Gallup kannar árlega þjónustu sveitarfélaga og mælir viðhorf íbúa til þjónustu í 20 stærstu sveitarfélögum landsins.
Könnunin hefur verið framkvæmd samfellt frá árinu 2008 og veitir yfirlit yfir þróun afstöðu íbúa til einstaka málaflokka yfir tíma og stöðu Mosfellsbæjar gagnvart öðrum sveitarfélögum.
Á árinu 2022 reyndust 92% aðspurðra frekar eða mjög ánægðir með sveitarfélagið sem stað til að búa á og hækkaði úr 89% frá fyrra ári og er Mosfellsbær í öðru sæti á landsvísu í þessari spurningu. Mosfellsbær var á síðasta ári fyrir ofan meðaltal sveitarfélaganna í níu spurningum af tólf. Þjónusta grunnskóla og þjónusta við fatlað fólk er hins vegar undir landsmeðaltalinu sem kallar á umbótavinnu næstu misserin og er sú vinna hafin.

Ánægja eykst með skipulagsmál
Ánægja íbúa eykst milli ára í sex spurningum og má þar auk ofangreindrar spurningar nefna ánægju með skipulagsmál þar sem skorið hækkar um eitt stig og óánægðum fækkar um 6%. Þar hækkar Mosfellsbær um tvö sæti milli ára í samanburði sveitarfélaganna. Það sama á við um afstöðuna til gæða umhverfisins þar sem ánægja eykst og Mosfellsbær ferðast upp töfluna.
Afstaða íbúa til þjónustu við barnafjölskyldur stendur í stað en þar sem meðaltalseinkunn annarra sveitarfélaga lækkar þá færist Mosfellsbær upp töfluna og sama hreyfing á sér stað milli ára í afstöðunni til þjónustu leikskóla sveitarfélagsins. Þar er Mosfellsbær í fjórða sæti á landsvísu og þeir sem njóta þjónustunnar gefa sveitarfélaginu einkunnina 4,4 á 5 punkta skala.

Hástökkvarar ársins í menningarmálum
Ánægja íbúa með aðstöðu til íþróttaiðkunar í Mosfellsbæ eykst milli ára og færist bærinn upp um tvö sæti á síðasta ári. Hástökkvarar ársins eru menningarmálin og þjónusta sveitarfélagsins á heildina litið þar sem ánægjan eykst og sveitarfélagið hækkar í báðum tilvikum um fimm sæti.
Verulegt tækifæri er hins vegar til umbóta þegar kemur að afstöðu íbúa til þess hvernig starfsfólk Mosfellsbæjar hefur leyst úr erindum þeirra þar sem skorið var 3,5 árið 2021 en lækkaði í 3,4 árið 2022.

Almenn vísbendingu um stöðu mála
Könnun Gallup á þjónustu Mosfellsbæjar hefur verið kynnt í bæjarráði. „Það er mjög gleðilegt að bæjarfélagið hefur hækkað á milli ára þegar kemur að lykilspurningunni um þjónustu bæjarfélagsins þegar á heildina er litið og deilir öðru sætinu á landsvísu með nokkrum öðrum sveitarfélögum,“ segir Regína Ásvaldsdóttir bæjarstjóri.
„Mikilvægt er að hafa í huga að könnunin veitir almenna vísbendingu um stöðu mála í einstaka málaflokkum og er hluti þeirra gagna sem nýtt eru til að þróa þjónustu Mosfellsbæjar. Það sem er gott við að fá reglulega mælingu á þjónustu bæjarins er að finna þá þætti sem þarfnast helst úrbóta.“

Viljum laga það sem þarfnast úrbóta
„Því miður er það þjónusta við fatlaða einstaklinga í ár eins og undanfarin ár og þar þurfum við einfaldlega að gera betur. Málaflokkurinn fékk aukið framlag í fjárhagsáætlun 2023 og við vonum svo sannarlega að þeir fjármunir skili sér í ánægðari þjónustuþegum og aðstandendum.
Það sama á við um málefni grunnskólans og við bindum miklar vonir við að aukin sérfræðiþjónusta í grunnskólum og vinna við innleiðingu farsældarhringsins verði til þess að styrkja þjónustuna og laga það sem þarfnast úrbóta.
Mosfellsbær vinnur nú að verkefnum til að hraða vinnu við stafræna þróun sveitarfélagsins. Hluti af þeirri vinnu mun fela í sér innleiðingu stafrænna lausna til að auka skilvirkni í svörun erinda og halda utan um samskipti bæjarins við íbúa,“ segir Regína Ásvaldsdóttir, bæjarstjóri.

Hjá Mosfellsbakaríi starfa bakarar sem hafa tileinkað sér fagleg vinnubrögð og nota einungis góð hráefni í sínar vörur.
Landssamband bakarameistara stendur árlega fyrir keppni um brauð ársins og köku ársins og hlaut Mosfellsbakarí að þessu sinni bæði verðlaunin. Það var Gunnar Jökull bakaranemi hjá Mosfellsbakaríi sem sigraði í keppninni um brauð ársins, en það er kamút súdeigsbrauð og er einstaklega ljúffengt og gott.
Það var svo bakarinn og kondítorneminn hjá Mosfellsbakarí Guðrún Erla Guðjónsdóttir sem vann árlegu keppnina um köku ársins. Sem að þessu sinni var unaðsleg Doré karamellumousse með passion-kremi og mjúkum herslihnetumarengsbotni, kakan er svo hjúpuð með gullglaze og skreytt með handgerðum súkkulaðilaufum. Það var matvælaráðherra Svandís Svavarsdóttir sem tók á móti fyrstu köku ársins 2023.

Eva Dís Björgvinsdóttir er nýr eigandi Aristó hárstofu sem staðsett er í Háholti 14. Hún hefur keypt stofuna af Ingu Lilju Hjálmarsdóttur og Guðrúnu Sveinsdóttur en þær stofnuðu stofuna árið 2003. Aristó verður því 20 ára í nóvember á þessu ári.

„Ég þekki aðeins til Aristó þar sem ég starfaði þar um tíma, þannig að þegar þetta tækifæri bauðst, að kaupa stofuna, sló ég til. Sömu starfsmenn verða áfram á stofunni ásamt því að ég bætist við og vonandi fleiri, það eru alla vega lausir stólar. Ég mun á næstunni fríska aðeins upp á stofuna og gera hana svolítið huggulega. Ég hef opnað fyrir tímabókanir hjá mér í gegnum noona appið þannig að hægt er að bóka tíma í gegnum netið. Einnig er hægt að hringja í síma 566-8989.

Fríður Esther Pétursdóttir eigandi verslunarinnar kinky.is selur unaðsvörur ástarlífsins og undirföt fyrir konur.

Fríður Esther fékk þá hugmynd í ársbyrjun 2019 að opna vefverslun með undirföt en henni fannst vanta á markaðinn ódýr en vönduð föt í öllum stærðum og gerðum. Salan hefur farið langt fram úr væntingum og í dag hefur Fríður opnað verslun við Laugaveg og hefur aukið vöruúrvalið til muna.
Fríður hefur einnig hug á að þjónusta landsbyggðina betur og hefur keypt litla rútu til að keyra á milli staða. Þetta yrði nýjung á Íslandi og hún er spennt að sjá hvernig móttökurnar koma til með að verða.
Fríður Esther er fædd á Selfossi 19. júlí 1975. Foreldrar hennar eru Elísa Elísdóttir fyrrv. kaupmaður og Pétur Hjaltason fyrrv. sparisjóðsstjóri á Selfossi.
Fríður Ester á tvö systkini, Anton f. 1972 og Guðbjörgu Gínu f. 1978.

Kom heim með mús í vasanum
„Ég er fædd og uppalin á Selfossi og átti yndislega æsku á þessum fallega stað þar sem allir þekktu alla. Fyrstu fimm árin mín bjuggum við í eldri hluta bæjarins en fluttum svo í nýja hlutann í hús sem foreldrar mínir byggðu. Ég minnist þess að búa innan um hálfkláruð hús með móann í bakgarðinum með tilheyrandi ævintýrum.
Ég elskaði öll dýr og á góðar minningar um kisuna mína, hundinn minn og páfagaukinn. Eitt sinn kom ég heim með hagamús í vasanum, mömmu og vinkonum hennar til lítillar gleði,“ segir Fríður Esther og hlær.
„Foreldrar mínir voru vinamörg og ég minnist dásamlegra ferðalaga en farið var í Galtalæk öll sumur. Þar var tjaldað og grillað og oft var haldið þar upp á afmælið mitt sem mér fannst æðislegt.“

Fer lítið fyrir saumaskap
„Ég gekk í barna- og gagnfræðaskóla á Selfossi og var heppin að vera með sömu krökkunum í bekk allan þennan tíma. Bekkurinn minn heldur enn hópinn og við stelpurnar hittumst reglulega í saumaklúbb þótt lítið fari fyrir saumaskapnum. Ég á bara hlýjar og góðar minningar frá skólaárunum.
Á sumrin var ég í sveit hjá afa og ömmu í Laugarási í Biskupstungum. Afi var garðyrkjubóndi og ég fékk að skottast um í gróðurhúsunum með honum. Það hefur örugglega samt verið meiri vinna fyrir hann að hafa mig heldur en fyrir hann að fá hjálp frá mér,“ segir Fríður Esther og brosir.
„Ég byrjaði í Fjölbrautaskóla Suðurlands en varð svo ófrísk af tvíburum þegar ég var 18 ára svo það varð lítið úr skólagöngu eftir það. Ég fór síðar á alls konar námskeið og styttra nám tengt störfum mínum.“

Vil hvergi annars staðar eiga heima
Eiginmaður Fríðar Estherar heitir Þorsteinn Magnús Guðmundsson en hann er uppalinn í Mosfellsbæ. Börn þeirra eru Jóhanna Ýr og Þórunn Petra f. 1993, Elís Aron f. 2001 og Aríella og Adríana f. 2011. Barnabarnið Vilhjálmur Þór er eins árs.
„Við fluttum í Mosfellsbæ 2008 og búum í húsi sem tengdaforeldrar mínir byggðu í Arkarholtinu. Hér er alveg hreint frábært að búa og ég vil hvergi annars staðar vera. Við hjónin höfum frá árinu 2013 tekið að okkur fósturbörn sem hafa komið og verið hjá okkur í mislangan tíma sem okkur þykir ofurvænt um.
Við fjölskyldan eigum sumarbústað í Kerhrauni í Grímsnesinu sem við erum að gera upp svo við reynum að vera þar eins mikið og við getum, sérstaklega á sumrin. Ég elska að skoða heiminn og hef verið dugleg að draga fjölskylduna í ferðalög. Við erum líka heilmikil sófafjölskylda, elskum að hafa kósýkvöld og horfa á góða mynd.“

Hefur ræktað hunda í tuttugu ár
„Ég hef nánast alla tíð unnið einhvers konar verslunarstörf, var deildarstjóri í Kaupfélaginu á Selfossi og verslunarstjóri hjá 10-11. Þegar við fluttum í Mosfellsbæ þá rak ég verslunina Hundaheim en ég seldi hana þegar ég tók við sem framkvæmdastjóri Hundaræktarfélags Íslands en þar starfaði ég í nokkur ár.
Ég hef verið að rækta hunda í yfir 20 ár bæði á Íslandi og í Póllandi í samstarfi með góðu fólki en ég á nokkra hunda líka í Póllandi. Hundaræktun á Íslandi getur verið mjög krefjandi vegna erfiðra innflutningsreglna. Ég ferðast mikið á hundasýningar erlendis og á orðið góða vini út um allan heim tengt þessu áhugamáli mínu sem ég er svo þakklát fyrir að geta stundað.“

Löngu hætt að vera gæluverkefni
Fríður Esther stofnaði vefverslunina kinky.is í ársbyrjun 2019 en hugmyndin kviknaði þegar henni fannst vanta á markaðinn ódýr en vönduð falleg undirföt í öllum stærðum og gerðum. Hún fann góðan framleiðanda og flytur vörurnar inn milliliðalaust.
„Ég var heimavinnandi á þessum tíma og ákvað að slá til og opna vefverslun og sé alls ekki eftir því. Ég byrjaði afar rólega og hef hægt og bítandi verið að auka vöruúrvalið og í dag er þetta löngu hætt að vera lítið gæluverkefni. Ég opnaði verslun á Laugaveginum í kjölfarið og jók úrvalið á kynlífstækjunum sem hefur fallið í góðan jarðveg.
Elstu dætur mínar hafa hjálpað mér heilmikið við reksturinn og sjá meðal annars um samfélagsmiðlana.“

Þetta yrði nýjung á Íslandi
„Ferðamenn hér á landi eru duglegir að koma til okkar í búðina og Íslendingar auðvitað líka og við eigum orðið okkar föstu viðskiptavini sem koma hingað aftur og aftur. Við elskum að vera á jaðrinum og gera eitthvað nýtt fyrir okkar viðskiptavini, þeir hafa líka verið duglegir að hafa samband og óska eftir sérpöntunum. Í versluninni bjóðum við einnig upp á vörur fyrir þá allra hörðustu ef við getum orðað það svo,” segir Fríður og brosir og bendir á vörurnar í hillunum.
Hugmyndin er líka sú að útbúa færanlega verslun, við keyptum litla rútu sem við höfum nefnt Kónginn. Okkur langar til að þjónusta landsbyggðina betur og fara með rútuna út á land. Þar gæti fólk komið og skoðað og jafnvel sótt pantanir sem keyptar hafa verið á netinu. Þetta yrði nýjung á Íslandi og ég er mjög spennt að sjá hvernig fólk mun taka á móti okkur.“
Ég spyr Fríði út í nafnið, kinky.is? „Já það er nú bara þannig að það sem einhverjum finnst óhefðbundið getur verið fullkomlega eðlilegt fyrir aðra svo mér fannst þetta bara passa ansi vel, lénið var laust svo ég kýldi bara á þetta,“ segir Fríður Esther að lokum er við kveðjumst.

Undanfarnar vikur hafa endurbætur og breytingar átt sér stað á Olís Langatanga sem er hluti af umbreytingarferli og nýrri ásýnd allra stöðva.
Stöðin hefur fengið mikla upplyftingu þar sem básum hefur verið komið fyrir í matsalnum og hann aðeins stækkaður svo betur fari um sem flesta. Einnig hefur verið frískað upp á allar innréttingar sem gerir heildaryfirbragð léttara.
Þjónustustöðin hefur aukið á fjölbreytnina og opnað Lemon míní með hollari valkosti fyrir viðskiptavini. Lemon míní er aðeins minni útgáfa af Lemon en þar er í boði fjórar vinsælustu tegundirnar af samlokum og djúsum frá Lemon.
Lemon er ferskur og safaríkur matur og hentar vel þeim sem velja sér hollari kosti. Á sínum stað eru svo ávallt safaríkir hamborgarar frá Grill 66 eins og margir þekkja og frábært úrval af annarri smávöru sem og bílavörum.

Mæta ólíkum þörfum viðskiptavinanna
„Á síðasta ári var gerður samningur við TVG-Zimsen og eiga viðskiptavinir kost á að fá sendar pantanir til okkar til að sækja og í leiðinni tankað bílinn og fóðrað magann. Þannig kappkostum við að mæta ólíkum þörfum viðskiptavina okkar,“ segir Elsa Forberg verslunarstjóri Olís í Mosfellsbæ.
„Við bjóðum gamla og nýja viðskiptavini hjartanlega velkomna og hlökkum til að þjónusta þá áfram.“

Jórunn Edda Hafsteinsdóttir fagstjóri hjúkrunar og svæðisstjóri Heilsugæslu Mosfellsumdæmis.

Jórunn Edda var ung að árum er hún hóf störf á sambýli en það var þar sem hún áttaði sig á við hvað hún vildi starfa í framtíðinni. Hún hóf nám í hjúkrunarfræði og eftir útskrift hóf hún störf á Landspítalanum þar sem hún starfaði í tólf ár. Hún segir árin þar hafa verið góð en starfið hafi oft á tíðum verið krefjandi.
Í dag stýrir hún Heilsugæslu Mosfellsumdæmis sem flutti í nýtt húsnæði að Sunnukrika árið 2021. Heilsuvernd er stór hluti af starfseminni svo það er sannarlega í mörg horn að líta.

Jórunn Edda er fædd í Vestmannaeyjum 23. mars 1975. Foreldrar hennar eru Guðfinna S. Kristjánsdóttir fv. bankastarfsmaður og Hafsteinn Stefánsson húsasmiður.
Jórunn á tvo bræður, Kristján Helga f. 1978 og Ívar Frey f. 1985.

Tel mig forréttindastelpu
„Ég fæddist í Vestmannaeyjum en bjó þar aldrei en móðir mín er ættuð þaðan. Mér þykir mjög vænt um Eyjarnar og þar á ég stóra fjölskyldu.
Ég ólst upp í sveit, í Túni í Flóa, rétt utan við Selfoss. Ég átti góða æsku og tel mig forréttindastelpu að hafa alist þarna upp og hafa enn aðgang að sveitinni. Foreldrar mínir voru með blandað bú í félagsbúi við afa minn og ömmu sem bjuggu á sama bæ. Það var gæfa að fá að alast upp í nálægð þeirra því þau eru fyrirmyndir mínar í svo mörgu.
Það hafði mótandi áhrif að taka þátt í sveitastörfunum og að valta og snúa á traktornum þegar aldur leyfði. Ég hafði gaman af því að keyra hann, maður sat með vasadiskóið og söng hástöfum lög með Greifunum.“

Hafði góð áhrif að koma fram
„Ófærð og rafmagnsleysi er eitthvað sem maður þekkti vel, þá var kveikt á olíulömpum og kertum. Ein jólin var svo brjálað veður að við þurftum að fara yfir til ömmu og afa á traktornum með jólapakkana bundna aftan á, það var rafmagnslaust þau jólin. Föðurbræður mínir léku alltaf jólasveina og þeir komu með pakkana í stórum poka alla leið inn í stofu, þetta er ljúf æskuminning,“ segir Jórunn og brosir.
„Ég gekk í barnaskólann í Þingborg en þetta var lítill sveitaskóli með um 30 börn, þar var skipt í yngri og eldri deildir. Skólastjórinn var mikill leikhúsáhugamaður og það voru sett upp leikrit fyrir jólin sem allir tóku þátt í. Þetta hafði án efa góð áhrif á það að koma fram og taka þátt.“

Skelltu sér á sveitaböllin
Jórunn gekk í gagnfræðaskólann á Selfossi og segir að það hafi verið mikil breyting að koma í stóran skóla. „Eftir útskrift úr gagnfræðaskólanum þá fór ég í Fjölbrautaskóla Suðurlands, það voru góð ár og þar kynntist ég mínum bestu vinkonum. Við vorum duglegar að ferðast og skemmta okkur á sveitaböllunum í Njálsbúð, Hvoli og Aratungu.
Á sumrin tók ég þátt í störfunum í sveitinni en sumarið eftir fermingu fór ég að vinna í humri í Vestmannaeyjum. Þá dvaldi ég hjá ömmu minni Helgu og það var skemmtilegt sumar. Eftir það starfaði ég hjá Kaupfélagi Árnesinga og við hin ýmsu verslunarstörf eftir það.“

Fór til Bandaríkjanna
„Eftir stúdentinn 1995 fór ég í eitt ár sem aupair til Bandaríkjanna. Ég var í New Jersey fylki og var mjög heppin með fjölskyldu. Tilgangurinn með þessari dvöl var að sjá heiminn og læra betur ensku því ég ætlaði í frekara nám.
Þetta var mjög þroskandi för, ég náði að ferðast til Flórída, Mexíkó og Kanada. Þetta var áður en internetið kom til sögunnar þannig að ég skrifaði um 350 bréf til vina og ættingja þetta árið og fékk annað eins til baka,“ segir Jórunn og brosir. „Eftir að ég kom heim þá starfaði ég einn vetur á bensínstöð en eftir það hef ég starfað við umönnun og hjúkrun.“

Ekkert gerist af sjálfu sér
Jórunn Edda er gift Óskari Sigvaldasyni frá Borgarnesi, hann rekur ásamt öðrum fyrirtækið Borgarverk. Þau eiga þrjá drengi, Sigvalda Örn f. 2002, Hafstein Ara f. 2007 og Halldór Orra f. 2011.
„Við fjölskyldan höfum gaman af því að ferðast, bæði um landið og erlendis og við förum mikið í sveitina, eins höfum við verið í jeppaferðum og útivist.
Drengirnir okkar hafa allir æft íþróttir með Aftureldingu, um tíma voru þeir allir í blaki og ég líka. Ég gaf kost á mér í barna-og unglingaráð blakdeildarinnar. Þátttaka í starfi Aftureldingar er gefandi og reyndist mér góð leið til að kynnast skemmtilegu og drífandi fólki. Við sem eigum börn í íþróttum megum ekki gleyma því að ekkert gerist af sjálfu sér og við verðum öll að taka þátt í einhvern tíma til þess að starf félagsins gangi upp, þá uppskera allir.“

Þetta var krefjandi á köflum
„Ég starfaði eitt sumar á sambýli á Selfossi og þar áttaði ég mig á að áhugi minn lægi í hjúkrun. Ég hóf nám í hjúkrunarfræði við Háskóla Íslands og útskrifaðist 2001. Ég hóf störf á Landspítalanum og starfaði þar í tólf ár, lengst af á almennri skurðdeild og þvagfæraskurðdeild. Þetta voru góð ár þótt starfið hafi verið krefjandi á köflum. Á þessum tíma tók ég einnig diplómanám í hjúkrun aðgerðasjúklinga við HÍ.
Haustið 2013 ákvað ég að breyta til, komin með þrjú börn og orðið flóknara að vera í vaktavinnu. Ég sótti um starf hjá Heilsugæslu Mosfellsumdæmis og hér hefur mér líkað mjög vel. Ég byrjaði sem skólahjúkrunarfræðingur en hef verið mest í ung- og smábarnavernd og á hjúkrunarmóttökunni.“

Skjólstæðingum fer fjölgandi
„Árið 2016 fór ég í klínískt diplómanám í heilsugæsluhjúkrun við Háskólann á Akureyri, hélt áfram námi og kláraði meistarapróf 2020 í heilbrigðisvísindum með áherslu á klíníska heilsugæslu í héraði.
Vorið 2021 bauðst mér að taka við sem fagstjóri hjúkrunar og svæðisstjóri heilsugæslunnar. Hér starfar gott starfsfólk, tæplega 30 manns, 7 starfsstéttir í mismunandi stöðugildum. Saman vinnum við að því að sinna og leysa úr erindum sem berast með hag skjólstæðinga okkar að leiðarljósi, en skjólstæðingum stöðvarinnar hefur farið fjölgandi.
Heilsuvernd er stór hluti af starfi heilsugæslunnar, mæðravernd, ung- og smábarnavernd, skólaheilsugæsla og heilsueflandi móttaka. Við erum sífellt að þróa þjónustuna til að sinna okkar fólki sem best. Í haust komum við af stað nýrri heilsueflandi móttöku aldraðra sem er góð og þörf viðbót. Við erum einnig með öfluga hjúkrunarmóttöku og dagvakt sem sinnir bráðveikum og slösuðum, ásamt hefðbundinni læknamóttöku. Á morgnana bjóðum við upp á stutta samdægurs læknatíma og einnig í lok dags.
Álag hefur verið mikið, sér í lagi síðustu tvö árin, það er krefjandi verkefni að sinna vel þeim erindum sem berast en hlúa um leið vel að starfsfólkinu. Árið 2021 fluttum við í nýja húsnæðið okkar í Sunnukrika sem hefur breytt gríðarlega miklu í starfi stöðvarinnar.
Ég er mjög stolt af því að tilheyra þeim góða hópi sem starfar á heilsugæslunni,“ segir Jórunn Edda og brosir er við kveðjumst.

Mosfellingur ársins 2022 er Halla Karen Kristjánsdóttir íþróttafræðingur og formaður bæjarráðs Mosfellsbæjar.
Halla Karen hefur verið óþreytandi við að hvetja bæjarbúa til hreyfingar og heilbrigðari lífsstíls í áratugi. Hún hefur m.a. starfrækt íþróttaskóla barnanna, kennt leikfimi í World Class og Í toppformi, haldið úti hlaupahópnum Mosóskokki, séð um Kvennahlaupið, unnið sem íþróttakennari í Borgarholtsskóla í 25 ár og hefur gert frábæra hluti varðandi hreyfingu eldri Mosfellinga síðustu ár.

Sögulegur sigur Framsóknar í vor
Halla Karen tók við sem formaður Framsóknarfélags Mosfellsbæjar í ágúst 2021 og í framhaldinu varð hún oddviti flokksins í febrúar 2022. Flokkurinn hafði ekki átt fulltrúa í bæjarstjórn Mosfellsbæjar í 12 ár en vann stórsigur í kosningunum vorið 2022 og fékk fjóra bæjarfulltrúa kjörna.
Fylgið rúmlega tífaldaðist þegar það fór úr 2,9% í 32,2% og í fyrsta skipti í rúma hálfa öld var annar flokkur en Sjálfstæðisflokkurinn orðinn stærstur í Mosfellsbæ. Framsókn myndaði nýjan meirihluta með Samfylkingunni og Viðreisn og réð nýjan bæjarstjóra. Halla Karen sjálf tók við sem formaður bæjarráðs.

Missti föður sinn eftir kosningarnar
„Þetta er búið að vera viðburðaríkt ár,“ segir Halla Karen. „Þetta er stór viðurkenning sem mér þykir óskaplega vænt um og kemur mér skemmtilega á óvart. Þótt margt hafi gengið vel hingað til þá er þetta mikil breyting á mínu daglega lífi sem hefur allt sína kosti og galla. Ég ætla bara að vera alveg hreinskilin með það.
Þetta var mjög erfitt ár fyrir mig líka en ég missti minn helsta stuðningsmann, föður minn og vin, tveimur vikum eftir þennan stóra sigur okkar. Það má segja að þessir mánuðir hafi verið mjög lærdómsríkir og einkennst á sama tíma af gleði og sorg.
Halla Karen hefur áður tekið þátt í pólitík á lífsleiðinni og oft hefur verið reynt að fá hana til þess aftur. „Mér hefur bara ekki fundist rétti tímapunkturinn, fyrr en kannski núna. Ég er komin á miðjan aldur og reynslunni ríkari, dætur okkar Ella orðnar stórar þannig að ég hugsaði með mér, af hverju ekki að slá til og prufa og hafa áhrif á samfélagið okkar? Við tók einstaklega krefjandi og spennandi kosningabarátta.
Við vorum með vel samsettan hóp í Framsókn og það var eitthvað í loftinu sem small svo allt að lokum. Við vorum á réttum tíma á réttum stað og ég vil taka það fram að ég er alls ekki ein í þessu. Við erum kröftugur, góður og fjölbreyttur hópur og saman erum við sterk. Allt fólk sem hefur látið gott af sér leiða til samfélagsins á einn eða annan hátt.“

Þakklát fyrir að hafa ráðið bæjarstjóra
Var aldrei ákall um að þú settist sjálf í bæjarstjórastólinn eftir sigurinn?
„Við vorum búin að gefa það út að við ætluðum að ráða bæjarstjóra en auðvitað geta forsendur alltaf breyst. Það hefði líka alveg eins getað verið einhver annar af listanum. Í dag er ég mjög þakklát að við fórum þessa leið, að ráða í stöðuna.“ Regína Ásvaldsdóttir tók við sem bæjarstjóri í byrjun september. „Hún er einmitt það sem okkur vantaði á þessum tímapunkti, öflug, klár, mannleg og kröftugur reynslubolti.“
Nýr meirihluti hefur nú starfað í rúmt hálft ár og Halla Karen segist finna að ábyrgðin sé mikil. „Ég er að stíga vel út fyrir þægindarammann, margt er skemmtilegt og annað er örlítið minna skemmtilegt.
Ég vil standa við þá ábyrgð sem mér var falin og því upplifi ég oft að ég sé alltaf í vinnunni en auðvitað þarf ég að finna jafnvægi í þessu öllu. Eigum við ekki að segja að það sé áramótaheitið mitt. Tíminn og reynslan í þessu starfi mun væntanlega hjálpa mér að skipuleggja tímann minn betur.“

Vilja öll gera bæinn betri
„Ég veit ekki hvort ég sé einhver brjálaður pólitíkus en ég hef mikinn áhuga á fólki og mig langar að hafa áhrif á hvernig samfélagi við búum í. Bæjarbragurinn þarf að vera góður og tækifærin eru mörg.
Með nýjum meirihluta koma auðvitað breyttar áherslur en mín draumsýn er í raun sú að við bæjarstjórnin gætum unnið enn meira saman, af því að ég veit að við höfum sama markmiðið, að gera bæinn okkar betri. Það væri þá hægt að sleppa því að eyða púðri í það sem minna máli skiptir.“
Í dag er Halla Karen í leyfi frá kennslunni í Borgarholtsskóla, sem var löngu ákveðið, en kemur sér nú vel við að aðlagast nýjum veruleika í pólitíkinni. Þá er hún einnig í háskólanum í ýmsum heilsutengdum kúrsum en segist ekki vera allra duglegasti námsmaðurinn þar, í augnablikinu.