Nanna Björt Ívarsdóttir gefur kost á sér í 5. sæti í prófkjöri sjálfstæðis­manna sem fram fer þann 31. janúar 2026. Nanna Björt er tvítug og stundar nám við lagadeild Háskóla Íslands.

„Ég hef mikinn áhuga á því hvernig samfélagið okkar þróast og hef alltaf haft gaman af því að taka þátt, hlusta og láta rödd mína heyrast þegar kemur að málefnum sem skipta fólk máli. Ég er tilbúin að stíga skrefinu lengra. Ég vil vinna af heilindum með góðu og jákvæðu fólki að því að styrkja Mosfellsbæ enn frekar, hvort sem um er að ræða málefni ungs fólks, tómstundir, félagsmál eða önnur verkefni sem snerta daglegt líf okkar allra. Mosfellsbær er heimilið mitt og framtíð bæjarins er mér hjartans mál.”

Ragnar Bjarni Zoëga Hreiðarsson, hef ákveðið að bjóða mig fram í 4. sæti í prófkjöri Sjálfstæðisflokksins sem fram fer þann 31. janúar 2026.

„Ég geri það af því að ég trúi á bæinn okkar, á samfélagið sem við höfum byggt upp og á að við getum gert það enn betur saman. Á þessu kjörtímabili hef ég tekið virkan þátt í bæjarmálum, starfað sem aðalmaður í umhverfisnefnd, einnig hef ég setið sem varamaður í fræðslunefnd og skipulagsnefnd. Ég hef einnig tekið virkan þátt í starfi ungra kjósenda og var formaður Ungra Sjálfstæðismanna í Mosfellsbæ.

Ég tel það afar mikilvægt að ungt fólk hafi skýra rödd í mótun framtíðar Mosfellsbæjar. Við stöndum frammi fyrir stórum og spennandi verkefnum: Uppbyggingu hverfa, bættri þjónustu, auknum tækifærum fyrir börn, ungmenni og fjölskyldur og ekki síst því að halda áfram að byggja upp öflugt og ábyrgt samfélag þar sem öllum líður vel. Saman gerum við góðan bæ enn betri!“

Magnús Ingi Ingvarsson gefur kost á sér í 6. sæti í prófkjöri Sjálfstæðisflokksins sem fer fram 31. janúar 2026.

Magnús er 32 ára og starfar í dag sem framkvæmdastjóri hjá Þitt öryggi og er einnig formaður Glímufélags Reykjavíkur. Hann er trúlofaður Thelmu Rut Hermannsdóttur og eiga þau saman tvö börn á leik- og grunnskólaaldri.

„Ég hef starfað með fjölbreyttum sviðum innan sveitarfélaga í verkefnum tengdu öryggi, fyrirbyggjandi áætlunum og forvörnum. Ég brenn fyrir málefnum barna og ungmenna og tel ég að kraftar mínir muni nýtast vel í þeim verkefnum sem að framundan eru í okkar frábæra sveitarfélagi.“

Það er óhætt að segja að Mosfellsbær sé umkringdur dásamlegri náttúruparadís, fellin okkar og fjöllin, fossarnir og heiðarnar. Mosfellingar eru duglegir að nýta þessa auðlind hvort sem er gangandi, hlaupandi, hjólandi eða ríðandi út.
Farsælt samstarf hefur verið á milli Mosfellsbæjar og Skátafélagsins Mosverja undanfarin ár um að auðvelda Mosfellingum að nýta sér útivistarsvæði í kringum bæinn til útivistar og gönguferða. Stikaðar hafa verið yfir 90 km af gönguleiðum í kringum Mosfellsbæ.
Á svæðinu eru fjölmargir vegprestar og upplýsinga- og fræðsluskilti. Á þessum skiltum eru staðarheiti, vegalengdir og ýmsar fróðlegar upplýsingar, bæði landfræðilegar og sögulegar. Gönguleiðirnar eru fjölbreyttar og því ættu allir að finna eitthvað við sitt hæfi. Göngukortið má nálgast á vef Mosfellsbæjar, á bókasafninu og í sundlaugunum.

Glaðlegir steinar með spakmælum
Margir göngugarpar hafa orðið varir við skemmtilega nýjung á nokkrum af fellunum okkar. Það eru málaðir steinar í glaðlegum litum með skemmtilegum tilvitnunum. Þessir steinar gleðja og hvetja útivistarfólk. Mosfellingur fór á stúfana í leit að þeim sem væri að koma þessum steinum fyrir. Sú leit skilaði því að það er kona hér í bæ sem er að dunda sér við þetta skemmtilega verkefni, steinakonan kýs að vera nafnlaus og halda áfram að gleðja aðra sem ganga sömu leiðir og hún.
Mosfellingur hvetur alla til að skella sér í fellagöngu til að skoða þessa skemmtilegu steina og þakkar um leið nafnlausu steinakonunni fyrir sitt skemmtilega framlag.

Fyrirtækið Þitt öryggi hefur verið starfandi frá árinu 2020. Eigandi þess og framkvæmdastjóri Magnús Ingi Ingvarsson og starfsfólk hans sérhæfa sig í uppsetningu á öryggisferlum, kennslu í líkamlegum inngripum og bjóða upp á sjálfsvarnarnámskeið fyrir fyrirtæki og stofnanir.
Markmiðið er að veita almenningi þekkingu og færni til að takast á við krefjandi aðstæður sem kunna að koma upp.

Magnús fæddist í Reykjavík 29. ágúst 1993. Foreldrar hans eru Bryndís Björk Karlsdóttir bókari og Ingvar Magnússon húsasmíðameistari og slökkviliðsmaður.
Magnús á fjóra bræður, Garðar Inga f. 1982, Bjarka Þór f. 1986, Arnór Inga f. 1990 og Karl Stefán f. 2000.

Með tóman poka fyrir aflann
„Ég ólst upp í Grafarvogi og það var gott að alast upp þar, ég líki því gjarnan við Mosfellsbæ. Mikið af ungu fólki með börn og nóg um að vera, maður var því sjaldnast heima við.
Mínar uppáhaldsæskuminningar eru þegar við fjölskyldan vorum að ferðast um landið, fara í útilegur og að veiða. Nú geri ég mitt allra besta til þess að gera það sama fyrir börnin mín. En sú minning sem situr kannski sem fastast eru ferðirnar okkar að Djúpavatni í Selvogi. Þar hélt föðurfjölskylda mín ættarmót árlega, alltaf um hvítasunnuhelgina. Þá lagði maður af stað upp að vatni vopnaður veiðistöng og með tóman poka fyrir aflann. Honum var svo skilað fullum þegar maður kom til baka, þá varð ég stoltur,“ segir Magnús Ingi og brosir.

Jaðaríþróttirnar komu sterkar inn
„Ég gekk í Foldaskóla og hafði gaman af því að vera í skólanum en hafði samt takmarkaðan áhuga á náminu. Ég átti alltaf erfitt með einbeitingu í þeim fögum sem fönguðu ekki áhugasvið mitt en skaraði fram úr þeim sem ég hafði áhuga á.
Fyrir mér þá snerist skólinn fyrst og fremst um félagslífið, mér fannst ég aldrei passa í þennan ramma sem allir áttu að vera í.
Ég átti auðvelt með að halda mér uppteknum á sumrin, var mestmegnis eitthvað utandyra að vesenast. Var í jarðvinnu hjá afa og handlangari hjá pabba í smíðinni. Ég lagði samt alltaf mikið kapp á íþróttir, aðallega knattspyrnu en jaðaríþróttirnar komu líka sterkar inn.
Unglingsárin snerust mestmegnis um að hitta misgóðan vinskap og eltast við stelpur.“

Uppskar sigur í öllum sínum bardögum
Eftir útskrift úr Foldaskóla lá leið Magnúsar Inga í íþróttafræði við Fjölbrautaskólann í Breiðholti. Hann hefur einnig komið víða við í módelstörfum, leiklist og áhættuleik og samhliða því ákvað hann að eltast við draum um atvinnumennsku í MMA, bardagaíþrótt sem sameinar tækni úr mismunandi bardagalistum. Magnús þekkti vel til enda búinn að æfa íþróttina í tvö ár en langaði að sjá hvert hann gæti farið með þetta ef hann gæfi sig allan í það.
Árið 2014 var árið sem hann uppskar sigur í öllum sínum bardögum, fjórum talsins og vann alla í fyrstu lotu. Tveimur árum síðar lenti hann í 3. sæti á Evrópumeistaramótinu og í kjölfar mótsins hóf hann feril í atvinnumennsku þar sem hann vann alla sína bardaga í fyrstu lotu. Hann varð Íslandsmeistari í brasílísku jiu jitsui og síðan heimsmeistari viðbragðsaðila í sömu íþrótt 2023 á heimsleikunum í Winnipeg en það var hans síðasta keppni.
Magnús lauk stúdentsprófi frá Keili 2020 og hóf síðan nám í félagsráðgjöf í Háskóla Íslands.

Ef veður og vindar leyfa
Magnús Ingi er trúlofaður Thelmu Rut Hermannsdóttur tannlækni. Þau eiga tvö börn, Hektor Frey f. 2019 og Heru Líf f. 2024.
„Okkur fjölskyldunni þykir fátt skemmtilegra en að fara um landið og skoða fallega staði, eins að fara í útilegur og veiðiferðir. Við förum líka mikið í sund og leggjum kapp á að prófa sem flestar sundlaugar landsins. Eins fer mikill tími í það að fylgja syninum eftir í íþróttum sem er einstaklega gaman. Já, það má eiginlega segja að ef veður og vindar leyfa þá erum við sem minnst heima við.“

Þeir þurftu útrás og utanumhald
Þegar Magnús Ingi var ungur að árum hóf hann störf á frístundaheimili, þar hófst ferill hans að starfa með börnum og ungmennum. Hann var fljótt fenginn til að vinna með drengjum sem þurftu auka útrás og utanumhald. Síðar bættist við þjálfun einstaklinga þannig að um tíma starfaði hann sem þjálfari, stuðningsfulltrúi á virkum dögum og sem dyravörður um helgar.
„Árið 2015 hóf ég störf í Vinakoti búsetukjarna, síðar Klettabæ. Þar starfaði ég sem ráðgjafi og deildarstjóri til ársins 2022. Var síðan fenginn til að stýra námskeiðum vegna hæfni minnar í bardagaíþróttum. Þetta voru gefandi ár en gátu verið erfið á köflum.
Ég ákvað síðan að breyta til og hóf þá störf sem slökkviliðs- og sjúkraflutningamaður og starfaði við það í tvö ár.“

Búa yfir áratuga þekkingu
„Árið 2020 stofnaði ég eigið fyrirtæki, Þitt öryggi. Ég fór í að stýra námskeiðum og gera fyrirbyggjandi áætlanir fyrir búsetukjarna í sjálfsvörn og inngripum en þar var vanþekkingin gríðarleg. Ég var heppinn að hafa aðgengi að frábærum sérfræðingum sem lögðu sitt af mörkum við að aðstoða mig. Þeirra þekking nýttist vel í uppsetningu fyrirbyggjandi áætlana.
Í dag er starfsemin fjölbreytt, við bjóðum upp á hin ýmsu námskeið og fyrirlestra. Við sérhæfum okkur meðal annars í uppsetningu á öryggisferlum, kennslu í líkamlegum inngripum og sjálfsvarnarnámskeið fyrir einstaklinga, fyrirtæki og stofnanir.
Öryggisferlarnir eru í fyrirlestraformi þar sem farið er yfir öryggisatriði, varúðarráðstafanir og notkun á tengslamyndandi nálgun.
Á sjálfsvarnarnámskeiðunum er farið yfir grip og fastatök sem starfsmenn gætu þurft að nýta sér í neyð eða ef til líkamlegra átaka kemur. Námskeiðin eru sérsniðin að hverjum og einum vinnustað fyrir sig. Eins sérhæfum við okkur í að útfæra öryggisferla og námskeið í sjálfsvörn á vinnustað. Umsjónarmenn námskeiðanna búa yfir áratuga þekkingu í félagsþjónustu og sjálfsvörnum.“

Virk í forvarnaverkefnum
„Ég er einnig einn eiganda hjá Reykjavík MMA og starfa þar sem formaður Glímufélags Reykjavíkur. Ég get stoltur sagt frá því að við rekum þar öflugt barna- og ungmennastarf og erum virk í að taka þátt í forvarnaverkefnum með sveitarfélögum og skólum.
Það er bara þannig í lífinu að það þurfa allir að kunna að bregðast við í erfiðum aðstæðum, sama á hvaða aldri maður er. Ef hætta steðjar að þá er betra að kunna réttu handtökin, ekki frjósa, heldur velja sér hlutverk og taka skjótar ákvarðanir,“ segir Magnús Ingi að lokum er við kveðjumst.

Um miðjan október lauk vinnu við að setja upp þau leiktæki sem krakkar í Mosfellsbæ völdu í lýðræðisverkefninu Krakka Mosó.
Nokkrir hressir krakkar tóku sig til í byrjun vikunnar og tóku tækin formlega í notkun en tækin ættu ekki að hafa farið fram hjá krökkum í bænum sem hafa nýtt sér hlýindin í október til að leika sér þar.

Þrjú verkefni kosin til framkvæmda
1) Stór aparóla með upphækkuðum byrjunarpalli sem er hugsuð fyrir eldri börn og unglinga og var sett upp í Ævintýragarðinum.
2) Þrautabraut á vatni við Stekkjarflötina en fyrirmynd hennar er vatnsþrautabrautin í Kjarnaskógi fyrir utan Akureyri og hentar brautin bæði börnum og unglingum.
3) Loks voru sett upp nokkur tæki á leikvelli við Rituhöfða sem eru snúningsróla, klifurgrind, minna snúningstæki og bekkur. Í því verkefni reyndist nauðsynlegt að gera breytingar frá þeirri tillögu sem kosið var um. Í ljós kom að ekki eru lengur fluttar inn til landsins fjögurra arma snúningsrólur en áður en sú breyting var gerð óskaði bæjarráð eftir umsögn ungmennaráðs um hana. Ungmennaráð samþykkti þá breytingu fyrir hönd krakka í Mosfellsbæ. Rólan er ætluð fyrir börn frá sex ára aldri og sameinar hreyfingu, jafnvægi og gleði á skemmtilegan hátt.

997 börn greiddu atkvæði
Krakka Mosó er þátttökulýðræðisverkefni þar sem nemendur á mið- og unglingastigi grunnskóla Mosfellsbæjar settu fram hugmyndir að verkefnum í opnu samráði.
Skólarnir voru með lýðræðisfræðslu og verkefninu lauk með kosningu þar sem 1.179 voru á kjörskrá. Grunnskólar með mið- og unglingastig í Mosfellsbæ eru Kvíslarskóli, Helgafellsskóli, Lágafellsskóli og Varmárskóli og höfðu nemendur þeirra allir færi á að kjósa.
Alls greiddu 997 börn atkvæði, sem er um 85% kjörsókn. Fulltrúar krakkanna stýrðu talningu atkvæða sem fór fram á kjördag þann 20. maí síðastliðinn og var sumarið notað til að framkvæma verkefnin undir styrkri stjórn garðyrkjudeildar Mosfellsbæjar.

Ég skrapp upp á Akranes á laugardaginn. Afturelding hefði getað bjargað sér frá falli úr Bestu deildinni þann dag en fótboltaguðirnir voru ekki með okkur í liði og fall í næstefstu deild er staðreynd. Það þarf yfirleitt nokkrar tilraunir til að komast á toppinn. Víkingur, Breiðablik og Stjarnan hafa ekki alltaf verið á toppnum. Staða þeirra í íslenskum fótbolta í dag byggir á margra ára þrautseigju, vilja, samvinnu og dugnaði. Ef við í Mosfellsbæ viljum komast í þennan góða félagsskap, kvenna– og karlamegin, þurfum við að gera það sama. Halda áfram, bæta við á öllum vígstöðvum, vinna saman og þora að hugsa hátt.

Aðstaða skiptir máli, ekki bara fyrir fótboltann, heldur allar íþróttir og hreyfingu. Góð aðstaða hvetur fólk til dáða, fjallahjólabrautirnar í Ævintýragarðinum eru lítið en mikilvægt dæmi um það. Brautirnar hafa verið mikið notaðar af börnum og unglingum frá opnun og iðkendum fjölgar stöðugt í hjóladeild Aftureldingar.

Hver króna sem sett er í íþróttastarf skilar sér margfalt til baka. Mosfellingurinn Hilmar Ásgeirsson komst að því í BS ritgerð sinni í hagfræði fyrr á árinu að hver króna sem hið opinbera setur í barna- og unglingastarf skilar sér að minnsta kosti tvöfalt til baka fyrir samfélagið vegna þess að það eru minni líkur á lífsstílstengdum sjúkdómum hjá þeim sem æfa reglulega. Ef félagslegi þátturinn er líka tekinn inn í myndina þá aukast margfeldisáhrifin. Sport England gaf út skýrslu árið 2024 sem metur áhrifin fjórföld. Samkvæmt skýrslunni skilar fjárfesting í aðstöðu og stuðningi við alla aldurshópa fjórfalt til baka í samfélagslegum ábata og stórminnkar álagið á heilbrigðis- og velferðarkerfið.

Skagamenn vígðu nýja íþróttahöll á laugardaginn. Glæsileg keppnishöll í fullri stærð með áhorfendaaðstöðu fyrir innanhúsíþróttir sem á daginn þjónar skólum bæjarins. Þessi fjárfesting á alveg örugglega eftir að skila sér margfalt til baka, fyrir samfélagið allt.

Heilsumolar Gaua
Mosfellingur 30. október 2025