Hlustar fólk á þig?

Það nennir enginn að hlusta á fólk röfla á fundum og það er erfitt að hlusta á fólk í ræðustól sem er að hugsa hvað það ætlar að segja jafnóðum.
Það getur verið heilmikið vit í því sem viðkomandi vill koma á framfæri, en ef það er illa sett fram þá hættir fólk fljótt að hlusta og man ekkert af því sem sagt var.

Hvort sem það er verið að halda ræðu eða tjá sig um mál á fundum, þá er best að vera vel undirbúinn. Vita hvað maður vill segja og koma skoðun sinni eða efni á framfæri þannig að fólk hlusti og taki eftir. Það er mjög algengt að fólk byrji að undirbúa ræðu kvöldið áður en á að flytja hana. Svo eru nokkrir sem mæta algjörlega óundirbúnir, vita svona um það bil hvað þeir vilja segja en stama og endurtaka sig í sífellu þegar á hólminn er komið.
Ræður eru alls konar og af ýmsu tilefni. Sumir þurfa að flytja erindi á fundum í vinnunni, á ráðstefnum eða á námskeiðum. Fæstir eru að flytja ræður reglulega en flest myndum við vilja vera öruggari þegar persónulegir viðburðir eru í okkar nærumhverfi. Til dæmis í veislum, afmæli, brúðkaup eða skírn.
Það er alltaf gaman að hlýða á vini og vandamenn sem standa upp og tala til veislugesta, segja frá vinskap og gefa heilræði. Það er gaman þegar fólk stígur fram þokkalega undirbúið og veit hvað það ætlar að segja.

Góður undirbúningur er lykilatriði. Ef þig langar að flytja ræðu í brúðkaupi er gott að byrja á því að hugsa hvað þig langar að segja. Punktaðu niður t.d. sögur, heilræði og almennan fróðleik. Raðaðu svo efninu niður þannig að flæðið verði gott, upphaf, miðja og endir.
Upphaf ræðu þarf að vera grípandi, þú vilt að fólk hlusti á þig. Miðjan þarf að vera áhugaverð því þú vilt halda athyglinni. Lokaorðin mega gjarnan vera minnisstæð, þannig að ræðan þín sitji eftir í huga áheyrenda.

Það geta allir flutt ræðu og hjá Korpu færðu tækifæri til að þjálfa framkomu, ræðuflutning og almennt að tjá þig í hóp. Þar viðheldur fólk bæði þekkingu og þjálfun með því að mæta á fundi og bæta í reynslubankann með þátttöku í skemmtilegu starfi.

Fundir Korpu eru 1. og 3. miðvikudag í hverjum mánuði klukkan 20:00, í Safnaðarheimili Lágafellssóknar, Þverholti 3 á 2. hæð. Allir eru velkomnir á fundi og vel er tekið á móti gestum. Frekari upplýsingar um starfið má finna á powertalk.is
Næstu tveir fundir verða miðvikudaginn 7. nóvember og miðvikudaginn 21. nóvember klukkan 20.00.

Lóa Björk Kjartansdóttir
Ritari Korpu 2018-2019