Á næstu mánuðum verður ráðist í breytingar á útibúaneti Arion banka. Markmiðið er að aðlaga útibúanetið að nýrri nálgun í bankaþjónustu þar sem m.a. er lögð áhersla á aðgengi að stafrænum lausnum og einföldun þjónustu.
Liður í þessum breytingum er að útibúið í Mosfellsbæ sameinast Höfðaútibúi bankans á Bíldshöfða 20. Starfsfólkið hér í Mosfellsbæ mun því flytja sig um set, ýmist í Höfðaútibú eða í önnur störf hjá bankanum.

Sameiningin tekur gildi 10. maí
Höfðaútibúið er eitt af stærstu útibúum bankans, eða svokallaður þjónustukjarni, en þar er áhersla lögð á almenna bankaþjónustu og ráðgjöf sérfræðinga á öllum helstu sviðum fjármála einstaklinga og fyrir­tækja. Aðrir þjónustukjarnar Arion banka eru í Borgartúni, Smáranum í Kópavogi, í Borgarnesi, á Selfossi og Akureyri.
Sameiningin tekur gildi 10. maí en áfram verður alhliða hraðþjónustubanki í Mosfellsbæ þar sem m.a. er hægt að taka út og leggja inn seðla, greiða reikninga og millifæra. Fyrst um sinn verður hann áfram í Þverholti 1, þar sem útibúið hefur verið til húsa, en í framhaldinu fundin ný staðsetning í alfaraleið, nærri verslun og þjónustu.

Á reitunum á milli Framhaldsskóla Mosfellsbæjar og Krónunnar eru hafnar framkvæmdir við byggingu verslunar- og íbúðarhúsnæðis.
Markmið gildandi deiliskipulags er að þétta og efla miðbæ Mosfellsbæjar. Einnig að móta skjólsæla, þétta og sólríka íbúabyggð auk verslunar og þjónustu og styrkja þannig götumyndina. Svæðið er í hjarta bæjarins og því lögð rík áhersla á metnað og vandaða hönnun við gerð og frágang mannvirkja á svæðinu.

Allt að 105 íbúðir á milli FMOS og Krónunnar
Byggingarnar verða þriggja til fimm hæða háar og verslanir verða á fyrstu hæð á þeim reit sem er næstur Krónunni. Aðrar byggingar á svæðinu verða eingöngu íbúðarhúsnæði og er gert ráð fyrir að unnt verði að byggja allt að 105 íbúðir á þessum þremur reitum í Bjarkarholti.
Framkvæmdir munu standa yfir næstu tvö ár og stefnt verður að því að þeim verði að mestu lokið í árslok 2019.
Samgöngustígurinn meðfram Bjarkarholti mun á meðan framkvæmdir standa sem hæst verða nýttur fyrir bæði gangandi og hjólandi umferð en hann var áður sérgreindur eftir samgöngumáta.
Á næstunni er fyrirhuguð vinna við lagnir í götunni og má því gera ráð fyrir röskun á umferð á því tímabili.

Halldóra Björnsdóttir íþróttafræðingur telur að hreyfing, hugleiðsla og góð næring sé lykillinn að heilbrigði og hamingju

Í byrjun árs var Halldóra sæmd riddarakrossi við hátíðlega athöfn á Bessastöðum fyrir framlag sitt til heilsuverndar og lýðheilsu. Hún hefur sinnt margvíslegu fræðslustarfi í gegnum tíðina, flutt erindi víða og talað máli beinverndar í fjölmiðlum.
Áhugamál hennar tengjast íþróttum og heilsu í víðasta skilningi. Hún æfði júdó og fimleika þar til skíðabakterían greip hana heljartökum en hún hefur kennt á skíði bæði hér heima og erlendis. Hjólreiðar eru nýjasta áhugamál Halldóru en hún hjólar til og frá vinnu eins oft og veður leyfir.

Halldóra er fædd í Reykjavík 12. apríl 1961. Foreldrar hennar eru þau Sigríður Jóna Kjartansdóttir fv. skrifstofustjóri og Björn Blöndal Kristmundsson fv. verslunarmaður. Halldóra á tvö systkini, Kjartan Halldór og Kristínu, en Kjartan lést árið 1974.

Fékk að leika sér í áhaldageymslunni
„Ég er alin upp í Sæviðarsundinu og á góðar minningar þaðan. Mamma æfði handbolta þangað til ég varð 8 ára og ég fór oft með henni á æfingar. Ég fékk að leika mér í áhaldageymslunni innan um bogahesta, kistur og alls kyns leikfimisdót. Ég held að grunnurinn að íþróttafræðunum sem ég lærði síðar og varð minn starfsvettvangur hafi orðið til þarna.
Ég sótti í að vera mest á hreyfingu á æskuárunum og hef verið fremur hreyfanleg síðan,“ segir Halldóra og brosir.

Skíðabakterían greip mig heljartökum
Halldóra æfði júdó frá 6-9 ára aldurs og var á þeim tíma sú yngsta sem tekið hafði beltapróf. „Þegar ég var farin að hafa meiri áhuga á að sníkja mér lakkrís í lakkrísgerðinni sem var í sama húsi og júdóæfingarnar þá létu foreldrar mínir mig hætta og ég skipti yfir í fimleika. Fimleikana stundaði ég af miklum áhuga í tvö ár eða þar til skíðabakterían greip mig heljartökum og ég æfði og keppti á skíðum í rúman áratug.“

Kvennaskólaárin voru dásamleg
Ég hóf skólagönguna í Ísaksskóla og þaðan lá leiðin í Langholtsskóla. Ég átti gott með að læra og var bara ánægð með alla kennarana mína. Að loknu barnaskólaprófi fór ég 13 ára gömul í Kvennaskólann í Reykjavík og lauk þaðan gagnfræðaskólanámi. Kvennaskólaárin voru dásamleg, en í skólanum kynntist ég skemmtilegum stelpum og ein þeirra er ein af mínum bestu vinkonum í dag.“

Ógleymanlegt í Kerlingarfjöllum
„Eftir útskrift úr gagnfræðaskóla fór ég í Verzlunarskólann og útskrifaðist þaðan 1981. Ég æfði á skíðum öll skólaárin sem náði þó ekki að svala minni skíðafíkn því ég hélt áfram á sumrin og vann þá sem skíðakennari í Kerlingarfjöllum. Þar átti ég ógleymanlegar stundir með yndislegu og skemmtilegu samstarfsfólki.
Ég ákvað að fara til Austurríkis, læra þýsku og taka skíðakennarapróf. Ég kenndi á skíði heilan vetur í austurrísku Ölpunum og hafði sett stefnuna á nám við Íþróttaháskólann í Köln. Áform mín breyttust og fyrr en varði var ég komin hinum megin við Atlantshafið, langleiðina að Kyrrahafinu.“

Í stórbrotnu landslagi Klettafjallana
„Vinkona mín úr Verzló hvatti mig til þess að fylgja sér eftir til Edmonton í Albertafylki í Kanada og þangað fór ég haustið 1982 til þess að læra íþróttafræði. Námsárin urðu fjögur en ég útskrifaðist þaðan sem íþróttafræðingur með áherslu á íþróttir fatlaðra og líkamsþjálfun.
Ég æfði og keppti með skíðaliði skólans og fékk tækifæri til þess að skíða í stórbrotnu landslagi Klettafjallanna.“
Í Edmonton kynntist Halldóra samlanda sínum, Birgi Þór Baldvinssyni, sem sótt hafði þangað í framhaldsnám. Hann varð síðar eiginmaður hennar en hann starfar sem kennari við Klettaskóla. Þau eiga fjögur börn, Kjartan Þór fæddan 1987, Sigríði Þóru fædda 1991, Halldóru Þóru fædda 1993 og Kristínu Þóru fædda 1998. Barnabörnin eru þrjú, Áslaug Ýr, Elías Kári og Una Rán.

Frábær tími á Reykjalundi
„Á háskólaárunum vann ég á sumrin í heilsusporti á Reykjalundi sem var frábær tími. Það var ekki slæmt að fara á hestbak, sigla á Hafravatni, fara í sund og skemmta sér allan daginn.
Eftir að ég kom heim frá Kanada þá fór ég í Háskólann til að ná mér í kennsluréttindi til að geta kennt í grunn- og framhaldsskóla. Ég kenndi leikfimi í Stúdíói Jónínu og Ágústu í nokkur ár og einnig í Heilsurækt Seltjarnarness. Eins kenndi ég á mínu sérsviði íþróttir fatlaðra í Öskjuhlíðarskóla.”

Hjá Ríkisútvarpinu í 30 ár
Árið 1987 tók Halldóra við morgunleikfiminni hjá Ríkisútvarpinu og hefur haft umsjón með henni síðan eða í rúm 30 ár. Morgunleikfimin hefur nú verið á dagsskrá Ríkisútvarpsins í 61 ár en það var Valdimar Örnólfsson sem byrjaði með hana.
„Mér þykir afar vænt um morgunleikfimina og gleðst alltaf innilega þegar fólk hefur samband við mig og segist hafa verið samferða mér á þeim vettvangi.“

Fræðslustarf hjá Beinvernd
„Árið 2000 tók ég að mér framkvæmdastjórn hjá Beinvernd sem er félag áhugafólks um beinþynningu og afleiðingar hennar en þar starfa ég í hálfu starfi. Hjá félaginu hef ég sinnt margvíslegu fræðslustarfi, flutt erindi víða í félögum og stofnunum og talað máli beinverndar.
Ég tel mig hafa verið óþreytandi í því að upplýsa fólk um mikilvægi þess að hreyfa sig fyrir beinin og gæta þess að fá nóg af kalki og D-vítamíni.“

Tók virkan þátt í starfi Aftureldingar
Halldóra fór í jógakennaranám og kenndi m.a. eldri borgurum jóga á Hlaðhömrum í nokkur ár. Enn leitaði hún sér aukinnar menntunar við Háskóla Íslands, þaðan sem hún útskrifaðist með MA gráðu í menntunarfræðum árið 2005. Þaðan lá leið hennar á Rannsóknarstofu í öldrunarfræðum þar sem hún starfaði á árunum 2005-2008 samhliða starfi sínu hjá Beinvernd. Frá árinu 2008 hefur hún kennt íþróttir við Fjölbrautarskólann í Breiðholti.
„Áhugamál mín tengjast íþróttum og heilsu í víðasta skilningi. Ég tel að hreyfing, hugleiðsla og góð næring sé lykillinn að heilbrigði og hamingju. Ég hef tekið virkan þátt í starfi Aftureldingar, var m.a. í stjórn barna- og unglingaráðs knattspyrnudeildarinnar til margra ára og starfaði mikið með meistaraflokki kvenna.“

Heilsan það dýrmætasta sem við eigum
Í byrjun árs var Halldóra sæmd riddarakrossi við hátíðlega athöfn á Bessastöðum. „Fálkaorðan kom mér verulega á óvart en gladdi mig vissulega. Hún var veitt fyrir störf í þágu heilsuverndar og lýðheilsu og finnst mér afar ánægjulegt að þau málefni skulu vekja slíka athygli enda er heilsan það dýrmætasta sem við eigum.”

Mosfellingurinn 22. febrúar 2018
Myndir og texti: Ruth Örnólfs

Fimmtudaginn 15. febrúar var haldinn formlegur stofnfundur Miðflokksins í Mosfellsbæ. Fundurinn var haldinn á Hótel Laxnesi.
Fjöldi manns sótti fundinn og var fimm manna stjórn kosin og þrír varamenn. Formaður stjórnar er Friðrik Ólafsson verkfræðingur. Stjórnin er kosin til bráðbirgða eða fram að fyrsta formlega aðalfundi.
Fundurinn ákvað að stefnt skuli að því að bjóða fram til bæjarstjórnar í Mosfellsbæ og við val á lista verði uppstilling notuð. Auglýst verður eftir áhugasömum aðilum (sjá auglýsingu í Mosfellingi). Áhugasamir aðilar geta einnig haft samband við formann félagins fridrik@meter.is fyrir 26. febrúar.
Í tilkynningu frá flokknum segir að Miðflokkurinn vilji virkja rödd fólks í Suðvesturkjördæmi og býður því fram til sveitarstjórnarkosninga sem fram fara laugardaginn 26. maí. Stefnt er að því að bjóða fram í Mosfellsbæ, Kópavogi, Garðabæ, Hafnarfirði og Seltjarnarnesi.

Stofnaður hefur verið Samfélagssjóður Kaupfélags Kjalarnesþings. Sjóðnum er ætlað að úthluta fjármunum til almenningsheilla á fyrrum félagssvæði Kaupfélagsins og er stofnfé sjóðsins 50 milljónir.
Kaupfélag Kjalarnesþings var stofnað um miðja síðustu öld og starfaði fyrstu árin að Fitjakoti á Kjalarnesi en lengst af eða frá 1956 í Mosfellssveit.
Kaupfélagið sjálft hætti verslunarrekstri um 1997 og leigði verslunarhúsnæði sitt út eftir það m.a. til Krónunnar og fleiri aðila.

50 milljónir í stofnfé sjóðsins
Á aðalfundi Kaupfélagsins í júlí 2016 var tekin ákvörðun um að leggja félagið niður og var sú ákvörðun staðfest á félagsfundi í ágúst 2016. Kjörin var slitastjórn sem fékk það verkefni að annast um slit félagsins, sölu eigna þess og uppgjör við lánadrottna og skyldi það fé sem afgangs yrði lagt í sjóð og fénu ráðstafað til almenningsheilla á fyrrum félagssvæði kaupfélagsins. Þetta kemur fram í tilkynningu frá Samfélagssjóði KKÞ.
Skilanefnd KKÞ boðaði síðan til félagsfundar 27. desember 2017. Á fundinum var m.a. samþykkt stofnun sjálfseignarstofnunar sem ber heitið Samfélagssjóður KKÞ og var stofnfé sjóðsins ákveðið kr. 50 milljónir. Vonir standa til að þegar skilanefnd hefur lokið störfum muni koma viðbótarstofnfé til sjóðsins.

Fimm manna stjórn skipuð um sjóðinn
Félagsfundur kaus eftirtalda sem aðal- og varamenn í stjórn sjóðsins: Birgi D. Sveinsson, Stefán Ómar Jónsson og Steindór Hálfdánarson sem aðalmenn og Sigríði Halldórsdóttur og Svanlaugu Aðalsteinsdóttur sem varamenn.
Nýkjörin stjórn Samfélagssjóðs KKÞ hefur haldið sinn fyrsta fund þar sem hún m.a. skipti með sér verkum þannig að formaður er Stefán Ómar, ritari er Birgir og meðstjórnandi er Steindór. Stjórnin samþykkt á þessum fyrsta fundi sínum að ávallt skyldi boða bæði aðal- og varamenn á stórnarfundi.

Úthlutanir fari fram næstu 2-3 ár
Verkefni stjórnar er að úthluta fjármunum samfélagssjóðsins til æskulýðs- og menningarmála, góðgerðar- og líknarmála og annarrar starfsemi til almenningsheilla á fyrrum félagssvæði Kaupfélags Kjalarnesþings sem nær yfir Mosfellsbæ, Kjalarnes og Kjósarhrepp.
Gert er ráð fyrir að verkefnið taki eftir atvikum 2-3 ár. Þegar úthlutun úr Samfélagssjóði KKÞ verður lokið verður sjálfseignarstofnunin lögð niður í samræmi við lög nr. 19/1988 um sjóði sem starfa samkvæmt staðfestri skipulagsskrá. Á næstu misserum verður auglýst um fyrstu úthlutun og þá kynnt nánar um fyrirkomulag umsókna.

Nánari upplýsingar er hægt að finna á heimsíðu sjóðsins www.kaupo.is

Ég týndi skrefamælinum mínum í Flatey fyrir einu og hálfu ári. Síðan þá hef ég ekki mælt hvað ég er að hreyfa mig mikið dags daglega. Ekki fyrr en núna í febrúar. Þá ákvað ég að setja mér það markmið að ganga allavega 10.000 skref á dag í 50 daga. Af hverju? Í fyrsta lagi vegna þess að ég var farinn að hafa á tilfinningunni að ég hreyfði mig ekki nóg dags daglega.

Í öðru lagi vegna þess að ég hef bæði gaman og gott af því að fara í gegnum áskoranir sem krefjast aga og viljastyrks. Ég bauð fleirum að taka áskoruninni með mér. 50 daga áskorunin inniheldur fleiri þætti svo sem ákveðið mataræði og æfingar og við sem tökum þátt veitum hvert öðru aðhald og stuðning. Ég nota símann núna til að mæla skrefin en langar aftur í einfaldan skrefamæli. Það er ljóst að ég hef ekki verið að hreyfa mig nóg síðan ég var í Flatey. Ég æfi reglulega styrk og liðleika og hef gert lengi, en yfir daginn hef ég greinilega setið of mikið við tölvuna. Reglulegar æfingar einar sér eru ekki nóg fyrir okkur. Ég þarf að hafa fyrir skrefunum á þann hátt að ég þarf að fara í 2-3 göngutúra yfir daginn. Annars næ ég þeim ekki. Ég byrja á morgungöngum, frábær byrjun á degi. Við erum í viku 2 í 50 daga áskoruninni og göngutúrarnir eru að gefa mér mikið. Bæði líkamlega og andlega.

Við erum gerð til þess að ganga, mannfólkið, og ef við sinnum því ekki erum við að vanrækja eigin líkama og hug. Veður skiptir engu máli. Góðir skór og útivistarföt eru svarið við þeirri afsökun. Ég er kominn á þá skoðun að ganga sé grunnurinn að góðri heilsu. Ef við vanrækjum hana verðum við að vesalingum. Einfaldlega.

Heilsumolar Gaua
Mosfellingur 22. febrúar 2018

Kærleiksvikan í Mosfellsbæ verður haldin 12.-18. febrúar.
Skipuleggjendur eru þær Vigdís Steinþórsdóttir, Oddný Magnúsdóttir og Jóhanna B. Magnúsdóttir og vilja þær nota Kærleiksvikuna til að auðga samskipti fólks á milli með falleg hætti.
„Verum örlát á hrós og falleg skilaboð. Það er ekki væmni heldur styrkur að geta tjáð sig um hæfileika annarra. Tökum höndum saman svo allir bæjarbúar muni finna að það ríkir náungakærleikur hér,“ segir Vigdís Steinþórsdóttir.
Að þessu sinni fer heiðursgjöfin til fræðslunefndar fatlaðra í hestamannafélaginu Herði. Nefndin hefur unnið gríðalega gott starf og er brautryðjandi í því að hjálpa fötluðum börnum að komast á hestbak og þar með út í náttúruna. Þar hefur einnig verið unnin mikil og falleg sjálfboðavinna, einstaklingar hafa tekið strætó alla leið frá Akranesi og Reykjavík til að gefa vinnu sína hér.
Fjöldi viðburða í boði
Þær stöllur benda einnig Mosfellingum á að gefa sér tíma til að njóta skilaboðanna frá nemendum Lágafells- og Varmárskóla í innkaupakerrunum í Bónus og Krónunni.
„Verið velkomin á alla þá viðburði sem við höfum skipulagt og búið til ykkar eigin viðburði á heimilum og vinnustöðum,“ segir Vigdís en dagskráin er auglýst hér á hinni síðunni og á Facebook undir „Kærleiksvika í Mosfellsbæ.“

——

D A G S K R Á 

Mánudagur 12. febrúar
Bónus og Krónan. Nemendur úr Lágafells- og Varmárskóla setja kærleiksrík skilaboð á innkaupakerrurnar.

Miðvikudagur 14. febrúar
Hátíðarstund í anddyri FMOS kl. 16.30
Fræðslunefnd fatlaðra í hestamannafélaginu Herði heiðruð fyrir frábært starf.
Vanda Sigurgeirsdóttir lektor við HÍ fjallar í stuttu máli um mikilvægi vináttu.
Nemendur Listaskóli Mosfellsbæjar syngja nokkur lög.
Vinnustofa Skálatúns verður með kærleiksgjafir til sölu.

Fimmtudagur 15. febrúar
Heilunarguðþjónusta í Lágafellskirkju kl. 20. Söngur, bæn, handayfirlagning og smurning.
Sr. Arndís Bernhardsdóttir og græðarar.

Laugardagur 17. febrúar
Félagsvist á torginu í Kjarna á vegum öldungaráðs og ungmennaráðs.
Kaffiveitingar í boði Mosfellsbæjar. Allir velkomnir ungir sem aldnir, ókeypis aðgangur.

Sunnudagur 18. febrúar
Spákaffi í Mosfellsbakaríi kl. 13–16
(15 mín. spá á vægu verði)

Friðarganga
Kl. 16:30, gengið verður frá torginu gegnt Kjarna og niður að tjörninni í Kvosinni og þar verður friðarkertum raðað.
Hver kemur með sitt kerti.

Kærleikssetrið:
Dagskrá alla vikuna sjá kaerleikssetrid.is

Sjá nánari dagskrána á vef Mosfellsbæjar www.mos.is og Kærleikssetursins
www.kaerleikssetrid.is og á facebook „Kærleiks­vika í Mosfellsbæ“