Foreldrar þurfa bara að redda þessu — aftur(!)

Mosfellsbær hefur hampað sér fyrir að vera með lægstu leikskólagjöldin á höfuðborgarsvæðinu — en á sama tíma er þjónustan að skerðast fyrir foreldra og börn.
Má þar nefna fyrirkomulag sumarleikskólans sem er enn ein skerðingin sem foreldrar átta sig jafnvel ekki enn á.

Tilgangur sumarleikskólans er nefnilega ekki að koma til móts við fjölskyldurnar í Mosfellsbæ heldur fyrst og fremst að bæta starfsumhverfi leikskóla. Þetta veldur því að hefðbundið skólastarf hefst nú viku seinna en vanalega eða 11. ágúst.
Þó svo að þátttaka í sumarleikskólanum hafi dregist saman er ekki þar með sagt að foreldrar þurfi ekki á þjónustunni að halda.
Þvert á móti eru margir hikandi því það er ekki auðveld ákvörðun að senda barnið sitt í nýjan leikskóla, með starfsmanni sem þekkir það ekki, í heila viku eða lengur. Sér í lagi börn með sérþarfir eða þau sem eiga erfitt með breytingar og nýjar aðstæður.

Það er auðvelt og jafnvel sjálfsagt að Mosfellsbær sé með lægstu leikskólagjöldin þegar skerðingarnar á föstudögum og óvissan með sumarleikskólann eru teknar með í myndina. Bæjarstjórn þarf hins vegar líka að horfa á heildarmyndina: Flestir vinna í Reykjavík og ekki allir hafa au-pair eða ömmu og afa á lausu sem geta hlaupið undir bagga til aðstoðar.
Alla jafna er fólk með 25 sumarfrísdaga sem þarf að deila yfir sumarið – að undanskildum vetrarfríum, starfsdögum og blessuðu skráningardögunum sem við gleymum allt of oft að sækja um. Þeir eru efni í annan pistil.
Það er nefnilega eitt að vera með lægstu leikskólagjöldin á landinu en það er annað að bjóða raunverulega þjónustu sem fjölskyldur geta reitt sig á.
Hægt væri að líkja þessu við auglýsa bestu opnunartímana í verslun – en standa svo með tómar hillur.

Foreldrar vilja geta treyst á þá þjónustu sem bæjarfélagið á að veita – þjónustu sem gerir fjölskyldum kleift að láta daglegt líf ganga upp. Ekki aðeins með því að lágmarka kostnað á blaði heldur með raunverulegum stuðningi sem nýtist í verki – þess þá heldur ef Mosfellsbær ætlar að skreyta sig með þeim stimpli að vera barnvænt sveitarfélag.

Guðfinna Birta Valgeirsdóttir