Harry Potter og London baby!

Það fór fjörugur hópur frá Framhaldsskólanum í Mosfellsbæ til London þann 8. maí í Harry Potter ferð.
Þetta var hluti af nemendum úr Harry Potter áfanga sem var kenndur á vorönn 2025. Planið var að fara í leikhús að sjá Harry Potter and The Cursed Child og fara á Harry Potter safnið.
Þetta er í annað sinn sem þessi áfangi hefur verið kenndur en því miður fór hópurinn ekki út síðast þar sem fluginu var aflýst haustið 2023. Í þetta sinn var ekkert óveður sem stoppaði hópinn í að komast til London.
Nemendur leysa fjölmörg verkefni á önninni, þau eru sett í húsin eins og í Hogwarts skólanum, Slytherin, Gryffindor, Hufflepuff og Ravenclaw, þar sem þau reyna að vinna húsbikarinn. Í þetta sinn vann Gryffindor húsbikarinn þar sem þau voru stigahæsta húsið í lok annar. Nemendur lásu síðustu bókina í Harry Potter seríunni og unnu verkefni alla önnina. Svo horfðu þau á blöndu af Harry Potter myndunum ásamt því að gera fjölmörg verkefni en áfanginn er valáfangi í ensku á efsta þrepi.
Hópurinn flaug snemma út á fimmtudegi en nemendur gistu saman á hosteli og skemmtu sér vel saman 8.-11. maí í stórborginni. Þetta var dásamleg ferð í alla staði, nemendur stóðu sig með einstakri prýði og skemmtu sér vel. Þetta voru langir dagar en veðrið lék við okkur. Þau drukku í sig menninguna og nutu saman.
Ferðin var skipulögð með upplifun og menningu í huga og byggt á ferðinni sem átti fyrst að fara í. Ferðin var með þétta dagskrá en smá frjáls tími sem nemendur nýttu í að versla og skoða borgina.
Leikhúsferðin var mjög áhugaverð en leikritið er í tveimur hlutum og fjallar um tríóið Harry, Ron og Hermione , ásamt börnum þeirra og atburði í framtíðinni. Sýningin var ótrúlega flott og vel sett upp og gaman að sjá hvernig þeir útfærðu verkið og blekktu áhorfendur á meðan sýningunni stóð.
Hópurinn fór saman á British National Museum á laugardagsmorgninum en svo var flakkað um borgina og borðað saman um kvöldið.
Síðasti dagurinn fór í Harry Potter safnið. Þar var mikið að sjá og margt að skoða. Þetta var frábær endir á frábærri ferð. Ég er ótrúlega þakklát fyrir að hafa fengið tækifæri til að fara erlendis með hópinn og fá að upplifa þetta í gegnum nemendur.
Framhaldsskólinn í Mosfellsbæ leggur sig fram við að bjóða nemendum upp á áhugaverða valáfanga sem snúa að áhuga nemenda og kennara.

Helena María Smáradóttir