Anna Sigríður Guðnadóttir

Ég leyni því ekki að niðurstöður kosninganna þann 26. maí voru vonbrigði fyrir Samfylkinguna í Mosfellsbæ.
Framboðum fjölgaði til muna í bænum við þessar kosningar frá þeim síðustu og ljóst að mun meiri samkeppni yrði um atkvæðin. Enda kom það á daginn og niðurstaðan varð að Samfylkingin tapaði einum bæjarfulltrúa.
Miklar breytingar verða nú í bæjarstjórn. Í minnihluta á síðasta kjörtímabili voru tveir flokkar en á þessu nýhafna kjörtímabili verða þeir fjórir og hver þeirra með einn fulltrúa. Vinstri græn höfnuðu tilboði þessara flokka um meirihlutaviðræður og töldu sínum áherslum og málefnum best borgið í fangi Sjálfstæðisflokksins líkt og áður sem kom kannski ekki á óvart.
Ásýnd nýrrar bæjarstjórnar verður einnig gjörbreytt því einungis tvær konur munu sitja í níu fulltrúa bæjarstjórn næsta kjörtímabil. Það er sorgleg staða árið 2018 og endurspeglar að stjórnmálaflokkar treysta konum síður til að sitja í oddvitasætum.
Á síðasta kjörtímabili náðum við Ólafur Ingi bæjarfulltrúar S lista góðum árangri og fengum samþykktar margar tillögur um málefni sem flokkurinn hafði sett á oddinn í kosningabaráttunni 2014. Þeim árangri náðum við með málefnalegu starfi og staðfestu. Þrátt fyrir breytta stöðu þá mun ég sem bæjarfulltrúi Samfylkingarinnar halda áfram að vinna málefnum okkar jafnaðarmanna framgang innan bæjarstjórnar og nýta til þess málefnalegar leiðir.
Þeim sem ákváðu að treysta Samfylkingunni fyrir atkvæði sínu þakka ég af heilum hug. Full auðmýktar gagnvart verkefninu lofa ég að gera mitt allra besta til að vinna að áherslum okkar á ábyrgan rekstur, lýðræðislegt samráð og gagnsæi, mannvænt skipulag, jafnrétti, sjálfbærni og umhverfismál með hagsmuni framtíðarkynslóða í huga, að ógleymdri félagslegri samhjálp á grunni virðingar og mannréttinda, en allar þessar áherslur miða að því að auka jöfnuð, velsæld og gleði í bænum okkar góða.

Anna Sigríður Guðnadóttir
bæjarfulltrúi Samfylkingarinnar

Margrét Guðjónsdóttir

Að taka þátt í sveitarstjórn er ábyrgðarfull ákvörðun. Traust íbúanna á kjörnum fulltrúum og starfsmönnum sveitarfélagsins er forsenda hins staðbundna lýðræðis.
Ég hef búið í Mosfellsbæ frá árinu 1989 og þekki bæinn vel. Eitt af þeim málum sem ég hef brennandi áhuga á eru skipulagsmál. Gríðarleg uppbygging hefur átt sér stað í Mosfellsbæ síðustu ár, sem er jákvætt, en samhliða þurfum við að standa vörð um okkar fjölbreyttu og fallegu náttúru sem er okkar sérstaða á höfuðborgarsvæðinu.

Skipulagsvaldið er í höndum sveitarstjórna en við framkvæmd þess verða íbúar að geta treyst því að jafnræðis sé gætt auk þess sem festa sé í framkvæmd skipulagsins og því verði almennt ekki breytt nema veigamiklar ástæður mæli því með.
Ég vil leggja áherslu á að fá íbúana í lið með okkur, hlusta, taka við rökum, leita til þeirra til að afla upplýsinga og þekkingar og vinna saman að málefnum sveitarfélagsins. Það eru íbúarnir sem eru sérfræðingar í nærumhverfinu og geta komið með áhugaverðar lausnir.

Mosfellsbær er yndislegur staður til að búa í og hlakka ég til að geta beitt þekkingu minni íbúum hans til góðs.

Margrét Guðjónsdóttir
skipar 2. sæti á lista Vina Mosfellsbæjar.

Anna Sigríður Guðnadóttir

Samfylkingin vill skóla í fremstu röð fyrir börnin í Mosfellsbæ og að allir nemendur fái tækifæri til að þroska hæfileika sína og blómstra.
Skólinn gegnir afar mikilvægu hlutverki í að undirbúa börn og ungmenni undir þátttöku í margbreytilegu lýðræðissamfélagi og því þarf að búa þannig að skólunum að þeir hafi nægt bolmagn til að sinna verkefni sínu af alúð. Endurskoðun skólastefnu bæjarins sem samþykkt var 2010 er löngu tímabær.

Stuðningur og samstarf
Samfylkingin leggur áherslu á að styrkja starfsumhverfi kennara með því að auka aðgengi að sérhæfðu starfsfólki á ýmsum fagsviðum. Þannig er hægt að mynda öflug og samstíga teymi svo auðveldara verði að mæta ólíkum þörfum nemenda. Stuðningur við börn á að miðast við þarfir þeirra en ekki að vera háður læknisfræðilegum greiningum. Námsframboð og skipulag þarf að vera sveigjanlegt. Efla þarf samstarf á milli skóla, skólastiga og allra þeirra aðila sem sinna tómstundum og menntun barna og ungmenna til að sem best samfella sé í vinnudegi barna og aðstæður fullnægjandi. Þá er nauðsynlegt að hugað sé tímanlega að uppbyggingu skólamannvirkja svo skólar verði ekki of stórir. Að eiga stærstu skóla landsins á ekki að vera markmið sveitarfélagsins.

Steinunn Dögg Steinsen

Fleiri leikskólakennara
Nauðsynlegt er að fjölga leikskólakennurum í leikskólum bæjarins og þar á bærinn að stíga myndarlega inn með stuðningi við starfsfólk sem vill sækja sér frekari menntun. Þetta má gera með því að auka við stöðugildi á leikskólum til að koma til móts við fjarveru vegna skólasóknar starfsfólks. Til þessa hefur sveitafélagið ekki staðið sig nógu vel í að styðja ófaglærða starfsmenn leikskóla á þessu sviði. Þar vill Samfylkingin gera mun betur.

Leikskóli fyrir 12 mánaða
Samfylkingin vill að öll 12 mánaða börn fái leikskólavist. Óvissa um dagvistunarúrræði barna er óásættanlegt fyrir foreldra og samfélagið. Þá er mikilvægt að þeirri lækkun leikskólagjalda sem Samfylkingin fékk samþykkta í bæjarstjórn verði viðhaldið og að gjöldin verði áfram sambærileg við sveitarfélögin á höfuðborgarsvæðinu. Við viljum búa vel að barnafjölskyldum og gæta þess að þjónustan í okkar góða bæ sé ekki síðri eða dýrari en annars staðar.

Listaskólinn
Listaskólinn gegnir ákaflega mikilvægu hlutverki í bæjarlífinu. Samfylkingin vill að á næsta kjörtímabili verði unnið markvisst að því að skapa Listaskólanum framtíðar­aðstöðu svo hann geti vaxið og dafnað með stækkandi sveitarfélagi og sinnt áfram þeirri mikilvægu kennslu og menningaruppeldi sem honum er falið.

Samfylkingin telur mikilvægt að setja málefni barna í fyrsta sætið. Ef þú er sammála þá setur þú x við S á kjördag 26. maí.

Anna Sigríður Guðnadóttir, bæjarfulltrúi og oddviti Samfylkingarinnar.
Steinunn Dögg Steinsen, varabæjarfulltrúi, skipar 3. sæti á lista Samfylkingarinnar.

Hildur Björg Bæringsdóttir

Í Mosfellsbæ er fjórðungur bæjarbúa á grunnskólaaldri og málefni dagvistunar, skóla og tómstunda því sjálfkrafa í brennidepli hjá stórum hluta bæjarbúa.
Það er okkur hjartans mál að gera betur í skólamálum, tryggja dagvistun og að börnum og starfsfólki líði vel. Það er alveg frábært hvað kennarar og starfsmenn skólanna standa sig vel miðað við þær aðstæður sem þeir hafa.

Viðreisn leggur áherslu á að bjóða börnum bæjarins upp á nútíma tækni og aðbúnað til að geta tekist á við verkefni sín í takt við þann heim sem við búum í. Samkvæmt gögnum Mosfellsbæjar, þá er gert ráð fyrir 40 milljónum króna til upplýsinga- og tæknimála hjá grunnskólum og gert er ráð fyrir eflingu tæknibúnaðar, bættan aðbúnað kennara og nemanda ásamt stuðningi við innleiðingu á fjölbreyttari kennsluháttum. Núverandi aðbúnaður er óviðunandi og þessar úrbætur því löngu tímabærar og fær bæjarstjórn klapp á bakið fyrir þær. En hér er ansi knappt í lagt. Heildarframlagið reiknast sem 22 þúsund krónur per barn. Allir kennarar eiga að fá fartölvur og í það fer væntalega helmingur upphæðinnar. Restin, 20 milljónir, fer vonandi í börnin en það dugar skammt. Þetta verður að endurskoða og tryggja raunhæft fjármagn í þennan mikilvæga málaflokk.

Fyrsta áfanga Helgafellsskóla lýkur um næstu áramót og þá hefja börn í 1-5. bekk nám þar. Þegar skólinn er fullbúinn er gert ráð fyrir 110 börnum í leikskóla og 600 í grunnskóla í 1-10. bekk. Við verðum að tryggja að fjöldi íbúa í hverfinu stemmi við stærð skólans. Varmárskóli er hannaður sem 600 barna skóli og það eru mörg ár síðan þar voru 600 börn. Nýr Helgafellsskóli léttir vissulega á, en ekki nægilega mikið.

Varmárskóli er löngu sprunginn og það er tímabært að bæjaryfirvöld opni augun og líti til framtíðar. Það er nauðsynlegt að bregðast strax við og leysa bráðvanda Varmárskóla og gera allsherjar úrbætur á skólabyggingunum. Þó ekki væri nema til samræmis við markmið um heilsueflandi samfélag og kröfur um nútíma skólahald. Nemendur Varmárskóla voru 822 skólaárið 2017/2018 og verða 868 nemendur á næsta skólaári. Þessa fjölgun á að leysa með 2 færanlegum kennslustofum. Hverfið í Leirvogstungu heldur áfram að byggjast upp og áður en við vitum af verður húsnæði í Háholti og Þverholti fullbyggt með nýju fólki sem þarf að koma börnum sínum í skóla. Í Leirvogstungu er leikskóli í færanlegum kennslustofum. Ef við byggjum strax varanlegan skóla í Leirvogstungu fyrir börn 1-9 ára, þá myndi það létta mun betur á Varmárskóla og auðvelda vinnu við endurbætur. Hefjast þarf handa strax við að byggja Leirvogstunguskóla.

Það er því ljóst að löngu tímabært er að móta skólastefnu til framtíðar og endurskoða stefnu í uppbyggingu skólamannvirkja í samráði við alla hagsmunaaðila og sem tekur mið af áætlun um íbúafjölda. Verkefnið er ögrandi og við viljum beisla tækifærin sem þessu fylgja og móta saman með íbúum bæjarins metnaðarfullt fræðslu- og tómstundastarf sem tekur mið af þörfum allra íbúanna.

Hildur Björg Bæringsdóttir
4. sæti á lista Viðreisnar í Mosfellsbæ.

„Börn og unglingar eiga að upplifa ævintýri á hverjum degi og koma heim úr skóla- og frístundastarfi ánægð, hugsandi, forvitin, full ástríðu og vilja til að afla sér þekkingar og hafa áhrif…“

Svona hljóma upphafsorð nýrrar menntastefnu Reykjavíkurborgar til 2030. Útgangspunkturinn við mótun stefnunnar var barnið sjálft og haft víðtækt samráð við alla hagsmunaaðila í skólasamfélaginu og leitað ráðgjafar sérfræðinga. Markmið menntastefnunnar er að börn og unglingar verði leiðtogar í eigin lífi og fær um að láta drauma sína rætast. Til að svo megi verða verður lögð áhersla á eftirfarandi lykilhæfni: félagsfærni, sjálfseflingu, læsi, sköpun og heilbrigði. Innleiðingunni er fylgt eftir með stuðningi og fjármagni og eftir þriggja ára þróunartímabil verður lagt mat á hvernig til tókst og gerðar nauðsynlegar endurbætur.
Það er engin tilviljun að mörg nágrannasveitarfélög okkar eru með menntamálin í forgangi og eru að eyða miklum tíma og fjármunum í að greina stöðuna og móta sér framtíðarstefnu. Grunnstoðum menntunar er ábótavant sem endurspeglast meðal annars í niðurstöðum PISA og úttekt Evrópumiðstöðvar á framkvæmd stefnu um menntun án aðgreiningar. Mennta-málaráðherra, Lilja Alfreðsdóttir, talar um tímamót í menntamálum þjóðarinnar og að við séum víða á rauðu ljósi. Skúli Helgason, formaður skóla- og frístundaráðs Reykjavíkur, bendir á að á Íslandi séu byggðir dýrir og flottir skólar en of lítil áhersla lögð á innra starfið. Haraldur Haraldsson, bæjarstjóri í Hafnarfirði, talar um úrræðaleysi vegna nemenda með fjölþættan vanda.

Ef við lítum okkur nær og skoðum niðurstöður mælinga á líðan og námsárangri barna í Mosfellsbæ (Rannsókn og greining um líðan og hagi ungs fólks, Skólapúls, samræmd próf o.fl.) sést glöggt að víða eru rauð flögg sem rýna þarf betur í. Við megum ekki skorast undan heldur þarf að horfa fram á veginn og gera betur því hvort sem okkur líkar betur eða verr eru gríðarlegar breytingar framundan. Tæknibyltingin sem er hafin mun hafa mikil áhrif á líf okkar allra og breyta því samfélagi sem við nú þekkjum. Miklar breytingar munu verða á vinnumarkaði og þurfa því börnin okkar að búa sig undir störf sem eru jafnvel ekki til í dag. Hefðbundum störfum mun fækka og flókin störf taka við þar sem reynir á skapandi hugsun, þrautseigju, rökhugsun, samvinnu og grunnþekkingu á forritun. Hvernig ætlum við sem samfélag að takast á við þetta risavaxna verkefni?

Foreldrafélag Varmárskóla skorar á öll framboð að setja menntamálin í fyrsta sæti. Mikilvægt er að fara í greiningu á stöðu skóla í Mosfellsbæ og kynna sér hvað önnur bæjarfélög eru að gera. Gera þarf áætlun og móta framtíðarsýn til að takast á við gjörbreytt samfélag og tryggja að fjármagn fylgi. Nauðsynlegt er að endurskoða núverandi menntastefnu sem eru einstaklega falleg orð á blaði en því miður lítil innistæða fyrir. Saman getum við breytt þessu og tryggt að skólar í Mosfellsbæ séu framsæknir og í fremstu röð. Það er allt hægt ef viljinn er fyrir hendi enda snýst pólitík um forgangsröðun. Hver er ykkar forgangsröðun?

F.h. stjórnar Foreldrafélags Varmárskóla,
Helga Kristín Magnúsdóttir formaður og Elfa Haraldsdóttir varaformaður

——

Hver er ykkar forgangsröðun?
Foreldrafélag Varmárskóla hefur þegar sent eftirfarandi spurningar um skólamál á öll framboð og verða svör þeirra birt á samfélagsmiðlum.

Munuð þið beita ykkur fyrir því að:
1. Gera úttekt til að tryggja að húsnæði og aðstaða til skóla- og frístundastarfs sé fullnægjandi og samrýmist kröfum um heilsuvernd?
2. Endurskoða menntastefnu Mosfellsbæjar og tryggja skólunum nauðsynlegt fjármagn til að geta unnið eftir henni?
3. Efla faglega þjónustu við nemendur og kennara með því að fjölga faglærðu fólki innan skólanna og auka þverfaglegt samstarf milli þeirra?
4. Nýta með markvissum hætti niðurstöður innlendra sem erlendra mælinga sem gerðar eru á námsárangri og líðan barna til að gera betur?
5. Vinna markvisst gegn einelti og huga betur að bættri líðan barna og ungmenna? Niðurstöður Rannsókna og greininga sýna að kvíði og vanlíðan barna og unglinga í Mosfellsbæ fer vaxandi.
6. Endurskoða úrræði fyrir börn með sérþarfir og leggja áherslu á snemmtæka íhlutun og markviss inngrip án þess að greining þurfi endilega að vera forsenda fjárveitinga?
7. Veita öflugri stuðning við börn og ungmenni í hegðunar- og samskiptavanda með aukinni ráðgjöf og ráðningu fleiri sérhæfðra starfsmanna?
8. Móta heildstæða stefnu um upplýsingatækni í skóla- og frístundastarfi og tryggja að innleiðingu fylgi stuðningur sérfræðinga í upplýsingatækni, skólaþróun og kennsluráðgjöf og nauðsynlegt fjármagn til að bæta búnað?
9. Nemendur fái aukin tækifæri til að kynnast störfum í iðn-, raun- og tæknigreinum og styrkja tengsl milli skóla og atvinnulífs með markvissri náms- og starfsfræðslu og vettvangsferðum?
10. Unnið sé markvisst í skólastarfi eftir markmiðum um heilsueflandi samfélag þar sem heilsa spannar líkamlega, andlega og félagslega vellíðan?
11. Auka samstarf við foreldrasamtök og tryggja aðkomu foreldra að stefnumótandi ákvörðunum um skóla- og frístundastarf?

Herdís Kristín Sigurðardóttir

Miðflokkurinn vill gæta barna ekkert síður en aldraðra og öryrkja. Miðflokkurinn leggur sérstaklega áherslu á snemmtæk úrræði fyrir börn með sérþarfir þar sem bið fyrir úrræði verði ekki aðeins stytt heldur hverfi.
Í dag er þessu svo við komið að hver silkihúfan á fætur annarri ásamt ágreiningi á milli stofnanna, ríkis og sveitarfélaga gerir það að verkum að börn þurfa ekki aðeins að bíða eftir úrræðum heldur fá þau ekki.

Biðin eftir greiningu
Í pistli á Bleikt.is frá því í september 2011 lýsir móðir ein, Kolbrún Reinhardtsdóttir Kvaran (Kolla Kvaran), hve vonlaust kerfið er þegar kemur að því að leitað sé eftir greiningu barna og úrræðum fyrir börn sem þola enga bið.
Foreldrar sem þurfa að komast í gegnum daginn rétt eins og við hin en hafa ekki tök, ráð eða þekkingu á skrifræðinu og vita ekki hve langan tíma það tekur að fá lausn brennur inni og barnið sem og öll fjölskyldan líður fyrir aðgerðarleysið.
Hve hversdagslega illt getur kerfið verið gagnvart börnum og hversu vonlaus barátta foreldra oft er fyrir börnin sín þarf að vera viðfangsefni okkar sem viljum breyta og bæta.

Örlygur Þór Helgason

Snemmtæk úrræði
Í Mosfellbæ, rétt eins og víðast hvar annars staðar, eru börn sem þurfa á sértækum úrræðum af margvíslegum toga að halda. Þarna þarf að spyrða saman félags- og fjölskylduúrræði sveitarfélags, íþrótta- og tómstundafélög og síðast en ekki síst leik- og grunnskóla.
Snemmtæk úrræði eru ætluð til þess að áður en við missum barnið út af braut lífsins og hamingjunnar ber okkur, sem þekkjum til og höfum tækin, að skapa grundvöll fyrir foreldra að lausn, varanlegri lausn, sem miðast að því að unnið sé í þessum málum áður en vandinn er orðinn of stór.

Enga bið
Miðflokkurinn leggur gríðarlega áherslu á snemmtæk úrræði sem byrja eigi í leikskóla og svo fylgt eftir í grunnskóla. Tryggja þarf betri menntun og þverfagleg úrræði yfir svið bæjarfélagsins og nefnda með það að markmiði að allir í kerfinu viti af ferlinu og lausnum áður en vandinn ber foreldra yfirliði.
Látum ekki börn og foreldra bíða svo árum skiptir til að fá lausn fyrir barn sitt þar sem hver bendir á annan og ekkert gerist. Leysum vandann.
Miðflokkurinn er lausnamiðaður flokkur sem framkvæmir.

Herdís Kristín Sigurðardóttir er sjálfstætt starfandi og hrossaræktandi, skipar 2. sæti á lista Miðflokksins í Mosfellsbæ.
Örlygur Þór Helgason er kennari og þjálfari, skipar 3. sæti á lista Miðflokksins í Mosfellsbæ.
Heimild: Bleikt.is: (www.bleikt.pressan.is/lesa/skituguborninhennarevu)

Sveinn Óskar Sigurðsson

Miðflokkurinn leggur ríka áherslu á að þeir sem fyrir hann starfa vilji vinna með fólki en ekki brjóta sjálfsmynd fólks niður. Við sem skipum lista Miðflokksins í Mosfellsbæ komum úr öllum áttum og fjölmargt sem sameinar okkur.

Við erum eins og þið
Í einhverjum tilvikum virðist sem stjórnmálamenn hafi farið svo út fyrir getu sína og mörk að tíðindum sæti. Við, sem skipum lista Miðflokksins, erum vinnandi fólk á öllum aldri. Við erum viðskiptafræðingar, einn er lögreglumaður, þar má finna einstæðar mæður, fólk sem hefur þurft að berjast fyrir hverri krónu, sumir eru vörubílstjórar, aðrir námsmenn. Við höfum marga fjöruna sopið og erum hokin af reynslu.

EIR málið verður rannsakað
Miðflokkurinn lofar því að EIR málið verði rannsakað, mál sem er eina einstaka hrunmálið sem ekki hefur verið rannsakað. Þar glötuðust 8 milljarðar og þar af 2 af lífeyri eldri borgara, þeirra sem treystu og trúðu þáverandi stjórnarmönnum EIRAR. Þeir hafa ekki þurft að sæta ábyrgð. Ekki má gleyma þaulsetnasta flokksins í bæjarstjórn.

Margrét Jakobína Ólafsdóttir

Eigum við að gleyma þessu EIR máli?
Getum við, í hvaða flokki sem er, látið undir höfuð leggjast að kalla til ábyrgðar þá sem gættu ekki hagsmuna eldri borgara í þessu bannsetta EIR máli? Í stjórn var fólk með menntun frá verkfræðingi til lögfræðings og gætti ekki þess einfalda og sjálfsagða hlutar að þinglýsa beinum eða óbeinum eignarréttindum gamla fólksins. Hvaða opinber embættismaður, lögmaður eða fasteignasali sem er hefði misst öll sín réttindi og starf vegna aðgerðarleysis af þessum toga.
Getum við, sem samfélag, haldið vegferð okkar áfram inn í lífið og út úr því án þess að þetta mál verði krufið? Við í Miðflokknum segjum nei!
Það er tími til kominn að meirihlutinn í Mosfellsbæ, þ.e. þeir sem þar enn sitja í fleti, fái úttekt á því hvernig fulltrúar þeirra fóru með fjármuni eldri borgara í framangreindu EIR máli.

Miðflokkurinn vill persónulega þjónustu og skilvirkar lausnir fyrir aldraða
Miðflokkurinn leggur áherslu á að gæta að persónulegri þjónustu við aldraða inn í framtíðina. Tími ópersónulegrar símsvörunar og kröfu um fyrirspurnir í gegnum netheima Mosfellsbæjar er runninn upp. Miðflokkurinn mun tryggja aðrar leiðir og persónulegri fyrir eldri borgara í Mosfellsbæ þar sem tryggt verði aðgengi beint að bæjarstjóra fyrir hvern einasta einstakling.
Við munum tryggja gjaldfrjálsar almenningssamgöngur fyrir aldraða og aðgengi að þjónustu þótt búið sé að loka Heilsugæslunni um kvöldin og helgar auk þess að síðasti bankinn lokaði skyndilega. Miðflokkurinn vill rjúfa einangrun eldri borgara og auka virkni þeirra.
Miðflokkurinn mun ekki gera aldraða að e.k. féþúfu eins og virðist gilda um meirihlutann í Mosfellsbæ og EIR. Þarna er gott að vera en það er dýrt. Verðlag leigu og þjónustu er tilkomið m.a. vegna óráðsíu og þessa umtalað EIR máls. Þaðan sprettur þessi vandi og honum hefur verið velt yfir á eldri borgara. Miðflokkurinn mun leitast við að vinda ofan af þessu viljaverki.

Sveinn Óskar Sigurðsson er viðskiptafræðingur og skipar 1. sæti á lista Miðflokksins í Mosfellsbæ.
Margrét Jakobína Ólafsdóttir er félagsliði og skipar 6. sæti á lista Miðflokksins í Mosfellsbæ.