Við lifum góðæristíma.
Góðærinu er þó misskipt og lítt fer fyrir því að lagt sé í félagsleg verkefni þegar svo vel árar.
Okkur er þess í stað tjáð að fram undan sé svo bjart að við eigum að fá „lækkun“ en ekki það sem raunin er … „afsláttur“ af hækkun.
Hér er viðtekna módelið að ef ég boða 20% hækkun en hækka svo „bara“ um 10% hafi ég lækkað eitthvað um 10%, jafnvel 50%. Til að koma þessu á skiljanlegt form getur verið gott að fjarlægja „%“ og setja í staðin orðið „hnefahögg“.
Mosfellsbær hefur undanfarin misseri grætt vel á að geta selt lóðir meðan að þéttingastefna Reykjavíkurborgar hefur keyrt lóðaverð á SV-horninu uppúr öllu valdi. Uppkeyrt lóðaverð og uppkeyrt íbúðaverð kemur með uppkeyrð fasteignagjöld hvers grunnur skapar nú rými fyrir „tilboð, afslátt, lækkun“.
Hér í bæ er verið að taka fullan þátt í því sem hefur hækkað húsnæði hvað mest á landsvísu og haldið uppi verðbólgu á tímum sem hefðu átt að vera tímar eðlilegrar verðhjöðnunar. Skortstefna lóða hefur gríðarleg áhrif enda hefur verð lóða farið á einum áratug úr því að vera 5-6% byggingakostnaðar og upp í 25%. Fjármögnunarkostnaður lóða er hærri en fasteigna og eru áhrifin á verðmyndun íbúða því enn meiri. N.B. að svo virðist vera að bæta eigi við innviðagjaldi til að hækka lóðaverð verulega í viðbót og koma lóðaverðinu í 30-33% byggingakostnaðar og þar með 35-40% endanlegs verðs.
Raunin er að við gjaldendur og nýir Mosfellingar hefðu grætt mest á því að lóðir/íbúðir hefðu verið ódýrari og hækkun íbúðaverðs sem og fasteignagjalda þá minni, verðbólga minni, kaupmáttur meiri.
Ekki verður séð að stefnan hafi breyst m.v. að þær 105 íbúðir sem rísa munu við Háholt/Bjarkarholt verða ekki á vegum félags án hagnaðarsjónarmiða líkt og Bjargs íbúðafélags heldur þvert í hina áttina enda verða íbúðirnar á vegum eins þess aðila sem borið hefur uppi verðbólgu síðastliðinna ára með gegndarlausum hækkunum á leiguverði.
Það að „fleyta rjómann“ með slíkum hætti er mjög hættulegt þar sem slíkt kerfi gerir ekki ráð fyrir stöðnun, hvað þá niðursveiflu en þegar að slíkar koma þarf oftar en ekki að grípa niðurskurðarhnífinn og beita á stærsta kostnaðarliðinn … skólana.
Endanlega eru sveitarfélögin á villigötum. Þau hafa tekið við verkefnum frá ríkinu án nauðsynlegs fjármagns eða að ríkið hefur breytt eða aukið kröfurnar eftir á svo að sveitin þarf nú að leita auka fjármögnunar. Útsvar er á flestum stöðum í botni og þá aðeins eitt til ráða … eignasala.
Mest fæst fyrir það sem takmarkað framboð er af og hafa sveitarfélögin því mörg hver valdið lóðaskorti, keyrt upp verðið en um leið íbúðaverð og verðbólgu. Nákvæmlega þetta er það sem veldur því að hér vex nú úr grasi kynslóð sem verður bráð gamma enda munu þau aldrei geta fjármagnað eigin íbúðakaup enda hækkar verðið hraðar og meira en sparnaðurinn.

Óskar Guðmundsson
Greinarhöfundur er formaður
Framsóknarfélags Mosfellsbæjar

Undirbúningur sjálfstæðismanna til sveitarstjórnarkosninga í vor er nú í fullum gangi. Margir einstaklingar með ólíka sýn á bæjarmálum gefa kost á sér sem mér finnst mjög jákvætt því það leiðir til fjölbreyttra hugmynda um hvernig hægt sé að gera Mosfellsbæ betri bæ til að búa í, þótt gott sé að búa þar í dag og óvíða betra.

Ég hef alltaf haft áhuga á bæjarmálum en aldrei fundist rétti tíminn eða þorað að hella mér í framboð því ég hélt að ég hefði ekki nægjanlega reynslu til að stíga skrefið til fulls sem er svo oft með okkur konur. Við erum oft sjálfar duglegastar að draga úr okkur kjarkinn og höldum að við séum ekki nægilega hæfar.
Við þurfum ekki að kunna allt eða hafa þekkingu á öllu til að taka áskorunum heldur lærum við af öðrum reynsluboltum sem hafa starfað á þessum vettvangi. Mér finnst að við konur ættum að vera duglegri að ögra okkur sjálfum og sýna hver annarri meiri stuðning í daglegu lífi hvort sem það er innan veggja heimilisins, í vinnu eða komandi kosningum.

Við getum gert bæinn okkar enn betri, bæ sem fólk vill búa í til frambúðar og það er svo sannarlega gott að búa í Mosfellsbæ. Hér er frábært að ala upp börnin sín og einnig fyrir börn að alast upp fullyrðir dreifbýlistúttan ég, Kristín Ýr, sem naut þess að alast upp í litlu þorpi út á landi.
Mér finnst Mosfellsbær einmitt vera eins og lítill bær út á landi, stutt er í náttúruna, frábærar gönguleiðir, frábært íþróttastarf fyrir alla og nánd við nágrannana.
Nú hvet ég allar konur að velta þessum hlutum fyrir sér, skrá sig í flokkinn og flykkjast á kjörstað og sýna í verki að við konur getum líka gert gagn þó svo að ég sé ekki að gera lítið úr karlmönnunum sem starfa í bæjarmálunum hér.

Það er mín skoðun að konur ættu að fá meira vægi í stjórnmálum almennt. Ég tók ákvörðun fyrir þremur árum að ég ætla aldrei að hallmæla öðrum konum, ég ætla að ögra sjálfri mér, hafa þor til að taka ákvarðanir, þor til framkvæmda, kynnast nýju fólki og taka fólki eins og það er og mynda mér skoðanir um fólk þegar ég hef kynnst því en halda samt sem áður áfram að vera ég sjálf.
Ég er nefnilega mamma, eiginkona, vinkona og mig langar að geta gert gagn í bæjarmálum hér í Mosfellsbæ.

Kristín Ýr Pálmarsdóttir.
Sækist eftir 5.-9. sæti í prófkjöri
Sjálfstæðisflokksins þann 10. febrúar.

Ég hef ákveðið að gefa kost á mér í prófkjöri Sjálfstæðismanna sem fram fer 10. febrúar næstkomandi. Í dag er ég varabæjarfulltrúi og varaformaður þróunar- og ferðamálanefndar sem hefur verið frábær reynsla.
Fyrir 4 árum var ég ekki viss um hvort stjórnmál væru fyrir mig, en eftir að hafa tekið þátt hefur áhuginn vaxið og því ákvað ég að halda áfram. Margir spyrja fyrir hvað ég standi og hverju ég ætla að vinna að í bæjarstjórn. Þar sem ég er tuttugu og þriggja ára myndu einhverjir segja að ég væri fulltrúi unga fólksins í hópnum, en án gríns þá er fátt sem ég hef ekki áhuga á.
Ég er stoltur Mosfellingur og hef alveg ólæknandi áhuga á því sem er að gerast í bænum mínum. Það er ánægjulegt hvað Mosfellingar eru ánægðir með bæinn sinn eins og Gallup kannanir hafa sýnt. Það vil ég að verði áfram. Mosfellsbær er bærinn minn og sá staður sem ég vil búa með minni fjölskyldu og veit ég að margir jafnaldrar mínir eru mér sammála.
Ég hvet Mosfellinga til að taka þátt í prófkjörinu sem fram fer 10. febrúar og óska eftir stuðningi í 4.-6. sæti.

Sturla Sær Erlendsson

Kæru Mosfellingar!

Við áramót er okkur tamt að taka stöðuna, leggja mat á það sem gerðist á liðnu ári um leið og við horfum fram á veginn. Höfum við gengið til góðs, götuna fram eftir veg og hvernig blasir framtíðin við okkur?
Árið 2017 var gott ár fyrir marga. Mikil hagsæld hefur ríkt í okkar góða landi undanfarin ár sem skilað hefur sér til þjóðarinnar með meiri velmegun og auknum kaupmætti. Það mátti lesa í fjölmiðli um daginn að yfir stæði fordæmalaust góðæri og laun hefðu aldrei verið hærri. Þótt líklegt megi teljast að við séum nú á toppi hagsveiflunnar, er útlitið til næstu ára samt sem áður bjart. Áfram er spáð vexti í hagkerfinu, fjölgun ferðamanna, góðri stöðu fiskistofna og tryggri afkomu þjóðarbúsins.
Töluvert umrót var í landsmálapólitíkinni á sl. ári. Ríkisstjórnin sprakk eftir stutta setu og kosningar fóru fram. Niðurstaðan leiddi til myndunar nýrrar ríkisstjórnar með mjög breiða pólitíska skírskotun þar sem Sjálfstæðisflokkur og Vinstri græn mynduðu ríkisstjórn með þátttöku Framsóknarflokksins. Í Mosfellsbæ hafa Sjálfstæðisflokkur og Vinstri græn myndað meirihluta í bæjarstjórn frá árinu 2006 þrátt fyrir að annar þessara flokka hafi lengst af haft nægan styrk í bæjarstjórn til að vera einn í meirihluta. Þetta samstarf hægri og vinstri flokks hefur gefist afar vel í Mosfellsbæ enda hefur ríkt traust og trúnaður milli aðila. Nú má segja að „Mosfellsbæjarmódelið“ hafi verið tekið upp í landsmálunum og ég hef þá trú að þessi nýja ríkisstjórn eigi eftir að reynast þjóðinni vel og geti haldið áfram þeim góðu verkum sem hafa verið í gangi.
Fyrir Mosfellsbæ var árið gott og ánægja ríkti meðal íbúanna með bæinn sinn samkvæmt könnunum. Mig langar sérstaklega að nefna eitt verkefni sem efnt var til á árinu en það er lýðræðisverkefnið „Okkar Mosó“. Það verkefni tókst einstaklega vel og var þátttaka íbúa mikil sem leiddi til margra góðra verka sem íbúar óskuðu eftir að hrint yrði í framkvæmd. Ljóst er að framhald verður á verkefnum sem þessum.

Mikil íbúafjölgun í Mosfellsbæ
Mjög mikil íbúafjölgun varð í Mosfellsbæ eða um 8% á árinu 2017. Segja má að hér sé um fordæmalausa fjölgun að ræða. Mestu munar um nýju hverfin okkar Leirvogstungu og Helgafellshverfi og er fjölbýlishluti þess hverfis nú að verða fullbyggður. Töluvert er þó eftir af sérbýlishluta Helgafellshverfis en fullbyggt munu um 3.000 íbúar búa þar. Þessu til viðbótar eru að fara af stað verkefni í miðbænum sem felur í sér um 250 nýjar íbúðir við Bjarkarholt, Háholt og Þverholt ásamt verslunarhúsnæði. Það mun setja nýjan svip á miðbæinn okkar og gera hann mun samkeppnishæfari um verslun, þjónustu og menningu ýmis konar.
Svona mikil uppbygging kallar á fjárfestingar í innviðum. Helgafellsskóli er nú í byggingu og er gert ráð fyrir að fyrsti áfangi hans verði tekinn í notkun í upphafi árs 2019. Önnur stór framkvæmd sem ráðist verður í á árinu 2018 er bygging knatthúss að Varmá. Húsið verður byggt þar sem eldri gervigrasvöllur er nú og verður um 3.800 fm að stærð. Auk knattspyrnuvallar verður í húsinu hlaupabraut ásamt göngubraut, áhorfendaaðstöðu og snyrtiaðstöðu. Húsið verður án alls efa bylting fyrir íþróttafólk, sérstaklega knattspyrnu, í Mosfellsbæ. Með húsinu verður til góð æfingaaðstaða allan ársins hring.
Áfram verður haldið með atvinnuuppbyggingu í bænum. Lóðum verður fjölgað í Desjamýri og uppbygging þar komin vel á veg. Gerður hefur verið samningur um uppbyggingu á lóðum við Sunnukrika sem er hluti af miðsvæði bæjarins. Þar hefur þremur af fjórum lóðum á svæðinu verið úthlutað þar sem reisa á skrifstofu- og þjónustuhúsnæði, aðstöðu fyrir ferðaþjónustuaðila og í skoðun er að þar verði einnig 4-5 stjörnu hótel með veitingastað. Uppbygging á Leirvogstungumelum er hafin en þar hefur landeigandi selt lóðir undir atvinnustarfssemi. Þetta eru allt saman góðar fréttir fyrir Mosfellsbæ sem mun auka atvinnutækifæri í bænum sem og tekjur bæjarsjóðs sem hægt er að nota til að bæta enn frekar þjónustu við bæjarbúa.

Álögur lækka og þjónusta efld
Samkvæmt fjárhagsáætlun Mosfellsbæjar fyrir árið 2018 munu skattar og gjöld lækka jafnframt því að þjónusta við íbúana verður efld. Þrátt fyrir þetta er gert ráð fyrir rúmlega 300 mkr. afgangi af rekstri bæjarsjóðs á árinu. Aukin hagsæld, fjölgun íbúa ásamt traustum rekstri gerir það að verkum að svona er hægt að standa að málum hjá Mosfellsbæ.
Meðal þess sem fjárhagsáætlunin inniheldur má nefna:
Þjónusta við börn og unglinga aukin. Áfram verður unnið að því að auka þjónustu við 12-18 mánaða börn og plássum fjölgað um 20 á þeim ungbarnadeildum sem stofnaðar hafa verið. Frístundaávísun mun hækka um 54% og fara í 50 þúsund kr. og gjaldskrár leikskóla miðast við 13 mánaða aldur í stað 18 mánaða. Jafnframt var ákveðið að almennt gjald í leikskóla lækki um 5% frá áramótum. Þá verður unnið að verkefnum til að skapa enn betri aðstöðu í leik- og grunnskólum m.a. með því að efla tölvukost og aðrar umbætur með verulegum fjármunum á árinu 2018.

Álögur á einstaklinga og fyrirtæki lækka. Álagningarhlutföll fasteignaskatts, fráveitu- og vatnsgjalds lækka um 11% og lækkar kostnaður íbúa og af fasteignum sem því nemur auk þess sem lækkun fráveitu- og vatnsgjalds hefur áhrif til lækkunar fyrir fyrirtæki í bænum. Þá verða ekki almennar hækkanir á gjaldskrám fyrir þá þjónustu sem bærinn veitir og lækka gjaldskrár því að raungildi milli ára þriðja árið í röð. Framlög til afsláttar á fasteignagjöldum til tekjulægri eldri borgara hækka um 50% milli ára. Loks mun verð á heitu vatni lækka um 5% þann 1. janúar 2018.
Með þessu er tryggt að allir muni með einhverjum hætti njóta góðs af bættu rekstrarumhverfi sveitarfélagsins.
Í vor verður kosið til sveitarstjórna og þá munu landsmenn ganga að kjörborðinu og kjósa fulltrúa í bæjarstjórnir. Ég vænti þess að við Mosfellingar munum sýna lýðræðisvitund okkar í verki og flykkjast á kjörstað síðasta laugardag í maí.
Mosfellsbær fagnaði 30 ára kaupstaðarafmæli þann 9. ágúst sl. Haldið var veglega upp á afmælið og komu m.a. forsetahjónin í vel heppnaða opinbera heimsókn í bæinn okkar. Hátíðarhöldin enduðu síðan með glæsilegri bæjarhátíð „Í túninu heima“ síðustu helgina í ágúst.

Framtíðin er björt í Mosfellsbæ og með gildin okkar góðu VIRÐINGU – JÁKVÆÐNI – FRAMSÆKNI og UMHYGGJU að leiðarljósi eru okkur allir vegir færir. Ég vil nota tækifærið og þakka ykkur öllum fyrir gott samstarf, samskipti, vináttu og stuðning á árinu 2017 og megi árið 2018 verða okkur gæfuríkt og gleðilegt.

Haraldur Sverrisson,
bæjarstjóri

Þegar líður að kosningum verður eitt aðal umræðuefni kaffistofa og annarra starfsmannasvæða hin alræmda forgangsröðun.
Almennt er talið mikilvægast að menntun, tómstundir og laun gangi fyrir en nú virðist þó svo vera að Mosfellsbæ sé mikilvægast að taka þátt í samgönguverkefni sem enginn getur með neinni vissu sagt fyrir hvað muni kosta. Þetta er svokölluð Borgar-lína sem margir fremur kalla Dag(s)drauma.
Falleg lausreimuð plön ganga út á 1,1 til 1,15 milljarða á km og þannig 63 til 70 ma. Þrátt fyrir það kemur fram í skýrslu Reykjavíkurborgar og Samtaka sveitarfélaga á höfuðborgarsvæðinu (SSH) „Borgarlína, hlutverk, hvað, hvar hvernig“ að fyrstu 18 km muni kosta 30-65 ma. (bls. 30 í skýrslunni). Hinir 39 km hljóta þá að vera nánast fríir, jafnvel borga með sér.
Raunhæfara væri að taka meðaltal af útgildum fyrstu 18 km og ætla þá að hver km kosti 2,64 ma. og 57 km verkefnið þá um 150,4 ma.
Þar með er þó ekki öll sagan sögð.
„Planið“ gengur nefnilega út á að hækka notkun almenningssamgangna úr 4% í 12% auk þess að minnka bílaumferð um 75>58%. Slíkt er vart raunhæft m.v. að notkun almenningssamgangna hefur aðeins einu sinni skriðið yfir 4% og það var á fyrstu mánuðunum eftir Hrun sem notkunin slefaði í 5%.
Hvert 1% sem upp á 12% notkun vantar kostar um hálfan milljarð á ári í „töpuð fargjöld“ og þar af Mosfellsbæ allt að 20 milljónir á ári á hvert 1% sem geta verið allt að 6.
Til 2040, áætlaðra verkloka, myndi slíkt teljast til 66 milljarða á gengi dagsins í dag hvar alls gætu fallið á Mosfellsbæ 2,7 milljarðar.
150 milljarða framkvæmd, 25 ma. frá ríkinu, 66 milljarða reikningsskekkja, 4,1% hlutur Mosfellsbæjar (hlutfall af rekstri Strætó).
125 + 66 = 191 x 0,041 = 7,83 milljarðar.
Það allra skrýtnasta er þó ekki nefnt. Forsendur Borgarlínu eru nefnilega að horfið sé frá nokkrum framkvæmdum mislægra gatnamóta. Þar m.a. er horfið frá mislægum gatnamótum Vesturlandsvegar og Korpúlfsstaðabrautar. Nákvæmlega þau gatnamót eru ein af forsendunum fyrir því að Mosfellsbær geti tengst Borgarlínu beint.
Einu gleyma allir aðilar. Það er stefna Reykjavíkurborgar að eyðileggja flugvöllinn í Vatnsmýri. Þarf þá Borgarlína ekki að ná a.m.k. í vallarstæði nýrra plana í Hvassahrauni? Ef svo er hækkar kostnaðurinn um 10% hið minnsta.
Hluti Mosfellsbæjar þá 8,6 milljarðar. 8 þúsund og sex hundruð milljónir. Um 850 þúsund á hvern einstakling í bænum. 3,44 milljónir á vísitölufjölskylduna.
Helmingur fjárútláta er 2018-2022 eða allt að 4,3 milljarðar. Slíkt er um 20% ætlaðra útsvars- og fasteignaskatttekna kjörtímabilið 2018-2022. Að láni á 5% vöxtum er afborgunin 215 milljónir á ári.
Það er því til lítils að ætla að prumpa út milljónum í kosningaloforð 2018 um „lækkanir“ ef að skuldir bæjarins hækka um meira um meira en sem þeim nemur vegna dag(s)draumaverkefna.

Óskar Guðmundsson
Greinarhöfundur er formaður Framsóknarfélags Mosfellsbæjar.

Nú þegar árið 2018 er gengið í garð er verið að brýna fyrir öllum að minnka plastnotkun inn á heimilum.
Minn draumur er sá að Mosfellsbær fari alla leið í flokkun á sorpi því þetta er jú það sem koma skal og ekki mun umfang sorps minnka miðað við að íbúum bæjarins fjölgar, sem og íbúum landsins alls.

Kröfur hafa verið að aukast um flokkun almennt og þurfum við að gera enn betur í þessum málum, við gætum byrjað að flokka allt sorp, plast og allan lífrænan úrgang, einnig allt gler ásamt öðru endurvinnanlegu sorpi. Við ættum að taka til fyrirmyndar önnur bæjarfélög sem hafa stigið þetta skref til fulls og kynna okkur hvernig þau haga flokkuninni og fengið upplýsingar um hverjir séu helstu kostirnir við flokkun. Það þarf ekki alltaf að finna upp hjólið, nýtum okkur frekar reynslu og þekkingu í þessum málum hjá öðrum sveitarfélögum.

Mosfellsbær er nú þegar byrjaður að huga að aukinni sorpflokkun með því að hafa tvær sorptunnur við hvert hús, gráa fyrir almennt sorp og bláa fyrir pappírsúrgang svo sem tímarit, fernur, eggjabakka og bylgjupappa. Grenndargámar eru á nokkrum stöðum hér í Mosfellsbæ sem hægt er að nýta. Ég hvet svo alla hér í Mosfellsbæ að flokka.

Kristín Ýr Pálmarsdóttir.
Sækist eftir 5.-9. sæti í prófkjöri
Sjálfstæðisflokksins þann 10. febrúar.

Í lok nóvember síðastliðins var samþykkt fjárhagsáætlun Mosfellsbæjar 2018-2021.
Við lestur og greiningu hennar kemur í ljós að fjárhagsstaða bæjarins hefur styrkst verulega á undanförnum árum, skuldir hafa lækkað og tekjur aukast.
Það er mjög ánægjuleg staðreynd og ljóst að meirihluti bæjarstjórnar, undir stjórn Sjálfstæðisflokksins, og starfsmenn bæjarins hafa verið og eru að vinna gott starf í þeim fjölmörgu verkefnum og málaflokkum sem tilheyra rekstri á bæjarfélagi eins og Mosfellsbæ.
Sökum batnandi fjárhagsstöðu er hægt að auka framlög til ýmissa mikilvægra verkefna bæjarins á næsta ári auk þess að létta skattaálögum á bæjarbúa og er það vel.

Ánægja meðal Mosfellinga
Í Mosfellsbæ er gott að búa og sýna kannanir að íbúar Mosfellsbæjar eru ánægðastir með bæinn sinn þegar mælt er viðhorf íbúa til þjónustu í 19 stærstu sveitarfélögum landsins.
Það eru væntanlega margir þættir sem eiga þátt í þessari ánægju íbúa Mosfellsbæjar og mikilvægt fyrir bæjaryfirvöld að halda áfram á sömu braut, hlusta áfram á íbúana og leggja kapp á að auka enn frekar lífsgæði Mosfellinga.
Þessar kannanir vekja athygli og útkoma þeirra á eflaust þátt í því að ungt fjölskyldufólk velur í miklum mæli að flytja í bæinn og er það ánægjuleg þróun.

Ört stækkandi bæjarfélag
Mikil fjölgun bæjarbúa undanfarin misseri og á komandi árum er á sama tíma mjög krefjandi verkefni fyrir bæjaryfirvöld. Mikill og hraður vöxtur á fjölda íbúa kallar á miklar framkvæmdir sem þarf að vinna hratt og vel í að koma í framkvæmd. Hér má nefna skólamál, leikskólamál, íþróttaaðstöðu og umhverfismál, svo eitthvað sé nefnt.
Mosfellsbær er í fararbroddi á landinu sem heilsueflandi bær. Þessi heilsumiðaða stefna bæjaryfirvalda hefur aldrei verið mikilvægari en nú.
Það forvarnarstarf fyrir börn, unglinga og fullorðna sem unnið er í skólum, íþróttafélögum og á fleiri stöðum í bænum er ómetanlegt og oft á tíðum vanmetið.
Þessi málefni eru reyndar ofarlega á forgangslista bæjaryfirvalda eins og kemur fram í fjárhagsáætlun, en betur má ef duga skal.
Það er því, að mínu mati, verkefni næstu missera að bæta enn meira fjármagni í þessa málaflokka, bæta verulega íþróttaaðstöðu í bænum, efla enn frekar aðstöðu, tækjakost o. fl. í skólum og leikskólum bæjarins ásamt fleiri þáttum í grunnþjónustu okkar ört stækkandi bæjarfélags.

Spennandi verkefni framundan
Umhverfismál skipta okkur Mosfellinga mikill máli og þau málefni þurfa að vera í brennidepli nú sem fyrr samfara stækkun bæjarfélagsins.
Samgöngumál eru mjög stór og mikilvægur málaflokkur og ljóst að breytingar á þeim verða miklar á næstu árum með stöðugt aukinni umferð bæði á höfuðborgarsvæðinu sem og innanbæjar í Mosfellsbæ.
Það er því ljóst að bæjaryfirvöld þurfa að leggja mikla áherslu á þau mál eins og stendur til að gera, t.d. með mótun umhverfis- og samgöngustefnu bæjarins.
Fram undan eru mörg spennandi verkefni og miklar framkvæmdir eru á verkefnalista Mosfellsbæjar og því mikilvægt að vel sé haldið á málefnum sveitafélagsins.

Óska eftir stuðningi í 2.-3. sæti
Ég hef ákveðið á að bjóða fram þekkingu mína og reynslu í rekstri, í mannauðs­málum, auk áralangs sjálfboðaliðastarf í íþrótta- og félagsmálum til þjónustu við íbúa Mosfellsbæjar á næsta kjörtímabili.
Ég gef kost á mér í 2.-3. sæti í prófkjöri Sjálfstæðisflokksins í Mosfellsbæ sem fer fram 10. febrúar 2018. Ég sækist þar með eftir að bætast í öflugan hóp bæjarfulltrúa Sjálfstæðisflokksins í Mosfellsbæ, til að vinna með þeim áfram að framförum og bættum lífsgæðum í Mosfellsbæ.
Ég óska Mosfellingum gleðilegra jóla og velgengni í leik og starfi á komandi ári.

Ásgeir Sveinsson,
framkvæmdastjóri hjá Halldóri Jónssyni ehf. og formaður Aftureldingar karla í handbolta.