Ólöf Kristín Sívertsen

Nú þegar hátíð ljóss og friðar er að ganga í garð er ekki úr vegi að staldra aðeins við, líta yfir árið og velta því fyrir sér hvernig það var og af hverju.
Leið mér vel? Lagði ég rækt við sjálfa/-n mig og aðra? Var ég meðvituð/-aður um gerðir mínar og viðbrögð í hinu daglega amstri? Þetta eru aðeins örfáar af þeim spurningum sem koma upp í hugann því það er nefnilega svo ótal margt sem við getum gert til að efla vellíðan okkar og leggja rækt við okkur sjálf og aðra í kringum okkur.

Jákvæðni er val
Eins og segir í fyrsta geðorðinu þá er einfaldlega léttara að hugsa jákvætt og slíkt er í raun val hvers og eins. Það er sama hversu krefjandi verkefnin okkar eru, það er alltaf hægt að finna jákvæðar hliðar á þeim og þó okkur takist jafnvel ekki að leysa þau eins og við vildum þá erum við að minnsta kosti alltaf reynslunni ríkari. Mundu að reynslan og viðhorf okkar til hlutanna skapa okkur sem manneskjur og þau gildi sem við stöndum fyrir. Áskoranir lífsins eiga nefnilega ekki að hafa lamandi áhrif á okkur, þær eiga að hjálpa okkur að uppgötva hver við erum í raun.

Þakklæti bætir heilsuna
Þakklæti er göfug og góð tilfinning. Sálfræðingurinn Robert A. Emmons hefur meðal annarra rannsakað áhrif þakklætis á samskipti, hamingju og heilsu fólks. Niðurstöður hans sýna m.a. að það einfalda atriði að þakka markvisst og meðvitað einu sinni í viku leiðir til betri heilsu, meiri gleði og hamingju, betri svefns og samskipta, meiri ákafa og bjartsýni, meiri styrks og ákveðni, meiri ástundunar líkamsræktar, meiri lífs­ánægju og er þá einungis talinn upp hluti þeirra góðu áhrifa sem þakklæti hefur á líf okkar og heilsu.

Hlúðu að því sem þér þykir vænt um
Rannsóknir hafa einnig sýnt að þeim sem gengur vel í lífinu og líður vel eiga það sameiginlegt að hlúa að því sem þeim þykir vænt um. Með því að koma vel fram við og gleðja aðra þá stuðlum við að vellíðan þeirra auk okkar eigin. Settu þér það markmið að gleðja og/eða tjá einhverjum væntumþykju þína reglulega og hlúðu þannig að þeim sem þér þykir vænt um og skipta þig máli í lífinu.

Vellíðan
Það er löngu vísindalega sannað að holl, góð og fjölbreytt næring hefur jákvæð áhrif á líkamlega og andlega líðan okkar og hið sama gildir um hreyfingu. Ef okkur líður vel andlega og líkamlega þá eru yfirgnæfandi líkur á því að félagslegi þátturinn fylgi með sem einkennist af góðum og kærleiksríkum samskiptum við aðra. Temjum okkur að þakka fyrir góðu hlutina í lífi okkar, hvort sem þeir eru stórir eða smáir, og virkjum fólkið í kringum okkur með í þessari vegferð til þakklætis, hamingju og heilbrigðis.

Heilsueflandi samfélag í Mosfellsbæ færir ykkur hjartans þakkir fyrir samfylgdina á árinu sem er að líða, óskar ykkur gleði og friðar um hátíðirnar og að sjálfsögðu heilbrigðis og hamingju á nýju ári.

Ólöf Kristín Sívertsen,
lýðheilsufræðingur og verkefnisstjóri
Heilsueflandi samfélags í Mosfellsbæ

Haraldur Sverrisson bæjarstjóri Mosfellsbæjar.

Fjárhagsáætlun Mosfellsbæjar fyrir árið 2017 er nú til umræðu í bæjarstjórn. Samkvæmt henni er gert ráð fyrir rúmlega 200 mkr. afgangi af rekstri.
Veltufé frá rekstri verður jákvætt um 924 mkr. eða um 10% af heildartekjum og að í árslok 2017 verði skuldaviðmið komið niður í 106% af tekjum sem er langt undir viðmiðunarmörkum sveitarstjórnarlaga.

Skattar lækkaðir og þjónustugjöld óbreytt
Skattar verða lækkaðir á íbúa Mosfellsbæjar á árinu 2017. Í fyrsta skipti síðan fyrir hrun verður álagningarhlutfall útsvars fyrir neðan hámark en bæjarstjórn hefur ákveðið að það verði 14,48% en hámarkið er 14,52%. Jafnframt er gert ráð fyrir lækkun fasteignagjalda til að koma til móts við þá auknu eignamyndun sem átt hefur sér stað með hækkun fasteignamats. Þessar aðgerðir lækka greiðslur heimilanna um 12.000 kr. á ári að meðaltali.
Auk lækkunar skatta er gert ráð fyrir að þjónustugjöld sveitarfélagsins haldist óbreytt milli ára og lækki því að raungildi. Hér er um kjarabætur að ræða fyrir fjölmargar barnafjölskyldur í bænum og er þetta t.d. annað árið í röð sem leikskólagjöld hækka ekki. Fjárhagáætlunin gerir auk þessa ráð fyrir auknum niðurgreiðslum á fasteignagjöldum fyrir tekjulága eldri borgara.

Þjónusta við barnafjölskyldur aukin og bætt
Fjárhagsáætlunin gerir ráð fyrir aukinni þjónustu og auknum niðurgreiðslum, einkum til barnafjölskyldna. Verulegir fjármunir verða settir í að auka þjónustu við börn 1-2ja ára. Stofnaðar verða ungbarnadeildir við tvo leikskóla bæjarins þar sem pláss verður fyrir um 30 börn á þessum aldri, auk þess sem plássum verður fjölgað á einkareknum leikskólum í nágrenni sveitarfélagsins fyrir börn úr Mosfellsbæ. Auk þessa verða niðurgreiðslur auknar talsvert þannig að frá 18 mánaða aldri er greitt fyrir börn sama gjald, hvort sem þau eru á leikskólum bæjarins, á einkareknum skólum eða hjá dagforeldrum.
Haldið verður áfram að stuðla að íþrótta- og tómstundaiðkun barna með hækkun frístundaávísunar um 18%. Það er til viðbótar þeim breytingum sem gerðar voru í haust þegar frístunda­ávísunin var hækkuð verulega til barnmargra fjölskyldna. Fjárhagsáætlunin gerir einnig ráð fyrir því að fjármunir verði settir í að koma upp skipulögðu ungmennastarfi á vegum Mosfellsbæjar í nafni Ungmennahúss sem hafi aðstöðu í Framhaldsskólanum, sem og að Listaskólinn verði efldur til að geta sinnt fleiri nemendum og að tónlistarnám verði aukið innan grunnskólanna.
Hér hafa verið nefnd nokkur af þeim atriðum þar sem þjónusta við bæjarbúa er aukin til muna. Hægt er að skoða áætlunina í heild sinni inni á vef bæjarins www.mos.is.

Uppbygging heldur áfram – nýr grunnskóli byggður
Mikil uppbygging á sér stað í Mosfellsbæ um þessar mundir og aðeins í Helgafellshverfi einu hafa verið gefin út byggingarleyfi fyrir ríflega 400 íbúðum. Þessi mikla uppbygging kallar á fjárfestingar í innviðum. Fjárhagsáætlunin gerir ráð fyrir að fjárfest verði fyrir tæplega 800 mkr. að frádregnum gatnagerðargjöldum. Þar er stærsta einstaka framkvæmdin bygging Helgafellsskóla en gert er ráð fyrir að í þá framkvæmd fari um 500 mkr. á árinu 2017.
Fyrsti áfangi skólans verður tekinn í notkun haustið 2018. Auk þess er gert ráð fyrir töluverðum fjármunum í framkvæmdir við íþróttamannvirki með áherslu á Varm­ársvæðið. Auk þess er í skoðun bygging fjölnota íþróttahallar í einkaframkvæmd í samvinnu við Ungmennafélagið Aftureldingu. Fé er áætlað í endurbætur á eldri byggingum bæjarfélagsins og einkum er þar horft til Varmárskóla sem þarfnast viðhalds.

Hér hefur verið stiklað á stóru um þau atriði sem tillaga að fjárhagsáætlun felur í sér. Mosfellsbær er vel rekið sveitarfélag og það er ánægjulegt að svigrúm hafi skapast fyrir því að geta bætt hag bæjarbúa með aukinni þjónustu og lækkun skatta og gjalda eins og stefnt er að.
Það er gott að búa í Mosfellsbæ og það er okkar vilji sem störfum í hans þágu að svo verði áfram.

Haraldur Sverrisson, bæjarstjóri

Katrín Sigurðardóttir

Það er margsannað hvað hreyfing og mataræði hefur mikil áhrif á heilsuna. Hreyfing þarf ekki að vera svo mikil og mataræði ekki að vera mjög sérhæft eða ýkt til að skila bættri heilsu.
Við hjá Rauða krossinum í Mosfellsbæ viljum stuðla að bættri heilsu og skipulögðum gönguhópi sem hefur það að markmiði að hjálpa fólki að taka ábyrgð á eigin heilsu. Gönguhópurinn er fyrir alla sem þurfa heilsu sinnar vegna að hreyfa sig eða þá sem langar bara í göngutúr í góðum félagsskap.
Gengið er tvisvar í viku í 30 til 40 mínútur, á hraða sem hentar hverjum og einum. Ekki er ætlunin að keppa að því að verða fyrstur eða komast í keppnisform. Til þess er nóg af lausnum í boði hjá líkamsræktarstöðum og fleiri aðilum. Það að ganga með fleirum á fyrirfram ákveðnum tíma gerir það mun líklegra að maður fari af stað eða haldi sig við efnið til lengri tíma. Það er líka alkunna að maður er manns gaman og er þetta upplagt tækifæri til að fara í göngutúr í góðum félagsskap.
Til viðbótar við göngurnar verða fræðslukvöld einu sinni í mánuði um hreyfingu, mataræði og helstu lífsstílssjúkdóma. Þannig getur fólk betur tileinkað sér venjur sem eru um leið forvörn fyrir ýmsa lífsstílssjúkdóma eða, ef einhver slíkur er þegar til staðar, hjálpað fólki að tileinka sér lífsstíl til að vinna gegn sjúkdómnum. Í fræðslunni er miðað við sannreyndar og viðurkenndar upplýsingar og ekki fjallað um sérstaka kúra eða tískubólur tengdar mataræði.
Til að styrkja okkur enn frekar munum við elda saman hollan og góðan mat einu sinni í mánuði og fá sérfræðinga til að miðla til okkar hvernig hægt er að hafa mataræðið hollt, gott og fjölbreytt.
Gengið er á mánudögum og fimmtudögum klukkan 16.15 frá Rauða kross húsinu í Þverholti 7 Mosfellsbæ. Mikilvægt er að tilgangur hreyfingarinnar er ekki að komast í keppnisform eða að vera fyrstur heldur er markmiðið að stunda hreyfingu sem stuðlar­ að eigin heilbrigði.
Nánari upplýsingar: hulda@redcross.is eða í síma: 898 6065.

Katrín Sigurðardóttir hópstjóri verkefnisins
og ritari í stjórn Rauða krossins í Mosfellsbæ

Sr. Skírnir Garðarsson

Að gefnu tilefni vil ég undirritaður, Skírnir­ Garðarsson, fyrrum prestur Lágafellssóknar koma eftirfarandi á framfæri:
Ónóg stjórnsýsla Lágafellssóknar og mannauðsstjórnun hefur undanfarin misseri dregið dilk á eftir sér. Í fyrra hættu organisti, prestur og djákni og í framhaldinu var klúður varðandi ráðningu nýs starfsfólks, óánægja var með ráðningarferli organista og óánægja er nú meðal starfsfólks sóknarinnar.
Sóknarpresturinn og framkvæmdastjórinn voru sett undir rannsókn Úrskurðarnefndar þjóðkirkjunnar og var niðurstaðan birt 3. nóv. sl.
Þar kemur fram að ámælisverð vinnubrögð hafa verið viðhöfð gagnvart undirrituðum, gagnvart opinberum eftirlitsaðilum og stjórnsýsla framkvæmdastjórans virðist hafa einkennst af þekkingarskorti og vöntun­ á vandvirkni.
Þá eru meint brot sömu aðila á persónuverndarlögum og trúnaði gagnvart tölvupóstum starsfólks til skoðunar hjá Persónuvernd. Þar er ljóst að viðkvæmum upplýsingum var komið á óheiðarlegan hátt til yfirmanna kirkjunnar, meintir gerendur eru sóknarpresturinn og framkvæmdastjórinn.
Þessi meintu brot teygja sig yfir þriggja ára tímabil, 2014 –2016, fyrri hluta árs.
Um er að ræða meint brot á meðferð rafrænna skjala, ásamt því að farið hefur verið á svig við siðareglur kirkjunnar.
Úrskurður Úrskurðarnefndar þjóðkirkjunnar liggur frammi á biskupsstofu og hefur verið sendur sóknarnefnd Lágafellssóknar og kirkjuráði.
Úrvinnsla Persónuverndar er í gangi og niðurstöðu er að vænta í vetur.
Allt er þetta til tjóns fyrir sóknarbörnin í Lágafellssókn.

Sr. Skírnir Garðarsson

——-

Úrskurðarorð:
Aðfinnsluvert er að enginn gagnaðila skyldi láta málshefjanda tafarlaust vita af erindi Persónuverndar frá 12. ágúst 2013.
Aðfinnsluvert er með hvaða hætti gagnaðilar sóknarnefnd og framkvæmdastjóri Lágafellssóknar brugðust við fyrrgreindu erindi Persónuverndar.
Aðfinnsluvert er að gagnaðili sóknarprestur skyldi vísa erindi Persónuverndar til biskups Íslands án þess að tilkynna málshefjanda tafarlaust þá ákvörðun sína.
Gagnaðilum bar ekki að veita máls­hefjanda andmælarétt vegna erindis Persónuverndar.

Úrsúla Jünemann

Vandfundinn er sá staður þar sem er gnægð af góðu ferskvatni og meira en það eins og hér á landi.
Okkur Íslendingum þykir sjálfsagt að vatn – bæði kalt og heitt – er nær alls staðar að finna og við þurfum ekki að hafa áhyggjur af því að þar verði skortur á. Fréttir af því að nýlega hafi verið mengun í drykkjarvatni á Vestfjörðum hafa ekki snert landsmenn sérlega mikið en gefa samt smá aðvörunarmerki.

Í gegnum Mosfellsbæjarlandið renna nokkrar ár: Varmá, Kaldakvísl, Suðurá, Úlfarsá og Leirvogsá (sem er á landamærunum við Reykjavík). Varmá sem er á náttúruminjaskrá og Kaldakvísl renna í gegnum þéttbýli og eru því í mestri hættu að verða fyrir mengun. Reyndar hafa orðið nokkur mengunarslys í báðum þessum ám.
Hvað er það sem getur valdið mengun í ám, vötnum og sjó?
-Rangar tengingar frá húsum og bílskúrum þar sem skólp fer óhreinsað í árnar og sjóinn.
-Óhreinsað skólp frá ófullnægjandi rotþróm og siturlögnum.
-Málning, olía og annað sem hellt er í niðurföll utandyra eða í bílskúrum.
-Tjöruhreinsir og sápa frá bílaþvotti.
-Klór úr heitum pottum.

Búið er að hanna góðan bækling um vatnsvernd sem allir bæjarbúar ættu að fá heim. Því miður hefur ekki orðið af því vegna peningaleysis því ekki er veitt nægilegu fjármagni til umhverfismála. En vatnsvernd ætti að vera eitt af forgangsmálunum hér eins og annars staðar, ekki spurning.
Mosfellsbærinn er yndislegur bær þar sem gott er að búa. Hér á að vera heilsueflandi samfélag. Þannig að umhverfið okkar á að vera heilnæmt en ekki mengað. Vatnakerfin eru viðkvæm og ef þau verða fyrir raski og mengun eru þau lengi að ná sér – ef þau nái sér. Fyrirbyggjandi aðgerðir eru margfalt ódýrari en mótvægisaðgerðir seinna meir þegar skaðinn er skeður.

Ég skora á bæjaryfirvöld að leggja til fjármagn til fræðslu um vatnsvernd og til að vakta vatnakerfin í bænum reglulega. Umhverfismálin eiga ekki að lenda alltaf í aftasta sæti.

Úrsúla Junemann
Höfundur starfar í umhverfisnefnd fyrir M- listann

Jón Steindór Valdimarsson

Samkeppni, gott viðskiptasiðferði og frjáls markaður veita aðhald og stuðla að efnahagslegum framförum og hagsæld almennings. Þess vegna á að nýta markaðslausnir á öllum sviðum nema þar sem almannahagsmunir krefjast annars.
Frjáls samkeppni er best til þess fallin að tryggja neytendum fjölbreytt úrval vöru og þjónustu. Samtímis þarf að hafa skilvirkt samkeppniseftirlit og tryggja almenna neytendavernd.

Réttur neytenda
Settar hafa verið fram nokkrar grundvallareglur til þess að tryggja rétt neytenda. Þar má helst nefna að geta valið milli fjölbreytts varnings og þjónustu á samkeppnishæfu verði og af fullnægjandi gæðum. Svo er það rétturinn til að fá nauðsynlegar upplýsingar til að geta mótað skynsamlegt val og ákvarðanir.
Sem betur fer eru þessi réttindi í flestum tilvikum virt. Því miður eru á þessu undantekningar, stórar og smáar, sem brýnt er að lagfæra.

Fyrst skal nefna búvörusamninga, tolla og innflutningshöft sem leiða til skerts vöruúrvals og hærra verðs til neytenda en ella væri. Að auki er vandséð að bændur hagnist á þessu fyrirkomulagi.

Þá eru það reglur sem koma í veg fyrir að t.d. tannlæknar geti auglýst sína þjónustu og þar með gjaldskrár. Þannig er komið í veg fyrir að neytendur geti kynnt sér mismunandi verð og þjónustu. Kraftar samkeppninnar fá ekki að virka. Það er vont fyrir neytendur og þá tannlækna sem veita ódýra þjónustu.

Loks skulu nefnd uppgreiðslugjöld fjármálastofnana. Skuldurum er gert mjög erfitt um vik að færa viðskipti sín til lánastofnana sem bjóða betri vexti og þjónustu. Kostnaðurinn við að færa viðskiptin getur verið það hár að hann standi í vegi fyrir raunverulegu vali neytandans. Meginröksemd lánastofnana fyrir uppgreiðslugjaldi er að þær verði að geta varist áföllum vegna hugsanlegrar uppgreiðslu á lánum fyrir gjalddaga. Það stangast á við rétt neytandans og hindrar samkeppni. Þetta verður að lagfæra.

Jón Steindór Valdimarsson
Skipar 2. sæti á lista Viðreisnar
í Suðvesturkjördæmi

Þorgerður Katrín Gunnarsdóttir

Það er grundvallarréttur fólks í lýðræðisríki að geta gengið til kosninga og að allir geti með atkvæði sínu haft jafnan rétt til að hafa áhrif á hverjir og hvers konar stjórnvöld komast til valda.

Allt frá því þéttbýli fór að myndast á Íslandi hefur því verið mismunað með hlutfallslega minna atkvæðavægi en í dreifbýli. Fjöldi þingmanna á hvern íbúa hefur því lengi verið mismikill milli kjördæma og þess vegna hafa áhrif kjósanda í kosningum verið mismikil eftir því hvar þeir búa. Nú má þessi munur því vera allt að tvöfaldur; íbúar í Norðvesturkjördæmi geta haft um tvöfalt fleiri þingmenn á hvern íbúa heldur en íbúar í Suðvesturkjördæmi og hefur hver íbúi því um tvöfalt meiri áhrif á úthlutun þingsæta á Alþingi.

Við í Viðreisn teljum það forgangsatriði að stjórnarskránni verði breytt til þess að tryggja að atkvæðisréttur allra landsmanna verði jafn, óháð búsetu þeirra.
Fötluð kona í Hafnarfirði á að hafa sama rétt og trillukarl fyrir austan, fyrirtækjaeigandi fyrir vestan á að hafa sama atkvæðisrétt og kennari í Kópavoginum. Jafnréttið er ósköp einfalt.
Andstæðingum þessa brýna lýðræðismáls hefur oft og tíðum tekist að gera þetta að baráttu höfuðborgarsvæðis gegn landsbyggðinni. Sú barátta á að vera óþörf.

Þingmenn Alþingis eiga að bera hag landsins alls fyrir brjósti og öllum ætti að vera ljóst að sterkt höfuðborgarsvæði þarf á sterkri landsbyggð að halda. Skipting og forgangsröðun verkefna ríkisins þarf að vera tekin á jafnræðisgrundvelli, með þarfir allra kjördæma að leiðarljósi og sífelldum áminningum um að ekkert þeirra megi sitja eftir við útdeilingu sameiginlegra gæða.

Við megum ekki vera hrædd við kerfisbreytingar. Íhaldssemin hefur ávallt og mun áfram passa upp á sig og sína. Því kerfisbreytingar eru ógnun við valdhafa er sækja völd sín til slíks ójafnræðis sem felst í misvægi atkvæðisréttar.
Viðreisn er ekki þannig flokkur og því munum við einhenda okkur í kerfisbreytingar sem auka réttlæti og jafnrétti á Íslandi, öllum til hagsbóta.

Þorgerður Katrín Gunnarsdóttir
Skipar 1. sæti á lista Viðreisnar
í Suðvesturkjördæmi