Magnús Már valinn Mosfellingur ársins

Mosfellingur ársins 2024 er Magnús Már Einarsson þjálfari meistaraflokks karla hjá Aftureldingu. Maggi, eins og hann er alltaf kallaður, afrekaði það á síðasta tímabili að koma liði sínu í efstu deild.
Þetta er í fysta skipti sem karlalið Aftureldingar spilar í deild þeirra bestu en síðasta haust átti knattspyrnudeildin 50 ára afmæli. „Ég er mjög þakklátur og snortinn að fá þessi verðlaun frá besta blaði í heimi. Fyrir mig persónulega eru þetta skemmtilegustu verðlaun sem ég hef fengið á ævinni. Hilmar ritstjóri hefði sjálfur átt skilið að fá verðlaunin fyrir magnað starf í bænum og ég vona að hann fái slíka viðurkenningu einn daginn,“ segir Maggi en hann er kvæntur Önnu Guðrúnu Ingadóttur, þau eiga von á sínu þriðja barni en fyrir eiga þau synina Einar Inga og Blæ.

Viðurkenning okkar allra
„Mér finnst þessi verðlaun vera fyrir alla sem hafa hjálpað Aftureldingu að komast upp í efstu deild. Leikmannahópurinn hefur lagt mikla vinnu á sig undanfarin ár og flestir leikmenn okkar eru uppaldir hjá Aftureldingu eða hafa verið mjög lengi hjá félaginu. Þjálfarateymið er frábært og má þar fyrstan nefna Enes Cogic aðstoðarþjálfara en hann hefur starfað með mér frá fyrsta degi og verið mér stoð og stytta.
Sjálfboðaliðarnir og stjórn meistaraflokksráðs, með Gísla formann í broddi fylkingar, eiga ótrúlega mikinn þátt í þessu líka sem og auðvitað stuðningsmenn og styrktaraðilar. Þá vil ég nýta tækifærið og þakka fjölskyldu minni fyrir stuðninginn og sérstaklega foreldrum mínum og Önnu Guðrúnu eiginkonu minni.“

Margt breyst síðan ég sat með hestunum
Maggi er uppalin Mosfellingur, hann byrjaði að æfa fótbolta með 6. flokki árið 1998 og spilaði upp alla yngri flokka í Aftureldingu og tók við sem aðalþjálfari liðsins 2019.
Það hefur verið draumur Magga frá barnæsku að sjá Aftureldingu spila í efstu deild. „Ég byrjaði að mæta á alla leiki hjá meistaraflokki 1999 og hef varla misst úr leik síðan. Ég byrjaði sem boltastrákur á Tungubökkum, sat þar fyrir aftan markið með hestunum. Svo mætti ég sem stuðningmaður, fljótlega tók ég að mér að útbúa leikskrár fyrir alla leiki, síðan varð ég leikmaður, aðstoðarþjálfari og nú þjálfari. Það hefur margt breyst síðan ég sat þarna á Tungubökkunum með hestunum, en þá var Afturelding í neðstu deild,“ segir Maggi en markmiðið var skýrt frá upphafi og það var að koma liðinu upp í efstu deild.

Viljum festa okkur í sessi í efstu deild
„Það verður mjög gaman að spila í Bestu deildinni í sumar. Efstu félögin eru nánast atvinnumannalið og við munum leggja allt í sölurnar til að standast þeim snúning með því að æfa vel og hafa umgjörðina góða.
Við höfum verið mjög heppin með styrktaraðila undanfarin ár og það er gaman að fleiri eru tilbúnir að koma í lið með okkur í þessu stóra verkefni til að við getum haldið áfram að vaxa innan sem utan vallar. Við viljum meira og næsta skref er að festa sig í sessi í Bestu deildinni því að mínu mati á Afturelding heima þar.“

Frábær stuðningur að Varmá
„Það er gríðarlega mikil spenna fyrir fyrsta leik tímabilsins gegn Breiðabliki þann 5. apríl, fyrsti heimleikurinn er svo gegn ÍBV á Malbikstöðinni að Varmá 13. apríl. Ég er viss um að við verðum með besta stuðninginn í sumar. Það er ótrúlega skemmtilegt að spila á Varmá fyrir framan okkar fólk og magnað að sjá hvað áhorfendafjöldinn hefur vaxið ár frá ári. Það er skemmtun fyrir alla fjölskylduna að mæta á völlinn. Sjáumst á vellinum,“ segir Maggi.