Kraftlyftingafólk úr Mosfellsbæ hefur náð glæsilegum árangri á mótum síðustu vikur, bæði hér heima og erlendis. Meðal þess sem ber hæst er Norðurlandameistaratitill, fjöldi Íslandsmeta og sterk frammistaða á Íslandsmóti unglinga.
Guðrún Ásgeirsdóttir varð Norðurlandameistari á móti sem fram fór í Finnlandi í september síðastliðnum. Hún var jafnframt önnur stigahæst í sínum flokki og skilaði þar með frábærum árangri á sterkum alþjóðlegum vettvangi.
Á Íslandsmóti unglinga á Akureyri stóð Helgi Kristberg upp úr. Hann sigraði í -105 kg flokki, setti alls ellefu Íslandsmet og varð annar stigahæsti keppandi mótsins. Árangurinn undirstrikar miklar framfarir hjá Helga og lofar góðu fyrir framhaldið.
Guðmundur Logi Ólafsson átti sömuleiðis gott mót á Akureyri og hafnaði í öðru sæti í -83 kg flokki. Hann bætti sinn besta árangur í öllum greinum og hélt þannig áfram góðri þróun.
Þá tekur Guðný Björk Stefánsdóttir þessa dagana þátt í heimsmeistaramóti í Kína, stærsta sviði kraftlyftinganna.
Árangurinn sýnir vel þá öflugu starfsemi sem byggst hefur upp í kringum kraftlyftingar í Mosfellsbæ og þann metnað sem er til staðar hjá iðkendum.
Kraftlyftingafélag Mosfellsbæjar stendur þó frammi fyrir þeirri áskorun að finna hentugt húsnæði í Mosfellsbæ fyrir starfsemina. Leitað er nú að aðstöðu sem rúmar æfingar og áframhaldandi uppbyggingu félagsins.
Það er því ljóst að þótt árangurinn sé þegar glæsilegur er metnaðurinn áfram mikill, bæði á keppnispallinum og í uppbyggingu starfsins hér í Mosó.
