Dýralæknirinn Mosfellsbæ flutti í nýtt húsnæði fyrir skemmstu og er nú til húsa í Urðarholti 2 þar sem Mosfellsbakarí var eitt sinni til húsa.
Þórunn Þórarinsdóttir dýralæknir er eigandi stofunnar sem hefur verið starfrækt í Mosfellsbæ síðan 2003 en auk Tótu eins og hún er alltaf kölluð starfa þrír dýralæknar auk annars starfsfólks á stofunni.

Fullbúinn dýraspítali
„Við erum rosalega ánægð að vera komin í þetta framtíðarhúsnæði, það var löngu orðið tímabært að stækka, þar sem húsnæðið sem við vorum í var orðið of lítið.
Hér getum við boðið upp á alla þjónustu sem dýrin þurfa frá fæðingu til dánardags. Við erum hér með röntgentæki, sónartæki, blóðrannsóknartæki, fullbúna skurðstofu og fleira. Við erum líka með frábæra aðstöðu fyrir tannhreinsum og tanntöku dýra, ásamt allri annarri þjónustu sem dýrin þurfa,“ segir Tóta sem segir Mosfellinga ánægða með nýja dýraspítalann.

Glæsileg verslun
„Hér erum við líka með glæsilega verslun þar sem við leggjum áherslu á að vera með gæðavöru.
Við erum með mikið úrval af gæludýrafóðri frá til dæmis Royal Canin og Hills. Ég vanda valið á vörum í verslunina og verð með allt sem dýraeigandinn þarf á að halda.
Opnunartíminn hjá okkur er frá kl. 6-18 allar virka daga, auk neyðarþjónustu fyrir alvarleg tilfelli,“ segir Tóta að lokum og tekur vel á móti Mosfellingum og þeirra dýrum, stórum sem smáum.

Hanna Símonardóttir í heimsókn hjá Liverpool akademíunni.

Liverpool-skólinn verður haldinn í samstarfi við Aftureldingu í níunda sinn nú í júnímánuði.
Skólinn hefur stækkað og dafnað og nú koma 16 þjálfarar frá Liverpool til þess að sýna íslenskum fótbolltasnillingum hvernig þjálfunin fer fram hjá þessu fornfræga félagi.
Gera má ráð fyrir að iðkendur í ár verði rúmlega 350 talsins, en skólinn er haldin hér í Mosfellsbæ og á Akureyri í samvinnu við Þór. Undanfarin ár hefur verið uppselt í skólann í Mosfellsbæ.

Hugmyndin kvikaði á Barbados
Hanna Símonardóttir, einn af virkustu sjálfboðaliðum Aftureldingar, segir að hugmyndin hafi kviknað eftir samtal við Guðjón Svanson. Drengirnir hans höfðu farið í Liverpool-skóla á Barbados þegar fjölskyldan var í heimsreisu.
„Skömmu seinna er ég á leiðinni á leik í Liverpool og Gaui fékk þjálfarana sem hann hafði kynnst á Barbados til þess að hitta mig, en sá þjálfari var kominn í fullt starf hjá Liverpool Academy.
Í stuttu máli þá samþykkti hann að skólinn kæmi til prufu einu sinni. Níu árum seinna er hann ennþá í fullum gangi,“ segir Hanna sem er mjög stolt af Liverpool-skólanum í Mosfellsbæ.

Frábær ávinningur fyrir alla
„Skólinn er lítill á þeirra mælikvarða en þeir eru ánægðir með hvernig þetta gengur og hvernig við gerum hlutina. Þriggja ára reynslutíma lauk og við fengum langtímasamning. Þjálfarar Liverpool, iðkendur og foreldrar eru ánægð með okkur.
Að geta gefið íslenskum krökkum tækifæri á því að sækja æfingar hjá knattspyrnuskóla frá jafn sögufrægu, virtu félagi og Liverpool er frábær ávinningur fyrir Aftureldingu og Mosfellsbæ. Við eigum frábærara þjálfara en öll fjölbreytni er frábær og að krakkarnir fái að kynnast hugarfari erlendra þjálfara er ómetanlegt.“

Með Liverpool í blóðinu
Sjálf er Hanna líklega ein af hörðustu stuðningmönnum Liverpool á Íslandi og fer reglulega á leiki liðsins á Anfield. Hún segir fáa trúa sér þegar hún útskýrir að á tíma hafi hún ekki fylgst mikið með liðinu, enda hafi mikið verið að gera í barnauppeldi og lífinu.
„Það var elsti sonur minn sem reddaði þessu þegar hann kom heim úr skólanum einn daginn og gólaði úr forstofunni að Liverpool væri besta liðið og hann héldi með þeim. Þá datt ég aftur í gírinn og hef vart misst úr leik síðan,“ segir þessi kraftmikla kona að lokum.

Jóhann Guðjónsson og Bjarki Sigurðsson áttu stóran þátt í velgengni Aftureldingar í kringum aldamótin

Í vor eru 20 ár liðin frá því að karlalið Aftureldingar í handknattleik sópaði að sér öllum sigurlaunum sem voru í boði í íslenskum handknattleik. Afturelding var bikarmeistari í febrúar, deildarmeistari mánuði síðar og undir lok apríl lyftu Aftureldingarmenn Íslandsmeistarabikarnum í fyrsta og jafnframt eina skipti til þessa.
Afturelding lagði FH-inga með þremur vinningum gegn einum í úrslitarimmunni. Bjarki Sigurðsson, fyrirliði, tók við Íslandsmeistarabikarnum í Kaplakrika sunnudagskvöldið 25. apríl við ærandi fögnuð sennilega um eitt þúsund Mosfellinga sem flykktust á leikinn til að styðja lið sitt með ráðum og dáð.
„Ég man alltaf eftir ferðinni heim í Mosó eftir leikinn. Við fengum lögreglufylgd inn í bæinn og á móti okkur tók gríðarlegur fjöldi fólks við Hlégarð þegar við mættum með bikarinn. Þetta var einstök stund sem verður ævinlega ofarlega í minningunni,“ sagði Bjarki þegar hann spjallaði við tíðindamann á dögunum.
Lokaleikinn í rimmunni vann Afturelding 25:23, þar sem Bjarki var markahæstur með níu mörk. „Ég held að þetta sé eitt mesta ef ekki mesta afrek nokkurs liðs Aftureldingar í sögu félagsins,“ sagði Jóhann Guðjónsson sem var formaður handknattleiksdeildar Aftureldingar frá 1991 til 2003.

„Þetta vannst ekki fyrir tilviljun“
Jóhann var vakinn og sofinn yfir deildinni árum saman en með honum og samverkmönnum hans var lyft grettistaki í handknattleiknum í Mosfellsbæ á tíunda áratug síðustu aldar. „Þetta vannst ekki fyrir tilviljun. Aðdragandinn var langur og margt hafði verið gert á árunum á undan til að byggja upp liðið allt frá því að við fórum upp í efstu deild vorið 1993 með Guðmundur Guðmundsson núverandi landsliðsþjálfara sem þjálfara Aftureldingar,“ sagði Jóhann og benti á fyrsti stóri titilinn hafi unnist 1997 þegar Afturelding varð deildarmeistari í efstu deild karla. „Við unnum markvisst að því að ná þessu takmarki að verða Íslandsmeistarar en þessa tilteknu leiktíð féllu öll púslin saman.“
Fæðing gullliðsins 1999 var ekki auðveld því þótt Afturelding hafi á árunum á undan verið með eitt besta handknattleikslið landsins þá kvarnaðist úr hópnum eftir hvert tímabil. Leikmenn réru á önnur mið, ekki síst fóru þeir til Evrópu. Til dæmis yfirgáfu átta sterkir leikmenn frá Aftureldingu eftir tímabilið vorið 1998. Ýmist lögðu þeir skóna á hilluna góðu eða gengu til liðs við félagslið í Evrópu eða þá til annarra liða á Íslandi.

Margfaldir meistarar myndaðir að Varmá.

Litháarnir reyndust happafengur
„Satt best að segja var útlitið ekki bjart um sumarið 1998 þegar við voru byrjaðir að æfa. Sárafáir leikmenn voru á æfingum og ekki margt sem benti til þess að við yrðum með samkeppnishæft lið. Vissulega var talsvert af ungum og efnilegum strákum í hópnum en fleiri reynda leikmenn vantaði,“ sagði Bjarki. Jóhann tekur undir það og segist vel muna efti að hafa fengið samtal frá Skúla Gunnsteinssyni þjálfara þegar leið á sumarið þar sem Skúli hafði þungar áhyggjur af því að eiga ekki í lið um haustið ef fram héldi sem horfði. Skúli var þá á öðru ári sem þjálfari Aftureldingar. „Ég sagði Skúla að hafa ekki nokkrar áhyggjur. Við í stjórninni skyldum sjá um að fá leikmenn. Hann ætti bara að þjálfa,“ sagði Jóhann.
„Það fór að rofa til þegar leið fram á sumarið. Hafsteinn Hafsteinsson kom til okkar og síðan Litháarnir Gintaras Savukynas og Gintas Galkauskas. Þeir reyndust okkur sannkallaður happafengur. Savukynas var leikstjórnandi og við náðum alveg einstaklega vel saman. Það var eins hugur okkar væri einn og hinn sami. Sennilega var það lykillinn að sóknarleik okkar allt tímabilið,“ sagði Bjarki. „Alexei Trúfan og Galkauskas bundu síðan saman vörnina en að baki henni stóð landsliðsmarkvörðurinn Bergsveinn Bergsveinsson vaktina.
Þegar út í mótið var komið þá voru við með hörkugott lið en hópurinn var ekki breiður og við máttum alls ekki við miklum áföllum. Sem betur fer komumst við áfallalítið í gegnum veturinn en það var hætt við að það hefði verið á brattann að sækja ef margir hefðu meiðst alvarlega,“ sagði Bjarki.
Afturelding vann 16 af 22 leikjum sínum í deildinni, gerði tvö jafntefli og tapaði fjórum viðureignum. Stjarnan varð í öðru sæti fjórum stigum á eftir. ÍBV hafnaði í þriðja sæti 10 stigum frá Aftureldingu. Bjarki varð markakóngur deildarinnar með 169 mörk, skoraði 14 mörkum meira en stórskyttan Sigurður Valur Sveinsson sem lék þennan vetur með HK.

Mark Bergsveins vendipunkturinn í bikarleiknum
Rimma Aftureldingar og FH um Íslandsmeistaratitilinn var ekki eina einvígi liðanna á þessu tímabilið því lið félaganna léku einnig til úrslita í bikarkeppninni í Laugardalshöll laugardaginn 13. febrúar. Með frábærum síðari hálfleik vann Aftureldingarliðið úrslitaleikinn með fimm marka mun, 26:21.
„Mark Bergsveins markavarðar okkar yfir endilangan völlinn í jafnri stöðu í síðari hálfleik var vendi­punktur í úrslitaleiknum að mínu mati. Markið slökkti alveg á FH-liðinu,“ sagði Bjarki. Og Jóhann rifjar upp frá sama leik að séra Pálmi Matthíasson prestur hafi komið að máli við sig í hálfleik en þá var Aftureldingarliðið undir og sagt að það blési ekki byrlega fyrir Aftureldingarliðið. „Ég sagði Pálma að það hentaði okkur betur að vera undir og þess vegna litist mér vel á stöðuna. Hvort Pálmi fylgdi okkur eða FH að málum veit ég ekki en við snerum taflinu við í síðari hálfleik og unnum sannfærandi sigur.“

Bjarki var sóttur til Drammen
Að margra mati var koma Bjarka til Aftureldingar sumarið 1998 einn stærsti þátturinn í að Afturelding náði þessum einstaka árangri á fyrri hluta ársins 1999. Bjarki hafði farið á kostum með Drammen veturinn 1997-98 og hélt uppteknum hætti leiktíðina 1998-99 með Aftureldingu og var besti leikmaður Íslandsmótsins.
„Ég var í sambandi við Bjarka allan veturinn sem hann var hjá Drammen enda kynnst honum vel árin sem hann var hjá okkur fyrir Noregsdvölina. Þegar kom fram í ársbyrjun 1998 heyrði ég á Bjarka að hann var ekki sáttur í Drammen þótt honum gengi vel inni á leikvellinum.
Þegar komið var undir vor var ég á leið í bæinn á fimmtudegi eftir að hafa verið í snjósleðaferð. Þá hringdi ég í Einar Pál Kjærnested sem þá var framkvæmdastjóri handknattleiksdeildarinnar og sagði honum að við tveir værum á leið til Drammen morguninn eftir. Ég væri á leið niður í Kringlu á söluskrifstofu Flugleiða að kaupa tvo flugmiða fyrir okkur. Við fórum út morguninn eftir, sömdum við Bjarka á laugardeginum og héldum svo heim til Íslands.
Bjarki flutti heim í Mosfellsbæ með fjölskylduna um sumarið og hefur verið þar síðan eins og fleiri leikmenn sem léku með okkur á þessum árum,“ sagði Jóhann og bætti við:
„Ekki löngu eftir að við sömdum við Bjarka hafði Alfreð Gíslason samband við mig en hann var þá að taka við þjálfun Magdeburg í Þýskalandi. Hann vildi fá Bjarka til sín. Ég sagði við Alfreð að það væri ekkert mál ef félag hans vildi greiða Aftureldingu 10 milljónir króna fyrir. Ekkert varð af kaupunum.“

20 ára afmæli Gullliðsins fagnað
Jóhann og Bjarki segjast minnast þessa árs með gleði í huga. Aðeins góðar minningar standi eftir nú 20 árum síðar. Til stendur að hópurinn komi saman í vor eða í byrjun sumars að sögn Bjarka til að halda upp á áfangann. Góðar vonir standi til þess að svo að segja allir mæti, m.a. Litháarnir tveir, Gintaras Savukynas og Gintas Galkauskas sem búa ekki lengur hér á landi.
„Þessi ár voru skemmtileg, ekki síst meistaratímabilið. Áhuginn var gríðarlegur í bænum, fullt hús á öllum leikjum og við vorum með trausta stuðningsmannasveit sem lét mikið að sér kveða,“ segir Jóhann og bætir við.
„Þess utan voru við afar trausta bakhjarla að deildinni sem voru Bjarni Ásgeir Jónsson og fyrirtæki hans Holtakjúklingur og Örn Kjærnested sem átti Álftárós á þessum árum. Þeir voru burðarásar í fjárhagsstuðningi við deildina. Án þeirra framlaga hefði þetta ekki verið hægt. Fleiri fyrirtæki í bænum komu að og segja má að allir hafi lagst á árar með okkur á þessum árum enda var árangurinn samkvæmt því,“ sagði Jóhann Guðjónsson.

————————————-
Eftirtaldir voru í Íslandsmeistaraliði Aftureldingar: Ásmundur Einarsson, Bergsveinn Bergsveinsson, Jóhannes Lange og Sölvi Már Margeirsson voru markverðir. Aðrir voru Alexei Trúfan, Bjarki Sigurðsson, Einar Gunnar Sigurðsson, Gintaras Savukynas, Gintas Galkauskas, Hafsteinn Hafsteinsson, Haukur Sigurvinsson, Hilmar Stefánsson, Jón Andri Finnsson, Magnús Már Þórðarson, Maxime Trúfan, Níels Einar Reynisson og Sigurður Sveinsson.
Þjálfari var Skúli Gunnsteinsson og aðstoðarþjálfari mágur hans, Siggeir Magnússon. Óskar Jón Helgason var sjúkraþjálfari og Matthías Árni Guðmundsson var liðsstjóri.

Texti: Ívar Ben – Mynd: Raggi Óla

Bæjaryfirvöld skora á ráðherra að tryggja rekstrargrundvöll.

Sunnudaginn 31. mars sagði Mosfellsbær upp samningum um rekstur hjúkrunarheimilisins Hamra til samræmis við uppsagnarákvæði samninganna.
Bæjarstjóra var veitt heimild til uppsagnar á aukafundi bæjarráðs Mosfellsbæjar þann 29. mars. Byggir uppsögnin á vanefndum og/eða ófullnægjandi greiðslum enda standa þær ekki undir raunverulegum kostnaði við veitingu þeirrar þjónustu sem ríkið gerir kröfu um og ber ábyrgð á að veitt sé.
„Eins og staðan er núna er ekki rekstrargrundvöllur fyrir heimilinu,“ segir Haraldur Sverrisson, bæjarstjóri. „Til að auka á rekstrarvandann er fallinn úr gildi rammasamningur Félags forstöðumanna fyrirtækja í velferðarþjónustu og ráðuneytisins. Þá ákvað ráðuneytið að fella úr gildi svokallað RAI-mat, sem er ákvörðunargrunnur fyrir umönnunarþyngd sem og smæðarálag, sem kemur sér illa fyrir reksturinn á Hömrum.“
Haraldur segir að stjórn Hamra hafi tilkynnt bæjarfélaginu að heimilið sé ekki rekstrarhæft nema til komi frekari fjármunir.
Heimilið var vígt í júní 2013 og nú eru þar 33 rými en samið hefur verið um að stækka heimilið og að þar verði 74 rými. Haraldur segir að stækkunin muni laga rekstrargrundvöllinn en því miður séu nokkur ár þangað til að hún verði að veruleika.

Framlög duga ekki
„Mosfellsbær tók að sér með samningunum að annast verkefni sem ríkið ber lögum samkvæmt ábyrgð á að sé veitt. Það er miður að sú staða sé nú komin upp að Mosfellsbæ sé nauðugur sá einn kostur að rifta samningum við heilbrigðisráðuneytið um rekstur Hamra.
Við höfum um langt skeið haldið því að ráðuneytinu að framlög þess til starfseminnar duga ekki til að standa undir þeim kostnaði sem starfsemin kallar á til að unnt sé að mæta þeim kröfum sem ríkið sjálft gerir til þeirrar þjónustu sem inna þarf að hendi á hjúkrunarheimilinu Hömrum.
Ráðuneytið hefur ítrekað verið upplýst um afstöðu bæjarins og við kallað eftir viðbrögðum þess. Ráðuneytið var samhliða upplýst um áform okkar um að segja upp samningum ef viðunandi lausn fengist ekki á næstu dögum.
Nú liggur fyrir að samningnum hefur verið sagt upp og að óbreyttu tekur ráðuneytið innan skamms yfir þær skyldur sem leiða af starfsemi hjúkrunarheimilisins Hamra.“ sagði Haraldur Sverrisson.

Flæði er eftirsóknarvert ástand. Lykilatriði þegar kemur að vellíðan og hamingju. Flæði er þegar maður er að gera eitthvað sem manni finnst svo áhugavert, spennandi, gefandi eða skemmtilegt að maður gleymir öllu öðru. Spáir ekki í hvað klukkunni líður, hvað eigi að vera í matinn í kvöld eða hvað maður sé að fara að gera á morgun eða hinn. Það eina sem skiptir máli er það sem maður er að gera akkúrat núna.

Flæði er einstaklingsbundið. Það sem einn upplifir sem flæði getur öðrum fundist drepleiðinlegt. Það er eðlilegt, þótt við mannfólkið eigum margt sameiginlegt og séum félagsverur þá erum við um leið ólík. Brennum fyrir ólíkum hlutum. Vinnan okkar ætti að vera þannig að hún gæfi okkur kost á því að vera í flæði. Að við séum að sinna verkefnum sem okkur þykja áhugaverð og gefandi. Við höfum örugglega öll verið í vinnu þar sem tíminn virtist ekki líða. Stóð bara kyrr. Það er ekki flæði.

Því oftar sem við erum í flæði, því betur líður okkur. Best er að flæðislínur innan fjölskyldna séu að hluta sameiginlegar eða skarist á einhvern hátt þannig að einstaklingar innan þeirra upplifi gleði og hamingju við að gera hluti saman.
Lykilatriði er að velta þessu fyrir sér. Pæla í sjálfum sér og þeim sem standa manni næst. Hvað gefur okkur mest? Hvenær flýgur tíminn án þess að við tökum eftir því? Hvenær er ég svo niðursokkinn að ég tek ekki eftir neinu öðru?

Ég upplifði sjálfur magnað flæði í sjónum í síðustu viku. Á brimbretti, með fólkið mitt í kringum mig. Hvort ég náði öldu eða ekki skipti ekki máli. Það sem skipti máli var að vera úti í elementunum. Öldur, rigning, áskoranir, frelsi, samvera. Tíminn flaug, ekkert annað skipti máli eða komst að í þessa tvo klukkutíma. Mögnuð upplifun. Flæði.

Heilsumolar Gaua
Mosfellingur 4. apríl 2019

Mosfellingurinn Eyrún Linda Gunnarsdóttir löggiltur fótaaðgerðafræðingur útskrifaðist með hæstu einkunn frá Keili í janúar. Í kjölfarið opnaði hún fótaaðgerðastofuna Heilir fætur í verslunarkjarnanum í Hvera­fold í Grafarvogi.
„Samkvæmt Félagi íslenskra fótaaðgerðafræðinga eru helstu störf fótaaðgerðafræðinga fyrst og fremst að viðhalda og upplýsa almenning um heilbrigði fóta. Þeir greina og meðhöndla algeng fótavandamál eins og sveppasýkingar, vörtur, líkþorn, inngrónar táneglur og siggmyndun. Einnig bjóða þeir upp á sérsmíðuð innlegg og hlífðarmeðferðir sem ætlað er að létta á hinum ýmsu svæðum fótanna og þannig draga úr verkjum eða meinamyndunum,“ segir Eyrún Linda.

Allir gildir fyrir fótaaðgerð
„Ég tel að fótaumhirða sé mjög mikilvæg, sér í lagi hjá fólki með sykursýki, taugasjúkdóma, gikt, húðsjúkdóma, íþróttameiðsli eða sem einfaldlega á erfitt með að sinna fótunum sjálft. Svo eru auðvitað allir velkomnir sem vilja gera vel við sig.
Hægt er að fjárfesta í gjafabréfi á stofunni sem er að margra mati mjög sniðug gjöf fyrir þá sem eiga allt. Opið er á stofunni frá 9 á morgnana til 16 á daginn eða eftir samkomulagi og hægt er að bóka utan opnunartíma.“

Við eigum bara eitt sett af fótum
„Full meðferð í fótaaðgerð felur í sér fótabað, klipptar neglur og þynningu ef þess þarf ásamt snyrtingu niður með hliðum nagla. Einnig er sigg minnkað, líkþorn fjarlægð séu þau til staðar og fótanudd með góðu fótakremi í lokin.
Allir eru gildir fyrir fótaaðgerð hvort sem um er að ræða börn, unglinga, ungt fólk eða eldra. Við erum bara með eitt sett af fótum sem þarf að huga vel að,“ segir Eyrún Lind að lokum en hægt er að nálgast allar upplýsingar um stofuna á facebook síðunni Heilir fætur – fótaaðgerðastofa.

Á næstunni munu 19 ný hús bætast við Súluhöfða í Mosfellsbæ.

Hafnar eru framkvæmdir við gatnagerð við Súluhöfða 32–57. Um er að ræða nýja íbúðagötu milli núverandi neðsta botnlanga götunnar og golfvallarins við Leirvoginn. Gamli golfskálinn mun víkja á næstunni auk æfingaaðstöðu.
Samhliða gatnagerð er unnið að endurnýjun þrýstilagnar frá skólpstöðinni í Leirvogi. Reisa á 19 einbýlishús í þessari viðbót við Súluhöfðann.