Skólahald á Blikastaðalandi

Nú styttist í að deiliskipulag Blikastaðalands verði tekið til umræðu og staðfestingar og þá þarf að taka ákvarðanir er snúa að uppbyggingu innviða á svæðinu.
Eitt af því sem þarf að skoða er hvernig uppbygging t.d. skólamannvirkja á að vera. Ljóst er að uppbygging þessara mannvirkja hleypur á milljörðum króna og því skiptir máli að uppbyggingin sé eins skynsamleg og hagnýt og hægt er.
Skólahúsnæði á að vera hjartað í hverfinu, þar slær takturinn og fólk streymir að þegar skemmtanir og annað uppbrot á sér stað. Rekstrarlega skiptir einnig máli að húsnæðið sé í notkun eins mikið og hægt er á degi hverjum.
Sem dæmi má nefna að hægt er að samnýta húsnæði fyrir grunnskóla, frístund, félagsmiðstöð og jafnvel hafa íþróttahús sambyggt við. Öll þessi starfsemi gengur upp í sama húsinu, sérstaklega ef gert er ráð fyrir henni í upphafi. Það er því hægt að koma því þannig fyrir að þessi starfsemi fái sitt sjálfstæði í húsinu og sé ekki fyrir öðrum.

Skipulag innviða
Ég hef bent á það og talað fyrir því að uppbygging innviða verði sem mest á þann veg að börn sem búa í hverfinu komist sem lengst og mest fótgangandi eða á hjóli innan þess.
Í ýmsum greinum sem birst hafa í vetur, t.d. eftir Ásdísi Hlökk Theodórsdóttur skipulagsfræðing, eru þessi hverfi kölluð 20 mínútna hverfi. En þau hverfi eru byggð upp á þann veg að innan 20 mínútna eigirðu að komast í alla þjónustu sem þú þarft. Ástæðan er einföld.
Við vitum að umferðin í kringum hverfið verður gríðarlega þung á fyrstu árunum og því þarf að leita allra leiða til að auka ekki á hana, meira en þarf. Með þessari skipulagskenningu einföldum við einnig líf foreldra sem geta nýtt tímann sinn í annað en að skutla börnum sínum fram og til baka. Hugmyndir um 20 mínútna hverfi minnka einnig álag á aðra innviði í sveitarfélaginu, t.d. Varmársvæðið.
Við sjáum það öll í hendi okkar að það svæði ber ekki nemendur tveggja stórra grunnskóla til viðbótar við alla aðra þjónustu. Því skiptir máli að hugsa um innviði á Blikastaðalandi með þeim hætti að svæðið verði sjálfstætt. Þar rísi fullvaxið íþróttahús. Ekki lítið kennsluíþróttahús sem dugar hvað best yngsta stigi og miðstigi grunnskóla, eins og hefur verið gert við tvo grunnskóla bæjarins, sem veldur því að keyra þarf unglingana í Varmá.
Hvaða skoðun sem við höfum á samningnum um uppbyggingu á Blikastöðum þá skiptir mestu máli að uppbyggingin fari eins mikið fram á okkar forsendum og hægt er, svo fjárhagslegu jafnvægi sveitarfélagsins sé ekki teflt í tvísýnu.

Dagný Kristinsdóttir
Bæjarfulltrúi Vina Mosfellsbæjar