Fyrirmyndin Rey

Áttu dóttur? 10 ára eða eldri? Bjóddu henni með þér á nýju Star Wars myndina. Þar fær hún að sjá virkilega öflugar fyrirmyndir. Heilsteyptar, yfirvegaðar, öruggar, leitandi, traustar og hugaðar konur sem eru í lykilhlutverkum í myndinni. Rey, aðalpersóna myndarinnar, fer þar fremst í flokki.

Það sem mér fannst best við kvenpersónurnar í myndinni var að þær eru fyrst og fremst persónur í stað þess að vera stillt upp sem kynþokkafullum gyðjum. Myndin snýst um jafnvægi, baráttu milli góðs og ills, á mörgum sviðum. Ég er enginn Star Wars aðdáandi og hef held ég bara séð fyrstu myndina – eða þá fjórðu, eftir því hvernig maður telur þær. Það var fyrir mörgum tugum ára. En þessi mynd er virkilega góð, það eina slæma við hana er íslenska hléið sem rífur mann hratt og örugglega út úr myndinni og hendir inn í raunheima með krafti. En maður var reyndar snöggur að komast aftur inn í myndina eftir hléið, hún er það grípandi.

Ég fór með 15 ára syni mínum. Þeir eldri voru búnir að sjá hana og sá yngsti aðeins of ungur enn. Ég á engar dætur en hefði að sjálfsögðu tekið þær með. Ég á litla frænku, en hún er bara tveggja ára og því nokkur ár í að hún fái að horfa á myndina. Kvikmynd eins og þessi sem gerir ekki út á týpísk hlutverk kynjanna, eins og oft verður í bíómyndum, ætti að vera skylduáhrif fyrir alla sem hafa aldur til. Hún sýnir manni að kynið skiptir ekki máli þegar kemur að því að hugsa, læra, meta aðstæður og taka yfirvegaðar ákvarðanir.

Hún sýnir manni að það sem skiptir máli er að vera trúr sjálfum sér og sínu fólki, þora að fylgja eigin samvisku, trúa á það sem skiptir máli og láta ekki aðra fara illa með sig.

Heilsumolar Gaua
Mosfellingur 21. desember 2017