Styrkjum úthlutað úr Klörusjóði

Á dögunum voru afhentir styrkir úr Klörusjóði en markmið Klörusjóðs er að stuðla að nýsköpun og framþróun í skóla- og frístundastarfi í Mosfellsbæ.
Sjóðnum er ætlað að styrkja verkefni sem unnin eru í einstökum skóla eða í samstarfi á milli skóla og var í ár lögð áhersla á verkefni á sviði upplýsinga- og tæknimála.
Nafn sjóðsins, Klörusjóður, er til heiðurs Klöru Klængsdóttur (1920-2011). Klara útskrifaðist frá Kennaraskóla Íslands árið 1939 og hóf sama ár kennslu við Brúarlandsskóla. Hún starfaði alla sína starfsævi sem kennari í Mosfellsbæ.

ALLT fasteignasala opnar í Kjarna

ALLT fasteignasala hefur opnað útibú í Þverholti 2. Fasteignasalan er staðsett í gamla Íslandsbankarýminu í Kjarnanum en fyrir eru starfsstöðvar í Reykjanesbæ, Grindavík og Vestmannaeyjum.
Kristinn Sigurbjörnsson, annar eigenda ALLT, hefur starfað hjá fyrirtækinu síðan 2016. Sjálfur hefur Kristinn búið í Mosfellsbæ í þrjú ár og telur að með allri þeirri uppbyggingu sem hefur átt sér stað í bæjarfélaginu undanfarið hafi skapast aukið rými fyrir fleiri fasteignasölur.
„Það er auðvitað mikil fjölgun íbúa hér í bænum og ég sé mikla möguleika í að þjónusta fólk í bæði kaupum og sölu með mína þekkingu,“ segir Kristinn sem er byggingafræðingur og húsasmíðameistari að mennt og þekkir því ferlið allt frá grunni. „Einnig get ég aðstoðað byggingaverktakana frá upphafi, þegar þeir eru að hanna og breyta, og komið þannig fyrr að verkefnunum.“

Þjónusta allt höfuðborgarsvæðið
ALLT er framsækin og hágæða fasteignasala sem leggur áherslu á ánægjuvog bæði kaupenda og seljanda, öryggi og nákvæmni í öllum vinnubrögðum og framsækni í framsetningu og kynningu á eignum sem eru til sölu- eða leigumeðferðar hjá fyrirtækinu.
Útibúið í Mosfellsbæ mun þjónusta allt höfuðborgarsvæðið og höfðu þeir lengi haft augastað á húsnæði í Mosfellsbæ. „Fólk er nánast hætt að koma inn á fasteignasölurnar, við vinnum í raun bara heiman frá þeim sem eru að selja og getum því verið hvar sem er,“ segir Kristinn.
Í heildina starfa 15 manns hjá fasteignasölunni, þar af 8 hér í Mosfellsbæ. „Við hvetjum bæjarbúa til að kíkja til okkar í kaffi og spjall eða fá góðar ráðleggingar,“ segir Kristinn og bætir við að skráðum eignum hjá þeim í Mosfellsbæ fari ört vaxandi.

Jóna Benediktsdóttir ráðin skólastjóri Varmárskóla

Jóna Benediktsdóttir hefur verið ráðin í starf skólastjóra Varmárskóla frá 1. ágúst. Hún er með B.Ed gráðu frá KHÍ, meistaragráðu í sérkennslufræðum og diplómu í stjórnun menntastofnana frá HÍ. Hún hefur einnig setið námskeið í stjórnun og opinberri stjórnsýslu.
Jóna hefur starfað sem grunnskóla­kennari, aðstoðarskólastjóri til fjölda ára og sem skólastjóri við grunnskólann á Ísafirði. Frá 2018 hefur hún starfað sem skólastjóri við grunnskólann á Suðureyri. Jóna hefur tekið þátt í fjölmörgum þróunarverkefnum, haldið námskeið og ritað greinar um skólamál. Jóna hefur sinnt ýmsum trúnaðarstörfum og hefur gegnt formennsku í félagi um „Uppbyggingu sjálfsaga“ og hefur réttindi til að kenna þau fræði.

Kosið um 29 tillögur í Okkar Mosó 2021

Rafræn kosning er hafin í lýðræðisverkefninu Okkar Mosó 2021. Þar gefst íbúum tækifæri á að kjósa sín uppáhalds verkefni til framkvæmda, verkefni sem þeim þykja gera bæinn betri.
Um er að ræða forgangsröðun og úthlutun fjármagns til framkvæmda í nærumhverfi íbúa í Mosfellsbæ.
Alls bárust 140 fjölbreyttar tillögur að verkefnum í hugmyndasöfnuninni, talsvert fleiri en árin 2017 og 2019. Hugmyndirnar voru metnar af hópi sérfræðinga á umhverfissviði Mosfellsbæjar og lagt var mat á kostnað við hönnun og framkvæmd. Afrakstur þeirrar vinnu var tillaga um 29 hugmyndir sem voru lagðar fram til kynningar í lýðræðis- og mannréttindanefnd og eru þær nú komnar í kosningu meðal íbúa Mosfellsbæjar. Kosningin fer fram á slóðinni kosning2021.mos.is sem stendur yfir þessa vikuna til og með sunnudagsins 6. júní.

Tvöfalt vægi með hjarta
Íbúar velja þær hugmyndir sem þeir vilja kjósa á kosningasíðunni. Hægt er að kjósa áfram hugmyndir fyrir samtals upphæð allt að 35 milljónum. Mikilvægt er að vita að þegar kosið er þarf ekki að fullnýta fjármagnið. Með því að kjósa eitt eða fleiri verkefni velur íbúi að gefa þeim atkvæði sitt. Kjósendur geta líka sett hjarta við eina af þeim hugmyndum sem þeir kjósa og þannig gefið þeirri hugmynd tvöfalt vægi, tvö atkvæði í stað eins.

15 ára og eldri geta kosið
Ungmenni sem verða 15 ára á árinu geta haft áhrif og kosið. Það þýðir að verðandi 10. bekkingar geta komið sínu áliti á framfæri. Um er að ræða íbúakosningu sem er framkvæmd á grundvelli ákvæða sveitarstjórnarlaga þannig að allir kjósendur þurfa að notast við rafræn skilríki eða Íslykil til þess að greiða atkvæði.

Íbúakosningin er hafin
Íbúar í Mosfellsbæ eru hvattir til þess að taka þátt í að velja hugmyndir og að hvetja aðra til þess að kjósa á síðunni kosning2021.mos.is.
Nánari upplýsingar er að finna á mos.is/okkarmoso og í kápunni sem hylur Mosfelling að þessu sinni.
Það er kjörið að losa kápuna af blaðinu til þess að virða allar hugmyndir fyrir sér á einni opnu og jafnvel hengja á ísskápinn til að minna heimilismenn á að kjósa.

Hér getur þú kosið: kosning2021.mos.is

 

Nettó opnar í Mosfellsbæ

Gunnar Egill framkvæmdastjóri verslunarsviðs og Jón Steinar verslunarstjóri Nettó í Mosfellsbæ.

Föstudaginn 4. júní mun Nettó opna nýja verslun við Sunnukrika 3 í Mosfellsbæ. Unnið hefur verið hörðum höndum að því að standsetja rýmið síðustu vikur. Í Sunnukrika er einnig að finna heilsugæslu, apótek, bensíndælur og kjötbúð.
„Við höfum horft til Mosfellsbæjar mörg undanfarin ár og erum ótrúlega spennt fyrir því að opna,“ segir Gunnar Egill Sigurðsson framkvæmdastjóri verslunarsviðs Samkaupa. „Staðsetningin er mjög spennandi og með þeim flottu fyrirtækjum og þjónustu sem er í húsinu er ljóst að þjónusta við íbúa mun stórbatna. Þetta er önnur græna verslun okkar sem þýðir að öll tæki eru keyrð á umhverfisvænum orkumiðli, LED lýsing er í versluninni, allt sorp er flokkað, allir frystar og megnið af kælum eru lokaðir svo eitthvað sé nefnt.“

Leiðandi í heilsusamlegum og lífrænum vörum
„Verslun okkar er rúmgóð með miklum þægindum, björt og vítt til veggja. Við leggjum mikla áherslu á ferskvöruna og það fyrsta sem mætir þér er brakandi ferskt ávaxta- og grænmetistorg. Nettó er leiðandi í heilsusamlegum og lífrænum vörum og fá þær vörur mikið rými,“ segir Gunnar Egill.
Verslanir Nettó eru staðsettar á 17 stöðum á landinu og bætist nú glæsileg verslun við í Mosfellsbæ. Nettó er í eigu Samkaupa hf. og var fyrsta lágvöruverslunin til að opna netverslun á Íslandi. Þá er verið að innleiða vildarkerfi sem gildir í öllum Nettóverslunum sem ber heitið Samkaup í símann og veitir viðskiptavinum fastan afslátt af innkaupum og aðgang að sértilboðum.

Þrautin

Við héldum KB þrautina nýverið. KB þrautin er utanvegahlaup með fjölbreyttum þrautum sem gera lífið skemmtilegra. Fólk þurfti til dæmis að klifra yfir veggi og upp kaðla, skríða undir gaddavír, labba í djúpu drullusvaði og upp langa og bratta brekku, bera þunga hluti á milli staða og prófa sig á jafnvægis­slá. 100 manns tóku þátt í þrautinni. Sumir fóru þetta sem einstaklingar, aðrir fóru í gegnum þrautina sem lið. Það gladdi mig mikið að sjá og heyra hvað þátttakendur voru ánægðir þegar þeir komu í mark. Ánægðir með að hafa klárað verkefnið, tekist á við erfiðar aðstæður og komist í gegnum þær.

Fólk hafði sérstaklega gaman af þeim þrautum sem komu þeim á óvart, drullugámurinn hans Leibba og A-veggurinn voru oft nefnd í því sambandi. Annað sem gladdi mig mjög var að sjá svipinn á fólki sem var, fyrir þrautina, efins um að það gæti þetta. Það er ólýsanlegur svipur, einhvers konar mögnuð blanda af stolti og gleði.

Mér fannst frábært að sjá öfluga einstaklinga fara í gegnum þrautina af miklum krafti, gefa allt sitt í hana. En það sem mér fannst allra vænst um, var að fylgjast með hópunum sem tækluðu verkefnin sem eitt teymi og fylgdust þannig að í gegnum alla þrautina. Þetta voru ólíkir hópar, vinahópur, stórfjölskylda, vinnufélagahópur og æfingafélagahópur komu meðal annars við sögu í þrautinni og stóðu sig virkilega vel sem sterkar liðsheildir. Sterkari saman, kom vel í ljós í KB þrautinni. Ég er búinn að vera stúdera síðastliðna mánuði hvað einkennir öflug teymi og hvað þarf að hafa í huga við uppbyggingu á sterkum teymum, margt af því sem ég hef verið að læra kom fram hjá þátttakendum í þrautinni.

Það er svo ánægjulegt að geta styrkt aðeins hið góða starf í sumarbúðum Reykjadals eftir hlaupið, en allar tekjur af hlaupinu runnu til þeirra. Njótum sumarsins!

Heilsumolar Gaua
Mosfellingur 3. júní 2021

Þjónusta jarðvarmavirkjanir og veitur á öllu landinu

Mosfellingarnir Ingvar Magnússon, Baldur Jónasson og Jóhann Jónasson.

Deilir er öflugt og ört stækkandi fyrirtæki sem staðsett er í Völuteig í Mosfellsbæ. Deilir er tækniþjónusta sem býður fjölbreyttar véla- og tæknilausnir til fyrirtækja sem stafa í orkuiðnaði og veitustarfsemi.
Það var Baldur Jónasson sem stofnaði Deili árið 2008, Ingvar Magnússon og Jóhann Jónasson komu svo seinna inn í eigandahópinn. „Fyrst um sinn þjónustaði fyrirtækið eingöngu Orkuveitu Reykjavíkur. Þetta þróaðist hratt í það að við fórum fljótt að þjónusta öll orkuver á landinu.
Við höfum alltaf verið fókusaðir á græna orku, á jarðorkuverin og veiturnar. Við höfum skapað okkur sérstöðu á þessu sviði,“ segir Baldur sem starfar í dag sem verkefnis- og rekstrarstjóri Deilis.
Nýverið komu nýir eigendur að félaginu sem gefur fyrirtækinu tækifæri á að styrkja þá þekkingu og þjónustu sem Deilir stendur fyrir.

Mennirnir á bakvið tjöldin
„Það má segja að við séum mennirnir á bakvið tjöldin, okkar hlutverk er að notandi raforku og vatns verði ekki fyrir truflun. Okkar hlutverk er að þjónusta vélbúnaðinn, við reynum að hámarka þann tíma sem orkuverin eru í gangi með því að lágmarka bilanir með því að sjá til þess að vélbúnaðurinn sé í góðu ásigkomulagi.
Við mælum árangur okkar í því að rekstur þessara virkjana gangi truflunarlaust árum eða jafnvel áratugum saman. Þegar farið er í að stoppa vélbúnað til að gera við þá pössum við að þau verkefni séu vel undirbúin og taki sem skemmstan tíma og að viðgerðin endist lengur en áður,“ segir Jóhann Jónasson framkvæmdastjóri Deilis.

Starfsmannhópurinn stækkað ört
Í dag starfa yfir 60 manns hjá Deili en fyrirtækið festi kaup á nýju 2.000 fm húsnæði við Völuteig fyrir rúmu ári.
„Eftirspurnin eftir okkar þjónustu er alltaf að aukast. Starfsmannahópurinn okkar hefur stækkað um helming á einu ári.
Við erum duglegir að fylgjast með þróun í þessum málum og höfum komið okkur upp góðu tengslaneti. Við erum í góðum samskiptum við sérfræðinga á þessu sviði bæði í Evrópu og Bandaríkjunum. Við flytjum inn vélbúnað og varahluti og fáum oft sérfræðing að utan í viðgerðir og viðhaldsverkefni,“ segir Ingvar sem sér um sölu- og tæknimál hjá Deili.

Þekking til útflutnings
„Hér höfum við byggt upp þjónustumiðstöð fyrir virkjanir og veitur á öllu landinu. Hingað koma fulltrúar þeirra til að ná í sérfræðiþekkingu. Þetta gerum við með að hafa vel þjálfað og hæft starfsfólk í sérhæfða þjónustu. Áreiðanleiki er ein af höfuðdyggðunum okkar því að viðskiptavinurinn þarf að geta treyst á okkur, fengið þá þjónustu sem hann þarf í réttum gæðum og á réttum tíma.
Hér hefur byggst upp mikil þekking og sérhæfing á rekstri og viðhaldi tæknibúnaðar, verðmæt þekking sem við erum að vinna að útflutningi á til annarra landa,“ segir Jóhann að lokum.

Draumurinn orðinn að veruleika

Fyrsti íslenski rjómalíkjörinn, Jökla, er kominn á markað. Pétur Pétursson mjólkurfræðingur hefur þróað drykkinn síðastliðin 14 ár en þetta er í fyrsta sinn hérlendis sem framleiddur er áfengur drykkur úr íslenskri mjólk og þar sem mysa er nýtt við gerð líkjörs.
Pétur fékk hugmyndina eftir að hafa fengið að smakka heimatilbúinn líkjör úr hrímaðri mjólkurkönnu beint úr frystinum hjá bónda á Ítalíu. Hann ákvað þegar heim var komið að gera tilraunir með sinn eigin drykk og nú er sá draumur orðinn að veruleika.

Pétur er fæddur í Reykjavík 30. júlí 1964. Foreldrar hans eru þau Matthildur Jóhannsdóttir söngkona og Pétur Guðmundsson búfræðingur.
Pétur á þrjú systkini, Ragnheiði f. 1959, Baldvin f. 1962 og Alan Má f. 1976.

Man hvað hún skrifaði vel
„Ég flutti í Mosfellssveit þegar ég var tveggja ára gamall og foreldrar mínir byggðu sér hús í Markholti 18. Það var gaman að fá nokkur uppeldisár í sveitinni, svona sveit með sjarma.
Ég man þegar Ragnheiður systir mín keppti í sundi á 17. júní í Varmárlaug. Ég var svo stoltur þegar hún stakk sér til sunds því nánast allir Mosfellingar voru mættir til að horfa.
Þegar ég var 7 ára þá fluttum við til Reykjavíkur og ég ól manninn í Vogahverfinu. Ég var því fyrstu tvö árin mín í skólaskyldu í Varmárskóla og ég man hvað Klara Klængsdóttir kennarinn minn skrifaði vel, ég vildi alltaf skrifa svona vel eins og hún.
Ég fór svo í Vogaskóla og kláraði grunnskólann þar, smíði, skrift og landafræði voru mín uppáhaldsfög ásamt íþróttunum.
Staða mín er því sú að ég held bæði með Aftureldingu og Þrótti,“ segir Pétur og brosir.

Fór til Danmerkur í nám
Pétur var ekki viss um hvað hann langaði til að gera eftir grunnskólanámið svo hann fór að vinna sem aðstoðarbókbindari. Síðar hóf hann störf sem tollvörugeymsluvörður hjá Sambandi íslenskra samvinnufélaga. Hann byrjaði í rafvirkjanámi en fór síðan til Danmerkur í mjólkurfræðinám og bætti svo við tæknifræðinámi. Árin í Danmörku urðu fimm, bæði við nám og störf.
Eiginkona Péturs er Sigríður Sigurðardóttir viðkiptafræðingur en hún starfar hjá Marel. Þau eiga tvö börn, Sindra Þór f. 1987 sem starfar sem flugumsjónarmaður hjá SunAir í Danmörku og Stefaníu Ósk f. 1995 en hún er í mastersnámi í iðnaðarverkfræði í Danmörku. Barnabarnið Benjamín Thor er fæddur 2020.
„Við fjölskyldan fluttum í Mosfellsbæ árið 2000 eftir ábendingu um frábæra eign frá Sigrúnu Björgu frænku minni. Hér líður okkur vel og útivera er í miklu uppáhaldi hjá okkur fjölskyldunni, hlaup, ganga og hjólreiðar og að sjá um að hundarnir fái sína hreyfingu. Við förum öll á skíði og höfum stundað þau vel, fjalla-, svig- og gönguskíði. Það er ekkert betra en að vera úti í náttúrunni,“ segir Pétur.

Tökum púlsinn á búskapnum
„Eftir heimkomu starfaði ég sem mjólkurfræðingur hjá Emmessís en fór síðan út í sölumennsku. Starfaði hjá Sápugerðinni Frigg og sá þar um sölu á hreinlætisvöru fyrir landbúnaðinn. Leiðin lá síðan til Áburðarverksmiðjunnar sem síðar sameinaðist Fóðurblöndunni þar sem ég starfa í dag sem sölustjóri.
Ég hitti bændur reglulega og við tökum saman púlsinn á búskapnum og gerum hann enn betri.“

Hún var stoð mín og stytta
„Ég fór líka út í það að læra óperusöng og hóf nám í Söngskólanum í Reykjavík, fyrst í almennt söngnám, síðan í ljóða- og aríudeild skólans. Minn aðalkennari var Snæbjörg Snæbjarnardóttir, hún leiddi mig í gegnum námið og var mín stoð og stytta. Einnig kenndi Garðar Cortes mér tæknina í óperukórnum og Signý Sæmundsdóttir.
Að námi loknu tók ég þátt í minni fyrstu óperu, Leðurblökunni eftir Strauss, sem frumsýnd var í Íslensku óperunni árið 1999. Þessi uppfærsla var síðan sýnd einu sinni í Færeyjum og spannar það allan minn erlenda söngferil í óperusöng.
Alls urðu óperurnar 16 sem ég tók þátt í og er mér minnisstæðust fyrsta óperan sem frumsýnd var í Hörpu, Töfraflautan eftir Mozart, en hún var sýnd fyrir fullu húsi kvöld eftir kvöld.
Þannig að það má nú segja að ég hafi fetað í fótspor foreldra minna þar sem ég starfa bæði við landbúnað og söng,“ segir Pétur og hlær.

Viðbrögðin létu ekki á sér standa
Það hefur alltaf blundað í Pétri að gera eitthvað sérstakt úr mjólk og eins og áður sagði þá fékk hann hugmynd að framleiðslu rjómalíkjörsins Jöklu eftir að hafa smakkað heimatilbúinn mjólkurlíkjör hjá bónda á Ítalíu. Honum fannst þetta skemmtileg stemning og bragðið kom honum virkilega á óvart.
„Ég hófst handa við að koma hugmyndinni í framkvæmd og byrjaði að dunda við þetta í eldhúsinu heima hjá mér. Gestum og gangandi var gefið að smakka, viðbrögðin létu ekki á sér standa svo ég fór yfir á næsta stig og fór alvarlega að huga að framleiðslu á drykknum.“

Sá hvítfyssandi jökulá
Í þróunarferlinu fékk Pétur styrk frá verkefninu „Mjólk í mörgum myndum“ við að vinna að hugmynd sinni en verkefnið var á vegum Auðhumlu og Matís sem veitir nýsköpunarstyrki til að þróa nýjar vörur úr mjólk.
„Ég vildi hafa líkjörinn eins íslenskan og eins mikið unninn úr mjólkinni og hægt er og ég kalla hana hvíta gullið. Ég er að breyta mjólk í vín og nota mjólk og rjóma og eins viðbætt mjólkurprótein í stað þykkingarefna. Eins er sjálfbærni í Jöklu þar sem búinn er til vínandi úr ostamysu sem annars væri hent. Vinsælustu bragðefni Íslendinga eru súkkulaði og lakkrís og var því tilvalið að vinna með það svo ég bætti þeim bragðefnum við drykkinn.
Á upphafsárunum var ég að gera tilraunir með vanillukorn og rjóma. Ég hristi prufuglasið og sá þá fyrir mér hvítfyssandi jökulá með sandkornum á fleygiferð í tilraunaglasinu. Þá hugsaði ég að þetta væri eins og stórbrotin jökulá á Íslandi, þá kom nafnið sjálfkrafa upp í kollinum á mér, Jökla.“

Stór stund fyrir mig og mína fjölskyldu
„Mér finnst ég standa í þakkarskuld við íslenskan landbúnað og bændur og vona svo sannarlega að hægt verði til framtíðar litið að auka við mjólkurkvótann um heilan helling nú þegar sala á Jöklu hefst frá og með deginum í dag.
Eftir 14 ára þróun er draumur minn loks orðinn að veruleika, þetta er stór stund fyrir mig og mína fjölskyldu sem hefur staðið þétt við bakið á mér.
Ég held að þessi drykkur eigi eftir að falla vel í kramið bæði hjá landsmönnum og ferðamönnum,“ segir Pétur sem er ekkert annað en bjartsýnn á að vel takist til.

Hjartað slær alltaf heima í Mosfellsbæ

Mosfellska hljómsveitin KALEO hefur farið sigurför um heiminn en strákarnir fluttu til Bandaríkjanna fyrir sex árum.
Ný plata sveitarinnar, Surface Sounds, leit dagsins ljós nú nýverið eftir að útgáfu hennar var frestað vegna kórónuveirufaraldursins. Hún hefur nú þegar fengið frábærar viðtökur um allan heim.
Meðlimir hljómsveitarinnar KALEO eru þeir Jökull Júlíusson, Davíð Antonsson, Daníel Ægir Kristjánsson og Rubin Pollock.
Sökum COVID hefur hljómsveitin verið á Íslandi í rúmt ár og leitar að æfingaaðstöðu til að undirbúa sig undir þriggja ára heimstúr sem fram undan er til að fylgja eftir nýju plötunni.
Við hittum Jökul Júlíusson forsprakka sveitarinnar og spurðum út í tímamótasamstarf við Aftureldingu, rokklífið og allt það helsta sem okkur þyrsti í að vita.

Æfði á yngri árum með Aftureldingu
Hvernig hafa viðbrögðin við nýju plötunni verið?
Þau eru búin að vera gífurlega góð í alla staði og með mest seldu plötum á heimsvísu eftir fyrstu söluviku

Og hvernig gekk að vinna hana?
Það var langt og strangt ferli. Ég hóf upptökur á meðan ég var enn á tónleikaferðalagi 2017 bæði í rútunni og mismunandi hljóðverum víða um heim þegar frídagar gáfust. Síðan síðla árs 2018 eftir að tónleikaferðalaginu lauk gat ég einbeitt mér að stúdíóinu og eyddi þá mestum tíma í Nashville, New York og Los Angeles.

Hvernig kom það til að þið fóruð að styrkja Aftureldingu?
Þetta var hugmynd sem Magnús Már þjálfari kom með til mín. Mér fannst það auðvitað mjög spennandi og ákveðin rómantík í því að geta styrkt uppeldisfélagið. Eftir því sem við best vitum hefur þetta ekki verið gert áður, að listamaður auglýsi framan á knattspyrnutreyjum, í það minnsta ekki á Íslandi.

Eitthvað meira planað í kringum það?
Planið er að reyna að mæta á heimaleiki í sumar og vonandi gera eitthvað skemmtilegt með liðinu ef samkomutakmarkanir og aðstæður leyfa.

Þú æfðir sjálfur með Aftureldingu?
Ég æfði með Aftureldingu á yngri árum og við lentum meðal annars í 2. sæti á Íslandsmótinu í 2. flokki. Eftir það fór ég að einblína meira á tónlistina og það tók svolítið við.

Varla misst úr dag í ræktinni í 10 ár
Hvernig hefur Covid farið með þig? Gott að fá smá pásu eða er þetta óþolandi ástand?
Það má eiginlega segja bæði. Þetta hefur vissulega verið góð hvíld á margan hátt en að sama skapi erfitt að aðlagast öðrum lífsstíl. Við höfum reynt að vinna á meðan við getum og tekið upp nokkra lifandi flutninga í íslenskri náttúru. Aðalvandamálið hefur verið að finna æfingaaðstöðu og auglýsum við hér með eftir því ef að einhver hefur tök á að hýsa eða leigja lítilli hljómsveit húsnæði.

Hvað er svo fram undan hjá ykkur?
Fram undan er þriggja ára heimstúr sem hefst í febrúar á næsta ári í Norður-Ameríku til að fylgja eftir nýju plötunni, Surface Sounds.

Tekur ekki á að búa í rútu í langan tíma á þessum tónleikaferðalögum?
Þetta getur verið gífurlega lýjandi á tímum. Sérstaklega eftir langt tónleikaferðalag. Ég reyni alltaf að hugsa vel um mig þegar kemur að heilsu, hreyfingu og mataræði og ég held að það hafi oft bjargað mér á tímum.

En þú hugsar vel um heilsuna?
Já, ég hef alltaf búið til tíma fyrir það, sama hvað. Það er eiginlega ótrúlegt að hafa nánast ekki misst úr dag í ræktinni í 10 ár sama í hvaða landi ég er, þangað til Covid kom. Þá þurfti maður að reyna bjarga sér í útihlaupum o.fl.

Kærastan jarðbundin og heilsteypt
Hvernig tekur Telma, kærastan þín, öllu þessu hljómsveitarstússi?
Ég myndi segja að hún umberi það bara mjög vel. Þetta er oft langt frá því að vera eðlilegt líf en hún er ótrúlega jarðbundin og heilsteypt og mikil fyrirmynd svo að það auðveldar okkur að finna stöðugleika.

Hvar sérðu sjálfan þig eftir 10 ár?
Það verður að koma í ljós. Þetta hefur verið síbreytilegt síðustu ár og maður hefur þurft að aðlagast hratt. Það sem er næst á dagskrá núna er langur túr og að byrja að vinna í næstu plötu, vonandi sem fyrst. Auðvitað vonast maður síðan til að fá tíma inn á milli og koma heim og njóta á Íslandi sömuleiðis.

Hvert er eftirminnilegast giggið?
Þau eru mörg eftirminnileg úti um allan heim en það er nú alltaf eftirminnilegt þegar ritstjórinn dró mig fyrst upp á svið til að syngja og spila á Ásláki fyrir þó nokkrum árum. Ætli það hafi ekki verið eitt af fyrstu giggunum.

Mikið vatn runnið til sjávar
Ætlaðir þú þér alltaf að verða tónlistarmaður?
Ég var kannski ekki viss um að ég myndi starfa við það fyrr en hlutirnir byrjuðu virkilega að rúlla 2013. Það hefur þó alltaf verið mikil ástríða.

Hvað finnst þér skemmtilegast að gera sem tónlistarmaður?
Ég lít meira á mig sem lagahöfund heldur en söngvara eða hljóðfæraleikara. Það er þar sem ég finn mig mest, svo er ótrúlega gaman hvernig hægt er að lita lögin með mismunandi hljóðfærum, útfærslum og fleira.

Og hvert stefnir þú?
Ástæðan fyrir því að ég flutti til Bandaríkjanna fyrir um sex árum var aðallega til þess að taka upp tónlistina þar og flytja hana. Þar eru að mínu mati bestu hljóðverin og fólkið til að vinna með.
Ég held að ég stefni alltaf á að halda áfram að þróast og að gera hlutina vel. Ég get líka alveg viðurkennt að maður gleymir kannski oft að staldra við og horfa til baka og sjá hversu mikið vatn hefur runnið til sjávar.

Þið eruð alveg komnir yfir í enskuna, það er ekkert von á lagi á íslensku í náinni framtíð?
Ég hef alltaf samið á ensku. Það hefur einfaldlega verið mér eðlilegt.
Eina lagið sem ég hef spilað á íslensku er Vor í Vaglaskógi. Það er líka eina ábreiðan sem ég hef tekið. Það er þó aldrei að vita í framtíðinni. Aldrei að segja aldrei.

Stoltur Mosfellingur og Íslendingur
Mosfellingar eru afskaplega stoltir af framgangi ykkar (hafið verið valdir m.a. bæjarlistamenn Mosfellsbæjar og hljómsveitin valin Mosfellingur ársins). Finnið þið fyrir stuðningi úr ykkar heimabyggð?
Alveg hiklaust. Ég er ótrúlega stoltur af því að vera Mosfellingur og það hafa verið forréttindi að alast hér upp. Þetta er frábært samfélag og ég hef alltaf fundið mikinn stuðning, jafnvel þegar að við vorum rétt að byrja og fengum að æfa uppi í félagsmiðstöð. Það væri einmitt gaman að reyna að koma upp flottri aðstöðu fyrir ungt tónlistar- og listafólk til að styðja við ungu kynslóðina og hvetja hana áfram.

Þú ert duglegur að kynna Ísland og segja frá þínum heimahögum, finnst þér það skipta máli?
Ég er mjög stoltur Íslendingur og er ófeiminn við að flagga því. Það eru líka forréttindi að geta tekið upp lifandi flutninga við þessar náttúruperlur sem við eigum eins og Fjallsárlón, Þrídranga o.fl.

Hljómsveitin Rolling Stones þurfti að margbiðja ykkur um að hita upp fyrir sig, eru margir sem vilja fá ykkur með á túr?
Það er mjög algengt að fyrirspurnir berist. Ég hef mjög takmarkaðan áhuga á að hita upp fyrir aðra á þessum tíma á ferlinum. Við erum með meira en nóg efni til að halda okkar eigin tónleika og viljum því frekar einbeita okkur að því.

Hvar slær hjartað?
Hjartað slær alltaf heima í Mosfellsbæ.

Svanþór nýr eigandi fasteignasölunnar

Fasteignasala Mosfellsbæjar er á efstu hæð í Kjarna.

Eigendaskipti hafa orðið á Fasteignasölu Mosfellsbæjar en nýr eigandi er Svanþór Einarsson. Tekur hann við fyrirtækinu af Einari Páli Kjærnested og Hildi Ólafsdóttur sem rekið hafa fasteignasöluna í 20 ár.
Svanþór er Mosfellingur í húð og hár og er Mosfellingum að góðu kunnur. Hann er löggiltur fasteignasali og hefur sjálfur unnið á fasteignasölu Mosfellsbæjar í tæp 13 ár og að undanförnu séð alfarið um daglegan rekstur.
„Ég tek við góðu búi af vinum mínum Einari Páli og Hildi sem hafa rekið fasteignasöluna með miklum myndarbrag síðustu tvo áratugi.
Það verður lítið um breytingar hjá okkur enda á góðum stað og með úrvals starfsfólk.“

Best að búa í Mosó
„Fasteignamarkaðurinn í Mosfellsbæ hefur verið ansi líflegur enda mikið byggt síðustu ár. Það eru miklu fleiri að reyna að komast í Mosó en úr. Hér er eftirsóknarvert að búa enda hef ég alltaf sagt að það er best að búa í Mosó.
Íbúum hefur fjölgað gríðarlega mikið síðustu ár og jafnvel færri komist að en vilja. Við munum halda áfram að leggja metnað okkar í að þjónusta Mosfellinga enda hefur það verið okkar sérsvið.“
Fasteignasala Mosfellsbæjar er rótgróið fyrirtæki, staðsett á efstu hæð í Kjarna, Þverholti 2.
Svanþór er í sambúð með Önnu Ragnheiði Jónsdóttur grunnskólakennara og búa þau í Helgafellshverfi. Sonur Svanþórs er knattspyrnumaðurinn Jason Daði.

Hjóla- og golfmót til styrktar góðum málefnum í Mosfellsbæ

Lagt á ráðin við golfskálann í Mosfellsbæ. Hrefna Rós (Reykjakot), Magnús (hjólari), Palli Lindal (skipuleggjari), Helga Lind (Hlaðgerðakot), Karl (Blik), Ágúst (GM) og Valdimar Þór (Hlaðgerðakot).

Páll Líndal stendur fyrir Palla Open golfmóti til styrktar Reykjadal og Hlaðgerðarkoti laugardaginn 22. maí.
„Já, það verður golfmót en við ætlum líka að hjóla og verða tvær vegalengdir í boði. 45 km og svo 10 km fjölskylduhringur í Mosfellsbæ. Meiningin er að safna fyrir tveimur verðugum málefnum hér í bæ og skipta öllu sem safnast á milli þeirra.“
Golfmótið hefst kl. 7 um morguninn og stendur fram á kvöld en verið er að vinna með endanlega útfærslu á hjólaþættinum en við notum líklega Strava og hóparnir hjóla frá leikskólanum Huldubergi milli kl. 9 og 12.

Byrjaði með færslu á Facebook
Þú varst að pæla í Pallaballi líka, er það ekki? „Jú, ef allt væri eðlilegt yrði ball í golfskálanum um kvöldið en við sjáum til hvernig Covid-staðan verður.“
En hver er þessi Palli? „Ég er bara miðaldra karlmaður í Klapparhlíðinni,“ segir Palli og hlær.
„Þetta byrjaði nú bara bara með einum Facebook-status í vetur sem fékk mjög jákvæð viðbrögð. Eins konar áskorun um að gera eitthvað hressilegt þegar Covid væri búið og hafa eitthvað til að hlakka til. Svo hefur eitt leitt af öðru og nú er þetta að verða að veruleika.

Allir boðnir og búnir að hjálpa til
„Það hafa allir sem ég hef leitað til tekið mér fagnandi. Golfklúbburinn leggur allt sitt af mörkum og við höfum safnað fullt af vinningum og styrkjum.“ Þá hafa Palli og hundurinn Brúnó safnað um 2.000 golfboltum í kringum völlinn í vetur sem seldir verða á keppnisdegi.
„Þetta er partur af því að búa í Mosó og láta sig samfélagið varða, en yfirskrift dagsins er Sælla er að gefa en þiggja.“
Og þú átt afmæli þennan dag? „Já, reyndar, en dagurinn snýst alls ekki um það“.
Hve miklu ætlar þú að safna? „Það er góð spurning, vonandi þremur milljónum ef vel gengur, en það verður hægt að styrkja án þess að taka þátt.“

Nánari upplýsingar um dagskrá laugardagsins verður að finna hér.

Reykjadalur er sumar- og helgardvalarstaður í Mosfellsdal fyrir börn og ungmenni með fötlun eða sérþarfir. Í Reykjadal er börnum og ungmennum gefið tækifæri til að skapa ógleymanlegar minningar. Gleði, jákvæðni og ævintýri lýsa starfseminni vel. Árlega koma um 250 einstaklingar í Reykjadal, 8-21 árs. Lögð er áhersla á að hver og einn einstaklingur njóti sín á sínum forsendum.

Hlaðgerðarkot í Mosfellsdal er elsta starfandi meðferðarstofnun landsins og rekið af Samhjálp. Þar er unnið með einstaklinga sem eiga við fíknivanda að stríða. Í Hlaðgerðarkoti starfar þverfaglegt teymi, læknis, hjúkrunarfræðings, félagsráðgjafa og áfengis- og fíkniráðgjafa ásamt því sem umsjónarmenn eru við störf allan sólahringinn. Lögð er áhersla á heimilis­legt og hlýlegt viðmót og er virðing fyrir einstaklingnum höfð að leiðarljósi.

Eldri deild Varmárskóla verður Kvíslarskóli

Fimmtudaginn 6. maí var tilkynnt um nýtt nafn á eldri deild Varmárskóla. Efnt var til nafnasamkeppni á skólann sem 7.-10. bekkur mun tilheyra við stofnun hans 1. ágúst næstkomandi og fékk skólinn nafnið Kvíslarskóli að undangenginni nafnasamkeppni.
Varmárskólanafnið mun fylgja yngri deildinni og því varð að finna nýtt nafn á eldri deild núverandi Varmárskóla.

Nafnanefnd vann úr tillögum
Skipuð var nafnanefnd til að vinna úr tillögum að nafni og leggja til við bæjarráð þá tillögu sem varð hlutskörpust.
Í nafnanefndinni sátu Bjarki Bjarnason bæjarfulltrúi V-lista og Anna Sigríður Guðnadóttir bæjarfulltrúi S-lista sem fulltrúar bæjarstjórnar, Birgir D. Sveinsson, fyrrverandi skólastjóri sem fulltrúi samfélagsins, Margrét Lára Höskuldsdóttir sem fulltrúi starfsmanna skólans og Ásta Kristbjörnsdóttir sem fulltrúi nemenda. Þórhildur Elvarsdóttir skólastjóri Varmárskóla var ritari nafnanefndarinnar.
Góð þátttaka var í samkeppninni og bárust alls 68 tillögur að nýju nafni. Nafnanefndin setti sér starfsreglur og fundaði tvisvar sinnum. Að lokum stóð eitt nafn eftir, Kvíslarskóli, en sjö tillögur bárust þar sem þetta nafn var lagt til og komu þær frá 7. GÁS og 10. KÁ í Varmárskóla, Ragnheiði Ríkharðsdóttur, Óðni Pétri Vigfússyni, Einari Jóhannessyni, Jóhönnu Magnúsdóttur og Krista Glan.

Sjö tillögur um Kvíslarskóla
Nafn skólans, Kvíslarskóli, kallast á við Varmárskólanafnið enda um systurskóla að ræða, það vísar beint til örnefnis í næsta nágrenni sem er Kaldakvísl og loks er nýja nafnið í góðu samræmi við þá nafnahefð sem mótast hefur síðustu áratugi hér í Mosfellsbæ sem er að kenna skóla við örnefni í næsta nágrenni við skólana. Þá var nefnt í umræðu um nýja nafnið á samfélagsmiðlum að með sama hætti og Kaldakvísl tekur við vatni úr Varmá þá mun Kvíslarskóli taka við nemendum úr Varmárskóla
Eins og Mosfellingar vita hefur eldri deild Varmárskóla lengi verið kölluð Gaggó Mos enda gekk skólinn lengi undir heitinu Gagnfræðaskóli Mosfellsbæjar þegar það skólastig var við lýði í landinu. Nú eru hins vegar hvorki til barnaskólar né gagnfræðaskólar og því ekki unnt að nota þau orð sem hluta af formlegu heiti skóla en mörgum þykir auðvitað vænt um eldra nafnið og gera má ráð fyrir því að það lifi í einhverri mynd áfram.

Kjötbúðin opnar í Mosó

Geir Rúnar Birgisson eigandi Kjötbúðarinnar.

Kjötubúðin mun opna glæsilega verslun í Sunnukrika í næstu viku. Það er Mosfellingurinn Geir Rúnar Birgisson sem er eigandi og rekstraraðili Kjötbúðarinnar.
Geir, sem er kjötiðnaðarmeistari, hefur rekið Kjötbúðina á Grensásvegi síðastliðin 10 ár við góðan orðstír. „Ég byrjaði minn feril í Nóatúni hér í Mosó, þegar búðin lokaði var alltaf draumurinn að opna kjötbúð hér í bænum.
Á þessum tíma var ekkert hentugt húsnæði og úr varð að ég opnaði Kjötbúðina á Grensásvegi og hef rekið hana undanfarin 10 ár,“ segir Geiri. Búðin í Sunnukrika mun verða útibú frá hinni búðinni þar sem öll vinnsla mun fara fram.

Styttra fyrir Mosfellinga
„Við munum vera hér með ferskt kjötborð og allt sem því tilheyrir, meðlæti, sósur og eftirrétti. Það verður styttra fyrir Mosfellinga að ná sér í steik á grillið en stór hópur minna viðskiptavina eru Mosfellingar,“ segir Geiri en þess má geta að Kjötbúðin hefur verið stór styrktaraðili meistaflokks karla í knattspyrnu undanfarin ár og hafa grillaðir hamborgarar frá Kjötbúðinni verið seldir á heimaleikjum við miklar vinsældir.
Í byrjun júní mun Nettó opna verslun í sama húsnæði en fyrir er heilsugæslan og Apótekarinn með starfsemi í húsinu. „Nettó leitaði til mín og sá greinilega hag í því að vera með kjötbúð við hliðina á verslun sinni og ég tel að við eigum eftir að eiga í góðu samstarfi hér. Ég er mjög spenntur að opna en undirbúningurinn er búinn að vera langur. Ég heyri að það spenningur í bæjarbúum og ég er líka rosa ánægður að opna loksins kjötbúð á heimaslóðum,“ segir Geiri að lokum.

Sterkar konur

Mér finnst vænlegast til árangurs að breyta hlutum með því að vinna að umbótum með mismunandi leiðum. Þannig geta fleiri nýtt styrkleika sína og tekið þátt í umbótunum. Heilbrigðiskerfið er gott dæmi. Tækninýjungar, framfarir í læknavísindum og betra skipulag í þjónustunni eru nokkur dæmi um hvernig við getum gert kerfið okkar betra. Skipulagið við bólusetningarnar í Laugardalshöllinni er mjög gott dæmi um hverju er hægt að áorka með þaulhugsuðu skipulagi.

En við getum líka bætt heilbrigðiskerfið með því að passa betur upp á okkar eigin heilsu. Því heilsuhraustari sem við erum, því minni þörf höfum við fyrir þjónustuna og því minna verður álagið á kerfið. Þarna finnst mér ég geta gert gagn og reyni því að einbeita mér að því að efla heilsu þeirra sem eru í kringum mig.

Metoo bylgjan sem fór á stað í síðustu viku hefur haft sterk áhrif á mig. Mér finnst erfitt að lesa allar frásagnirnar og finn til með þeim konum sem stíga fram og segja sína sögu. Ég hélt við værum komin lengra í þessu ferli sem samfélag. Mér finnst mikilvægt að við tökum öll þátt í að breyta þessu og eins og með heilbrigðiskerfið, reynum að finna hvar og hvernig við getum gert mest gagn. Nýtt okkar styrkleika, pælt í því „hvað ég get gert“ og svo látið verkin tala.

Fyrir utan að gera mitt besta til að reyna að vera góð fyrirmynd fyrir syni mína, finnst mér ég gera mest gagn á þessu sviði með því að halda áfram að byggja upp hópa þar sem konur og karlar æfa saman. Í okkar litla styrktaræfingaklúbbi er kona yfirþjálfari og þjálfaralistinn telur svipað margar konur og karla. Líklega fleiri konur í dag. Í æfingahópnum eru bæði konur og karlar, langflestir tímar eru kynjablandaðir. Útkoman – gagnkvæm virðing, jákvæð samskipti, sterkar konur og karlar.

Heilsumolar Gaua
Mosfellingur 13. maí 2021

Aldrei fleiri tillögur borist í Okkar Mosó

Alls bárust 140 tillögur frá íbúum í lýðræðisverkefninu Okkar Mosó 2021 og hafa þær aldrei verið fleiri. Nú stendur yfir mat og úrvinnsla tillagnanna hjá fagteymi starfsfólks á umhverfissviði Mosfellsbæjar. Hugmyndirnar eru metnar út frá þeim forsendum sem gefnar eru í söfnun hugmynda og mótaðar til uppstillingar fyrir kosningu. Í kjölfarið verður stillt upp allt að þrjátíu verkefnum sem íbúum gefst kostur á að kynna sér nánar og kjósa um í kosningum sem munu hefjast 31. maí og standa til 6. júní. Mosfellsbær var fyrst sveitarfélaga til þess að veita 15 ára og eldri íbúum kost á að taka þátt í kosningunni um verkefni og er það nú orðið aldursviðmið hjá flestum öðrum sambærilegum verkefnum. Íbúar eru hvattir til þess að kynna sér þau verkefni sem lögð verða í dóm kjósenda og taka þátt í að velja verkefni sem koma til framkvæmda á næstu tveimur árum. Gert er ráð fyrir því að kostnaður við framkvæmd verkefnanna nemi allt að 35 milljónum króna á tímabilinu.