Bernhard Linn eða Benni eins og hann er ávallt kallaður er með bíladellu á háu stigi og hefur ekið bílum svo lengi sem hann man eftir sér. Hann ætlaði sér alltaf að verða bifvélavirki en fann fljótt út að það heillaði hann meira að sitja undir stýri og starfa sem atvinnubílstjóri.
Benni hefur átt hátt í 50 fólks- og vörubíla um ævina, nokkur mótorhjól og fjórhjól en fyrsta bílinn eignaðist hann 16 ára gamall, Renault „hagamús“ árgerð 1954.

Bernhard er fæddur í Reykjavík 1. októ­ber 1942. Foreldrar hans voru þau Arndís G. Jakobsdóttir starfsmaður á Álafossi og símamær og Irving Linn hermaður í bandaríska hernum. Faðir Benna var sendur frá Íslandi áður en Benni fæddist og hann hefur aldrei hitt föður sinn.
Benni á þrjá bræður samfeðra, Kenneth, Edward og Eric og hefur hann hitt tvo af þeim en Edward lést árið 1996.

Svínahirðir og sjoppustjóri
Benni hefur búið hér alla sína ævi og er því rótgróinn Mosfellingur. Fyrstu fjögur ár ævi sinnar bjó hann í Tjaldanesi í Mosfellsdal með móður sinni og afa sínum og ömmu en flutti síðan í bragga sem stóð efst í Ullarnesbrekkunni.
„Ég byrjaði að vinna 12 ára gamall á Álafossi, var svínahirðir, vann á traktor og svo var ég sjoppustjóri í tvö ár,“ segir Benni þegar við rifjum upp æskuárin hans.
„Ég gekk í Brúarlandsskóla og þar voru frábærir kennarar. Það var alltaf gaman í skólanum og mér gekk vel að læra.“

Dvergarnir sjö
Benni hefur alltaf verið góður í sundi enda alinn upp í innisundlauginni á Álafossi. Þar tók hann líka afreksstig en Klara Klængsdóttir kenndi honum sundtökin. Krakkarnir úr sumarbústöðunum í Reykjahverfinu komu oft í sund og þá var kátt á hjalla.
„Ég æfði knattspyrnu og frjálsar yfir sumartímann á Tungubökkum og á unglingsárunum æfði ég handbolta. Þá var skotið í mark í kjallara í Brúarlandi en Afturelding æfði líka í Hálogalandi í Reykjavík.
Ég spilaði í tvö ár á Íslandsmóti í handknattleik með Aftureldingu með liði sem gekk undir nafninu Dvergarnir sjö.Það nafn kom til því allir voru svo hávaxnir nema ég. Það gekk vel hjá okkur og einn veturinn fékk ég að taka öll vítaköstin. Ég skoraði úr þeim öllum nema einu sem ég fékk að taka aftur af því að dómarinn var ekki búinn að flauta og ég skoraði.“

Forljótur og erfiður í akstri
„Ég er með bíladellu á háu stigi og eignaðist mitt fyrsta mótorhjól 15 ára gamall og fyrsta bílinn 16 ára, Renault „hagamús“, segir Benni og brosir. „Ég fór í iðnskóla á Reykjalundi að læra bifvélavirkjun en áttaði mig fljótt á því að mér fannst meira spennandi að keyra bílana heldur en að gera við þá og fór þá að starfa sem atvinnubílstjóri.
Fyrsti vörubíllinn sem ég starfaði á var forljótur og erfiður í akstri, grjóthastur og þungur í stýri. Á þessum tíma voru flestir vegir malarvegir, oftast holóttir og allt leiddi þetta upp í skrokkinn á manni.
Bílarnir hafa breyst til hins betra og þróunin er gífurleg, ekki síst fyrir bílstjórann. Flestir vörubílar eru nú með loftfjöðrun á hverju hjóli, stýrishúsið á loftpúðum og sætið á loftfjöðrum og langflestir eru sjálfskiptir. Það er ekkert mál að keyra stóra bíla í dag, bara gaman.“

Kynntust í Dalnum
Benni kynntist eiginkonu sinni, Dagbjörtu Pálmeyju Pálmadóttur, eða Döggu eins og hún er ávallt kölluð, í partýi í Dalsgarði. Þau giftu sig 1970 og byrjuðu búskap sinn í Hlíðartúni en byggðu sér svo hús við Merkjateig. Í dag hafa þau komið sér vel fyrir á Eirhömrum.
Benni og Dagga eiga fimm börn, Arndísi Guðríði f. 1970, Pálma f. 1972, Steinunni f. 1977, Ágúst f. 1979 og Hauk f. 1982. Barnabörnin eru tíu talsins.
„Við Dagga höfum verið dugleg að ferðast í gegnum tíðina, höfum átt húsbíla í yfir tuttugu ár, fyrsti hét Kátur svo kom Skútinn og svo Langintes.
Við höfum farið víða með börnunum okkar og barnabörnum og eins með húsbílafélaginu.“

Unnið alla daga vikunnar
„Maður hefur komið víða við í akstrinum í gegnum tíðina. Ég keyrði sendibíl fyrir Kaupfélag Kjalarnesþings og vörubíl hjá Haraldi Guðjónssyni og mági hans hjá Sandi og möl. Ég vann í námu fyrir Vinnuvélar, keyrði hjá Steypustöðinni, Vörubílastöðinni Þrótti og hjá bækistöð Reykjavíkurborgar í 17 ár.
Vinnudagarnir voru oft ansi langir, allt frá hálfátta á morgnana til ellefu á kvöldin alla daga vikunnar, laugardaga og marga sunnudaga.
Maður setti nú ekki fyrir sig að skreppa á ball á laugardagskvöldum þótt maður þyrfti að mæta til vinnu daginn eftir,“ segir Benni og glottir.

Lærði mikið um mannleg samskipti
Árið 1970 stofnaði Benni jarðverktakafyrirtækið Hengil ásamt félögum sínum Jóni Sverri í Varmadal og Níelsi Unnari á Helgafelli. Á þessum tíma var mikil uppbygging í Mosfellsbæ og þeir félagar tóku að sér gatnagerð og húsgrunna og það var unnið myrkranna á milli.
Benni var einn af stofnendum Litlu bílastöðvarinnar, leigubílastöðvar sem starfrækt var í Mosfellsbæ í nokkur ár. Hann keypti sér leigubíl og ákvað að hvíla sig á vörubílaakstri.
Í leigubílaakstrinum segist hann hafa lært mikið um mannleg samskipti og telur sig reynslunni ríkari.
Litla bílastöðin sameinaðist síðan Hreyfli og þar keyrði Benni í nokkur ár. Samhliða leigubílaakstrinum starfaði hann í sveitastjórnarmálum í átta ár, þar af tvö ár sem framkvæmdastjóri íþróttamannvirkja.

Hefur unnið til margra verðlauna
Benni hefur lengi haft áhuga á flugi og hefur flogið mikið á einkavélinni TF-SPA.
Hann starfaði með Junior Chamber og Lions í tíu ár en bridds hefur spilað mjög stóran sess í lífi hans alveg frá því hann var unglingur og hann spilar enn.
Hann byrjaði að spila með Mosfellingum í Hlégarði en síðan á hinum ýmsu stöðum eftir það. Hann fór í þrjár keppnisferðir erlendis og hefur unnið til margra verðlauna.
Ég spyr Benna að lokum hvað sé skemmtilegast við að spila bridds? „Þetta reynir mikið á mann sem er gaman því þetta er hugaríþrótt og ekki skemmir svo félagsskapurinn fyrir,“ segir Benni er við kveðjumst.

Mosfellingurinn 4. júlí 2019
ruth@mosfellingur.is

Nú standa yfir endurbætur á húsnæði Varmárskóla og hafa þær gengið vel að sögn Hallgríms Skúla Hallgrímssonar hjá umhverfissviði Mosfellsbæjar sem annast verkefnisstjórn endurbótanna.
Endurbæturnar eru samstarfsverkefni margra aðila en leiddar af umhverfissviði Mosfellsbæjar með ráðgjöf frá verkfræðistofunni EFLU.
Endurbæturnar byggjast annars vegar á úttekt verkfræðistofunnar Verksýnar og hins vegar ábendingum sem komu fram í heildarúttekt verkfræðistofunnar EFLU á húsnæði Varmárskóla. Þeir verktakar sem vinna á svæðum þar sem greinst hefur örveruvöxtur hafa allir umtalsverða reynslu af sambærilegum verkefnum.

Staða endurbóta í yngri deild
Í yngri deild eru fjórir verktakar að störfum og er vinna hafin í suðvesturálmunni auk kennaraálmu og bókasafninu.
Ás-Smíði hefur hafist handa við að þvo málninguna af kennaraálmunni og miðar því verki vel áfram. Það verður svo í þeirra verkahring að klára að múra þá álmu að nýju og endurnýja þökin á kennaraálmunni og suðvesturálmu að utan.
Fyrirtækið Pétur & Hákon verktakar eru langt komnir með að fjarlægja alla loftaklæðningu úr stofum á efstu hæð suðvestur­álmu auk þess að vera búnir með rúmlega helminginn af ganginum. Næstu skref eru að fá EFLU til að merkja hvaða fjalir í þakklæðningu skuli fjarlægja og verður það gert um leið og þakjárnið verður fjarlægt, þ.e.a.s. utanfrá. EFLA hefur veitt ráðgjöf varðandi uppbyggingu á þakinu sem verður sett upp í stofunum, leiðbeint um frágang á rakavarnarlagi og hvernig best verði staðið að því að tryggja góða loftun.
Þá eru Kappar verktakar byrjaðir að vinna á þeim svæðum sem EFLA merkti til sérstakrar skoðunar í kjallara yngri deildar. Fyrsti staður var bókageymslan í kjallaranum en Kappar munu vinna sig skipulega í gegnum þá staði sem EFLA merkti til frekari skoðunar og viðgerða.

Staða endurbóta í eldri deild
Ístak hefur hafist handa við endurbætur í eldri deild. Tækjakostur í mötuneyti hefur verið aftengdur og næstu skref eru að fjarlægja innréttingar, gólfefni og eftir atvikum veggi á grunni leiðbeininga frá EFLU.
Umhverfissvið Mosfellsbæjar leggur áherslu á að fylgja út í hörgul öllum leiðbeiningum EFLU og hefur samstarfið við verkfræðistofuna gengið mjög vel að mati beggja aðila.
„Framkvæmdir við Varmárskóla eru á fullum skriði og það er ánægjulegt að okkur hafi í samstilltu átaki fjölda aðila tekist að setja af stað endurbætur á Varmárskóla sem rúmast innan þess þrönga stakks sem sumarið er sem framkvæmdatími í skólabyggingu.
EFLA er nú sem fyrr okkur öflugur bakhjarl við að skipuleggja og útfæra endurbæturnar og hefur auk þess tekið að sér að vakta framgang og gæði vinnunnar miðað við þeirra gagnreyndu viðmið. Við skólasetningu í lok sumars verður öllum helstu framkvæmdum lokið, þar með talið allt rask tengt vinnu við þök.
Við útilokum ekki að minniháttar frágangur innanhúss gæti þurft að eiga sér stað á fyrstu dögum skólans en sjáum ekki fyrir okkur að það verði til að trufla skólahald og treystum á góða samvinnu við skólasamfélagið um þau úrlausnarefni sem slík staða gæti kallað á,“ segir Haraldur Sverrisson bæjarstjóri Mosfellsbæjar.

Róbert Orri Þorkelsson hefur skrifað undir nýjan samning við Aftureldingu sem gildir út tímabilið 2020. Hinn 17 ára gamli Róbert Orri hefur alist upp allan sinn fótboltaferil hjá Aftureldingu og verið fastamaður á miðjunni hjá meistaraflokki undanfarin tvö keppnistímabil. Í fyrra hjálpaði hann Aftureldingu að vinna 2. deildina og í ár hefur hann leikið vel með liðinu í Inkasso-deildinni.
Róbert er úr öflugum 2002 árgangi hjá Aftureldingu sem varð Íslandsmeistari í 3. flokki í fyrra en hann átti að auki fast sæti í byrjunarliði U17 ára landsliðs Íslands sem fór í lokakeppni EM í vor.

Félög í Pepsi Max-deildinni hafa sýnt Róberti áhuga en hann ákvað að skrifa undir framlengingu á samningi sínum við Aftureldingu.
„Það er gríðarlegt fagnaðarefni að Róbert hafi framlengt samning sinn við Aftureldingu. Það er gleðiefni að ungir heimamenn hafi trú á uppbyggingunni sem er í gangi í Mosfellsbæ og vilji taka þátt í henni með okkur. Róbert er efnilegur leikmaður sem hefur verið gaman að fylgjast með í meistaraflokki undanfarin tvö ár og vonandi heldur hann áfram að bæta sig sem leikmaður hér í Mosfellsbæ,” sagði Geir Rúnar Birgisson, formaður meistaraflokksráðs.

Bæjarblaðið Mosfellingur hefur verið gefið út frá árinu 2002. Nú eru öll tölublöð frá upphafi aðgengileg á timarit.is en það er Landsbókasafn Íslands – Háskólabókasafn sem rekur vefinn.
Mosfellingur gerði samning við Landsbókasafnið í vetur um varðveislu alls efnis á timarit.is og hefur sú vinna staðið yfir ásamt skönnun á elstu tölublöðunum.
Nú eru hátt í 300 blöð Mosfellings aðgengileg á stafrænu formi á vefnum.

Öflug leitarvél á vefnum
„Við erum að skrifa hina nýju sögu Mosfellsbæjar,“ segir Hilmar Gunnarsson ritstjóri Mosfellings. „Það er ánægjulegt að blöðin séu komin í trausta varðveislu og aðgengileg öllum hvenær sem er. Þetta eru miklar og sögulegar heimildir bæði í texta og myndum síðastliðin 17 ár.“
Öflug leitarvél er á vefnum og hægt er að prenta út valdar síður. Notendur geta leitað í gagnagrunninum að efni sér til fróðleiks og skemmtunar.

Yfir 8.000 blaðsíður í stafrænu formi
„Blaðsíður Mosfellings á timarit.is telst okkur að séu komnar yfir 8.000 talsins þannig að það má alveg gleyma sér yfir þeim.
Auk frétta úr bæjarlífinu hverju sinni eru viðtöl Ruthar Örnólfsdóttur, Mosfellingurinn, nú orðin 200 og Heilsumolar Gaua, Guðjóns Svanssonar að verða 100 talsins. Þá eru gömlu myndirnar í umsjón Birgis D. Sveinsson orðnar óteljandi og allar myndirnar hans Ragga Óla ómetanlegar, svo eitthvað sé nefnt,“ segir Hilmar.
Framvegis verða blöðin uppfærð á nokkurra mánaða fresti eftir því sem tækifæri gefst til. Einnig má minna á heimasíðu blaðsins www.mosfellingur.is þar sem finna má vefútgáfu af nýjasta tölublaði Mosfellings auk þess sem birtar eru helstu fréttir úr blaðinu á vefsíðunni.

—-

Tímarit.is er stafrænt safn sem veitir aðgang að milljónum myndaðra blaðsíðna á stafrænu formi af þeim prentaða menningararfi sem varðveittur er í blöðum og tímaritum. Aðgangur er öllum opinn og stuðst er við nýjustu tækni í geymslu og miðlun upplýsinga.

Heilsudagurinn í Mosfellsbæ var haldinn 27. maí. Dagurinn hófst með morgungöngu og endaði með málþingi í Listasalnum.
Sölvi Tryggvason fjölmiðlamaður hélt fyrirlestur og Gulrótin var afhent.
Gulrótin er lýðheilsuviðurkenning sem ætlað er að hampa einstaklingi, hópi, fyrirtæki eða stofnun fyrir brautryðjendastarf í þágu heilsueflingar og bættrar lýðheilsu íbúa Mosfellsbæjar.
Það eru Heilsuvin og Mosfellsbær sem standa að baki viðurkenningunni sem felur í sér þakklæti fyrir frumkvæði og störf í anda lýðheilsu og á jafnframt að vera hvatning til allra á þessum vettvangi í bæjarfélaginu.

Leikur að læra og Morgunfuglar
Þetta er í þriðja sinn sem viðurkenningin er veitt en hana hafa hlotið Svava Ýr Baldvinsdóttir íþróttakennari sem hefur m.a. séð um Íþróttaskóla barnanna hjá Aftureldingu í fjöldamörg ár og hjónin Guðjón Svansson og Vala Mörk hjá Kettlebells Iceland.
Í ár það Kristín Einarsdóttir, íþróttakennari, sem hlýtur viðurkenninguna fyrir óendanlegan drifkraft og frumkvæði að aukinni hreyfingu barna og fullorðinna í gegnum kennsluaðferðina „Leikur að læra“ og skokkhópinn Morgunfuglana.
Í rökstuðningi með tilnefningunni segir að hún hafi unnið ötullega að því að innleiða kennsluaðferðina Leikur að læra í leik- og grunnskóla á Íslandi. Aðferðin nýtir hreyfingu og leik markvisst í námi barnanna og miðar að því að efla líkamlega, andlega og félagslega vellíðan þeirra. Hún hefur síðustu ár haldið úti námskeiðum í aðferðinni fyrir kennara á Spáni og eru þeir ófáir kennarnir sem hafa nýtt sé þau.
Ekki nóg með það heldur hefur hún einnig haldið úti hlaupahópnum Morgunfuglunum hér í Mosfellsbæ.

Verkfræðistofan EFLA hefur lokið vinnu við heildarúttekt á öllu húsnæði Varmárskóla en verkfræðistofan hefur á síðustu tveimur árum unnið þrjár úttektir fyrir Mosfellsbæ á rakaskemmdum.
Niðurstöður sýnatöku EFLU gefa til kynna að almennt sé ástand húsnæðis Varmárskóla gott og jafnvel betra en sambærilegur húsakostur af sama aldri. Ekki er þörf á bráðaaðgerðum né lokun skólans en úrbóta er þörf og að hluta til umfram það sem þegar hefur verið ákveðið. Þetta kemur fram í tilkynningu frá Mosfellsbæ.
Lagt er til að unnið verði að því að fjarlægja á nokkrum afmörkuðum stöðum rakaskemmd byggingarefni innandyra samhliða endurbótum á ytra byrði yngri deildar sem boðnar voru út í vor. Framkvæmdir eru við það að hefjast.

Endurnýjun á elstu húshlutum
Áður en EFLA lauk við heildarúttektina lágu fyrir áform um endurbætur á elstu húshlutum Varmárskóla og hófust þær framkvæmdir við skólaslit Varmarskóla.
Endurnýja á hluta þakefna og glugga auk múrviðgerða og málunar. Innandyra þarf að fara í úrbætur sem Efla leggur til þar sem rakaskemmd byggingarefni verða fjarlægð, steinslípað, hreinsað og málað.
Miðað er við að verktakar með sértæka þekkingu á vinnubrögðum við viðgerðir á rakaskemmdu húsnæði verði fengnir í verkefnið. Stærri aðgerðum á veðurkápu húsanna hefur verið áfangaskipt og forgangsraðað til næstu þriggja ára í samræmi við niðurstöður fyrirliggjandi úttekta.
Við þessa vinnu er mikilvægt að horfa til framtíðar varðandi endingu hins endurnýjaða húshluta og mæta kröfum byggingarreglugerðar í dag.

Ástand húsnæðis Varmárskóla sambærilegt eða betra en búast mátti við
Í heildarúttekt EFLU kemur fram að það er helst eldri hluti skólans sem þarfnast endurbóta. Ráðgjafar EFLU taka fram í niðurstöðum sínum að alltaf megi búast við að finna svæði með rakaskemmdum í eldra húsnæði en nú sé hins vegar þekking til staðar til að greina slík svæði og því hægara um vik að bregðast við áður en í óefni er komið.
Að mati EFLU hafa þær aðgerðir og endurbætur sem farið hafa fram síðustu tvö ár skilað Varmárskóla betri húsakosti. Enn eru þó nokkur viðfangsefni til staðar og heildarúttektin er góð leiðsögn um æskileg næstu skref.
Niðurstöður EFLU má bæði nýta til forgangsröðunar aðgerða og til leiðbeiningar um verklag við endurbæturnar. Lagt er til að forgangur verði settur í að bæta innivist og aðstöðu nemenda og starfsfólks.

Kynning heildarúttektarinnar
Samkvæmt upplýsingum frá Mosfellsbæ voru helstu niðurstöður heildarúttektar EFLU kynntar fyrir skólastjórum Varmárskóla, starfsmönnum skólans og stjórnendum Mosfellsbæjar sl. föstudag.
Skýrsla EFLU verður kynnt í bæjarráði þann 13. júní og skólasamfélaginu í heild þann 19. júní kl. 18.00 á opnum fundi í Varmárskóla sem jafnframt verður streymt á YouTube rás Mosfellsbæjar.
„Mosfellsbær fagnar því að heildarúttekt EFLU staðfesti að ástand húsnæðis Varmárskóla er almennt gott og jafnvel betra en við mátti búast. Við sinnum okkar húsnæði af kostgæfni og fylgjum góðum ráðum EFLU um æskileg næstu skref.
EFLA hefur nú veitt okkur leiðbeiningar um áherslur næstu mánaða og Mosfellsbær mun bregðast við þessum niðurstöðum af festu og einurð og hér eftir sem hingað til tryggja nemendum og starfsmönnum heilsusamlegt starfsumhverfi,“ segir Haraldur Sverrisson bæjarstjóri Mosfellsbæjar.

Niðurstaðan skýr
„Við starfsmenn Varmárskóla fengum kynningu á niðurstöðum heildarúttektar EFLU síðasta föstudag og hlökkum til að vinna með þeim og umhverfissviði Mosfellsbæjar að endurbótum á húsnæði skólans nú í sumar. Niðurstaðan er skýr um að hvorki reyndist þörf á bráðaaðgerðum né lokun skólans og okkar verkefni er að bæta við þeim úrbótaverkefnum sem ekki eru á áætlun sumarsins. Ég vona eindregið að allir aðilar geti sammælst um þau mikilvægu verkefni,“ segir Þórhildur Elfarsdóttir skólastjóri Varmárskóla.

Ærslabelgur mun rísa á Stekkjarflöt og búið verður til skíða- og brettaleiksvæði í Ævintýragarðinum í Ullarnesbrekkum í kjölfar íbúakosninga um verkefni í lýðræðisverkefninu Okkar Mosó. Íbúar kusu einnig meðal annars að fá flokkunarruslafötur, merkja toppa bæjarfella og fjalla og bætta lýsingu á göngustígum.
Metþátttaka var í kosningum sem stóðu frá 17. til 28. maí eða 19,1% sem er mesta þátttaka sem hefur verið í sambærilegum kosningum á Íslandi.
Alls hlutu 11 hugmyndir brautargengi en 35 milljónum verður varið í framkvæmd verkefnanna. Framkvæmd þeirra hefst í sumar en lýkur haustið 2020.

Kosningaþáttaka aukist töluvert
Tæplega 1.800 manns tóku þátt í kosningunni sem er 19,1% Mosfellinga 15 ára og eldri. Um 61% þátttakenda voru konur, tæplega 39% karlar. Þegar reiknað er út hlutfall þátttakenda innan hvers aldursbils sem kaus kemur í ljós að þátttakendur á aldrinum 31−40 ára voru fjölmennastir eða 32%.
Síðast þegar kosið var í Okkar Mosó árið 2017 tóku 14% íbúa 16 ára og eldri þátt í kosningunum. Síðan hefur bæði fjölgað talsvert í bæjarfélaginu en einnig voru fleiri á kjörskrá í ár vegna lækkaðs kosningaaldurs. Þátttaka hefur því aukist talsvert.

11 hugmyndir kosnar til framkvæmda
1 – Ærslabelgur settur upp á Stekkjarflöt.
2 – Skíða- og brettaleiksvæði í Ævintýragarðinum í Ullarnesbrekkum
3 – Flokkunarruslafötur settar upp á þremur stöðum við göngustíga
4 – Merkingar á toppum bæjarfella og fjalla
5 – Betri lýsing á göngustíg milli Hulduhlíðar 30−32
6 – Miðbæjartorgið gert skemmtilegt með leiktækjum
7 – Ungbarnarólur fyrir yngstu börnin í Hagaland og Leirvogstungu
8 – Hvíldarbekkir og lýsing meðfram göngustígum við Varmá
9 – Kósý Kjarni – notalegri aðstaða til samvista
10 – Lýsing sett upp á malarstíg frá Álafosskvos að brú við Ásgarð
11 – Fræðsluskilti með sögu Álafossverksmiðjunar sett upp í Kvosinni