Vatnsleikfimi nýtur sívaxandi vinsælda

Um árabil hefur hópur fólks stundað vatnsleikfimi í Lágafellslaug og nú er ásóknin orðin slík að ákveðið hefur verið að bæta við aukatímum á þriðjudögum og fimmtudögum frá 19-20 bæði kvöldin.
Undanfarin tíu ár hefur Sigrún Másdóttir leitt starfið en hún er menntaður íþróttafræðingur með mastersgráðu í heilsuþjálfun og kennslu frá Háskólanum í Reykjavík. Mosfellingur tók Sigrúnu tali um starfið.
„Ég tók við vatnsleikfimihópnum árið 2012 og þá hafði hópurinn verið starfræktur í nokkur ár. Hópurinn samanstendur af konum á besta aldri sem líður vel í vatni í skemmtilegum félagsskap og stór hluti af hópnum hefur verið frá upphafi. Hópurinn er í Lágafellslaug alla mánudaga og miðvikudaga, eina klst. í senn. Lágafellslaug hentar einstaklega vel fyrir kennsluna þar sem færanlegur botn er til staðar”

Frábær kostur fyrir hjarta- og æðakerfi
Sigrún segir tengslin mikil á milli kvennanna, bæði systur, mágkonur og vinkonur stormi saman í laugina og hópurinn hafa stækkað jafnt og þétt í gegnum árin.
„Námskeiðin hafa verið þéttsetin síðastliðin ár þar sem áherslan er ekki einungis á fjölbreytta og áhrifaríka hreyfingu heldur ekki síður til að upplifa ánægju og gleði í góðum félagsskap.
Þjálfun í vatni er frábær kostur fyrir hjarta- og æðakerfi og blóðþrýstingur rís ekki hátt undir álagi, einnig eru litlar líkur á meiðslum.
Vatnsleikfimi hentar því flestum þar sem auðveldara er að framkvæma æfingar í vatninu en á þurru landi, líkaminn verður léttari og því minna álag á vöðva og liðamót. Fyrir þá sem glíma t.d. við gigt eða stoðkerfisvandamál er vatnsleikfimi kjörin.“

Hver og einn framkvæmir æfingar á sinni eigin getu
Sigrún þjálfaði mest handbolta á árum áður en þegar hún tók að sér hópinn í Lágafellslaug sótti hún sér innblástur og hugmyndir víðsvegar á heilsustofnunum og sundlaugum landsins þar sem vatnsleikfimi er starfrækt.
„Ég held að einhvers konar vatnsleikfimi sé nú í boði í flestum sundlaugum landsins.
Fyrir nokkrum árum kenndi ég eldri borgurum hér í Mosfellsbæ og þekki því nokkuð vel til. Ég reyni að byggja námskeiðin upp á fjölbreyttri þolþjálfun og styrktaræfingum með margs konar hjálpartækjum, þar sem hver og einn framkvæmir æfingarnar á sinni eigin getu og forsendum,“ sagði Sigrún að lokum.

KYNNING