Opnunarhátíð í Helgafellsskóla
Nemendur fengu aðstoð bæjarfulltrúa og opnuðu skólann formlega.
Komið er að því að hefja skólastarf í Helgafellsskóla tveimur árum eftir að skóflustunga var tekin að skólabyggingunni.
Í upphafi verður einn af fjórum áföngum skólans tekinn í notkun. Í sumar verður annar áfangi tilbúinn til notkunar og síðari tveir áfangarnir verða svo teknir í notkun í framhaldinu.
Þriðjudaginn 8. janúar var skrúðganga frá Brúarlandi yfir í Helgafellsskóla. Nemendur og starfsfólk skólans gengu fylktu liði og tóku með sér í krukkum hið góða og notalega andrúmsloft Brúarlands sem var svo sleppt út í Helgafellsskóla.
Bæjarfulltrúar og nemendur klipptu á borðann
Þegar í skólann var komið hófst opnunarathöfnin. Gestir voru nemendur og starfsfólk skólans, fulltrúar í ráðum og nefndum bæjarins og fulltrúar þeirra fyrirtækja sem komið hafa að byggingu skólans.
Við opnunina fluttu Haraldur Sverrisson bæjarstjóri og Kolbrún Þorsteinsdóttir formaður fræðsluráðs ávörp þar sem þau fóru yfir aðdragandann að stofnun skólans og þeirri hugmyndafræði sem skólinn mun byggja á.
Nemandi skólans, Katla Birgisdóttir, spilaði á þverflautu. Nemendur opnuðu svo skólann með formlegum hætti með aðstoð bæjarfulltrúa.
Opið hús sunnudaginn 13. janúar
Sunnudaginn 13. janúar verður opið hús í skólanum þar sem öllum bæjarbúum og öðrum þeim sem áhuga hafa á skólastarfinu er boðið að heimsækja skólann. Helgafellsskóli verður opinn frá kl. 13 til 15 og verða uppákomur og skemmtiatriði flutt af nemendum skólans.
Skólastarf hefst mánudaginn 14. janúar en í upphafi verða í skólanum um hundrað nemendur í 1. til 5. bekk en þeim mun fjölga ört á næstu misserum. Innan skamms hefst svo leikskólastarf en í upphafi verður um að ræða eina deild fyrir elstu árganga leikskólabarna.
Listaskólinn með aðsetur á staðnum
Tómstunda- og tónlistarstarf verður fléttað inn í skólastarfið og mun Listaskóli Mosfellsbæjar hafa aðstöðu til kennslu í skólanum.
Frístundastarf verður í skólanum að lokinni kennslu fyrir yngstu nemendurna og einnig munu tómstundafræðingar koma að hópefli og kennslu í félagsfærni í samvinnu við kennara skólans.
Innan skamms tíma mun verða boðið upp á félagsmiðstöðvastarf í samvinnu við félagsmiðstöðina Ból fyrir elstu nemendur skólans, starfið verður í formi klúbbastarfs og skipulagðra viðburða.
Fjölbreyttar kennsluaðferðir
Stóru línurnar í skólastefnu Helgafellsskóla verða teymiskennsla og fjölbreyttar kennsluaðferðir þar sem allir nemendur fá nám við hæfi og geta blómstrað í leik og starfi.
Næsta haust verður skólinn gerður að 200 daga skóla fyrir yngri árganga í grunnskólanum þar sem samtvinnast kennsla og frístund. Samþætting verður á námsgreinum og samvinna milli árganga. Áhersla verður lögð á lýðræði og að undirbúa nemendur sem best undir þátttöku í lýðræðisþjóðfélagi sem er í sífelldri þróun.
Skólastjóri Helgafellsskóla er Rósa Ingvarsdóttir.
