Heilsuna. Konuna. Börnin. Fjölskylduna. Ættingjana. Vinina. Kunningjana. Nágrannana. Æfingafélagana. Samstarfsfélagana. Keppinautana. Liðsfélagana. Þjálfarana. Aftureldingu. Fylki. Þrótt. ÍR (í körfu). Sjálfboðaliðana. Landsliðin okkar. Sigurleikinn í Amsterdam. HM í Rússlandi. Miðana á Argentínuleikinn – þú veist hver þú ert, meistari. Lars og Heimi. Fólk sem er opið fyrir hugmyndum og óhefðbundnum leiðum. Náttúruna. Mosfellsbæ. Strandir. Ísland. Ferðalög. Fluginnritun á netinu. Ódýr fargjöld. Booking.com. Frelsi. „Þetta reddast“ genið okkar. Þor og kjark. Hið góða í fólki. Traust sem aðrir sýna manni.

Ég er í flugvél á leið í stutta ferð til Stokkhólms. Skrifa þennan stutta pistil um borð. Ég hef áður skrifað um þakklæti, en það er svo sterk og mikilvæg tilfinning að það er aldrei of oft á hana minnst. Þakklæti kemur manni í gott skap, góðan fíling. Núllar út þörfina fyrir að koma auga á hið neikvæða, það sem maður getur kvartað yfir. Ég nota þakklæti mikið til þess að koma mér í rétt hugarástand.

Það er ekki flókið að vera þakklátur. Maður þarf bara að einbeita sér aðeins. Gefa sér nokkrar mínútur í að skanna lífið og leyfa svo öllu því sem maður er þakklátur fyrir að streyma til sín. Ég ákvað í morgun þegar ég var eldsnemma á leiðinni út á flugvöll að skipta yfir í þakklætisgírinn í stað þess að hugsa alltof langt fram í tímann um allt það sem ég þyrfti að muna, skipuleggja og framkvæma. Ég á það til að fara aðeins of langt fram úr mér í því. Gleyma augnablikinu.

Fyrir utan það sem ég nefndi hér að ofan er ég afar þakklátur fyrir Gulrótina sem við Vala fengum afhenda á dögunum. Gulrótin er lýðheilsuviðurkenning Mosfellsbæjar fyrir heilsueflingarstarf. Við erum þakklát fyrir viðurkenninguna, stolt af henni og tökum henni sem hvatningu fyrir okkur til þess að halda áfram á sömu braut og gera betur. Takk!

Heilsumolar Gaua
Mosfellingur 7. júní 2018

Kjósendur í Mosfellsbæ geta valið á milli átta framboða í sveitarstjórnarkosningunum laugardaginn 26. maí. Í nýjasta tölublaði Mosfellings sitja oddvitar framboðanna fyrir svörum. Hér er á ferðinni oddviti Vinstri-grænna.

Nafn:
Bjarki Bjarnason.

Aldur:
65 ára.

Gælunafn:
Í Mosfellsdal var ég stundum kallaður Bjarkmundur eftir að við Guðmundur bróðir minn gerðumst áskrifendur að Þjóðviljanum undir nafninu Bjarkmundur Bjarnason.

Starf:
Rithöfundur og forseti bæjarstjórnar Mosfellsbæjar.

Fjölskylduhagir:
Ég er kvæntur Þóru Sigurþórsdóttur leirlistakonu, börnin okkar eru Bjarni sem er gullsmiður, Vilborg þjóðfræðingur og Guðmundur húsasmiður. Við Þóra eigum fjögur yndisleg barnabörn.

Hvar býrðu?
Á Hvirfli í Mosfellsdal.

Hvað hefur þú búið lengi í Mosó?
Ég hef búið hér í sveitarfélaginu frá árinu 1954 þegar foreldrar mínir fluttu að Mosfelli og faðir minn gerðist sóknarprestur Mosfellinga.

Hvað áttu marga vini á Facebook?
2.864.

Um hvað snúast kosningarnar 2018?
Í grunninn snúast þær um það sem skiptir alla máli, jafnt Mosfellinga sem aðra:
– Aukin lífsgæði og félagslegt réttlæti, öllum til handa.
– Umhverfið okkar og Móður jörð.
– Heiðarleika og gegnsæi.

Hver er merkasti Mosfellingurinn?
Allir Mosfellingar eru merkir, hver á sinn hátt, ég hvorki get né vil gera upp á milli þeirra.

Hvernig er kynjahlutfall og aldursdreifing á listanum ykkar?
Kynjahlutfallið er hnífjafnt. Elst er kjarnakonan Elísabet Kristjánsdóttir en yngstur er Bjartur Steingrímsson heimspekinemi.

Hefur þú komist í kast við lögin?
Já, umferðarlögin.

Er pólitík skemmtileg?
Hún er líkt og lífið sjálft: Fjörleg, stundum óvægin, en umfram allt spennandi og full af fyrirheitum.

Uppáhaldsviðburður í Mosó?
Þegar kveikt er á kyndlunum við setningu bæjarhátíðarinnar í Álafosskvos og þeir lýsa upp þéttsetna brekkuna.

Hvað drekkur þú marga kaffibolla á dag?
2-3 bolla.

Fallegasti staður í Mosfellsbæ?
Lengst inni á Mosfellsheiði
er lítil hringlaga seftjörn.
Á bakkanum verpir himbrimi;
sperrtur óðinshani á sundi
kinkar til mín kolli og segir:
Hér er fallegasti staðurinn
og hann þarf ekkert nafn.

Besti matur í Mosó?
Ýsa í raspi, beint úr fiskbúðinni okkar.

Eitthvað sem fólk veit ekki um þig?
Ég kenndi einu sinni á blokkflautu við Grunnskóla Grímseyjar.

Hverja tækir þú með þér á eyðieyju?
Róbinson Krúsó og Frjádagur yrðu efstir á gestalistanum.

Hvað finnst þér vanta í Mosó?
Kaffihús.

Síðasta SMS sem þú fékkst?
Gangi þér vel í kosningunum, Bjarki minn.

Hvað er markmiðið að ná mörgum inn í bæjarstjórn?
Markmiðið er að gera okkar besta í kosningabaráttunni – síðan spyrjum við að leikslokum.

Með hverjum hugnast þér að starfa eftir kosningar?
V-listinn gengur óbundinn til kosninga, við metum stöðuna þegar úrslitin liggja á borðinu.

Spilar árangur flokksins á landsvísu rullu í Mosó?
Það er ekki gott að segja; vegir atkvæðanna eru ­órannsakanlegir.

Af hverju ætti fólk að kjósa þinn lista?
Við erum með markvissa stefnu í öllum málaflokkum og frambjóðendur sem eru reiðubúnir að fylgja henni eftir af fullri einurð. Kjósum V-listann!

—–

Kynning á framboðslista Vinstri-grænna í Mosfellsbæ– Reiðubún að láta gott af okkur leiða í samfélaginu

VG í Mosfellsbæ í Mosfellsbæ á Facebook

Kjósendur í Mosfellsbæ geta valið á milli átta framboða í sveitarstjórnarkosningunum laugardaginn 26. maí. Í nýjasta tölublaði Mosfellings sitja oddvitar framboðanna fyrir svörum. Hér er á ferðinni oddviti Miðflokksins.

Nafn:
Sveinn Óskar Sigurðsson.

Aldur:
49 ára.

Gælunafn:
Óskar.

Starf:
Ráðgjafi og sjálfstætt starfandi.

Fjölskylduhagir:
Giftur Danith Chan, lögfræðingi. Við eigum tvær dætur, Sylvíu Gló Chan, sem stundar nám við Menntaskólann í Reyjavík og Ingridi Lín Chan, sem stundar grunnskólanám við Varmárskóla í Mosfellsbæ.

Hvar býrðu?
Ég bý að Barrholti í Mosfellsbæ.

Hvað hefur þú búið lengi í Mosó?
Frá 2003 eða í 15 ár.

Hvað áttu marga vini á Facebook?
Síðast var talan 1.793.

Um hvað snúast kosningarnar 2018?
Um velferð, börnin, barnafólk, aldraða og öryrkja, um hreyfingu og gjaldfrjálsar máltíðir fyrir grunnskólabörn, svo að öll börn setið við sama borð, óháð fjárhag foreldra. Kosningarnar snúast um að skipta um meirihluta í Mosfellsbæ enda hefur sá sem nú ríkir komið fjármálum bæjarins í svo mikið óefni að grunnstoðum stafar ógn af.

Hver er merkasti Mosfellingurinn?
Halldór Laxness en sá sem á lífi er og að öðrum ólöstuðum, söng- og listakonan Sigrún Hjálmtýsdóttir, sópran.

Hvernig er kynjahlutfall og aldursdreifing á listanum ykkar?
Það eru 8 konur og 10 karlar en í 8 efstu sætunum eru 5 konur en aðeins 3 karlar. Því er þetta eiginlega kvennalisti með smávegis af körlum í bland aftast í þessum glæsilega hestvagni. Jakob Máni er yngstur, tvítugur og Magnús Jósepsson er elstur, 73 ára. Hann skipar heiðurssætið.

Hefur þú komist í kast við lögin?
Nei, en get samt sungið með herkjum.

Er pólitík skemmtileg?
Já, annars væri maður ekki að gefa sig í þetta síðustu 35 árin.

Uppáhaldsviðburður í Mosó?
Opnun á nýrri sýningu í Listasalnum.

Hvað drekkur þú marga kaffibolla á dag?
1-4 en aðeins meira fyrir kosningar og fer í kaffipásur stundum í nokkra mánuði. Drekk þá austurlenskt te af bestu sort.

Fallegasti staður í Mosfellsbæ?
Það er Leirvogurinn. Hann er afar fallegur og fuglarnir gefa lífinu lit. Að ganga með sjónum er yndislegt og að sjá norðurljósin að hausti sem og um vetur, fuglana að vori sem á sumri.

Besti matur í Mosó?
Hann er ótvírætt að finna á grænmetismörkuðunum í Mosfellsbæ. Þar má nefna markaðinn að Mosskógum og að Reykjum. Án þessara markaða væri Mosfellsbær allt annar og ekki samur. Við verðum standa vörð um landbúnað hér í bænum og víðar um land.

Eitthvað sem fólk veit ekki um þig?
Ég hef verið konsúll frá því árið 2003 en ég tók þá við ræðismannsstöðu fyrir Afríkuríkið Namibíu. Þar dvel ég oft og er það yndislegt land. Að hafa kynnst konunni í Pekingháskóla, hún ættuð frá Kambódíu, og vera ræðismaður Namibíu er dálítið spes. En þetta er allt líf mitt og yndi.

Hverja tækir þú með þér á eyðieyju?
Konuna auðvitað!

Hvað finnst þér vanta í Mosó?
Nýjan meirihluta.

Síðasta SMS sem þú fékkst?
,,Vííí takk :)“ frá Þórunni Magneu Jónsdóttur, sem skipar 4. sæti á lista Miðflokksins eftir að ég hrósaði henni fyrir frábæra frammistöðu.

Hvað er markmiðið að ná mörgum inn í bæjarstjórn?
Ég tel raunhæft að ná 5 ef allir mæta á kjörstað.

Með hverjum hugnast þér að starfa eftir kosningar?
Það er ekki gefið upp að svo stöddu enda ekki klókt að úttala sig um það. En það byggir á því að við náum að láta lausnir okkar fyrir Mosfellbæ ná fram að ganga.

Spilar árangur flokksins á landsvísu rullu í Mosó?
Þarf ekki að vera. Sveitastjórnarmál lúta öðrum lögmálum en landsmálin og hafa gert lengi.

Af hverju ætti fólk að kjósa þinn lista?
Við erum lausnamiðaður flokkur. Flokksmenn Miðflokksins eru þekktir fyrir að leysa mál en ekki flækja þau fyrir kjósendum. Það þekkjum við öll frá lánaleiðréttingunum sem komu mörgum vel og aðgerðum til losunar fjármagnshafta. Íslendingar urðu betur staddir sökum aðgerða flokksmanna Miðflokksins og við stöndum við gefin fyrirheit. Við höfum kjark til að ganga hreint til verks.

—–

Kynning á framboðslista Miðflokksins – Ætla að ná fram hagræðingu í rekstri sveitarfélagsins

Miðflokkurinn Mosfellsbæ á Facebook

Kjósendur í Mosfellsbæ geta valið á milli átta framboða í sveitarstjórnarkosningunum laugardaginn 26. maí. Í nýjasta tölublaði Mosfellings sitja oddvitar framboðanna fyrir svörum. Hér er á ferðinni oddviti Íbúahreyfingarinnar og Pírata.

Nafn:
Sigrún H. Pálsdóttir.

Aldur:
Á besta aldri.

Gælunafn:
Sigrún.

Starf:
Bæjarfulltrúi og leiðsögumaður.

Fjölskylduhagir:
Gift og tveggja barna móðir.

Hvar býrðu?
Í Lágafellshverfi.

Hvað hefur þú búið lengi í Mosó?
15 ár.

Hvað áttu marga vini á Facebook?
560.

Um hvað snúast kosningarnar 2018?
Gegnsæi, lýðræðisumbætur og velferð Mosfellinga.

Hver er merkasti Mosfellingurinn?
Jón Kalman.

Hvernig er kynjahlutfall og aldursdreifing á listanum ykkar?
10 konur, 8 karlar. Yngst 30 ára/elstur 68 ára.

Hefur þú komist í kast við lögin?
Nei.

Er pólitík skemmtileg?
Pólitík er mjög verðugt viðfangsefni og getur verið mjög skemmtileg.

Uppáhaldsviðburður í Mosó?
Jólabókakynningin í Bókasafni Mosfellsbæjar og bæjarhátíðin Í túninu heima.

Hvað drekkur þú marga kaffibolla á dag? 2.

Fallegasti staður í Mosfellsbæ?
Gönguleiðin eftir bökkum Varmár.

Besti matur í Mosó?
Kalkúnn frá Reykjabúinu, grænmeti úr heimabyggð og konfekt úr Mosfellsbakaríi.

Eitthvað sem fólk veit ekki um þig?
Hvað mér finnst gott að vinna að næturlagi.

Hverja tækir þú með þér á eyðieyju?
Hengirúmið, góðar bækur og þjón.

Hvað finnst þér vanta í Mosó?
Menningarhús með góðum matsölustað.

Síðasta SMS sem þú fékkst?
Frá vinkonu á ferð um Kína.

Hvað er markmiðið að ná mörgum inn í bæjarstjórn?
4.

Með hverjum hugnast þér að starfa eftir kosningar? Fólki sem brennur fyrir því að auka gegnsæi og knýja fram stjórnsýslubreytingar í Mosfellsbæ.

Spilar árangur flokksins á landsvísu rullu í Mosó?
Nei, ekki beint, en við hlökkum til að eiga bakland í Pírötum á þingi.

Af hverju ætti fólk að kjósa þinn lista?
Vegna þess að við vinnum af krafti og heilindum að velferð Mosfellinga.

—–

Kynning á framboðslista Íbúahreyfingarinnar og Pírata – Endurnýjun tímabær – Valkostur í boði

Íbúahreyfingin og Píratar á Facebook

Kjósendur í Mosfellsbæ geta valið á milli átta framboða í sveitarstjórnarkosningunum laugardaginn 26. maí. Í nýjasta tölublaði Mosfellings sitja oddvitar framboðanna fyrir svörum. Hér er á ferðinni oddviti Viðreisnar.

Nafn: Valdimar Birgisson

Aldur: 55

Gælunafn: Ég var alltaf kallaður Valli Bigga Vald á Ísafirði, en Valdi hér fyrir sunnan.

Starf: Auglýsingasérfræðingur.

Fjölskylduhagir:
Kvæntur Sigríði Dögg Auðunsdóttur fréttamanni og eigum við hjónin sex börn. Að auki á ég tvö barnabörn.

Hvar býrðu? Akurholti 17.

Hvað hefur þú búið lengi í Mosó?
Hef búið hér með einu hléi frá 2008.

Hvað áttu marga vini á Facebook?
Rúmlega 2.000

Um hvað snúast kosningarnar 2018?
Kosningarnar snúast um hvort við viljum innleiða nútímalegri stjórnun á bæjarfélaginu eða halda okkur við það gamla.

Hver er merkasti Mosfellingurinn?
Það er Halldór Laxness en af núlifandi Mosfellingum er það Jökull í Kaleo.

Hvernig er kynjahlutfall og aldursdreifing á listanum ykkar?
Við erum með fléttulista þannig að það er jafnt hlutfall kynja á listanum. Hrafnhildur Jónsdóttir er elst 59 ára, Tamar Klara Lipka Þormarsdóttir og Ari Páll Karlsson eru bæði 21 árs. Fimm af fyrstu 9 eru 30 ára eða yngri.

Hefur þú komist í kast við lögin?
Ég er nýbúinn að fá sekt fyrir að leggja ólöglega í Skaftahlíð. Mjög neyðarlegt.

Er pólitík skemmtileg?
Hún getur verið það, já, og ætti ekki að vera skemmandi ef við gætum þess að fara í málefnin en ekki manninn. Það er ekkert að því að takast á um málefni en um leið verður að gæta þess að bera virðingu fyrir fólki.

Uppáhaldsviðburður í Mosó?
Það er Í túninu heima. Gaman að sjá hvernig sú hátíð hefur vaxið og íbúar taka þátt í henni.

Hvað drekkur þú marga kaffibolla á dag?
Ég drekk opinberlega tvo bolla á dag.

Fallegasti staður í Mosfellsbæ?
Það fyrsta sem ég féll fyrir þegar ég bjó á Ökrum voru bakkar Varmár frá dælustöðinni og uppúr. Núna get ég talið upp fleiri, svo sem Leiruvogurinn og strandlengjan þar, og svo er Mosfellsdalurinn allur fallegur.

Besti matur í Mosó?
Það er Osso Bucco sem konan mín eldar af stakri snilld eins og svo margt annað. Það er eiginlega besti matur í heimi að mati sérfræðinga.

Eitthvað sem fólk veit ekki um þig?
Örugglega fullt. Til dæmis var ég í unglingalandsliðinu á skíðum, ég var sjómaður í mörg ár og svo vann ég við að selja snyrtivörur um hríð.

Hverja tækir þú með þér á eyðieyju?
Konuna mína, Sigríði Dögg, því að ég myndi vilja upplifa eyðieyjudvöl með henni, Gordon Ramsay, til að elda fyrir mig góðan mat, Ricky Gervais til að stytta mér stundir, og Elon Musk til að koma mér heim aftur.

Hvað finnst þér vanta í Mosó?
Það væri gott að hafa góðan matsölustað í bænum. Það vantar meiri þjónustu í Mosfellsbæ.

Síðasta SMS sem þú fékkst?
Tveir fyrir einn á Bergsson …

Hvað er markmiðið að ná mörgum inn í bæjarstjórn?
Markmiðið er að ná tveimur inn.

Með hverjum hugnast þér að starfa eftir kosningar?
Góðu fólki. Það er fullt af því í öllum flokkum í Mosfellsbæ og við sjáum bara tækifæri en ekki vandamál þar.
Spilar árangur flokksins á landsvísu rullu í Mosó? Eflaust eitthvað en sveitarstjórnarkosningar snúast um þær áskoranir sem eru hér en ekki annars staðar.

Af hverju ætti fólk að kjósa þinn lista?
Vegna þess að það er kominn tími á breytingar og við erum fólkið sem getur komið þeim breytingum á.

—–

Kynning á framboðslista Viðreisnar– Viðreisn ætlar að gera betur

Viðreisn í Mosfellsbæ á Facebook

Umhverfismálin hafa verið fyrirferðarmikil bæði í leik og starfi hjá Andrési Arnalds fyrrverandi fagmálastjóra hjá Landgræðslunni og núverandi verkefnastjóra en hann hefur starfað hjá stofnuninni í 37 ár.
Undanfarin ár hefur hann komið að úrbótum vegna þeirra miklu áhrifa sem vaxandi fjöldi ferðafólks hefur á okkar viðkvæma land.
Andrés ætlar að láta af störfum um áramótin en hann segir að hugsjónin um að vernda landið verði ávallt á sínum stað.

Andrés er fæddur í Reykjavík 4. desember 1948. Foreldrar hans eru þau Ásdís Andrésdóttir og Sigurður Arnalds útgefendur bóka og tímaritsins Satt en þau eru bæði látin.
Andrés á fimm bræður, Jón, Ragnar, Sigurð, Einar og Ólaf en Jón og Einar eru látnir.

Glitrandi vorkvöldin við Húnaflóann
„Ég ólst upp í Reykjavík og að hluta til á Ósum á Vatnsnesi í Vestur-Húnavatnssýslu. Líklega tengjast æskuminningarnar mest mínu notalegu heimili á Stýrimannastígnum og fjölbreyttum útileikjum.
Dvölin á Ósum á einnig stóran sess, að gefa kindunum, þegar ég fékk að velja mér lamb, fyrsta sumarkaupið, móðurlausi sel­kópurinn Harpa, útreiðatúrar og glitrandi vorkvöldin við Húnaflóann.
Ég dvaldi fyrst á Ósum þegar ég var 3 ára og var þar síðan öll sumur til 16 ára aldurs auk vetrarins þegar ég varð sex ára.“

Mannskapurinn gat verið skrautlegur
„Ég gekk í Miðbæjarskólann og líkaði vel, ég fékk snemma áhuga á undrum náttúrunnar sem fylgt hefur mér mér æ síðan.
Eftir landspróf úr Gagnfræðaskólanum í Vonarstræti tóku við fjögur dýrðleg ár í Menntaskólanum í Reykjavík. Á menntaskólaárunum vann ég hins vegar fyrir mér á togurum, lengst af á síðutogaranum Ingólfi Arnarsyni.
Á togurunum gat mannskapurinn verið skrautlegur þegar komið var um borð á þeim aflalitlu árum en í ljós kom margt gullið þegar rann af þeim.“

Reyndi að komast á krabbaveiðar
„Leiðin lá á Hvanneyri, þar átti ég frábær ár í Bændaskólanum og framhaldsdeildinni og útskrifaðist 1971. Við tók nám í beitarstjórnun og stjórnun vistfræði beitilanda í Washington í Bandaríkjunum 1972-74.
Á sumrin var ég sjómaður í Alaska, fyrst á laxveiðum þar sem við fengum 19.000 laxa á nítján veiðidögum. Talið var upp í árnar og skipin fengu aðeins að veiða einn dag í viku.
Seinna sumarið fékk ég far með rækjubát frá Seattle til Alaska þar sem ég ætlaði að reyna að komast á krabbaveiðar en lenti í selarannsóknum.“

Kynntist húnvetnskri bóndadóttur
Skömmu eftir heimkomuna, síðasta vetrardag 1975, kynntist Andrés húnvetnskri bóndadóttur og hafa þau verið saman síðan. Hún heitir Guðrún Pálmadóttir og er dósent í iðjuþjálfunarfræði við Háskólann á Akureyri.
Þau eiga fjögur börn, Ásdísi Aðalbjörgu f. 1977, Ara Pálmar f. 1980, Ólaf Þór f. 1986 og Hólmfríði Ósk f. 1988. Fyrir átti Andrés Stefán f. 1972 með Ráðhildi Stefánsdóttur. Barnabörnin eru sjö.

Standa vörð um sérstöðu náttúrunnar
Á árunum 1981-1984 stunduðu hjónin nám í Colorado í Bandaríkjunum og börnin fylgdu með. „Við fluttum svo í Mosfellssveit skömmu eftir að við komum til baka. Það var ári fyrir breytinguna úr sveit í bæ og trúlega var það sveitablærinn og nálægðin við fellin og fjöllin sem réði mestu.
Við höfum verið dugleg að stunda útivist og fara í ferðalög og víða farið bæði innanlands og utan. Ég hef komið á fjölmarga fallega staði erlendis, en því oftar sem ég fer til annarra landa þeim mun fegurra finnst mér Ísland. Við þurfum að standa vörð um sérstöðu náttúrunnar og landslagsheilda.“

Tónlistin er allra meina bót
„Áhugamál mín eru mörg og hefur tónlistin verið fyrirferðarmikil. Börnin voru í tónlistarnámi hér í bænum og Guðrún hefur lengst af sungið í kórum. Ég var alltaf í klappliðinu og er enn dyggur stuðningsmaður á tónleikum sem eru nokkuð tíðir hjá þessari fjölskyldu. En svo kom loks að mér, ég gekk í Vorboðana, kór aldraðra, nú í vetur. Tónlistin er allra meina bót.
Ég hef verið í Lionsklúbbi Mosfellsbæjar í mörg ár sem er skemmtilegur félagsskapur. Ég hef séð það í gegnum tíðina, allt frá mínum sjómennskuárum, hve stuðningur við þá sem orðið hafa á mistök í lífinu skiptir miklu máli, ekki bara fyrir þá sjálfa, heldur ekki síður fyrir samfélagið.“

Samskiptin breyttust til hins betra
Umhverfismálin hafa verið fyrirferðarmikil bæði í leik og starfi hjá Andrési. Sveinn Runólfsson fyrrverandi landgræðslustjóri fékk hann „að láni“ frá Rannsóknastofnun landbúnaðarins sumarið 1981, en svo fór að honum var aldrei skilað.
„Mér líkaði starfið hjá Landgræðslunni vel. Á mínum langa ferli hef ég komið að beitar- og landgræðslumálum um land allt. Það reyndi oft á, einkum vegna skilningsleysis á áhrifum beitar. Með tilkomu farsælla samstarfsverkefna, eins og „Bændur græða landið“, breyttust samskiptin við grasrótina mjög til hins betra.“

Í túninu heima
Andrés hefur haft mikinn áhuga á umhverfismálum í Mosfellsbæ og tók þátt í stofnun og starfi samtakanna Mosa sem voru mjög öflug á sínum tíma.
Í samstarfi við Mosfellsbæ var haldin fjölsótt ráðstefna í Hlégarði árið 1994 sem bar heitið „Í túninu heima“ þar sem fjallað var um umhverfismál, útivist og mannlíf. Samtökin hlutu viðurkenningu Mosfellsbæjar fyrir framlag til umhverfismála 1996. Árið 2016 var Andrési veitt viðurkenning frá bænum fyrir störf á sviði umhverfismála.

Sæmdur fálkaorðunni
Árið 2011 var Andrés sæmdur heiðursmerki hinnar íslensku fálkaorðu fyrir störf á vettvangi landgræðslu og jarðvegsverndar. Hann hefur verið virkur í alþjóðlegu samstarfi um landgræðslumál, m.a. sótt fundi erlendis og komið að undirbúningi alþjóðlegra ráðstefna.
„Við hér á Íslandi höfum nýtt okkur vel reynslu annarra þjóða, meðal annars til að stuðla að auknu landlæsi og þátttöku bænda jafnt sem almennings í vernd og endurreisn landkosta. Landverndarstarfið í Ástralíu hefur verið þar góð fyrirmynd. Jafnframt höfum við af mikilli þekkingu og reynslu að miðla til annarra þjóða sem eru að stríða við svipuð landeyðingarmál og við höfum verið að fást við hér frá því að skipulagt landgræðslustarf hófst fyrir 110 árum. Á þessum grunni starfar hér Landgræðsluskóli háskóla Sameinuðu þjóðanna og hef ég verið þar bæði í fagráði og sem kennari frá upphafi.“

Laus við meginskyldur
„Síðustu árin hef ég komið talsvert að úrbótum vegna þeirra miklu áhrifa sem vaxandi fjöldi ferðafólks hefur á okkar viðkvæma land. Ástand gönguleiða og staða er víða slæmt og efla þarf fagmennsku í því sem gert er.
Nú er ég að draga saman seglin, laus við meginskyldur sem fylgdu því að vera fagmálastjóri Landgræðslunnar og læt af störfum um áramót eftir að hafa starfað í 37 ár hjá þessari merku stofnun. Vissulega tímamót en hugsjónin um að vernda landið verður ávallt á sínum stað,“ segir Andrés er við kveðjumst.

Mosfellingurinn 17. maí 2018
Myndir og texti: Ruth Örnólfs

Vinir Mosfellsbæjar er óháð framboð sem býður fram í fyrsta sinn í vor. Framboðið á sér ekki rætur í hinum hefðbundnu stjórnmálaflokkum.
Framboðið sækir styrk sinn til einstaklinga úr ýmsum áttum með fjölbreytta þekkingu og bakgrunn, sem eiga það sameiginlegt að vilja efla hag bæjarins og allra íbúa hans.

Áhersla lögð á góða samvinnu
Heiðarleiki, þekking og lýðræði eru þau gildi sem framboð Vina Mosfellsbæjar mun byggja starf sitt á. Sérsök áhersla verður lögð á góða samvinnu við bæjarbúa og bæjarstarfsmenn.
Vinir Mosfellsbæjar ætla að auka og auðvelda aðkomu bæjarbúa með virku íbúalýðræði. Með opinni, gagnsærri og gagnvirkri stjórnsýslu geta Mosfellingar gert góðan bæ enn betri.

Fyrrum bæjarritari í fyrsta sæti
Stefán Ómar Jónsson, viðskiptalögfræðingur og fyrrverandi bæjarritari Mosfellsbæjar, mun leiða lista Vina Mosfellsbæjar. Í öðru sæti er Margrét Guðjónsdóttir lögmaður. Í þriðja sæti er Michele Rebora stjórnmálafræðingur og ráðgjafi í gæðastjórnun. Fjórða sæti skipar Vilhelmína Eva Vilhjálmsdóttir grafískur hönnuður og framkvæmdastjóri fimleikadeildar Aftureldingar.

Stefán Ómar Jónsson

Framboðslisti Vina Mosfellsbæjar
1. Stefán Ómar Jónsson
2. Margrét Guðjónsdóttir
3. Michele Rebora
4. Vilhelmína Eva Vilhjálmsd.
5. Olga Stefánsdóttir
6. Sigurður Eggert Halldóruson
7. Lilja Kjartansdóttir
8. Gestur Valur Svansson
9. Óskar Einarsson
10. Agnes Rut Árnadóttir
11. Pálmi Jónsson
12. Rúnar Breiðfjörð Ásgeirsson
13. Björn Brynjar Steinarsson
14. Sonja Ósk Gunnarsdóttir
15. Úlfhildur Geirsdóttir
16. Björn Óskar Björgvinsson
17. Valgerður Sævarsdóttir
18. Valdimar Leó Friðriksson

Styrkur einstaklinga úr ýmsum áttum
Stefán Ómar Jónsson leiðir listann fyrir sveitarstjórnarkosningarnar þann 26. maí. „Framboðið sækir styrk sinn til einstaklinga úr ýmsum áttum með fjölbreytta þekkingu og bakgrunn, sem eiga það sameiginlegt að vilja efla hag bæjarins og allra íbúa hans.
Vinir Mosfellsbæjar hvetja alla unga sem aldna til þess að nýta kosningarétt sinn, þennan mikilvæga lýðræðislega rétt sem við þurfum að viðhalda og rækta.
Við höfum einlægan áhuga á vandaðri og réttsýnni stjórnsýslu. Í nútímasamfélagið þar sem tölvutækni og róbótavæðing, fjórða iðnbyltinginn, ræður ríkjum er mikilvægt að stjórnsýslan sé ekki aðeins vönduð og rétt, heldur að hún sé rafræn og gagnvirk. Á þessum málum hef ég mikla þekkingu og hana mun ég sem bæjarfulltrúi nýta þannig að íbúar fái notið fremstu tækni.
Ég leiði Vini Mosfellsbæjar til þessara bæjarstjórnarkosninga af heilindum og með gleði í hjarta.“

Margrét Guðjónsdóttir

Með viðamikla þekkingu
„Vinir Mosfellsbæjar hafa það að markmiði að koma að uppbyggingu og þjónustu við Mosfellinga, með viðamikla þekkingu að vopni,“ segir Margrét Guðjónsdóttir.
„Við höfum einlægan áhuga á velferðarmálum almennt, málefnum fatlaðra svo og málefnum eldri borgara. Í eldri borgurum býr fjársjóður reynslu og þekkingar sem við getum og eigum að nýta okkur. Í skipulagsmálum þurfum við að vanda okkur sérstaklega til að tapa ekki þeim sjarma að vera sveit í borg. Á þessum málefnum hef ég mikla þekkingu og hana mun ég nýta.
Ef við stöndum saman og ræðum málin, leyfum öllum þeim mannauði sem Mosfellsbær býr yfir að njóta sín og koma að málum, þá getum við gert bæinn okkar enn betri fyrir íbúa hans, jafnt unga sem aldna.“