Kvenfélagskonur undirbúa árlegar skreytingar í miðbænum.   Mynd: RaggiÓla

Bæjarhátíðin Í túninu heima verður haldin 28. til 31. ágúst og fagnar hátíðin 20 ára afmæli í ár. Dagskráin er fjölbreytt og glæsileg að vanda.
Hátíðin verður formlega sett á hátíðardagskrá í Hlégarði á fimmtudegi. Þá fer fram útnefning bæjarlistamanns og veittar verða umhverfisviðurkenningar.

Allir taka þátt
Íbúar, félagasamtök og fyrirtæki leggja sitt af mörkum til hátíðarinnar og dagskráin er þannig úr garði gerð að allir ættu að finna eitthvað við sitt hæfi. Mosfellingar prýða hús og garða í litum hverfanna fjögurra og skapa þannig sérstakt svipmót í bænum. Líkt og undanfarin ár verður hægt að njóta fjölda góðra tónleika í görðum bæjarins, en „Mosfellingar bjóða heim“ er eitt af sérkennum hátíðarinnar. Listamenn bæjarins taka einnig þátt með því að opna vinnustofur sínar og bjóða gesti velkomna.
Í garðinum við Hlégarð verður glatt á hjalla á föstudag og kjörið að staldra þar við áður en skrúðgangan leggur af stað frá Miðbæjartorgi með hestamannafélagið Hörð í fararbroddi. Leiðin liggur í Ullarpartý í Álafosskvos, þar sem Mosfellingar sameinast í brekkusöng. Björgunarsveitin Kyndill kveikir á blysum og baðar kvosina í bleikum lit.
Eftir að hafa notið fjölbreyttrar dagskrár vítt og breitt um bæinn á laugardag safnast íbúar Mosfellsbæjar í götugrill í skreyttum götum bæjarins. Í tilefni af 20 ára afmæli hátíðarinnar styrkir Mosfellsbær skipuleggjendur götugrilla með pylsum og pylsubrauðum, auk þess sem trúbadorar munu sjá um að skapa stemningu. Þegar fer að dimma geta bæjarbúar séð Helgafell uppljómað í hátíðarbúning.

Breytingar á fjölskyldutónleikunum
Einn af hápunktum hátíðarinnar hefur verið sá að Mosfellingum og gestum þeirra er boðið á fjölskyldutónleika á bæjartorginu. Í ár var ákveðið að flytja fjölskyldutónleikana frá laugardagskvöldi til seinni parts á sunnudegi og halda þá á Hlégarðstúninu. Tilgangur þess er að leitast við að brjóta upp það mynstur sem sést hefur síðastliðin tvö til þrjú ár. Frá árinu 2022 hefur fjöldi gesta undir lögaldri sem voru einir á ferð í Mosfellsbæ aukist verulega. Sú þróun náði hápunkti í fyrra sem kallaði á aukna löggæslu, kaup á öryggisgæslu, aukna viðveru barnaverndarstarfsmanna og athvarf fyrir þá unglinga sem þurftu aðstoð.
Þessi breyting hefur vakið upp ólík viðbrögð meðal bæjarbúa, en markmiðið er að tryggja jákvæða og fjölskylduvæna stemningu á hátíðinni.

Heilsueflandi hátíð að vanda
Að vanda eiga íþróttir sinn mikilvæga sess á dagskrá hátíðarinnar.
Tindahlaup Mosfellsbæjar er eitt vinsælasta utanvegahlaup landsins. Tindahlaupið er samstarfsverkefni Mosfellsbæjar, Björgunarsveitarinnar Kyndils og blakdeildar Aftureldingar.
Fellahringurinn verður haldinn í sjöunda sinn, en í honum er hjólað um stíga og slóða umhverfis fellin í Mosfellsbæ.
Hundahlaupið fer fram í annað sinn í Mosfellsbæ, en markmið þess er að kynna öðruvísi nálgun á útivist með hundum.
Ný fjölskyldufjallahjólabraut verður opnuð í Ævintýragarðinum og þá verður haldið skákmót í Varmárskóla en opnar skákæfingar hefjast þar nú í haust. Fótboltamót Aftureldingar og Gæðabaksturs fyrir 7. og 8. flokk karla og kvenna verður haldið á Tungubökkum.
Þá verður síðasta umferðin í Íslandsmótinu í motocross haldin í hinni stórkostlegu braut MotoMos í Leirvogstungu.

Fyrir börn og ungmenni
Margt verður um að vera fyrir börnin á bæjarhátíðinni.
Sirkus Ananas stýrir skemmtilegri sirkussmiðju á uppskeruhátíð sumarlesturs bókasafnsins á miðvikudag, og á laugardag verður ÞYKJÓ með skemmtilega smiðju í bókasafninu þar sem ungir sem aldnir geta föndrað náttúrukórónur.
Brúðubíllinn sýnir í Álafosskvos, teymt undir börnum og hoppukastalar á Stekkjarflöt.
Slökkvistöðin við Skarhólabraut verður til sýnis og gestum býðst að skoða bíla, tæki og búnað slökkviliðsins í bílasal.
Ýmislegt er á dagskrá sem er ætlað ungmennum. Í Hlégarði verður slegið upp tveimur böllum, fyrir miðstig og efsta stig grunnskóla. Félagsmiðstöðin Ból stendur fyrir sápubolta á túninu við Hlégarð en sá viðburður sló í gegn í fyrra. Ungum hljómsveitum gefst kostur á að flytja tónlist sína á sviði í Álafosskvos á laugardag.

Buslandi bæjarhátíð
Í Lágafellslaug verða fjórir spennandi viðburðir. Sundlaugarkvöldið býður upp á skemmtun fyrir alla aldurshópa með Blaðraranum, Lalla töframanni og DJ Baldri. Í anddyri laugarinnar opnar samsýning Bonís og BrummBrumm. Stórtónleikar Sinfóníuhljómsveitar Íslands verða sýndir í beinni útsendingu í innilaug Lágafellslaugar á föstudagskvöld og boðið verður í sundlaugarbíó á laugardagskvöld.
Mosfellsbær og Mosfellsbakarí bjóða upp á ljúffenga afmælisköku í tilefni 20 ára afmælis bæjarhátíðarinnar fyrir utan Mosfellsbakarí á laugardag.

Hér má sjá dagsrá hátíðarinnar í heild sinni. 

Jóhanna B. Magnúsdóttir garðyrkjufræðingur lét draum sinn rætast árið 2011 þegar hún stofnaði Ræktunar- og fræðslusetur að Dalsá í Mosfellsdal. Þar eru kjöraðstæður bæði til ræktunar og námskeiðahalds, í jaðri höfuðborgarsvæðisins, upp í sveit en þó nærri þéttbýlinu.
Markmiðið með starfsemi setursins er að aðstoða fólk við að tengjast náttúrunni, efla lífræna ræktun í heimilisgörðum og að reka gróðrarstöð með lífræna grænmetisframleiðslu.

Jóhanna Borghildur er fædd í Reykjavík 31. ágúst 1946. Foreldrar hennar eru þau Steinunn Jóhannsdóttir húsmóðir og Magnús Björgvin Sveinsson bílstjóri og bóndi. Systkini Jóhönnu eru Júlíana f. 1945, Sveinn f. 1948, Kristján Már f. 1951 og Ingibjörg f. 1958.

Góðar minningar frá Snæfellsnesi
„Fyrstu árin mín bjuggum við fjölskyldan á Laugateigi í Reykjavík en ég var einnig mikið hjá afa mínum og ömmu á Syðra Lágafelli á Snæfellsnesi. Mínar allra sterkustu æskuminningar eru þaðan, við að gefa hænunum og haninn dálítið fúllyndur, leika mér við heimalninginn eða taka þátt í heyskapnum á túninu og út á engjum.
Ég var oft send með kaffið út á engjar, þá kíkti maður ofan í mógrafirnar þó ég hafði verið vöruð við og horfði á brunnklukkurnar dýfa sér ofan í vatnið. Ég fékk svo að sitja á hestunum á leiðinni heim, milli heybagganna.
Minningin um sólmyrkvann 1954 fellur mér seint úr minni, afi hafði sett sót á gler sem við notuðum til að horfa á sólina hverfa smám saman, þetta fannst mér spennandi.”

Við systkinin tókum öll þátt
„Foreldrar mínir stofnuðu nýbýlið Norðurbrún í Reykholti í Biskupstungum. Fljótlega reistu þau tvö gróðurhús þannig að ég er því að hluta til alin upp í gróðurhúsi,” segir Jóhanna og brosir. Í kringum íbúðarhúsið byggði mamma upp glæsilegan heimilisgarð sem við systkinin tókum þátt í að vinna við.
Ég var átta ára þegar ég byrjaði í barnaskólanum í Reykholti, ég naut mín vel þar, góð kennsla og frábær félagsskapur. Við krakkarnir lékum okkur úti í frímínútum þangað til Óli Möller skólastjóri blés í flautuna sína sem merki um að nú skyldi kennsla hefjast á ný.
Lítil sundlaug var í Reykholti á þessum tíma og það leið varla sá dagur að við færum ekki að synda og leika okkur þar.
Lífið á sumrin gekk út á að sinna búskapnum á Norðurbrún, sækja kýrnar, snúa heyinu, naglhreinsa timbur og sækja mjólkurbrúsana. Ég fór síðan í Héraðsskólann á Laugarvatni og eftir útskrift hóf ég störf hjá Kaupfélagi Árnesinga á Selfossi.”

Farsæl ár í Tungunum
Jóhanna kynntist eiginmanni sínum, Birni Halblaub, árið 1963. Þau eiga þrjá syni, Magnús f. 1964, Ágúst f. 1968 og Torfa f. 1972. Barnabörnin eru níu.
„Fyrstu árin bjuggum við í Reykjavík og líf mitt snerist þá mest um það að sinna börnum og heimilinu en ég starfaði einnig á leikskólanum Drafnarborg. Við færðum okkur svo um set og fluttum austur í Biskupstungur. Þar rak maðurinn minn vélaverkstæði og ég sinnti gróðurhúsunum, ræktaði þar tómata, gúrkur og kálplöntur og einnig sumarblóm til framhaldsræktunar.
Eftir farsæl sjö ár í Tungunum fluttum við í Mosfellssveitina, það var árið 1976. Þegar drengirnir okkar voru komnir á unglingsaldur þá skildu leiðir okkar Björns.”

Hefur gert margt á lífsins leið
Jóhönnu hafði alltaf dreymt um að fara í nám og lét verða af því að fara í öldungadeild Hamrahlíðarskóla og útskrifaðist sem stúdent 1990. Sama ár útskrifaðist hún af umhverfisbraut frá Garðyrkjuskóla ríkisins en hún hefur allt tíð verið mikið tengd náttúrunni.
Jóhanna hefur gert margt á lífsins leið og hefur haft mikla ánægju af að vinna með fólki. Áhugasvið hennar er fyrst og fremst á sviði umhverfismála og ræktunar í víðum skilningi og að fræða fólk um náttúruna.
Hún var ráðin sem fyrsti umhverfisfulltrúi Ferðamálaráðs og gegndi því til ársins 1993. Hún hefur verið ötul í baráttu fyrir náttúruvernd og stofnaði ásamt félögum sínum Sjálf­­­­­­­­­­­­­­­­­­­­­­­­­­­­­­boðaliðasamtök um náttúruvernd. Einnig starfaði hún hjá Náttúruverndarráði, Landvernd, Tilraunastöð Háskólans á Keldum og sem ferðamálafulltrúi fyrir Skaftárhrepp. Árið 2003 réðst Jóhanna til starfa hjá Garðyrkjufélagi Íslands sem framkvæmdarstjóri. Hún hefur einnig starfað við móttöku ferðamanna til landsins.
Jóhanna hefur ferðast mikið um hálendið bæði akandi og gangandi og tengst því sterkum böndum. Síðastliðna áratugi hefur hún verið að hjálpa fólki við að efla tengsl sín við náttúruna, vernda ósnortna náttúru og rækta grænmeti.

Félagsskapurinn mikils virði
„Þegar ég fór að leita að stað til að búa á í sveit, en þó nærri þéttbýlinu, þá var ég svo heppin að Dalsá í Mosfellsdal var til sölu. Núna í vor eru 32 ár síðan ég flutti á þennan draumastað.
Fyrstu árin starfaði ég annars staðar en ákvað svo að starfa eingöngu við framleiðslu grænmetis og fræðslu um matjurtarækt. Það var góð ákvörðun á sínum tíma en svo fyrir nokkrum árum hugsaði ég hvort ekki væri kominn tími á að hætta að rækta eitthvað annað en garðinn minn. Ég hef reyndar alltaf ræktað garðinn minn, sama hvar ég hef búið,” segir Jóhanna og brosir.
Niðurstaðan var að ræktun grænmetis og alls kyns jurta væri óaðskiljanlegur partur af lífi mínu. Ég ákvað því að bjóða vinkonum mínum að rækta í hluta af matjurtagarðinum mínum. Við værum þá saman að ala upp plöntur frá fræi til uppskeru og ræktum þá um leið félagsskapinn sem er mér mikils virði.”

Hefur mikla ánægju af að syngja
Það hefur alla tíð verið hluti af lífi Jóhönnu að sinna félagsstörfum. Hún hefur setið í stjórn FaMos, félags aldraðra í Mosfellsbæ, síðan 2019 og í febrúar sl. tók hún við sem formaður félagsins. Hún hefur einnig mikla ánægju af að syngja, var í Reykjalundarkórnum um tíma en er núna í Vorboðunum, kór eldri borgara í Mosfellsbæ og hefur verið formaður kórsins frá 2020. Hún hefur einnig starfað sem verkefnastjóri á vegum bæjarins.
Ég spyr Jóhönnu að lokum um önnur áhugamál en sönginn? „Hannyrðir og hvers kyns sköpun er einnig stórt áhugamál hjá mér. Ég er með vefstól í stofunni og hef verið að jurtalita garn til vefnaðar. Bókagerð hefur líka alltaf heillað mig og nú á síðustu árum hefur gerð vatnslita úr íslensku grjóti gripið mig og í framhaldi af því fór ég að læra vatnslitun.
Hversdagurinn minn snýst nú orðið um félagsstörf hér í Mosfellsbænum og að rækta garðinn minn hér á Dalsá, það er alltaf nóg um að vera,” segir Jóhanna og brosir er við kveðjumst.

Styrktarmótið Palla Open var haldið fimmta árið í röð í byrjun júní.
Mótið fer stækkandi ár hvert og er orðið stærsta golfmót sinnar tegundar hér á landi. Að þessu sinni voru það 244 kylfingar sem tók þátt og ríkti mikil gleði á Hlíðarvelli þennan dag í blíðskaparveðri.
Framlag Golfklúbbs Mosfellsbæjar er til fyrirmyndar en allt þátttökugjald rennur beint til málefnisins og jafnframt gefur klúbburinn alla sína vinnu í tengslum við mótið.

Draumurinn að byggja nýtt hús
Á síðustu fimm árum hefur Palla Open safnað um 16 milljónum til styrktar góðum málefnum. Stærstur hluti af þessum fjármunum hefur runnið til Reykjadals. Palla Open hefur keypt fjóra útivistarhjólastóla sem hafa heldur betur nýst vel.
Þá hafa fjölmargir styrktaraðilar gefið glæsilega vinninga í gegnum árin.
Framlag Palla Open styrkir starfsemi, uppbyggingu og aðstöðu í Reykjadal, þar sem vinátta, ævintýri og þátttaka eru í forgrunni. „Draumurinn er að byggja nýtt hús í Reykjadal,“ segir Palli Líndal sem er stórhuga.

Á myndinni eru þau Ágúst, Andrea, Bergljót, Kári, Palli og Hlín með afrakstur síðustu þriggja ára.

Við Mosfellingar eigum frábæra fulltrúa í landsliði Íslands á lokakeppni EM í fótbolta í Sviss. Cecilía Rán Rúnarsdóttir, flutti 7 ára í Mosfellsbæ og lék með Aftureldingu upp yngri flokkana og í meistaraflokki áður hún færði sig yfir í Fylki og þaðan í atvinnumennsku erlendis. Cecilía hefur átt frábært tímabil í marki Inter Milan á Ítalíu og var eftir tímabilið valin besti markvörður deildarinnar. Hafrún Rakel Halldórsdóttir ólst upp í Mosfellsbænum og lék lengi með Aftureldingu þangað til hún skipti yfir í Breiðablik og þaðan í Bröndby í Danmörku, eitt af allra bestu liðum Danmerkur. Hafrún spilar á miðjunni og er í uppáhaldi hjá stuðningsmönnum félagsins sem hrósa henni fyrir sterkt hugarfar og sigurvilja. Það verður gaman að fylgjast með þeim Cecilíu og Hafrúnu í Sviss. Þær eru frábærar fyrirmyndir fyrir ungar fótboltastelpur í Mosfellsbæ og hafa sýnt að með metnaði, dugnaði og þrautseigju er hægt að láta fótboltadrauma rætast.

Jákvæð sálfræði er aðferðafræði sem ég er persónulega mjög hrifinn af. Það að vinna með styrkleika sína, rækta þá og byggja á þeim er alveg örugglega eitthvað sem bæði Hafrún og Cecilía gera reglulega. Birna Kristín Jónsdóttir, fyrrverandi formaður Aftureldingar, sem nýlega lauk námi í jákvæðri sálfræði hefur verið að vinna með fótboltastelpum og –strákum undanfarið í því að efla andlegan styrk þeirra og styrkja jákvæða menningu í liðum þeirra. Hún bendir á að rannsóknir sýna að einstaklingar sem þekkja styrkleika sína og nýta þá daglega eru mun líklegri til þess að vera virkir í starfi og daglegu lífi og eru framtakssamari, hamingjusamari og heilbrigðari. Ég hlakka líka til að fylgjast með Birnu í framtíðinni, það er ótrúlega verðmætt fyrir okkur sem samfélag að öflugt fólk vinni í andlega þættinum með íþróttafólkinu okkar – það eflir bæði þau sem einstaklinga og alla þá hópa sem þau tilheyra.

Heilsumolar Gaua
Mosfellingur 3. júlí 2025

Laugardaginn 14. júní bjóða Blikastaðir gestum í heimsókn. Hægt verður að kynna sér fyrirhugaða uppbyggingu á svæðinu og njóta veitinga og skemmtunar.
Mosfellingurinn Dóri DNA hefur að undanförnu verið fenginn sem ráðgjafi í málefnum Gamla bæjarins á Blikastöðum sem hann segir eiga eftir að vaxa sem skæsleg miðstöð þjónustu.

Horfa inn í framtíðina
„Ég hef verið með Blikastaðalandið á heilanum síðan ég heyrði af fyrirhugaðri uppbyggingu,“ segir Dóri. „Síðan um jólin hef ég verið í samtali við bæjarbúa um hvað þeim finnst að ætti að koma þarna og það segja allir það sama, einhvers konar kaffihús, eitthvað fyrir börnin og svo eru Mosfellingar auðvitað mjög uppteknir af kryddbrauðinu.
Þess vegna er planið að bjóða í heimsókn og að fá Baunir og ber til að hella upp á latté, Leikhópinn Lottu og sjálfur ætla ég að taka að mér pizzubaksturinn. Þetta er líka kannski viðleitni til að horfa inn í framtíðina á Blikastöðum.“

Áhugasamir geti upplifað svæðið
„Mér fannst bara kjörið að gera eitthvað sumarlegt og eitthvað mjög mosfellskt, sem minnir samt á eitthvað mjög töff í Kaupmannahöfn.
Svo það sé á hreinu, þá er kryddbrauðið ekki eitthvað sem maður lærði í heimilisfræði og er borðað með feitum bita af smjöri. Þetta er í raun kross-afbrigði pizzu og brauðstanga með mjög spes-umami-kryddblöndu. Þetta gerir alla gjörsamlega brjálaða sem smakka þetta. Vonandi sér maður sem flesta – gamla kryddbrauðs-unnendur sem og nýliða.
Kannski að stóra atriðið sé að nú gefst bæjarbúum og öllum sem áhuga hafa tækifæri á að labba um svæðið með hönnuðum og soldið upplifa þetta.“
Dagskráin er frá kl. 12:30 til 17:00.

Á dögunum opnaði verslunin Delí í Kjarnanum, Þverholti 2.
Það eru þau Przemyslaw Kosiorowski, Mateusz Kubas og Izabela Grajewska sem reka verslunina, en þau koma öll frá Póllandi þó að Izabela hafi búið lengur á Íslandi en í Póllandi.
„Hugmyndin kom frá manninum mínum og besta vini hans, við tókum höndum saman og fórum í þetta verkefni. Við fundum húsnæði, fengum öll leyfi, svo var farið í að panta inn vörur og svoleiðis og að finna góða birgja með þær vörur sem okkur langaði að bjóða upp á. Þetta gekk allt saman vel og á endanum náðum við að opna,“ segir Izabela Grajewska.

Fjölbreytt og öðruvísi vöruval
„Okkar sérstaða er kannski að við erum með öðruvísi vöruúrval en í öðrum verslunum, við flytjum inn mikið af vörum beint frá Póllandi, Úkraínu, Litháen og eitthvað frá Þýskalandi.
Við erum með góðan birgja erlendis með gæðavörur. Við erum einnig með úrval af ferskvöru frá Íslandi og svo erum við alltaf með nýbakað brauð og bollur á hverjum degi. Við ætlum okkur svo að vera með heitan kjúkling, tilbúnar samlokur og í framtíðinni heimilismat sem verður lagaður hér á staðnum. Það er verið að vinna í því að klára öll leyfi og svoleiðis í sambandi við það,“ segir Izabela sem vonast til að geta boðið upp á þessa þjónustu sem fyrst.

Skemmtilegt app í Delí
Þau í Delí hafa nýverið látið hanna fyrir sig skemmtilegt app, viðskiptavinirnir geta tekið mynd af vörum í búðinni og fengið þar upplýsingar um vöruna, næringargildi og jafnvel hugmyndir að notkun og uppskriftir.
„Já, appið okkar hefur fengið góðar viðtökur og er þetta skemmtileg viðbót hjá okkur og fólk er að byrja að nota þetta. Ég er dugleg að afla mér upplýsinga frá viðskiptavinum hvað við getum gert betur og hvað við getum bætt. Ég er dugleg að pósta á facebook en við heitum Deli matvöruverslun, endilega líkið við síðuna okkar og fylgist með.“

Góðar viðtökur
Deli er opin alla daga vikunnar, mánudaga til laugardaga kl. 7:00-22:00 og sunnudaga kl. 11:00-22:00.
„Við erum ánægð með viðtökurnar og mér finnst alveg æðislegt að fá fólk í búðina og upplifa að fólk er tilbúið að prófa eitthvað nýtt. Hugsunin hjá okkur var að auka aðgengi að vörum sem við þekkjum frá okkar heimalandi, við vissum að það væri engin búð með þessum vörum í Mosfellsbæ og því varð þessi staðsetning fyrir valinu.
Við hvetjum Mosfellinga til að kíkja á okkur, kynna sér vörurnar sem við erum með og kynnast nýjungum og nýju bragði,“ segir Izabela að lokum.

Kosningu í lýðræðis- og þátttökuverkefninu Krakka Mosó 2025 er lokið og voru 1.179 krakkar á mið- og unglingastigi í Mosfellsbæ á kjörskrá. Alls greiddu 997 krakkar atkvæði og reyndist kjörsókn því um 85%.
Það að útfæra Okkar Mosó sem Krakka Mosó 2025 er mikilvægt skref í því að efla börn sem virka þátttakendur í lýðræðislegu samfélagi.
Verkefnið byggir á 12. gr. Barnasáttmála Sameinuðu þjóðanna sem tekur annars vegar á réttinum til að tjá skoðanir sínar og hins vegar réttinum til þess að skoðanir barna hafi vægi. Mosfellsbær vinnur nú að innleiðingu verkefnisins Barnvænt sveitarfélag í samstarfi við UNICEF á Íslandi og endurspeglar Krakka Mosó þær áherslur.

Hugmyndir fyrir þrjú opin svæði
Verkefnið fór af stað með kynningum fyrir nemendur í skólum dagana 22.–23. apríl, þar sem fræðsla var veitt um lýðræði og þátttöku. Eftir það fór fram hugmyndasöfnun í bekkjum skólanna dagana 28.–29. apríl, þar sem nemendur fengu tækifæri til að leggja fram þær hugmyndir sem þeir töldu mikilvægar fyrir þrjú opin svæði í bænum. Alls bárust rúmlega 400 tillögur.
Svæðin eru Ævintýragarðurinn, Stekkjarflöt og svæði við Rituhöfða. Hugmyndirnar gátu tengst því að gera svæðin betri, skapa eitthvað nýtt, efla hreyfingu, hafa jákvæð áhrif á umhverfi og íbúa til útivistar og samveru, bættrar lýðheilsu eða aðstöðu til leikja og skemmtunar.
Samkvæmt fjárhagsáætlun Mosfellsbæjar fyrir árið 2025 var 20 milljónum króna úthlutað til að framkvæma þau verkefni sem krakkar og ungmenni í Mosfellsbæ kjósa.

Eftirlit frá yfirkjörstórn Mosfellsbæjar
Eftir úrvinnslu hugmyndanna sem fór fram 2.–13. maí var farið í kynningu meðal nemenda á þeim tillögum sem fóru til atkvæðagreiðslu. Þær voru sex: stór aparóla, þrautabraut á vatni, pumpan, parkour þrautir, snúningsróla og að lokum blak-, padel- og tennisvöllur.
Kjördagur var 20. maí síðastliðinn og lauk kosningu á hádegi. Krakkar úr hverjum skóla fylgdust með framkvæmd og fulltrúar þeirra tóku þátt í sjálfri talningunni með stuðningi meðal annars frá fulltrúa yfirkjörstjórnar Mosfellsbæjar. Kjörkassar voru notaðir og hófst talning atkvæða kl. 13.00 og lauk 14.30.
Niðurstöður kosninganna voru tilkynntar og afhentar bæjarstjóra til framkvæmdar kl.16:00 í Helgafellsskóla sama dag.

Þrjú verkefni kosin til framkvæmda
Þrjú verkefni voru kosin til framkvæmda og var bæjarstjóra afhent niðurstaðan í Helgafellsskóla þar sem talning atkvæða fór fram. Fyrir valinu urðu:
Þrautabraut á vatni
Þrautabraut úr ýmiss konar trjábolum yfir vatn. Fyrirmyndin er vatnsþrautabrautin í Kjarnaskógi fyrir utan Akureyri. Hentar bæði börnum og unglingum.
Stór aparóla
Há og löng aparóla með upphækkuðum byrjunarpalli. Hugsuð fyrir eldri börn og unglinga. Staðsett í brekku þannig að hægt sé að ná ágætis hraða. Nógu há til þess að fæturnir rekist ekki í jörðina.
Snúningsróla
Snúningsróla með fjórum örmum og sætum. Rólan fer í hringi og upp og niður á sama tíma. Hugsuð fyrir börn frá sex ára aldri.

Verkefnin framkvæmd í sumar
Mosfellsbær vill hrósa og þakka öllu því efnilega, áhugasama og flotta unga fólki sem kom að kosningunum í Krakka Mosó og þeim sem tóku þátt. Framtíðin er aldeilis björt í Mosfellsbæ með svona flottan hóp krakka.