundir einstaklinga lokið grunnskóla sem munu eiga erfitt uppdráttar í lífinu. Afleiðingarnar eru alvarlegar og margvíslegar, fyrir drengina sjálfa og fyrir samfélagið allt.

Grafalvarleg staða
Sjálfsvíg eru algengasta ástæða dauðsfalla af hjá ungum mönnum. Ef litið er til tíðni sjálfsvíga er hlutfall karla 87% á árinu 2015 í yngsta aldurshópnum, 15 til 35 ára. Komið hefur fram að lestrarvandi drengja við útskrift úr grunnskólanum er geigvænlegur. Árlega ljúka 700 drengir grunnskólanámi án þess að vera þokkalega læsir. Er það boðlegt skólakerfi? Aðeins 30% þeirra sem ljúka meistaragráðu úr háskólanum eru karlar og karlmenn eru einungis þriðjungur þeirra sem stunda háskólanám. Skólakerfið er gert fyrir duglegar stelpur, segir dr. Hermundur Sigmundsson prófessor sem mest hefur rannsakað ólíka upplifun kynjanna af skólakerfinu. Svo virðist sem tápmiklir og fjörugir drengir finni lítið við sitt hæfi í skólunum, sem eru skipulagðir af konum með þarfir og smekk kvenna í huga. Fyrirmyndir skortir en hlutfall karlkennara í grunnskólum hefur farið lækkandi áratugum saman og er nú komið niður í 17%.

Vandinn eykst með árunum
Vanlíðan drengja birtist með ýmsum hætti. Ef við lítum til notkunar hegðunarlyfja meðal drengja í grunnskólunum er hún meira en helmingi algengari en meðal stúlkna á sama aldri. Þá er brottfall drengja úr framhaldsskólum mun meira en hjá stúlkum. Aukning á nýgengi örorku hefur á undanförnum árum verið örari meðal yngri karla en kvenna. Og þannig mætti áfram telja. Orsakaþættirnir eru margir en líklega vegur þungt að grunnskólar taka ekki nægjanlegt tillit til líffræðilegs munar á kynjunum. Áhugasvið drengja og stúlkna eru ólík en þroski stúlkna virðist henta betur að skólakerfinu sem virðist gera sömu kröfur til allra óháð eiginleikum.

Skólakerfið þarf að henta bæði drengjum og stúlkum
Afleiðingar af vanlíðan margra drengja á mótunarárunum hefur keðjuverkandi áhrif á líf þeirra til framtíðar. Þess vegna er þjóðfélagslega hagkvæmt að ráðast að vandanum þar sem hann birtist í upphafi. Allir kannast við afleiðingarnar. Þunglyndi, fíkniefnaneysla, offita, kvíði, einangrun, afbrot og tölvufíkn ungra manna. Þeir finna ekki sína hillu í lífinu. Skólakerfið þarf að vera í stakk búið til að mennta bæði stúlkur sem drengi. Fyrir ríflega 20 árum var mælt fyrir þingsályktunartillögu um að kanna sérstaklega stöðu drengja í skólakerfinu, en því miður hefur lítið gerst síðan. Miðflokkurinn hefur ítrekað vakið athygli á alvarleika málsins. Vandinn er öllum ljós, það er tímabært að bregðast við.

Karl Gauti Hjaltason, kgauti@althingi.is.
oddviti Miðflokksins í Suðvesturkjördæmi

Til hamingju, stelpur!

Jón Fannar Árnason

Íþróttaárið 2021 hefur verið frábært hjá stelpum í Aftureldingu. Mörg afrek hafa unnist á síðustu mánuðum. Hérna verður farið yfir þau helstu í tímaröð.
Sunnudaginn 2. maí tryggðu stelpurnar í handbolta sér sæti í Olís deildinni á næsta tímabili. Liðið gerði það með útisigri á Fjölni/Fylki þó að einni umferð væri ólokið.
Nokkrum vikum seinna eða laugardaginn 22. maí urðu blakstelpurnar Íslandsmeistarar með sigri í oddaleik gegn HK. Leikurinn vannst 3-0. Þetta var í fjórða sinn sem Afturelding vinnur þennan titil.
Nýjasta afrekið var fimmtudagskvöldið 9. september en þá unnu stelpurnar í fótbolta sér sæti í Pepsi Max deildinni næsta sumar. Liðið vann 4-0 sigur gegn FH í lokaumferðinni.
Framtíðin er björt hjá stelpum í Aftureldingu. Þið eruð flottar fyrirmyndir.
Til hamingju, stelpur!

Jón Fannar Árnason
tómstunda- og félagsmálafræðingur

Bætt lýðheilsa = sparnaður í heilbrigðiskerfinu

Bryndís Haraldsdóttir

Lýðheilsuaðgerðir miða að því að viðhalda og bæta heilbrigði, líðan og aðstæður einstaklinga og þjóðarinnar í heild með heilsueflingu, forvörnum og heilbrigðisþjónustu.
Hið opinbera á að skapa fólki aðstæður í samfélaginu sem auðvelda því að stunda heilbrigða lífshætti og efla vitund fólks og vitneskju um mikilvægi þess. Fáir deila um mikilvægi þess að íslenska ríkið greiði niður skuldir þar sem það sparar vaxtagreiðslur til framtíðar.
Svipað er hægt að segja um fjármuni sem varið er til aukinnar heilsueflingar til að bæta lýðheilsu. Slíkt sparar umtalsverð útgjöld til heilbrigðismála til lengri tíma.

Heilsubærinn Mosfellsbær
Mosfellsbær hefur staðið sig einstaklega vel í að viðhalda og varðveita útivistarsvæði bæði innan byggðarinnar og í útjaðri byggðar. Í þessu felast raunveruleg verðmæti fyrir komandi kynslóðir sem við fáum líka að njóta strax. Tveir golfvellir, tvær sundlaugar, mikið magn göngu- og hjólastíga og stikaðar gönguleiðir á öll fellin okkar meðfram ám og vötnum.
Óhætt er að segja að á tímum Covid hafi útivistarsvæðin sannað gildi sitt svo um munar. Yndislegt hefur verið að fylgjast með fjölskyldum í fjöruferð, fólki á öllum aldri á golfvellinum og aukinn áhugi á fellunum okkar og fossunum hefur heldur betur sýnt sig á þessum furðulegu tímum.
Rannsóknir sýna að gott aðgengi að útivist og fallegu umhverfi eru álitin ómetanleg lífsgæði og það eykur hamingju íbúa. Það stuðlar að aukinni lýðheilsu og sparar fjármuni til framtíðar í heilbrigðis­þjónustu.

Framtíðin er björt
Með bætta lýðheilsu og bjartsýni að leiðarljósi býð ég fram krafta mína til setu á Alþingi. Ég hef í störfum mínum talað fyrir enn betra samfélagi fyrir fjölskyldur í landinu.
Ég hef talað fyrir jafnrétti og umhverfisvernd, ég hef talað fyrir nýsköpun og öflugu atvinnulífi. Ég hef talað fyrir bættum samgögnum og auknu valfrelsi í samgöngum. Ég hef talað fyrir nýrri nálgun í heilbrigðis­málum. Árangur núverandi ríkisstjórnar hefur ekki látið á sér standa.

Undir stjórn Sjálfstæðisflokksins hefur ríkissjóður haft bolmagn til að taka á móti heimsfaraldri með öflugum stuðningsaðgerðum sem tryggðu rekstrargrundvöll fyrirtækja og um leið afkomu heimilanna í landinu. Allir mælikvarðar benda til þess að aðgerðir okkar síðustu kjörtímabil og þær ákvarðanir sem teknar voru í ríkisfjármálum séu grundvöllur þeirrar viðspyrnu sem Ísland býr yfir nú þegar við búum okkur undir að vaxa út úr faraldrinum.
Setjum X við D, strax í dag, og tryggjum að Ísland verði áfram land tækifæranna.

Bryndís Haraldsdóttir
þingmaður Sjálfstæðisflokksins

Samvinna, Samgöngu­sáttmáli og Sundabrú

Willum Þór Þórsson

Við þekkjum öll þá kyrrstöðu sem ríkt hefur í uppbyggingu á samgönguæðum höfuðborgarsvæðisins undanfarna áratugi. Á sama tíma hefur umferðarþunginn aukist og ferðir til og frá vinnu geta tekið óratíma sérstaklega á háanna­­tíma.
Fyrir þetta kjörtímabil, sem nú er að ljúka, vorum við komin í skuld við vegakerfið vítt og breytt um landið. Hluti af vandamáli höfuðborgarsvæðisins voru deilur milli sveitarfélaganna varðandi framtíðar fyrirkomulag samgangna á svæðinu.
Sveitarfélögin höfðu öll mismunandi sýn og áherslur í málaflokknum sem gerði það að verkum að pattstaða myndaðist og ekkert gerðist. Ekki fyrr en formaður Framsóknar, Sigurður Ingi, settist í stól samgöngu- og sveitarstjórnaráðherra. Sigurður Ingi er nefnilega samvinnumaður af gamla skólanum og hann náði að byggja brýr milli ólíkra sjónarmiða og hagsmuna þessa sex sveitarfélaga.
Útkoman úr þeirra samvinnu og samtali er eitt stærsta framfaramál kjörtímabilsins. Samgöngusáttmáli sveitarfélaganna á höfuðborgarsvæðinu. Þar er að finna umfangsmikla uppbyggingu á stofnbrautum svæðisins, innviðum, almenningssamgöngum, göngu- og hjólastígum sem og umferðarstýringu á höfuðborgarsvæðinu. Í náinni framtíð munum við sjá þau verkefni sem heyra undir sáttmálann fara í framkvæmd hvert á fætur öðru.
Einnig þekkjum við umræðuna um Sundabraut eða Sundabrú. Sú umræða hefur dúkkað upp fyrir kosningar síðan ég fékk kosningarétt. Það var því afar ánægjulegt að sjá málið komast formlega af stað í sumar eftir gríðalega vandaða undirbúningsvinnu. Ferlið er hins vegar langt enda gríðalega stór framkvæmd. Stefnt er að því að hægt verði að fara yfir brúna árið 2031.
Sundabrú mun létta mikið á umferð í Mosfellsbæ og Ártúnsbrekku og auka þannig lífsgæði þeirra sem búa á svæðinu.
Framsókn er samvinnuflokkur, svona vinnum við!

Willum Þór Þórsson
1. sæti Framsókn Suðvestur

Lög unga fólksins

Leifur Ingi Eysteinsson

Í aðdraganda kosninga þá rignir yfir okkur alls kyns auglýsingum um það sem flokkarnir ætla að gera eftir kosningar.
Trúverðugleiki flokka er hins vegar misjafn og er því mikilvægt að skoða verkin frá líðandi kjörtímabili og meta það út frá þeim.
Fyrir ungt fólk, sem er að taka þátt í sínum fyrstu kosningum, langar okkur að draga aðeins fram tvö mál sem Framsókn kom í gegn á liðnu kjörtímabili sem snerta hag okkar unga fólksins.

Menntasjóðurinn
Lilja Alfreðsdóttir mennta- og menningarmálaráðherra umbylti lánaumhverfi námsmanna á kjörtímabilinu með stofnun Menntasjóðsins sem tekur við af LÍN. Nýr menntasjóður er með hærri framfærslu, möguleika á 30% niðurfellingu höfuðstóls, val um óverðtryggð lán og beinan fjárstuðning við foreldra í námi. Þetta er mesta framfaramál ungra námsmanna í áratugi.

Kjartan Helgi Ólafsson

Hlutdeildarlánin
Fyrir ungt fólk hefur reynst erfitt að koma sér inn á húsnæðismarkaðinn en hlutdeildarlánin sem Ásmundur Einar félags- og barnamálaráðherra kom með á kjörtímabilinu aðstoða einmitt ungt fólk að komast inn á þann markað. Það brúar bilið við fyrstu kaup og þarf þá einungis að leggja fram 5% af kaupverði eignarinnar en HMS lánar 20% sem hlutdeildarlán og það ber enga vexti eða afborganir. Stórt framfaramál fyrir ungt fólk.

Afrekalisti Framsóknar á kjörtímabilinu er langur og mörg framfaramál fyrir ungt fólk farið í gegn til viðbótar við þessi tvö hér að ofan. Það gefur okkur trúverðugleika þegar við tölum inn í framtíðina. Við tölum ekki fyrir neinum byltingum heldur framförum og raunhæfum lausnum.
Ungt fólk er framarlega og áberandi á listum Framsóknar t.d. hér í Suðvesturkjördæmi þar sem þrír af fimm efstu eru undir 35 ára. Á næsta kjörtímabili er mikilvægt að halda áfram veginn sem lagður var á síðasta kjörtímabili. Verkefnin framundan eru krefjandi og það mun skipta máli hverjir halda um stjórnartaumana. Framtíðin ræðst á miðjunni. XB fyrir unga fólkið.

Leifur Ingi Eysteinsson og Kjartan Helgi Ólafsson,
höfundar eru stjórnarmenn í Framsóknarfélagi Mosfellsbæjar

Afturelding spilar í Pepsi Max deild kvenna á næsta tímabili

Birna Kristín Jónsdóttir

Það var frábær stemming á Fagverksvellinum fimmtudaginn 9. september. Rúmlega 500 manns voru mættir á völlinn í boði Jako til þess að styðja stelpurnar okkar í úrslitaleik á móti FH um sæti í deild þeirra bestu að ári og ný vallarklukka leit dagsins ljós.
Ljóst var fyrir leikinn að liðið sem ynni færi upp, leikurinn var í járnum framan af en um leið og fyrsta markið kom var þetta aldrei spurning og niðurstaðan 4 – 0 fyrir Aftureldingu. Liðið stóð sig hrikalega vel, brjáluð barátta í stelpunum allan tímann og lang markahæsta konan í Lengjudeild í ár kemur úr okkar röðum, Guðrún Elísabet Björgvinsdóttir skoraði 23 mörk og ég held að þetta hafi verið skrifað í skýin en hún spilar einmitt í treyju númer 23.
Teymið allt í kringum liðið í sumar hefur verið samstíga og mjög öflugt. Mig langar að nota tækifærið til að þakka öllum sjálfboðaliðunum sem hafa lagt hönd á plóginn. Þetta gerist ekki af sjálfu sér það er alveg ljóst. Sjálfboðaliðinn er einn mikilvægasti hlekkurinn í okkar starfi og eigum við mikið undir ykkur öllum.
Við erum ótrúlega rík og í raun ótrúlegt hvað fólk er tilbúið að leggja mikið á sig. Ég tala fyrir mig sjálfa að oft og tíðum er starfið erfitt og ég velti alveg fyrir mér af hverju ég er að eyða öllum þessum tíma í þetta.
Svo koma svona uppskerustundir og þá er þetta allt þess virði – Takk öll. Áfram Afturelding.

Birna Kristín Jónsdóttir,
formaður Aftureldingar.

Mikilvægi hreyfingar

Ragnheiður Vídalín Gísladóttir

Ávinningur þess að stunda íþróttir er mikill fyrir líkamlega og andlega heilsu.
Við sem búum í Mosfellsbæ erum heppin með þann fjölda íþróttagreina sem eru í boði fyrir okkur. Nú þegar haustið er komið þá fara margir að huga að því að æfa. Þá er gott að geta farið og prófað mismunandi íþróttagreinar því það sama hentar ekki öllum. Á heimasíðu Aftureldingar er hægt að sjá hvaða íþróttagreinar eru í boði.
Við hjá Taekwondodeild Aftureldingar viljum vekja athygli á starfinu hjá okkur. Taekwondo er ólympísk bardagaíþrótt þar sem iðkendur læra sjálfsvörn og aga, þá eflir taekwondo sjálfstraust, liðleika, þol og þrek.
Við erum með frábæran hóp þjálfara, iðkenda og foreldra. Það er í boði að koma og prófa æfingar frítt hjá okkur í tvær vikur.
Æfingar fara fram í bardagasal Aftureldingar að Varmá. Taekwondo hentar öllum og er hægt að byrja að æfa á hvað aldri sem er. Iðkendur hjá okkur eru á aldrinum 6-50 ára. Almennar æfingar eru fyrir alla frá 6 ára aldri. Krílatímar eru fyrir 3-5 ára og TKD fitness eru styrktar- og brennsluæfingar fyrir 18 ára og eldri.
Á heimasíðu okkur www.afturelding.is/taekwondo er hægt að sjá stundatöflu og upplýsingar um þjálfara. Nánari upplýsingar er hægt að fá í gegnum tölvupóst taekwondo@afturelding.is

Ragnheiður Vídalín Gísladóttir,
formaður Taekwondodeildar Aftureldingar

Jafnrétti fyrir okkur öll

Una Hildardóttir

Frá árinu 2006 höfum við haldið Jafnréttisdag Mosfellsbæjar hátíðlegan í kringum 18. september en dagurinn er fæðingardagur Helgu J. Magnúsdóttur fyrrum oddvita Mosfellsbæjar sem lét sig málefni kvenna varða með ýmsum hætti. Hún var til að mynda formaður Kvenfélagasambands Gullbringu- og Kjósarsýslu og formaður Kvenfélagasambands Íslands.
Helga lést árið 1999 og upplifði miklar framfarir í jafnréttismálum á æviskeiði sínu. Í formannstíð Helgu í Kvenfélagasambandinu var Leiðbeiningastöð heimilanna stofnuð og skrifstofa sambandsins flutt að Hallveigarstöðum en hún var ein þeirra baráttukvenna sem gerðu Kvennaheimilið á Hallveigarstöðum að veruleika.

Jafnréttisdagurinn nú á dagskrá grunnskólanna
Þegar lýðræðis- og mannréttindanefnd Mosfellsbæjar tók fyrstu skrefin við skipulagningu dagskrár jafnréttisdagsins í ár varð fljótt ljóst að óvíst væri hvort heimsfaraldur gæti haft áhrif á dagskrána í ár. Ákvað nefndin að í ár yrðu hátíðarhöldin rafræn og þeim streymt á miðlum Mosfellsbæjar.
Það var samhugur um umræðuefnið, stöðu trans barna og ungmenna í Mosfellsbæ og fylltist dagskráin hratt og örugglega. Það er fagnaðarefni, í ljósi ötullar baráttu Helgu frá Blikastöðum fyrir menntun og menntunartækifærum kvenna, að dagskrá jafnréttisdagsins var streymt í öllum grunnskólum bæjarins í dag. Að dagurinn hennar sé nýttur til þess að fræða ungt fólk, draga úr fordómum og auka samstöðu og sýnileika í jafnréttisbaráttunni.
Síðastliðin 15 ár hef ég, líkt og Helga upplifað miklar framfarir í jafnréttismálum, sérstaklega er kemur að breyttu viðhorfi til kynjajafnréttis. Jafnrétti kynjanna er ekki lengur bara spurning um tvö kyn og baráttu kvenna sem enn er ekki lokið.
Með tilkomu laga um kynrænt sjálfræði höfum við styrkt réttindi trans og intersex fólks, sérstaklega barna. Lýðræðis- og mannréttindanefnd þótti þarft að fjalla sérstaklega um stöðu trans barna, auka sýnileika og fræða okkur og aðra til þess að draga úr fordómum og bæta þjónustu og stuðning.

Fögnum fjölbreytileikanum
Á rafrænum jafnréttisdegi veittum við jafnréttisviðurkenningu Mosfellsbæjar í 15. sinn en í ár hlýtur Hinsegin klúbbur Bólsins viðurkenninguna. Hinsegin klúbburinn var stofnaður árið 2019 og er vettvangur þar sem öll ungmenni á aldrinum 13-18 ára geta verið þau sjálf og er þátttakendum gefið færi á að fræðast frekar um hinsegin málefni.
Starfsemi klúbbsins er kærkomin viðbót í flóru félagsstarfs í Mosfellsbæ en þar er meðal annars staðið að fjölbreyttri fræðslu, m.a. kynfræðslu og hafa samtök eins og #Sjúkást og Eitt líf í komið í heimsókn.
Með viðurkenningunni vill lýðræðis- og mannréttindanefnd Mosfellsbæjar viðurkenna þörfina fyrir öruggan vettvang fyrir hinsegin ungmenni. Tryggjum að við öll, sem búum í Mosfellsbæ, njótum sömu mannréttinda – óháð kyni, kynhneigð, kynvitund, kyntjáningu eða kyneinkennum.

Una Hildardóttir,
höfundur er formaður Lýðræðis- og mannréttindanefndar Mosfellsbæjar.

Miðflokkurinn lætur verkin tala og stendur við gefin fyrirheit

Sveinn Óskar Sigurðsson

Nú stefnir í annað hvort óbreytt stjórnarsamstarf Sjálfstæðisflokks og Vinstri hreyfingarinnar græns framboðs á landsvísu eða óhreina vinstri stjórn.
Við Mosfellingar höfum búið við vinstri stjórn Sjálfstæðismanna í Mosfellsbæ um árabil og við sjáum hve hægt gengur að halda eignum bæjarins við og tryggja afburða þjónustu m.a. á sviði málefna fatlaðra og þeirra sem sárlega vantar félagslegt húsnæði. Biðlistar myndast og skuldir hrannast upp. Það er nú orðið lenska hjá meirihlutanum í Mosfellsbæ að benda á einhvern annan nafla en sinn eigin þegar fjárhagur bæði sveitarfélags og ríkis er kominn í hnút. Hins vegar bera þessir aðilar ábyrgð. Er ekki rétt að láta þá sæta þeirri ábyrgð?

Árið 2002, um það leyti þegar fáir vinstri menn tóku öll völd í Sjálfstæðisflokknum í Mosfellsbæ og fulltrúar Nýs vettvangs, fyrrum R-listans, gengu þar inn, ritaði núverandi bæjarstjóri grein með yfirskriftinni; „Er ekki kominn tími til að skipta?“. Þar mælti bæjarstjórinn eindregið gegn framkvæmdum á Blikastaðalandi og vildi fremur þétta byggð í miðbæ Mosfellsbæjar. Þéttingin hófst reyndar heimavið hjá honum sjálfum. Við vitum öll hvert það verkefni er komið og nú stefnir í enn frekari þéttingu byggðar meðfram borgarlínu sem nú er sögð forsenda fyrir að Blikastaðalandið byggist upp. Hvað með Sundabraut?

Bæjarstjórinn hefur nú tryggt að miklum fjármunum Mosfellinga verði varið í borgarlínu svo verkefnið, sem hann var sjálfur mótfallinn, nái nú fram að ganga. Í sömu grein fjallar hann um alla þá pytti sem hann situr nú sjálfur í, ásamt félögum sínum og Vinstri hreyfingunni grænu framboði. Hann hefur því tekið bæjarbúa í skógarferð sem endaði í feni, skuldafeni.

Sama virðist stefna í varðandi núverandi stjórnvöld sem orna sér, rétt eins og bæjarstjóri okkar, við þann eld sem brennur vegna COVID-19 heimsfaraldursins og bendir á að í honum brunnu eignir, tækifæri og væntingar bæjarbúa til að lækka skuldir. Þá er fullyrt að þetta sé hvorki ríkisstjórn Íslands né bæjarstjórnarmeirihluta í Mosfellsbæ að kenna. Þetta var allt vegna COVID-19.

Vandinn er í raun og sann fortíðarvandi. Skuldir bæjarfélagsins eru ekki komnar til aðeins vegna COVID-19 og sama með ríkissjóð Íslands. Nú hefur verið gefið á garðann í Mosfellsbæ og enn er gefið. Sama hefur verið gert með uppboðseignum hjá ríkissjóði, fasteignum almennings sem seldar voru á „spott prís“ ásamt gjafafé sem afhent var á báðar hendur í heimsfaraldrinum. Hefur þessu verið rétt skipt. Nei, alls ekki. Þessu er svo ætlað að mæta með aukinni skattlagningu og enn stærra bákni.

Við Mosfellingar getum hvorki búið lengur við vinstri stjórn hér í Mosfellsbæ né á landsvísu. Við þurfum að kjósa flokk sem þorir, flokk sem stendur við gefin fyrirheit og þá sem hafa sýnt og sannað að það er almenningur í landinu sem gengur fyrir. Miðflokkurinn leggur áherslu á að gera skattborgara að eftirlitsaðilum almannafjár, bæta samgöngur án endalausra umferðartafa, skilvirkara heilbrigðiskerfi án biðlista, bætt kjör eldri borgara, Sundabraut og nægt lóðaframboð. Við viljum taka stjórn á landamærum Íslands, auka ferðafrelsi um hálendið og hafna ofríki ríkisvaldsins þegar kemur að hálendi Íslands og orkuöflun. Við viljum einfalda regluverkið og tryggja að bæði sveitarfélög og ríki séu betur rekin en nú í dag. Umhverfismálin eru í ólestri og ímyndunarstjórnmál þar sem hver fjöðurinn á eftir annarri er dregin yfir raunverulega stöðu mála.

Því er rétt að ítreka fyrirsögn bæjarstjórans í Mosfellsbæ frá árinu 2002: „Er ekki kominn tími til að skipta?“.

Sveinn Óskar Sigurðsson,
höfundur er fulltrúi Miðflokksins í bæjarráði
og bæjarstjórn í Mosfellsbæ.

Tryggjum niðurgreiðslu sálfræðiþjónustu

Elín Anna Gísladóttir

Þann 9. september síðastliðinn birti heilbrigðisráðuneytið tvær áfangaskýrslur um óbein áhrif af Covid-19.
Það þarf í sjálfu sér ekki að koma mikið að óvart að úr þessu má lesa að geðheilbrigði þjóðarinnar hefur farið versnandi. Sérstaklega er tekið fram að faraldurinn hafi haft afgerandi neikvæð áhrif á líðan framhaldsskólanema.
Sama dag og þessi skýrsla kemur út þá birtist áskorun frá Sálfræðingafélagi Íslands og Öryrkjabandalagi Íslands um að standa við stóru orðin og fjármagna lög um niðurgreiðslu á sálfræðiþjónustu. Lög sem að allir þingmenn Alþingis samþykktu en ríkisstjórnin hefur svo ekki séð um að fjármagna. Samt vitum við með staðreyndum að þörfin er mikil og hefur líklega sjaldan verið jafn brýn og nú.
Þessi lög sem félögin vísa í, í áskorun sinni, eru einmitt lög sem urðu að veruleika fyrir tilstilli Viðreisnar. Frumvarp sem ég er gríðarlega stolt af að minn flokkur hafi leitt og náð fram breiðri samstöðu um. Við vitum það í Viðreisn að niðurgreiðsla sálfræðiþjónustu skiptir máli og á að vera sjálfsagður hlutur. Við erum komin á þann stað núna 2021 að vita það að andleg heilsa skiptir alveg jafn miklu máli og sú líkamlega. Svo það er mikilvægt að við veitum fólki tækifæri til þess að geta sótt sér þessa þjónustu.
Við munum halda áfram að berjast fyrir þessu máli svo að sem allra fyrst geti Íslendingar gengið að þessu sem sjálfsögðum hlut. Það er mikilvægt fyrir okkur öll og þá sérstaklega unga fólkið okkar sem kemur nú út úr þessum heimsfaraldi verr statt andlega en það var fyrir faraldurinn. Sjáum til þess að þeirra bíði kerfi sem getur stutt þau við að vinna sig út úr þessu svo þetta þurfi ekki að fylgja þeim út lífið.

Gefðu framtíðinni tækifæri!
Settu X við C þann 25. september.

Elín Anna Gísladóttir,
höfundur skipar 3. sæti á lista
Viðreisnar í Suðvesturkjördæmi.

Betra líf fyrir fjölbreyttar fjölskyldur

Gerður Pálsdóttir

Alþingiskosningar nálgast. Nú hefur þú, kjósandi góður, tækifæri til að kjósa með breytingum til betra lífs fyrir allar fjölskyldur á Íslandi.
Samfylkingin vill halda uppi sterkri almennri velferðarþjónustu á Íslandi til þess að uppfylla kröfur okkar og hugsjónir um félagslegt réttlæti.

Endurreisn barnabótakerfisins
Samfylkingin ætlar að endurreisa barnabótakerfið að norrænni fyrirmynd. Það gerum við með því að hækka skerðingarmörk tekjutengdra barnabóta úr 351 þús. kr. fyrir einstæða foreldra í 600 þús. kr. og sömu mörk fyrir par í 1.200 þús. kr. Þannig jöfnun við kjörin og léttum undir með barnafjölskyldum. Tillögur Samfylkingarinnar eru fullfjármagnaðar, sanngjarnar og jafnaðarstefna í framkvæmd. Við hvetjum kjósendur til styðja okkur svo að þessar breytingar verði gerðar á barnabótakerfinu.

Þórunn

Mikilvægi sterkrar velferðarþjónustu
Samfylkingin ber ábyrgð á framgangi jafnaðarstefnunnar á Íslandi. Það er því á okkar ábyrgð að vinna sífellt að endurskoðun og nýsköpun innan velferðarþjónustunnar til að hún þróist í takt við kröfur samtímans og virki sem skyldi. Ljóst er að margt má betur fara í íslensku velferðarkerfi og það viljum við laga. Kerfið byggir í of ríkum mæli á skerðingum og tekjutengingum og er hvorki nógu almennt né nógu þétt. Of mörg falla á milli kerfa, festast í fátæktargildrum eða lifa í einsemd og einangrun. Alltof mörg þurfa að óttast um lífsafkomu sína, neita sér um nauðsynlega læknisþjónustu eða alast upp í fátækt.
Hornsteinn velferðarsamfélags jafnaðarmanna er virðing okkar allra fyrir hverjum og einum. Þess vegna leggur Samfylkingin ríka áherslu á að notendasamráð sé viðhaft við alla stefnumótun og ákvarðanatöku um velferðarmál og þannig tryggt að stefna stjórnvalda sé í takti við veruleika og aðstæður þeirra hópa sem við á. Við lítum svo á að sérhver manneskja hafi eitthvað til samfélagsins að leggja og viljum nýta styrkleika hvers og eins sem best með þvíað stuðla að virkri þátttöku sem flestra og rjúfa einangrun þeirra sem upplifa sig afskipta eða útundan.

Bætt réttindi fatlaðs fólks
Samfylkingin vill að réttindi fatlaðs fólks séu virt í hvívetna á Íslandi. Það kallar á fullt aðgengi á öllum sviðum samfélagsins og að fötluðum einstaklingum séu tryggð tækifæri til sjálfstæðs lífs. Við viljum lögfesta samning Sameinuðu þjóðanna um réttindi fatlaðs fólks og fylgja honum eftir með markvissum aðgerðum, meðal annars fullri fjármögnun stuðningsþjónustu og samninga um notendastýrða persónulega aðstoð (NPA). Áfram þarf að vinna að viðhorfsbreytingu í samfélaginu gagnvart réttindum fatlaðs fólks og gegn hvers kyns mismunun og fordómum í þeirra garð.
Settu X við S í kjörklefanum 25. septem­ber nk.!

Gerður Pálsdóttir er þroskaþjálfi, búsett í Mosfellsbæ og skipar
9. sæti framboðslista Samfylkingarinnar í Suðvesturkjördæmi.
Þórunn Sveinbjarnardóttir leiðir listann.

Mosfellsbær, fyrsta kolefnishlutlausa sveitarfélagið?

Sigurður Loftur Thorlacius

Loftslagsvá er ein mesta ógn sem mannkynið hefur nokkru sinni staðið frammi fyrir.
Loftslagsbreytingar af mannavöldum eru ótvíræðar og valda meðal annars aukinni tíðni hitabylgna, aftakaúrkomu, flóða og gróðurelda. Þessar breytingar eru ekki lengur fjarri okkur heldur sjáum við sligandi hitabylgjur í nágrannalöndum okkar, gróðurelda geisa og hamfaraflóð æða yfir þéttbýli. Hitamet falla svo um munar á hverju ári. Loftslagsvá vofir ekki einungis yfir kynslóðum framtíðar heldur ógnar hún okkur hér í dag. Vinstri Græn vilja róttækar aðgerðir og réttlát umskipti í loftslagsmálum og viðbrögð við loftslagsvánni sem byggja á áætlunum og fléttast inn í alla pólitíska stefnumótun, líka í sveitarfélögum.
Mosfellsbær er ekki undanskilinn áhrifum loftslagsbreytinga því þær valda til dæmis aukinni tíðni á flóðum eins og þau sem urðu í Mosfellsbæ í mars 2015. Með auknum líkum á aftakaúrkomu eykst líka hættan á skriðuföllum og Mosfellsbær er ríkur af fellum. Við þurfum að sýna fyrirhyggju, aðlagast loftslagsvánni og taka tillit til hennar í öllu skipulagi. Samhliða þurfum við að draga úr losun gróðurhúsalofttegunda og auka bindingu kolefnis hratt og örugglega til að koma í veg fyrir frekari loftslagsbreytingar.

Mosfellsbær hefur löngum verið í fararbroddi sveitarfélaga í umhverfismálum og á fáum stöðum hefur samþætting náttúru og byggðar tekist jafn vel. Við getum verið hreykin af fjölskylduvæna samfélaginu okkar, virku menningarlífi og gróskumikilli náttúru.
Í stjórnarsáttmála ríkisstjórnar Katrínar Jakobsdóttur var sett fram markmið um kolefnishlutleysi Íslands fyrir 2040 og í júní á þessu ári var það markmið lögfest á Alþingi. Í umhverfisstefnu Mosfellsbæjar er líka stefnt á kolefnishlutleysi og ýmsar leiðir lagðar fram til að draga úr losun og auka bindingu. Styðja á við hjólreiðar, almenningssamgöngur og orkuskipti til að draga úr losun frá samgöngum. Auka á kolefnisbindingu með aukinni skógrækt og landgræðslu ásamt því að endurheimta votlendi og birkiskóga. Auka á aðgengi að vistvænum vörum, minnka matarsóun og auðvelda flokkun úrgangs.
Í umhverfismálum höfum við Mosfellingar forskot á mörg önnur sveitarfélög og ættum að nýta okkur þá forystu til að verða fyrsta íslenska kolefnishlutlausa sveitarfélagið. Einhver sveitarfélög hafa sett stefnuna á kolefnishlutleysi 2030 og þar ætti Mosfellsbær ekki að vera neinn eftirbátur. Við Vinstri græn viljum stíga stór skref, það vill Mosfellsbær líka, sameinumst öll í markmiðinu um kolefnishlutlaust bæjarfélag.

Sigurður Loftur Thorlacius, umhverfisverkfræðingur og fulltrúi ungs fólks í Loftslagsráði.
Höfundur er í 11. sæti Vinstri grænna í Suðvesturkjördæmi.