Börnin í forgrunni

Anna Sigríður Guðnadóttir

Meirihluti B-, S- og C-lista í bæjarstjórn Mosfellsbæjar leggur mikla áherslu á málefni barna og ungmenna og fjölskyldna þeirra enda vitum við að það þarf þorp til að ala upp barn.
Eins og komið hefur fram samþykkti bæjarstjórn að setja fram sérstaka aðgerðaáætlun í þágu barna árið 2025. Sú aðgerðaáætlun er einstök í starfi sveitarfélagsins.
Einnig er unnið að innleiðingu hugmyndafræði Barnvæns sveitarfélags ásamt því að sjónum verður sérstaklega beint að börnum í framkvæmd Okkar Mosó árið 2025.

Barnvænt sveitarfélag
Barnvænt sveitarfélag skuldbindur sig til þess að innleiða Barnasáttmála Sameinuðu þjóðanna og vinna markvisst eftir hugmyndafræði hans. Vonir standa til þess að næsta vor ljúki innleiðingarferli og í framhaldinu fái Mosfellsbær viðurkenningu sem Barnvænt sveitarfélag. Innleiðing sáttmálans þýðir að sveitarfélagið noti hann sem viðmið í sínu starfi og að ákvæði hans verði rauður þráður í starfsemi þess.
Segja má að starfsfólk sveitarfélagsins og kjörnir fulltrúar setji upp barnaréttindagleraugu til að rýna alla verk- og ákvarðanatökuferla innan sveitarfélagsins með hliðsjón af sáttmálanum. Þeir grunnþættir sáttmálans sem byggt er á eru þekking á réttindum barna, að ætíð skuli byggja ákvarðanir á því sem barninu sé fyrir bestu, jafnræði allra barna, virðing fyrir skoðunum barna og réttur allra barna til lífs og þroska. Ljóst er að innleiðing hugmyndafræðinnar styður við innleiðingu laga um samþættingu þjónustu í þágu farsældar barna.

Krakka Mosó
Ákvörðun hefur verið tekin um að þátttaka í lýðræðisverkefninu Okkar Mosó verði bundin við börn árið 2025. Sú ákvörðun styður sannarlega við innleiðingu barnvæns sveitarfélags. Útfærsla og framkvæmd kosninganna verður unnin í samstarfi stjórnsýslunnar og skólanna á vormánuðum og verður mjög áhugavert að fylgjast með því verkefni. Krakka Mosó verður spennandi þáttur í að efla lýðræðislega þátttöku barna og skilning á lýðræðislegu ferli.

Börnin okkar
Að síðustu nefni ég til sögunnar aðgerðaáætlunina Börnin okkar sem bæjarstjórn samþykkti að setja 100 milljónir í á árinu 2025. Þetta er viðbótarfjármagn við það margvíslega starf sem sveitarfélagið sinnir nú þegar í þágu barna. Í aðgerðaáætluninni Börnin okkar, sem unnin var í miklu samstarfi hagaðila, er áherslan sett á almennar forvarnir, snemmtækan stuðning við börn og styrkingu barnaverndar.
Ekki þarf að fjölyrða um þá ógnvænlegu þróun sem átt hefur sér stað í íslensku samfélagi og nægir þar að nefna mikla fjölgun tilkynninga á landsvísu um börn sem sýna áhættuhegðun. Þess vegna eru snemmtækur stuðningur og styrking barnaverndar svo mikilvægir þættir í aðgerðaáætluninni.
Sem dæmi um snemmtækan stuðning og almenn forvarnaverkefni má nefna aukið aðgengi að sálfræðiþjónustu og félagslegri ráðgjöf, hækkun frístundaávísunar, lýðheilsuverkefni fyrir unglinga í íþróttahúsum, aukin fræðsla og stuðningur fyrir foreldra, gerð samskiptasáttmála skólasamfélagsins og reglur um snjall­símanotkun á skólatíma svo eitthvað sé talið.
Ef samfélag vill bæta uppeldisskilyrði barna sinna, gera umhverfi þeirra enn þroskavænlegra og já almennt sinna börnum og ungmennum betur þá eru forvarnir af ýmsum toga lykilatriði. Meirihluti B-, S- og C-lista hefur í sínum störfum lagt áherslu á mikilvægi forvarna og eflingu lýðheilsu til að bæta heilbrigði, líðan og aðstæður einstaklinga og hópa. Um þær áherslur hljótum við að vera sammála.

Ég sendi Mosfellingum öllum bestu jólakveðjur og óskir um enn barnvænna nýtt ár 2025.

Anna Sigríður Guðnadóttir
Bæjarfulltrúi Samfylkingarinnar

Nútíma stjórnsýsla

Lovísa Jónsdóttir

Þegar núverandi meirihluti í Mosfellsbæ tók við árið 2022 var fljótlega ákveðið að ráðast í úttekt á stjórnsýslu og rekstri með það fyrir augum að bæta þjónustu við íbúa og gera reksturinn skilvirkari.
Strategía, ráðgjafafyrirtæki sem sérhæfir sig í úttektum og umbótum, framkvæmdi úttektina.
Þar var lagður grunnur að nýju skipulagi þar sem horft var á verkefnin út frá áherslum sveitarfélagsins um að efla þjónustu við bæjarbúa í stækkandi sveitarfélagi. Með nýju skipulagi gafst aukið svigrúm til að skerpa á áherslum varðandi stjórnarhætti, efla áhættu- og árangursmat, samhæfa verkefni á milli sviða og deilda, fylgja eftir umbótum og nýta betur þá tækniþróun sem hefur orðið í samfélaginu.
Nýtt svið, menningar-, íþrótta- og lýðheilsusvið, var sett á laggirnar auk skrifstofu umbóta og þróunar en þjónustu- og samskiptadeild var lögð niður.
Undir skrifstofu umbóta og þróunar falla verkefni tengd stafrænni umbreytingu, upplýsingatækni, upplýsingamiðlun, tölfræði og greiningu, sem og innleiðing helstu umbótatillagna sem voru lagðar til í áðurnefndri rekstrarúttekt.

Valdimar Birgisson

Alls komu fram yfir 70 umbótatillögur í rekstrarúttekt Strategíu sem verið er að innleiða eða verða innleiddar.
Ein af umbótatillögunum var um úttekt á rekstri upplýsingatæknimála Mosfellsbæjar en hún leiddi í ljós að þörf var á talsverðum endurbótum á því sviði. Meðal annars sameining rekstrarumhverfis upplýsingatæknimál í eitt en þau eru fjögur í dag.
Þá hefur verið farið í umfangsmikla vinnu við innleiðingu á stafrænum lausnum en frá ársbyrjun 2023 hafa 33 stafrænar lausnir verið innleiddar, þar af er 27 verkefnum að fullu lokið.
Þessi vinna heldur áfram því hún hefur sýnt að umbóta er þörf. Vinnan fer að mestu leyti fram á bak við tjöldin, vinna sem sést kannski ekki en bætir þjónustuna við bæjarbúa og sparar kostnað til lengri tíma.
Í þessum skipulagsbreytingum hefur verið lögð áhersla á að fjölga ekki stöðugildum að óþörfu. Markmiðið er skilvirkari stjórnsýsla og betri þjónusta við Mosfellinga.

Lovísa Jónsdóttir
Valdimar Birgisson

Fjárhagsáætlun Mosfellsbæjar 2025

Ásgeir Sveinsson

Meirihluti Framsóknar, Samfylkingar og Viðreisnar hefur samþykkt fjárhagsáætlun Mosfellsbæjar fyrir árið 2025. Áætlunin er vel unnin af starfsfólki Mosfellsbæjar og framsetning á gögnum skýr og vel sett fram.
Það er margt gott í áætluninni, og í mörgum tilfellum er ágæt samstaða í bæjarstjórn um hvaða verkefni eigi að setja í vinnslu í okkar góða bæjarfélagi.
Lögbundin þjónusta og kostnaður við hana hefur aukist jafn og þétt undanfarin ár og sú þróun heldur áfram og er það áskorun í rekstri sveitarfélaga. Fulltrúar D-lista í bæjarstjórn benda annað árið í röð við gerð fjárhagsáætlunar á að það eru gul og jafnvel rauð blikkandi ljós í fjármálum bæjarins sem þarf að gefa gaum og bregðast við að okkar mati.

Aukin lántaka og hækkun á sköttum og álögum
Það sem einkennir fjárhagsáætlun ársins 2025 er stór og víðtæk framkvæmdaáætlun og miklar fjárfestingar sem kalla á háar lántökur sem hækka skuldahlutfall sveitarfélagsins enn meira í efnahagsumhverfi sem er mjög óhagstætt.
Á næsta ári mun Mosfellsbær taka hæsta lán sem bærinn hefur tekið á einu ári og er það mjög dýrt fyrir skattgreiðendur í Mosfellsbæ í því vaxtaumhverfi sem nú ríkir.
Þetta gerist á sama tíma og tekjur bæjarins hafa aukist mikið m.a. vegna hækkunar útsvars og skatta og álaga á íbúa, auk þess sem tekjur af lóðasölu og byggingarréttargjöldum hafa numið 1.700 milljónum frá því nýr meirihluti tók við rekstri bæjarins.
Auk aukinnar lántöku til að mæta auknum útgjöldum munu skattar og álögur á bæjarbúa halda áfram að hækka.
Má þar nefna að skattprósenta fasteignaskatta mun hækka í 0,20 % og er sú prósenta mun hærri en þekkist í öðrum sveitarfélögum á höfuðborgarsvæðinu sem hafa verið að lækka sína fasteignaskattsprósentu fyrir utan Reykjavík. Þessi hækkun skattprósentu kemur ofan í miklar hækkanir á fasteignasköttum undanfarin tvö ár sem allir fasteignaeigendur og rekstraraðilar fyrirtækja í Mosfellsbæ hafa rækilega fundið fyrir.

Rekstrarniðurstaða A-hluta bæjarsjóðs fyrir árið 2025 samkvæmt áætlun er mínus 41 milljón þegar búið er að taka frá einskiptistekjur sem koma frá lóðasölu og byggingaréttargjöldum. Það er ekki ásættanleg niðurstaða og sýnir að rekstur bæjarins er ósjálbær.

Endurskoða þarf áætlanir og minka þarf kostnað
Fulltrúum meirihlutans er tíðrætt um erfitt efnahagsástand og að fjárhagsstaða Mosfellsbæjar sé erfið, en þrátt fyrir það eru engar tillögur í fjárhagsáætlun bæjarins fyrir árið 2025 um aðhald eða sparnað. Til að allrar sanngirni sé gætt þá skal tekið fram að það er erfitt að hægja á eða hætta við framkvæmdir sem eru í miðjum klíðum, svo sem byggingu leikskóla og íþróttahúss í Helgafelli, framkvæmdir við uppbyggingu við íþróttasvæðið að Varmá o.fl. framkvæmdir.
Það er samt nauðsynlegt miðað við að vaxtastig og verðbólga hafa verið mun hærri og langvinnari en gert var ráð fyrir og staða og þróun efnahagsmála er enn mjög óljós að skoða gaumgæfilega fyrri áætlanir og rýna hvar hægt er að draga saman og minka útgjöld.

Það er að okkar mati fulltrúa D-lista í bæjarstjórn ekki hægt keyra áfram fyrri áætlanir m.a. kostnaðarsamar breytingar í stjórnkerfi bæjarins sem eru meðan aðstæður í efnhagsmálum eru eins erfiðar og raun ber vitni.
Það þarf að sýna mikla ábyrgð í fjármálastjórnun og rekstri, forgangsraða rétt og gera raunhæfar áætlanir bæði á tekju- og útgjaldahliðum í þessu umhverfi.
Í rekstri ört stækkandi sveitarfélags eins og Mosfellbæjar, þarf öflugan samheldinn og ábyrgan meirihluta, sem er vel inni í málum og þorir að taka erfiðar pólitískar ákvarðanir og standa með þeim.
Bæjarfulltrúar D-lista í Mosfellsbæ munu áfram styðja tillögur meirihlutans sem við teljum skynsamlegar og góðar, og halda áfram að koma okkar tillögum og stefnumálum á framfæri og leggja þannig okkar af mörkum til að áfram verði best að búa í Mosfellbæ.
Ég sendi Mosfellingum öllum bestu óskir um gleðileg jól og farsælt komandi ár.

Ásgeir Sveinsson
Bæjarfulltrúi
Oddviti D-lista

Breytum þessu

Valdimar Birgisson

Við stöndum nú á tímamótum. Alþingiskosningarnar þann 30. nóvember 2024 munu marka stefnuna fyrir framtíð landsins og þar býður Viðreisn upp á skýra, raunhæfa og framsækna stefnu fyrir samfélag þar sem frelsi, jöfnuður og ábyrg hagstjórn eru í fyrirrúmi.
Nú er kominn tími til að taka á helstu áskorunum okkar með alvöru lausnum. Það er kominn tími til að breyta.

Alvöru hagstjórn til að ná niður verðbólgu
Verðbólga hefur leikið íslenskan almenning grátt síðustu misseri. Hún étur upp kaupmátt og veldur óstöðugleika í efnahagslífi heimilanna og fyrirtækja með háum vöxtum sem eru fylgikvilli verðbólgunnar.
Viðreisn leggur áherslu á stöðugleika. Með ábyrgri hagstjórn getum við dregið úr verðbólgu og tryggt jafnvægi í efnahagslífinu. Við viljum lækka verðbólgu og vexti, greiða niður skuldir og minnka vaxtabyrði ríkisins með því að leggja áherslu á að fara betur með opinbert fé með því að fækka stofnunum og verkefnum þeirra.

Líðan barna og ungmenna í forgang
Félagsleg staða barna og ungmenna hefur versnað á undanförnum árum, og margar fjölskyldur glíma við erfiðleika. Viðreisn vill auka aðgengi að sálfræðiþjónustu í skólum, styðja betur við fjölskyldur og tryggja að börn fái að njóta öryggis og stuðnings sem þau þurfa til að blómstra.
Mikilvægasta verkefni hvers samfélags er að tryggja velferð næstu kynslóðar.

Lausnir í húsnæðismálum
Viðreisn vill stuðla að raunverulegum lausnum í húsnæðismálum sem hjálpa ungu fólki og fjölskyldum að koma sér þaki yfir höfuðið. Við viljum framlengja heimild til að nýta séreignarsparnað sem innborgun á húsnæðislán, losa ríkisjarðir fyrir húsnæðisuppbyggingu og einfalda reglugerðir til að flýta byggingu og lækka kostnað.

Stöndum vörð um frelsi einstaklingsins
Frelsi einstaklingsins gagnvart ríkinu er grunnstoð í stefnu Viðreisnar. Frelsi til þess að elska og lifa lífinu án afskipta hins opinbera, frelsi kvenna til að ráða yfir sínum líkama, atvinnufrelsi og frelsi til að vera eins og hver og einn kýs eru okkar leiðarljós.
Ríkið á ekki að skipta sér af því hvað við skírum börnin okkar eða hvern við elskum. Við viljum samfélag þar sem einstaklingar fá að njóta sín og hafa val um hvernig þeir lifa lífi sínu, án óþarfa inngripa ríkisins.

Kosningarnar 30. nóvember eru tækifæri til að velja stefnu sem skilar raunverulegum breytingum. Við í Viðreisn trúum því að saman getum við gert Ísland að landi þar sem lífsgæði, réttlæti og framtíðarsýn eru í fyrirrúmi. Nú er tíminn til að breyta með því að kjósa Viðreisn.

Valdimar Birgisson

Opnun jólatrjáasölu Skógræktarfélags Mosfellsbæjar

Björn Traustason

Jólatrjáasala Skógræktarfélags Mosfellsbæjar opnar sunnudaginn 8. desember klukkan 13-14. Fyrsta tréð verður sagað, harmonikkuleikur mun óma um skóginn, Álafosskórinn mun syngja nokkur lög og að sjálfsögðu munu jólasveinar mæta í skóginn.
Skógræktarfélag Mosfellsbæjar verður 70 ára á næsta ári, en félagið var stofnað árið 1955 af Kvenfélagi Lágafellssóknar, Ungmennafélaginu Aftureldingu og Skógræktarfélagi Skáta við Hafravatn. Mikið vatn hefur runnið til sjávar síðan félagið var stofnað og mörg svæði innan Mosfellsbæjar orðin skógi vaxin. Á tíma Guðrúnar Hafsteinsdóttur, sem var formaður frá 1983 til 2003, bættust fjölmörg svæði við og þar má nefna Æsustaðahlíð, Þormóðsdal, Lágafell, Norður-Reyki, Helgafell og Úlfarsfell gegnt Skarhólabraut. Þetta eru svæði sem eru orðin útivistarsvæði Mosfellinga og munu verða um ókomin ár.
Fyrsta skógræktarsvæði Skógræktarfélags Mosfellsbæjar var í Hamrahlíð við Vesturlandsveg, en þar hófust gróðursetningar árið 1957. Það þýðir að elstu trén í Hamrahlíðarskóginum nálgast 70 árin og eru þau hæstu komin yfir 22 metra hæð.
Hamrahlíðarskógurinn samanstendur af fjölmörgum trjátegundum en þær algengustu eru sitkagreni, stafafura og blágreni, en einnig er nokkuð um birki, lerki og fleiri trjátegundir. Eins og Mosfellingar þekkja er þetta orðið eitt af bestu og fjölsóttustu útivistarsvæðum höfuðborgarsvæðisins og þó víðar væri leitað. Í Hamrahlíðarskóginum eru fjölmargar gönguleiðir sem tengjast svo við hina ýmsu göngustíga sem liggja um Úlfarsfellið þvert og endilangt. Það er einmitt á þessu svæði félagsins þar sem jólatrjáasala Skógræktarfélagsins er staðsett.
Heimsókn í skóginn til að næla sér í jólatré er orðinn fastur liður í undirbúningi jólanna hjá fjölmörgum Mosfellingum og nærsveitungum. Eins og áður gefst fólki bæði kostur á að sækja sér jólatré í skóginn, en það er fátt sem toppar það að finna hið eina sanna jólatré með sög í hönd og finna jólaandann færast yfir sig. Svo er einnig afar vinsælt að heimsækja rjóðrið okkar og kanna úrvalið af þeim trjám sem koma úr skógum Skógræktarfélagsins. Í rjóðrinu ríkir mikill jólaandi enda er þar góð lýsing og svo er alltaf skjól í skóginum.

Björn Traustason
Formaður Skógræktarfélags Mosfellsbæjar

Samningar byggja á samvinnu

Willum Þór Þórsson

Til þess að tryggja jafnt tímanlegt aðgengi að heilbrigðisþjónustu óháð efnahag og búsetu er mikilvægt að semja um alla nauðsynlega heilbrigðisþjónustu.
Án samninga við stofnanir og fagfólk er hætta á að tekjulægri hópar neyðist til að neita sér um nauðsynlega þjónustu. Samningar gefa okkur jafnframt frekari tækifæri til að skipuleggja þjónustuna heildstætt, tryggja samfellu og stuðla að bættum gæðum og öryggi.

Samningar við sérfræðilækna
Búið er að semja við sérfræðilækna til fimm ára sem batt enda á langt samningsleysi með ofangreindum neikvæðum afleiðingum. Samningurinn tryggir aukna greiðsluþátttöku og sparar heimilunum um það bil 3 milljarða á ári. Samningnum er jafnframt ætlað að styðja við framþróun í þjónustu sérfræðilækna með sérstakri áherslu á nýsköpun, stafræna þróun og fjarheilbrigðisþjónustu til að gera hana aðgengilegri óháð búsetu.

Samið við sjúkraþjálfara
Í kjölfarið tókust samningar við sjúkraþjálfara til fimm ára sem einnig höfðu verið samningslausir í lengri tíma með framangreindu óhagræði. Með samningnum lækkaði kostnaður þeirra sem sækja sér þjónustuna og öll aukagjöld sem lögð höfðu verið á þjónustuþega felld niður.
Þjónusta sjúkraþjálfara er okkur mikilvæg og umfangsmikil en rúmlega 62.000 einstaklingar nýttu þjónustu sjúkraþjálfara í fyrra. Við þekkjum það hversu mikilvægu hlutverki sjúkraþjálfarar gegna á mjög víðtæku sviði endurhæfingar. Ljóst er að bætt aðgengi að þjónustu sjúkraþjálfara dregur úr álagi annars staðar í heilbrigðiskerfinu og hefur jákvæð áhrif á fjölda Íslendinga.

Samningur við tannlækna og tannréttingasérfræðinga
Það voru ánægjuleg tímamót þegar fyrsti heildarsamningur um tannlækningar var undirritaður. Samningurinn tryggir greiðsluþátttöku hjá tannlæknum fyrir börn, aldraða og öryrkja til næstu fimm ára en einnig fjölgaði meðferðum sem greiddar eru af Sjúkratryggingum.
Samhliða samning um tannlækningar þá var gerður tímamótasamningur um tannréttingar og þjónustu tannréttingasérfræðinga. Samningurinn er sá fyrsti sem gerður er um þjónustuna hér á landi og fól m.a. í sér nær þreföldun á styrk vegna almennra tannréttinga. Með samningnum hækkuðu styrkir til tannréttinga úr 150.000 kr í 430.000 kr. sem leiðir af sér aukið og jafnara aðgengi að þjónustunni, óháð efnahag.

Lýðheilsutengdar aðgerðir
Búið er að ljúka samningsgerð vegna lýðheilsutengdra aðgerða. Samningarnir gilda til áramóta en áfram er unnið að samningum til lengri tíma. Lýðheilsutengdar aðgerðir eru aðgerðir sem teljast ekki til bráðaaðgerða heldur eru valkvæðar þannig að hægt er að skipuleggja þær fram í tímann, s.s. liðskiptiaðgerðir á hné og mjöðm, kviðsjáraðgerðir vegna endómetríósu, bakaðgerðir vegna brjóskloss og þrenginga í mænugöngum og augasteinsaðgerðir.
Þessar aðgerðir eiga það sammerkt að geta komið einstaklingum aftur til heilsu og í samfélagslega virkni, og það er verðugt takmark í sjálfu sér. Það eru sameiginlegir hagsmunir samfélagsins, bæði efnahagslegir og félagslegir, að tryggja tímanlegt aðgengi að slíkri þjónustu sem veitt er á réttu þjónustustigi og styður við virkni einstaklingsins í samfélaginu.
Samhliða auknum afköstum og auknu aðgengi að þjónustunni innan íslenska heilbrigðiskerfisins hefur t.a.m. þeim sem leitað hafa út fyrir landsteinana í liðskiptaaðgerð, á grundvelli biðtímaákvæðis EES-samningsins um heilbrigðisþjónustu yfir landamæri, fækkað um rúmlega helming. Það er jákvæð þróun í samhengi við áherslur okkar í Framsókn um skilvirkni og hagkvæmni.

Þessir samningar skipta máli
Íslenska heilbrigðiskerfið byggir á félagslegum grunni þar sem jafnt aðgengi allra landsmanna að heilbrigðisþjónustu, óháð efnahag eða búsetu, er tryggt og um það ríkir samstaða í íslensku samfélagi. Það er og hefur verið stefna Framsóknar að lækka greiðsluþátttöku almennings vegna heilbrigðisþjónustu og tryggja jafnt og tímanlegt aðgengi. Með samningum sköpum við faglega umgjörð um heilbrigðisþjónustu á sama tíma og við tryggjum jafnræði í aðgengi að henni.

Willum Þór Þórsson,
heilbrigðisráðherra og oddviti Framsóknar í Suðvesturkjördæmi

Kæri Mosfellingur

Bryndís Haraldsdóttir

Ég hef verið þess heiðurs aðnjótandi að fá að vinna fyrir þig síðustu ár, fyrst sem bæjarfulltrúi og seinna sem þingmaður. Nú er komið að kosningum og ég legg störf mín í þinn dóm.

Árangur fyrir okkur öll
Á þessu kjörtímabili hef ég verið formaður allsherjar- og menntamálanefndar ásamt því að hafa setið bæði í fjárlaganefnd og velferðarnefnd. Í allsherjar- og menntamálanefnd höfum við afgreitt ýmis mál. Þar ber að mínu mati hæst þær mikilvægu breytingar sem gerðar voru á útlendingalögum, breytingar sem gengu út á að styrkja kerfið og færa það til samræmis við kerfin á hinum Norðurlöndunum. Þá samþykktum við jafnframt breytingar á lögreglulögum, breytingar sem styrkja lögregluna í störfum sínum, einkum og sér í lagi gegn skipulagðri glæpastarfsemi.
Ég er ekki síður stolt af þeim lögum sem við samþykktum um miðstöð menntunar og skólaþjónustu. Miðstöðin verður lykilstofnun fyrir skóla landsins en þar er, meðal annars, verið að þróa samræmd hæfniviðmið. Slík viðmið eru auðvitað ein grundvallarforsenda öflugs skólakerfis og veita nauðsynlegar upplýsingar um það hvar börnin okkar standa. Þau veita okkur innsýn í styrkleika barnanna, hvar þau blómstra, og hverju megi hlúa betur að.
Auk þessa hef ég sjálf lagt fram ófá mál á Alþingi, mál sem ég tel samfélaginu öllu til bóta, sum stór, önnur smærri, en öll nauðsynleg. Þar á meðal eru mál um dánaraðstoð, um að gefa dreifingu ösku frjálsa og um að setja Sundabraut strax í einkaframkvæmd, svo fátt eitt sé nefnt.
Þótt árangur hafi náðst í mörgum málum eru sum ekki komin jafn langt og ég myndi helst hafa kosið. Það er til dæmis löngu orðið tímabært að ráðast í alvöru umbætur á samgöngukerfi höfuðborgarsvæðisins. Ég hef þess vegna verið mikill stuðningsmaður höfuðborgarsáttmálans. Við Mosfellingar þekkjum það enda af eigin raun hversu mikill tími fer í ferðir á milli staða. Slíkt gengur ekki til lengdar. Við þurfum að bretta upp ermar og ráðast í þær samgöngubætur sem þörf er á ekki seinna en strax.

Hvers vegna er ég Sjálfstæðismaður?
Á laugardag eru kosningar. Úrslit þeirra munu ráða hvert við stefnum sem samfélag á næstu árum.
Sjálfstæðisflokkurinn vill létta undir með heimilum landsins, það gerum við með hagræðingu í ríkisrekstri, lægri sköttum, minni verðbólgu og lægri vöxtum.
Jöfn tækifæri allra eru forsenda framfara og velferðar. Þjóðir sem ná árangri í menntamálum búa við fleiri tækifæri og betri lífskjör. Þess vegna boðar Sjálfstæðisflokkurinn stórsókn og umbreytingu á menntakerfinu.
Sjálfstæðisflokkurinn vill heilbrigðisþjónustu fyrir fólkið en ekki kerfið, þar sem þjónusta er veitt tímanlega og er aðgengileg öllum óháð efnahag. Sjálfstæðisflokkurinn vill aukna nýsköpun og fjölbreyttari rekstrarform sem stuðlar að betri þjónustu.
Sjálfstæðisflokkurinn stendur vörð um séreignarstefnuna og ætlar að ryðja í burtu hindrunum sem standa í vegi fyrir því að einstaklingar geti eignast eigið húsnæði. Í því felst að byggt verði hraðar, meira og hagkvæmar. Það gagnast jafnt þeim sem vilja eiga og leigja.
Öflugt atvinnulíf er forsenda framfara og undirstaða velferðar. Sjálfstæðisflokkurinn vill að það sé eftirsóknarvert að stofna og reka fyrirtæki á Íslandi. Til þess þarf að tryggja stöðugleika, hóflega skattheimtu og einfalt regluverk.

Sjálfstæðisflokkurinn vill verja fullveldi, sjálfstæði og öryggi þjóðarinnar og tryggja enn frekar efnahagslegt sjálfstæði landsins með frjálsum viðskiptum og greiðum aðgangi að alþjóðamörkuðum. Við viljum ekki ganga í ESB enda er hag íslensku þjóðarinnar betur borgið utan Evrópusambandsins.
Ég vil meiri árangur fyrir okkur öll. Þess vegna er ég Sjálfstæðismaður.

Bryndís Haraldsdóttir
Þingmaður Sjálfstæðisflokksins
Meiri árangur fyrir okkur öll
Settu X við D á kjördag

Með enga menn og engin vopn?

Vala Garðarsdóttir

Við í Framsókn verðum seint vænd um það að sitja með hendur í skauti. Í 108 ár hefur Framsókn unnið að velferð og framförum okkar allra, óþreytandi og óslítandi sama hvernig á okkur viðrar.
Stjórnarsamstarfið, síðasta misserið áður en Sjálfstæðisflokkurinn ákvað upp á sitt einsdæmi að sprengja ríkisstjórnina, var oft erfitt.
Við héldum þó ótrauð áfram að berjast fyrir okkar hjartans málum, að styrkja fjölskyldur, börnin okkar, heilsuna og öryggi fólks í lífi og starfi enda er sú barátta hryggjarstykkið í hugsjón Framsóknar og þar gefum við engan afslátt. Þetta er okkur mikilvægast.
Að því sögðu verður að segjast að undanfarnar vikur hafa verið okkur þungur róður, óánægja fólks á liðnu stjórnarsamstarfi og ítrekaðar atlögur að flokknum af hálfu stjórnarandstöðunnar þar sem sannleikurinn virðist með öllu virtur að vettugi er erfitt að kyngja og ómögulegt að berjast við í því fjaðrafoki sem á sér stað þessar vikurnar.
En hvað ætlum við að gera?
Við stöndum berskjölduð frammi fyrir alþjóð-
Hálfnakin en þó með þá óbilandi trú að okkar trausta bakland og skynsemi fólks sjái hvað það er sem raunverulega skiptir samfélagið máli.
Við erum eins og sagt er, með fáa menn og engin vopn, en einmitt á slíkum stundum afhjúpast úr hverju maður er gerður og þá skiptir liðsheildin öllu máli.

Framtíðin
Framsókn mun halda áfram að setja fjölskylduna í forgang, bæta lífsgæði okkar allra og hugsa um heildina og sérstaklega velferð þeirra sem minnst mega sín og þurfa á mestri hjálp að halda. Það er okkar leiðarljós. Allt annað kemur samhliða þeim vexti.
Góðar og skilvirkar samgöngur eru nauðsynlegar og skipta okkur miklu máli og okkur Mosfellinga sérstaklega, við þurfum einfaldar og skjótar aðgerðir sem eru vel framkvæmanlegar og fyrir því munum við berjast.
Við viljum frelsi í fæðingarorlofi, að fjölskyldur hafi val um það hvernig þær ráðstafa sínum rétti og afnema allar eyrnamerkingar á þeim ráðahag, að auki viljum við hækka launin og lengja samverutímann upp í 20 mánuði.
Þetta er vel gerlegt og við sem þjóð höfum efni á því að stórbæta kerfið því ávinningurinn er ekki alltaf mældur í krónum og aurum heldur því sem mikilvægast er, andleg heilsa og öryggi barnanna okkar.
Forvarnir skipta að sama skapi gríðarlega miklu máli, að andleg og líkamleg heilsa sé á oddinum í okkar daglega lífi, hvort sem er í skólakerfinu, heilbrigðiskerfinu, á vinnumarkaðinum eða í félags- og tómstundastarfi, að styrkja kerfisbundið okkar heilbrigði og fylgja því eftir um aldur og ævi er besta fjárfesting sem við gerum, ekki bara fyrir okkur sjálf heldur fyrir allt samfélagið.
Við þurfum lægri skatta, aukna verðmætasköpun svo við höfum efni á þessu öllu saman og það er vel gerlegt og við treystum okkur best í það verkefni. Það bíða okkar verk eins og virkjanir, samgöngubætur, styrking löggæslu og það sem brýnast er, að bæta vinnuumhverfi kennaranna okkar og allra þeirra sem eru að hugsa um börnin okkar. Við getum þetta saman!

Ég segi meiri samvinna, meiri umhyggja,
meiri Framsókn.

Vala Garðarsdóttir
Mosfellingur og fornleifafræðingur
Skipar 3. sæti Framsóknar í Suðvesturkjördæmi.

Tillögur til fjárhags­áætlanagerðar

Dagný Kristinsdóttir

Í lok hvers árs þarf að horfa fram á veginn og leggja drög að því hvernig verja skuli því fjármagni sem skilar sér til sveitarfélagsins í formi útsvars og gjalda.
Vinir Mosfellsbæjar hafa lagt fram fimm tillögur til fjárhagsáætlanagerðar.

Námssjóður
Sú fyrsta er tillaga að stofnun námssjóðs fyrir starfsfólk sveitarfélagsins. Hugmyndin vaknaði í umræðu um fólkið okkar sem sinnir lægst launuðustu störfunum og er með litla menntun að baki.
Hugsunin er sú að sjóðurinn verði hvatning fyrir starfsfólk til að sækja sér menntun og jafnvel geri fólki það kleift.

Fjármálaráðgjafar fyrir skólastjórnendur
Grunnskólar bæjarins eiga það sameiginlegt að vera fjölmennir og stórir. Auknar kröfur eru á hendur skólastjórnenda um að vera faglegir leiðtogar og reka óaðfinnanlega skóla. Þeir eiga að vera sýnilegir, tengjast starfsmönnum, nemendum, foreldrum og samfélaginu og innleiða nýjar stefnur. Til að okkar stjórnendur geti staðið undir þeim kröfum sem gerðar eru til þeirra þurfum við að skapa þeim svigrúm til þess.
Góður stuðningur af hálfu sveitarfélags við skólastjórnendur sína er að veita þeim stuðning í fjármálum. Að þeir hafi fjármálaráðgjafa sem getur tekið saman upplýsingar um stöðu fjármála, hver staðan á stöðuhlutföllum í skólanum sé og geti veitt ráðleggingu er gríðarlega mikilvægt.
Með því aukast líkur og skilningur á að skóli standist fjárveitingar eða hljóti aukafjárheimildir eftir því sem nauðsynlegt er. Eins fæst yfirsýn yfir það hvernig fjármunum er varið sem getur aukið skilvirkni og er í takti við nýlega samþykkt um úttekt á upplýsingatæknimálum.

Almenningssamgöngur
Vinir Mosfellsbæjar leggja til að Mosfellsbær taki forystu í að efla almenningssamgöngur sem raunhæfan valkost og legga til þrjár tillögur þar að lútandi.
Tillaga 1: Lagt er til að leið 15 verði gerð að borgarlínuhraðstrætó til að stytta eins og kostur er ferðatíma milli Mosfellsbæjar og Reykjavíkur.
Tillaga 2: Lagt er til að settur verður á laggirnar innanbæjarstrætó sem keyrir á 15 mínútna fresti eftir leiðum sem tengja hverfi Mosfellsbæjar og koma þannig í staðinn fyrir þann hluta af núverandi leið 15 sem tillaga 1 tekur til, sem og núverandi leið 7. Innanbæjarstrætó fæðir jafnframt hraðstrætó númer 15 farþegum sem halda áfram út fyrir bæjarmörkin.
Tillaga 3: Lagt er til að frítt verði í strætó fyrir börn í 7.-10. bekki grunnskóla bæjarins (12-16 ára) sem eiga lögheimili í sveitarfélaginu. Eins er lagt til að Mosfellsbær hvetji jafnframt eldri ungmenni til notkunar almenningssamgangna með því að tryggja 50% niðurgreiðslu á Nemakorti strætó til 18 ára aldurs.

Þessar tillögur eru lagðar fram í ljósi þess að langt er í að borgarlínan komi í bæinn. Breytingar á rótgrónum venjum og hugarfari taka langan tíma og því ekki til neins að bíða ef tryggja á að þær gríðarlegu fjárfestingar sem borgarlínan kallar á skili fullum ávinningi þegar þeim lýkur.
Við förum úr því að reka lestina í það að draga vagninn og bjóða upp á samtalið um breytta tíma.

Dagný Kristinsdóttir
Bæjarfulltrúi Vina Mosfellsbæjar

Veldu leið sem virkar

Bjarni Benediktsson

Nú renna upp síðustu klukkustundir kosningabaráttunnar. Á laugardaginn er kosið milli tveggja leiða.
Annars vegar Reykjavíkur­módelsins, undir forystu flokkanna sem þar leiða. Hins vegar leiðar okkar sjálfstæðismanna, sem hefur endurspeglast í rekstri sveitarfélaganna í Suðvesturkjördæmi.

Kosningarnar fara ekki fram í neinu venjulegu árferði. Segja má að nú renni upp eins konar ögurstund fyrir íslenskt samfélag. Klára þarf verkefnið að ná niður verðbólgu og vöxtum. Fyrstu skrefin hafa verið stigin og ef við höldum áfram á réttri leið munu verðbólga og vextir lækka hratt á næsta ári. Það er langstærsta hagsmunamál heimila og fyrirtækja á Íslandi.

Fyrir unga …
Sumir segja að ég tali of mikið um fortíðina, þylji upp iðagrænar hagtölur og reifi gamla sigra. Stundum er nokkuð til í því, en við megum þó aldrei gleyma þeim árangri sem hefur náðst, vegna þess að á honum byggjum við. Við megum ekki kaupa heimsmynd þeirra sem stöðugt selja einhvers konar niðurrifsmynd af samfélaginu okkar. Við höfum lækkað skatta, hagur fólks hefur heilt yfir vænkast ár frá ári, nýjar atvinnugreinar vaxið hratt og Ísland orðið stærra og meira spennandi á alla vegu.

Með þessu er hins vegar ekki sagt að allt sé fullkomið, frekar en annars staðar, og nú verður að horfa til framtíðar. Fæðingartíðni fer lækkandi og við höfum áhyggjur af stöðu ungs fólks á húsnæðismarkaði. Við þessu þarf að bregðast og stuðla að því að ungt fólk hafi trú á Íslandi og vilji stofna hér fjölskyldu. Til þess viljum við meðal annars veita foreldrum barna að þriggja ára aldri skattaafslátt og efla fæðingarorlofskerfið enn frekar.
Það mikilvægasta er svo að tækifærin séu til staðar – að hér verði til eftirsóknarverð störf á fjölbreyttum sviðum. Á húsnæðismarkaði þarf að einfalda skipulagsferli og regluverk, auk þess að skylda sveitarfélög til að tryggja nægt lóðaframboð. Það gengur ekki að höfuðborgin reki stöðugt lestina í þeim efnum. Samhliða þarf að afnema óþarfa þröskulda á borð við stimpilgjöld og efla séreignarleiðina enn frekar, sem hefur hjálpað tugum þúsunda íslenskra fjölskyldna að eignast eigið húsnæði.

… sem aldna
Við heyrum sömuleiðis eðlilegt ákall um að styðja enn betur við fólk á seinni hluta æviskeiðsins. Fólkið sem byggði upp landið okkar og lagði hér grunn að lífskjörum sem eru með þeim bestu í heiminum á skilið áhyggjulaust ævikvöld. Hér á að vera gott að eldast.
Við viljum sveigjanlegri starfslok og ætlum að hækka frítekjumörk ellilífeyris. Þar munar mestu um frítekjumark atvinnutekna – ekkert hjálpar fólki meira en að gera því kleift að hjálpa sér sjálft. Nýta verður tækifærin í nýju fyrirkomulagi við uppbyggingu hjúkrunarheimila, en það er ekki síður mikilvægt að veita betri þjónustu svo fólk geti búið lengur á sínu eigin heimili.

Taktískar kosningar
Það er skiljanlegt að margir kalli eftir breytingum við kosningar. Hins vegar er mikilvægt að þær breytingar felist ekki í kollsteypum fólks sem við þekkjum alltof vel af vettvangi Reykjavíkurstjórnarinnar, sem nú vill einnig taka við taumunum á landsvísu.

Þær breytingar sem mestu skipta að mínu mati eru þessar: Lægri álögur á fólk og fyrirtæki, fleiri tækifæri fyrir fólk til að blómstra og bæta hag sinn á sínum eigin forsendum, opinber þjónusta þar sem lausnirnar fæðast úti í samfélaginu – ekki eingöngu á forsendum ríkisins.

Til að koma þessum breytingum til leiðar þarf að kjósa taktískt, og eina taktíska kosningin í þeim efnum er stærri Sjálfstæðis­flokkur.

Bjarni Benediktsson
forsætisráðherra og formaður Sjálfstæðisflokksins

Hverjum treystið þið?

Elín Anna Gísladóttir

Á laugardaginn er komið að kosningum til Alþingis. Þá kemur í ljós hverjum þjóðin treystir til þess að leiða íslenskt samfélag inn í framtíðina.
Við í Viðreisn höfum verið í samtali við kjósendur um allt land þar sem við höfum lagt okkur fram um að hlusta á hvað það er sem brennur á fólki.
Þar kemur skýrt í ljós að fólk er orðið langþreytt á því að kerfin okkar eru brotin, margir eiga erfitt með að ná endum saman, matarkarfan hækkar og hækkar, ungt fólk sér fyrir sér betri framtíð annars staðar en á Íslandi, kennarar eru langþreyttir á erfiðri stöðu, fólk kemst ekki í sálfræðiþjónustu því það hefur ekki efni á því og börnunum okkar líður verr.
Þessu viljum við breyta.

Mosfellingar fyrir Mosfellinga
Rödd Mosfellinga er sterk á lista Viðreisnar í Suðvesturkjördæmi. Listinn er skipaður fimm Mosfellingum sem búa hér og tveimur til viðbótar sem ólust upp í Mosfellsbæ.
Valdimar Birgisson er í 5. sæti, Ester Halldórsdóttir er í 6. sæti, Elín Anna Gísladóttir er í 8. sæti, Tamar Klara Lipka Þormarsdóttir er í 10. sæti, Helgi Pálsson er í 17. sæti, Guðrún Þórarinsdóttir er í 26. sæti og Lovísa Jónsdóttir er í 28. sæti.

Kjósum framtíðina
Munum það að kosningar eru tækifæri okkar sem þjóðar að hafa áhrif á samfélagið okkar og móta það til framtíðar. Við í Viðreisn höfum skýra sýn á hvaða forgangsmál skipta máli.
Hér þarf að ná niður vöxtum og verðbólgu. Við þurfum að styrkja og endurskipuleggja heilbrigðiskerfið svo að fólk fái þá aðstoð sem það þarf en hangi ekki á biðlistum svo árum skipti – þá sérstaklega börnin okkar. Og við þurfum að búa við frelsi þar sem við fáum, hvert og eitt okkar, að vaxa og dafna og leggja okkar til samfélagsins.

Því bið ég ykkur kæru Mosfellingar að hafa okkur í Viðreisn í huga þegar þið gangið inn í kjörklefann. Setjum x við C og kjósum þá sem þora að breyta því sem ekki þjónar sínum tilgangi lengur.

Elín Anna Gísladóttir

Að eldast með reisn

Guðmundur Ingi Guðbrandsson

Við Vinstri græn leggjum ríka áherslu á öflugt velferðarkerfi sem grípur og sinnir öllum aldurshópum. Eldra fólk á rétt á góðri þjónustu sem og að því sé mætt af virðingu og skilningi.
Í ríkisstjórnartíð Vinstri grænna hófum við umbætur í þjónustu við eldra fólk. Grunnhugsunin er sú að eldra fólk er ekki byrði á samfélaginu heldur hefur það ótvírætt virði.

Það á að vera gott að eldast
Aðgerðaáætlunin „Gott að eldast“ er samstarfsverkefni félags- og vinnumarkaðsráðuneytis og heilbrigðisráðuneytis sem ég fékk samþykkta á Alþingi. Hún felur í sér grundvallarbreytingu á fyrirkomulagi þjónustu við eldra fólk með það að markmiði að veita betri og heildstæðari þjónustu, gera fólki kleift að búa lengur heima hjá sér, efla dagdvalir og endurhæfingu og draga úr þörf á hjúkrunarrýmum. Þessi vinna er hafin með þróunarverkefnum víða um land.

Bætum kjör þeirra sem minnst hafa
Annað forgangsverkefni er að hækka framfærslu þeirra í hópi eldra fólks sem minnstar tekjur hafa. Við tökum skref í þá átt í fjárlögum næsta árs að mínu frumkvæði, þar sem almennt frítekjumark ellilífeyris verður hækkað.
Þessu þarf að fylgja eftir með frekari kjarabótum á næsta kjörtímabili. Markmiðið á að vera að ellilífeyrir þeirra sem engar aðrar tekjur hafa sé aldrei lægri en lágmarkslaun.

Aukum samskipti kynslóða
Ég hef einnig talað fyrir því að efla tengsl milli kynslóða, þar sem hin yngstu í samfélaginu geta lært af reynslu og visku þeirra eldri.
Sjálfur naut ég þeirrar gæfu í æsku að umgangast ömmu mína á hverjum degi. Þessi samskipti eru ómetanleg, þar sem þau flytja menningu og þekkingu á milli kynslóða og skapa dýrmætan félagsskap.

Verjum velferðina
Varðstaða um velferðarkerfin og grunninnviðina eru hluti af hjartslætti okkar Vinstri grænna. Saman getum við séð til þess að Ísland verði samfélag sem tryggir heilbrigða öldrun.

Guðmundur Ingi Guðbrandsson
Varaformaður VG og skipar 1. sæti VG í Suðvesturkjördæmi

Menning í aðdraganda jóla

Hrafnhildur Gísladóttir

Í Mosfellsbæ er mikið um að vera í menningar- og listastarfi í kringum jólin.
Fyrst ber að nefna frábæran jóla-listamarkað í Listasal Mosfellsbæjar, þar sem yfir 50 listamenn sýna og selja list sína. Hugmyndin að þessari samsýningu kom frá íbúa bæjarins og var lögð fyrir menningar og lýðræðisnefnd sem samþykkti að í stað hefðbundinnar listasýningar í desember, yrði prófað að hafa samsýningu margra listamanna, eins konar listaverkajólamarkað.
Óhætt er að segja að vel hefur tekist til með fjölbreytni verka og hvetjum við alla Mosfellinga að gefa sér tíma til að kíkja á þennan markað sem stendur til 20. desember.

Um næstu helgi verða ljósin tendruð á jólatrénu okkar á Miðbæjartorgi með fjölbreyttri og skemmtilegri dagskrá. Hlégarðs­tún er prýtt jólaljósum, en hugmyndin um Jólagarð við Hlégarð var ein af þeim hugmyndum sem kosnar voru til framkvæmdar í lýðræðisverkefninu Okkar Mosó 2021.

Fjölbreyttar uppákomur verða í garðinum á aðventunni og vel þess virði að brjóta upp skammdegið og heimsækja Hlégarðstúnið í aðdraganda jólanna. Einnig verður mikið um að vera í félagsheimilinu okkar, Hlégarði. Þar má nefna jólamarkað, listaskólinn heldur jólatónleika svo eitthvað sé nefnt og að sjálfsögðu mögnuð skötuveisla á Þorláksmessu.

Gaman hefur verið að fylgjast með og fá að taka þátt í að styðja við þær frábæru hugmyndir sem koma frá íbúum í að skapa það blómlega menningar- og listalíf sem er í bænum og hversu vel íbúar mæta og taka þátt í því sem er að gerast í Mosfellbæ. Öflugt menningarlíf gerir mannlífið í Mosó betra.

Hrafnhildur Gísladóttir,
formaður menningar- og lýðræðisnefndar Mosfellsbæjar

Nýtt upphaf með Samfylkingunni

Þórunn Sveinbjarnardóttir

Við kjósum til Alþingis á laugardaginn 30. nóvember. Kosningar, sem boðað var til þegar stjórnarflokkarnir þrír sprungu endanlega á limminu eftir sjö ár af brokkgengu samstarfi.
Á laugardaginn gefst kjósendum langþráð tækifæri til að stokka upp í stjórnmálunum. Það skiptir máli fyrir framtíð Íslands að nýta það vel.

Undir forystu Kristrúnar Frostadóttur hefur Samfylkingin kynnt þrjú veigamikil útspil í kosningabaráttunni. Þar eru stefnumál og markmið sem við höfum sett okkur í þéttu samráði við fólkið í landinu.
Við lofum ekki töfralausnum og erum alveg hreinskilin með að við þurfum tvö kjörtímabil til að marka Íslandi nýja og betri framtíð. Þá framtíð þarf að marka í ríkisstjórn sem Samfylkingin leiðir.

Örugg skref
Samfylkingin ætlar að setja heilbrigðisþjónustu og málefni aldraðra í hæsta forgang með því að taka örugg skref að betra og öruggara aðgengi að heilbrigðiskerfinu og vinna upp halann sem myndast hefur í uppbyggingu hjúkrunarrýma. Það hefur reynst kostnaðarsöm vanræksla.
Hver einasti íbúi hér á landi þarf að fá fastan heimilislækni. Það eitt eykur öryggi og lækkar kostnað í heilbrigðiskerfinu. Nú hefur aðeins helmingur landsmanna

Alma D. Möller

aðgang að föstum heimilislækni. Þetta viljum við laga á tveim kjörtímabilum.

Krafa um árangur
Samfylkingin gerir kröfu um árangur í samgöngu- og atvinnumálum. Það þarf ekki að fara mörgum orðum um innviðskuldina sem bíður okkar í samgöngum um allt land.
Mesta fólksfjölgun í Evrópu og rúmlega tvær milljónir ferðamanna á ári hafa reynt á samgöngukerfið svo um munar. Fjárfesting í samgöngum þarf að hækka um helming og nema 1% af vergri landsframleiðslu.
Við viljum líka ljúka uppbyggingu betri almenningssamgangna á höfuðborgarsvæðinu. Þó fyrr hefði verið.

Umbætur á húsnæðismarkaði
Samfylkingin vill ráðast í bráða­aðgerðir svo að stærri hluti íbúðarhúsnæðis nýtist sem heimili fólks fremur en fjárfestingarvara hinna efnameiri.
Við viljum ná stjórn á Airbnb, herða eftirlit og takmarka heimagistingu við lögheimili eða sumarbústað. En 90 daga reglan verður að sjálfsögðu áfram í gildi. Við leggjum til að gististarfsemi í atvinnuskyni verði aðeins í samþykktu atvinnuhúsnæði en ekki íbúðarhúsnæði, óháð því hvenær rekstrarleyfi var gefið út.
Samfylkingin stendur með ungu fólki og vinnandi fjölskyldum og auðveldar þeim að koma sér þaki yfir höfuðið.

Til grundvallar allri okkar pólitík liggur jafnaðarstefnan og hugsjónir hennar um algild mannréttindi og frelsi einstaklingins í samfélagi þar sem öll njóta velferðar og öryggis án tillits til stöðu. Í samfélagi þar sem atvinnugreinar blómstra í heilbrigðri samkeppni og gætt er að fjölbreyttri nýsköpun og framþróun okkur öllum til heilla.

Kjósum Samfylkinguna fyrir nýtt upphaf á Íslandi.

Þórunn Sveinbjarnardóttir og Alma D. Möller
eru í framboði fyrir Samfylkinguna í Suðvestur­kjördæmi í alþingiskosningunum 30. nóvember.

Miðflokkurinn – fyrir framtíðina

Lóa Jóhannsdóttir

Landsmenn eru orðnir þreyttir á stöðunni í íslenskum stjórnmálum. Það er vegna þess að stjórnmálaflokkar gleyma oftast að hlutverk þeirra er að þjóna samfélaginu og gæta hagsmuna allra landsmanna.
Stjórnmál eiga ekki að snúast um hagsmuni eða pólitík flokka, heldur um velferð þjóðarinnar á grunni skýrrar hugmyndafræði. Þess vegna viljum við Miðflokksmenn breyta stöðunni í efnahags-, útlendinga- og orkumálum en einnig í húsnæðismálum þar sem ráðist verði á rót vandans. Það þarf að rjúfa áratuga kyrrstöðu í nauðsynlegri uppbyggingu samgöngumannvirkja á höfuðborgarsvæðinu í stað þess að festa okkur í vítahring óraunhæfra og kostnaðarsamra hugmynda borgarlínunnar. Hugum að nokkrum þáttum:

1. Setjum þjóðina framar flokkspólitík
Miðflokkurinn vill endurskoða hvernig við hugsum um stjórnmál. Við stöndum fyrir innihald umfram umbúðir og viljum hætta að fylgja úreltri hugmyndafræði prinsipplausra stjórnmála. Þess í stað viljum við leggja áherslu á lausn aðkallandi verkefna á grundvelli þess hvað sé skynsamlegt að gera. Við viljum flokk sem forgangsraðar í þágu fólksins og grunnkerfa samfélagsins.

2. Heildstæð nálgun á efnahagsmál og atvinnulíf
Miðflokkurinn vill tryggja að skattpeningar fari í það sem skiptir okkur raunverulega máli – heilbrigðisþjónustu, menntun og velferð. Til þess er nauðsynlegt að draga úr óþarfa útgjöldum og stöðva viðvarandi halla á ríkissjóði undanfarinna ára. Um leið viljum við Miðflokksmenn efla nýsköpun og styrkja sjálfstæði atvinnulífsins enda verður engin velferð án verðmætasköpunar.

3. Ábyrg innflytjendastefna sem tekur mið af íslenskum veruleika
Miðflokkurinn telur að innflytjendastefna eigi ekki að byggjast á skyndiákvörðunum undir pólitískum þrýstingi. Þvert á móti á hún að vera ábyrg, mannúðleg og í samræmi við það sem íslenskt samfélag getur staðið undir.
Nauðsynlegt er að endurskoða lög um hælisleitendur, þá þannig að þau taki mið af getu samfélagsins til að taka á móti hælisleitendum í stað óstjórnar síðustu ára. Um leið þarf að vera til kerfi sem tryggi að nýir íbúar landsins fari eftir lögum og virði okkar samfélag. Þar með verðum við betur í stakk búin til að bæta þjónustu og stuðning við þá sem þurfa mest á hjálp að halda.

4. Velferð sem stuðlar að jafnrétti fyrir alla
Velferðarkerfið okkar þarf að vera öryggisnet fyrir alla, ekki aðeins þá í neyð. Miðflokkurinn vill bæta þjónustu fyrir aldraða, þá sem hafa sérstakar þarfir og fjölskyldur. Við viljum samfélag þar sem allir hafa aðgang að heilbrigðisþjónustu, menntun og öryggi, samfélag þar sem börn geta alist upp í umhverfi sem styður við velferð þeirra.

5. Sjálfbær framtíð og raunhæf
Miðflokkurinn styður umhverfisvernd byggða á vísindum og heilbrigðri skynsemi og nýjustu tækni. Við teljum mikilvægt að nýta umhverfisvæna innlenda orku til að auka lífskjör á Íslandi. Við getum aukið orkuframleiðslu, bætt flutningskerfið og nýtt virkjanir og orkukosti betur til að bæta kjör landsmanna.

Miðflokkurinn – flokkurinn fyrir framtíðina
Ég býð mig fram fyrir Miðflokkinn til að byggja samfélag sem við getum öll verið stolt af.
Ef þú vilt sjá breytingar og tryggja að Ísland verði fyrir okkur öll, þá er Miðflokkurinn rétta valið fyrir þig. Við getum gert betur og við eigum að krefjast þess að stjórnmál snúist um hagsmuni þjóðarinnar. Við eigum það öll skilið.

Lóa Jóhannsdóttir.
Höfundur er Mosfellingur og er í 6. sæti á lista Miðflokksins í Suðvesturkjördæmi.