Hótel Laxnes var formlega opn­að í september 2008 að viðstöddu fjölmenni.
Á hótelinu eru 26 herbergi við allra hæfi, þrjár svítur, herbergi með sérinngangi og eldun­araðstöðu auk tveggja stúdíóíbúða fyrir fatlaða á fyrstu hæð.
„Fyrsta skóflustungan var tekin árið 2004 og tók fjögur ár að byggja hótelið, einn nagla í einu,“ segir Albert Rútsson hóteleigandi.
„Þegar ég keypti Áslák á sínum tíma sá ég mikil tækifæri í lóðinni hér í kring. Fólk hélt auðvitað að ég væri brjálaður.
Fyrst leigði ég skólakrökkum og öðrum stúdíóíbúðinar á neðri hæðinni en svo kom sprengingin í ferðamannaiðnaðnum. Frá þeim tíma höfum við vaxið ört frá ári til árs. Tíminn hefur verið fljótur að líða og hótelið fengið góða dóma. Markaðssetningin fer mikið fram á netinu og hefur gengið vel. Við erum með átta manns í vinnu og svo er Áslákur alltaf opinn til miðnættis.

Hótelið stækki í náinni framtíð
Búið er að teikna stækkun við hótelið og þá myndi herbergjum fjölga um 40. „Ég á von á því að það gerist í náinni framtíð. Um áramótin tekur við nýr hótelstjóri og fjölskyldan mín mun meira koma inn í reksturinn. Ég er auðvitað farinn að eldast en mun þó alltaf fylgist með á hliðarlínunni.
Aðspurður um hvort hótelið væri ekki til sölu svarar Alli að salan á sínum tíma hafi sem betur fer klikkað. Framtíðin sé björt og aldrei hafi fleiri gestir sótt hótelið.
„Við höfum auglýst bæjarfélagið mjög mikið og allt sem það hefur upp á að bjóða. Það er stutt að fara til og frá Reykjavík og margir okkar gesta vilja vera aðeins fyrir utan miðbæinn.
Við fáum t.d. mikið af gestum frá Þýskalandi, Englandi, Ameríku og nú eru Japanir að flykkjast hingað.“

Vegleg gjöf til björgunarsveitarinnar
Í tilefni af 10 ára afmælis hótelsins ákvað Alli að gefa björgunarsveitinni Kyndli 100.000 kr. og 300 eintök af ævisögu sinni sem kom út fyrir skömmu. Það má því segja að gjöfin til Kyndils geti orðið að andvirði einnar milljónar.

Verktakafyrirtækið Afltak í Mosfellsbæ er handhafi jafnréttisviðurkenningar Mosfellsbæjar.
Afltak hefur ráðið konur til starfa sem hefðbundið hefur verið litið á sem karlmannsstörf auk þess að hvetja kvenkyns starfsmenn til iðnnáms. Í dag starfa fjórar konur hjá Afltaki og þrjár þeirra eru faglærðir húsasmiðir. Þá leggur Afltak mikla áherslu á að veita konum og körlum jöfn tækifæri og sömu laun fyrir sömu störf.
Með viðurkenningunni vill fjölskyldunefnd Mosfellsbæjar hvetja fyrirtæki í Mosfellsbæ til að fylgja góðu fordæmi Afltaks og byggja undir vitundarvakningu og auka umræðu um jafnrétti kynjanna.
Eigendur Afltaks eru hjónin Kristín Ýr Pálmarsdóttir og Jónas Bjarni Árnason og er fyrirtækið staðsett að Völuteigi 1.
Viðurkenningin var veitt á Jafnréttisdegi Mosfellsbæjar þann 21. september. Landsfundur sveitarfélaga um jafnréttismál fór einnig fram á sama tíma í Hlégarði og Kletti.

Ungmennafélagið Afturelding var stofnað 11. apríl 1909. Afturelding hefur heilsu allra aldurshópa að leiðarljósi með því að hvetja til og standa fyrir heilbrigðri afþreyingu í formi íþrótta og hreyfingar en innan félagsins starfa ellefu deildir.
Á aðalfundi Aftureldingar sem fram fór í maí sl. var kosinn nýr formaður, Birna Kristín Jónsdóttir. Hún sér fram á mikla uppbyggingu hjá félaginu á næstunni í samstarfi við Mosfellsbæ og mun verða unnið að því að móta raunhæf framtíðar­áform.

Birna Kristín er fædd á Eskifirði 9. ágúst 1971. Foreldrar hennar eru Olga A. Björnsdóttir húsmóðir og Jón Ingi Einarsson fyrrum skólastjóri. Systkini Birnu eru þau Aðalheiður Björk, Dagný og Einar Guðberg.

Bæði í frjálsum og fótbolta
Birna var aðeins eins árs þegar hún flutti ásamt fjölskyldu sinni frá Eskifirði til Víkur í Mýrdal. Þar bjuggu þau í 10 ár þangað til þau fluttu aftur austur. „Mér fannst mjög gaman að búa á báðum þessum stöðum þótt ég líti nú alltaf á mig sem Eskfirðing. Ég var í íþróttum, bæði í frjálsum og fótbolta, fyrst með Drangi í Vík og síðan Austra.“

Skilin eftir á Skeiðarársandi
„Ég hafði yfirleitt gaman af öllum hlutum en hef heyrt það frá foreldrum mínum að ég hafi verið ansi baldin sem krakki. Alltaf vöknuð um leið og sólin kom upp og þau þurftu alveg að hafa fyrir mér. Sem dæmi má nefna að eitt skipti var ég skilin eftir á Skeiðarársandi því ég hlýddi ekki. Ég var beðin um að sitja í aftursætinu á bílnum en það vildi ég ekki, ég vildi standa á milli sætanna.
Ég var sett á leikskóla en það hentaði mér ekkert sérlega vel, ég náði að strjúka þaðan og það lýsir mér kannski vel því ég hef alltaf farið mínar eigin leiðir.“

Skutlaði öllum út af laglínunni
„Þegar ég var 13 ára var stofnaður kór á Eskifirði. Tónlistarkennarinn tók alla í prufur og þetta var mjög gaman. Einn daginn sagði mamma við mig við kvöldverðarboðið: „Birna mín, er ekki alveg nóg fyrir þig að vera bara í boltanum og frjálsum, svo er skólinn og blaðburðurinn og svona?“ Ég jánkaði því nú en þá hafði tónlistarkennarinn gefið mömmu „hint“ um það að ég hefði þann eiginleika að skutla öllum út af laglínunni með mínu einstaka lagi,“ segir Birna og brosir
„Ég gekk í Víkurskóla en kláraði svo skylduna í grunnskóla Eskifjarðar. Mér þótti skemmtilegast í íþróttum og stærðfræði. Uppáhaldskennarinn minn var líklega Helga Unnarsdóttir sem kenndi mér leikfimi en hún brann fyrir frjálsum íþróttum og smitaði okkur sannarlega með sér. Eftir grunnskóla flutti ég til Reykjavíkur í íbúð sem foreldrar mínir áttu og bjó þar með systur minni.“

Lentu í ýmsum ævintýrum
Ég fór í Verslunarskóla Íslands, kláraði verslunarprófið og tók svo frí í eina önn og vann í síldinni heima. Það var alveg hrikalega skemmtilegt tímbil.
Í janúar 1990 byrjaði ég í MH og kláraði stúdentinn þaðan. Þar kynntist ég einni af mínum bestu vinkonum, henni Huldu Þóreyju. Við fórum saman í Interrail eftir útskrift og lentum í ýmsum ævintýrum. Okkur fannst við mjög fullorðnar en við vorum í raun eins og tvær úr Tungunum, hún frá Kópaskeri og búin að fara einu sinni til útlanda og ég frá Eskifirði og var að fara í fyrsta skipti.
Eftir þessa dýru og frábæru ferð fékk ég vinnu í Seðlabankanum og þar starfa ég enn en hef líka tekið ýmis konar nám samhliða vinnunni. Þetta er frábær vinnustaður og ég hef alltaf verið mjög lánsöm með samstarfsfólk og yfirmenn.“

Leikurinn endaði með jafntefli
Birna Kristín kynntist eiginmanni sínum Herði Hafberg Gunnlaugssyni húsasmíðameistara árið 2005 en þau giftu sig tveimur árum síðar. „Það var sko þvílík lukka að kynnast Herði. Okkar fyrsta deit var að horfa saman á fótboltaleik Manchester United – Liverpool sem endaði með jafntefli sem lýsir okkar hjónabandi ansi vel,“ segir Birna og brosir.
Við eigum sameiginlega þrjár dætur, Hrafnhildur Olga dóttir mín er fædd 1994 og Ásta Jóhanna hans Harðar er fædd 1998 en Ingibjörg Ólína er fædd 2009.
Við fjölskyldan komum úr Grafarholtinu og þegar kom að því að stækka við okkur þá rákumst við á eign í Mosfellsbæ. Við skoðuðum hana og vorum fljót að sjá að þetta væri sú eina rétta. Við fluttum í maí 2014 og okkur hefur verið einstaklega vel tekið hérna og höfum eignast marga góða vini.“

Afturelding er einstakt félag
„Áhugamál mín eru held ég bara allar íþróttir, skíði og útivist. Ég hef æft margar íþróttir en knattspyrnan er þó alltaf í uppáhaldi.
Þegar ég var búin að starfa í þrjú ár sem gjaldkeri Aftureldingar tók ég við sem formaður. Frá þeim tíma sem ég tók við hefur starfið verið mjög fróðlegt, krefjandi og skemmtilegt. Formaður er ekkert nema hafa gott fólk með sér, aðalstjórnin er sérstaklega vel mönnuð og ekki skemmir fyrir allt það yndislega starfsfólk íþróttahússins sem við reiðum okkur á.
Afturelding er einstakt félag og framtíð iðkenda er björt. Fram undan er mikil uppbygging á aðstöðumálum, við erum að fara að skipta út gólfi í sölum og svo fer að rísa knattspyrnuhús hjá okkur. Meistaraflokkur karla er efstur í 2. deildinni í dag og ef þeir fara upp um deild eru meiri kröfur af hálfu KSÍ um vallaraðstæður og umgjörð en við mætum í dag. Það verður spennandi verkefni að fara í ef af verður.“

Mótum raunhæf framtíðaráform
„Við vinnum í góðu samstarfi við Mosfellsbæ en bærinn á og rekur öll þau mannvirki sem við notum. Auðvitað gerum við okkur grein fyrir því að ekki er hægt að gera allt í einu en saman vinnum við að því að móta raunhæf framtíðaráform. Það verður gaman að sjá hvert við verðum komin á 110 ára afmæli félagsins á næsta ári.
Maður finnur glöggt þegar vel gengur í íþróttunum hvað það sameinar Mosfellinga og því gríðarlega mikilvægt að við stöndum okkur vel. Það er á okkar ábyrgð að veita deildunum okkar toppaðstöðu.
Ég held að það sé alveg óhætt að segja að Aftureldingarhjartað slær í öllum Mosfellingum,” segir Birna brosandi að lokum.

Mosfellingurinn 6. september 2018
Myndir og texti: Ruth Örnólfs

Á sérstakri hátíðardagskrá á bæjarhátíðinni Í túninu heima var Steinþór Hróar Steinþórsson, betur þekktur sem Steindi Jr., útnefndur bæjarlistamaður Mosfellsbæjar árið 2018.
Steindi Jr. er alinn upp og búsettur í Mosfellsbæ. Hann er skapandi listamaður og hefur náð árangri á fleiri en einu sviði lista. Hann hefur gert sjónvarpsþætti, leikið og skrifað handrit og sannað sig bæði í leiklist og tónlist.

Vann Edduna fyrir leik í Undir trénu
Steindi hefur gert garðinn frægan í gamanhlutverkum og í seinni tíð einnig verkum í alvarlegri kantinum en hann vann Edduna 2018 fyrir hlutverk sitt í myndinni Undir trénu. Hann er skapandi og frjór í sinni listsköpun og höfðar til breiðs hóps.
Þá hefur hann með áberandi hætti verið tengdur við Mosfellsbæ í mörgu af því sem hann hefur tekið sér fyrir hendur. Í því tilliti hefur hann lagt sig fram um að vekja athygli á uppruna sínum í Mosfellsbæ og tekið þátt í mörgum verkefnum innan bæjarins.

Vill miðla reynslu sinni áfram
„Sem grjótharður Mosfellingur er þetta mesti heiður sem mér hefur hlotnast,“ segir Steindi. „Þetta er mér mikil hvatning og mun ég áfram reyna að tengja bæinn minn við það sem ég er að bralla.
Mig langar að nota tækifærið og nýta mér þessa nafnbót til að miðla reynslu minni áfram til krakka og unglinga í Mosfellsbæ og kynna þau fyrir skapandi listum. Vonandi mun það gerast einn daginn í góðu samstarfi við skólana og félagsmiðstöðina.
Ég hlakka til að hitta krakkana og reyna að smita þau af bakteríunni. Það væri gaman að sjá vini hittast og skapa saman eitthvað skemmtilegt í stað þess að hanga hver í sínu horni í símanum eins og svo algengt er.“

Nýtti hádegishléin vel
„Ég hóf t.d. ferilinn minn hér í Mosó við að gera stuttmyndir og skrifa í bæjarblöðin. Þá stofnaði ég útvarpsstöð í samstarfi við félagsmiðstöðina Ból.“
Steindi skrifaði sína fyrstu sjónvarpsþáttaseríu að hluta til þegar hann vann í Lágafellslaug. „Já, ég nýtti hádegishléin vel og faldi mig stundum með fartölvu inni í klefa. Það hefur mikið vatn runnið til sjávar síðan þá,“ segir Steindi að lokum.

Á laugardaginn kemur Þróttur frá Vogum í heimsókn í Mosfellsbæinn til að spila við strákana okkar í 2. deildinni. Við erum efstir í deildinni, höfum skorað flest mörk allra liða – reyndar allra liða í fjórum efstu deildum karla á Íslandsmótinu í sumar. Eina liðið hingað til sem hefur náð að rjúfa 50 marka múrinn. En Þróttararnir eru sýnd veiði en langt frá því gefin. Þeir eru eitt af bestu útiliðum deildarinnar, gengur mun betur á útivöllum en heima í Vogum. Það stefnir því allt í hörkuleik að Varmá.

Fjölmargir Mosfellingar fóru með liðinu á Seltjarnarnes í síðasta leik og komu kátir heim eftir baráttu­sigur gegn spræku liði Gróttu. Þar áður mættu margir Mosfellingar á heimaleikinn gegn Hugin frá Seyðisfirði og urðu heldur ekki fyrir vonbrigðum. Strákarnir, þjálfararnir og teymið í kringum þá hafa lagt hart að sér frá því að undirbúningstímabilið hófst síðasta haust. Það eru þrír leikir eftir í 2. deildinni. Deildinni sem við ætlum að kveðja í ár.

Til þess að það megi gerast er stuðningur okkar Mosfellinga lykilatriði. Við getum gefið þeim sem eru inn á vellinum aukaorku með því að mæta á völlinn og sýna þeim að félagið okkar skiptir okkur máli.

Íþróttir eru að mínu mati besta forvörnin sem við sem samfélag eigum og félagið okkar allra, Afturelding, er stútfullt af fólki sem gerir sitt besta til þess að skapa góða og jákvæða umgjörð fyrir krakka og unglinga sem vilja og þurfa að hreyfa sig. Því meiri árangri sem meistaraflokksliðin okkar ná, því meiri pressa – jákvæð – er á bæjaryfirvöld að efla umgjörð félagsins. Bæði íþróttalega og félagslega. Það er svigrúm til bætingar á báðum sviðum. Stuðningur við strákana okkar á laugardaginn hjálpar til við að mjaka málum áfram. Efla samstarf Mosfellsbæjar og Aftureldingar, okkur öllum til góða. Sjáumst á vellinum!

Heilsumolar Gaua
Mosfellingur 6. september 2018

Íbúar í Álafosskvos hafa tekið sig saman í samstarfi við Mosfellsbæ og tekið í notkun svokallaðan Samfélagsgarð efst í Kvosinni.
Garðurinn er hugsaður fyrir íbúana til að rækta sitt eigið grænmeti og vera saman úti í náttúrunni. Garðurinn er hringlaga og hefur hver íbúi sína sneið til ræktunar.
„Samfélagslegur ávinningur af verkefni sem þessu getur verið töluverður, segir Guðrún Ólafsdóttir íbúi í Kvosinni. „Garðurinn mun auka tengsl okkar við náttúruna og samvinnu íbúanna ásamt því að auka samveru fjölskyldunnar. Börnin okkar læra í verki að virða og njóta náttúrunnar og rækta sína eigin næringu.“

Í anda heilsueflandi samfélags
Íbúarnir í Álafosskvos leituðu til Mosfellsbæjar þar sem svæðið er í eigu bæjarins. „Okkur fannst þetta í anda Heilsueflandi samfélags, stuðlar að góðum samskiptum, hvetur fólk til að borða hollt og rækta líkama og sál,“ segir Berglind, einn af ræktendunum.
Svæðið sem var áður þakið lúpínu hentar einkar vel til ræktunar, sólríkur blettur og skjólsælt er úr öllum áttum. Mosfellsbær aðstoðaði við að standsetja ræktunarsvæðið og útvegaði mold. Þá var Jón Júlíus hjá Garðmönnum og íbúi í Kvosinni liðtækur og lagði sitt af mörkum.

Þjappar íbúunum saman
Íbúarnir segjast mjög þakklátir fyrir hversu vel bærinn tók í hugmyndina og þá aðstoð sem þeir fengu.
Nafnið Samfélagsgarður kom til vegna hversu mikið hann gerir fyrir samfélagið og þjappar íbúum saman. „Svo dreymir okkur auðvitað um að svona verði í hverju einasta hverfi bæjarins, að íbúar rækti grænmetið sitt, kannski með nokkrar hænur og svona,“ segja ánægðir samfélagsþegnar í Kvosinni.

Hans Þór hefur unnið jöfnum höndum við sitt fag sem veggfóðrara- og dúklagningameistari og sem hljóðfæraleikari en hann byrjaði að spila 14 ára gamall.
Lengst af spilaði Hansi eins og hann er ávallt kallaður með Lúdó sextettnum en hann hefur einnig spilað með hinum ýmsu böndum í gegnum tíðina. Á dögunum gaf hann út eigin geisladisk sem hann tileinkar góðum vini.

Hans Þór er fæddur í Reykjavík 2. september 1941. Foreldrar hans eru þau Jónína Þorbergsdóttir húsmóðir og Jens Hansson skipstjóri. Hans á tvo bræður, þá Hafstein og Sverri.

Fór upp á stól og jóðlaði
„Ég er alinn upp í Reykjavík og Kópavogi en var öll sumur hjá afa mínum og ömmu á Hellissandi og þar fannst mér gott að vera. Ég lærði að slá með orfi og ljá hjá afa mínum og um 10 ára aldur fékk ég heimasmíðað orf sem passaði sérstaklega fyrir mig.
Þegar ég var ungur, svona um sex ára aldurinn, var ég oft fenginn til að koma í afmæli þar sem ég fór upp á stól og jóðlaði. Þetta voru fyrstu giggin hjá mér og stundum fékk ég aur fyrir,“ segir Hansi og brosir.

Útskrifaðist úr Iðnskólanum
„Ég byrjaði í Miðbæjarskólanum en fór svo í Kópavogsskóla og þaðan í Austurbæjarskóla. Í þeim síðastnefnda varð ég fyrir miklu einelti og mér leið illa í skólanum. Ég gat ekki hugsað mér að fara í gagnfræðaskóla út af eineltinu og fór þá að vinna við innheimtu hjá Sjóvá en fór í kvöldskóla hjá KFUM.
Árið 1957 fór ég í Iðnskólann í Reykjavík og útskrifaðist þaðan sem veggfóðrara- og dúklagningamaður og hef unnið við þá iðn síðan.
Ég hef alla tíð haft gaman af tónlist og byrjaði að læra á saxófón hjá Braga Einarssyni og Vilhjálmi Guðjónssyni klarínettleikara. Ég fór líka í Tónlistarskóla Reykjavíkur og var fyrsti nemandinn í saxófónleik þar.“

Gift í 55 ár
Eiginkona Hansa er Hjördís Sigurðardóttir sölumaður en þau hafa verið gift í 55 ár og eiga þrjá syni. „Hilmar elsti sonur okkar er fæddur 1960. Hann er dúkari eins og ég og mikill veiðisnillingur. Hann er kvæntur Oddnýju Magnadóttur og samtals eiga þau sex börn. Jens er fæddur 1963 og er dúkari og hljóðfæraleikari, lengst af í Sálinni hans Jóns míns. Hann á þrjá syni. Yngstur er svo Sigurður Helgi dúkari og söngvari, hann er kvæntur Öldu Kristinsdóttur og þau eiga þrjú börn.
Barnabörnin okkar eru tólf og svo eigum við fjögur barnabarnabörn.“

Hafa ferðast víða
„Áhugamál okkar hjóna eru margvísleg en við erum búin að ferðast mjög mikið erlendis á öllum þessum árum okkar saman. Við höfum farið í um 30 ár til Kanarí í sólina yfir vetrartímann en einnig til Taílands, Hong Kong, Ameríku, Jamaica og Rússlands.
Nýjasta áhugamálið er húsbíllinn okkar, við eltum góða veðrið og góða ferðafélaga.
Við eigum líka stóra fjölskyldu og við elskum að hittast og njóta þess að borða saman. Eins eyðum við góðum stundum með vinum okkar.“

Með puttann á púlsinum
Hans og Sigurður sonur hans stofnuðu fyrirtæki saman árið 2000, Múrefni ehf. sem staðsett er í Mosfellsbæ. Þeir sérhæfa sig í að selja og þjónusta sérhæfðar byggingavörur og gólfefni frá völdum framleiðendum í Evrópu. Þeir miðla þekkingu til birgja og þá sérstaklega til fagmanna og viðskiptavina til að tryggja hámarks árangur og endingu á þeim vörum sem þeir hafa upp á að bjóða.
„Þetta byrjaði þannig að við fengum umboð fyrir Weber sem selur gæðamúrefni og ýmis viðgerðarefni fyrir hús. Síðan bættum við múrklæðningum við og það nýjasta hjá okkur er vínylparket sem hefur algjörlega slegið í gegn.“

Tónlistin aðaláhugamálið
„Ég byrjaði að læra á saxafón þegar ég var 14 ára og það ár byrjaði ég í Lúðrasveitinni Svaninum. Ég fór með þeim á landsmót lúðrasveita á Akureyri og þar kynntist ég Finni Eydal. Hann bauð mér með sér heim til að hlusta á djass sem síðar varð mín uppáhaldstónlist.
Maður spilaði síðan með hinum og þessum á skólaböllum en árið 1957 var Plúto kvintett stofnaður sem síðar varð Lúdó sextett. Það var spilað í Vetrargarðinum við tívolí sem var ansi líflegur staður. Þar voru ekki vínveitingar en menn mættu með vínið innanklæða. Oftar en ekki lenti allt í slagsmálum, við sviðið var stór bjalla sem við notuðum til að hringja í útkastarana sem hentu áflogaseggjunum út og ballið hélt svo áfram.
Í Þórskaffi spiluðum við fimm kvöld í viku og þangað kom engin inn nema í sparifötum og með bindi. Sveitaböllin tóku svo við og böllin fyrir kanann upp á velli.
Vinsældir hljómsveitarinnar jukust jafnt og þétt og stóð þessi spilamennska yfir í 10 ár á þessum tíma en þetta var oft ansi strembið.“

Palla er sárt saknað
Hans gaf út geisladisk á dögunum með lögum sem eru honum afar kær en diskurinn er gefinn út til minningar um vin hans, Pál Helgason tónlistarmann. „Leiðir okkar Palla lágu fyrst saman í Karlakórnum Stefni þegar hann var endurvakinn. Við urðum góðir vinir og spiluðum saman meðal annars í hljómsveit í Oddfellow-húsinu ásamt Örlygi Richter og fleirum. Palla er sárt saknað.
Diskurinn er svona léttur jazzdiskur, vinur minn Grétar Örvarsson hvatti mig til þess að fara út í þetta og sá hann um upptökur. Þeir sem spila með mér eru Einar Valur Scheving, Grétar Örvarsson, Pétur Valgarð Pétursson, Úlfar Sigmarsson og Þórður Högnason.“
Og hvar er hægt að kaupa diskinn? „Hann er ekki kominn í dreifingu ennþá en fyrir áhugasama þá er hægt að nálgast hann hjá mér.“

Tónlistarveisla Í túninu heima
Nú er bæjarhátíðin á næsta leiti og dagskrá hátíðarinnar glæsileg að vanda. „Við höfum boðið heim til okkar hingað í Akurholtið í sex ár og höfum verið með tónleika í garðinum. Þetta byrjaði þannig að við búum í sama húsi og yngsti sonur okkar sem er í rokkkarlakórnum Stormsveitinni. Við skelltum bara í band fjölskyldan ásamt vinum og höfum líka fengið aðra listamenn til liðs við okkur.
Þetta hefur verið mjög skemmtilegt og mikill fjöldi fólks hefur lagt leið sína til okkar. Því miður þá verður ekki af tónleikum í ár vegna anna en við fjölskyldan viljum fá að nota tækifærið og óska öllum bæjarbúum gleðilegrar hátíðar,“ segir Hansi er við kveðjumst.

Mosfellingurinn 21. ágúst 2018
Myndir og texti: Ruth Örnólfs