Ágætu Mosfellingar.
Fimmtudaginn 28. apríl nk. mun umhverfisnefnd Mosfellsbæjar efna til opins fundar í Listasalnum í Kjarna og hefst hann kl. 17.
Fundurinn er haldinn í samræmi við lýðræðistefnu bæjarins en þar segir: Hver og ein nefnd leitist við að hafa opinn upplýsinga- og samráðsfund fyrir bæjarbúa einu sinni á ári.
Þema fundarins er heilsuefling og útivist í Mosfellsbæ og verða flutt þrjú stutt erindi þar um. Í kjölfarið gefst fundargestum kostur á að ræða þessi málefni og hvaðeina sem tengist umhverfismálum bæjarins. Hér verður gerð nánari grein fyrir viðfangsefni fundarins.

Heilsueflandi samfélag og útivist
Mosfellsbær skilgreinir sig sem heilsueflandi samfélag og er útivist mikilvægur þáttur í því samhengi. Bærinn er umlukinn fögru umhverfi með ótal tækifærum til útivistar og á fundinum mun Ólöf Sívert­sen frá Heilsuvin fjalla um heilsueflingu og útivist í sveitarfélaginu.

Skógrækt og útivist
Skógrækt hefur verið stunduð í landi Mosfellsbæjar um áratugaskeið eins og sjá má víða í sveitarfélaginu. Þetta starf hefur ekki síst verið borið uppi af Skógræktarfélagi Mosfellsbæjar, af mikilli eljusemi og dugnaði. Skógræktarsvæðin eru kjörin til útivistar og á fundinum mun fulltrúi félagsins fjalla um þau mál.

Gönguleiðir
Margar áhugaverðar gönguleiðir er að finna í landi Mosfellsbæjar, bæði meðfram ströndinni og um fjöll og dali. Á undanförnum árum hafa þessar leiðir verið merktar rækilega með stikum og skiltum; verkefnið er fjármagnað af Mosfellsbæ en Skátafélagið Mosverjar annast framkvæmd þess. Ævar Aðalsteinsson mun fjalla um gönguleiðaverkefnið á fundinum.
Þessar merktu gönguleiðir eru flestar í námunda við þéttbýlið en þess má geta að uppi á Mosfellsheiði er mikið af ómerktum göngu- og reiðleiðum. Undanfarin misseri hefur starfshópur á vegum bæjarins haft það verkefni með höndum að kortleggja þessar leiðir og skilgreina notkun þeirra. Hér er um viðamikið verkefni að ræða sem er enn í vinnslu en þess má geta að Mosfellsheiði er sameign nokkurra sveitarfélaga, þar á meðal Mosfellsbæjar.

Lokaorð
Sumarið er sá árstími þegar fólk hugar hvað mest og best að umhverfi sínu. Því er ekki úr vegi að minna á að fram til 5. maí verður sérstakt hreinsunarátak í bænum; að venju hefur sveitarfélagið sett upp gáma fyrir garðaúrgang en um staðsetningu þeirra má lesa nánar á heimasíðu Mosfellsbæjar.
Við hvetjum bæjarbúa til að fjölmenna á fundinn þann 28. apríl og fyrir hönd umhverfisnefndar óskum við öllum Mosfellingum gleðilegs sumars.

Bjarki Bjarnason, formaður.
Örn Jónasson, varaformaður.

„Nohh, nohh, það er aldeilis stæll á manni!“ sagði maðurinn við bifvélavirkjann þar sem sá síðarnefndi stóð í klefanum í sund­skónum.
Maður má bara þakka fyrir að þú mætir ekki bara hérna á nýpússuðum lakkskónum, sagði maðurinn við bifvélavirkjann og rak svo upp hæðnishlátur. Bifvélavirkinn starði vonleysislega á manninn sem stóð andspænis honum í sturtunni og hugsaði með sér: „Andskotans afskiptasemi alltaf hreint!“

Spígsporandi um klefann
„Já, þú hefur ekki trú á svona skóm,“ sagði bifvélavirkinn og dró andann djúpt. „Ef að þú vilt auka líkurnar að fá sveppsýkingu í fæturna eða í neglurnar þá eru sundklefarnir algjörlega málið. Ekki svo að skilja að klefarnir séu illa þrifnir heldur kemur þetta vegna þess að fólk er ekki í sundskóm!“ Hvorki þeir sem eru með sveppasýkingu né þeir sem eru í áhættuhópi fyrir að fá sveppasýkingar. Það þarf ekki nema að eitthvað smá rof komi á húðina eða ónæmiskerfið virki ekki alveg eins vel og það ætti að gera, þú spígsporandi á tánum hérna í klefanum og viti menn: Bamm! Þú ert kominn með sveppasýkingu.

Þetta kemur ekki fyrir mig
„En þú heldur kannski að þetta geti ekki komið fyrir þig? Að þú sért á einhverjum andskotans sérsamningi? En þar skjátlast þér gamli minn,“ sagði bifvélavirkinn og fann að nú var hann að komast á skrið. Og hélt svo áfram: „Svo nennir þú eflaust ekki heldur að þurrka þér vel á milli tánna, heldur strýkur kannski bara mestu bleytuna ofan af tánum, smellir þér í sokkana og svo í lokaða skóna. Það sem gerist er að sveppurinn mallar í skónum, því í hitanum og rakanum í skónum líður sveppnum svo vel. Sveppurinn nær svo yfirhöndinni, hann byrjar oft á milli tánna og svo færir hann sig kannski niður á tábergið og svo ef hann er í stuði fer hann kannski í neglurnar líka.“
„Já, er það virkilega,“ sagði maðurinn og var nú orðinn svolítið alvarlegri. „En hvernig veistu hvort þú sért með sveppasýkingu á fótunum?“ spurði maðurinn.

Ekki gera ekki neitt
„Mér skilst að húðin verði svona hvít og þurr. Hún reyndar getur líka orðið rauð og þrútin og svo klæjar mann í húðina. Neglurnar geta orðið þykkar og ljótar og oft koma litabreytingar fram í þeim. Það versta er að þetta er alveg bráðsmitandi.“
„Já, er það virkilega,“ sagði maðurinn hissa. „Og hvað ef mig grunar að ég sé með sveppasýkingu?“ spurði maðurinn og hugsaði hvort hann klæjaði nokkuð á milli tánna.
„Aðalatriðið er að gera eitthvað í þessu en annars er ég bifvélavirki og enginn andskotans sérfræðingur í þessu! Farðu bara í fótaaðgerð og þá færðu að vita allt!“
Ekki gera ekki neitt
Pantaðu þér tíma strax í dag

Jóna Björg Ólafsdóttir
Fótaaðgerðafræðingur
Líkami og sál – s. 566-6307

Segja má að líf okkar sé í raun samsett úr ótölulegum fjölda augnablika sem við getum kallað núið. Ef við erum ekki í núinu má segja að við séum ekki til staðar í lífinu, gleymum að njóta líðandi stundar.
Í hröðu samfélagi nútímans einkenna margskonar áreiti líf okkar flestra, við þurfum að takast á við alls kyns áskoranir, gegna mörgum hlutverkum og svo mætti lengi telja. Slíkt ástand getur kallað fram streitu hjá einstaklingum og samkvæmt Alþjóðaheilbrigðismálastofnuninni (WHO) þá er streita og andleg vanlíðan einn helsti heilsuvandi Vesturlandabúa um þessar mundir.

Hvað er núvitund?
Hugurinn hefur tilhneigingu til að fara með okkur á flakk um fortíð og framtíð auk þess sem hann er alltaf að meta, skilgreina, flokka og skipuleggja – bæði meðvitað en oftast ómeðvitað. Mörg okkar glíma einnig við sjálfsgagnrýni og neikvæðar hugsanir og mótast líðan okkar mjög af þessum þáttum. Á meðan líður lífið hjá án þess að við tökum eftir öllum þeim stóru sem smáu ævintýrum sem eru í boði bæði innra með okkur og allt um kring.

Núvitund (e. mindfulness) merkir í raun að vakna til meðvitundar um okkur sjálf og lífið á líðandi stundu, að hafa athyglina í núinu á opinn og virkan hátt. Núvitund þýðir að við erum með hugsunum okkar á meðvitaðan hátt, tökum eftir þeim án þess að dæma og festa okkur í þeim – lærum að velja hvert og hvernig við beinum athygli okkar. Á þann hátt fáum við tækifæri til að losna undan valdi hugans og skynja okkur sjálf og lífið í vinsemd og sátt.

Ávinningurinn
Fjöldamargar rannsóknir hafa verið gerðar á núvitund síðustu ár og er niðurstaðan sú að þeir sem stunda núvitundaræfingar hafa betri skilning á tilfinningum sínum, eru hamingjusamari, eiga auðveldara með að setja sig í spor annarra, búa yfir meiri persónulegri hæfni, hafa meiri sjálfsvirðingu og eru sáttari í eigin skinni.
Núvitund styrkir einnig ónæmiskerfið, getur dregið úr þrálátum verkjum, vinnur gegn þunglyndi og kvíða og getur jafnvel haft jákvæð áhrif á t.d. of háan blóðþrýsting og hjartavandamál.

Samkvæmt rannsóknum er núvitund einfaldlega ein öflugasta leiðin sem við þekkjum í dag til að losna undan streitu og efla heilbrigði, vellíðan, sátt og jákvætt hugarfar.

Ólöf Kristín Sívertsen, lýðheilsufræðingur
og verkefnisstjóri Heilsueflandi
samfélags í Mosfellsbæ

Greinin birtist í Mosfellingi 10. mars 2016

Helstu fregnir af Félagi aldraðra í Mosfellsbæ og nágrenni eru þær að nýverið var haldinn fjölmennur aðalfundur, hinn 15. febrúar 2016, í Hlégarði. Fyrri stjórn var samhljóða endurkjörin. Um þetta má sjá nánar á vefsíðu félagsins www.famos.is.

Lög félagsins endurskoðuð
Lög félagsins voru endurskoðuð fyrir aðalfundinn, eftir að stjórn FaMos og sérskipuð laganefnd höfðu komið fram með ýmsar tillögur um lagfæringar á lögum félagsins. Nokkur umræða varð um lagabreytingarnar en að öðru leyti gekk fundurinn vel og óhikað fyrir sig, undir góðri fundarstjórn Magnúsar Sigsteinssonar. Eftir fyrsta stjórnarfund nýkjörinnar stjórnar varð skipting verka innan stjórnarinnar sú sama og verið hafði 2015. Mikill og góður rómur var gerður að glæsilegu örþorrablótsmeðlæti með kaffinu sem var í boði félagsins. Kaffinefnd félagsins undir forystu Elísabetar Kristjánsdóttur, matreiðslukennara, fékk mikið og verðskuldað lófaklapp fyrir sinn þátt í vel heppnuðum aðalfundi.

Skemmtiatriði
Meðan aðalfundargestir gæddu sér á þorrablótsréttum kaffinefndar, kom Pétur Bjarnason, fyrrum skólastjóri í Varmárskóla og síðar framkvæmdastjóri SÍBS, mjög á óvart, með skemmtilegum og fróðlegum fyrirlestri um hið einstaka og skemmtilega hljóðfæri „harmónikkuna“. Hann mætti með einar fjórar mismunandi stórar harmónikkur úr safni sínu og gaf fundargestum hljóðdæmi frá hverri um sig ásamt því að fá um 80 fundargesti fundarins til að taka hressilega undir með sér. Einstaklega skemmtileg stemning og almenn ánægja með framlag Péturs.

Sérkennileg staða
Á fyrsta stjórnarfundi nýkjörinnar stjórnar FaMos, gerði formaður stjórnar FaMos, Harald S. Holsvik, grein fyrir þeirri staðreynd að af 1362 einstaklingum, fæddum fyrir 31.12. 1956, þ.e. 60 ára og eldri, eru ekki nema um 34% í félaginu. En 2/3 hlutar íbúa í póstnúmerunum 270. 271 og 276, virðast ekki hafa gert sér grein fyrir ágæti þess að gerast félagar. En ekkert er auðveldara, t.d. með því að koma við hjá Félagsstarfi eldri borgara að Eirhömrum. Þar liggja frammi umsóknareyðublöð um félagsaðild ásamt því að unnt er að afrita slík umsóknareyðublöð af vefsíðu félagsins www.famos.is og senda upplýsingarnar á netfangið famos@famos.is ef fólk hefur tölvu til umráða. Svo einfalt er það. En hverjir eru þá kostir þess að vera skráður félagi í FaMos? Það er góð spurning.

Helstu viðfangsefni FaMos
1. Félagið stendur fyrir ýmis konar menningar- og skemmtistarfsemi um vetrarmánuðina ásamt því að ljúka vetrarstarfinu með dagsferð sem kallast „Menningarkvöld um miðjan dag“. Undanfarin misseri hafa verið sögunámskeið á vegum nefndarinnar og þá gjarnan farið í eins eða tveggja daga ferð um viðeigandi söguslóðir. Á vegum félagsins er einnig starfandi „Leshringur“ sem tekur ýmsar bókmenntir fyrir og greinir inntak þeirra „niður í kjölinn“, stundum í sameiningu með höfundum sem koma stundum og lesa upp með hópnum í góðri samvinnu með starfsfólki Bókasafnsins í Mosfellsbæ.
2. Félagið samræmir íþróttaiðkun félagsmanna. Þar má nefna; vatnsleikfimi, boccia, ringó og dansleikfimi. Mismunandi oft í viku hverri um vetrartímann. Ýmis íþróttamót eru haldin allt árið og hefur lið FaMos oft unnið til verðlauna undanfarin ár.
3. Einnig má nefna; Línudans, gönguhóp, golf-pútt, olíumálun, gleriðju, hannyrðir, módelsmíði, útskurð, spænskunám og fl. ótalið. Allt í góðu samstarfi við Félagsstarfið að Eirhömrum. Þeir sem hafa aðgang að tölvu, fá, um vetrartímann, vikulegar tilkynningar um það sem efst er á baugi í félagsstarfinu.
4. Á vegum félagsins starfar einnig sérstök Ferðanefnd sem skipuleggur og samræmir skemmtilegar ferðir á vegum félagsins innanlands og erlendis eftir atvikum.
5. Félagsskírteini FaMos, gildir sem afsláttarkort um land allt, því félagið er aðili að Landssambandi eldri bogara, LEB en með félagsskírteini FaMos, virkjar félagsmaður aðild að ýmsum afsláttarsamningum og sérstakri afsláttarbók sem gefin er út af LEB og er einnig tiltæk á Internetinu, fyrir þá sem hafa tölvu við höndina. Algengur afsláttur af vöru og þjónustu getur verið á bilinu 10-15% eftir viðkomandi viðskiptum. Fyrirtækin í Mosfellsbæ hafa stutt og styrkt félagsstarfið vel og dyggilega og verið góður bakhjarl við félagið og starfsemi þess. Það er því ósk mín að allir félagar og þeirra fjölskyldur, þiggi þjónustu hér í bænum ef hún er til staðar, áður en leitað er annað.
6. Fyrir þá sem hafa unun af að syngja, þá er starfandi kór eldri borgara, Vorboðarnir, formaður er Úlfhildur Geirsdóttir. Í Vorboðunum eru um 60 manns, veitt er kennsla í raddbeitingu ásamt því er um mjög öflugt félagsstarf að ræða og skemmtilegir viðburðir, stundum oft í mánuði. Bara fjör.
Verið öll velkomin í hópinn til okkar, www.famos.is og famos@famos.is

Harald S. Holsvik, formaður FaMos

Greinin birtist í Mosfellingi 10. mars 2016

Það er svo ótal margt sem við getum gert til að efla vellíðan okkar og leggja rækt við okkur sjálf.
Það er löngu vísindalega sannað að holl, góð og fjölbreytt næring hefur jákvæð áhrif á líkamlega og andlega líðan okkar og hið sama gildir um hreyfingu. Ef okkur líður vel andlega og líkamlega þá eru yfir­gnæfandi líkur á því að félagslegi þátturinn fylgi með sem einkennist af góðum og kærleiksríkum samskiptum við aðra.

Kærleiksvikan 14.-21. febrúar
Kærleiksvikan hefur verið við lýði í Mosfellsbæ allt frá árinu 2010 en markmið hennar er að virkja kærleikann innra með okkur, bæði í garð okkar sjálfra sem og annarra. Margt skemmtilegt er á dagskránni og má þar m.a. nefna kærleiksrík skilaboð sem nemendur grunnskólanna setja á innkaupakerrur í Krónunni og Bónus og Heilunarguðþjónustu sem verður í Lágafellskirkju kl. 20:00 í kvöld.
Kærleikssetrið býður m.a. upp á létt herðanudd, talna- og stjörnuspeki og margt fleira auk þess sem hægt verður að kaupa 15 mínútna spá á vægu verði í Spákaffi í Kaffihúsinu Álafossi á sunnudag. Nánari dagskrá má finna á síðunni „Kærleiksvika í Mosfellsbæ“ á Facebook.

Lífshlaupið
Þessa dagana er Lífshlaupið, heilsu- og hvatningarverkefni ÍSÍ, í algleymingi. Mörg lið úr Mosfellsbæ taka að sjálfsögðu þátt eins og frá bæjarskrifstofunni, Varmárskóla og Lágafellsskóla. Í Lífshlaupinu eru landsmenn hvattir til að huga að daglegri hreyfingu sinni og hvernig megi auka hana.
Getum við t.d. gengið/hjólað á milli staða í stað þess að nýta bílinn? Getur við gengið stigann í staðinn fyrir lyftuna? Höldum við á börnunum okkar eða leyfum við þeim að ganga/hlaupa? Við getum öll bætt við hreyfingu í okkar daglega líf og gott er að miða við ráðleggingar Embættis landlæknis en þar er börnum/unglingum ráðlagt að hreyfa sig í minnst 60 mínútur á dag og fullorðnum í minnst 30 mínútur. Nánari ráðleggingar um hreyfingu má nálgast á www.landlaeknir.is

Hlúðu að því sem þér þykir vænt um
Rannsóknir hafa sýnt að þeim sem gengur vel í lífinu og líður vel eiga það sameiginlegt að hlúa að því sem þeim þykir vænt um. Með því að koma vel fram við og gleðja aðra þá stuðlum við að vellíðan þeirra auk okkar eigin. Settu þér það markmið að gleðja og/eða tjá einhverjum væntumþykju þína áður en þú ferð að sofa í kvöld og hlúðu þannig að þeim sem þér þykir vænt um og skipta þig máli í lífinu.

Ólöf Kristín Sívertsen, lýðheilsufræðingur
og verkefnisstjóri Heilsueflandi
samfélags í Mosfellsbæ

Heilsa er líkamleg, andleg og félagsleg líðan og gerir einstaklingnum kleift að lifa innihaldsríku lífi (skilgreining WHO). Þriðji áhersluþáttur verkefnisins Heilsueflandi samfélag er geðrækt, líðan og félagslíf. Fyrsta geðorðið hvetur okkur til þess að hugsa jákvætt. Það er auðvelt að festast í viðjum vanans og rannsóknir hafa sýnt fram á að það er algengara að neikvæðar hugsanir brjótist fram í amstri dagsins. Við þurfum að þjálfa heilann til að hugsa jákvætt.
Það að vera jákvæður er ekki aðeins að brosa, vera glaður og ánægður, heldur snýst það um að meta umhverfi sitt á jákvæðan og uppbyggilegan hátt. Þannig getum við betur haldið einbeitingu, metið aðstæður og tekið skynsamar ákvarðanir.

Neikvæðar hugsanir eins og ótti taka völdin þegar við mætum ljóni og hlaupum í burtu. Flestir hugsa aðeins um það eitt að forða sér og hlaupa en gleyma skynsemi og að meta aðstæður. Það sama á við þegar við hugsum neikvæðar hugsanir um okkur sjálf, við sjáum ekki lausnir fyrir áhyggjum og neikvæðni. Álag og stress margfaldast. Heilinn í raun lokar á umhverfi sitt og einbeitir sér að því neikvæða sem er t.d.: „Ég náði ekki að klára öll verkefnin í dag, ég fór ekki í heimsókn til mömmu eða…“
Á meðan náum við ekki að einbeita okkur að öðrum valkostum, þegar við erum glöð, jákvæð og ánægð. Við tökum oft ekki eftir því þegar við getum verið hamingjusöm, aðeins þegar við erum það ekki. Við verðum að staldra við í amstri dagsins og horfa í kringum okkur og læra að meta allt það sem er í kringum okkur. Ekki bara að vera að hugsa um morgundaginn, eða gærdaginn, hugsum um daginn í dag.
Temjum okkur að sjá það jákvæða, þegar neikvæðar hugsanir heltaka okkur. Í öllum tilfellum er hægt að sjá það jákvæða – við þurfum bara að þjálfa og rækta heilann til þess.
Er glasið þitt hálffullt eða hálftómt?

Sylgja Dögg Sigurjónsdóttir, 
fagstjori EFLU.

Heilsuhornið
Mosfellingur 28. janúar 2016

Varanleg förðun er byltingarkennd meðferð sem felst í innsetningu lita undir yfirborð húðar til þess að skerpa línur andlits, og undirstrika náttúrulega fegurð þína. Meðferðin hefur verið notuð af mörgum þekktustu módelum, leikurum og skemmtikröftum heims til að bæta útlit þeirra. Fagurfræðilegt gildi, tímasparnaður og minni peningaeyðsla er ástæða þess að varanleg förðun er kölluð „förðun framtíðarinnar“.
Ímyndaðu þér að horfa í spegilinn á hverjum degi og sjá fullkomnar augabrúnir, skarpa augnlínu og fallegar varir. Þú værir fersk og örugg með sjálfa þig og ávallt tilbúin að fara hvert sem er. Hægt er að ná öllu þessu fram og meira til með heimsþekktum vörum og tækjabúnaði frá Nouveau Contour. Nouveau Contour er eitt þekktasta og mest leiðandi fyrirtækið í heiminum í dag á þessu sviði og er ég mjög stolt af því að geta boðið upp á meðferðir og vörur því tengdu.
Varanleg förðun felur í sér ísetningu lita á augnlínu, augabrúnir og varir, og endist í u.þ.b. 1-3 ár. Litirnir frá Nouveau Contour eru 100% náttúrulegir. Þeir innihalda járnoxíð sem gerir það að verkum að mjög ólíklegt er að þeir valdi ofnæmi.
Margar konur eru með gisnar augnabrúnir og ljósa augna­umgjörð, og eru þreyttar á því að þurfa mjög ört að lita augnhár og augabrúnir. Aðrar konur hafa lítinn tíma til að mála sig, og svo eru enn aðrar sem hafa þurft að undirgangast lyfjameðferð vegna ýmissa heilsufarskvilla og hafa þess vegna misst augabrúnir og augnhár, og er varanleg förðun því frábær kostur. Ávinningurinn af varanlegri förðun er náttúrulegt, svipmeira útlit sem undirstrikar fegurð þína.
Allar nánari upplýsingar má nálgast á www.likamiogsal.is

Fanney Dögg Ólafsdóttir
master í varanlegri förðun frá Nouveau Contour