Þorrablóti Aftureldingar aflýst

Þorrablót Aftureldingar, sem haldið er í íþróttahúsinu að Varmá, er ein helsta fjáröflun félagsins ár hvert.

Formlega hefur verið ákveðið að hætta við Þorrablót Aftureldingar sem halda átti þann 23. janúar 2021 vegna samkomutakmarkana. Eftir miklar vangaveltur um útfærslur, m.a. rafrænt blót, var hins vegar ákveðið að stefna á risadansleik á vormánuðum svo framarlega sem aðstæður í samfélginu bjóði upp á það. „Við fórum yfir stöðuna nú í byrjun desember þar sem þessar ákvarðanir voru teknar. Við héldum í vonina fram að því að við gætum haldið okkar striki og var búið að ráða bæði hljómsveit og veislustjóra. En í ljósi aðstæðna þá tökum við ekki neina sénsa og vonum að fólk sýni því skilning,“ segir forseti þorrablótsnefndar, Rúnar Bragi Guðlaugsson.