Nokkur orð um leikskóla

Dagný Kristinsdóttir

Nú þegar kosningabaráttan er að líða undir lok langar mig að nefna eitt málefni sem hefur ekki fengið mikla umræðu – leikskólamálin.
Í Mosfellsbæ komast flest börn inn í dagvistun við 12 mánaða aldur, það er vel gert og má segja að bærinn standi sig betur þar en sum önnur sveitarfélög.
Það sem við þurfum að skoða á komandi misserum eru starfsaðstæður inni í leikskólunum, hvernig búið er að börnunum og hvernig hægt er að fjölga menntuðum leikskólakennurum.
Einnig þarf að skoða sérstaklega varanlega lausn á leikskólahúsnæði í Leirvogstungu – við getum ekki talið það lausn við hæfi að hafa einn leikskóla í færanlegum kennslustofum.

Það er erfitt að nálgast tölur um fagmenntaða leikskólakennara sem starfa hjá bænum en eftir því sem ég kemst næst er hlutfallið um 20-25%. Í samningum leikskólakennara er kveðið á um tiltekna tíma í starfi með börnum og aðra tiltekna tíma sem fara í faglegt starf, eins og undirbúning.
Deildarstjóri á leikskóla fær, svo dæmi sé tekið, 10 tíma í undirbúning á viku. Aðrir kennarar fá 5 tíma og eiga að skila sömu útkomu í faglegu starfi.
Það að starfa í skóla er hópvinna, ef einn veikist þarf að leysa hann af og þá stíga samstarfsmenn inn í. Þann tíma taka þeir af sínum undirbúningstíma sem aftur þýðir að þeir mæta óundirbúnir til að sinna sínum hópi. Það hefur bein áhrif á faglegt starf í skólum.
Stytting vinnuvikunnar hefur haft gríðarleg áhrif inn í leikskólum. Tökum sem dæmi, 20 starfsmenn taka út styttingu, færri eru að störfum, börnin eru jafnmörg og þeim þarf að sinna.
Það á að veita sömu þjónustu, með sama opnunartíma en með færra starfsfólki.
Aðstæður leikskólabarna í bænum eru mismunandi. Nýrri leikskólar ná að bjóða upp á rými barna til athafna samkvæmt leiðbeiningum frá Félagi leikskólakennara en í eldri leikskólum er þrengra um hópinn.
Sérstaklega vil ég benda á húsakost Leirvogstunguskóla, en skólastarfið þar fer fram í færanlegum kennslustofum.
Við getum ekki horft á aðstæður skólans, húsnæðislega séð með öðrum gleraugum en þeim að þetta sé tímabundið úrræði. Við hjá Vinum Mosfellsbæjar teljum afskaplega mikilvægt að farið sé í þá vinnu að byggja upp varanlegt skólahúsnæði í hverfinu.

Til að hlúa faglega að leikskólastarfinu í bænum þarf að taka tillit til mikils álags vegna veikinda starfsfólks og styttingar vinnuvikunnar.
Við þurfum að skoða hvernig við getum gert starfsumhverfið hjá leikskólum bæjarins aðlaðandi og eftirsóknarvert. Til að það geti gerst þurfum við að fara í naflaskoðun og fá liðsinni stjórnenda leikskólans.

Við þurfum að standa við bakið á stjórnendum og létta af þeim ákveðnum verkefnum svo þeir geti verið faglegir leiðtogar í sínu húsi.
Það þarf að jafna aðstöðumun barnanna í bænum, öll okkar börn eiga að vera í góðu, varanlegu húsnæði, með jafnmikið rými til athafna. Þá horfum við sérstaklega til eldra skólahúsnæðis og skólahúsnæðis Leirvogstunguskóla.
Börn eru best – hlúum að þeim eins vel og við getum, þar sem allir sitja við sama borð.

Dagný Kristinsdóttir skipar 1. sæti á lista Vina Mosfellsbæjar

Blikastaðir

Bjarki Bjarnason

Árið 2005 tók ég blaðaviðtal við Sigstein Pálsson sem var síðasti bóndinn á Blikastöðum, hann var þá tíræður en enn mjög ern. Í viðtalinu kemur fram að þess yrði ekki langt að bíða að íbúðabyggð risi á Blikastaðatúnum.
Síðan eru liðin 17 ár og Blikastaðaland hefur verið eins og óbyggð eyja milli Reykjavíkur og þéttbýlisins vestast í Mosfellsbæ. Á sama tíma hefur ríkt mikill lóða- og húsnæðisskortur á höfuðborgarsvæðinu. Það er þess vegna mikið fagnaðarefni að nú sjái til lands og uppbygging hefjist á þessum slóðum.

Stórfelld uppbygging
Á síðustu misserum hafa rýnihópar verið að störfum, meðal annars til að skilgreina þá miklu innviðauppbyggingu sem er nauðsynleg á Blikastöðum, samfara þéttri íbúðabyggð þar. Einnig hófust viðræður milli Mosfellsbæjar og Arion banka sem er eigandi landsins. Eftir langar og strangar viðræður var viðamikill samningur um stórfellda uppbyggingu á Blikastöðum samþykktur á fundi bæjarstjórnar Mosfellsbæjar 4. maí síðastliðinn.
Blikastaðaland verður byggt upp í áföngum á næstu áratugum og fram undan er mikil skipulagsvinna hjá Mosfellsbæ vegna þessa viðamikla verkefnis. Gert er ráð fyrir fjölbreyttri og blandaðri íbúabyggð, íþróttamannvirkjum, skólabyggingum og öðru sem fjölmenn íbúabyggð kallar á.
Uppbygging á Blikastöðum mun draga úr lóðaskorti á höfuðborgarsvæðinu og flýta því að Borgarlínan verði lögð upp í Mosfellsbæ.
Samkvæmt samningnum mun Arion banki leggja fram verulega fjármuni til uppbyggingar á innviðum, þar er m.a. um að ræða gatnagerð og skóla- og íþróttamannvirki.
Að þessu leyti er samningurinn einsdæmi, það er einnig fátítt að svo stórt íbúasvæði sé skipulagt frá grunni, í því felast mörg spennandi tækifæri.

Kennileiti
Náttúruperlur og útivistarsvæði eru í seilingarfjarlægð frá Blikastaðalandi, til dæmis Úlfarsfell, Úlfarsá og Leiruvogur. Á síðustu öld var eitt stærsta kúabú landsins á Blikastöðum, þar voru allt að hundrað nautgripir þegar mest lét. Útihúsin standa enn, þau verða endurgerð, þeim fengið nýtt hlutverk og munu mynda „hjartað“ í þeirri íbúabyggð sem rís á Blikastaðalandi.
Í áðurnefndu blaðaviðtali við Sigstein Pálsson var hann spurður að því hvernig honum litist á að byggja á þessari gömlu bújörð, hann svaraði með þessu orðum: „Mér líst bara vel á það. Þetta er þróunin og mér hefur alltaf þótt gaman að fylgjast með framkvæmdum og framförum hér í sveitarfélaginu.
Það verður gott að byggja á Blikastaðatúnum. Þar fauk aldrei hey og fólki kemur til með að líða vel þarna.“

Bjarki Bjarnason, skipar 1. sæti V-listans í kosningunum 14. maí.

Hlégarð heim!

Elín Árnadóttir

Félagsheimili okkar Mosfellinga, Hlégarður, á sér orðið rúmlega 70 ára sögu. Félagsheimilið er eitt kennileita bæjarins og hefur verið okkar stolt.
Í húsinu hafa lengi verið ýmsir viðburðir haldnir og félagasamtök í bænum til dæmis haft þar athvarf og aðstaðan hefur verið ómetanleg til stuðnings ýmsu félagsstarfi og íbúar og fyrirtæki í bænum hafa í gegnum tíðina getað nýtt húsið til veisluhalda. Síðustu átta ár eða svo hefur rekstur Hlégarðs verið í höndum einkaaðila og Mosfellingar ekki haft sama aðgang að húsinu og áður. Félagsstarfið á ekki lengur neitt athvarf og hafa hin ýmsu félög því verið á hrakhólum og hefur það án efa dregið úr þeirra starfsemi.
Hafist var handa við endurbætur á húsinu fyrir nokkru síðan og er nú endurbótum að hluta til lokið og neðri hæðin tilbúin. Þar er því hægt að halda viðburði og er mjög mikilvægt að nýta aðstöðuna vel fyrir menningarstarfsemi í bæjarfélaginu. Þar eru möguleikarnir óteljandi. Þá þarf að klára endurbætur á annarri hæðinni og skapa þar aðstöðu fyrir félagsstarfsemi. Einnig mætti nýta útisvæðið betur og jafnvel byggja við.

Hvað vilja bæjarbúar?

Jakob Smári Magnússon

Samfylkingin vill efna til hugmyndasamkeppni meðal bæjarbúa um uppbyggingu á svæðinu og hvernig Hlégarðssvæðið getur nýst íbúum sem best.
Hlégarður eins og hann er í dag er ekki nógu stór til að standa undir nafni sem menningarhús án þess að einhver uppbygging eigi sér stað. Listaskólinn þarf til dæmis varanlegt húsnæði og leikfélagið þarf húsnæði, svo eitthvað sé nefnt. En einhvers staðar þarf að byrja.
Samfylkingin vill fyrst og fremst fá Hlégarð aftur heim, að rekstur hússins verði í höndum bæjarins og bæjarbúar fái aftur aðgang að húsinu. Það er orðið löngu tímabært að hlúa að menningu og listum í Mosfellsbæ. Listafólk þarf að fá aðstöðu til að sinna list sinni, halda sýningar, efna til tónleika og leiksýninga og leyfa íbúum bæjarins að njóta allrar þeirrar listar og menningar sem kraumar í Mosfellsbæ.
Fyrsta skrefið er að fá Hlégarð aftur í hendur bæjarins og hefja uppbyggingu saman.

Settu x við S á kjördag og við hefjum menningarlífið til vegs og virðingar saman!

Elín Árnadóttir og Jakob Smári Magnússon, skipa 4. og 5. sæti á lista Samfylkingarinnar

Hvers vegna XD í Mosó á laugardag?

Ásgeir Sveinsson

Mosfellsbær er fjölskylduvænt, heilsueflandi og framsækið bæjarfélag þar sem er gott og eftirsóknarvert að búa.
Samkvæmt könnunum eru íbúar með þeim ánægðustu á landinu og hér hefur orðið ein mesta hlutfallslega fjölgun íbúa undanfarin ár. Samfara þessari þróun hefur verið í gangi mesta framkvæmdaskeið í sögu sveitarfélagsins í uppbyggingu innviða auk þess sem þjónusta við bæjarbúa er sífellt að aukast. Mosfellsbær stendur vel fjárhagslega, þökk sé ábyrgri stjórn fjármála og á líðandi kjörtímabili hafa framkvæmdir í Mosfellsbæ aldrei verið meiri. Sú uppbygging mun halda áfram með miklum framkvæmdum á íþróttamannvirkjum að Varmá og nýjum leikskóla í Helgafellshverfi svo eitthvað sé nefnt.
Sjálfstæðisflokkurinn í Mosfellsbæ hefur haft það að leiðarljósi að halda álögum á íbúa eins lágum og best getur við rekstur bæjarins. Við erum stolt af því að hafa lækkað álögur á íbúa á líðandi kjörtímabili m.a. með lækkun fasteignaskattaprósentu á íbúða- og atvinnuhúsnæði. Þá hafa álögur á barnafólk lækkað verulega þegar leikskólagjöld lækkuðu um 20% á líðandi kjörtímabili og nú býðst 12 mánaða börnum í Mosfellsbæ dagvistarpláss.

Jana Katrín Knútsdóttir

Það er sterkt og faglegt skólasamfélag í Mosfellsbæ sem við ætlum að styrkja enn frekar og veita meiri stuðning fagfólks inn í skólana. Við ætlum að opna stafræna Fab Lab smiðju og viljum opna Þróunar- og nýsköpunarsmiðju sem veitir ótal tækifæri fyrir alla aldurshópa.

Skipulagsmálin eru stór þáttur í vaxandi samfélagi og uppbygging í Mosfellsbæ heldur áfram. Búið er að ná samningum um uppbyggingu á Blikastaðalandi þar sem rísa mun glæsilegt vistvænt hverfi með fjölbreyttu íbúðamynstri fyrir alla aldurshópa. Í Blikastaðalandi sem mun rísa í áföngum til næstu 20-25 ára mun einnig verða fyrsta flokks þjónusta þegar litið er til skóla- og íþróttamannvirkja auk hágæða samgangna. Uppbygging mun einnig halda áfram á öðrum stöðum í bænum.
Við munum áfram standa vörð um sérkenni Mosfellsbæjar sem „sveit í borg“ og huga vel að dýrmætri náttúrunni allt í kringum okkur.
Málefni fatlaðra er mikilvægur málaflokkur sem nauðsynlegt er að veita verðskuldaða athygli. Á líðandi kjörtímabili höfum við aukið þjónustu s.s. með opnun úrræðis fyrir geðfatlaða. Við munum halda áfram þeirri þróun, meðal annars með úthlutun lóðar undir nýjan íbúðakjarna í 5. áfanga Helgafellshverfis fyrir fatlað fólk og með áherslu á samþættingu þjónustu.
Mosfellsbær er heilsueflandi samfélag með Aftureldingu sem hornstein í okkar frábæra bæjarfélagi. Við munum leggja mikla áherslu á að samþykktri uppbyggingu á Varmásvæðinu verði flýtt eins og aðstæður leyfa auk þess sem uppbygging á íþróttamannvirkjum muni hefjast á Blikastaðalandi, þar á meðal fjölnota knatthús í fullri stærð.
Eldri borgurum fer fjölgandi og á þessu kjörtímabili höfum við lagt mikla áherslu á lýðheilsumál eldri Mosfellinga og munum halda því áfram. Í samstarfi við Eir mun íbúðum fyrir eldri borgara fjölga auk mikillar stækkunar á rýmum fyrir félagsstarf. Jafnframt er búið að samþykkja aðkallandi stækkun hjúkrunarheimilisins Hamra sem verður með 75 rými eftir stækkun.
Ábyrgur og traustur rekstur undanfarinna ára gerir það að verkum að framtíðin er björt í Mosfellsbæ. Sjálfstæðismenn hafa verið við stjórnvölinn á þessum uppgangstímum þar sem þjónusta og rekstur sveitarfélagsins hefur tekið miklum og jákvæðum breytingum og bærinn eflist og dafnar.
Við ætlum að sjá til þess að rekstur bæjarfélagsins verði áfram ábyrgur og traustur, álögur á íbúa muni halda áfram að lækka og að áfram verði best að búa í Mosfellsbæ. Til þess að ná þeim markmiðum okkar þurfum við þinn stuðning, hvert atkvæði skiptir máli.

Ásgeir Sveinsson og Jana Katrín Knútsdóttir skipa 1. og 2. sæti á framboðslista Sjálfstæðisflokksins fyrir sveitarstjórnarkosningar 14. maí.

Kosningaloforðin

Rakel Baldursdóttir

Flokkar í framboði keppast við að koma sínum metnaðarfullu stefnum á framfæri, stefnum sem taka mið af menntamálum, skipulagsmálum, velferðarmálum, loftslagsmálum og svo lengi má telja og eru þegar upp er staðið alls ekki ólíkar.
Allar þessar tilkynningar um fögur loforð eru margar hverjar löngu tímabærar og flestar íbúum öllum til hagsbóta. En dugar þetta til?
Stefnur flokkana eru ekki svo ólíkar síðustu kjörtímabilum, þá einna helst stefnur um loftslagsmál sem hveða við nýjan tón enda erum við öll í kapphlaupi við tímann að bæta þar úr.
Það er ekki nóg að setja sér metnaðarfull markmið, það þurfa að vera mælanleg langtímamarkmið til að ná árangri í stefnumálum, það þurfa allir að fá að koma að borðinu og með raunverulegum hætti, markmið þurfa að vera sýnileg, tímasett og eftirfylgni þarf að vera til staðar. Reglulega þarf að taka stöðu mála og með upplýstum hætti. Óháðir ólíkir fagaðilar með sérþekkingu þurfa að koma að málum og styðjast þarf við niðurstöður rannsókna.
Allt þetta þarf að vera sýnilegt til að tryggja heiðarleika og með rafrænni, gagnsærri stjórnsýslu, auknu og opnu samtali við íbúa, faglegum vinnubrögðum undir stjórn óháðs stjórnanda náum við betri árangri.
Höfum ekki sömu stefnur á næsta kjörtímabili.
Náum árangri núna.

Rakel Baldursdóttir, skipar 10. sæti á lista Vina Mosfellsbæjar

Við viljum bara það besta fyrir börnin okkar

Sævar Birgisson

Fyrsta skólastig, eða leikskólar, er einhver mikilvægasta þjónusta sem sveitarfélög veita. Í Mosfellsbæ er heimilt að sækja um leikskólavist fyrir börn frá 12 mánaða aldri. Gott og vel. Það sem er mikilvægast í umsóknarferlinu er að óvissu um hvenær og hvar barnið fái leikskólapláss sé eytt eftir fremsta megni.
Það er nógu stórt verkefni fyrir nýbakaða foreldra að sinna uppeldinu, án þess að þurfa að bæta öðrum áhyggjum ofan á það. Vissulega hafa verið ákveðnir vaxtarverkir í takti við vaxandi íbúafjölda í sveitarfélaginu og því krefjandi verkefni að mæta aukinni þörf í þessum málum. Ekki er hægt að verða við öllum óskum um tiltekinn skóla og getur fæðingarmánuður barns haft mikið að segja í þeim efnum. Aðalatriðið er að við veitum foreldrum hugarró. Við í Framsókn Mosfellsbæ viljum að þjónustan við börn sé veitt um leið og fæðingarorlofi foreldra lýkur, það þarf að sjá til þess að bilið sé brúað.
Það er gríðarlega krefjandi starf að vera starfsmaður á leikskóla og mikil ábyrgð sem felst í því að sjá um börnin okkar á þessum mest mótandi tíma á þeirra ævi. Við sem foreldrar gerum ríkar kröfur á leikskólastarfið, alveg eins og starfsfólkið gerir kröfur á okkur sem foreldra. Það þarf að sjá til þess að búið sé þannig um að við sem sveitarfélag séum einmitt að veita bestu þjónustu sem völ er á, framúrskarandi þjónustu. Hærra hlutfall fagmenntaðra leikskólakennara er stór þáttur í því að efla góða þjónustu enn frekar. Sem dæmi má nefna að ófaglærðir starfsmenn leikskóla eru oft á tíðum einstaklingar sem vilja sækja sér menntunina en vantar hvatningu til að taka skrefið.
Við hjá Framsókn viljum beita okkur fyrir því að efla það mikilvæga starf sem unnið er í leikskólum sveitarfélagsins, meðal annars með því að mæta því frábæra fólki sem þar starfar og auðvelda því að sækja sér viðeigandi menntun til að styrkja stöðu sína. Eru fjölmargar leiðir færar í þeim efnum. Á sama tíma erum við að bæta þjónustuna og gera vinnustaðina enn eftirsóknarverðari.
Ásmundur Einar Daðason, mennta- og barnamálaráðherra, hefur unnið mjög gott starf fyrir farsæld barna og fjölskyldna í landinu. Mikið framfaraskref var stigið þegar Alþingi samþykkti frumvarp til nýrra laga um samþættingu þjónustu í þágu farsældar barna. Þau ganga út á að tryggja aukna samvinnu og samfellu í þjónustu við börn, eitthvað sem mikilvægt er að verði innleitt sem fyrst. Hér í Mosfellsbæ eigum við að vera framúrskarandi þegar kemur að málefnum barna, því við viljum bara það besta fyrir börnin okkar.

Setjum málefni barna í forgang og merkjum X við B á kjördag.
Höfundur er faðir tveggja barna á leikskólaaldri.

Sævar Birgisson
3. sæti á lista Framsóknar í Mosfellsbæ

Þakklæti að lokum

Margrét Guðjónsdóttir

Það er gefandi að taka þátt í sveitarstjórnarmálum. Það er líka mikil ábyrgð sem fylgir því að taka þátt í sveitarstjórnarmálum.
Þegar á mig var skorað fyrir sveitarstjórnarkosningar á árinu 2018, að starfa með hópi fólks sem hafði það eitt að markmiði að koma að uppbyggingu og þjónustu við Mosfellinga með lýðræði, heiðarleika og þekkingu að vopni, var áhugavert að vera með. Hópi sem nefnir sig Vini Mosfellsbæjar en í nafninu felst í raun allt sem segja þarf.
Þessi þátttaka mín hefur gefið mér mikið. Ég hef fengið aukna þekkingu á hvað í starfi þeirra sem starfa á þessum vettvangi felst. Ég hef kynnst hópi fólks, fólki sem hefur gefið sig fram til að starfa á pólitíska sviðinu, mörgu því frábæra fólki sem starfar hjá sveitarfélaginu og ég hef kynnst mörgum íbúum sem ég hefði kannski annars ekki kynnst. Fyrir þetta vil ég þakka.
Ég vil hvetja alla sem áhuga hafa á sveitarstjórnarmálum, ekki síst unga fólkið, að gefa kost á sér til starfa og nýta þekkingu sína til að koma að góðum verkum því ég veit að ef íbúar standa saman, ræða málin, hvort sem er í skólamálum, skipulagsmálum eða hverjum öðrum málum sem okkur öll varða, leyfum öllum þeim mannauði sem Mosfellsbær býr yfir að njóta sín og koma að málum, þá þurfum við ekki að kvíða framtíðinni.
Það er líka tímafrekt að taka þátt í sveitarstjórnarmálum sé þeim sinnt af heilindum og með sóma og hef ég nú ákveðið að beina kröftum mínum og tíma á annað svið.
Ég kveð þennan vettvang með miklu þakklæti í huga, bæði fyrir það traust sem mér var sýnt svo og þakklæti til þeirra sem ég hef átt í samskiptum við.

Margrét Guðjónsdóttir
Höfundur er varabæjarfulltrúi Vina Mosfellsbæjar 2018-2022

11 bæjarstjórar

Michele Rebora

Í kosningum á laugardaginn gefst okkur Mosfellingum í fyrsta skipti kostur á að velja 11 einstaklinga til að stýra bænum okkar.
Þessir 11 einstaklingar eru fulltrúar ólíkra hreyfinga, með mismunandi áherslur og stefnumál, en við það að taka sæti í bæjarstjórn verða þeir um leið líka fulltrúar okkar allra. Ábyrgð á stjórnun bæjarins liggur nefnilega hjá bæjarstjórn sem slíkri, ekki hjá flokkum eða listum.

Bæjarstjórn og nefndir bæjarins eru það sem kallast fjölskipað stjórnvald, þ.e. fyrirbæri þar sem stjórnsýsluákvarðanir eru teknar saman. Ákvarðanir verða ekki teknar nema á fundum.
Við hjá Vinum Mosfellsbæjar trúum því að þar eigi að gefast tækifæri til að ræða málin og skoða þau út frá mismunandi sjónarmiðum, til að finna bestu lausnina og niðurstöður sem þóknast flestum, með hagsmuni heildarinnar að leiðarljósi.

Að sjálfsögðu er ekki hægt að ræða málin endalaust og er hin almenna regla lýðræðisins að meirihlutinn ræður en sá meirihluti þarf ekki að vera fyrirfram ákveðinn, heldur endurspegla upplýsta ákvörðun, eins og í öllum vinahópum.
En hvernig er það, ræður bæjarstjóri ekki öllu? Nei, alls ekki. Bæjarstjóri er framkvæmdastjóri sveitarfélagsins og ber því eingöngu ábyrgð á að framkvæma það sem bæjarstjórn hefur ákveðið. Þess vegna teljum við hjá Vinum Mosfellsbæjar að fagráðinn bæjarstjóri, sem er ekki bæjarfulltrúi og situr þannig ekki báðum megin borðsins, sé heppilegast leiðin til að halda hlutverkum skýrum og koma í veg fyrir hagsmunaárekstra.
Veljum breytta stjórnarhætti, verum Vinir.

Michele Rebora skipar 4. sæti á lista Vina Mosfellsbæjar

Íþrótta- og tómstunda­starfsemi í Mosfellsbæ

Brynja Hlíf Hjaltadóttir

Mosfellsbær er ört vaxandi samfélag og hér býr fjölbreyttur hópur fólks og er því mikilvægt að hér sé öflugt og fjölbreytt íþrótta- og tómstundastarf.
Við í Sjálfstæðisflokknum viljum stuðla að aukinni hreyfingu almennings og efla lýðheilsu bæjarbúa.
Í heilsueflandi samfélagi er algjört lykilatriði að góð aðstaða sé til íþróttaiðkunar en við í Sjálfstæðisflokknum ætlum að halda áfram að bæta aðstöðuna við íþróttamiðstöðvarnar í Lágafelli og að Varmá og jafnframt lengja opnunartíma í Lágafellslaug.
Við stefnum á að taka í notkun glæsilega 900 fermetra nýbyggingu við íþróttamiðstöðina að Varmá og viljum við hraða samþykktum uppbyggingaráætlunum á íþróttasvæðinu að Varmá eins mikið og aðstæður leyfa og stefnum á að ljúka við endurnýjun á Tungubökkum.
Þá viljum við einnig stuðla að frekari útiveru bæjarbúa, einkum eldri íbúa bæjarins, og ætlum við því að setja upp fleiri æfingatæki og bekki á útivistarsvæðum og gönguleiðum bæjarins sem verður vonandi hvatning til aukinnar útivistar.
Ekki þarf að fara mörgum orðum um mikilvægi þess að börn og unglingar finni sig í íþróttum og/eða tómstundum. Á síðustu árum hefur verið mikil þróun á samfélaginu, einkum á sviði íþrótta og tómstunda, hér má t.d. nefna rafíþróttir og nýjar jaðaríþróttir. Með tilkomu nýrra íþrótta- og tómstunda fá börn, sem ekki finna sig í hefðbundum íþróttum, aukin tækifæri á að finna sér grein sem hentar þeim.
Mikilvægt er að Mosfellsbær fylgi þessari þróun, við viljum styðja áfram við nýsköpun í lýðheilsumálum og finna þeim farveg og traustan sess innan Mosfellsbæjar.
Við leggjum áherslu á fjölbreyttar tómstundir fyrir eldri borgara því eins og með börnin er mikilvægt að eldri íbúar bæjarins finni sér afþreyingu sem hentar þeim. Við í Sjálfstæðisflokknum viljum halda áfram stuðningi við eldri borgara og auka við uppbyggingu á íþrótta- og félagsstarfi eldri íbúa Mosfellsbæjar.
Við ætlum að hækka enn frekar frístundaávísanir hjá ungmennum og eldri borgurum til að tryggja jafnan aðgang barna og unglinga að íþrótta og tómstundastarfi bæjarins og stuðla að aukinni hreyfingu, virkni og lýðheilsu eldri íbúa Mosfellsbæjar.

Brynja Hlíf Hjaltadóttir skipar 8. sæti á lista Sjálfstæðis­flokksins fyrir komandi sveitarstjórnarkosningar.

Raddir íbúa hafa áhrif

Rúnar Þór Guðbrandsson

Í baráttunni við lyktar- og sjónmengun frá starfsemi Sorpu hafa íbúar í Leirvogstungu náð miklum árangri með stöðugu aðhaldi. Það sýnir að raddir íbúa hafa áhrif og skipta máli.
Að sama skapi hafa kjörnir fulltrúar sýnt máttleysi gagnvart yfirgangi Reykjavíkur og hlutleysi annarra eigenda byggðasamlagsins. Eigendur SORPU eru öll sveitarfélögin á höfuðborgarsvæðinu.

Í rúman áratug hafa íbúasamtök Leirvogstungu átt hátt í hundrað fundi með fulltrúum Mosfellsbæjar og Sorpu um starfsemi þeirra í Álfsnesi. Árið 2013 var svo gert eigendasamkomulag. Í því fólst í stuttu máli eftirfarandi:
• Fullkominni gas- og jarðgerðarstöð með lokuðu ferli yrði komið upp í Álfsnesi með samþykki Mosfellsbæjar og íbúasamtaka Leirvogstungu og urðun hætt í Álfsnesi.
• Brennsla á lyktarsterkum úrgangi færi í Kölku á Suðurnesjum (Suðurnesjamenn og eigendur Sorpu hafa ekki náð samkomulagi um það vegna ósamstöðu).
• Urðun á óvirkum úrgangi (að mestu lyktarlaus) yrði á Suðurlandi (Sunnlendingar bökkuðu út úr þessu eftir síðustu sveitarstjórnarkosningar. Sorpa setti þvingunaraðgerðir á þá en síðan hafa þeir flutt sitt sorp utan með skipum).
Sveitarstjórnir vilja ýta þessu frá sér og enginn virðist vilja þetta í „sinn bakgarð“. Vandamálið liggur því þar og yfirgangur Reykjavíkur verið algjör og öðrum sveitarfélögum finnst bara fínt að Reykjavík sjái um þetta því þetta trufli enga nema Mosfellinga.
Staðan í dag er sú að Gas- og jarðgerðarstöðin er klár og hefur hafið starfsemi. Umdeilt er hversu vel hafi tekist til. Athugasemdum íbúa um lokað ferli (þrær yfirbyggðar) og staðsetningu var þó mætt.

Urðun átti að vera lokið en er á framlengdum fresti þar sem samstarfssveitarfélögin hafa ekki viljað axla ábyrgð og finna starfseminni staðsetningu. Framlengdur frestur rennur út í lok árs 2023. Allar líkur eru á því að hefja verði útflutning á sorpi að þeim tíma liðnum komist sveitarfélögin ekki að samkomulagi. Til að hægt sé að hefja urðun á óvirkum úrgangi er nauðsynlegt að byggja sorpbrennslustöð því núverandi geta Kolku í Suðurnesjabæ er takmörkuð og ekki hefur náðst samstaða um stækkun hennar.
Vinnuhópur sem skilaði skýrslu um áramót komst að þeirri niðurstöðu að hagkvæmast væri að byggja sorpbrennslustöðina í Álfsnesi. Þetta munum við aldrei geta sætt okkur við. Aðgerðarleysi og samstöðuleysi samstarfs sveitarfélaganna í Sorpu er búið að setja urðunarmálin í algjört óefni.
Það skiptir því gríðarlega miklu máli fyrir Mosfellinga að raddir íbúa heyrist áfram í þessu máli. Það hefur vissulega skilað okkur árangri. En það skiptir ekki síður máli að í nýrri bæjarstjórn verði fólk sem mun beita sér fyrir því að þetta stóra umhverfisslys verði ekki í bakgarðinum okkar.

Við í Framsókn erum einhuga í því að koma málefnum Sorpu í réttan farveg.
Munið X við B á kjördag.

Rúnar Þór Guðbrandsson, í stjórn íbúasamtaka Leirvogstungu og skipar 10. sæti á lista Framsóknar í Mosfellsbæ.

Heimurinn er okkar – ný menntastefna Mosfellsbæjar

Kolbrún G. Þorsteinsdóttir

Heimurinn er okkar er heitið á nýrri menntastefnu Mosfellsbæjar sem hefur nú verið samþykkt af bæjarstjórn.
Lærdómssamfélagið í Mosfellsbæ kom að gerð stefnunnar og má nefna fulltrúa frá skóla- og frístundastarfi, börn, foreldra, starfsfólk, íbúa og kjörna fulltrúa.
Haldið var skólaþing í Helgafellsskóla, rafrænt íbúaþing, lögð fyrir viðhorfskönnun fyrir allt starfsfólk í skóla- og frístundastarfi og sérstaklega var rætt við börn í leikskóla.
Reglulega var vinnan kynnt og rædd í fræðslunefnd. Verkefnateymi sá um alla vinnu og framkvæmd stefnunnar en í teyminu sátu fulltrúar frá leikskólum, grunnskólum, frístund, Listaskóla og Framhaldsskólanum í Mosfellsbæ.
Stefnan ber merki um mikinn metnað í skólastarfi og umhyggju fyrir nemendum og mun tryggja að Mosfellsbær verði áfram í fremstu röð í skólamálum.

Vöxtur, fjölbreytni, samvinna
Menntastefnan byggir á þremur stoðum en þær eru vöxtur, fjölbreytni og samvinna. Innan hverrar stoðar eru markmið og lykilorð. Aðaláherslan er á velferð og líðan nemenda en eins og fram kemur í stefnunni er „Ör­yggi og vellíð­an eru und­ir­staða þess að börn blómstri í námi og leik. Því skal tryggja að börn fái tæki­færi til þess að efla styrk­leika sína og tak­ast á við áskor­an­ir í ör­uggu og hvetj­andi um­hverfi.“
Við innleiðingu stefnunnar er sett upp aðgerðaráætlun með mælaborði sem tekur til alls skóla- og frístundastarfs. Jafnframt mun hver og einn skóli setja upp aðgerðaráætlun sem birtist í framkvæmdaáætlun skólanna. Stefnan er sett upp með þeim hætti að auðvelt er að vinna með innihaldið á alla mögulega máta.
Innleiðing stefnunnar hefst næsta haust á nýju skólaári og verður formlega ýtt úr vör 23. september á sameiginlegum fræðsludegi grunn- og leikskóla í Mosfellsbæ.

Horft til Mosfellsbæjar í skólamálum
Skólamál eru mikilvægustu mál sveitarfélaganna og þar stendur Mosfellsbær sig einna best. Horft er til skólaþróunar í Mosfellsbæ því hér er framúrskarandi skólastarf og framúrskarandi starfsfólk. Við höfum mætt mikilli barnafjölgun með breytingum og farið ótroðnar slóðir.
Í bæinn hefur flutt metfjöldi barnafólks en hér eru engir biðlistar á leikskólum. Þann 1. apríl var búið að bjóða öllum börnum, sem fædd eru í ágúst 2021 eða fyrr, leikskólapláss í leikskólum bæjarins. Hvergi eru fleiri ungbarnapláss á leikskólum þar sem eins árs gömul börn fá þjónustu að loknu fæðingarorlofi foreldra.
Nýr grunnskóli, Helgafellsskóli, var byggður nú er leikskóli að fara í byggingu í sama hverfi. Ekkert sveitarfélag fór í jafn mikið átak í að láta skanna allt húsnæði og viðhald stofnana ávallt verið efst á blaði hjá umhverfissviði Mosfellsbæjar.

Börnin mikilvægust
Ég óska Mosfellingum til hamingju með nýja menntastefnu og vona að skólastarf megi blómstra áfram. Börnin í bænum eru mikilvægustu íbúarnir og veit ég að framtíðarbæjarstjórn mun tryggja að svo verði áfram.
Ég er ákaflega stolt að hafa fengið að sitja í bæjarstjórn fyrir Sjálfstæðisflokkinn í Mosfellsbæ og tekið þátt í að byggja upp bæinn og styðja við skólastarf á mesta uppbyggingartíma í sögu bæjarins. Ég þakka fyrir mig og kveð stjórnmálin í Mosfellsbæ og lít um leið stolt yfir farinn veg.

Kolbrún G. Þorsteinsdóttir, bæjarfulltrúi og formaður fræðslunefndar Mosfellsbæjar

Varmá til framtíðar

Lovísa Jónsdóttir

Í síðasta tölublaði Mosfellings voru kynntar fyrir bæjarbúum fyrirætlanir um byggingu þjónustuhúss við íþróttahúsið að Varmá.
Þetta er löngu tímabær uppbygging sem við í Viðreisn vorum með á stefnuskrá okkar fyrir síðustu sveitarstjórnarkosningar. En því miður þá lítur allt út fyrir að þessi bygging verði enn einn búturinn í bútasaumsteppið Varmá.
Með byggingu þessa húss er verið að skapa félagsaðstöðu sem lengi hefur verið kallað eftir. Við bætast 4 búningsklefar og aðkoman að húsinu verður eins og hún á að vera í nútímalegri íþróttaaðstöðu. En er þetta nóg? Hvar er heildarsýnin fyrir svæðið? Mosfellsbær er í örum vexti og mun halda því áfram á næstu árum.

Framtíðarsýnin
Þessi byggingaráform bera það helst með sér að þau séu ætluð til þess að leysa stöðuna eins og hún er í dag en ekki vanda morgundagsins. Við í Viðreisn teljum að það þurfi að horfa lengra fram í tímann og vinna okkur í haginn. Við vitum að íbúum mun fjölga hratt á næstu árum og það er svekkjandi að vera ekki fyrr búin að vígja nýja aðstöðu en að hún er orðin úrelt.
Síðast þegar búningsklefum var bætt við, árið 1986, voru íbúar sveitarfélagsins færri en 2.500. Við vorum ennþá Mosfellssveit. Núna á að bæta við fjórum klefum sem eiga að þjóna bæjarfélagi sem telur rúmlega 13.000. Tvöföldun á klefum fyrir meira en fimmfalt stærra bæjarfélag.
Í mörg ár hefur ekki verið hægt að bjóða öllum gestaliðum sem koma hingað til að keppa að fara í sturtu eftir leik. Þó að fjórir klefar séu vissulega til bóta þá þarf ekki mikla stærðfræðikunnáttu til þess að átta sig á því að þetta er ekki nóg.

Frístund á Varmá
Það sem við í Viðreisn söknum þó einna mest er að þetta gullna tækifæri sé ekki nýtt til að huga að aðstöðu fyrir börnin okkar, fyrir og eftir að þau stunda sínar íþróttir.
Við í Viðreisn viljum að á Varmársvæðinu verði frístund sem börn geta nýtt þá daga sem þau sækja æfingar í íþróttahúsinu. Þarna verði aðstaða þar sem börnin geta geymt skólatöskur og annað sem fylgir þeim á æfingar, geti borðað nestið sitt og séu í umsjón fagaðila sem myndu sinna þessu starfi á sömu faglegu forsendum og eru í frístund í skólunum sjálfum.
Svona getum við tryggt að börnin séu í öruggu umhverfi og geti farið í frístund eftir æfingu, sem í dag er ekki hægt. Með þessari lausn er bæði hægt að einfalda líf foreldra og auðvelda Aftureldingu að bjóða börnunum að prófa fjölbreyttar íþróttir.
Við megum líka alls ekki gleyma því að við fáum varla betra tækifæri til þess að skapa aðstöðu til íþróttaiðkunar fyrir börn með fatlanir. Það er auðvelt að taka þarfir þessa hóps inn á þessu stigi en það getur reynst erfitt að breyta húsnæði eftir að það er risið.

Það mætti telja upp mörg atriði til viðbótar; aðstöðu fyrir eldri borgara, aðstöðu við þjálfara og starfsfólk. Við þurfum að taka Varmársvæðið í heild, skipuleggja það í samráði við alla hagaðila og horfa til framtíðar. Þannig getum við eignast íþróttasvæði sem sæmir Mosfellsbæ.

Þessu viljum við breyta.
Þú getur breytt – Veldu Viðreisn.

Lovísa Jónsdóttir,
oddviti Viðreisnar í Mosfellsbæ

Mosó – bær íþrótta, menningar og lista

Hilmar Stefánsson

Það er gott að vera Mosfellingur. Bærinn vex og dafnar og það er ánægjulegt að fylgjast með fleira og fleira fólki setjast hér að og gera Mosfellsbæ að sínum heimabæ.
Fjölbreytt menningarlíf, öflugt íþrótta- og tómstundastarf og tækifæri til fjölbreyttrar útivistar í náttúrunni allt um kring eru meðal margra góðra þátta sem við Mosfellingar erum svo lánsamir að búa við. Því skal kannski engan undra að samkvæmt árlegri könnun Gallup segjast nú 89% bæjarbúa ánægðir með Mosó sem stað til að búa á.
Undirstaða þess sem tryggir gott bæjarfélag hvar íbúar eru ánægðir er meðal annars ábyrgur og traustur rekstur. Til viðbótar við það þarf framsýna menn og konur í brúnni sem hafa hugmyndaauðgi, hugrekki og þor til að hugsa út fyrir hið hefðbundna, vera skapandi við úrlausnir áskorana og taka ákvarðanir byggðar á framtíðarsýn og í góðu samráði við íbúa.
Á komandi kjörtímabili viljum við sjálfstæðismenn að Mosfellsbær verði áfram fjölskylduvænn, heilsueflandi og framsækinn bær sem hefur velferð og þarfir allra íbúa að leiðarljósi og að hér verði áfram eftirsóknarvert að búa, bæði fyrir nýja og eldri Mosfellinga.

Við vitum að skapandi umgjörð um menningarmál er öllum samfélögum holl og því viljum við sjálfstæðismenn gera okkar til að stuðla að fjölbreyttu og blómlegu menningarlífi í Mosfellsbæ. Við viljum vinna að því að skapa frjóan og góðan jarðveg til að efla og styðja við menningarstarfsemi í bænum, efla menningartengda ferðaþjónustu og auka við framboð menningarviðburða í bænum. Við viljum auk þess stuðla að byggingu á fjölnota menningarhúsi á sama tíma og við hugum að því hvernig hægt er að nýta enn betur húsakynni bæjarins í þágu lista og menningar.
Öflugt íþrótta- og tómstundastarf er annað sem við Mosfellingar höfum verið lánsamir að njóta en þar hefur ómetanleg þátttaka sjálfboðaliða spilað lykilhlutverk.
Við þekkjum mikilvægi þess að fólk á öllum aldri, börn, fullorðnir og eldri borgararar, hafi gott aðgengi að íþrótta- og tómstundastarfi, meðal annars vegna þess hversu mikið heilbrigð hreyfing getur stuðlað að líkamlegu hreysti og skipt sköpum fyrir andlega vellíðan.

Við viljum því tryggja að það íþrótta- og tómstundastarf sem er í boði í Mosfellsbæ sé vel kynnt íbúum svo þeir geti með auðveldum hætti leitað sér upplýsinga og nýtt sér til heilsueflingar.
Við viljum einnig stuðla að áframhaldandi uppbyggingu íþróttasvæða og íþróttamannvirkja, meðal annars með því að bæta við íþróttamiðstöðvarnar í Lágafelli og að Varmá og ljúka við endurnýjun á Tungubökkum. Þá viljum við hækka enn frekar frístundaávísanir, halda áfram uppbyggingu til útivistar, tryggja áframhaldandi stuðning við jaðaríþróttir og þannig stuðla að heilbrigðri samveru fjölskyldna og annarra í Mosfellsbæ.

Tryggjum áframhaldandi vöxt og mótum framtíðina saman. Setjum X við D þann 14. maí.

Hilmar Stefánsson
Höfundur skipar 7. sæti á lista Sjálfstæðis­flokksins fyrir komandi sveitarstjórnarkosningar.

Sameinumst um heilsueflandi samfélag

Ólöf Kristín Sívertsen

Nú styttist heldur betur í sveitarstjórnarkosningar og áherslur og stefnuskrár framboða í bænum hafa litið dagsins ljós.
Það er virkilega ánægjulegt að sjá að flestir flokkar, ef ekki allir, leggja áherslu á lýðheilsumál og áframhaldandi uppbyggingu Heilsueflandi samfélags hér í Mosfellsbæ með einum eða öðrum hætti. Í því samhengi er vert að rifja upp að nú eru liðin 10 ár frá því að Mosfellsbær, fyrst allra sveitarfélaga, hóf formlegt samstarf við Embætti landlæknis og heilsuklasann Heilsuvin í Mosfellsbæ um uppbyggingu Heilsueflandi samfélags hér í bæ.

Samvinna er lykilatriði
Til að ná árangri við slíka uppbyggingu er lykilatriði að allir hagaðilar stefni að því sameiginlega markmiði að auðvelda fólki að taka heilsusamlegar ákvarðanir og lifa heilbrigðu lífi.
Rannsóknir hafa sýnt að áhrifaþættir heilbrigðis felast m.a. í geðrækt og líðan, mataræði, hreyfingu og útivist sem saman skapa lífsgæði okkar auk umhverfis- og efnahagslegra þátta. Stjórnvöld þurfa að taka tillit til heilsu við allar stefnumótandi ákvarðanir í samfélaginu varðandi t.d. skóla-, umhverfis-, íþrótta, tómstunda-, samgöngu-, skipulags-, atvinnu-, menningar- og öldrunarmál.
Íbúar þurfa jafnframt að vera virkir þátttakendur og grípa eða benda á öll þau tækifæri sem hægt er að nýta til að byggja hér upp fyrirmyndarsamfélag sem leggur áherslu á vellíðan og lífsgæði íbúa. Samvinna allra, að ógleymdu frumkvæði, er lykillinn að árangri.

Lýðheilsustefna
Nú hefur Lýðheilsustefna Mosfellsbæjar litið dagsins ljós og hafa þar verið hnýttir saman þræðir þeirrar miklu vinnu við uppbyggingu Heilsueflandi samfélags í bænum okkar undanfarin ár.
Næsta mál á dagskrá er að bretta upp ermar og sameinast um kraftmikla innleiðingu þeirrar stefnu sem talar að sjálfsögðu við allar aðrar meginstefnur bæjarins. Það mun renna enn styrkari stoðum undir þann heilsubæ sem bærinn okkar sannarlega er og tryggja nauðsynlega framþróun á öllum sviðum.

Ávinningur allra
Uppbygging Heilsueflandi samfélags er ávinningur fyrir alla og fjölmargar rannsóknir hafa sýnt fram á að hver króna sem varið er í heilsueflingu og forvarnir skilar sér margfalt til baka til samfélagsins svo ekki sé minnst á bætta heilsu og aukin lífsgæði allra, þar liggja raunverulegu verðmætin.
Leggjumst öll á árarnar til að tryggja áframhaldandi uppbyggingu Heilsueflandi samfélags í bænum okkar því við hljótum öll að vilja búa í samfélagi þar sem áhersla er lögð á vellíðan og lífsgæði allra íbúa.

Ólöf Kristín Sívertsen, lýðheilsu­fræðingur og verkefnisstjóri Heilsueflandi samfélags í Mosfellsbæ

Vond vinnubrögð

Guðmundur Hreinsson

Við Mosfellingar urðum vitni að óvönduðum og vondum vinnubrögðum á síðasta fundi bæjarstjórnar Mosfellsbæjar þann 4. maí.
Þar var til umfjöllunar og afgreiðslu leynisamningur við Arion banka um uppbyggingu á Blikastaðalandinu, samningur sem ekki mátti sýna eða ræða úti í samfélaginu fram að setningu fundarins.
Við hjá Vinum Mosfellsbæjar, þar með talinn bæjarfulltrúi Vina Mosfellsbæjar, erum ekki efnislega á móti því að Blikastaðalandið sé byggt upp heldur á móti þeim óvönduðu vinnubrögðunum sem voru viðhöfð. Það er fáheyrt að svo risastórt mál sé dregið upp úr hatti núverandi meirihluta Sjálfstæðisflokks og Vinstri grænna í lok kjörtímabilsins og það án allrar kynningar eða umræðu úti í samfélaginu og keyrt í gegnum bæjarstjórn með valdi. Íbúar Mosfellsbæjar fengu enga aðkomu og voru ekki spurðir álits, þrátt fyrir að lýðræðisstefna Mosfellsbæjar mæli fyrir um að svo skuli vera í svo stórum málum sem þessu.

Stefán Ómar Jónsson

Í fljótu bragði þá sýnist okkur að þessi samningur getur ekki verið annað en bara viljayfirlýsing þar sem innihald hans framselur skipulagsvald til þriðja aðila og er það að okkar mati í hæsta máta ósiðlegt og ekki eftir laganna bókstaf. Samningurinn bindur hendur kjörinna fulltrúa langt fram í tímann.
Þéttleiki byggðar í Blikastaðalandi verður samkvæmt samningnum helmingi meiri en í Helgafellslandinu og mætti líkja við að settar yrðu 4 – 5 hæðir ofan á hverja blokk í Helgafellshverfinu og þykir nú mörgum nóg um þéttleika þess hverfis. Svona mikill þéttleiki, er það það sem við viljum?
Samningurinn gengur svo langt að hann formar ítarlega skipulag svæðisins að næsta bæjarstjórn og næstu bæjarstjórnir verða eins konar afgreiðslunefndir fyrir þá sem kaupa samninginn af Arion banka, afgreiðslunefndir sem munu lítil eða engin áhrif hafa um byggðaþróun landsins.
Kæru íbúar Mosfellsbæjar, við hjá Vinum Mosfellsbæjar erum andstæðan við svona vinnubrögð. Við viljum að allt sé uppi á borðum. Þess vegna lagði bæjarfulltrúi Vina Mosfellsbæjar til að málinu yrði frestað svo hægt væri að skoða það og kynna, en meirihluti Sjálfstæðisflokks og Vinstri grænna felldi þá tillögu.
Bæjarfulltrúi Vina Mosfellsbæjar greiddi atkvæði einn gegn samþykkt samningsins vegna skorts á lýðræðislegum vinnubrögðum og skorts á að kynna svo stóra ákvörðun meðal íbúa bæjarins.

Guðmundur Hreinsson skipar 2. sæti á lista Vina Mosfellsbæjar
Stefán Ómar Jónsson er bæjarfulltrúi Vina Mosfellsbæjar