Haustið er tíminn – Fimm ráð til að koma sér af stað

Helstu kostirnir við að gera líkamsrækt að lífsstíl og stunda daglega eru aukið heilbrigði, andleg og líkamleg vellíðan.
Þegar við breytum slíkum lifnaðarháttum þá fylgir aukin orka, ónæmiskerfið verður sterkara, bætt sjálfsmynd og aukið sjálfstraust.

Hér eru fimm kostir þess að stunda reglulega líkamsrækt og hreyfingu allt árið.

1. Bætir skapið og styrkir ónæmiskerfið
Þarftu að fá útrás? Eða þarftu að losa um streituna eftir erfiðan dag? Iðkun líkamsræktar eða ganga 30 mínútur rösklega getur hjálpað við að losa um streitu.
Líkamsrækt örvar ýmis efni heilans sem gera þig tilfinningalega hamingjusamari og hefur áhrif á eigin vellíðan sem gerir það að verkum að við verðum enn skapbetri í skammdeginu. Ónæmiskerfið styrkist með daglegri líkamsrækt og hreyfingu. Sjálfstraust og vellíðan á líkama og sál eykst.

2. Borðaðu á þriggja tíma fresti
Borðaðu á tveggja til þriggja tíma fresti til að halda brennslunni gangandi. Þegar þú ætlar að taka þig verulega á þá er nauðsynlegt að skera niður sætindi, gosdrykki, kex og kökur.
Allt er þó leyfilegt einu sinni í viku á nammidegi (t.d. á laugardögum). Verið dugleg að drekka nóg af vatni yfir allan daginn og einnig meðan á æfingu stendur. Vatn er allra meina bót.

3. Haltu matardagbók
Mjög gott er að halda utan um mataræðið sitt með því að skrifa matardagbók. Með því að halda matardagbók fær maður betri yfirsýn yfir það sem maður lætur ofan í sig og hefur betri yfirsýn yfir fæðuval.
Ég mæli með að borða fimm til sex máltíðir á hverjum degi. Það er morgunmatur, millimál, hádegismatur, millimál, kvöldmatur og kvöldsnarl.

4. Betri svefn
Áttu í erfiðleikum með svefn? Regluleg hreyfing getur hjálpað þér að sofna og dýpkar svefn þinn. Stundaðu líkams- og heilsurækt daglega og þú munt finna mun á svefninum.
Þegar við stundum meiri hreyfingu þá þurfum við meiri svefn. Svefnleysi getur m.a. stuðlað að því að þú borðar meira og finnur frekar til svengdar. Því er nauðsynlegt að ná góðum svefni til að ná meiri árangri í heilsurækt.

5. Betra kynlíf
Finnst þér þú vera of þreytt/ur eða langar ekki að njóta líkamlegrar nándar við maka þinn? Regluleg líkamsrækt getur haft jákvæð áhrif á kynlíf þitt. En það er meira en það. Regluleg hreyfing getur valdið aukinni örvun fyrir konur.
Karlmenn sem æfa reglulega eiga minni líkur á að lenda í vandræðum með ris­truflanir en þeir sem nýta ekki orkuna í að stunda reglulegt kynlíf. Kynlíf er hollt fyrir líkama, nándina og sálina.

Líkamsrækt er lífstíll
Íþróttir og líkamsrækt er besta og skemmtilegasta leiðin til að varðveita eigin heilsu. Við eigum aðeins einn líkama og heilsan okkar er það dýrmætasta sem við eigum. Líkamsrækt gefur þér tækifæri til að slaka á og njóta lífsins sem gerir þig hamingjusamari. Aukin líkamsrækt getur einnig hjálpað þér að tengjast betur fjölskyldu eða vinum í skemmtilegu félagslegu og hvetjandi umhverfi.

Ég vil hvetja þig kæri lesandi að byrja strax að hreyfa þig. Gangi þér vel!

Unnur Pálmarsdóttir, MBA
Mannauðs- og markaðsstjóri Reebok Fitness