Miðflokkurinn í Mosfellsbæ býður fram í fyrsta skipti í sveitarstjórnarkosningum 26. maí.
Með þessu framboði er markmiðið að ná fram hagræðingu í rekstri sveitarfélagsins til að bæta kjör bæjarbúa, lækka álögur og efla þjónustu í Mosfellsbæ.

Alvarlegt pólitískt straumrof
„Núverandi meirihluti er kominn í öngstræti með fjármál bæjarins,“ segir Sveinn Óskar Sigurðsson sem leiðir framboðið. „Þar er af mörgu að taka sem og í skipulagsmálum þar sem dómsmál virðast nú varða leiðina í átt að ófremdarástandi.
Leikvöllur á miðju hringtorgi í Krikahverfi ásamt hóteli þar ofan í áður ágætt skipulagsfyrirkomulag lýsir vel því alvarlega pólitíska straumrofi sem meirihlutinn í Mosfellsbæ hefur orðið fyrir.“

Fjármálaóreiða bitnar á allri þjónustu
„Fjármálaóreiða meirihlutans bitnar einnig heiftarlega á allri þjónustu eins og við barnafólk, svo einhver dæmi séu nefnd. Mikilvægt er að hugað verði að málefnum eldri borgara í bænum, m.a. í ljósi þess að lokað hefur verið á alla læknisþjónustu í bæjarfélaginu um kvöld, nætur og helgar.
Bankastofnanir eru nú engar að verða í Mosfellsbæ þegar Arion banki lokar.“

Framboðslisti Miðflokksins
1. Sveinn Óskar Sigurðsson
2. Herdís Kristín Sigurðardóttir
3. Örlygur Þór Helgasson
4. Þórunn Magnea Jónsdóttir
5. Kolbeinn Helgi Kristjánsson
6. Margrét Ólafsdóttir
7. Ásta B. O. Björnsdóttir
8. Valborg Anna Ólafsdóttir
9. Friðbert Bragason
10. Ólöf Högnadóttir
11. Linda Björk Stefánsdóttir
12. Friðrik Ólafsson
13. Hlynur Hilmarsson
14. Jakob Máni Sveinbergsson

15. Ólafur Davíð Friðriksson
16. Jón Pétursson
17. Sigurrós K. Indriðadóttir
18. Magnús Jósepsson

Úrræði fyrir barnafólk
Herdís Kristín Sigurðardóttir, sem skipar 2. sæti lista Miðflokksins í Mosfellsbæ, leggur ríka áherslu á að úrræði fyrir barnafólk í bænum verði til staðar. Meirihlutinn hefur látið undir höfuð leggjast að tryggja barnafólki næg dagvistunarúrræði fyrir börn um árabil.

Auka þarf forvarna­starf í Mosfellsbæ
Örlygur Þór Helgason skipar 3. sæti listans. Hann er kennari og þjálfari. Örlygur telur að auka þurfi forvarnarstarf í Mosfellsbæ.

Leita þarf skilvirkra lausna þegar kemur að því að mynda t.a.m. stoðnet við allt skólakerfið og dagmæður í Mosfellsbæ. Þetta verði að vera úrræði sem mögulegt er að grípa strax til svo hægt sé að aðstoða einstaklinginn, barnið, sem bráðnauðsyn er að vernda og hlúa að þegar mest á reynir.
Örlygur, sem er kennari og þjálfari, vill tryggja að í bæjarfélaginu sé starfandi fólk með þekkingu og reynslu af því að bregðast skjótt við þegar erfiðleikar steðja bæði að börnum í skólum bæjarins, starfsfólki og íbúum Mosfellsbæjar.

Mosfellingurinn Hjördís Nína Egilsdóttir setti upp sitt fyrsta verk í leikhúsinu The Old Red LionTheatre í London í mars. Hjördís Nína flutti til Englands eftir útskrift úr menntaskóla, haustið 2014.
Hún hóf nám í Arts University Bournemouth-háskólanum, tók upp nafnið Dísa Andersen og útskrifaðist þaðan vorið 2017 sem Theatre maker. Dísa steig sín fyrstu skref hjá Bæjarleikhúsinu í Mosfellsbæ. „Ég byrjaði á leiklistarnámskeiðum og fann mig algjörlega þar. Fólkið í leikfélaginu hefur alltaf sýnt mér mikinn stuðning og þá ber helst að nefna Agnesi Wild og Gunnhildi,“ segir Dísa.
Dísu og samstarfkonu hennar Julie bauðst að setja upp verkið Is This Thing On? í leikhúsinu The Old Red Lion Theatre, en þær reka saman leikfélagið Frigg Theatre. „Það er afskaplega spennandi tækifæri að fá að setja upp verk í svona flottu leikhúsi. Þetta er mjög kostnaðarsamt, en fólki gafst kostur á að styrkja okkur í gegnum hópfjármögnunarsíðu.“

Gengið með verkið í maganum í tvö ár
„Verkið fjallar um heimilisofbeldi og áhrif þess á unga konu sem er að vaxa úr grasi. Hvernig þekkja má ofbeldi í samböndum, vináttu og svik. Við notuðumst mikið við ljóðlist og dans við sköpun verksins svo úr varð eins konar ljóðrænn hugarheimur fórnarlambs ofbeldis. Ég er búin að vera að vinna að þessu verki síðastliðin tvö ár.“
„Ég bæði skrifaði verkið, lék í sýningunni og sá um hljóðhönnun. Sýningarnar gengu mjög vel og við erum í samræðum um að sýna verkið á nokkum leiklistarhátíðum. Við Julie erum jákvæðar á framtíð Friggjar Theatre enda búnar að skapa okkur gott orðspor hérna í London.
Við ætlum að halda áfram að búa til okkar eigin verk með fókus á sögur kvenna. Julie er frá Noregi og er það okkar draumur að fara með verkin bæði til Íslands og Noregs.“

Þorsteinn, eða Steini mæló eins og hann er ávallt kallaður, byrjaði sem sumarstarfsmaður hjá Mosfellshreppi árið 1986, þá á síðasta ári í byggingatæknifræði. Það sumar starfaði hann við ýmis konar mælingar og eftirlit og hafði umsjón með ýmsum framkvæmdum. Hálfu ári síðar var hann fastráðinn og hefur starfað á umhverfissviði bæjarins síðan eða í 31 ár.
Í fyrra tók Steini við nýrri stöðu sem deildarstjóri eigna og veitna og hefur þar með umsjón með eignum bæjarins, þ.e.a.s. skólum og leikskólum, og sér um viðhaldsmál gatna og lagna.

Þorsteinn Sigvaldason er fæddur í Reykjavík 9. júní 1960. Foreldrar hans eru Ingibjörg Halldórsdóttir fyrrverandi dagmóðir og Sigvaldi Þorsteinsson lögfræðingur en hann lést árið 1998. Þorsteinn á fimm systkini, Elísabetu fædda 1948, Erlu fædda 1950, Sigrúnu fædda 1958, Boga fæddan 1962 og Dagbjörtu fædda 1969.

Fengum vinnu við að flokka timbur
„Við fjölskyldan bjuggum í Smáíbúðahverfinu í Reykjavík og þar var mjög gott að alast upp. Fossvogurinn var á þessum tíma í mikilli uppbyggingu og fólk var að flytja inn í hálfkláruð húsin.
Það var mikið af krökkum í hverfinu og við félagarnir fórum í marga leiðangra á byggingarsvæðinu og fengum meðal annars vinnu við að flokka timbur í stærðir og fengum laun fyrir.
Ásgarðurinn var gerður að sleðabrekkum á veturna og gatan iðaði að lífi. Þegar Bústaðakirkja var í byggingu þá mættum við félagarnir iðulega til að hjálpa til eða kannski vorum við meira að þvælast fyrir,“segir Steini og brosir.

Íslandsmeistari í fótbolta
„Ég æfði fótbolta með Víkingi og afrekaði að verða Íslandsmeistari með 5. flokki árið 1972. Breiðagerðisskóli var okkar hverfisskóli til 12 ára aldurs en þá lá leiðin í Réttarholtsskóla þaðan sem ég lauk landsprófi 1974.
Eftir útskrift úr Réttó lá leiðin í Menntaskólann við Sund og ég útskrifast 1981. Ég man hvað það var gífurleg breyting að fara úr gagnfræðaskóla yfir í menntaskóla, miklu meiri breyting en maður átti von á.“

Kynntust í Sigtúni
„Eftir menntó tók ég mér eitt ár í námsleyfi og fór að vinna hjá múrarameistara við ýmis störf tengd byggingarvinnu, þó aðallega steypuvinnu. Ég hafði verið hjá honum í sumarvinnu frá 1978.
Einn sumardaginn eftir vinnu 1982 skellti ég mér í Sigtún þar sem ég kynntist lífsförunauti mínum, Kristínu Þórmundsdóttur geislafræðingi, og höfum við verið saman síðan. Við eigum þrjú börn, Berglindi Rut fædda 1985, Sigvalda fæddan 1988 og Hugrúnu fædda 1994. Barnabörnin eru fjögur, Tristan Ýmir, Thelma Katrín, Þór Magni og Lilja Kristín.“

Fékk viðurnefnið Steini mæló
„Um haustið 1982 hóf ég nám við Tækniskóla Íslands í byggingatæknifræði. Á þessum tíma bjuggum við Kristín hjá foreldrum hennar en fluttum svo í Kópavoginn árið 1986. Það sama ár fékk ég sumarvinnu hjá Mosfellshreppi en útskrifast úr skólanum í desember. Í framhaldi fékk ég svo fastráðningu hjá tæknideild Mosfellshrepps sem þá var staðsett í Hlégarði og hef starfað hjá umhverfissviði síðan.
Í fyrstu var ég mikið við mælingar, setja út hús og allt sem viðkom mælingum og fékk því viðurnefnið Steini Mæló.“

Ekki auðveld ákvörðun
„Starf mitt varð fljótlega viðameira og ég sá um ýmis verkefni tengd uppbyggingu bæjarfélagsins. Þegar ég hóf störf hjá hreppnum bjuggu hér um 3.600 manns en í dag er fjöldinn í bænum rúmlega 10.000. Starfið er mjög fjölbreytt og hefur maður komið nánast að öllu sem tæknimaður bæjarfélags kemur að.
Árið 1988 vorum við hjónin hvött af Jóni Ásbjörnssyni þáverandi bæjartæknifræðingi að fjárfesta í lóð í Reykjabyggð. Þetta var ekki auðveld ákvörðun fyrir okkur borgarbörnin en eftir nokkra rúnta í Mosfellssveitina var ákvörðunin tekin, við fórum að byggja og fluttum inn 1991. Ég verð ávallt þakklátur Jóni að hafa hvatt okkur í þetta.
Faðir minn aðstoðaði gífurlega við bygginguna, kom eftir sinn vinnutíma og var nánast á hverjum degi að hjálpa stráknum að koma þaki yfir höfuðið.“

Sumarbústaðaferð á hverju ári
„Þegar börnin voru lítil var mikið farið í ferðalög og reyndum við að fara á hverju ári í vikutíma í sumarbústað og þær minningar eru djúpar í hugum fjölskyldumeðlima.
Ég tók einnig þátt í félagsstarfi með Aftureldingu, var í stjórn frjálsíþróttadeildar og handknattleiksdeildar og upplifði árin 1999 og 2000 þar sem Afturelding var á toppnum og vann allt sem hægt var að vinna.
Árið 2005 fór ég að hafa mikinn áhuga á veiði og við félagarnir förum í fjórar veiðiferðir á hverju ári. Síðastliðin 12 ár höfum við alltaf byrjað veiðisumarið á fjölskylduferð í Vatnsdalsá, síðan taka Veiðivötnin við, Þingvallavatn og tvær laxveiðiferðir.“

Margt dreif á dagana á þessum árum
„Árið 2000 tók ég við sem forstöðumaður Áhaldahússins en eftir sem áður var ég með ýmis verkefni tengd uppbyggingu bæjarins, nýrra hverfa og umsjón með nýbyggingum.
Margt dreif á dagana, mikil flóð sem gengu yfir bæinn og ollu töluverðum tjónum og eins var snjóþungt, sérstaklega árið 2000 þar sem allur febrúar var nánast undirlagður og mikil ófærð. Á þeim árum var tækjakostur allt annar en hann er í dag og kröfur samfélagsins öðruvísi.
Í fyrra tók ég við nýrri stöðu, deildarstjóri eigna og veitna, og hef í dag umsjón með eignum bæjarins, þ.e.a.s. skólum og leikskólum, og sé einnig um viðhaldsmál gatna og lagna.“

Miklar breytingar á starfsumhverfi
Á þeim tíma sem Steini hefur unnið hjá bænum hafa fimm bæjarstjórar verið að störfum. Þegar hann byrjaði var Páll Guðjónsson bæjarstjóri en á eftir honum komu Róbert B. Agnarsson, Jóhann Sigurjónsson, Ragnheiður Ríkharðsdóttir og Haraldur Sverrisson sem er starfandi bæjarstjóri í dag.
Steini hefur komið nánast að allri gatnagerð í Mosfellsbæ að undanskildu Helgafells- og Leirvogstunguhverfi en þau verkefni fóru í einkaframkvæmd. Hann hefur einnig komið meira og minna að öllum opinberum nýbyggingum í bænum.
„Á þessum árum hafa verið miklar breytingar á starfsumhverfi, bæði það að undirbúningur framkvæmda er orðinn töluvert lengri vegna breyttra reglugerða og lagaumhverfis og svo hafa miklar tækniframfarir orðið eins og fólk þekkir.“
Ég spyr Steina hvort hann sé alltaf á vaktinni? „Já, það má segja það, ég hef verið nánast á vaktinni fyrir bæinn í 31 ár og svarað símtölum á öllum tímum sólarhrings ef eitthvað hefur komið upp á.“ Með þeim orðum kvöddumst við og Steini rauk af stað á fund enda alltaf nóg að gera.

Mosfellingurinn 5. apríl 2018
Myndir og texti: Ruth Örnólfs

Mánudaginn 19. mars settust tíu flóttamenn að í Mosfellsbæ, hinsegin­ fólk frá Úganda sem hefur undanfarið dvalið í flóttamannabúðum í Kenía.
Þetta er í fyrsta sinn sem Mosfellsbær tekur formlega á móti flóttafólki. Í hópnum eru sex fullorðnir og fjögur börn, þar af eitt ungmenni, eldra en 18 ára. Samningur Velferðarráðuneytisins og Mosfellsbæjar lýtur að móttöku, aðstoð og stuðningi við hópinn á næstu tveimur árum.
Fyrstu dagarnir hafa verið mjög spennandi enda fólkið á framandi slóðum. „Við erum að reyna að venjast veðrinu,“ segir Hakim sem blaðamaður hitti ásamt hinum níu í Álafosskvosinni. „Íslendingar eru mjög almennilegir og vingjarnlegir, spjalla og hafa boðið okkur velkomin og við erum mjög þakklát fyrir það.“

Ætla að öðlast nýtt líf á Íslandi
Vissuð þið eitthvað um Ísland áður en þið komuð? „Daginn sem mér var sagt að við værum að fara til Íslands las ég ýmislegt á Google og lærði um menninguna á Íslandi. Ég lærði að höfuðborg Íslands væri Reykjavík, ég las um nýja forsetann og svoleiðis,“ segir Hakim.
Hver er helsti munurinn á Úganda og Íslandi? „Það er rosalega mikill munur, ég get ekki einu sinni borið þessi tvö lönd saman. Í Úganda er fólkið með svakalega fordóma fyrir samkynhneigðum og dómhart en það hef ég ekki upplifað á Íslandi síðan ég kom.“
Heldur þú að þér eigi eftir að líða vel hér á Íslandi? „Já, algjörlega. Ég er með miklar væntingar um að þetta skref eigi eftir að breyta lífi mínu. Ég ætla að eignast nýja vini og vonandi öðlast nýtt líf á nýjum stað. Ég hlakka til að byrja að læra íslensku og verða hamingjusamur á Íslandi.“
Þannig að þú átt ekki eftir að flytja aftur til Úganda í bráð? „Nei, þegar ég ákvað að flytja burt ákvað ég að ég myndi ekki snúa aftur.“

Fordómar á Íslandi á öðrum skala
Valgarð Már Jakobsson er einn sjálfboðaliða hjá Rauða krossinum sem aðstoðað hefur flóttafólkið. „Þetta er nýtt verkefni þar sem allir flóttamennirnir fá leiðsögumann sem á að vera stuðningur við að koma þeim inni í samfélagið. Við gerum eitthvað skemmtilegt með þeim og hjálpum þeim að fóta sig.
Það eru allir að stoppa þau og bjóða velkomin. Það er auðvitað fullt af fordómum hér á Íslandi, þau eru bara ekki farin að kynnast þeim ennþá. En auðvitað á allt öðrum skala heldur en heima hjá þeim þar sem þau eru bara stöðugt í lífshættu. Þetta er auðvitað mikil breyting fyrir þau og það hefur allt gengið mjög vel og allir hafa tekið þeim rosalega vel,“ segir Valgarð.

Vantar ennþá tvær íbúðir til leigu
Berglind Ósk er deildarstjóri á fjölskyldusviði Mosfellsbæjar og hefur komið að móttöku flóttafólksins. „Þetta hefur gengið mjög vel en auðvitað koma upp erfiðleikar, við erum t.d. ekki búin að finna íbúðir fyrir alla. Það vantar ennþá tvær íbúðir þannig að einhverjir eru enn á gistiheimilum.
Það er auðvitað margt sem þarf að huga að, t.d. heilsufarsskoðanir, skráning inn í landið og fá kennitölu, bankareikning o.fl.
Á næstu dögum fara þau í svokallaða samfélagsfræðslu, heimsækja lögreglu og slökkvilið og fleiri staði. Svo byrja þau öll í íslenskukennslu í næstu viku.
Þau hafa sætt ofsóknum af hálfu yfirvalda í sínu landi og því nauðsynlegt að öðlast traust aftur.“

Vilja byrja að vinna strax
Hvað langar þau að aðhafast hér á landi? „Þau spurðu strax hvenær þau gætu byrjað að vinna. Þau eru flest öll með reynslu af almennum vinnumarkaði og einhverja menntun. Þau vilja helst bara byrja strax. Börnin fara í skóla núna á næstu dögum en elsta stelpan er nú þegar aðeins byrjuð í framhaldsskólanum.
Eru þau komin til að vera eða líta þau á þetta sem tímabundið úrræði?
„Þau eru fyrst og fremst mjög þakklát fyrir að vera örugg. Í Úganda eru lögin þannig að samkynheigðir eru réttdræpir en auðvitað finnst öllum erfitt að yfirgefa heimalandið sitt. Það er ekkert fyrirséð að viðhorfið þar sé að fara að breytast.“
Tekur Mosfellsbær þátt í miklum kostnaði? „Þau fá fyrst um sinn fjárhagsaðstoð frá Mosfellsbæ sem er svo endurgreidd af ríkinu. Það er ákveðinn misskilningur að Mosfellsbær haldi þeim uppi. Þau eru hérna til að vera virkir samfélagsþegnar. Þau borga t.d. sjálf leigu á sínum íbúðum.“

Tenging í Samtökin 78
Berglind segir fólkið aldrei hafa séð snjó áður og jafnvel ekki sjó. „Þeim finnst fullkalt hér en þau eiga eftir að kynnast aðstæðum. Svo finnst þeim allir góðhjartaðir en þau eiga eftir að venjast því að geta verið þau sjálf. Þau upplifðu mikinn skort þegar þau voru á flótta í Kenía og urðu fyrir ofbeldi.“
Hópurinn er búinn að fara í Bókasafnið, Bónus og fleiri staði hér í Mosó og finnst það kostur að vera í smábæ nálægt höfuðborginni. „Það var einmitt eitt af því sem litið var til þegar Mosfellsbær var valinn að þau væru ekki að fara lengra út á land t.d. vegna tengingar í Samtökin 78.“
Þá hrósar Berglind sjálfboðaliðum Rauða krossins og segir þau mjög mikilvægan hlekk í öllu ferlinu.

Bæjarstjórn Mosfellsbæjar ákvað á 30 ára afmæli bæjarins í fyrra að veita fjármagni í uppsetningu á leiktæki í garðinum, t.d. stórum kastala, víkingaskipi eða öðru sambærilegu.
Þessi niðurstaða féll mjög vel að tillögum að uppbyggingu á miðsvæði garðsins og leiksvæði því tengdu.
Uppbygging á leiksvæðinu mun hefjast í apríl nk. og hefur umhverfissvið í samvinnu við skipulagshönnuði ákveðið að fjárfesta í kastala úr Eibe leiktækjalínuni.
Þau leiktæki bjóða upp á fjölbreytt safn kastala, klifurtækja og annarra útivistar- og ævintýraleiktækja fyrir börn á öllum aldri. Þá hentar kastalinn vel í náttúrulegu umhverfi eins og í Ævintýragarðinum og auðvelt verður að tengja kastalann við fleiri leiktæki í sömu leiktækjalínu í framtíðinni.

Karl Elinías Loftsson fyrrverandi útibússtjóri Búnaðarbankans hefur verið virkur í félagsstörfum eftir að hann lét af störfum.
Karl tók á móti mér á fallegu heimili sínu að Bjargartanga og við fengum okkur sæti í betri stofunni. Karl hefur einstaklega góða nærveru, er rólegur og yfirvegaður í fasi.
Það er óhætt að segja að Karl sitji ekki auðum höndum eftir að hann fór á eftir­laun því hann nýtir hvern dag til hins ítrasta. Ef hann er ekki að stjórna félagsvist eða bingói þá er hann að ferðast eða í golfi og svo hefur hann unun af að slípa íslenska steina.

Karl er fæddur á Hólmavík 2. mars 1937. Foreldarar hans voru Helga Guðbjörg Jónsdóttir húsfreyja og Loftur Bjarnason skipstjóri og verkamaður. Karl á sex systkini, Gróu, Þórdísi, Jón, Sigvalda, Ingimund Tryggva og Guðjón og sex hálfsystkini samfeðra, Gísla, Aðalheiði, Björnstjerne, Gest og tvö börn sem létust í bernsku.

Á handfærum í Steingrímsfirðinum
„Lífið í barnæsku snérist í kringum sjóinn og fiskinn. Ég var í kringum sjö ára aldurinn þegar ég fór fyrst með föður mínum á sjó og rérum við Guðjón bróðir með föður okkar á árabáti sem hét Skoppa. Við vorum nokkur sumur á handfærum í Steingrímsfirðinum og faðir minn sagði við okkur að það munaði um hvern fiskinn sem við bræðurnir gætum dregið.“

Tvær krónur í björgunarlaun
„Eitt sinn á mínum yngri árum var ég nærri drukknaður. Ég var að skola litlar hjólbörur í fjörunni neðan við húsið sem við bjuggum í þegar alda reið yfir og tók mig út og ég komst ekki aftur í land. Nokkrir eldri strákar sáu það sem gerðist og einn þeirra, Friðrik Arthúr, hljóp til að sækja hjálp. Gróa systir sem þá var sextán ára kom æðandi að og óð upp undir hendur þar sem ég flaut í sjónum og hún náði mér upp. Faðir minn kom stuttu síðar og í sameiningu fóru þau með mig til læknis sem dældi upp úr mér.
Ég hef ævinlega verið þakklátur Friðriki lífgjafa mínum og móðir mín var það líka og gaf honum tvær krónur í björgunarlaun.“

Gerðu út bát í sex ár
„Skólagangan gekk vel og ég lauk námi frá Grunnskóla Hólmavíkur vorið 1951. Þá tók sjómennskan við og ég var sjómaður og verkamaður næstu fimmtán árin. Var tvær vertíðir á Akranesi og eina á Ísafirði. Sjómennskan átti alltaf vel við mig og þetta voru ákaflega heillandi störf.
Árið 1960 létum við Jóhann og Kjartan Jónsynir smíða fyrir okkur 12 tonna fiskibát í skipasmíðastöð Inga Guðmonssonar á Akranesi. Báturinn hét Farsæll ST-28 og við gerðum hann út í sex ár.“

Njótum þess að ferðast
Karl kvæntist Valdísi Ragnarsdóttur húsmóður árið 1958. Börn Karls og Valdísar eru Bára, fædd 1956, veitingakona, Ragna Þóra, fædd 1959, þroskaþjálfi og sérkennari og Elín Gróa, fædd 1968, viðskiptafræðingur. Barnabörnin eru sjö en eitt þeirra er látið. Barnabarnabörnin eru tvö.
„Við hjónin njótum þess að ferðast bæði innanlands og utan í góðra vina hópi. Við höfum einnig mikla ánægju af því að fara á heimaslóðir til Hólmavíkur en þar eigum við hús sem við dveljum oft löngum stundum í.“

Mest með um 150 fjár
„Árið 1960 tók ég við umboði Olíuverslunar Íslands hf. á Hólmavík og var með það í 25 ár. Samhliða olíuversluninni rak ég verslun með matvörur og gjafavörur ásamt Jóni bróður mínum eða til ársins 1973. Við Jón vorum að auki með búskap í mörg ár, mest vorum við með um 150 fjár. Í dag á ég tvær kindur sem bróðir minn fóstrar fyrir mig.
Árið 1972 var ég skipaður yfirkjötmatsmaður á Vestfjörðum. Á þessum árum voru 52 sláturhús víðsvegar um landið. Ég starfaði sem matsmaður til ársins 2012 en þá voru aðeins átta sauðfjársláturhús eftir á landinu.“

Útibússtjóri í þrjátíu ár
„Karl starfaði fyrir Búnaðarbanka Íslands í 30 ár. „Ég hóf störf í útibúinu á Hólmavík árið 1973 og starfaði þar allt til ársins 1985. Þá var ég skipaður útibússtjóri í Vík í Mýrdal og var þar til ársloka 1990.
Svo var ég ráðinn útibússtjóri í útibúi bankans í Mosfellsbæ og gegndi því starfi til 67 ára aldurs. Bankaárin veittu mér gríðarlega ánægju, á öllum þessum stöðum kynntist maður mjög góðu og skemmtilegu fólki.“

Sæmdur æðstu viðurkenningu
Karl hefur starfað mikið í félagsmálum í gegnum tíðina, Hann var í stjórn Héraðssambands Strandamanna og í stjórn Átthagafélagsins í 26 ár. Hann var kosinn í hreppsnefnd Hólmavíkurhrepps árið 1966 og tók við sem oddviti árið 1972 og gegndi því starfi í 14 ár. Hann var einnig formaður ungmennafélagsins Geisla. Þar að auki hefur Karl verið í ýmsum stjórnum félagasamtaka á Vestfjörðum.
Eftir að hann flutti í Mosfellsbæ hefur hann starfað í sóknarnefnd Lágafellssóknar í 12 ár, í stjórn félags eldri borgara í 8 ár og í stjórn Golfklúbbsins í 8 ár. Hann hefur kennt pútt í 20 ár og stjórnar í dag félagsvist og bingói á Eirhömrum.
Karl hefur verið virkur meðlimur í Lionshreyfingunni síðastliðin 55 ár og verið sæmdur æðstu viðurkenningu Lionshreyfingarinnar, Melvin Jones. Hann er ævifélagi Lionsklúbbsins í Mosfellsbæ.

Slípar íslenska steina
„Ég hef alla tíð verið mikið í útivist í náttúru Íslands og stundaði stangveiði um land allt í mörg ár en síðastliðin 25 ár hefur golfið átt hug minn allan.
Áhugamál mitt til margra ára í seinni tíð er að vinna með íslenska steina, saga þá og slípa og til þess nota ég sérstakar vélar. Áður fyrr fór maður upp um fjöll og í fjörur að tína steina en núna þegar fæturnir eru farnir að gefa eftir þá verð ég að kaupa þá annars staðar til að halda starfseminni gangandi.
Steinarnir veita mér mikla ánægju og að hinu leytinu til þá er alltaf gott að hafa eitthvað fyrir stafni.“

Mosfellingurinn 15. mars 2018
Myndir og texti: Ruth Örnólfs

Bæjarráð Mosfellsbæjar hefur samþykkt úthlutunarskilmála og verð við úthlutun á 31 lóð við Fossatungu og Kvíslartungu í Mosfellsbæ. Um er að ræða stækkun Leirvogstunguhverfis til austurs í átt að Köldukvísl. Leirvogstunguhverfið er glæsilegt sérbýlishúsahverfi í Mosfellsbæ sem afmarkast af Leirvoginum og Vesturlandsvegi.
Lóðirnar skiptast þannig eftir gerð húsnæðis að raðhúsalóðir eru 17, parhúsalóðir 12 og einbýlishúsalóðir eru 2.

Hverfið að verða fullbyggt
„Mikil eftirspurn hefur verið eftir húsnæði í Mosfellsbæ eins og við íbúar höfum öll tekið eftir“, segir Haraldur Sverrisson bæjarstjóri. „Sérstaklega í þeim mikla uppgangi sem einkennt hefur síðustu ár með uppbyggingu m.a. í Helgafelli og Leirvogs­tungu. Á síðasta ári fjölgaði íbúum um 8% og við hjá Mosfellsbæ vinnum að því daglega að taka vel á móti nýjum íbúum um leið og við eflum þjónustuna almennt. Það er einkar ánægjulegt að geta hafið vinnu við að úthluta þessum lóðum í byrjun apríl á grundvelli útdráttar.
Við verðlagningu lóðanna var haft að leiðarljósi að verð væri í lægri kantinum miðað við markaðinn en samt ekki það lágt að óeðlilegur eftirmarkaður myndaðist með þær. Þegar byggingu þeirra lýkur verður Leirvogstunguhverfið að mestu fullbyggt.“

Dregið úr innsendum umsóknum
Heimilt er að sækja um fleiri en eina lóð í einu. Verði umsóknir um hverja lóð fleiri en ein verður dregið úr innsendum umsóknum. Umsækjendum um lóðir verður gefin kostur á að vera viðstaddir útdrátt sem verður auglýstur á vefsíðu bæjarins viku fyrir útdrátt. Útdrátturinn verður framkvæmdur af eða undir eftirliti sýslumanns eða annars hlutlauss aðila.
Verð lóðanna samanstendur af gatnagerðargjaldi sem er 32.082 kr. á m² auk byggingaréttargjalds sem er misjafnt eftir húsagerð. Þannig verður einbýlishúsalóðum úthlutað á um 13 m.kr., parhúsalóðum frá 7,5 m.kr. og raðhúsalóðum frá 6,2 m.kr.
Nánari upplýsingar á www.mos.is/lodir.