Stór meirihluti íbúa vill ekki þétta byggð á Blikastöðum

Hagsmunasamtök íbúa í Mosfellsbæ voru formlega stofnuð þann 9. janúar en tilgangur félagsins er að vera vettvangur fyrir íbúa Mosfellsbæjar til að gæta hagsmuna íbúa gagnvart stjórnvöldum, stjórnmálamönnum og öðrum.
„Við viljum hvetja íbúa til að taka virkan þátt í umræðunni um öll þau mál er varða hagsmuni íbúa Mosfellsbæjar,“ segir Berglind Þrastardóttir formaður samtakanna en með henni í stjórn eru Einar Páll Kjærnested og Ingibjörg Sigríður Árnadóttir.
Stuttu eftir stofnun samtakanna var sett af stað íbúakönnun og stofnaður hópur á Facebook sem telur um 900 meðlimi.
„Könnuninni var dreift með póstum á Facebook og þar komu hverfasíður bæjarins sér vel. Þátttaka fór fram úr björtustu vonum en tæplega 1.000 manns tóku þátt í könnuninni og ljóst er, út frá niðurstöðum hennar, að lítill samhljómur er á milli vilja bæjarbúa og bæjarfulltrúa um hvernig fólk vill sjá þróun byggðar í Mosfellsbæ.“

Brugðið eftir fund skipulagsnefndar
Hugmyndin að stofnun Hagsmunasamtaka íbúa í Mosfellsbæ varð til í framhaldi af því að íbúar í Bröttuhlíð og Hamratanga voru boðaðir á samráðsfund skipulagsnefndar Mosfellsbæjar í byrjun desember.
„Tilefnið var að kynna fyrir íbúum tillögu um að breyta þessari 47 íbúða götu, sem eingöngu er byggð einbýlishúsum og fjórbýlishúsum yfir í 157 íbúða borgarbyggð, þar sem m.a. yrðu byggðar sjö, þriggja og fjögurra hæða blokkir upp við Vesturlandsveginn í Bröttuhlíð.
Það er óhætt að segja að íbúum hafi brugðið enda tillagan í engu samræmi við gildandi aðalskipulag og ef af yrði myndi hún gjörbreyta ásýnd og byggð í götunni. Eftir fundinn hringdu nokkrir aðilar sig saman og voru allir sammála um að eitthvað yrði að gera til að berjast gegn þessum áformum og úr varð sterkur og drífandi hópur fólks. Fljótlega kom upp sú hugmynd að það væri skynsamlegt að stofna hagsmunasamtök þar sem hægt væri að ræða mál bæjarins á ópólitískum og málefnalegum vettvangi því flest höfum við skoðun á því hvernig við viljum sjá bæinn okkar þróast.“

Þörf á meiri umræðu um framtíðarsýn
Hagsmunasamtökin, í samvinnu við Húseigendafélagið, fengu Pál Jakob Líndal, dr. í umhverfissálfræði, til að vinna skoðanakönnun á meðal bæjarbúa og spyrja íbúa hvernig þeir sjái fyrir sér húsnæði, búsetu og þróun byggðar í sveitarfélaginu.
„Auðvitað hefði sveitarfélagið átt að vera búið að gera slíka könnun áður en ráðist var í meiriháttar umbreytingu á þróun byggðar, en því miður þá var það ekki gert.
Vonandi gefa bæjarfulltrúar okkar í Mosfellsbæ sér tíma til að rýna niðurstöðurnar og hugsanlega sjá þeir að það sé þörf á miklu meiri umræðu um framtíðarsýn Mosfellsbæjar á milli bæjarbúa og bæjarfulltrúa.“

960 manns tóku þátt í könnuninni
Vefkönnun var gerð á tímabilinu 17.-31. janúar 2024 og eru frumniðurstöður kynntar hér. 960 manns tóku þátt í könnuninni og var dreifing svara góð eftir aldursflokkum, kynjum og hverfum. Að sögn Páls Jakobs hafa þátttakendurnir almennt áhuga á skipulagsmálum og ættu niðurstöðurnar að vera hvatning fyrir skipulagsyfirvöld að efla samtal og samráð við íbúa.
– Flestir voru sammála um að þétting byggðar ætti ekki að fara fram með þeim hætti að opin svæði í þeirra eigin hverfi myndu víkja fyrir íbúðabyggð.
– 48% þátttakenda nefna Reykja-, Tanga-, Holta- og Höfðahverfi sem hverfi sem lýsi Mosfellsbæ best.
– Niðurstöður sýna að yfirgnæfandi fjöldi þátttakenda er andvígur því að ný byggð í Blikastaðalandi verði tvöfalt þéttari en núverandi byggð í Helgafellshverfi.

Opna skyndibitastaðinn Dúos

Skyndibitastaðurinn Dúos hefur opnað við hlið Krónunnar í Háholtinu. Tvíburasystkinin Alexía Gerður og Sigdór Sölvi Valgeirsbörn reka staðinn sem opnaði þann 12. janúar.
Systkinin eru alin upp á Kjalarnesi en búa nú í Mosó ásamt fjölskyldum sínum. Þau hafa mikla reynslu af lokum og hraðri afgreiðslu af Hlöllabátum þar sem þau hafa unnið í rúman áratug.
„Það hefur alltaf verið draumurinn að opna okkar eigin stað en hugmyndin var samt komin út af borðinu fyrir þónokkru síðan. Við ætluðum að breyta algjörlega um starfsvettvang. Svo einhvern veginn kom þetta bara upp á einum degi, skyndiákvörðun má segja,“ segir Alexía.

Lokurnar skírðar eftir Mosfellingum
„Þetta fer eiginlega betur af stað en við þorðum að vona og móttökurnar verið frábærar, alveg geggjaðar. Margir sem koma aftur og aftur.“
Á boðstólum eru lokur, hamborgarar, djúpsteiktar pylsur og franskar.
En hvaðan kemur nafnið Dúos?
„Við systkinin erum bara svo gott dúó að það lá beinast við.“
Hvaðan koma nöfnin á lokunum?
„Okkur langaði að hafa smá bæjarstemningu hérna hjá okkur þannig að við fengum lánuð nokkur gælunöfn með góðfúslegu leyfi. Nöfnin á lokunum eru því tengd við nokkra þekkta Mosfellinga. Það eru ekkert endilega allir sem fatta það, en pælingin er skemmtileg.“
Og hver er vinsælasta lokan?
„Það er hörð samkeppni á milli Bulkdórs og Bingó Bjössa þessa dagana. Fleiri nöfn eins og Pulla Jr., Slæ, Jollinn, King og Queen B skjóta þarna líka upp kollinum.“

Hægt að fá sent heim með Wolt
„Stærðin á húsnæðinu hér er fullkomin og staðsetningin góð. Næg bílastæði og líf í húsnæðinu öllu. Hér er hægt að grípa með sér mat eða gleypa í sig á staðnum. Við opnum kl. 10:00 á morgnana og lokum kl. 20:30 á kvöldin. Í hádeginu erum við með hádegistilboð sem hljóðar upp á loku og gos á 1.850 kr.“
Dúos hefur hafið samstarf við Wolt um heimsendingar þannig að nú er hægt að fá matinn sendan beint heim að dyrum.
„Við sjáum hvernig þetta gengur hjá okkur, svo er aldrei að vita nema við förum í frekari útrás í framtíðinni, það kemur bara í ljós. Það er nóg að gera í bili,“ segir Sigdór.

Þolinmæði og þrautseigja

Febrúar er hressandi mánuður. Það er svalt, það er stormasamt, það er allra veðra von. En febrúar er líka stysti mánuður ársins, líka þegar það er hlaupár eins og í ár. Ég er að verða mikill febrúarmaður. Hef gaman af því að vakna á morgnana og kíkja út um gluggann til að taka púlsinn á veðrinu og færðinni.

Oft kemur febrúar á óvart en hann á það líka til að detta í samfleytt skeið af eins veðri. Hann virðist vera þannig stemmdur núna, alvöru frost í kortunum eins langt og spár ná. Það þýðir að við eigum eftir að fá marga fallega sólardaga og þá er upplagt að nýta til þess að skella sér í léttar fella- eða fjallgöngur.

Við hjónin fórum á Mosfellið í gær. Sólin skein á hvítan snjóinn allt í kringum okkur, útsýnið var magnað, þetta var eins og að standa inni í póstkorti. Það var vissulega kalt, en við vorum vel klædd og fundum lítið fyrir kuldanum. Þegar mér verður aðeins kalt þessa dagana verður mér strax hugsað til La sociedad de nieve (Snjósamfélagið), bíómyndar sem yngsti sonur okkar kynnti okkur fyrir. Frábær mynd frá 2023 um atburð sem gerðist árið 1972. Þolinmæði, þrautseigja og sterkur lífsvilji eru lykilatriði í myndinni og eftir að hafa horft á hana og sett sig í spor þeirra sem þar er sagt frá, er erfitt að detta í að kvarta yfir kulda og klaka klæddur í hlý föt í upphituðu húsi á Íslandi.

Febrúar 2024 er líka sérstakur fyrir mig persónulega. Ég er að breyta til í vinnu. Legg á hilluna nokkur verkefni sem ég hef verið að fást við í mörg ár og stíg núna í febrúar inn í nýtt hlutverk sem mér finnst alveg ótrúlega spennandi og áhugavert. Óska ykkur öllum gleðilegs febrúar, njótum hans í botn!

Heilsumolar Gaua
Mosfellingur 8. febrúar 2024

Framleiðir sitt eigið fæðubótarefni

Mosfellingurinn Daníel Ingi Garðarsson er ungur athafnamaður sem hóf framleiðslu á fæðubótarefnum á síðasta ári.
„Upphafið að þessu var að ég fór sjálfur í hormónamælingu og greinist með of lágt testósterón og vantaði góðan búster fyrir testó en fann engan hér á landi og ákvað að búa til minn eigin og svo þróaðist þetta út frá því,“ segir Daníel sem segir lágt testósterón og ófrjósemi hjá ungum karlmönnum vera vaxandi vandamál í vestrænum heimi.

Framleitt í Matís
Daníel er mikill grúskari og hefur mikinn áhuga á indverskri og kínverskri læknisfræði, grúskar mikið í rannsóknum og er í líftækninámi sem stendur.
„Öll línan mín er framleidd hér á landi í Matís og ég nota einungis hágæða hráefni í fæðubótarefnin mín sem ég flyt inn sjálfur. Ég er með 6 vörur og ætla mér að breikka línuna í framtíðinni. Svo hef ég mikinn áhuga á að skoða íslenskar jurtir og vinna með þær í framtíðinni.“

Framleiðir undir nafninu Ingling
„Sem barn las ég mikið Íslendingasögurnar og ein af mínum uppáhalds sögum er Ynglingasaga en allir Íslendingar geta örugglega rakið ættir sínar þangað.
Sagan fjallar um afkomendur guðsins Freys sem er guð frjósemi og fannst mér þetta smellpassa. Og lógóið mitt er Ynglingarúnin. Svo er það líka skemmtilegt að ég heiti Ingi að öðru nafni,“ segir Daníel og hlær.

Ætlar sér stóra hluti
„Virknin í jurtunum sem ég er með, eins og til dæmis Ashwagandha sem hefur notið mikilla vinsælda á síðastliðnum árum, er að koma á hormónajafnvægi, virkar vel á streitu og álag og fleira. Markmið mitt er að bæta heilsu og vellíðan allra Íslendinga.
Vörurnar er hægt að fá á heimasíðunni minni www.ingling.is, Mamma veit best og í Urðarapóteki,“ segir Daníel að lokum og hvetur allar Mosfellinga til að skoða síðuna sína og kynna sér fæðubótarefnin sem hann býður upp á.

Náttúran heillar mig alltaf

Ari Trausti Guðmundsson jarðvísindamaður og rithöfundur er landsmönnum vel kunnugur enda hefur hann starfað mikið að upplýsingamiðlun til almennings um náttúruna, margs konar vísindi og tækni, nýsköpun, jarðvísindi og umhverfismál. Hann hefur skrifað fjölda bóka um náttúru Íslands og gefið út ljóðabækur, skáldsögur og smásagnasöfn.
Árið 2016 var Ari Trausti kosinn á þing þar sem hann var m.a. formaður og fulltrúi ýmissa nefnda en hann lét af störfum árið 2021.

Ari Trausti fæddist í Reykjavík 3. desember 1948. Foreldrar hans eru Lydía Pálsdóttir Zeitner-Sternberg leirmunasmiður og Guðmundur Einarsson myndlistamaður og rithöfundur frá Miðdal.
Ari á fimm systkini, Guðmund f. 1932, Einar Steinólf f. 1932, Yngva Örn f. 1938, Auði Valdísi f. 1943, Egil Má f. 1952.

Náttúran var áhugaverð
„Ég er alinn upp í Reykjavík, efst á Skólavörðustíg og í sumarhúsinu Lynghól í Mosfellsbæ, gamla Miðdalslandinu en þar bjuggum við í rúma þrjá mánuði á hverju ári.
Æskuminningarnar eru margar og góðar, hverfið mitt í Reykjavík var fullt af búðum, vinnustöðum, krökkum og leiksvæðum og svo dvölin frá því snemma sumars og fram yfir réttir í Lynghól og á Miðdalsheiðinni, þar var náttúran áhugaverð, trjáræktin og dýralífið.“

Nútíminn hélt innreið sína
„Ég gekk í Miðbæjarskólann þar sem mér leið vel, eignaðist góða vini og man bara eftir vönduðum kennurum. Þaðan fór ég í landsprófsdeild í Iðnaðarmannahúsinu við Vonarstræti og svo í Menntaskólann í Reykjavík þar sem nám gekk þokkalega en kennararnir voru upp og ofan. Við strákarnir oftar í jakkafötum til að byrja með en gallabuxum og þurftum að þéra suma kennara þar til þeir urðu dús. Yngri kennarar höfðu fundið nútímann og hann hélt líka innreið sína meðal nemanda með bítla- og hippatímabilinu.
Á sumrin dvaldi ég í sumarbústaðnum í Lynghól, fékk að fara með pabba og eldri bræðrum á veiðar og í ferðalög með foreldrum víða um land og í utanlandsferðir til Noregs, Svíþjóðar, Þýskalands, Austurríkis og Ítalíu.
Eftir útskrift úr gagnfræðaskóla hóf ég störf hjá Belgjagerðinni og starfaði þar við frágang vara. Ég starfaði einnig hjá Mjólkursamsölunni við ýmis störf og hjá Flugmálastjórn við viðhald á Reykjavíkurflugvelli.“

Samvera við ýmis góð tilefni
Eiginkona Ara Trausta er María Gíslína Baldvinsdóttir sjúkraliði frá Siglufirði. Þau eiga þrjú börn, Huldu Sóllilju f. 1973, Hugin Þór f. 1976 og Helgu Sigríði f. 1985. Barnabörnin eru fimm.
„Þegar börnin voru yngri vorum við mikið í sumarbústaðnum okkar, fórum á skíði og svo ferðuðumst við út á land, gjarnan til Siglufjarðar. Smám saman lá leið okkar einnig til útlanda. Núna snýst samvera um alls konar tilefni til að hittast, gjarnan til að borða saman og svo höfum við gætt barnabarnanna af og til sem veitir okkur hjónunum mikla ánægju.“

Hlotið margar viðurkenningar
Það er óhætt að segja að Ari Trausti hafi komið víða við á sínum ferli. Hann stundaði nám í jarðeðlisfræði við Oslóarháskóla og tók síðar viðbótarnám í jarðvísindum frá Háskóla Íslands og útskrifast þaðan 1984.
Hann vann við rannsóknarstörf, blaðamennsku, kennslu og leiðsögn og ferðaþjónustu til ársins 1987. Eftir það varð hann sjálfstætt starfandi og sinnti ýmiss konar faglegri ráðgjöf, fyrirlestrum, ferðaþjónustu, fjölbreyttum ritstörfum og dagskrárgerð fyrir sjónvarp og útvarp.
Ari Trausti hefur skrifað fjölda bóka, gefið út smásagnasöfn, ljóðabækur og skáldsögur. Hann hefur einnig skrifað margar greinar í blöð og tímarit um umhverfismál, ýmis þjóðmál, stjórnmál, ferðaþjónustu og fjallamennsku. Hann hefur hlotið margar viðurkenningar fyrir störf sín m.a. Bókmenntaverðlaun Halldórs Laxness, Landgræðsluverðlaunin, verðlaun Rannís fyrir framlag til vísindamiðlunar og árið 2022 varð hann handhafi riddarakross Fálkaorðunnar fyrir störf á sviði vísinda og þekkingarmiðlunar.

Á ekki langt að sækja listhneigð sína
Ari Trausti hefur komið að hönnun ýmissa safna og sýninga, meðal annars Lava Centre á Hvolsvelli. Hann hefur framleitt heimildarmyndir og sjónvarpsþætti, tekið þátt í ljósmyndasýningum og haldið sýningar á eigin verkum, vatnslitamyndum og teikningum.
Ari Trausti á ekki langt að sækja listhneigð sína en faðir hans var þekktur og afkastamikill myndlistarmaður og rithöfundur, móðir hans leirmunasmiður og Guðmundur (Erró) bróðir hans er einn af þekktustu samtímalistamönnum Íslands og hefur einnig leikið veigamikil hlutverk í alþjóðlegri myndlist.

Leitaði uppi óklifin fjöll
„Ég hef stundað útivist, fjalla- og jöklaferðir í yfir fimm áratugi, bæði hér heima, í Ölpunum og í nokkrum háfjallalöndum, t.d í Asíu og Suður-Ameríku. Mörg eldgos hafa verið tilefni til útivistar og svo hef ég líka stundað ísklifur. Ég var svolítið í hálendisleiðsögn hér heima og var í litlum hópi sem leitaði uppi óklifin fjöll á Íslandinu góða til að klífa.
Ég fór líka út í það að leiðsegja íslenskum hópum erlendis, m.a. á norðurslóðum og í Ekvador, auk ferða til Suðurskautslandsins, Mongólíu og Nýja-Sjálands svo dæmi séu nefnd. Fjallganga, létt eða erfið, er eiginlega meira en holl áreynsla, líka einhvers konar jóga, ég er ekki einn um þá skoðun.“

Alltaf gaman að skoða nýjar slóðir
Mörg Evrópulönd hafa verið á dagskránni á löngum tíma og við Maja höldum upp á borgarferðir og höfum farið í fáeinar slíkar um Frakkland að undanförnu. Það er alltaf gaman að skoða sig um á nýjum slóðum og í alls konar samfélögum.“
Ég spyr Ara hvað standi upp úr frá öllum þessum ferðalögum um heiminn? „Margar minningar hafa safnast til manns, t.d að klífa ófarinn tind eins og Snæfell við Kálfafellsdal í kulda og trekki. Ganga um ósnortnar slóðir á Grænlandi með sauðnautum.
Standa á fyrsta tindinum yfir 6.000 metrana í Bólivíu og horfa á langan skugga hans styttast í takt við sólaruppkomuna. Þurfa að taka tilhlaup til að stökkva af hraunfleka yfir glóandi sprungu á fast land í Heklugosi og sitja með Maju á Café Carette í Mýrinni í París. Eftirminnilegt já, en það eftirminnilegasta er ef til vill ókomið í sjóðinn,“ segir Ari og brosir.

Fara í göngutúra um bæinn
Árið 2016 var Ari Trausti kosinn á þing fyrir Vinstri græna í Suðurkjördæmi. Meðal annarra starfa á Alþingi var hann fulltrúi VG í utanríkismálanefnd, formaður Þingvallanefndar, formaður þingmannanefndar um norðurslóðir og varaformaður umhverfis og samgöngunefndar en hann lét af störfum 2021.
Ég spyr Ara Trausta hvað hann sé að gera í dag? „Ég sinni ritstörfum, fyrirlestrum, nefndarstörfum, leiðsögn og fjölmiðlun en nýti frístundir til annars, t.d. gönguferða með Maju upp og niður hér í sveitinni og í bænum,“ segir Ari að lokum er við kveðjumst.

Fyrsti Mosfellingur ársins kom í heiminn á nýársdag

Piotr og Karina með nýársdrenginn.

Fyrsti Mosfellingur ársins 2024 er drengur sem fæddist á Landspítalanum þann 1. janúar klukkan 22:49, hann var 3.855 gr. og 50 cm.
Drengurinn er fyrsta barn foreldra sinna sem eru þau Karina Cieslar og Piotr Cieslar sem koma frá Póllandi en hafa búið í Mosfellsbæ í tvö ár.

Fæðingin gekk vel
„Við vorum í gamlárspartýi til kl. 2 um nóttina og vöknuðum svo við að vatnið fór hjá mér kl. 6.
Fæðingin gekk mjög vel, það var vel tekið á móti okkur á Landspítalanum og mér finnst fæðingarþjónustan hér alveg dásamleg,“ segir hin nýbakaða móðir.

Elska kyrrðina og náttúruna
„Okkur líkar rosalega vel að búa hér í Mosfellsbæ, við elskum kyrrðina og náttúruna hér í kring. Við komum frá suður Póllandi og landslagið minnir okkur á heimaslóðir. Við stefnum á að flytja aftur til Póllands eftir ár til að vera nærri fjölskyldu og vinum,“ segir Piotr.
Mosfellingur óskar fjölskyldunni til hamingju með drenginn.

Dóri DNA Mosfellingur ársins 2023

Mosfellingur ársins 2023 er skemmtikrafturinn og höfundurinn Halldór Laxness Halldórsson, betur þekktur sem Dóri DNA.
Dóri er annar tveggja höfunda sjónvarpsþáttaraðarinnar Afturelding sem sýnd var á RÚV á síðasta ári og fékk frábærar viðtökur. Serían hefur verið sýnd víðsvegar á Norðurlöndunum og var m.a. valin besta norræna sjónvarpssería ársins í Svíþjóð.
„Ég er djúpt snortinn, þetta eru fyrstu verðlaunin sem ég vinn á ævi minni og að þau komi úr þessari átt er þeim mun sætara,“ segir Dóri en samningar um aðra þáttaröð af Aftureldingarþáttunum hafa þegar verið undirritaðir.

Höldum áfram að hugsa stórt
„Í mínum huga er þetta einhvers konar fullnægja á öllu þessu Aftureldingarverkefni og gott veganesti í næstu seríu. Við erum að skila fyrstu drögum að seríu tvö í lok mánaðarins, við förum enn dýpra í bæjarlífið, hleypum smá pólitík inn í þetta og skemmtilegum karakterum. Við erum enn að velta upp hugmyndum en finnum að það eru allir spenntir fyrir þessu.
Ég tel að þessir þættir hafi hreyft við bænum, það er einhver lenska að líta á okkur Mosfellinga sem sveitó en ef við horfum á listafólkið sem kemur héðan og hefur gert á undanförum áratugum þá erum við núna með Kaleo, Ólaf Arnalds og Sigur Rós á heimssviðinu.
Það er þetta afslappaða viðmót sem við Mosfellingar höfum gagnvart listum sem er lykillinn að þessari velgengni listafólks héðan, við þurfum bara að halda áfram að hugsa stórt.“

Stórt ár á sviði lista
Árið hefur verið stórt hjá Dóra því auk Aftureldingarþáttanna er hann einn aðalhöfundur kvikmyndarinnar Northern Comfort sem frumsýnd var í september en sýningarréttur hefur verið seldur til fjölmargra landa. Uppistandssýningin Dóri DNA, Engar takmarkanir, var sýnd um allt land og m.a. fyrir fullu húsi í Hlégarði.
„Í ár komst ég aftur á kreatíva sporið, við Haddi meðhöfundur minn í Afureldingu erum að skrifa saman tvær aðrar sjónvarpsseríur. Gerðum kvikmyndina Northern Comfort sem var stórt verkefni, Netflix, erlendir leikarar og allt á ensku. Við erum í sambandi við erlenda aðila sem vilja vinna með okkur en við vinnum rosalega vel saman og samstarfið algjör snilld.“

Munum hertaka bæjarfélagið aftur
„Þegar við skrifuðum fyrstu Aftureldingarseríuna þá rýndum við vel í bæjarlífið, það er svo gott að spegla samfélagið í Mosfellsbæ því hér er allt. Tökuferlið var algjört ævintýri og samstarfið við alla sem komu að þáttagerðinni var frábært. Það voru margir starfsmenn Mosfellbæjar og Aftureldingar sem fóru langt fram úr sínum hlutverkum og gerðu svo miklu meira fyrir okkur en þeim bar og fyrir það erum við rosalega þakklát.
Það er einn Mosfellingur sem verður að fá risa hrós en það er Ásgeir Jónsson sem sá um að þjálfa stelpurnar í handbolta og koma með handboltasýnina inn handritið.
Við skilum handriti í vor og ef allt gengur að óskum þá hertökum við bæjarfélagið aftur næsta vor. Það eru margar hugmyndir í gangi. Mögulega verður einn leikmaður liðsins farinn að leita út í atvinnumennsku og okkur langar að sýna hvernig atriði eins og lóðarifrildi í bæjarstjórn getur haft áhrif eða afleiðingar í handboltanum hjá 3. flokki.

Alltaf sendiherra Mosfellsbæjar
„Ég er svolítið gjarn á að hugsa sjálfan mig í baksætinu, en árið 2025 verð ég fertugur og þá ætla ég að gefa út bók sem fjallar að miklu leyti um líkamsvitund og það að vera feitur en er samt skemmtisaga. Þá ætla ég líka að stefna á að vera með uppistand í 1.000 manna sal og halda upp á ferilinn.
Það er mér gríðalegur heiður að hljóta þennan titil, er alltaf sendiherra Mosfellsbæjar hvar sem ég er í heiminum. Mosfellsbær hefur breyst mikið frá því ég ólst hér upp en í allri minni sköpun leita ég í upprunann, yfirleitt er ég að lýsa Mosfellsbæ æsku minnar.
Ég veit að þetta hljómar kannski lúðalega en Mosfellsbær gaf mér rödd, gaf mér afstöðu til að sjá hlutina í ákveðnu ljósi og þetta er það eina sem ég á sem listamaður,“ segir Dóri að lokum.

Sundlauginni á Skálatúni lokað vegna slæms ástands

Ákveðið hefur verið að loka sundlauginni á Skálatúni til frambúðar vegna slæms ástands hennar.
Meðal þeirra sem mikið hafa notað laugina er sundkennarinn Snorri Magnússon sem kennt hefur ungbarnasund. Snorri greinir frá því á Facebook að hann sitji uppi með nemendur sem biðu þess að hefja námskeið eftir jólafrí og fullan biðlista.

Þungbær ákvörðun
Nýr eigandi fasteigna á landi Skálatúns tók á dögunum þá þungbæru ákvörðun að starfsemi gæti ekki haldið áfram í sundlauginni á grundvelli öryggissjónarmiða, ekki síst með hliðsjón af því um hvers konar rekstur er að ræða.
Þetta kemur fram hjá Sóleyju Ragnarsdóttur framkvæmdastjóra sjálfseignarstofnunar Skálatúns.
„Milli jóla og nýárs á nýliðnu ári tók nýr eigandi formlega við eignarhaldi fasteigna í landi Skálatúns. Innan þess eignasafns er sundlaug, þar sem kennt hefur verið ungbarnasund til fjölda ára við góðan orðstír. Ætlun nýrra eigenda var alla tíð að sá rekstur myndi halda áfram, enda merk saga ungbarnasunds í lauginni sem mikill vilji var til þess að héldi þar áfram.“

Ástand burðarvirkis ótraust
„Síðla árs bárust upplýsingar um að ástand húsnæðisins sem laugin er í væri ekki eins og best yrði á kosið og var ákveðið að fá fagmenn til þess að skoða húsnæðið og meta ástand þess.
Út úr þeirri skoðun kom sú niðurstaða að ástand húsnæðisins er afar slæmt. Það sem vegur þyngst er að burðarbitar sem halda uppi þaki og veggjum laugarinnar eru mjög fúnir og illa farnir.
Ástand burðarvirkis er þannig ótraust og metið óöruggt.“

Núið

Ég er að vinna í núinu. Það er ekki einfalt. Kollurinn fer svo auðveldlega á flakk. Ég fer að hugsa um það sem ég ætla að gera, það sem er fram undan, það sem væri gott að myndi gerast og það sem væri minna gott að myndi gerast. En þegar ég næ að róa hugann og njóta þess sem ég er að gera án þess að velta á sama tíma fortíð eða framtíð fyrir mér þá færist yfir mig ró og friður, athyglin verður dýpri og ég skynja hluti betur.

Samhliða því að vinna í núinu er ég að vinna í breytingum. Ár 2024 er fyrir mér ár breytinga. Þessar breytingar krefjast þolinmæði, úthalds, seiglu og jákvæðs viðhorfs. Það er hollt að setja sjálfan sig í þannig aðstæður reglulega, að geta tekist á við þær áskoranir sem breytingar hafa í för með sér.

Ein leið til að tengja núið og breytingar saman er flæði. Að taka ákvarðanir, gera eitthvað en leyfa svo hlutunum að gerast í stað þess að vera of ákaftur í að ýta þeim áfram með afli. Anda inn um nefið og út um það líka. Það er heldur ekki einfalt fyrir mig, ég er ekki mjög þolinmóður að upplagi. Svo það er hollt fyrir mig að vinna í því líka, flæðinu. Flæði eins og ég túlka það, snýst um að koma hreyfingu á hluti, gára vatnið, en svo leyfa vatninu að renna þangað sem það á að renna og á þann hátt sem það á að renna.

Janúar er góður mánuður, einn af mínum uppáhalds. Lífið verður eðlilegt aftur eftir viðburðaríkan desember og það er upphafs- og bjartsýnisorka í loftinu. Evrópumót í handbolta spillir ekki fyrir – ég spái því að Steini okkar Mosfellinga verði kallaður inn í liðið um mitt mót og verði í kjölfarið ein af stjörnum mótsins.

Heilsumolar Gaua
Mosfellingur 11. janúar 2024

Bjarki ritar Árbók FÍ

Bjarki Bjarnason og Ólöf Sívertsen.

Bjarki Bjarnason rithöfundur á Hvirfli í Mosfelldal og Ferðafélag Íslands hafa undirritað samning um ritun árbókar félagsins 2026.
Bókin mun fjalla um Kjósarsýslu sem náði um aldir frá Elliðaánum inn í Hvalfjarðarbotn og upp á miðja Mosfellsheiði; innan sýslunnar voru þrír hreppar: Mosfellshreppur, Kjalarneshreppur og Kjósarhreppur.
Bjarki segir það mikið tilhlökkunarefni að takast á við þetta áhugaverða verkefni. „Í bókinni verður fjallað um Kjósarsýslu frá öllum sjónarhornum,“ segir hann, „um jarðfræði, náttúrufar, dýralíf, sögu og mannlíf í aldanna rás. Áður fyrr mynduðu íbúar í þessum hreppum félagsleg tengsl með ýmsum hætti, prestarnir á Mosfelli og Reynivöllum þjónuðu í kirkjunum á Kjalarnesi, bændur bundust samtökum og sýslungar tókust á í íþróttum, meðal annars í Sýsluglímu Kjósarsýslu. Karlakór Kjósarsýslu var til í eina tíð og unglingar af Kjalarnesi og úr Kjós sóttu skóla í Mosfellssveit og voru þá í heimavist. Og svo gnæfir Esjan yfir og allt um kring,“ bætir Bjarki við.
Árbók Ferðafélags Íslands er elsta ritröðin sem gefin er út á Íslandi, hún hefur komið út samfleytt frá árinu 1928, nú á dögum er bókin prentuð í 15 þúsund eintökum og dreift til félagsmanna.
Á ljósmyndinni eru Bjarki og Ólöf Kristín Sívertsen, forseti Ferðafélags Íslands, myndin var tekin í jólaskóginum í Hamrahlíð síðastliðinn sunnudag í tilefni af ákvörðun um þessi árbókarskrif.

asd f

Veitingafélagið styrkir Reykjadal

asd f

Síðastliðið sumar var góðgerðarhelgi hjá Veitingafélaginu, sem er í eigu hjónanna Óla Vals og Ragnheiðar, þá í tilefni hálfrar aldar afmælis Óla Vals.
Ákveðið var að ánafna 50% af sölu á veitingastöðum félagsins til valdra góðgerðarfélaga. Auk Bankans bistro í Mosfellsbæ á félagið og rekur veitingastaðina Mandi og Hlöllabáta.
Reykjadalur í Mosfellsdal er eitt af þeim góðgerðarfélögum sem Veitingafélagið styrkti. „Okkur langaði að styðja við frábært starf Reykjadals sem tekur á móti fötluðum börnum og ungmennum í sumarbúðir og styttri vetrardvalir. Börn vina okkar hjóna hafa notið frábærra stunda í Reykjadal, auk þess er ég alin upp í Mosfellsbæ og fjölskyldan mín hefur sterkar taugar til Reykjadals,“ segir Ragnheiður Þengilsdóttir, sem einnig er mannauðsstjóri Veitingafélagsins.
Á myndinni eru Ragnheiður Þengilsdóttir f.h. Veitingafélagsins, Andrea forstöðumaður Reykjadals og Anna Lilja sem var mætt á jólaskemmtun í Reykjadal og tók á móti styrknum sem var uppá 726.782 krónur.

Við metum betur það sem við höfum í dag

Bjarki Sigurðsson viðskiptastjóri og Elísa Henný Arnardóttir hjúkrunarfræðingur hafa bæði glímt við eftirköst af COVID-19. Í einlægu viðtali við Ruth Örnólfsdóttur ræða þau um lífshlaup sín og hvernig veikindin hafa skert lífsgæði þeirra til muna.

Samkvæmt Alþjóðaheilbrigðismálastofnuninni eru algengustu einkenni COVID-19 hiti, hósti, kvefeinkenni, slappleiki og skyndileg breyting á lyktar- eða bragðskyni, sumir smitast þó án þess að sýna einkenni. Flestir ná sér af sjúkdómnum án sérstakrar meðferðar en aðrir eru því miður ekki eins heppnir.
Hjónin Bjarki og Elísa Henný hafa bæði glímt við eftirköst af COVID-19 en þau greindust árið 2020. Síðan þá hefur bati þeirra verið hægur en með tímanum hafa þau fundið jafnvægi á líðan sinni og geta því stjórnað orkunni í rétta átt.

Bjarki fæddist í Reykjavík 16. nóvember 1967. Foreldrar hans eru þau Valgerður Ingibjörg Jóhannesdóttir húsmóðir og Sigurður Sverrir Guðmundsson vélstjóri.
Bjarki á tvær systur, Bryndísi Margréti f. 1959 og Berglindi f. 1971.

Elísa Henný fæddist í Reykjavík 18. maí 1968. Foreldrar hennar eru þau Björg Magnúsdóttir skrifstofukona og Örn Henningsson tryggingamiðlari.
Elísa á tvo bræður, Magnús Helga f. 1964 og Hjört Örn f. 1976.

Dásamlegt að alast þarna upp
Bjarki og Elísa Henný eru bæði uppalin í Fossvogshverfinu fyrir utan fimm ár sem Elísa var búsett í Breiðholti en hún hélt samt áfram skólagöngu sinni í Fossvogsskóla. Fossvogurinn var að byggjast upp á þessum tíma og því mikið um að barnafjölskyldur væru að koma sér fyrir. Fjöldi barna var því ávallt úti að leika sér og það var margt um að vera. Þau eru sammála um að þarna hafi verið dásamlegt að alast upp.
Bjarki og Elísa kynntust þegar þau voru 14 og 15 ára gömul í Réttarholtsskólanum. Bjarki segist hafa verið búinn að gjóa á hana augum áður en hún veitti honum athygli. Leiðir þeirra lágu síðan saman í partíi og þá tókust kynni með þeim fyrir alvöru.

Reyndasti leikmaður sögunnar
Þegar Bjarki var lítill strákur hafði hann lítinn áhuga á íþróttum en hann hjólaði mikið með félögum sínum og reyndi fyrir sér í knattspyrnu. Fjölskyldan fór mikið í útilegur og ferðalög á hans yngri árum og eins fór Bjarki í margar utanlandsferðir sjóleiðina með föður sínum en hann starfaði sem vélstjóri á millilandaskipum.
Áhugi hans á handbolta hófst þegar hann var sextán ára þegar skólabróðir hans Örnólfur Jónsson dró hann með sér á handboltaæfingu hjá Víkingi. Tveimur árum síðar var Bjarki valinn í æfingahóp landsliðsins og fór hann með þeim víða um heim.
Bjarki er einn reyndasti leikmaður í sögu íslenska karlalandsliðsins í handknattleik en ferill hans spannar um 30 ár. Hann var valinn til að taka þátt í Ólympíuleikunum í Seúl í Kóreu árið 1988, hann spilaði með landsliðinu á HM í Frakklandi 1989 þar sem þeir urðu heimsmeistarar, úrvalsliði á HM í Svíþjóð 1993 og eins spilaði hann á móti Egyptum sama ár með heimsliðinu.

Besta tímabilið með Aftureldingu
Bjarki átti möguleika á að gerast leikmaður stærstu liða í Evrópu en sökum þess að hann var samningsbundinn hér heima þá gat hann ekki farið. Þegar samningur hans losnaði 1997 þá fékk hann tilboð frá Drammen í Noregi sem hann gat ekki hafnað. Bjarki bjó eitt ár í Noregi, átti frábært tímabil og endaði næst markahæstur. Hann fékk síðan tilboð frá Aftureldingu sem hann tók og á þessum tíma varð liðið þrefaldur Íslandsmeistari svo það má segja að Bjarki hafi þarna spilað sitt langbesta tímabil, með sínu heimaliði.
Ég spyr Bjarka hvort hann stundi einhverjar íþróttir í dag? „Já, ég stunda hjólreiðar, golf og skíði á veturna og svo fer ég í ræktina við og við, maður þarf að hafa eitthvað fyrir stafni,“ segir Bjarki og brosir.

Íþróttirnar tóku alveg yfir
„Ég gekk í Fossvogs- og Réttarholtsskóla, á unglingsárunum var mikið um að vera og íþróttirnar farnar að taka yfir þannig að það fór kannski minna fyrir lærdóm á þeim tíma en með árunum þá fór maður að hafa meiri áhuga á námi. Á sumrin með skólanum starfaði ég hjá verktakafyrirtæki.
Frá Fjölbraut í Ármúla fór ég í Iðnskólann í Reykjavík í rafvirkjun, ég var mjög heppinn því ég fékk vinnu sem lærlingur hjá Rafver ehf. Eftir námið hélt ég áfram hjá þeim og starfaði sem rafvirki í nokkur ár, þetta var frábær tími með fagmannlegu fólki.
Leið mín lá síðan í Háskóla Íslands þar sem ég tók diploma í rekstrar- og viðskiptafræði og í dag starfa ég sem viðskiptastjóri hjá Jónar Transport.“

Fóru til að styðja sitt lið
Elísa fór mikið í skíðaferðir á sínum yngri árum með stórfjölskyldunni á skíðasvæði Víkings en í útilegur og jeppaferðir á sumrin. Fjölskylda hennar var líka dugleg að fara á fótbolta- og handboltaleiki hjá Víkingi en þau fóru til að styðja sitt lið. Elísa fór líka í Vindáshlíð og var dugleg í skátastörfunum sem krakki.
„Við fjölskyldan bjuggum í blokk í Fossvoginum með svo skemmtilegu fólki sem við höfum enn samband við og það eru reglulega haldin Keldulandspartý. Við krakkarnir í blokkinni vorum alltaf saman, vorum meira að segja með okkar eigið fótboltalið með sér búningum og allt, þetta eru svo skemmtilegar minningar,“ segir Elísa og brosir.

Það var bara svo gaman að vera til
„Ég gekk í Fossvogs- og Réttarholtsskóla og mér fannst yfirleitt mjög gaman í skólanum. Ég var samt pínu kvíðin og þorði aldrei að mæta ein í skólann, mátti aldrei mæta of seint og var mjög samviskusöm. Á sumrin með skólagöngunni starfaði ég í bæjarvinnunni, sem sendill og við afgreiðslustörf.
Mér fannst skemmtilegast á menntaskólaárunum í Menntaskólanum við Sund. Það var bara svo gaman að vera til, félagsskapurinn, tónlistin, allt dramað og hláturs­köstin, við vinkonurnar getum endalaust rifjað upp þessi góðu ár og hlæjum enn. Ég fór svo í Háskóla Íslands í hjúkrun og eftir útskrift þá hef ég starfað hjá Sjúkrasamlaginu, Heilsugæslunni í Mosfellsbæ og Landspítalanum. Í dag starfa ég á skurðstofunum í Orkuhúsinu.
Ég hef alltaf haft mikinn áhuga á íþróttum þótt ég hafi ekki verið að æfa sjálf. Ég er mikið fyrir útivist, hef stundað hlaup og gengið á fjöll. Ég hef verið í skokkhópum og eins hef ég skokkað mikið með mömmu minni og Sesselju vinkonu sem hefur alltaf hvatt mig, sama hvað. Það er svo gott að búa hér í Mosfellsbæ með öll þessi fell í kringum okkur, hér eru dásamlegar skokk- og gönguleiðir.“

Oft fjör á stóru heimili
Bjarki og Elísa giftu sig árið 1990, þau eiga fjögur börn, Örn Inga f. 1990, Kristinn Elísberg f. 1995, Bjarka Stein f. 2000 og Önnu Katrínu f. 2003.
„Við höfum verið dugleg í gegnum tíðina að fara í útilegur með krakkana, þau elskuðu að fara í þessar ferðir svo fellihýsið hefur komið að góðum notum. Við höfum líka stundað útivist mikið, hjólreiðar, farið í göngur og á skíði
Öll börnin okkar hafa stundað íþróttir og við höfum verið mikið með þeim í kringum þær. Horfum mikið á íþróttakappleiki saman, hittumst svo í Hjallahlíðinni, borðum góðan mat og förum í pottinn. Það er oft mikið fjör á stóru heimili, trúðu mér,“ segir Elísa og brosir.

Einkennin ekki mikil í fyrstu
Bjarki og Elísa Henný greindust bæði með Covid í október 2020 en þau eru meðal þúsunda annarra Íslendinga sem glíma við langvarandi veikindi af slíkri sýkingu.
Einkenni Bjarka voru ekki mikil í fyrstu en hann fékk hita á fyrsta degi en eftir nokkra daga hvarf svo lyktar- og bragðskynið.
Elísa segir að veikindin sjálf hafi ekki verið svo slæm í fyrstu, bara þessi venjulegu flensueinkenni, hiti, höfuðverkur og slappleiki. „Ég hef aldrei misst bragð- né lyktarskyn, Guði sé lof því ég elska að borða,“ segir Elísa og brosir.

Með sjúkrabíl á bráðamóttökuna
„Eftir að ég greindist með Covid fór ég allt í einu að finna fyrir einkennum frá hjartanu sem ég hafði aldrei fundið fyrir áður,“ segir Bjarki. „Ég fór með sjúkrabíl á bráðamóttökuna þar sem ég var rannsakaður í bak og fyrir og í ljós kom að ég er með hjartsláttartruflanir. Ég var settur á lyf og fór heim að rannsókn lokinni. Nú er ég undir eftirliti hjá hjartalækni sem metur stöðu mína hverju sinni.
Ég fæ slæm hjartaköst öðru hverju og það er ekki langt síðan ég fékk mitt versta kast. Ég svitna við minnstu áreynslu, hjartað pumpar hratt og svo ekkert og svo aftur hratt. Maður er orðinn næpuhvítur og með yfirliðstilfinningu, það er alveg hrikaleg vanlíðan á meðan þetta stendur yfir,“ segir Bjarki alvarlegur á svip. „Næstu daga á eftir líður manni eins og það sé búið að soga úr manni alla orku, svipað og maður hafi hlaupið heilt maraþon, maður er bara alveg búinn á því.
Vinnuveitendur mínir hafa sýnt þessu mikinn skilning á allan hátt, ég get unnið heima þegar ég þarf á að halda, fyrir það er ég mjög þakklátur.“

Ég hef það að leiðarljósi
„Mér var ráðlagt að fara rólega af stað sem ég gerði en fór svo til vinnu og fann að ég var enn slæm,“ segir Elísa. „Fékk einkenni eins og mikla mæði, höfuðverki, brjóstverki, heilaþoku, málstol, mikið orkuleysi, skjálfta, svima og svo ágerðist þetta bara með tímanum.
Ári seinna eða í október 2021 þá krassa ég algjörlega, fer á Reykjalund í endurhæfingu og miklar rannsóknir. Starfsfólk Reykjalundar reyndist mér vel en mér fannst mjög erfitt að vera komin í þá stöðu að þurfa að fara þangað inn. Mér fannst að margir aðrir þyrftu þess miklu frekar en ég. Læknirinn minn sagði við mig að batinn yrði hægur næstu árin og ég hef haft það að leiðarljósi.
Ég var í veikindaleyfi fram í maí og byrjaði þá í 50% vinnu en er núna komin í 80%, ég vinn ekki á miðvikudögum, það er heilagur hvíldardagur hjá mér.
Vinnuveitendur mínir og samstarfsfólk hafa sýnt mér mjög mikinn skilning og stuðning, þau hafa passað að ég fari ekki fram úr mér og fyrir það er ég þakklát. Það er sigur fyrir mig að geta unnið, sumir hafa ekki getað mætt aftur til starfa eftir Covid.
Það koma auðvitað dagar þar sem ég hef ekki getað mætt og þá finnst mér að ég hafi tapað.“

Allt hverfur innan úr mér
„Batinn er upp á við en hægur, einkennin sem ég hef enn eru verkir, þyngsli í brjóstkassa, höfuðverkur og mest orkuleysi. Þegar líður á daginn fer ég að tæmast að innan, allt hverfur innan úr mér og það er bara ekkert eftir. Ég þarf oft að taka verkjalyf og orkudrykki þegar ég kem heim sem ég gerði aldrei áður,“ segir Elísa.
„Ég hef verið að reyna að finna jafnvægi í þessu öllu saman frá því að ég greindist, er farin að stjórna orkunni því oft var það þannig að ef ég gerði of mikið einn daginn þegar mér leið vel þá þurfti ég að borga fyrir það með því að liggja í rúminu í þrjá daga. Hvíld og orkusparnaður er það sem virkar til að líða betur. Ég get ekki lengur skokkað eða hreyft mig eins og ég vil og auðvitað hefur það áhrif á andlegu hliðina.
Eftir svona veikindi lærir maður að meta betur það sem maður hefur og það sem maður getur notið, fjölskylduna, góða vini, frábæra og skemmtilega vinnu, jóga og fleira til. Við eigum líka þrjú yndisleg barnabörn sem gefa okkur svo mikið, ég vildi að ég hefði meiri orku með þeim.“

Höfum upplifað mikla góðsemi
„Við Bjarki þekkjum marga sem eru að glíma við mikla erfiðleika í lífinu svo okkur finnst við bara vera heppin miðað við okkar aðstæður. Við horfum bæði björtum augum á framtíðina og stefnum að bata en til þess þarf mikla þolinmæði. Standa með sjálfum sér, læra að slaka á og fá ekki móral yfir því að velja og hafna því sem maður gerir. Það getur verið svo erfitt að vera búin að plana eitthvað með fjölskyldu og vinum og þurfa svo að hætta við á síðustu stundu vegna veikindanna, þetta tekur virkilega á.
Við höfum upplifað svo mikla góðsemi og væntumþykju frá fólki, fjölskyldum okkar, vinum, samstarfsfólki og fleirum, við erum bara orðlaus. Við erum sannarlega rík að hafa allt þetta góða fólk í kringum okkur.“
Ég spyr hjónin í Hjallahlíðinni hvort þau vilji segja eitthvað að lokum. „Já, við óskum Mosfellingum öllum gleðilegrar jólahátíðar og farsældar á nýju ári,“ og þar með kvöddumst við.

Sigurpáll heim í Aftureldingu

Sigurpáll Melberg og Gísli Elvar formaður meistaraflokksráðs knattpsyrnudeildar Aftureldingar.

Sigurpáll Melberg Pálsson hefur gert tveggja ára samning við Aftureldingu og mun spila með liðinu í Lengjudeild karla í fótbolta næsta sumar.
Sigurpáll er 28 ára varnar- og miðjumaður sem lék upp alla yngri flokkana hjá Aftureldingu. Sigurpáll kemur til Aftureldingar frá danska félaginu FA 2000 en hann lék áður með Fjölni, Fram og HK. Samtals hefur Sigurpáll skorað sex mörk í 100 leikjum í næstefstu deild á Íslandi á ferli sínum auk þess sem hann á átján leiki að baki í efstu deild.
„Ég hef fylgst náið með liðinu síðan ég var hérna fyrir átta árum. Ég er hrikalega hrifinn af spilamennsku liðsins og hvernig þetta er innan sem utan vallar. Við eigum ekki að stefna á neitt annað en toppbaráttuna,“ sagði Sigurpáll eftir undirskriftina.
„Það er frábært þegar öflugir leikmenn sem eru uppaldir hjá Aftureldingu vilja koma aftur á heimaslóðir. Sigurpáll hefur æft með okkur undanfarnar vikur og fallið vel inn í hópinn. Sigurpáll er með mikla reynslu sem mun nýtast okkur vel í baráttunni í Lengjudeildinni næsta sumar,“ sagði Magnús Már Einarsson þjálfari Aftureldingar.

Hver er Mosfellingur ársins 2023?

Val á Mosfellingi ársins 2023 stendur nú yfir. Lesendum gefst kostur á að tilnefna þá sem þeim þykja verðugir að bera nafnbótina. Öllum er frjálst að senda inn tilnefningar í gegnum heimasíðu blaðsins www.mosfellingur.is. Þetta er í 19. sinn sem valið fer fram á vegum bæjarblaðsins Mosfellings. Íbúar eru hvattir til að taka virkan þátt og senda inn tilnefningar. Gjarnan má fylgja með stuttur rökstuðningur fyrir tilnefningunni og hvað viðkomandi hefur lagt til samfélagsins.

Áður hafa þessi hlotið nafnbótina: Sigsteinn Pálsson, Hjalti Úrsus Árnason, Jóhann Ingi Guðbergsson, Albert Rútsson, Embla­ Ágústsdóttir, Steindi Jr., Hanna Símonardóttir, Greta Salóme, Kaleo, Jóhanna Elísa Engelhartsdóttir, Sigrún Þ. Geirsdóttir, Guðni Valur Guðnason, Jón Kalman Stefánsson, Óskar Vídalín Kristjánsson, Hilmar Elísson, Sigmar Vilhjálmsson, Elva Björg Pálsdóttir og Halla Karen Kristjánsdóttir.

Útnefningin verður kunngjörð í fyrsta blaði ársins 2024, fimmtudaginn 11. janúar.

Reykjalundur lokar hluta húsnæðis vegna bágs ástands

Í byrjun desember lokaði endurhæfingarstöðin Reykjalundur hluta húsnæðis síns vegna bágs ástands bygginga heilbrigðisstofnunarinnar.
Var þetta gert í framhaldi af úttekt verkfræðistofu sem sýnir að óheilnæmt er fyrir sjúklinga og starfsfólk að dvelja í umræddum byggingum.

Viðamikil úttekt verkfræðistofu
Stjórnendur og starfsfólk Reykjalundar hafa um nokkurn tíma haft grun um að hluti húsnæðis Reykjalundar sé ófullnægjandi, annars vegar út frá veitingu heilbrigðis­þjónustu til viðkvæmra sjúklingahópa og hins vegar sem vinnuaðstaða starfsfólks. Þessar áhyggjur hafa undanfarin misseri verið kynntar fulltrúum Sjúkratrygginga, heilbrigðisráðuneytis og heilbrigðisráðherra sjálfum.
Viðamikil úttekt verkfræðistofunnar Verksýnar á húsnæðinu hófst síðasta sumar og staðfestir hún, því miður, grun um ófullnægjandi ástand þess. Þær byggingar sem þarf að loka eru báðar hæðir C-álmu, efri hæð F-álmu og smáhýsi sem staðsett eru á lóð Reykjalundar og hafa verið notuð til gistingar fyrir sjúklinga utan af landi. Jafnframt þarf að loka nokkrum afmörkuðum stöðum í A-, B- og G-álmum. Auk þessa verða nokkrar álmur settar í sérstaka hreinsun og regluleg aukaþrif þar sem ástandi er ábótavant en þó ekki talið heilsuspillandi.
„Reynt hefur verið eins og kostur er að sjá til þess að lokunin verði ekki til að draga úr starfseminni þó óneitanlega verði einhverjir hnökrar á þjónustu. Óvissa ríkir um hversu lengi lokunin mun vara, þar sem ekki eru fjármunir til staðar til að fara í þær umfangsmiklu lagfæringar sem nauðsynlegar eru,“ segir Pétur Magnússon forstjóri Reykjalundar.

Stjórnvöld meðvituð um stöðuna
Þjónustusamningur Reykjalundar við Sjúkratryggingar Íslands kveður á um að greiðslur samkvæmt honum megi einungis nýta í veitingu þjónustu við sjúklinga og felur ekki í sér sérstakar greiðslur til viðhaldsverkefna. SÍBS (eigandi húsnæðisins) hefur frá stofnun Reykjalundar árið 1945 greitt kostnað við uppbyggingu og viðhald.
Eftir því sem húsnæðið verður eldra og viðhaldsfrekara samhliða því sem tekjur af flokkahappdrætti SÍBS hafa minnkað, þá hrökkva þeir fjármunir ekki lengur til og því hefur einungis lágmarksviðhaldi verið sinnt á Reykjalundi í mörg ár.
Stjórnvöld hafa verið meðvituð um þessa stöðu og meðvituð um að húsnæðismál Reykjalundar væru langt frá því að vera sjálfbær. Þrátt fyrir það hefur ekki ennþá verið gengið frá framtíðarfyrirkomulagi húsnæðismála Reykjalundar.
„Við lokunina standa til boða færri rými fyrir sjúklinga utan af landi því hluti húsnæðisins sem lokað verður hefur verið nýttur fyrir gistingu sjúklinga sem ekki komast til síns heima á kvöldin.
Alls misstu 32 starfsmenn vinnuaðstöðu sína og hefur verið unnið að því að skipuleggja nýjar starfsstöðvar fyrir umrætt starfsfólk til bráðabirgða. Slíkt fyrirkomulag gengur þó ekki upp til langframa,“ segir Pétur Magnússon.

Engir fjármunir til staðar
„Það er von Reykjalundar að hægt verði að finna lausn sem tryggir samfellda og órofna þjónustu við sjúklinga til bæði skamms og langs tíma ásamt því að geta boðið upp á góða vinnuaðstöðu fyrir starfsfólk.
Verið er að skoða möguleika á tímabundinni uppsetningu færanlegra húseininga eða flutningi tímabundið í annað laust húsnæði. Vandinn er hins vegar sá að engir fjármunir eru til staðar til að greiða fyrir leigu slíks húsnæðis, né til að hefja viðgerðir á núverandi húsnæði. Það ríkir því mikil óvissa um þá mikilvægu starfsemi sem fram fer á Reykjalundi.“