Haustdagskráin í Hlégarði er farin að taka á sig mynd en nokkrir listamenn hafa boðað komu sína í félagsheimilið til áramóta. Á laugardaginn mætir Kjósverjinn Bubbi Morthens og heldur tónleika. Hann er á örstuttri tónleikaferð í nágrenni höfuðborgarinnar. Á sunnudaginn verður hann á heimavelli í Félagsgarði í Kjós en báðir tónleikarnir hefjast kl. 20:30.
Föstudaginn 6. nóvember verður hljómsveitin Dúndurfréttir með tónleika í Hlégarði. Þeir tóku generalprufu í Hlégarði í sumar við frábærar undirtektir.
Laugardaginn 5. dessember mæta svo systkinin KK og Ellen og halda jólatónleika. Tónleikar þeirra eru orðnir fastur liður í jólahaldi fjölmargra Íslendinga. Í ár verða þau á faraldsfæti líkt og áður, syngja jólalög í bland við sín eigin og segja sögur af sér sínum sem laða fram gleði og eitt og eitt tár. Með þeim verður fimm manna úrvalssveit tónlistarmanna undir stjórn hljómborðsleikarans góða Jóns Ólafssonar. Nánari upplýsingar má finna á Facebook-síðu Hlégarðs.

Hafið er nýtt verkefni hjá Mosfellsbæjardeild Rauða krossins þar sem boðið er upp á námsaðstoð fyrir börn í 3.-6. bekk. Sjálfboðaliðar munu aðstoða börnin við heimanám og skólaverkefni. Andrúmsloftið verður létt og afslappað þar sem hver og einn fer á eigin hraða. „Ég hef áður tekið þátt í svona verkefni í Grafar­vogi sem gekk mjög vel,“ segir Signý Björg Laxdal sjálfboðaliði. „Mig langar að skapa svipað umhverfi hér í mínum heimabæ og um leiða vekja athygli á starfi Rauða krossins í Mosfellsbæ. Ég er búin að fá nokkra samnemendur mína í HÍ til að mæta vikulega. Við tökum vel á móti krökkum og foreldrum í Þverholti 7 á mánudögum kl. 15-17. Tilvalið fyrir börn með námsörðugleika eða hafa íslensku sem annað tungumál. Nú eða bara þá sem vilja klára lærdóminn snemma í vikunni,“ segir Signý.

Búsetukjarninn í Þverholti 19 hlýtur jafnréttisviðurkenningu Mosfellsbæjar 2015.

Jafnréttisdagur Mosfellsbæjar var haldinn hátíðlegur föstudaginn 18. september og var yfirskrift dagsins 100 ára afmæli kosninga­réttar kvenna. Dagskrá fór fram í hátíðarsal Framhaldsskólans í Mosfellsbæ. Hápunktur dagsins var þegar jafnréttisviðurkenning Mosfellsbæjar 2015 var veitt.
Viðurkenningin er veitt þeim einstaklingi, stofnun, félagasamtökum eða fyrirtæki sem hefur staðið sig best í að framfylgja jafnréttislögum og/eða Evrópusátt­málanum um jafna stöðu kvenna og karla í sveitar­félögum og héruðum og/eða jafnréttisstefnu Mosfellsbæjar.

Leita sérstaklega að hæfum körlum
Í ár hlýtur búsetukjarninn í Þverholti 19 jafnréttisviðurkenninguna fyrir að vinna markvisst að því að hafa jöfn kynjahlutföll í starfsmannahópnum.
Það er Hólmfríður Dögg Einarsdóttir sem veitir búsetukjarnanum forstöðu en hún hefur lagt sig sérstaklega fram við að auglýsa eftir og leita að hæfum karlmönnum til starfa. Nú er svo komið að jöfn kynjahlutföll hafa verið í starfsmannahópi búsetukjarnans í Þverholti síðastliðið eitt og hálft ár og því ber að fagna.
Með viðurkenningunni vill Fjölskyldunefnd Mosfellsbæjar hvetja forstöðumenn hjá Mosfellsbæ áfram til góðra verka í tengslum við jafnréttismál.

Þrándur Gíslason er kominn aftur heim eftir tveggja ára útlegð á Akureyri.

Hvernig er að vera kominn aftur í Mosó?
Það er alveg yndislegt, alveg hrikalega gott. Við fjölskyldan erum búin að koma okkur vel fyrir í Kardi­mommubænum í Þverholti, við hliðina á Einari Scheving. Ég er Kasper, Jesper og hann er Jónatan. Svo er Fiddi þarna líka, hann er bæjarfógetinn eða í raun löggan í blokkinni. Það er gott að fíla sig velkominn á ný.

Verður ekki barátta um línustöðuna í vetur?
Jú, það verður samblanda af baráttu og samstöðu. Það er bara jákvætt og allir í góðum fíling. Af því sem ég hef séð og kynnst Einari Andra þjálfara þá er hann mjög flinkur í að finna öllum hlutverk, þannig að ég hef engar áhyggjur.

Ertu hjátrúafullur?
Nei, voða lítið. Mig langaði alltaf að vera með eitthvað spes. En ég er alltaf að skipta um númer og nærbuxur.

Hvernig er stemningin í liðinu?
Stemningin er mjög góð. Við erum búnir að taka nokkra æfingaleiki og erum að koma ferskir úr æfingaferð að norðan.
Kjúklingarnir eru orðnir að kalkúnum, orðnir svaðaleg stykki og mikið hungur í þeim. Rosa gott fyrir allt yngriflokkastarfið að vera með unga og öfluga handboltamenn með hjartað á réttum stað.
Ég hef fulla trú á því að Mosó sé aftur að fara standa undir nafni sem handboltabær. Það er orðið tímabært. Það verður stuð og stemming á pöllunum. Nú mæta allir með hrossabresti og þokulúðra og gera allt vitlaust í íþróttahúsinu í vetur.

Síðasti vetur var skemmtilegur, hvernig verður þessi?
Hann verður góður, nú bætum við bara ennþá meira í. Ágætt að bæta aðeins í þessa reynslu sem vantaði upp á þarna á lokasprettinum í vor.

Hver er besti handboltamaður allra tíma?
Róbert Sighvatsson, hann er legend.

Sérstakt aukablað um meistaraflokk karla í handknattleik fylgdi með Mosfellingi 10. september.
Næsti heimaleikur fer fram að Varmá laugardaginn 19. september kl. 16:00. Afturelding – Akureyri.

Bæjarblaðið Mosfellingur er 13 ára í dag, 13. september. Blaðið kemur út á þriggja vikna fresti og er dreift frítt í öll hús í Mosfellsbæ, á Kjalarnesi og í Kjós. Mosfellingur er frítt, frjálst og óháð bæjarblað sem flytur jákvæðar og skemmtilegar fréttir af því helsta í Mosfellsbæ og næsta nágrenni.

Stofnandi blaðsins er Karl  Tómasson og stýrði hann blaðinu fyrstu þrjú árin. Áður hafði Karl unnið að blöðum eins og Mosfellsblaðinu og Sveitunga. Síðastliðin 10 ár hefur  Hilmar Gunnarsson ritstýrt Mosfellingi en hann tók við keflinu á haustdögum 2005.

„Blaðið vex og dafnar með hverju árinu,“ segir Hilmar Gunnarsson. „Skemmtilegast er að fá viðbrögð bæjarbúa sem virðast njóta þess að fá innansveitarfréttirnar beint í æð. Það heldur okkur gangandi sem að blaðinu starfa. Ég er með gott fólk með mér í liði sem á sinn þátt í velgengni blaðsins og ber þar að nefna hjónin Önnu Ólöfu og Ragga Óla sem eru alltaf boðin og búin, Ruth Örnólfs sem sér um drottningarviðtölin og svo er það Inga Vals sem er okkar villupúki.“
„Það er vel við hæfi að opna nýja heimasíðu á þessum fallega degi. Markmiðið er að setja á vefinn helstu fréttir og greinar úr blaðinu þannig að fólk geti deilt með umheiminum. Auðvitað verður pappírsútgáfan áfram númer eitt, tvö og þrjú og er nýjustu blöðunum hægt að fletta hér á síðunni. Með tilkomu Facebook og annarra samfélagsmiðla er æ eftirsóknarverðara að deila fréttum og skemmtilegu efni þannig að þetta er okkar liður í að verða við því.

Að lokum langar mig að þakka Sindra vini mínum fyrir að koma þessari heimasíðu í loftið og vonandi að þið njótið vel,“ segir Hilmar.

Næsti Mosfellingur kemur út fimmtudaginn 1. október og er skilafrestur efnis og auglýsinga til kl. 12 mánudaginn 28. september.
Netfang blaðsins er mosfellingur@mosfellingur.is

 

 

Ég hef ekki tíma. Hvað hefur þú oft notað þessa afsökun? Ég hef notað hana alltof oft. En ég er að bæta mig, forgangsraða tíma mínum betur. Til þess að gera hluti sem gefa manni orku, þarf maður að taka aðra hluti út í staðinn. Annars lendir maður í vítahring tímastjórnunar­brjálæðis, svefnleysis og stress. Þegar maður hættir að gera hluti sem draga úr manni kraft og stela frá manni orku, galopnast nýjar gáttir. Gáttir sem maður nýtir í að gera spennandi, skemmtilega og nærandi hluti. Ef þér líður vel í því sem þú ert að gera, lætur þú öðrum í kringum þig líða vel. Og öfugt. En hverju áttu að hætta? Því sem tekur frá þér orku. Sestu niður og gerðu lista. Hættu svo einum hlut í einum og njóttu þess að hafa meiri tíma og orku.

Hér eru nokkrir hlutir sem ég hef hætt að gera. Listinn er alls ekki tæmandi, ég á nóg eftir! Lesa DV.is, kaupa Moggann, fara á óspennandi fótboltaleiki, horfa á fréttir og flesta sjónvarpsþætti, borða of mikið í einu, hafa samviskubit yfir einhverju sem öðrum finnst að ég eigi að gera – en geri ekki, fá tölvupóst og FB skilaboð í símann og mæta á óþarfa fundi. Bara þessi fáu atriði gefa mér 12-14 glænýja klukkutíma á viku sem ég get notað í að gera hluti sem gefa mér orku. Vinnan er oftast nefnd sem orsök þreytu og tímaleysis. Ef þú ert í vinnu sem tekur alla þína orku, hættu. Finndu þér nýja vinnu eða skapaðu þér þína eigin tekjustrauma. Ekki vera þræll. Ég hef hætt í nokkrum vinnum sem tóku meira frá mér en þær gáfu mér. Það krefst trúar á sjálfan sig að taka stökkið, en tilfinningin að taka ábyrgð á eigin tíma, vellíðan og þar með heilsu er yndisleg.
Áfram veginn!

Heilsumolar Gaua
Mosfellingur 10. september 2015

Örn Þórisson Kjærnested opnaði nýverið Bifreiðaverkstæði Össa að Völuteig 27, þar sem hann býður upp á allar almennar bílaviðgerðir.
„Ég opnaði verkstæðið í sumar, þetta fer vel af stað hjá mér og verkefnin og kúnnahópurinn fjölbreyttur og skemmtilegur,“ segir Össi.
„Þegar kom að því að fara í framhaldsskóla þá varð Borgarholtsskóli fyrir valinu. Ég skráði mig í bifvélavélavirkjun og hef verið með algjöra bíladellu síðan. Þegar ég úrskrifaðist úr Borgó fór ég í framhaldinu í Tækniskólann þar sem ég tók meistarann og útskrifaðist þaðan árið 2010.“
„Ég er búinn að vinna við fagið síðan ég kláraði námið en langaði svo að gera eitthvað nýtt og opna mitt eigið verkstæði. Það er náttúrlega langbest að vera í Mosó og því kom ekkert annað til greina en að finna hentugt húsnæði hér,“ segir Össi og hlær.
Allar frekari upplýsingar um verkstæðið má finna Facebook eða í síma 537-0230.