Félagsmiðstöðin Bólið fagnar 40 ára afmæli sínu með þriggja daga afmælisfögnuði í Hlégarði dagana 10.-12. apríl.
Félagsmiðstöðin Bólið býður upp á uppbyggilegt félagsstarf fyrir 10 til 16 ára börn og ungmenni. Í Bólinu er fjölbreytt og lifandi starfsemi sem er skipulögð að miklu leyti í samráði við unglingana.
Félagsmiðstöðin Bólið var fyrst opnuð um áramótin ‘83-’84 og fagnar því á þessu ári 40 ára afmæli.
Fyrst hafði félagsmiðstöðin aðsetur í gömlu símstöðinni, síðan hefur mikið vatn runnið til sjávar.
Í dag hefur félagsmiðstöðin aðsetur á þremur stöðum, á lóðinni við Lágafellsskóla, inni í Helgafellsskóla og við Skólabraut í svokölluðum Læknisbústað. Þar á neðri hæðinni er tónlistaraðstaða og hljóðver í boði fyrir ungmenni 13-25 ára og ber nafnið Kjallarinn.
Í dag starfa í Bólinu 17 starfsmenn og fer þar fram mikið og öflugt starf alla daga og öll kvöld vikunnar.
Böll verða haldin í Hlégarði á miðvikudags- og fimmtudagskvöld fyrir 5.-10. bekkinga.
Föstudaginn 12. apríl er svo almenningi boðið í veislu í Hlégarði kl. 17:00.
Bólráð sér um veislustjórn og bæjarstjóri Mosfellsbæjar mun ávarpa samkomuna.
Þar munu ungir listamenn koma fram og boðið verður upp á veitingar og spjall.

Eitt það besta við íþróttirnar er að þær búa yfir þeim töframætti að geta sameinað fólk. Það er ólýsanlegt að vera hluti af stórum hópi fólks sem er samankominn til þess að styðja eitt og sama liðið til dáða. Lið sem allir í hópnum hafa tengingu við. Tengingarnar ná saman eins og ósýnilegir rafmagnsþræðir, tengja okkur sem erum á pöllunum hvert við annað. Og okkur sem heild við íþróttaliðið okkar úti á vellinum. Það gefur liðinu orku sem síðan endurvarpast á áhorfendapallana. Og þannig eykst þessi sameiginlega orka jafnt og þétt. Við finnum fyrir tengingunum, finnum að við erum í þessu saman.

Vorið er skemmtilegur íþróttatími í Mosfellsbæ. Vetraríþróttirnar eru að ná hámarki og sumaríþróttirnar að byrja. Móðurskip okkar Mosfellinga, Afturelding, heldur úti öflugum félagsliðum í bolta­íþróttunum og það eru heldur betur spennandi tímar fram undan hjá þeim. Karla- og kvennalið UMFA í blaki eru bæði komin í undanúrslit í Íslandsmótinu, en úrslitakeppnin er í fullum gangi þessa dagana. Kvennaliðið okkar í handbolta tekur næstu daga og vikur þátt í úrslitakeppni um að halda sæti sínu í efstu deild og karlaliðið, sem endaði deildarkeppnina í öðru sæti, spilar þessa dagana við Stjörnuna í 8-liða úrslitum Íslandsmótsins. Við eigum, ekki enn, meistaraflokka í körfubolta, en íþróttin er mjög vaxandi í Mosfellsbæ og strákarnir í 2009 árganginum eru á meðal bestu liða landsins í dag. Kvenna- og karlaliðin okkar í fótbolta eiga bæði bikarleiki í apríl og Íslandsmótið hefst í byrjun maí.

Ég hvet unga sem aldna Mosfellinga til að mæta sem oftast á völlinn til að styðja okkar lið og upplifa um leið öfluga mosfellska sameiningarorku. Saman getum við náð langt!

Það er líka margt að gerast á vormánuðum hjá hinum íþróttadeildum UMFA – badminton, fimleikar, frjálsar, hjól, karate, sund og taekwondo. Skoðum það og önnur íþróttafélög bæjarins í næsta pistli.

Heilsumolar Gaua
Mosfellingur 11. apríl 2024

Hanna Björk Halldórsdóttir íþróttafulltrúi Aftureldingar ákvað að fara í tæknifrjóvgunarferli til Grikklands.

Ýmsar meðferðir flokkast undir tæknifrjóvgun og margvíslegar ástæður geta legið að baki þess að fólk fari í slíkar meðferðir. Þetta er t.d. kjörmeðferð fyrir einhleypar konur sem vilja eignast börn og hefur árangur af slíkum meðferðum verið góður.
Hanna Björk Halldórsdóttir er ein þeirra sem hefur kosið að fara slíka leið en hún eignaðist tvíbura í júlí sl. Hanna ákvað að leita sér aðstoðar erlendis og segist ánægð með þá þjónustu sem hún fékk í Grikklandi, þar var á hana hlustað og henni gefin ráð.

Hanna Björk fæddist í Reykjavík 9. mars 1985. Foreldrar hennar eru Valgerður Hermannsdóttir hjúkrunarfræðingur og Halldór Bárðarson smiður.
Hanna Björk á tvo bræður, Sverri Einar f. 1971 og Hall Þór f. 1981.

Þetta voru ævintýralöndin okkar
„Ég er alin upp í Mosfellsbæ og elskaði að alast upp hérna, myndi hvergi annars staðar vilja ala upp mín börn.
Það voru forréttindi að alast upp í næstu götu við ömmu og við vinkonurnar nýttum okkur það gjarnan að fara til hennar og fá heitt kakó og skúffuköku. Klettarnir í bakgarðinum hjá henni á Helgastöðum, Álafosskvosin og skógurinn í Brekkulandi voru helstu ævintýralöndin okkar.“

Við kunnum engar reglur
„Maður var alltaf úti að leika sér með krökkunum úr Holtunum. Við bjuggum til hafnaboltavöll á grasblettinum á horninu á Markholti og Skeiðholti. Við spiluðum en raunin var sú að við kunnum engar reglur nema kasta bolta, slá með kylfu og hlaupa,“ segir Hanna og hlær. „Pæjumótin voru líka stór hluti af sumartímanum og voru í raun það sem maður hlakkaði mest til.
Ég gekk í Varmárskóla og Gagnfræðaskóla Mosfellsbæjar, ég var mikil strákastelpa og var í fótbolta í öllum frímínútum. Árgangurinn minn var örugglega vel hress fyrir kennara og stjórnendur skólans. Ég held að ég hafi nú ekki verið sú sem hafi verið til vandræða endilega en átti það til að koma vinum mínum í vandræði, svona þegar prakkarinn kom upp í mér,“ segir Hanna Björk og brosir.
„Á sumrin starfaði ég á Reykjalundi og svo æfði ég fótbolta og frjálsar íþróttir, maður nýtti hverja lausa stund til að spila. Ég ferðaðist mikið um landið með fjölskyldu minni en ferðalögin voru oft farin vegna fótboltamóta hjá mér.“

Bauðst að fara til Miami
„Ég gekk í Menntaskólann í Reykjavík og við vorum tvær úr Mosó sem lentum saman í bekk. Okkur leist ekki vel á þetta frá fyrsta degi. Einn daginn fórum við saman í Menntaskólann við Sund til að sækja bók hjá vinkonu okkar en enduðum á að skrá okkur í skólann.
Ég átti fjögur frábær ár í MS og eignaðist þar mína bestu vini. Eftir útskrift prófaði ég alls konar, fór í HÍ en endaði svo á Flórída í einkaþjálfaranámi. Ég starfaði við þjálfun í Baðhúsi Lindu P í nokkur ár en bauðst svo að fara til Miami í Florida Memorial University og spila knattspyrnu fyrir nýtt háskólalið, þar var ég í tvö ár.“

Ein besta hugmynd sem ég hef fengið
„Eftir heimkomu frá Miami fór ég í Háskólann í Reykjavík í íþróttafræði. Það er án efa ein sú besta hugmynd sem ég hef fengið. Sumarið eftir útskrift þá gekk ég inn á ferðaskrifstofuna Kilroy og sagði ráðgjafa þar að mig langaði í meistaranám um haustið. Ég vildi fara þar sem væri hlýtt og töluð enska, ráðgjafinn benti mér á Hawaii Pacific University. Þangað fór ég og sótti nám í breytingastjórnun sem er ansi skemmtileg blanda með íþróttafræðinni.“

Menning hefur alltaf heillað
„Ég hef alla tíð haft mikinn áhuga á íþróttum en er að mestu leyti hætt að sprikla sjálf. Ég hef samt sett mér það markmið að fara á íþróttaviðburði í hverju landi sem ég fer til og það markmið hefur leitt mig á ýmsa skemmtilega viðburði.
Menning hefur alltaf heillað mig líka, að sjá hvernig fólk lifir. Lífið á Hawaii t.d. sýndi mér fjölbreytileika á allt öðrum stað en við þekkjum hérna heima, ég fann mig vel í því umhverfi og naut þess að læra.“

Ákvað að leita mér aðstoðar
Hanna Björk er sjálfstæð móðir tvíbura sem fæddust 6. júlí 2023 eftir mikið ævintýri í Grikklandi. Eftir 32 vikna meðgöngu fæddust Baltasar Bjarkan og Sunneva Kristín.
„Almennt séð hef ég gaman af að vera í góðum félagsskap en nú fer tíminn minn mest í börnin mín og það er bara yndislegt,“ segir Hanna Björk og brosir.
„Ég hóf mitt tæknifrjóvgunarferli 2019 og þetta ferðalag varði í fjögur ár. Ég fór í viðtal hjá Livio hér á Íslandi en var aldrei fyllilega ánægð þótt margir hafi fengið þar góða þjónustu, mér fannst viðtalið þurrt, stutt og ekki hlustað á mínar áhyggjur eða pælingar. Ég ákvað samt að gefa þeim tækifæri sem er kannski mín stærsta eftirsjá.
Fyrsta tæknisæðingin fór fram í júlí 2020, fór í fjögur skipti hér heima sem gengu ekki svo ég ákvað þá að leita mér aðstoðar erlendis. Ég hafði heyrt gott af Serum IVF Clinic í Grikklandi, fékk símaviðtal við kraftaverkakonuna Penny sem bauð mér að koma í rannsókn.
Eftir þær rannsóknir voru allar mínar áhyggjur, sem ég hafði rætt hér heima, staðfestar.“

Óendanlega þakklát
„Ég fór í fimm ferðir til Grikklands, þrjár meðferðir og allt gekk upp í þeirri þriðju sem jafnframt var fyrsta glasameðferðin og til urðu tveir fullkomnir einstaklingar.
Meðferð sem þessi er dýr og það voru margir sem höfðu á orði að þeir vildu styrkja mig í þessu ferli. Eftir miklar vangaveltur fór ég út í fjáröflun og seldi hinar ýmsu vörur. Ég náði að safna langleiðina upp í fulla meðferð, eina aðgerð, tvær flugferðir og hótelkostnað. Þetta var mikil vinna og oft á tíðum yfirþyrmandi, pabbi og vinkona mín tóku að sér að keyra út vörurnar í öllum veðrum.
Ég verð óendanlega þakklát öllum þeim sem létu fé af hendi rakna, það er ekki hægt að lýsa því með orðum hvernig það var að finna fyrir öllum þessum stuðningi.“

Starfið er margþætt
Hanna Björk hefur starfað við dagvistun, þjálfun og þjónustustörf í gegnum tíðina en árið 2017 var hún ráðin íþróttafulltrúi Aftureldingar. Hanna þekkir félagið og alla aðstöðu vel í gegnum sinn íþróttaferil frá unga aldri.
„Það eru mikil forréttindi að fá að starfa hjá uppeldisfélaginu og ég er ákaflega þakklát fyrir það tækifæri. Ég stýri íþróttamálunum og starfið er margþætt. Við viljum alltaf gera betur þegar kemur að þjálfun iðkenda og ekki síst í fræðslu fyrir þjálfara félagsins, starf mitt er liður í þeirri uppbyggingu,“ segir Hanna Björk og brosir er við kveðjumst.

Á Skálatúni hefur um árabil verið búsetusvæði fyrir fatlað fólk sem var rekið af IOGT á Íslandi. Vorið 2023 hætti IOGT á Íslandi þeirri starfsemi og þjónusta við íbúa á Skálatúni er nú á höndum Mosfellsbæjar en eignarhald fasteigna á svæðinu í eigu nýs aðila, Skálatúns, sjálfseignarstofnunar í þágu barna, ungmenna og fjölskyldna.
Til stendur að byggja upp þjónustusvæði fyrir börn og ungmenni og fjölskyldur þeirra á svæðinu og mun svæðið því taka vissum breytingum. Í ljósi þessara breytinga var ákveðið að halda nafnasamkeppni í þeim tilgangi að fá nýtt nafn á svæðið sem mun sinna breyttum verkefnum þegar svæðið hefur verið byggt upp.

Þrír sigurvegarar með sama nafnið
Niðurstaða dómnefndar í nafnasamkeppni fyrir uppbyggingu á svæðinu í landi Skálatúns í Mosfellsbæ er: Farsældartún.
Dómnefnd var skipuð þremur fulltrúum, Ásmundi Einari Daðasyni f.h. mennta- og barnamálaráðuneytisins, Önnu Sigríði Guðnadóttur bæjarfulltrúa, f.h. Mosfellsbæjar og Ragnari Jónssyni, f.h. auglýsingastofunnar TVIST.
Leitað var til almennings um tillögur að nafni. Samkeppnin var auglýst sérstaklega á heimasíðu Mosfellsbæjar og í bæjarblaðinu Mosfellingi. Enn fremur var þremur opinberum stofnunum gert sérstaklega viðvart um samkeppnina og þær hvattar til að fá sitt fólk til að taka þátt. Um það bil 150 tillögur bárust.
Niðurstaða dómnefndar var að velja heitið Farsældartún úr innsendum nafnatillögum.
Þrír aðilar stungu upp á nafninu, þær Guðrún Birna Einarsdóttir, Sigurveig Gunnarsdóttir og Gerður Pálsdóttir og var þeim veitt viðurkenning í vikunni.

Farsæld barna í forgrunni
Orðið farsæld merkir samkvæmt orðabók „það að farnast vel í lífinu“. Samkvæmt lögum um samþættingu þjónustu í þágu farsældar barna, farsældarlögunum, merkir farsæld barns þær „aðstæður sem skapa barni skilyrði til að ná líkamlegum, sálrænum, vitsmunalegum, siðferðilegum og félagslegum þroska og heilsu á eigin forsendum til framtíðar.“
Starfsemin sem mun fara fram í Farsældartúni mun einmitt miða að því að farsæld barna verði náð og því skýrt samhengi milli þess sem fara mun þar fram og heitis svæðisins.
Dómnefndin taldi að vísan þess heitis í tún væri m.a. vísan í gamla tíma þar sem fyrra heiti svæðisins var Skálatún. Einnig að þannig væri vísað í hefðir Mosfellsbæjar eins og bæjarhátíðina „Í túninu heima“. Þá eru tún tákn um ræktun, grósku og uppskeru, sem vísar til þess starfs sem fara mun fram á svæðinu þegar það hefur verið byggt.
Nafnið gefur einnig tækifæri til þess að skapa samverusvæði á reitnum sem gæti kallast Farsældartún, en þar mætti hafa leiktæki og annað sem hvetur til jákvæðrar og uppbyggjandi samveru barna, ungmenna og fjölskyldna.
Dómnefnd hvetur Mosfellsbæ einnig til þess að haga því þannig til að götuheiti á svæðinu beri nafnið Farsældartún og byggingar á svæðinu standi því við Farsældartún nr. 1, 2, 3, o.s.frv.
Fljótlega verður farið í deiliskipulagsvinnu á svæðinu en markmiðið er að þarna verði á einum stað helstu stofnanir og samtök sem koma að þjónustu við börn og ungmenni auk úrræða fyrir börn með fjölþættan vanda.

Ég hef nýhafið störf sem íþrótta- og lýðheilsufulltrúi Mosfellsbæjar. Starfið byggir á grunni sem ljúfmennið Sigurður Guðmundsson reisti, en starfslýsingin er á ýmsan hátt ólík hans. Ég er mjög spenntur fyrir þeim fjölmörgu verkefnum sem fram undan eru, er afar þakklátur fyrir traustið og ætla að gera mitt allra besta til að standa undir því.

Það er mikill áhugi á íþróttum og hreyfingu í bæjarfélaginu og margt í boði fyrir bæjarbúa á öllum aldri á því sviði. En við ætlum að gera enn betur. Mosfellsbær og Afturelding eru til dæmis að vinna þarfagreiningu fyrir nýja þjónustu- og aðkomubyggingu við íþróttamiðstöðina að Varmá. Fjölmargir kynningarfundir hafa verið haldnir og viðtöl tekin við á þriðja tug hagaðila. Að auki er nú opin rafræn könnun á vegum Mosfellsbæjar þannig að allir bæjarbúar geta komið skoðunum sínum og hugmyndum varðandi bygginguna á framfæri.

Ég hef undanfarna daga mikið hugsað um eitt af bláu svæðunum (Blue Zones) í heiminum og borið það saman við okkur í Mosfellsbæ. Loma Linda (fallega hæðin) er rúmlega 20 þúsund manna bæjarfélag í Kaliforníu. Við fjölskyldan dvöldum í þar í mánuð þegar við ferðuðumst um bláu svæðin fyrir akkúrat fimm árum að kynna okkur og læra um samspil langlífis og góðrar heilsu.

Það sem stuðlar fyrst og fremst, að mínu mati, að áberandi góðri heilsu íbúa Loma Linda er hugarfarið. Íbúar eru mjög meðvitaðir að búa í heilsubæ og nota það sem hvatningu til að stunda heilsusamlegt líferni. Ég sé Mosfellsbæ fyrir mér sem íþrótta– og heilsubæ Íslands. Við höfum allt sem til þarf – umhverfið, grunnaðstöðuna og það sem mikilvægast er, drífandi og jákvætt fólk sem vill vinna saman að sameiginlegum markmiðum. Hugarfarið er mikilvægast. Hugsum og tölum jákvætt, það hvetur okkur mest til dáða.

Heilsumolar Gaua
Mosfellingur 7. mars 2024

Ólafur Gestur Arnalds prófessor hefur lengi fengist við rannsóknir á íslenskri náttúru og vernd hennar.

Moldin fæðir og klæðir jarðarbúa og hún miðlar jafnframt ferskvatni um vistkerfi. Skilningur á náttúrunni og hvernig hún bregst við álagi vegna athafna mannsins á jörðinni krefst þekkingar á moldinni.
Jarðvegur á Íslandi er einstakur á heimsvísu, frjór en viðkvæmur, því aðstæður fyrir þróun hans hérlendis eru afar sérstakar.
Ólafur Gestur Arnalds vísindamaður hefur verið málsvari moldarinnar um langt skeið, hann hefur afgerandi þekkingu og skilning á þessari dýrmætu auðlind. Ólafur hefur alla tíð helgað líf sitt fræðistörfum á sviði jarðvegs og vistkerfa og kennt ófáum háskólanemum allt um moldina og mikilvægi hennar.

Ólafur er fæddur í Reykjavík 5. janúar 1954. Foreldrar hans eru Ásdís Andrésdóttir Arnalds og Sigurður Arnalds, útgefendur.
Systkini Ólafs eru Sigurður f. 1947, Andrés f. 1948, Einar f. 1950 og samfeðra Jón Laxdal f. 1935 og Ragnar f. 1938.

Hrifu jafnvel barnið með sér
„Ég ólst upp í gamla Vesturbænum á Stýrimannastíg. Hverfið var frábært fyrir börn að alast upp, margir krakkar í hverfinu sem höfðu mikið frjálsræði. Flestir voru úti meginhluta dags utan skólatíma, örstutt niður í Slipp, út í Örfirsey eða niður í miðbæ.
Ég á ansi fjölbreyttar æskuminningar, mikill gestagangur heima fyrir, faðirinn og margir gestkomandi voru frábærir sagnamenn sem hrifu jafnvel barnið með sér. Man hlátrasköllin um húsið en sögurnar gáfu mér um leið tilfinningu fyrir erfiðri lífsbaráttu landans á fyrri hluta 20. aldar.
Vinir okkar bræðra voru heimagangar og það var iðulega mannmargt á Stýró og margir urðu vinir til lífstíðar. Móðirin hélt þessu öllu saman af miklu umburðarlyndi og veitti stuðning þegar hans var þörf.“

Merkileg flóra alþingismanna
„Ég gerðist þingsveinn á Alþingi þegar ég var 10 ára gamall og vann þar marga vetur. Þar kynntist ég merkilegri flóru alþingismanna um miðjan sjöunda áratuginn í miðju kalda stríðinu.
Ég vann m.a. fyrir peningum til að kaupa útvarp og segulband til að hljóðrita tónlist úr Kanaútvarpinu enda þótti popptónlist óæðri músik, óáran sem myndi ganga fljótt yfir og var lítið spiluð í útvarpi landsmanna.“

Háseti á síðutogara
„Ég gekk í Miðbæjarbarnaskólann sem enn stendur við Tjörnina. Man marga frábæra kennara, góða vini og skemmtilega tíma.
Á sumrin var ég í sveit nokkur sumur en einnig við ýmis sendlastörf. Ég byrjaði sem háseti á síðutogara 15 ára gamall og var til sjós fjögur sumur. Aflaði fjár til vetrarins, sem var nú ekki alltaf varið af skynsemi,“ segir Ólafur og brosir. „Síðar vann ég sem verkamaður við gerð brimvarnargarðs í Súgandafirði og eitt sumar sem fangavörður.
Ég fór í Menntaskólann í Reykjavík eins og fimm bræður mínir á undan mér. Ég tók virkan þátt í leiklistarlífinu (Herranótt) þar sem var oft glatt á hjalla.“

Ýmislegt brallað á Birkiteignum
Eiginkona Ólafs er Ása Lovísa Aradóttir prófessor í landgræðslufræðum við Landbúnaðarháskóla Íslands. Þau eiga tvö börn, Arndísi Ósk f. 1979 sem er verkfræðingur að mennt og Guðmund Ara f. 1994 mannfræðing og tónlistarmann. Barnabörnin eru tvö.
„Það er ýmislegt brallað hérna á Birkiteignum þegar barnabörnin koma í heimsókn, málað, lesið og spilað. Við reynum einnig að eiga góðan sameiginlegan tíma á sumrin í orlofshúsum sem og í sumarhúsi stórfjölskyldunnar við Álftavatn í Grímsnesi. Við hjónin ferðumst þar fyrir utan mjög mikið, bæði vegna starfa okkar og í frítíma, innanlands sem utan.“

Skíðaferðirnar stytta veturinn
„Við Ása höfum alltaf stundað útivist, áður fyrr voru lengri göngur með „allt á bakinu“ á dagskrá en nú eru göngurnar styttri. Gjarnan farið á tjaldsvæði við hálendisbrúnina eftir því sem vindar blása.
Við höfum farið í árlegar ferðir með félögum frá menntaskólaárunum í um 30 ár sem hafa verið mjög gefandi. Skíðaferðir til Ítalíu og víðar stytta veturinn og nú hafa vetrarferðir til heitari slóða í frí bæst við. Vera okkar í Bandaríkjunum telur sjö ár og þar höfum við ferðast mjög mikið. Vinnan kemur okkur líka til framandi staða, m.a. til ýmissa landa Afríku.
Konan mín er listfengur málari en ég stunda töluvert myndatökur með dróna. Náttúra landsins er bæði innblástur í lífinu en einnig viðfangsefni í starfi okkar sem náttúrufræðingar.“

Störfin hafa verið fjölbreytt
Störf Ólafs, bæði á meðan hann stundaði háskólanám og síðar, hafa tengst jarðvegi, landnýtingu, ástandi vistkerfa, landgræðslu o.fl. Hann hóf sumarstörf við beitarrannsóknir við Rannsóknarstofnun landbúnaðarins (RALA) sumarið 1976 og hefur starfað þar allar götur síðan, fyrst meðfram námi en síðar sem sérfræðingur og sviðsstjóri eftir að háskólanámi lauk.
„Ég varð prófessor eftir að RALA sameinaðist Landbúnaðarháskólanum á Hvanneyri með stofnun Landbúnaðarháskóla Íslands. Störfin hafa verið fjölbreytt og hafa meðal annars beinst að sérstökum eiginleikum moldar á eldfjallasvæðum jarðar í samvinnu við evrópska kollega, að rannsóknum á eiginleikum sem og flokkun íslensk jarðvegs, en einnig að sandfoki og ryki á Íslandi, ástandi lands og vistheimt.
Í upphafi stýrði ég kortlagningu á jarðvegsrofi á landinu öllu en síðar þróun gagnagrunns um landgerðir og bújarðir á Íslandi með verkefninu Nytjaland, auk rannsókna á moldinni. Ég hef átt marga frábæra samstarfsmenn og nemendur í gegnum tíðina.“

Mold ert þú
Störf Ólafs hafa jafnframt falið í sér kennslu og skriftir, m.a. á vísindagreinum og bókum en sl. vor kom út bók eftir hann, Mold ert þú – jarðvegur og íslensk náttúra, sem var búin að vera lengi í smíðum.
Mold ert þú er efnismikil og glæsileg bók þar sem fjallað er um jarðveg og umhverfismál frá mörgum hliðum. Hún skiptist í þrjá meginhluta, grunnþætti jarðvegsfræðinnar, íslenska mold og umhverfið. Þetta er fróðleg bók fyrir alla sem hafa áhuga á náttúrufræði.
Bókin er prýdd miklum fjölda ljós- og skýringarmynda sem unnar voru af Fífu Jónsdóttur.

Tónlistin ofarlega á blaði
Ólafur hlaut Umhverfisverðlaun Norðurlandaráðs árið 1998 fyrir kortlagningu á jarðvegsrofi á Íslandi. Eins var honum, eiginkonu hans og Andrési Arnalds veitt umhverfisviðurkenning umhverfisnefndar Mosfellsbæjar árið 2016 fyrir störf að umhverfismálum. Ólafur hlaut landgræðsluverðlaun Landgræðslu ríkisins árið 2018.
Ólafur lauk formlega störfum í janúar síðastliðnum, ég spyr hann að lokum hvað taki nú við? „Aðeins rólegri dagar,“ segir Ólafur og brosir en náttúra, útivist og samvera með fjölskyldu er efst á blaði. „Að ferðast, kynnast náttúrunni, sögu og menningu, það eru forréttindi þegar atvinna og áhugamál hafa farið saman eins og í mínu tilfelli. Mosfellsbær er hreint magnaður bær þegar kemur að útivistinni.
Tónlistin er líka alltaf ofarlega á blaði, það er gaman að pikka upp lög og gítarsóló sem kemur í veg fyrir liðagigt og eflir andann á ýmsa lund.“

Mosfellingurinn Jóna Margrét Guðmundsdóttir keppir til úrslita í Idol stjörnuleit föstudagskvöldið 9. febrúar en sýnt verður frá keppninni í beinni útsendingu á Stöð 2.
Jóna Margrét er alin upp í Mosfellsbæ til 10 ára aldurs, en býr nú á Akranesi. Foreldrar hennar eru Mosfellingarnir Hjördís Kvaran Einarsdóttir og Guðmundur St. Valdimarsson. Jóna Margrét lauk stúdentsprófi af tónlistardeild Menntaskólans á Akureyri 2023. Eftir MA fór hún til Kaupmannahafnar í söngnám í Complete Vocal Institute.
„Ég var í námi úti í Danmörku þegar umsóknarferlið fyrir Idolið hófst og varð bara óskaplega skotin í þessu og ákvað að sækja um. Fékk svo svar um að ég væri komin inn og þá varð þetta allt svo raunverulegt. Ég er mjög þakklát fyrir það í dag og er ótrúlega stolt.“

Vön að koma fram
„Ég hafði komið nokkuð fram áður en ég fór í Idolið. Var búin að vera mikið á sviði í söngleikjum í Hofi á Akureyri sem LMA setti upp, keppti í söngvakeppnum og komið oft fram á vegum TónAk.
Ég á mér draum um að geta lifað á því að vera tónlistarmaður og þá þarf maður að vera duglegur að koma sér að. Ég hélt eigin útgáfutónleika á Græna hattinum þegar platan mín, Tímamót, kom út 2022. Platan var hluti af lokaverkefni mínu hjá TónAk.“

Allt sem mig dreymir um
„Úrslitakvöldið fer fram með þeim hætti að þrír keppendur koma fram og syngja eitt lag sem við veljum sjálf. Í miðjum þætti verður kosið og einn fer heim og þeir tveir sem eftir standa keppa aftur með því að syngja úrslitalag og aftur er kosið og eftir það verður krýndur sigurvegari Idolsins 2024.
Þetta hefur gengið ótrúlega vel, þetta er náttúrulega allt sem mig dreymir um að gera, að koma fram undir nafninu Jóna Margrét og vera listamaður.
Eins og fram hefur komið í þáttunum þá er þetta mjög, mjög erfitt ferðalag en á sama tíma 100% það sem mig dreymir um. Þetta er alveg magnað ferli og maður kynnist fullt af yndislegu og mjög hæfileikaríku fólki og myndar tengsl við fólk til frambúðar.“

Finnur fyrir ótrúlegum stuðningi
„Það er alveg magnað, ég finn fyrir ótrúlegum stuðningi alls staðar frá. Mosó er alltaf mínar æskuslóðir og ég finn fyrir ótrúlega miklum stuðningi þar en svo hef ég búið á fleiri stöðum og hef mótast þar sem karakter og listamaður og ég mun alltaf tengja mig við þá staði líka.
Ég finn fyrir miklum stuðningi frá öllum þessum stöðum, ég er mjög þakklát fyrir það og mér þykir vænt um það.
Ég ætla svo að nota „platformið“ og halda áfram, gefa út meiri tónlist og vera bara duglegri við að koma fram og trúa og treysta á það sem ég er. Þannig að ef einhvern vantar atriði eða tónlistarflutning þá endilega bara hafið samband.
Ég vil enn og aftur þakka kærlega fyrir allan stuðninginn og ég fer hress inn í úrslitakvöldið,“ segir Jóna Margrét glöð í bragði að lokum.