Það hefur löngum legið ljóst fyrir að það er ekki alltaf vinsælt að stokka upp í stöðnuðum kerfum. Ekki vegna þess að almenningur vilji ekki sjá fram á eðlilegar breytingar heldur fer kerfið sjálft og sterkir hagsmunaðilar því tengdir upp á afturlappirnar.
Neytendur hafa ekki verið sjálfsögð breyta hjá hugmyndasmiðum núverandi landbúnaðarkerfis. Árum saman hefur varðstaða verið uppi um óbreytt landbúnaðarkerfi. Samt koma sömu viðfangsefnin endurtekið upp líkt og í sauðfjárrækt. Bændur standa enn og aftur hjálparlausir frammi fyrir því að afurðarstöðvarnar lækka verðin til þeirra og verðlækkun til neytenda er ekki í myndinni. Samt má ekki hrófla við kerfinu né taka raunverulega á vandanum.
Lausnir gömlu flokkana felast í kyrrstöðu um kerfið. Og að venju borga neytendur og skattgreiðendur brúsann. Það sem verra er, lausnirnar gagnast bændum lítið til lengri tíma litið.
Kröfur um umfangsmikil birgðakaup og útflutningsskyldu sem heldur uppi verði til íslenskra neytenda hafa endurtekið verið settar fram af þingmönnnum Framsóknar, VG og Sjálfstæðisflokks í stað þess að ráðast að rót vandans. Það er óskiljanlegt og óverjanlegt fyrir neytendur.
Svipuð staða er uppi þegar litið er til mjólkurframleiðslunnar en hún er undanþegin samkeppnislögum. Eins og búið var að kynna í sumar á vef ráðuneytisins átti að afnema á þessu þingi undanþágu Mjólkursamsölunnar enda þarf að útskýra það sérstaklega af hverju sérlög eigi að gilda um fyrirtækið en ekki almenn lög. Lítil og meðalstór fyrirtæki í mjólkuriðnaði eiga einnig erfitt með að festa sig í sessi í þessu umhverfi með tilheyrandi tjóni fyrir neytendur. Mótspyrnan var hins vegar mikil frá sérhagsmunaaðilum og gömlu flokkunum. Nú eru breyttar aðstæður og kosningar fram undan. Mikilvægt er að frjálslynd sjónarmið eigi sér áfram talsmenn á þingi sem þora, þrátt fyrir mikla tregðu, að hreyfa við úreltum kerfum. Eðlilegar umbætur í takti við nútímann eru nauðsynlegar en þær koma ekki af sjálfu sér, hvað þá að kerfið sjálft hafi frumkvæði að þeim. Því þarf að breyta.

Þorgerður Katrín Gunnarsdóttir
Höfundur er sjávarútvegs- og landbúnaðarráðherra og þingmaður Viðreisnar.

Vonandi hafa allir notið sumarsins og bæjarhátíðarinnar í faðmi fjölskyldu og/eða vina og náð að hlaða sig orku og jákvæðni fyrir veturinn. Við í Heilsueflandi samfélagi ætlum að halda áfram uppteknum hætti og munu haustið og veturinn bera ýmislegt spennandi og skemmtilegt í skauti sér.

Göngum í skólann
Að velja virkan ferðamáta, s.s. göngu, hjólreiðar, hlaup, línuskauta og/eða hjólabretti er ein einfaldasta leiðin til að auka hreyfingu í daglegu lífi. Ávinningurinn er ekki eingöngu bundinn við andlega og líkamlega vellíðan heldur er þetta einnig hagkvæm og umhverfisvæn leið til að komast á milli staða. Markmið verkefnisins Göngum í skólann er einmitt að hvetja börn til að tileinka sér virkan ferðamáta í og úr skóla og auka færni þeirra til að ferðast á öruggan hátt í umferðinni. Verkefnið stendur yfir frá 6. september til 4. október nk.

Endurskinsvesti fyrir 1. og 2. bekk
Það er löngu sannað að hreyfing hefur góð áhrif á heilbrigði, líðan og lífsgæði. Heilsueflandi samfélag hvetur alla Mosfellinga til að velja sér virkan ferðamáta og til að stuðla sérstaklega að öryggi yngstu grunnskólanemenda Mosfellsbæjar hafa Heilsuvin og Mosfellsbær í samvinnu við TM fært öllum nemendum í 1. og 2. bekk endurskinsvesti til eignar í tengslum við verkefnið Göngum í skólann. Við biðjum foreldra að hvetja börnin sín til að ganga í skólann, finna með þeim öruggustu leiðina og hjálpa þeim að muna að nota vestið til að auka öryggi þeirra.

Lýðheilsugöngur Ferðafélags Íslands
Ferðafélags Íslands stendur fyrir lýðheilsugöngum í flestum sveitarfélögum á landinu nú í september sem eru einn af hápunktunum í 90 ára afmælisdagskrá félagsins. Göngurnar munu fara fram alla miðvikudaga í september kl. 18:00. Þetta eru fjölskylduvænar göngur sem taka u.þ.b. 60-90 mínútur og er tilgangur þeirra að hvetja fólk til útivistar og hreyfingar í góðum félagsskap og efla þar með heilsu sína og lífsgæði.
Allar upplýsingar um göngustaði vítt og breitt um landið má nálgast á heimasíðunni www.fi.is­/lydheilsa en hér í Mosfellsbæ verða göngur annars vegar úr Álafosskvos og hins vegar upp á Úlfarsfell (úr Skógræktinni v/Vesturlandsveg) alla miðvikudaga í september kl. 18:00. Komið endilega með okkur, bjóðið fjölskyldu og vinum með og njótum þess að hreyfa okkur saman í fallega bænum okkar. Þátttaka er ókeypis og allir hjartanlega velkomnir.
Það er sem sagt nóg um að vera og hvetjum við ykkur sem fyrr til að taka þátt. Hlúum að okkur sjálfum og því sem okkur þykir vænt um – verum til fyrirmyndar!

Ólöf Kristín Sívertsen, lýðheilsufræðingur og
verkefnisstjóri Heilsueflandi samfélags í Mosfellsbæ

Vilt þú taka þátt í skemmtilegu sjálfboðastarfi á vegum Rauða krossins?
Hér í Mosfellsbæ er starfrækt ein af 42 deildum Rauða krossins á Íslandi. Við sinnum mörgum verkefnum í nærsamfélaginu og hefur deildin virkan hóp sjálfboðaliða sem koma að ýmsu hjálparstarfi. Allir ættu að finna eitthvað sem vekur áhuga þar sem verkefnin eru bæði fjölbreytt og gefandi. Í starfi okkar er bæði að finna fasta liði sem og verkefni sem unnin eru eftir þörfum.

Heimanámsaðstoðin verður áfram á bókasafni Mosfellsbæjar á þriðjudögum milli klukkan 14 og 16 í vetur en þar gefst börnum í 1.-10. bekk tækifæri á að fá aðstoð með heimanám. Þar eru allir velkomnir og sér í lagi þeir sem eiga við námsörðugleika að stríða, hafa íslensku sem annað tungumál eða vilja félagsskap við heimalærdóminn.
Á miðvikudögum klukkan 13-16 hittast sjálfboðaliðar í verkefninu Föt sem framlag þar sem prjónuð eru, hekluð og saumuð föt fyrir hjálparstarf innan- og utanlands. Útbúnir eru fatapakkar fyrir 0-12 ára börn í Hvíta Rússlandi. Þar eru kaldir og langir vetur og mikil þörf fyrir hlýjan og góðan fatnað. Í Þverholti er heitt á könnunni og góður félagsskapur.
Viltu skipta, barnafataskiptimarkaður fyrir 12 ára og yngri, er opinn í Rauðakrosshúsinu á miðvikudögum milli 13-16. Markaðurinn er ávallt opinn meðan starfsemi er í húsinu. Þarna gefst foreldrum og forráðamönnum tækifæri á að koma með föt sem eru orðin of lítil og skipta þeim í stærri. Þetta er bæði fjárhagslega hagkvæmt og náttúruvænt.
Heimsóknavinir er félagslegt verkefni þar sem sjálfboðaliðar heimsækja fólk í nærsamfélaginu. Það er vinanna að ákveða hvað felst í heimsóknunum en það getur verið spjall, gönguferðir, ökuferðir, upplestur, handavinna og þannig mætti lengi telja. Helsta hlutverk heimsóknavina er þó fyrst og fremst að veita félagsskap, nærveru og hlýju.
Gönguvinir hittast fyrir utan Rauðakrosshúsið á mánudögum og fimmtudögum klukkan 16:15 og fara í létta gönguferð í góðum félagsskap.

Fjöldahjálparstöðvar eru opnaðar þegar á þarf að halda og sjá sjálfboðaliðar okkar um það ásamt liðsstyrk úr öðrum deildum. Þetta er mikilvægur þáttur í neyðaraðstoð þegar á þarf að halda. Þar er þolendum séð fyrir helstu grunnþörfum eins og mat, fatnaði og umfram allt húsaskjóli. Ýmis þjónusta kemur einnig inn í þessa neyðaraðstoð eins og skyndihjálp, sálrænn stuðningur, sálgæsla, ráðgjöf og upplýsingagjöf.
Rauði kross Íslands heldur fjölmörg námskeið fyrir sjálfboðaliða sína ár hvert og hefur verið boðið upp á ýmis námskeið og fyrirlestra hjá deildinni okkar í Mosfellsbæ, sem dæmi má þar nefna skyndihjálparnámskeið, Börn og umhverfi og sálrænn stuðningur.

Deildin hefur sinnt málefnum hælisleitenda sem staddir eru í Arnarholti og áður einnig í Víðinesi. Þar höfum við reynt að gera dvöl þeirra þægilegri með því að sinna félagslegum þörfum þeirra. Það hefur verið gert með því að bjóða upp á samveru við hin ýmsu tækifæri, halda enskunámskeið og útvega reiðhjól til afnota. Fram undan er svo áframhaldandi þróun á þessu verkefni og alltaf vantar sjálfboðaliða og nýjar hugmyndir.
Ef þú vilt slást í hópinn og láta gott af þér leiða, tökum við hjá Rauða krossinum í Mosfellsbæ vel á móti þér í Þverholti 7 en einnig er hægt að skrá sig á heimasíðu Rauða krossins: www.raudikrossinn.is. Nánari upplýsingar í síma 564 6035.

Ásgerður Inga Stefánsdóttir sjálfboðaliði
Rauða krossins og kennari í Varmárskóla

Bjartar sumarnætur eru dásamlegar og um að gera að njóta þeirra til fullnustu enda forréttindi að fá að upplifa slíkt.
Margir tengja þennan tíma, þegar sólin er hvað hæst á lofti, við langþráð sumarfrí þar sem við fáum tækifæri til að einbeita okkur að því að njóta og gera það sem okkur finnst skemmtilegast.

Samvera og vellíðan
Lífsmynstur margra breytist á þessum árstíma og flest okkar fá tækifæri til að njóta enn meiri tíma með fjölskyldum okkar og vinum. Njótum þess að vera saman, heimsækja fólkið okkar, tala saman, velta upp hugmyndum, skiptast á skoðunum, gefa af okkur, prófa eitthvað nýtt, spila, leika okkur og hlæja dátt. Gerum alla þessa litlu sjálfsögðu hluti sem eru í raun félagslegur fjársjóður hverrar manneskju.

Njótum náttúrunnar á hreyfingu
Sumarið er ekki hvað síst tíminn til að njóta hinnar dásamlegu fegurðar náttúrunnar og þar hefur heilsubærinn Mosfellsbær svo sannarlega upp á margt að bjóða. Nýtum okkar dásamlegu sundlaugar og hvernig væri síðan að gera gönguáætlun með fjölskyldunni?
Við fjölskyldan erum t.d. búin að ganga á Úlfarsfellið og Mosfell oftar en einu sinni í ár og stefnum á fleiri. Svo eru einnig spennandi göngu- og hjólaleiðir á láglendinu, t.d. meðfram ströndinni, í kringum Álafosskvos, í Reykjalundar­skógi, meðfram Varmánni og svo mætti lengi telja.
Þess utan er líka gaman að nýta þá frábæru aðstöðu sem er t.d. í boði á Stekkjarflöt, í Hamrahlíðarskóginum og Ævintýragarðinum til að bregða á leik og endurvekja barnið í sjálfum sér. Þarna er hægt að ná skemmtilegu markmiði í hverri ferð þar sem náttúran og félagsskapurinn spila að sjálfsögðu stærsta hlutverkið. Hugmyndirnar og möguleikar á útfærslum eru endalausir, hvern langar t.d. ekki í útivistarbingó?

Fjölbreyttur matur – vöndum valið
Munum eftir grænmetinu og ávöxtunum, leggjum upp með hollt nesti, verum dugleg að grilla fisk og gerum í raun hvaðeina sem okkur langar til. Það er enginn alheilagur í þessum efnum en verum samt meðvituð um að gæða hráefni skiptir sköpum og er „gott fyrir kroppinn“ eins og ég segi gjarnan við drengina mína.

Við sem stýrum Heilsueflandi samfélagi þökkum ykkur öllum fyrir frábæra samvinnu í vetur enda er samvinna og jákvætt viðhorf lykill að árangri þegar kemur að uppbyggingu heilsueflandi og -hvetjandi umhverfis hér í Mosfellsbæ.
Við vonum að þið eigið dásamlegt sumar og hlökkum svo sannarlega til að halda vegferðinni áfram í haust í samvinnu við ykkur frábæru Mosfellingar. Njótum sumarsins saman!

Ólöf Kristín Sívertsen, lýðheilsufræðingur og
verkefnisstjóri Heilsueflandi samfélags í Mosfellsbæ

Hvað er Borgarlína?
Borgarlína er hágæða almenningssamgöngur sem keyra á sérakgreinum og eru þannig ekki háðar annarri umferð.
Borgarlínan er leið sveitarfélaganna á höfuðborgarsvæðinu til að taka á móti þeim 70.000 íbúum sem áætlað er að bætist við til ársins 2040 án þess að umferð aukist í sama hlutfalli.
Þrátt fyrir eflingu almenningssamgangna með Borgarlínu er enn gert ráð fyrir því að einkabíllinn verði helsta samgöngutæki svæðisins. En með slíkri uppbyggingu aukast möguleikar heimila til að nota einkabílinn minna og kannski myndu mörg heimili frekar kjósa að eiga einn bíl í stað tveggja til fjögurra sem er staðan á mörgum heimilum í Mosfellsbæ í dag.

Af hverju Borgarlínu?
Vegna þess að það er mikilvægt að tryggja að ferðatími okkar aukist ekki til allra muna með fjölgun íbúa á höfuðborgarsvæðinu. Umferðarspár benda til þess að ómögulegt verði að uppfylla ferðaþarfir fólks til framtíðar eingöngu með uppbyggingu hefðbundinna umferðarmannvirkja.
Það sýna rannsóknir og reynslan bæði hérlendis og erlendis. Kostnaðar- og ábatagreining sýnir fram á það með óyggjandi hætti að það er þjóðhagslega hagkvæmt að setja fjármuni í Borgarlínu. Það dregur úr fjárfestingarþörf hins opinbera í öðrum dýrum samgöngumannvirkjum, það er umhverfisvænt, það minnkar samgöngukostnað heimilanna og bætir lýðheilsu almennings.

Fær Mosfellsbær Borgarlínu?
Svarið við því er JÁ, í svæðisskipulagi höfuðborgarsvæðisins er gert ráð fyrir að allir miðbæjarkjarnar á svæðinu tengist Borgarlínunni. Nú er í forkynningarferli skipulag sem tekur frá rými fyrir Borgarlínu, en samkvæmt þeirri tillögu mun Borgarlína keyra í gegnum væntanlega byggð í Blikastaðalandi, fara Baugshlíðina fram hjá Lágafellsskóla, Bogatanga og svo Þverholtið inn að miðbænum okkar.
Það er mikilvægt fyrir sveitarfélagið okkar að vera tengt þessari miklu samgöngubót sem Borgarlínan verður. Það er þó ástæða til þess að taka það fram að Borgarlínan mun aldrei þjónusta öll hverfi sveitarfélagsins vegna þess að þéttleiki í kringum slíkar stöðvar þarf að vera meiri en gengur og gerist í Mosfellsbæ, þar sem þéttleiki byggðar er almennt­ lítill. Þannig er gert ráð fyrir að þéttleiki á Blikastaðalandi verði meiri en við þekkjum í núverandi hverfum, svo og er gert ráð fyrir meiri þéttleika í miðbænum okkar.

Hvenær og hvernig verður þjónustunni háttað þangað til?
Borgarlínan mun ekki leysa af hólmi hinn almenna Strætó sem mun þjóna öðrum hverfum og tengja þau þannig við Borgarlínu. Ekki er hægt að fullyrða um það hvenær Borgarlínan rís í Mosfellsbæ en það mun verða í tengslum við uppbyggingu Blikastaðlands, líklega á næstu 10-20 árum. Þangað til mun hinn hefðbundni Strætó þjóna íbúum.
Bæjaryfirvöld leggja áherslu á að bæta þjónustu Strætó eins og kostur er. Þannig er brýnt að Strætó keyri í Helgafellshverfi enda byggist það hratt upp með fjölda íbúða. Eins er uppbygging í Leirvogstungu mikil og þar er í skoðun hvernig hægt er að bæta núverandi þjónustu með umhverfislegum og hagkvæmum hætti. Einnig er mikilvægt að kanna hvort ekki sé hægt að auka tíðni ferða, sérstaklega yfir sumartímann.

Bryndís Haraldsdóttir
Þingmaður og bæjarfulltrúi

Nú fer að líða að sumarfríi hjá deildinni okkar í Mosfellsbæ. Sjálfboðaliðar okkar fóru í árlega vorferð daginn fyrir Uppstigningardag, en sú ferð hefur undanfarin ár verið farin stuttu fyrir sumarlokun deildarinnar.
Að þessu sinni var farið umhverfis Snæfellsnesið og Borgarfjarðardeild Rauða krossins einnig heimsótt á heimleiðinni. Ferðin vakti mikla lukku að vanda. Nú fara helstu verkefni okkar í dvala þar til líður að hausti, en skrifstofa deildarinnar verður lokuð frá 19. júní til 14. ágúst nk. Þótt skrifstofa deildarinnar verði lokuð á þessu tímabili og helstu verkefni í dvala, þá er alltaf hægt að ná í okkur í síma deildarinnar ef mikið liggur við. Hælisleitendum og heimsóknarvinum verður sinnt, auk þess sem Gönguvinirnir verða á ferðinni í mestallt sumar.
Á uppstigningardag fór stjórn deildarinnar í vinnuferð til Hveragerðis í stefnumótun og samveru. Þar gafst okkur tækifæri til að yfirfara verkefnin okkar, ræða ný og hvernig við getum gert enn betur á næsta starfsári. Mosfellsbæjardeildin hét áður Kjósarsýsludeild en Kjalarnes og Kjós tilheyrir enn okkar starfssvæði. Margir hælisleitendur eru á okkar svæði í Arnarholti og Víðinesi, þar sem menn hafa lítið við að vera og samgönguleiðir þeirra afar torveldar. Reynt hefur verið að létta þeim samgönguleysið með því að útvega þeim reiðhjól m.a. í samvinnu við Barnaheill, sem hafa í nokkur ár safnað reiðhjólum fyrir börn og ungmenni. Síðastliðnar vikur hefur verið enskunámskeið fyrir þá í húsnæði okkar að Þverholti 7.
Námskeiðið var mjög vel heppnað að sögn sjálfboðaliða og nemenda. Þetta eru allt karlmenn á ýmsum aldri og af mjög mismunandi þjóðerni. Við viljum sérstaklega hvetja karlmenn til þess að kynna sér starf með hælisleitendum.
Okkur þykir gríðarlega mikilvægt að mæta þörfum þeirra sem nýta sér þjónustu okkar og um leið sýna framtíðar sjálfboðaliðum hve gefandi og áhrifaríkt það getur verið að gefa brot af tíma sínum. Það má alltaf hafa samband við okkur í gegnum Fésbókarsíðu deildarinnar eða með því að senda tölvupóst á starfsmann okkar hulda@redcross.is fyrir nánari upplýsingar. Verkefnin eru fjölbreytt en við munum kynna þau betur í haust fyrir forvitna og opna huga.
Fyrir tæplega tveimur árum tók ég þá ákvörðun að gerast heimsóknarvinur en það sem kom mér mest á óvart við það var hve verðmæt ein klukkustund á viku varð. Sjötíu ára aldursmunur okkar varð að engu þegar við sátum saman að skoða gamlar ljósmyndir og drekka kaffi.
Í vor kvaddi sú kæra vinkona en eftir sitja fallegar minningar og þakklæti fyrir kynni okkar. Verkefni geta verið svo miklu meira en bara verkefni. Að lokum er tilvalið að rifja upp sígild orð sem eru eitthvað á þá leið að enginn getur allt, en allir geta eitthvað.
Fyrir hönd stjórnar RKÍMOS þakka ég fyrir velvild í okkar garð og vel unnin störf ómetanlegra sjálfboðaliða. Sjáumst í túninu heima!

Signý Björg Laxdal, varaformaður
Rauða Krossins í Mosfellsbæ.

Nú á vordögum og í byrjun sumars er og verður heilmikið um að vera í heilsubænum okkar til að koma blóðinu á hreyfingu, gleðjast með okkar nánustu og auðga andann.

Hreyfivika UMFÍ – Move Week
Hreyfivikan verður nú haldin dagana 28. maí – 4. júní nk. Þessi vika er hluti af stóru lýðheilsuverkefni sem fram fer um gjörvalla Evrópu á sama tíma. Markmiðið er að fá hundrað milljónir fleiri Evrópubúa til að hreyfa sig reglulega fyrir árið 2020.
Að venju verður heilmikið um að vera í Mosfellsbæ og má finna dagskrá sem uppfærist jafnóðum á heimasíðu verkefnisins www.iceland.moveweek.eu auk þess sem upplýsingar verða birtar fésbókarsíðum Mosfellsbæjar og Heilsueflandi samfélags í Mosfellsbæ. Hver er þín uppáhalds hreyfing?

Heilsudagurinn í Mosfellsbæ 2017
Dagurinn verður haldinn hátíðlegur fimmtudaginn 1. júní nk. og byrjum við daginn að vanda á hressandi morgungöngu með Ferðafélagi Íslands á bæjarfellið Mosfell. Um kvöldið verður, líkt og síðustu ár, blásið til myndarlegs málþings í Framhaldsskólanum þar sem mikilvægi samvinnunnar svífur yfir vötnum.
Þorgrímur Þráinsson, rithöfundur og starfsmaður karlalandsliðsins í knattspyrnu, mun skyggnast á bak við tjöldin á EM og útskýra hversu miklu máli hver einstaklingur skiptir í sterkri liðsheild, við heyrum einnig frá fulltrúum skólanna okkar og fleira skemmtilegt verður á boðstólnum. Eins og alltaf er aðgangur ókeypis, boðið verður upp á léttar veitingar og allir hjartanlega velkomnir.

Örgöngur FÍ í Mosfellsdal
Ferðafélag Íslands býður nú í maí upp á þrjár örgöngur í Mosfellsdal með Bjarka okkar Bjarnasyni. Göngurnar hófust sl. þriðjudag skv. ferðáætlun FÍ en jafnframt verður gengið þriðjudagana 23. maí og 30. maí kl. 19:00. Nánari upplýsingar má finna á heimasíðu FÍ www.fi.is og á Fésbókarsíðu Heilsueflandi samfélags í Mosfellsbæ. Göngurnar eru ókeypis og allir hjartanlega velkomnir.

Hjólað í vinnuna
Nú er lýðheilsuverkefnið Hjólað í vinnuna á lokametrunum en það stendur stendur til 23. maí nk. Helsta markmið verkefnisins er að vekja athygli á virkum ferðamáta sem heilsusamlegum, umhverfisvænum og hagkvæmum samgöngumáta.
Þátttakendur eru hvattir til þess að ganga, hjóla, hlaupa eða nýta almenningssamgöngur til og frá vinnu. Virkur ferðamáti er frábær kostur til þess að koma hreyfingu inn í daglega rútínu og hvetjum við ykkur eindregið til að prófa.

Fyrirmyndardagurinn
Að lokum verður að minnast á Fyrirmyndardaginn sem Mosfellsbær stóð fyrir um liðna helgi. Þar kom saman vaskt og hugmyndaríkt fólk sem stóð m.a. fyrir fyrsta Íslandsmeistaramótinu í YFIR, ratleik í Reykjalundarskóginum, grilli á miðbæjartorginu, hjólagleði á hjólabrautinni okkar, tónleikum ungs og efnilegs listafólks o.fl. Í gærkvöldi tóku síðan nemendur í FMOS og vinaliðar í grunnskólunum höndum saman og fóru í útileiki í hverfum bæjarins. Sannkallað fyrirmyndarverkefni!

Við hvetjum ykkur eindregið til að taka þátt í öllu því sem boðið er upp á og virkja fólkið í kringum ykkur til að gera slíkt hið sama – því maður er manns gaman – og félagslegi þátturinn er svo sannarlega líka mikilvægur í vegferð okkar til hamingju og heilbrigðis.

Ólöf Kristín Sívertsen, lýðheilsufræðingur og
verkefnisstjóri Heilsueflandi samfélags í Mosfellsbæ