Karl Elinías Loftsson fyrrverandi útibússtjóri Búnaðarbankans hefur verið virkur í félagsstörfum eftir að hann lét af störfum.
Karl tók á móti mér á fallegu heimili sínu að Bjargartanga og við fengum okkur sæti í betri stofunni. Karl hefur einstaklega góða nærveru, er rólegur og yfirvegaður í fasi.
Það er óhætt að segja að Karl sitji ekki auðum höndum eftir að hann fór á eftir­laun því hann nýtir hvern dag til hins ítrasta. Ef hann er ekki að stjórna félagsvist eða bingói þá er hann að ferðast eða í golfi og svo hefur hann unun af að slípa íslenska steina.

Karl er fæddur á Hólmavík 2. mars 1937. Foreldarar hans voru Helga Guðbjörg Jónsdóttir húsfreyja og Loftur Bjarnason skipstjóri og verkamaður. Karl á sex systkini, Gróu, Þórdísi, Jón, Sigvalda, Ingimund Tryggva og Guðjón og sex hálfsystkini samfeðra, Gísla, Aðalheiði, Björnstjerne, Gest og tvö börn sem létust í bernsku.

Á handfærum í Steingrímsfirðinum
„Lífið í barnæsku snérist í kringum sjóinn og fiskinn. Ég var í kringum sjö ára aldurinn þegar ég fór fyrst með föður mínum á sjó og rérum við Guðjón bróðir með föður okkar á árabáti sem hét Skoppa. Við vorum nokkur sumur á handfærum í Steingrímsfirðinum og faðir minn sagði við okkur að það munaði um hvern fiskinn sem við bræðurnir gætum dregið.“

Tvær krónur í björgunarlaun
„Eitt sinn á mínum yngri árum var ég nærri drukknaður. Ég var að skola litlar hjólbörur í fjörunni neðan við húsið sem við bjuggum í þegar alda reið yfir og tók mig út og ég komst ekki aftur í land. Nokkrir eldri strákar sáu það sem gerðist og einn þeirra, Friðrik Arthúr, hljóp til að sækja hjálp. Gróa systir sem þá var sextán ára kom æðandi að og óð upp undir hendur þar sem ég flaut í sjónum og hún náði mér upp. Faðir minn kom stuttu síðar og í sameiningu fóru þau með mig til læknis sem dældi upp úr mér.
Ég hef ævinlega verið þakklátur Friðriki lífgjafa mínum og móðir mín var það líka og gaf honum tvær krónur í björgunarlaun.“

Gerðu út bát í sex ár
„Skólagangan gekk vel og ég lauk námi frá Grunnskóla Hólmavíkur vorið 1951. Þá tók sjómennskan við og ég var sjómaður og verkamaður næstu fimmtán árin. Var tvær vertíðir á Akranesi og eina á Ísafirði. Sjómennskan átti alltaf vel við mig og þetta voru ákaflega heillandi störf.
Árið 1960 létum við Jóhann og Kjartan Jónsynir smíða fyrir okkur 12 tonna fiskibát í skipasmíðastöð Inga Guðmonssonar á Akranesi. Báturinn hét Farsæll ST-28 og við gerðum hann út í sex ár.“

Njótum þess að ferðast
Karl kvæntist Valdísi Ragnarsdóttur húsmóður árið 1958. Börn Karls og Valdísar eru Bára, fædd 1956, veitingakona, Ragna Þóra, fædd 1959, þroskaþjálfi og sérkennari og Elín Gróa, fædd 1968, viðskiptafræðingur. Barnabörnin eru sjö en eitt þeirra er látið. Barnabarnabörnin eru tvö.
„Við hjónin njótum þess að ferðast bæði innanlands og utan í góðra vina hópi. Við höfum einnig mikla ánægju af því að fara á heimaslóðir til Hólmavíkur en þar eigum við hús sem við dveljum oft löngum stundum í.“

Mest með um 150 fjár
„Árið 1960 tók ég við umboði Olíuverslunar Íslands hf. á Hólmavík og var með það í 25 ár. Samhliða olíuversluninni rak ég verslun með matvörur og gjafavörur ásamt Jóni bróður mínum eða til ársins 1973. Við Jón vorum að auki með búskap í mörg ár, mest vorum við með um 150 fjár. Í dag á ég tvær kindur sem bróðir minn fóstrar fyrir mig.
Árið 1972 var ég skipaður yfirkjötmatsmaður á Vestfjörðum. Á þessum árum voru 52 sláturhús víðsvegar um landið. Ég starfaði sem matsmaður til ársins 2012 en þá voru aðeins átta sauðfjársláturhús eftir á landinu.“

Útibússtjóri í þrjátíu ár
„Karl starfaði fyrir Búnaðarbanka Íslands í 30 ár. „Ég hóf störf í útibúinu á Hólmavík árið 1973 og starfaði þar allt til ársins 1985. Þá var ég skipaður útibússtjóri í Vík í Mýrdal og var þar til ársloka 1990.
Svo var ég ráðinn útibússtjóri í útibúi bankans í Mosfellsbæ og gegndi því starfi til 67 ára aldurs. Bankaárin veittu mér gríðarlega ánægju, á öllum þessum stöðum kynntist maður mjög góðu og skemmtilegu fólki.“

Sæmdur æðstu viðurkenningu
Karl hefur starfað mikið í félagsmálum í gegnum tíðina, Hann var í stjórn Héraðssambands Strandamanna og í stjórn Átthagafélagsins í 26 ár. Hann var kosinn í hreppsnefnd Hólmavíkurhrepps árið 1966 og tók við sem oddviti árið 1972 og gegndi því starfi í 14 ár. Hann var einnig formaður ungmennafélagsins Geisla. Þar að auki hefur Karl verið í ýmsum stjórnum félagasamtaka á Vestfjörðum.
Eftir að hann flutti í Mosfellsbæ hefur hann starfað í sóknarnefnd Lágafellssóknar í 12 ár, í stjórn félags eldri borgara í 8 ár og í stjórn Golfklúbbsins í 8 ár. Hann hefur kennt pútt í 20 ár og stjórnar í dag félagsvist og bingói á Eirhömrum.
Karl hefur verið virkur meðlimur í Lionshreyfingunni síðastliðin 55 ár og verið sæmdur æðstu viðurkenningu Lionshreyfingarinnar, Melvin Jones. Hann er ævifélagi Lionsklúbbsins í Mosfellsbæ.

Slípar íslenska steina
„Ég hef alla tíð verið mikið í útivist í náttúru Íslands og stundaði stangveiði um land allt í mörg ár en síðastliðin 25 ár hefur golfið átt hug minn allan.
Áhugamál mitt til margra ára í seinni tíð er að vinna með íslenska steina, saga þá og slípa og til þess nota ég sérstakar vélar. Áður fyrr fór maður upp um fjöll og í fjörur að tína steina en núna þegar fæturnir eru farnir að gefa eftir þá verð ég að kaupa þá annars staðar til að halda starfseminni gangandi.
Steinarnir veita mér mikla ánægju og að hinu leytinu til þá er alltaf gott að hafa eitthvað fyrir stafni.“

Mosfellingurinn 15. mars 2018
Myndir og texti: Ruth Örnólfs

Bæjarráð Mosfellsbæjar hefur samþykkt úthlutunarskilmála og verð við úthlutun á 31 lóð við Fossatungu og Kvíslartungu í Mosfellsbæ. Um er að ræða stækkun Leirvogstunguhverfis til austurs í átt að Köldukvísl. Leirvogstunguhverfið er glæsilegt sérbýlishúsahverfi í Mosfellsbæ sem afmarkast af Leirvoginum og Vesturlandsvegi.
Lóðirnar skiptast þannig eftir gerð húsnæðis að raðhúsalóðir eru 17, parhúsalóðir 12 og einbýlishúsalóðir eru 2.

Hverfið að verða fullbyggt
„Mikil eftirspurn hefur verið eftir húsnæði í Mosfellsbæ eins og við íbúar höfum öll tekið eftir“, segir Haraldur Sverrisson bæjarstjóri. „Sérstaklega í þeim mikla uppgangi sem einkennt hefur síðustu ár með uppbyggingu m.a. í Helgafelli og Leirvogs­tungu. Á síðasta ári fjölgaði íbúum um 8% og við hjá Mosfellsbæ vinnum að því daglega að taka vel á móti nýjum íbúum um leið og við eflum þjónustuna almennt. Það er einkar ánægjulegt að geta hafið vinnu við að úthluta þessum lóðum í byrjun apríl á grundvelli útdráttar.
Við verðlagningu lóðanna var haft að leiðarljósi að verð væri í lægri kantinum miðað við markaðinn en samt ekki það lágt að óeðlilegur eftirmarkaður myndaðist með þær. Þegar byggingu þeirra lýkur verður Leirvogstunguhverfið að mestu fullbyggt.“

Dregið úr innsendum umsóknum
Heimilt er að sækja um fleiri en eina lóð í einu. Verði umsóknir um hverja lóð fleiri en ein verður dregið úr innsendum umsóknum. Umsækjendum um lóðir verður gefin kostur á að vera viðstaddir útdrátt sem verður auglýstur á vefsíðu bæjarins viku fyrir útdrátt. Útdrátturinn verður framkvæmdur af eða undir eftirliti sýslumanns eða annars hlutlauss aðila.
Verð lóðanna samanstendur af gatnagerðargjaldi sem er 32.082 kr. á m² auk byggingaréttargjalds sem er misjafnt eftir húsagerð. Þannig verður einbýlishúsalóðum úthlutað á um 13 m.kr., parhúsalóðum frá 7,5 m.kr. og raðhúsalóðum frá 6,2 m.kr.
Nánari upplýsingar á www.mos.is/lodir.

Á næstu mánuðum verður ráðist í breytingar á útibúaneti Arion banka. Markmiðið er að aðlaga útibúanetið að nýrri nálgun í bankaþjónustu þar sem m.a. er lögð áhersla á aðgengi að stafrænum lausnum og einföldun þjónustu.
Liður í þessum breytingum er að útibúið í Mosfellsbæ sameinast Höfðaútibúi bankans á Bíldshöfða 20. Starfsfólkið hér í Mosfellsbæ mun því flytja sig um set, ýmist í Höfðaútibú eða í önnur störf hjá bankanum.

Sameiningin tekur gildi 10. maí
Höfðaútibúið er eitt af stærstu útibúum bankans, eða svokallaður þjónustukjarni, en þar er áhersla lögð á almenna bankaþjónustu og ráðgjöf sérfræðinga á öllum helstu sviðum fjármála einstaklinga og fyrir­tækja. Aðrir þjónustukjarnar Arion banka eru í Borgartúni, Smáranum í Kópavogi, í Borgarnesi, á Selfossi og Akureyri.
Sameiningin tekur gildi 10. maí en áfram verður alhliða hraðþjónustubanki í Mosfellsbæ þar sem m.a. er hægt að taka út og leggja inn seðla, greiða reikninga og millifæra. Fyrst um sinn verður hann áfram í Þverholti 1, þar sem útibúið hefur verið til húsa, en í framhaldinu fundin ný staðsetning í alfaraleið, nærri verslun og þjónustu.

Á reitunum á milli Framhaldsskóla Mosfellsbæjar og Krónunnar eru hafnar framkvæmdir við byggingu verslunar- og íbúðarhúsnæðis.
Markmið gildandi deiliskipulags er að þétta og efla miðbæ Mosfellsbæjar. Einnig að móta skjólsæla, þétta og sólríka íbúabyggð auk verslunar og þjónustu og styrkja þannig götumyndina. Svæðið er í hjarta bæjarins og því lögð rík áhersla á metnað og vandaða hönnun við gerð og frágang mannvirkja á svæðinu.

Allt að 105 íbúðir á milli FMOS og Krónunnar
Byggingarnar verða þriggja til fimm hæða háar og verslanir verða á fyrstu hæð á þeim reit sem er næstur Krónunni. Aðrar byggingar á svæðinu verða eingöngu íbúðarhúsnæði og er gert ráð fyrir að unnt verði að byggja allt að 105 íbúðir á þessum þremur reitum í Bjarkarholti.
Framkvæmdir munu standa yfir næstu tvö ár og stefnt verður að því að þeim verði að mestu lokið í árslok 2019.
Samgöngustígurinn meðfram Bjarkarholti mun á meðan framkvæmdir standa sem hæst verða nýttur fyrir bæði gangandi og hjólandi umferð en hann var áður sérgreindur eftir samgöngumáta.
Á næstunni er fyrirhuguð vinna við lagnir í götunni og má því gera ráð fyrir röskun á umferð á því tímabili.

Halldóra Björnsdóttir íþróttafræðingur telur að hreyfing, hugleiðsla og góð næring sé lykillinn að heilbrigði og hamingju

Í byrjun árs var Halldóra sæmd riddarakrossi við hátíðlega athöfn á Bessastöðum fyrir framlag sitt til heilsuverndar og lýðheilsu. Hún hefur sinnt margvíslegu fræðslustarfi í gegnum tíðina, flutt erindi víða og talað máli beinverndar í fjölmiðlum.
Áhugamál hennar tengjast íþróttum og heilsu í víðasta skilningi. Hún æfði júdó og fimleika þar til skíðabakterían greip hana heljartökum en hún hefur kennt á skíði bæði hér heima og erlendis. Hjólreiðar eru nýjasta áhugamál Halldóru en hún hjólar til og frá vinnu eins oft og veður leyfir.

Halldóra er fædd í Reykjavík 12. apríl 1961. Foreldrar hennar eru þau Sigríður Jóna Kjartansdóttir fv. skrifstofustjóri og Björn Blöndal Kristmundsson fv. verslunarmaður. Halldóra á tvö systkini, Kjartan Halldór og Kristínu, en Kjartan lést árið 1974.

Fékk að leika sér í áhaldageymslunni
„Ég er alin upp í Sæviðarsundinu og á góðar minningar þaðan. Mamma æfði handbolta þangað til ég varð 8 ára og ég fór oft með henni á æfingar. Ég fékk að leika mér í áhaldageymslunni innan um bogahesta, kistur og alls kyns leikfimisdót. Ég held að grunnurinn að íþróttafræðunum sem ég lærði síðar og varð minn starfsvettvangur hafi orðið til þarna.
Ég sótti í að vera mest á hreyfingu á æskuárunum og hef verið fremur hreyfanleg síðan,“ segir Halldóra og brosir.

Skíðabakterían greip mig heljartökum
Halldóra æfði júdó frá 6-9 ára aldurs og var á þeim tíma sú yngsta sem tekið hafði beltapróf. „Þegar ég var farin að hafa meiri áhuga á að sníkja mér lakkrís í lakkrísgerðinni sem var í sama húsi og júdóæfingarnar þá létu foreldrar mínir mig hætta og ég skipti yfir í fimleika. Fimleikana stundaði ég af miklum áhuga í tvö ár eða þar til skíðabakterían greip mig heljartökum og ég æfði og keppti á skíðum í rúman áratug.“

Kvennaskólaárin voru dásamleg
Ég hóf skólagönguna í Ísaksskóla og þaðan lá leiðin í Langholtsskóla. Ég átti gott með að læra og var bara ánægð með alla kennarana mína. Að loknu barnaskólaprófi fór ég 13 ára gömul í Kvennaskólann í Reykjavík og lauk þaðan gagnfræðaskólanámi. Kvennaskólaárin voru dásamleg, en í skólanum kynntist ég skemmtilegum stelpum og ein þeirra er ein af mínum bestu vinkonum í dag.“

Ógleymanlegt í Kerlingarfjöllum
„Eftir útskrift úr gagnfræðaskóla fór ég í Verzlunarskólann og útskrifaðist þaðan 1981. Ég æfði á skíðum öll skólaárin sem náði þó ekki að svala minni skíðafíkn því ég hélt áfram á sumrin og vann þá sem skíðakennari í Kerlingarfjöllum. Þar átti ég ógleymanlegar stundir með yndislegu og skemmtilegu samstarfsfólki.
Ég ákvað að fara til Austurríkis, læra þýsku og taka skíðakennarapróf. Ég kenndi á skíði heilan vetur í austurrísku Ölpunum og hafði sett stefnuna á nám við Íþróttaháskólann í Köln. Áform mín breyttust og fyrr en varði var ég komin hinum megin við Atlantshafið, langleiðina að Kyrrahafinu.“

Í stórbrotnu landslagi Klettafjallana
„Vinkona mín úr Verzló hvatti mig til þess að fylgja sér eftir til Edmonton í Albertafylki í Kanada og þangað fór ég haustið 1982 til þess að læra íþróttafræði. Námsárin urðu fjögur en ég útskrifaðist þaðan sem íþróttafræðingur með áherslu á íþróttir fatlaðra og líkamsþjálfun.
Ég æfði og keppti með skíðaliði skólans og fékk tækifæri til þess að skíða í stórbrotnu landslagi Klettafjallanna.“
Í Edmonton kynntist Halldóra samlanda sínum, Birgi Þór Baldvinssyni, sem sótt hafði þangað í framhaldsnám. Hann varð síðar eiginmaður hennar en hann starfar sem kennari við Klettaskóla. Þau eiga fjögur börn, Kjartan Þór fæddan 1987, Sigríði Þóru fædda 1991, Halldóru Þóru fædda 1993 og Kristínu Þóru fædda 1998. Barnabörnin eru þrjú, Áslaug Ýr, Elías Kári og Una Rán.

Frábær tími á Reykjalundi
„Á háskólaárunum vann ég á sumrin í heilsusporti á Reykjalundi sem var frábær tími. Það var ekki slæmt að fara á hestbak, sigla á Hafravatni, fara í sund og skemmta sér allan daginn.
Eftir að ég kom heim frá Kanada þá fór ég í Háskólann til að ná mér í kennsluréttindi til að geta kennt í grunn- og framhaldsskóla. Ég kenndi leikfimi í Stúdíói Jónínu og Ágústu í nokkur ár og einnig í Heilsurækt Seltjarnarness. Eins kenndi ég á mínu sérsviði íþróttir fatlaðra í Öskjuhlíðarskóla.”

Hjá Ríkisútvarpinu í 30 ár
Árið 1987 tók Halldóra við morgunleikfiminni hjá Ríkisútvarpinu og hefur haft umsjón með henni síðan eða í rúm 30 ár. Morgunleikfimin hefur nú verið á dagsskrá Ríkisútvarpsins í 61 ár en það var Valdimar Örnólfsson sem byrjaði með hana.
„Mér þykir afar vænt um morgunleikfimina og gleðst alltaf innilega þegar fólk hefur samband við mig og segist hafa verið samferða mér á þeim vettvangi.“

Fræðslustarf hjá Beinvernd
„Árið 2000 tók ég að mér framkvæmdastjórn hjá Beinvernd sem er félag áhugafólks um beinþynningu og afleiðingar hennar en þar starfa ég í hálfu starfi. Hjá félaginu hef ég sinnt margvíslegu fræðslustarfi, flutt erindi víða í félögum og stofnunum og talað máli beinverndar.
Ég tel mig hafa verið óþreytandi í því að upplýsa fólk um mikilvægi þess að hreyfa sig fyrir beinin og gæta þess að fá nóg af kalki og D-vítamíni.“

Tók virkan þátt í starfi Aftureldingar
Halldóra fór í jógakennaranám og kenndi m.a. eldri borgurum jóga á Hlaðhömrum í nokkur ár. Enn leitaði hún sér aukinnar menntunar við Háskóla Íslands, þaðan sem hún útskrifaðist með MA gráðu í menntunarfræðum árið 2005. Þaðan lá leið hennar á Rannsóknarstofu í öldrunarfræðum þar sem hún starfaði á árunum 2005-2008 samhliða starfi sínu hjá Beinvernd. Frá árinu 2008 hefur hún kennt íþróttir við Fjölbrautarskólann í Breiðholti.
„Áhugamál mín tengjast íþróttum og heilsu í víðasta skilningi. Ég tel að hreyfing, hugleiðsla og góð næring sé lykillinn að heilbrigði og hamingju. Ég hef tekið virkan þátt í starfi Aftureldingar, var m.a. í stjórn barna- og unglingaráðs knattspyrnudeildarinnar til margra ára og starfaði mikið með meistaraflokki kvenna.“

Heilsan það dýrmætasta sem við eigum
Í byrjun árs var Halldóra sæmd riddarakrossi við hátíðlega athöfn á Bessastöðum. „Fálkaorðan kom mér verulega á óvart en gladdi mig vissulega. Hún var veitt fyrir störf í þágu heilsuverndar og lýðheilsu og finnst mér afar ánægjulegt að þau málefni skulu vekja slíka athygli enda er heilsan það dýrmætasta sem við eigum.”

Mosfellingurinn 22. febrúar 2018
Myndir og texti: Ruth Örnólfs

Fimmtudaginn 15. febrúar var haldinn formlegur stofnfundur Miðflokksins í Mosfellsbæ. Fundurinn var haldinn á Hótel Laxnesi.
Fjöldi manns sótti fundinn og var fimm manna stjórn kosin og þrír varamenn. Formaður stjórnar er Friðrik Ólafsson verkfræðingur. Stjórnin er kosin til bráðbirgða eða fram að fyrsta formlega aðalfundi.
Fundurinn ákvað að stefnt skuli að því að bjóða fram til bæjarstjórnar í Mosfellsbæ og við val á lista verði uppstilling notuð. Auglýst verður eftir áhugasömum aðilum (sjá auglýsingu í Mosfellingi). Áhugasamir aðilar geta einnig haft samband við formann félagins fridrik@meter.is fyrir 26. febrúar.
Í tilkynningu frá flokknum segir að Miðflokkurinn vilji virkja rödd fólks í Suðvesturkjördæmi og býður því fram til sveitarstjórnarkosninga sem fram fara laugardaginn 26. maí. Stefnt er að því að bjóða fram í Mosfellsbæ, Kópavogi, Garðabæ, Hafnarfirði og Seltjarnarnesi.

Stofnaður hefur verið Samfélagssjóður Kaupfélags Kjalarnesþings. Sjóðnum er ætlað að úthluta fjármunum til almenningsheilla á fyrrum félagssvæði Kaupfélagsins og er stofnfé sjóðsins 50 milljónir.
Kaupfélag Kjalarnesþings var stofnað um miðja síðustu öld og starfaði fyrstu árin að Fitjakoti á Kjalarnesi en lengst af eða frá 1956 í Mosfellssveit.
Kaupfélagið sjálft hætti verslunarrekstri um 1997 og leigði verslunarhúsnæði sitt út eftir það m.a. til Krónunnar og fleiri aðila.

50 milljónir í stofnfé sjóðsins
Á aðalfundi Kaupfélagsins í júlí 2016 var tekin ákvörðun um að leggja félagið niður og var sú ákvörðun staðfest á félagsfundi í ágúst 2016. Kjörin var slitastjórn sem fékk það verkefni að annast um slit félagsins, sölu eigna þess og uppgjör við lánadrottna og skyldi það fé sem afgangs yrði lagt í sjóð og fénu ráðstafað til almenningsheilla á fyrrum félagssvæði kaupfélagsins. Þetta kemur fram í tilkynningu frá Samfélagssjóði KKÞ.
Skilanefnd KKÞ boðaði síðan til félagsfundar 27. desember 2017. Á fundinum var m.a. samþykkt stofnun sjálfseignarstofnunar sem ber heitið Samfélagssjóður KKÞ og var stofnfé sjóðsins ákveðið kr. 50 milljónir. Vonir standa til að þegar skilanefnd hefur lokið störfum muni koma viðbótarstofnfé til sjóðsins.

Fimm manna stjórn skipuð um sjóðinn
Félagsfundur kaus eftirtalda sem aðal- og varamenn í stjórn sjóðsins: Birgi D. Sveinsson, Stefán Ómar Jónsson og Steindór Hálfdánarson sem aðalmenn og Sigríði Halldórsdóttur og Svanlaugu Aðalsteinsdóttur sem varamenn.
Nýkjörin stjórn Samfélagssjóðs KKÞ hefur haldið sinn fyrsta fund þar sem hún m.a. skipti með sér verkum þannig að formaður er Stefán Ómar, ritari er Birgir og meðstjórnandi er Steindór. Stjórnin samþykkt á þessum fyrsta fundi sínum að ávallt skyldi boða bæði aðal- og varamenn á stórnarfundi.

Úthlutanir fari fram næstu 2-3 ár
Verkefni stjórnar er að úthluta fjármunum samfélagssjóðsins til æskulýðs- og menningarmála, góðgerðar- og líknarmála og annarrar starfsemi til almenningsheilla á fyrrum félagssvæði Kaupfélags Kjalarnesþings sem nær yfir Mosfellsbæ, Kjalarnes og Kjósarhrepp.
Gert er ráð fyrir að verkefnið taki eftir atvikum 2-3 ár. Þegar úthlutun úr Samfélagssjóði KKÞ verður lokið verður sjálfseignarstofnunin lögð niður í samræmi við lög nr. 19/1988 um sjóði sem starfa samkvæmt staðfestri skipulagsskrá. Á næstu misserum verður auglýst um fyrstu úthlutun og þá kynnt nánar um fyrirkomulag umsókna.

Nánari upplýsingar er hægt að finna á heimsíðu sjóðsins www.kaupo.is